ခါန် 7
လွင် အာဆာထေဖာန် ဟုဝ် ဒါရာ
1 ဝါယ် အန် တီ ဒါ တာင် အီ အိုပ် တူတ့် ဒူအီ အီ လှူ ဒီ ဇဝ်ဖြာ ဝီ ဒီမွှတ် အာဆာထေဖာန် တဝ်း၊ “န့ မှာန်၊ ဂြုဝ်း ပီ ကာလာင် ဂေ။း”
2 အာဆာထေဖာန် ဝီ ဝျီ့ ဂြုဝ်း အန် တီ တဝ်း၊ “အိုယ် ဘေ ဒါ တာင် ဘော ဘေ ဘီနွင် အုဝ်။ ဇဝ်ဖြာ အီ မိုဝ်း အာဖုင် ဒင်ခုဝ် တာင်၊ အန် ဟဲ့ တး ကာပ့လုး ဒီ အာဘြာဟမ် အီ မုး ဂုန့် ဒင် အေ။ ဇဝ်ဖြာ ဟဲ့ ကာပ့လုး ဒီ အန် ဒေါ ဆီ ကွယ် အန် ခဲင် မိူင် မေဆုဝ်ဖုဝ်ထာမ်၊ အာတ့် ဟာဝ် ကွယ် အန် ခဲင် မိူင် ဟာရာန်။ 3 ဇဝ်ဖြာ ဟဲ့ ဒွိုမ် ကာလာင် ဒီ အာဘြာဟမ် တဝ်း၊ ‘တဲး မဲ လေး ခဲင် မိူင် ဒူင် ကွယ် ဝေါဝဲ မဲ၊ တဲး မဲ ဟာဝ် ခဲင် မိူင် ပီ ဒီ ဘျ အုဝ် ဒီ မဲ။’
4 အန် ဟဲ့ ဟွတ့် ထူမ် ဂြုဝ်း ပီ ကာလာင် ဇဝ်ဖြာ ဇိုဝ် တီ၊ အန် ဝီ လေး ခဲင် မိူင် အန် အီ မုး ဒူင် ကွယ် ဂေ ဒူအီ အာမျုဝ် ကာလာဒေ၊ ဝီ ဟာဝ် ကွယ် မိူင် ဟာရာန်။ ဝါယ် အန် တီ ဂုန့် အန် ဟဲ့ ဟွတ့် ယမ်၊ ဇဝ်ဖြာ ဝီ တိုယ် အန် ဟာဝ် ဇမ် မိူင် နီ၊ အီ မုး ဒူင် ကွယ် အေ ဒေါ တီ နီ။ 5 ခဲင် မိူင် တီ၊ ဇဝ်ဖြာ ယီ တူ တဲး အန် မိုဝ်း အူင့် ကာင် ဂေ အူင့် အီ မုး ကြုဝ် အာရာင် အန်။ အာဒါ အူ ပ့လုဝ့် မိူဝ်၊ အန် တူ မိုဝ်း။ ဇဝ်ဖြာ ယီ ဒွါ ကာဒိက် ဆတ်ဇာ ဒီ အန် တဝ်း၊ ‘ဂေ လှုက်လှာန် မဲ၊ အာဘြာဟမ်၊ ဂေ ဒီ ပွိုန် တူတ့် မိူင် နီ။’ ဒေါ ကာလာင် ဇဝ်ဖြာ ဂြုဝ်း တီ၊ အာဘြာဟမ် ညှမ် မိုဝ်း ဂွန်။ အူ ဝီ မိူဝ် အန် တူ မိုဝ်း။ 6 ဇဝ်ဖြာ ပီ ဝီ ကာလာင် ဒီ အန် တဝ်း၊ ‘ဂေ လှုက်လှာန် မဲ၊ ဂေ ဒီ ဘော ကွယ် ခဲင် မိူင် အီ ဟဝ်။ ဂေ အီ ဟဝ် ဒီ အိုပ် ဂေ ဘော တဲး ဂေ ခမ် ဒုက် ဒွန် မျုဝ်။ အာဒါ ဖွုန် မာယဝ်း ဆီနမ် ဂေ လုဝ် ခမ် ဒုက် တီ။’
7 ဟဲ့ ဟွတ့် ကာလာင် ဂြုဝ်း တီ၊ ဇဝ်ဖြာ ဝီ တဝ်း၊ ‘ဂေ ဒူအီ အီ ဒွါ ဒုက် ဒီ လှုက်လှာန် မဲ၊ ဂေ ယီ ဝီ လုဝ် ခမ် ဒုက် ပီ ဒွါ အုဝ် ဒီ ဂေ။ အုဝ် ဒီ ဝီ တဲး ဂေ ခမ် မှာပ် ဂေ၊ တဲး ဂေ ဘဲန် မှာယ် အီ။ ဟဲ့ ဟွတ့် ပန် တီ ဂေ လှုက်လှာန် မဲ၊ ဂေ ဒီ ဝီ လေး ခဲင် မိူင် တီ၊ ဝီ တး ဇမ် ခဲင် မိူင် နီ၊ တဲး ဂေ ဝီ ကြိုပ် အုဝ်။’ 8 ဇဝ်ဖြာ ဟဲ့ ဟွတ့် ဒွါ ကာဒိက် ဆတ်ဇာ ဒီ အာဘြာဟမ်၊ အန် ဝီ စ်ု အာဘြာဟမ် ဆွာ့ ဝဲန် ဟုန် လခါနာ အီမာယ် ဒွန် အီ၊ တဲး န့ ဘဲန် လက်ဆာနာ ပီ ဖြူမ် ဂေ ဒီ ဇဝ်ဖြာ။ ဝါယ် အန် တီ အာဘြာဟမ် ဝီ မိုဝ်း ဂွန် အီမာယ် အီ စိူဝ် အာဆဲက်။ ဒေါ ဟဲ့ နုဝ့် အာဆဲက် ဒါ ဆီငဲ၊ အာဘြာဟမ် ဝီ ဆွာ့ ဝဲန် ဟုန် လခါနာ အန်။ ဝါယ် အန် တီ အာဆဲက် ဝီ ဘဲန် ဂုန့် အာကူပ်။ အာကူပ် ဝီ ဘဲန် ဂုန့် ဂေ ဂိုဝ် ဒီ အာ ဝီ၊ အီ ဟဲ့ ဝီ ဘဲန် ဂုန့် ဒင် အေ ဒူအီ အာမျုဝ် အီဆာရေလ။
9 ဂေ ဂုန့် ဒင် အေ တီ၊ ဂေ ယီ တူ အိုင် ဝါ ဂေ အီ စိူဝ် အာယုဝ်။ ဂေ ဝီ ယွင့် အန်၊ တဲး အန် ဘဲန် မှာယ် အီ ဟဝ်၊ ကွယ် ခဲင် မိူင် အဲဂိုပ်။ ဇဝ်ဖြာ ယီ ကွယ် ရိုမ် ဒူပ် အာယုဝ်၊ 10 တဲး အန် ဝီ လေး ခဲင် ဒုက် ပီ လုဝ် ခမ် အန် ဒွန် မျုဝ်။ ဒေါ ကွယ် အန် ခဲင် မိူင် အဲဂိုပ်၊ ဇဝ်ဖြာ ဝီ ဒွါ အာယုဝ် မိုဝ်း အာငျာန်၊ တဲး ခုန်ဒီခမ် ဖာရုဝ် ကော အိုင် အန်။ ခုန်ဒီခမ် ဖာရုဝ်၊ ဝီ တဲး အာယုဝ် ဘဲန် ဒါ ကာညာ အီ အိုပ် မိူင် အဲဂိုပ် ဘော မိူင်၊ အိုပ် ဘော ခဲင် ဟုဝ် အန် ဒွန် မျုဝ်။
11 ဝါယ် အန် တီ ဘော ခဲင် မိူင် အဲဂိုပ် ဘော ခဲင် မိူင် ကာနန့် တွိုန်၊ န့ ဇမ် အာခြာဝ် အေတ့် ဘူမ်။ ဒေါ အန် တီ ဂေ ဂုန့် ဒင် အေ၊ ဂေ ဒွန် အီ လုဝ် ခမ် ဒုက် တာင်။ ဂေ တူ ပွိုန် ဒီ ဟြေတ့် ပီ ဒီ ဟူမ် နာ မှဝ်။ 12 ဟဲ့ ဟွတ့်၊ အာကူပ် တွိုန် ဘော ယိုဝ် အီ ဟဝ် တဝ်း၊ န့ ဆီ မိုဝ်း ပီ ဒီ ဟူမ် ခဲင် မိူင် အဲဂိုပ်။ အန် ဝီ စ်ု ဂွန် အန်၊ အီ မုး ဂုန့် ဒင် အေ၊ တဲး ဂေ ဟာဝ် ဇမ် မိူင် အဲဂိုပ် အူ စိုပ်။ 13 ဂေ ဟဲ့ ဟွတ့် ဝီ တး၊ ပီ ဝီ ဟာဝ် ပေါ အူ စိုပ်။ ဒေါ အန် တီ အာယုဝ် တွိုန် ဝီ တဲး အီကတ် အန် နပ် လွင် မုး အန် ဝါ ဂေ။ ဘော ခုန်ဒီခမ် ဖာရုဝ် ကော နပ် လွင် ဂေ အူကတ် အူဝါ အာယုဝ်။
14 ဟဲ့ ဟွတ့် ပန် တီ အာယုဝ် ဝီ စ်ု ဂေ၊ တဲး ဂေ ဒဲ့ ဂုန့် အန် အီ စိူဝ် အာကူပ် ဘော ဝေါဝဲ အန် ဒွန် အီ၊ တဲး ဂေ တး ဇမ် မိူင် အဲဂိုပ်။ ဂေ ဝေါဝဲ အာယုဝ်၊ ဂေ ဘောကာဂ့လျီတ် ကွယ် ဘူ ဂိုဝ် ဒီ ဖန် ဝီ။ 15 ပန် တီ အာကူပ် ဝီ လူင် ခဲင် မိူင် အဲဂိုပ်။ ဘော အန် ဘော ဂုန့် ဒင် အေ ဒွန် အီ၊ ဂေ ကွယ် ခဲင် မိူင် အဲဂိုပ်၊ တဲး ဂေ ဒွန် အီ ကော ယမ် ခဲင် မိူင် အဲဂိုပ် တီ။ 16 ဒုဝ် ဘူင့် ဂေ ယီ တူ ကွယ် ဆေဆေ ခဲင် မိူင် အဲဂိုပ်။ ဒေါ ဝီ လေး ဂေ ဒူအီ အီဆာရေလ ခဲင် မိူင် အဲဂိုပ်၊ ဂေ ဝီ ဒိုဝ်း ဟာဝ် ဒုဝ် ဘူင့် ဂုန့် ဒင် အေ၊ ဘ့လေး အုန် ဂေ ခဲင် မိူင် ဆေခေမ်။ န့ မုး ဒူင် ကွယ် ကာဒဝ် ဘာရေဝ် ပီ ဒွိုမ် စိုဝ်း ဒါ အာဘြာဟမ် ဒီ ဂေ ဒူအီ အီ မုး ဂွန် အာဟာမုဝ် တွိုန်။
17 ဝါယ် အန် တီ အာခြာဝ် ပီ ဒွိုမ် ကာလာင် ဇဝ်ဖြာ ဒီ အာဘြာဟမ် ဟဲ့ ကြဲ ဒီ ဇမ်။ ဂေ ဒူအီ အီဆာရေလ ဟဲ့ ကြဲ ဒီ ကိူန် ကာဆဝ် ခဲင် မိူင် အဲဂိုပ်။ 18 ဟဲ့ ဟွတ့်၊ န့ ဝီ မိုဝ်း ခုန်ဒီခမ် ကာမာယ်။ အန် ယီ တူ နပ် မာဆေ လွင် အာယုဝ် တွိုန်။ 19 ခုန်ဒီခမ် ကာမာယ် တီ၊ အန် ဝီ ဘူင် နာ တူ မွှိုမ် ဒီ ဒူအီ အာမျုဝ် အေ၊ တဲး ဂေ ဝီ ခမ် ဒုက် တာင်၊ ဝီ ခါနှာပ် ဂေ၊ စ်ု အီ ဟဝ် ငဝ်း ယမ် ဂွန် အာင ဂေ။
20 ဒေါ အန် တီ အာမုဝ်ဆဲ ဝီ ဂွိုတ်။ ဒေါ ဂွိုတ် အန် တီ၊ အန် ဟဲ့ စှိတ် ကာဆဝ်။ အာဒါ အူယ် မာဂျီန် ဂေ ပွိုန် ဒီ ဟျီင် အန် ခဲင် ကာင် ဂုန့် အန်။ 21 ဟဲ့ ဟွတ့်၊ ဂေ ဝီ လုဝ် ဝဲန် အန်။ န့ ယီ မိုဝ်း ဂွန် အီဘိုန့် ခုန်ဒီခမ် ဖာရုဝ်၊ အန် ဝီ ကာဒုး အာမုဝ်ဆဲ၊ ဝီ ဟျီင်၊ တဲး အန် ဘဲန် ဂွန် အန်၊ ကွယ် ခဲင် ဟုဝ် ခုန်ဒီခမ် ဖာရုဝ်။ 22 ဒေါ အန် တီ အာမုဝ်ဆဲ ဝီ ဟေန် တူတ့် ဒွန် မျုဝ် အီ မုး အာငျာန် ဂေ ဒူအီ အဲဂိုပ်။ ဘော ဂြုဝ်း ပီ ကာလာင် အန်၊ ဘော ပီ ဘူင် အန် ဒွန် မျုဝ်၊ န့ ဘျ အန် မိုဝ်း ပွုန် တာင်။
23 ဒေါ နုဝ့် အာဆာက် အန် ဖွုန် ဂိုဝ် ဆီနမ်၊ အန် ဝီ တဝ်း ဒီ ဟာဝ် ယွတ် ဒူင် ကွယ် ဂေ ဒူအီ အီဆာရေလ၊ အီ မုး ဝေါဝဲ အန်။ 24 အန် ဝီ ယိုဝ် ဒူအီ အဲဂိုပ် အူ ဝီ မး ဒူအီ အီဆာရေလ အူ ဝီ။ အန် ဝီ စွယ် ဒူအီ တီ၊ ငဝ်း ယမ် ဒူအီ အဲဂိုပ် တွိုန်။ 25 အာမုဝ်ဆဲ ထာင်၊ န့ ဒီ လိုဝ်း ဒီ နဝ်း ဂေ ဒူအီ အီဆာရေလ၊ လွင် ဇဝ်ဖြာ ဟဲ့ တိုယ် အန်၊ တဲး အန် စွယ် ဂေ လေး ခဲင် ဒုက် တာင် ဂေ။ န့ ယီ တူ လိုဝ်း မာဆေ ခဲင် နဝ်း ဂေ။ 26 ပါ ခဲညှာ အာမုဝ်ဆဲ ပီ ဝီ ဟာဝ် ဒူင် ကွယ် ဂေ၊ ပီ ဝီ ယိုဝ် ဒူအီ အာမျုဝ် အီဆာရေလ အာ ဝီ ဟဲ့ လာယ် ကာလုတ့်။ အန် ဝီ ထေဝ် ဒီ ခြဲ ဂါယ်၊ တဲး ဂါယ် ဝီ လာယ် ဒါခိုယ်။ အန် တဝ်း၊ ‘အိုယ်၊ ဘာယ် မုး အူ ဘီနွင်။ မှဝ် န့ ပါယ် ပီ လာယ် ကာလုတ့် ဘာယ်။း’
27 ဒူအီ အီ မး ပေါ ဝီ၊ အန် ယီ ဂိး ဝဲန် အာမုဝ်ဆဲ ဝီ တဝ်း၊ ‘အာဆေ ဟဲ့ တဲး မဲ ဘဲန် ဒါ ကာညာ အီ အိုပ် ယေ၊ ဆုင်ဖျာတ် အာမူ ယေ။း 28 မဲ ဆီ ငဝ်း ဝဲန် အုဝ်၊ တဲး န့ ပီ မဲ ငဝ်း ဝဲန် ဒူအီ အဲဂိုပ် ဒေါ တး မဲ အာမှိုဝ်။း’
29 အာမုဝ်ဆဲ ဟဲ့ ဟွတ့် ထူမ် ဂြုဝ်း ဒူအီ တီ၊ အန် ဝီ တဝ် လေး ခဲင် မိူင် အဲဂိုပ်၊ ဝီ ဟာဝ် ကွယ် ရိုမ် ဒူပ် ဂေ ဒူအီ အာမျုဝ် မီဒီအာန်၊ ဘဲန် ခဲတ့် ခဲင် မိူင် တီ။ ဒေါ ကွယ် အန် ခဲင် မိူင် မီဒီအာန်၊ အန် ဝီ မိုဝ်း ဂွန် အီမာယ် အာ ဝီ။
30 ဝါယ် အန် တီ န့ ဘော နုဝ့် ဖွုန် ဂိုဝ် ဆီနမ်။ အူ ဆီငဲ၊ အာမုဝ်ဆဲ ကွယ် ဒူင် ကာဟဝ်း အူ ပ့လုဝ့်၊ အီ ကွယ် ကာတတ် နွန် ဆီနာယ်။ အန် ဝီ ယိုဝ် အာမူ အာမာတ် ဇဝ်ဖြာ အူ ကာဒင် ကာပ့လုး ဒီ အန်၊ ကွယ် ခဲင် ယွုန် အီ မိုဝ်း ငဝ်။ 31 အာမုဝ်ဆဲ ဟဲ့ ယိုဝ် အာတီ၊ အန် ဝီ အာမ် ကာဆဝ်။ အန် ဝီ ဟာဝ် ချြီ့၊ တဲး အန် ယွတ် ဆီချာ။ အန် ဝီ ယိုဝ် ဂြုဝ်း ဇဝ်ဖြာ တဝ်း ဒီ အန်၊ 32 ‘အုဝ် မုး ဇဝ်ဖြာ ပီ ကြိုပ် ဂေ ဂုန့် ဒင် မဲ။ အုဝ် မုး ဇဝ်ဖြာ ပီ ကြိုပ် အာဘြာဟမ် ဘော အာဆဲက် ဘော အာကူပ် တွိုန်။’ ဒေါ ယိုဝ် အာမုဝ်ဆဲ ဂြုဝ်း တီ၊ အန် ဒီယေန့်၊ တူ ယ ယွတ် ပေါ အူ ဇေန့်။
33 ဇဝ်ဖြာ ဝီ တဝ်း ဒီ အန်၊ ‘တဲး မဲ ဘုတ့် ခူဒိန့် မဲ။ ဒူင် ကွယ် မဲ တီ၊ န့ မုး ဒူင် ဘွတ်။ 34 အုဝ် ဟဲ့ ဟွတ့် ယွတ် ဆီချာ ဒူအီ အုဝ်။ အုဝ် ဟဲ့ ဟွတ့် ယိုဝ် ဒုက် တာင် ပီ ခမ် ဂေ။ အုဝ် ဟဲ့ ယိုဝ် ခဲ့ ဒီအိး ဂေ နဝ်း ဂေ။ ဒေါ တီ နီ၊ အုဝ် ဟဲ့ လူင်၊ တဲး အုဝ် ချွတ် ဂေ။ မဲ အာမုဝ်ဆဲ၊ တဲး မဲ တး ကာတတ် အုဝ်။ အုဝ် ဒီ တိုယ် မဲ ဝီ ဝိဝ် ခဲင် မိူင် အဲဂိုပ်။’
35 အာမုဝ်ဆဲ တီ ဂေ ဒူအီ အီဆာရေလ ဟဲ့ ဟွတ့် ဝဲန်။ ဂေ ဟဲ့ ဟွတ့် တဝ်း၊ ‘အာဆေ ဟဲ့ တဲး မဲ အိုပ် ယေ၊ ဆုင်ဖျာတ် အာမူ ယေ။း’ ဝါယ် အန် တီ ဇဝ်ဖြာ ဟဲ့ ဝီ ဒဲ့ အန်၊ ဝီ တဲး အန် ဘဲန် ဒါ တာင် အီ အိုပ် ဂေ၊ တဲး အန် ဆုင်ဖျာတ် အာမူ ဂေ။ ခဲ့ တီ အာမူ အာမာတ် ဇဝ်ဖြာ ဟဲ့ စ်ု အာမုဝ်ဆဲ ဘူင် ဒေါ ကာပ့လုး အန် ခဲင် ယွုန် ဒီ အာတ့် အာမုဝ်ဆဲ။ 36 ဝါယ် အန် တီ အာမုဝ်ဆဲ ဝီ တိုယ် ဂေ ဒူအီ အီဆာရေလ လေး ခဲင် မိူင် အဲဂိုပ်။ အာတ့် လေး ဂေ၊ အန် ဟဲ့ ဘူင် နာ မွှိုမ် အာမ် ကာဆဝ် တဲး န့ ဘျ ပွုန် ဇဝ်ဖြာ။ ဟဲ့ ဟွတ့်၊ အန် ဝီ တိုယ် ဂေ၊ တဲး ဂေ ဟာဝ် ကာလုဝ်း အိုမ် နှူင် ရေန့်၊ တဲး ဂေ ဝီ ဟာဝ် ခဲင် ဒူင် ကာဟဝ်း အာဒါ ဖွုန် ဂိုဝ် ဆီနမ်။
37 န့ ဘော မုး အာမုဝ်ဆဲ တီ၊ အန် ဟဲ့ ဒွိုမ် တဝ်း ဒီ ဒူအီ အီဆာရေလ၊ ‘ဇဝ်ဖြာ ဒီ တိုယ် ဒူအီ အီ ဘျာန် ဂြုဝ်း ဇဝ်ဖြာ အူ ဝီ။ အန် ဒီ တး ကာတဲ ဘေ။ ဒါ ဆာရာ တီ၊ အန် ဘော ပီ အုဝ်။’ 38 အာမုဝ်ဆဲ တီ ဘော ကွယ် ရိုမ် ဒူပ် ဒူအီ အာမျုဝ် အေ ဒေါ ကွယ် ဂေ ခဲင် ဒူင် ကာဟဝ်း။ အန် မိူဝ် ဟဲ့ ကွယ် ကာတတ် အာမူ အာမာတ် ဇဝ်ဖြာ ဒေါ ကာလာင် အာမူ အာမာတ် ဇဝ်ဖြာ ဂြုဝ်း ဒီ အန် ဒေါ ကွယ် အန် ဒဲင် နွန် ဆီနာယ်။ အာမုဝ်ဆဲ မိူဝ် ယိုဝ် ဂြုဝ်း ဇဝ်ဖြာ၊ တဲး အန် ဝီ ကာလာင် တဲး အေ ထူမ်။ ဂြုဝ်း တီ၊ န့ မုး ဂြုဝ်း အီ ပွိုန် ဒွါ အာဆာက် ဒီ ဒူအီ။
39 ဂေ ဂုန့် ဒင် အေ၊ ဂေ ယီ တူ အိုင် ဒီ ထူမ် ဒူပ် ဂြုဝ်း အာမုဝ်ဆဲ။ ခဲင် နဝ်း ဂေ ဂေ ဝဲန် ဂြုဝ်း အန်၊ တဲး န့ ဘဲန် နဝ်း ဆီ ဝီ ဝေန့် မိူင် အဲဂိုပ် တွိုန်။ 40 ပန် တီ ဂေ ဝီ တဝ်း ဒီ အာရူန် တွိုန်၊ ‘တဲး မဲ ဘူင် အာရိုပ် ဇဝ်ဖြာ ဒွါ ဒီ ယေ။ တဲး ဇဝ်ဖြာ ယဲတ့် ဒီ အာတ့် အေ။ အာမုဝ်ဆဲ အီ ဟဲ့ ယဲတ့် အေ လေး ခဲင် မိူင် အဲဂိုပ်၊ အေ တူ နပ် နာ မှဝ် အန် ကွယ်။ အေ တူ နပ် ပီ ပါယ် အန် ဒဲင် နွန် နေန့်။’ 41 ဂေ ဟဲ့ ဟွတ့် ကာလာင် ဂြုဝ်း တီ၊ ဂေ ဘူင် အာရိုပ် မက်၊ တဝ်း န့ မုး ဇဝ်ဖြာ။ ဂေ ဝီ လှူ ဒီ မာမက် တီ၊ ဘူင် ဘ့လွယ် ကြိုပ် မာမက် တီ အီ မုး ဇဝ်ဖြာ ပီ ဘူင် ဂေ တာ ဒဲ ဂေ။ 42 ဇဝ်ဖြာ ယီ တူ အိုင် ပီ ဘူင် ဂေ။ အန် ဝီ ဘ့လေး ဝဲန် ဂေ၊ တဲး ဂေ ဝီ ကြိုပ် ဆီမန့် အီ ကွယ် ခဲင် ဘ့လေန့်။ ပီ ဘူင် ဂေ ဇိုဝ် တီ၊ န့ ဘော ပီ ပီ ဒဲမ် အုန် ဂေ ဒူအီ အီ ဘျာန် ဂြုဝ်း ဇဝ်ဖြာ။ ဂေ ဟဲ့ ဒွိုမ် တဝ်း၊
‘အိုယ် ဘေ ဒူအီ အီဆာရေလ၊ ဒေါ ကွယ် ဘေ ခဲင် ဒူင် ကာဟဝ်း အာဒါ ဖွုန် ဂိုဝ် ဆီနမ်၊ ဘေ ဟဲ့ ငဝ်း ယမ် ဒုဝ် ဆတ်ဒါဝါ၊ တဝ်း ဒီ လှူ။ ဘေ ယီ တူ ဒွိုမ် လှူ ဒီ အုဝ်၊ အီ မုး ဇဝ်ဖြာ။
43 ဘေ ဟဲ့ ကြိုပ် အာရိုပ် ဇဝ် မုဝ်လုဝ်း တဝ်း န့ မုး ဇဝ်ဖြာ။ ဘေ မိူဝ် ဟဲ့ ကြိုပ် ဆီမန့်၊ အီ မုး အာရိုပ် ဇဝ် အာရေဖာန်။ ဘေ ဟဲ့ ဘူင် အာရိုပ် ဂေ တီ၊ တဲး ဘေ ဝီ ကြိုပ်။
ခုဝ် အန် တီ အုဝ် ဇဝ်ဖြာ ဒီ ဝီ ဆုတ့် ဘေ လေး ခဲင် မိူင် ဘေ၊ တဲး ဘေ ဟာဝ် ကွယ် တူင့်၊ ကွယ် မိူင် ဘာဘဲ။’ ဂေ ဒူအီ အီ ဘျာန် ဂြုဝ်း ဇဝ်ဖြာ၊ ဂေ ဟဲ့ တဝ်း ပါယ် တီ။
44 အုဝ် ယီ တဝ်း ဒီ ဘေ၊ ဒေါ ကွယ် ဂုန့် ဒင် အေ ခဲင် ဒူင် ကာဟဝ်း၊ ဂေ ဟဲ့ မိုဝ်း ထိုပ် အီ မုး ဒူင် ကွယ် ဇဝ်ဖြာ။ ဂေ ဟဲ့ ဘူင် ထိုပ် တီ၊ တဲး န့ ပီ ပီ ဘျ ဇဝ်ဖြာ ဒီ အာမုဝ်ဆဲ။ ဇဝ်ဖြာ ဟဲ့ တဲး အန် ယိုဝ် အာရိုပ် ထိုပ် တီ ဒီ အာတ့်၊ တဲး အန် နပ် ဒီ ဘူင်။ ဟဲ့ ဟွတ့်၊ ဂေ ဟဲ့ ဒိုဝ်း ဂွတ် ထိုပ် တီ ယဲတ့် ဒီ အာတ့် ဂေ ဟာဝ် ဒူင် ဇမ် ဂေ ဒွန် ပ့လုဝ့်။
45 ဇဝ်ဖြာ ဟဲ့ ဟွတ့် ဒွါ ထိုပ် တီ ဒီ ဂေ။ ဒေါ ဝီ အိုပ် အာယောဆူ ဂေ ဒူအီ အာမျုဝ် အေ၊ ဂေ ဝီ ဒိုဝ်း ထိုပ် တီ တိုယ် ဇမ် ခဲင် မိူင် ကာနန့်၊ အီ မုး ဒူင် ကွယ် အေ ဒေါ တီ နီ။ ဒေါ လိုပ် ဂေ ခဲင် မိူင် ကာနန့်၊ ဇဝ်ဖြာ မိူဝ် ဝဲန် ဂေ ဒူအီ အာမျုဝ် ဟဝ်၊ တဲး ဂေ ဒူအီ အာမျုဝ် အေ ဝီ ကွယ် ခဲင် မိူင် တီ။ ထိုပ် ဇဝ်ဖြာ တီ ယီ ကွယ် ခဲင် မိူင် တီ ကော ဝီ ဇမ် အာခြာဝ် ဝီ ဘဲန် အာဒါဝိတ် ခုန်ဒီခမ်၊ ဝီ အိုပ် မိူင် အေ။ 46 ဇဝ်ဖြာ ယီ ဝုဝ် အာဒါဝိတ်။ ခုဝ်၊ အာဒါဝိတ် ဝီ မှာန့် တဲး ဇဝ်ဖြာ ခ့ဝါင် အန် ဆမ် ဟုဝ် တာင်၊ တဲး န့ ဘဲန် ဒူင် ကွယ် ဇဝ်ဖြာ ပီ ကြိုပ် အာကူပ်။ 47 န့ ယီ မုး ခုန်ဒီခမ် အာဆာလုဝ်မုဝ် အီ ဟဲ့ ဝီ ဆမ် ဟုဝ် ဇဝ်ဖြာ။
48 ဇဝ်ဖြာ အီ မုး ဇဝ်ဖြာ အီ တာင် လွှိုမ် တူတ့်၊ အန် ယီ တူ ကွယ် ခဲင် ကာင် ပီ ဘူင် ဒူအီ တာ ဒဲ ဂေ။ န့ ပီ ပီ ဒွိုမ် ကာလာင် ဒူအီ အီ ဘျာန် ဂြုဝ်း ဇဝ်ဖြာ အီ ဟဲ့ ဒဲမ် အုန် ဂြုဝ်း ဇဝ်ဖြာ တဝ်း၊
49 ‘ဂါင်ဟြာဝ် ဟဲ့ မုး ဒူင် ကွယ် အုဝ်။ ကာဒါယ် ပီ မ့ဘာင် ဒူင် ဘ့လေး အုဝ် ပ့လဝ် အုဝ်။ ဆေ န့ ပါယ် တီ၊ ကာင် မျုဝ် မှဝ် ဘေ ဆီ ဘူင်၊ တဲး အုဝ် ကွယ် နာ ခဲင်။း’ ဇဝ်ဖြာ မိူဝ် တဝ်း၊ ‘ဒူင် မှဝ် ဘေ ထာင် အုဝ် ပွိုန် ဒီလှဝ်။း
50 ဘေ ဟဲ့ ပိဝ်၊ န့ မုး အုဝ်၊ အီ ဟဲ့ ဘူင် တူတ့် ဒွန် မျုဝ်၊ တဲး န့ ဘဲန်၊ တဲး န့ မိုဝ်း။’ ဂေ ဒူအီ အီ ဘျာန် ဂြုဝ်း ဇဝ်ဖြာ၊ ဂေ ဟဲ့ တဝ်း ပါယ် တီ။
51 အုဝ် ယီ တဝ်း ဒီ ဘေ၊ နဝ်း ဘေ ဟဲ့ ဒိူဝ် ကာဆဝ်။ ဘေ တူ ဝဲန် နာ တူ မွှိုမ် ခဲင် နဝ်း ဘေ။ ဘော နာ တူ မွှိုမ် အီ ဒိုက် ဒီ ဟျုဝ့် ဘေ၊ ဘေ တူ ဝဲန် မာဆေ။ ဘေ ပီ ဂုန့် ဘေ၊ အီ ကွယ် ခါ အာတ့်။ ဘေ တူ အိုင် ဒီ ထူမ် ဒူပ် ပီ ဘျ နဝ်း ဖွိုမ် ဇဝ်ဖြာ ဒီ ဘေ။ 52 ဘော ဂုန့် ဒင် ဘေ အီ ကွယ် ခါ အာတ့် ဟဲ့ ဒွိုမ် ဒွါ ဒုက် ဒီ ဒူအီ အီ ဘျာန် ဂြုဝ်း ဇဝ်ဖြာ။ အာဝ် မိုဝ်း ဒါ ဆာရာ ခေါ အူ ဝီ၊ အီ တူ ကာဒုး ဒုက် ဒီ ဂုန့် ဒင် ဘေ။ န့ ဟဲ့ မိုဝ်း ဂေ ဒူအီ အီ ဘျာန် ဂြုဝ်း ဇဝ်ဖြာ၊ ဂေ ဟဲ့ ဒွိုမ် ကာလာင် လွင် ဒူအီ မွှိုမ် ပီ ဒီ တိုယ် ဇဝ်ဖြာ။ ဟဲ့ ဟွတ့်၊ ဂုန့် ဒင် ဘေ အီ ကွယ် ခါ အာတ့် ဂေ ဟဲ့ ဝဲန် ဒါ ဆာရာ ဂေ တီ။ ဒေါ တီ နီ၊ ဒူအီ မွှိုမ် ပီ တိုယ် ဇဝ်ဖြာ၊ အန် ဟဲ့ ဟွတ့် တး။ ဘေ ယီ ဟဲ့ အာပ် အန် ဒီ ဒါ တာင်၊ ငဝ်း ဝဲန် ဘော အန်။ 53 န့ မုး ဘေ။ ဘေ ဟဲ့ ပွိုန် ဒါရာ ဘွတ်။ ဇဝ်ဖြာ ဟဲ့ စ်ု ဂေ အာမူ အာမာတ် အန် ဒွါ ဒါရာ အန် ဒီ ဘေ။ ဘေ ယီ တူ ဒူပ် ဒါရာ တီ။”
54 အာဆာထေဖာန် ဟဲ့ ဟွတ့် ကာလာင် ဂြုဝ်း တီ၊ ဂေ ဒါ တာင် အီ ဆုင်ဖျာတ် ဒါရာ၊ ဂေ ဘော ရူ ကာဆဝ်။ ဂေ ဆီဂိတ် ဟြာင် ဂေ ကူပ် ရူ ဂေ။ 55 အာဆာထေဖာန် ယီ ယွတ် ဂါင်ဟြာဝ်။ နဝ်း ဖွိုမ် ဇဝ်ဖြာ ဟဲ့ နုဝ့် ခဲင် နဝ်း အန်။ အန် ဆာကိုဝ်း ယွတ် နာ ဒဲင် ဘော ယိုဝ် အာရူင် ဘ့လာင် ဇဝ်ဖြာ။ ဘော ဇဝ် ယေဆူ ကွယ် ဘ့လာက် အာအး ဇဝ်ဖြာ။ 56 ဒေါ အန် တီ အန် ဝီ တဝ်း၊ “တဲး ဘေ ယွတ်။ အုဝ် ဟဲ့ ယိုဝ် မာလုဝ်း ဂါင်ဟြာဝ် ဟဲ့ န့ဝိုဝ်း။ ဘော အန် ဇဝ် အီ ဟဲ့ ဒွိုမ် ဘဲန် ဂွန် ဒူအီ ဟဲ့ ကွယ် ဘ့လာက် အာအး ဇဝ်ဖြာ။”
57 ဒေါ ကာလာင် အန် ဂြုဝ်း တီ၊ ဂေ ဝီ ကာဘိတ် ဟျုဝ့် ဂေ၊ ဝီ ဒတ် ရျီင်။ ဂေ ဝီ ဟာဝ် ကာရူပ် အန်၊ 58 ဝီ ဒိုဝ်း အန် လေး တ မိူင်။ ဟဲ့ ဟွတ့်၊ ဂေ ဝီ ဒိုဝ်း မာဝ် ဝိုန့် ဒီ အန် တဲး အန် ကော ယမ်။ ဒေါ ဘူင် ဂေ ပါယ် တီ၊ ဂေ ဒူအီ တွိုန်၊ အီ ဟဲ့ ကာလုဝ် ဒီ ကာလာင် နာ တူ မွှိုမ် လွင် အာဆာထေဖာန်၊ ဂေ ဟဲ့ ဘုတ့် ခြိုင် ဂေ၊ ဘ့လေး ဒဲင် ကာဒါယ်။ န့ ယီ မိုဝ်း ကာညူမ် အူ ဝီ၊ အန် စိူဝ် အာဆောလူ။ အန် ဝီ ဘ်ု ခြိုင် ဂေ တီ။