1 ဒေါ ငဝ်း ဂေ အာဆာထေဖာန် ဘော အာဆောလူ ဟဲ့ ကွယ် ရိုမ် ဒူပ် ဂေ။ ဘော အန် ဟဲ့ ဖြူမ် တဲး ဂေ ငဝ်း အာဆာက် အာဆာထေဖာန်။

အူ ဆိန့် ဆီငဲ အန် တီ၊ ဂေ ဒူအီ ခဲင် ဖိုင် ဇဝ် ယေဆူ၊ ဂေ အီ ကွယ် ခဲင် မိူင် ယေရူဆာလဲမ်၊ ဂေ လုဝ် ခမ် ဒုက် တာင် ဘဲန် မျုဝ် ဘဲန် မျုဝ်။ ဂေ ဒွန် အီ လုဝ် ကာယဝ်း၊ လေး ခဲင် မိူင် ယေရူဆာလဲမ်၊ ဟာဝ် ကွယ် ဘဲန် ပ့လုဝ့် ဘဲန် ပ့လုဝ့် ခဲင် အိူင် ယူဒါ ဘော ခဲင် မိူင် ဆာမာရီ။ န့ ယီ မိုဝ်း မီ ဂေ ဒူအီ ပီ ရဝ်း ပီ တိုယ် ဇဝ် ယေဆူ၊ ဂေ ဆီ ကွယ် ခဲင် မိူင် ယေရူဆာလဲမ်။ 2 န့ ယီ မိုဝ်း ဒူအီ အီ ညှိုမ် အီ ဒူပ် န့တေန့် ဇဝ်ဖြာ၊ ဂေ ဝီ ဒိပ် ဒုဝ် ဘူင့် အာဆာထေဖာန်။ ဂေ ဘော က့လိုဝ် ကာဆဝ်၊ ဝီ ယာမ် တာင် ကူပ် ယမ် အန်။ 3 အာဆောလူ တွိုန် ယီ ရူ ကာဆဝ် ဒီ ဂေ ဒူအီ အီ လိုပ် ခဲင် ဖိုင် ဇဝ် ယေဆူ ဒွန် အီ။ အန် ဘော ဟာဝ် ခဲင် ကာင် ဒွန် ကာင်၊ ဒိူတ် လေး ဂေ ဒူအီ အီ ညှိုမ် ဇဝ် ယေဆူ၊ ဘော အီမာယ် အီဘိုန့်။ အန် ဝီ မှေတ့် ခြွင့် ဂေ ခဲင် ကာပိုမ်။

4 ဂေ ဒူအီ အီ ဒွိုမ် ကာယဝ်း ဟာဝ် ဒွန် ပ့လုဝ့်၊ ဂေ ဝီ ဟာဝ် ဒွန် နာ ဒွန် ပ့လုဝ့် ခဲင် မိူင် ဘော မိူင်။ ဂေ ဘော ဇမ် နာ မှဝ်၊ ဂေ ဝီ ကာလာင် ဂြုဝ်း ဇဝ်ဖြာ တဲး အီ ထူမ်။

5 န့ ယီ မုး အာဖီလိပ် တွိုန်၊ အန် ဘော ဟာဝ် ဇမ် အူ ပ့လုဝ့် ခဲင် အိူင် ဆာမာရီ။ အန် ဝီ ကာလာင် ဂြုဝ်း လွင် ဒူအီ ပီ ရဝ်း ပီ တိုယ် ဇဝ်ဖြာ တဲး အန် ချွတ် ဒူအီ။ 6 ဒေါ ယိုဝ် ဂေ ဒူအီ ဆာမာရီ ဂြုဝ်း အန် တီ ဘော နာ မွှိုမ် အာမ် ကာဆဝ် ပီ ဘူင် အန်၊ ဂေ ဝီ ထူမ် ဆီချာ ဂြုဝ်း ပီ ကာလာင် အန်။ 7 န့ ဘော မိုဝ်း ဒူအီ ကိူန်၊ အီ မိုဝ်း ကာနမ် ဟာယ် ကွယ် ခဲင် ဒုဝ် ဘူင့် ဂေ၊ ဂေ ဝီ ဒတ် တာင်၊ လေး ခဲင် ဒုဝ် ဘူင့် ဒူအီ တီ။ ဘော ဒူအီ အီ မိုဝ်း ပ့လဝ် ဂေ ဒဲ အီ ဟဲ့ ယမ်၊ ဘော ဂေ ဒူအီ စှေ ဝီ ကဲန်။ 8 ပါယ် တီ၊ ဂေ ဒူအီ အီ ကွယ် ခဲင် မိူင် တွိုန်၊ ဂေ ဘော ဒါခိုယ် ကာဆဝ်။

9 ခဲင် မိူင် တွိုန်၊ န့ ဘော မိုဝ်း ဒူအီ အူ ဝီ၊ အန် စိူဝ် အာဆီမူန်။ အန် မုး ဒါ အီ ဟျီင် ကာနမ်။ ပီ ဘူင် အန်၊ န့ တဲး ဂေ ဒူအီ ကိူန် ခဲင် အိူင် ဆာမာရီ ကော အာမ် ကာဆဝ်။ အန် ပီခိုက် အန် တဝ်း၊ အန် မုး ဒူအီ ဘွတ်၊ ဒူအီ အီ မိုဝ်း ပွုန် တာင်။ 10 ဂေ ဒူအီ ဘောကာဂ့လျီတ်၊ ဘော ဂေ အီ တျီ့ အီ တာင်၊ ဂေ ဝီ ထူမ် ဂြုဝ်း အန်။ ဂေ ဝီ တဝ်း၊ “ဟဲ့ မုး ဟဲ့ မှာန်၊ ဒူအီ တီ မိုဝ်း ပွုန် တာင် ပီ ဒွါ ဇဝ်ဖြာ ဒီ အန်။” 11 ကူပ် ဟဲ့ နပ် အန် ဒီ ဘူင် နာ မွှိုမ် အာမ် ကာဆဝ် တီ ဟဲ့ လှေန့်၊ ဂေ ဒူပ် အန်။ 12 ဂေ ဒူအီ ဇိုဝ် တီ၊ ဂေ ဝီ ထူမ် ဂြုဝ်း ပီ ကာလာင် အာဖီလိပ် လွင် ဇဝ်ဖြာ ဒီ အိုပ် ကာဒါယ် ဘော လွင် ဇဝ် ယေဆူ ချွတ် ဒူအီ။ ဂေ ဟဲ့ ဟွတ့် ထူမ် လွင် အန် တီ၊ ဂေ ဝီ ညှိုမ်။ ဘော ဂေ အီမာယ် အီဘိုန့် ဝီ ခမ် ဒီ စိုပ် ခဲင် အိုမ်။ 13 ဘော အာဆီမူန် တွိုန် ဝီ ညှိုမ် ဇဝ် ယေဆူ။ ဟဲ့ ဟွတ့်၊ ဘော အန် ဝီ တဲး အာဖီလိပ် စိုပ် အန် ခဲင် အိုမ်။ အန် ဝီ ဟာဝ် ဒူပ် အာဖီလိပ်၊ တဲး အန် ကော ဟာဝ် ဇမ် ဒွန် နာ ဒွန် ပ့လုဝ့် ဒူင် ဟာဝ် ဇမ် အာဖီလိပ်။ အန် ဝီ အာမ် ကာဆဝ် ဒေါ ယိုဝ် အန် နာ မွှိုမ် အာမ် ကာဆဝ် ပီ ဘူင် အာဖီလိပ်၊ အီ ဘျ ပွုန် ဇဝ်ဖြာ။

14 ဂေ ဒူအီ ပီ ရဝ်း ပီ တိုယ် ဇဝ် ယေဆူ အီ ကွယ် ခဲင် မိူင် ယေရူဆာလဲမ်၊ ဂေ ဘော နပ် လွင် ဒူအီ အာမျုဝ် ဆာမာရီ ဟဲ့ တဲး ဂြုဝ်း ဇဝ်ဖြာ လိုပ် ခဲင် နဝ်း ဂေ၊ ဂေ ဝီ တိုယ် အာပေတာရူ ဂါယ် အာယောဟာန် တွိုန်၊ တဲး ဂါယ် ဟာဝ် ဇမ် ဒူင် ကွယ် ဂေ ဒူအီ အီ ညှိုမ် ဇဝ်ဖြာ ခဲင် အိူင် ဆာမာရီ။ 15-16 ဂါယ် ဟဲ့ ဟွတ့် ဇမ်၊ ဂါယ် ဘော နပ်၊ ကူပ် ညှိုမ် ဂေ ဇဝ် ယေဆူ၊ ဂေ ဟဲ့ ဟွတ့် ခမ် ဒီ စိုပ် ခဲင် အိုမ်။ နဝ်း ဖွိုမ် ဇဝ်ဖြာ ယီ ညှမ် လိုပ် ခဲင် နဝ်း ဂေ။ ခုဝ်၊ ဂါယ် ဝီ ဆာခိုဝ် တဲး ဇဝ်ဖြာ ဒွါ နဝ်း ဖွိုမ် အန် လိုပ် ဘော ခဲင် နဝ်း ဂေ။ 17 ဂါယ် ဟဲ့ ဟွတ့် ဆာခိုဝ်၊ ဂါယ် ဝီ ဒါင် ဒဲ ဂါယ် ဒဲင် ဂိန့် ဂေ။ ပန် တီ နဝ်း ဖွိုမ် ဇဝ်ဖြာ ဘော လိုပ် ခဲင် နဝ်း ဂေ။

18 အာဆီမူန် တွိုန်၊ အန် ယီ ယိုဝ် နဝ်း ဖွိုမ် ဇဝ်ဖြာ လိုပ် ခဲင် နဝ်း ဒူအီ ဒေါ ဒါင် အာပေတာရူ ဂါယ် အာယောဟာန် ဒဲ ဂါယ် ဒဲင် ဂိန့် ဒူအီ တွိုန်၊ အန် ဝီ တဝ်း ဒီ ဒွါ ရွိုန် ဒီ ဂါယ်။ 19 အန် ဝီ တဝ်း၊ “တဲး ဘာယ် ဒွါ ပွုန် တီ ဘော ဒီ အုဝ်။ တဲး ဘော အုဝ် ပွိုန် ဒီ ဒါင် ဒဲ အုဝ် ဒဲင် ဂိန့် ဒူအီ၊ တဲး နဝ်း ဖွိုမ် ဇဝ်ဖြာ လိုပ် ခဲင် နဝ်း ဂေ။”

20 အာပေတာရူ တဝ်း ဒီ အန်၊ “ဘော မဲ ဘော ရွိုန် မဲ၊ တဲး န့ စှိုမ်။ မဲ ဟဲ့ ထာင် မဲ ပွိုန် စိုဝ်း ပီ ဒွါ ဇဝ်ဖြာ ဒီ အီ တာ ရွိုန်။ အာဝ် မုး ပါယ် တီ။ 21 နဝ်း မဲ အာဝ် မွှိုမ်၊ အာဝ် မှာန် ဒီ အာတ့် ဇဝ်ဖြာ။ ခုဝ်၊ မဲ တူ ပွိုန် ဘူင် ပီ ဘူင် ယာယ်။ 22 တဲး မဲ ဝဲန် နာ တူ မွှိုမ် ခဲင် နဝ်း မဲ၊ တဲး မဲ ဆာခိုဝ် ဇဝ်ဖြာ။ ဆေ န့ ဘော ပွိုန်၊ တဲး ဇဝ်ဖြာ ဂဝ်း ဝဲန် နဝ်း ဆီ ပွိုန် မဲ ပွုန် တီ။ 23 အုဝ် ဟဲ့ နပ်၊ နဝ်း မဲ အာဝ် အး ဘော ဘူင် မှာပ် ဆေဆေ။”

24 အာပေတာရူ ဟဲ့ ဟွတ့် ကာလာင် ဂြုဝ်း တီ၊ အာဆီမူန် တွိုန် ဝီ တဝ်း၊ “တဲး မဲ ဆာခိုဝ် ဇဝ်ဖြာ ဒါင် အုဝ်၊ ကွဲ့ တဲး န့ ဘဲန် ပီ ကာလာင် မဲ။”

25 ဝါယ် အန် တီ အာပေတာရူ ဂါယ် အာယောဟာန် တွိုန်၊ ဂါယ် ဟဲ့ ဟွတ့် ကာလာင် လွင် ဇဝ် ယေဆူ၊ ဟဲ့ ဟွတ့် ကာလာင် ဒီ ဒူအီ ကိူန် လွင် ဂြုဝ်း ဇဝ်ဖြာ၊ ဂါယ် ဝီ ဝိဝ် မိူင် ယေရူဆာလဲမ်။ ဒေါ ဟာဝ် ဂါယ် ဒူပ် န့တေန့်၊ ဂါယ် ဝီ ဟုဝ် ဒါရာ လွင် ဇဝ်ဖြာ ချွတ် ဒူအီ၊ တဲး ဂေ ဒူအီ ဆာမာရီ ဘဲန် ရဝ် ဘဲန် ရဝ် ပွိုန် ဒီ ထူမ်။

26 အာဖီလိပ် တွိုန်၊ ဒေါ ကွယ် အန် ခဲင် အိူင် ဆာမာရီ၊ န့ ယီ မိုဝ်း အာမူ အာမာတ် ဇဝ်ဖြာ အူ ကာဒင် တး ကာပ့လုး ဒီ အန် တဝ်း၊ “မဲ လေး လူင် နာ တေတ့်၊ ဝီ ဟာဝ် တဲး မဲ ဇမ် ဒီ န့တေန့် အီ တး မိူင် ယေရူဆာလဲမ်၊ ဝီ ဟာဝ် မိူင် ဂါဆာ အီ မုး န့တေန့် အီ ကာလုဝ်း ဒူင် ကာဟဝ်း။”

27 အာမူ အာမာတ် ဇဝ်ဖြာ ဟဲ့ ဟွတ့် ကာလာင် ဂြုဝ်း တီ၊ အာဖီလိပ် မိူဝ် ယိတ့် ဟာဝ် တဲး အန် ဇမ် ဒီ န့တေန့် တွိုန်။ အန် ဝီ ကာတုန့် ဒူအီ အူ ဝီ အီ တး မိူင် အေထီအူပ်။ အန် မုး အီမာယ် ဆး အီ ဘ်ု ကြုဝ်ကြာမ် နာင် ဟောခမ် ခဲင် မိူင် အေထီအူပ်။ နာင် ဟောခမ် တီ၊ အန် စိူဝ် ကန်ဒါဆေ။ ဒူအီ တီ၊ အန် ဟဲ့ ဟွတ့် ဟာဝ် မိူင် ယေရူဆာလဲမ်၊ တဲး အန် ကြိုပ် ဇဝ်ဖြာ။ 28 ဒေါ အန် တီ အန် ဝီ ဝိဝ် မိူင် အန်။ အန် ကွယ် ခဲင် လက်လဝ် အန်၊ တိး ထမ်။ ဘပ် ပီ တိး အန်၊ န့ မုး ဘပ် ပီ ဒဲမ် ဒူအီ အီ ဘျာန် ဂြုဝ်း ဇဝ်ဖြာ အီ စိူဝ် အာအီဆာယ။ 29 နဝ်း ဖွိုမ် ဇဝ်ဖြာ ဝီ တဝ်း ဒီ အာဖီလိပ်၊ “တဲး မဲ ဟာဝ် ချြီ့ လက်လဝ် တီ ဘော ဟာဝ် ရိုမ် ဒူပ် အန်။”

30 ပန် တီ အာဖီလိပ် ဝီ ဟာဝ် ချြီ့ လက်လဝ် တွိုန်။ အန် ဝီ ယိုဝ် ဒူအီ တွိုန် တိး ထမ် ခဲင် ဘပ် ပီ ဒဲမ် ဒါ ဆာရာ အာအီဆာယ၊ အီ မုး ဒူအီ အီ ဘျာန် ဂြုဝ်း ဇဝ်ဖြာ။ ပန် တီ အာဖီလိပ် ဒီမွှတ် အန် တဝ်း၊ “အိုယ် ဒါ၊ မဲ နပ် လွင် ဒါင် ဂြုဝ်း ပီ တိး မဲ တီ။း”

31 ဒူအီ အီ တး မိူင် အေထီအူပ် တွိုန်၊ အန် ဝီ ဝျီ့ ဂြုဝ်း တီ တဝ်း၊ “မှဝ် အုဝ် ဒီ ပါယ် ဒီ နပ် ဂြုဝ်း အန် တီ၊ ဆေ အာဝ် မိုဝ်း ဒူအီ မာနုဝ် အုဝ်။း” အန် ဟဲ့ ဟွတ့် တဝ်း ပါယ် တီ၊ အန် ဝီ ဒဲ့ အာဖီလိပ် တး ဟုဝ့် ဒဲင် လက်လဝ် အန်၊ တဲး ဂါယ် ကွယ် ရိုမ်။

34 ဒူအီ တး မိူင် အေထီအူပ် တွိုန်၊ အန် ဒီမွှတ် အာဖီလိပ် တဝ်း၊ “တဲး မဲ ကာလာင် ဒီ အုဝ်၊ တဲး အုဝ် နပ်။ ဒူအီ အီ ဘျာန် ဂြုဝ်း ဇဝ်ဖြာ တီ၊ အန် ကာလာင် ဂြုဝ်း တီ လွင် အာဆေ။း အန် ကာလာင် လွင် ဒုဝ် အန်၊ အန် ကာလာင် လွင် ဒူအီ ပေါ အူ ဝီ။း” 35 အန် ဟဲ့ ဟွတ့် ကာလာင် ဂြုဝ်း တီ၊ အာဖီလိပ် ဝီ စုး ဒီ ကာလာင် လွင် ခါန် ပီ တိး ဂါယ် ခဲင် ဘပ် ဇဝ်ဖြာ၊ တဲး အန် ကော နပ် လွင် ဇဝ် ယေဆူ။

36 ဒေါ ဟာဝ် ဂါယ် ဒူပ် န့တေန့် တွိုန်၊ ဂါယ် ဝီ ဟာ ဇမ် ဒူင် မိုဝ်း ဘ့လဲင် အိုမ်။ ဒူအီ အီ တး မိူင် အေထီအူပ် ဝီ တဝ်း၊ “နီ၊ န့ မိုဝ်း အိုမ်။ န့ ပွိုန် စိုပ် အုဝ် ခဲင် အိုမ် နီ ဒေါ တီ နီ။း”

37 အာဖီလိပ် ဝီ တဝ်း၊ “ဆေ မဲ ညှိုမ် ဆီချာ ဇဝ် ယေဆူ ခဲင် နဝ်း၊ ဟဲ့ ပွိုန်။” အန် ဝီ တဝ်း၊ “အုဝ် ဟဲ့ ညှိုမ်၊ ဇဝ် ယေဆူ မုး ဂွန် ဇဝ်ဖြာ။”

38 ပန် တီ အန် ဝီ စ်ု လက်လဝ် ဂိူတ်။ ဟဲ့ ဟွတ့်၊ ဂါယ် ဝီ လေး ခဲင် လက်လဝ်။ ဒူအီ အီ တး မိူင် အေထီအူပ် တွိုန် ဝီ တဲး အာဖီလိပ် စိုပ် အန် ခဲင် အိုမ်။ 39 ဟဲ့ ဟွတ့် ပန် တီ ဒေါ လေး ဂါယ် ခဲင် အိုမ် တွိုန်၊ န့ ဝီ မိုဝ်း နဝ်း ဖွိုမ် ဇဝ်ဖြာ တး ဒိုဝ်း အာဖီလိပ် အူ ဇေန့်၊ တဲး အန် ကော ဟြာယ် ဒီ အာတ့် ဒူအီ အီ တး မိူင် အေထီအူပ်၊ အာဝ် ဟူ တဲး အန် ယိုဝ် အာဖီလိပ်။ အန် ယီ ဝီ ဟာဝ် ဒူပ် န့တေန့် ပီ လုဝ် ဟာဝ် အန်။ နဝ်း အန် ဘော ဒါခိုယ် ကာဆဝ်။ 40 န့ ယီ မုး အာဖီလိပ်၊ အန် ဟဲ့ ဝီ ဇမ် မိူင် အာဆုဝ်ထူ အူ ဇေန့်။ အန် ဝီ ဟာဝ် ကာလာင် လွင် ဇဝ်ဖြာ အီ ချွတ် ဒူအီ ခဲင် မိူင် ဒွန် မိူင်၊ တဲး အန် ကော ဇမ် ဘော မိူင် ကေဆာရေ။