1 အာခြာဝ် ဒေါ အန် တီ န့ ယီ မုး အာဆောလူ တွိုန်။ အန် ယီ ဆီ နဲ့ ကာစွှာ့ ဟာဝ် ဂေ ဒီဘဲ ဇဝ် ယေဆူ၊ တဝ်း ဒီ ငဝ်း ဝဲန် ဂေ။ အန် ဘော ဟာဝ် ဒူင် ကွယ် ဒါ တာင် အီ အိုပ် တူတ့် ဒူအီ အီ လှူ ဒီ ဇဝ်ဖြာ။ 2 အန် မှာန့် ဒီ ဒါ တာင် အီ အိုပ် တူတ့် ဒူအီ အီ လှူ ဒီ ဇဝ်ဖြာ၊ တဲး ဒါ တာင် တီ ဒွါ ပဲ့ ဒီ အန်၊ တဲး အန် ဝီ ဟာဝ် တိုယ် ဒီ ဒါ တာင် ခဲင် ဇူင် ကြိုပ် ဂေ ဒူအီ အာယူဒါ ဇဝ်ဖြာ အီ ကွယ် ခဲင် မိူင် ဒါမာခူ။ ပဲ့ တီ ခ့ဝါင် အန် ဟြေတ့် ဂေ ဒူအီ အီ ဒူပ် န့တေန့် ဇဝ် ယေဆူ။ အန် ဟီ ယိုဝ် ဂေ ဘော မုး အီဘိုန့် အီမာယ်၊ အန် ပွိုန် မှေတ့် တူတ့် ဂေ၊ ဝီ တိုယ် ဂေ ဟာဝ် ဇမ် မိူင် ယေရူဆာလဲမ်၊ ခြွင့် ဂေ ခဲင် ကာပိုမ်။ 3 ဒေါ တး ဇမ် အန် ကာတတ် မိူင် ဒါမာခူ တွိုန်၊ အူ ဇေန့်၊ န့ မိုဝ်း ဘ့လာင် တာင် တး ခဲင် ဂါင်ဟြာဝ် လူင်၊ ဝီ လဲပ် ရူပ် အန်။ 4 အာဆောလူ ဘော ဂိုပ် ဒဲင် ကာဒါယ်၊ အန် ဘော ပွိုန် ယိုဝ် ဂြုဝ်း အီ ကာလာင် ဒီ အန် တဝ်း၊ “အိုယ် အာဆောလူ၊ မှဝ် န့ ပါယ် ပီ ဘူင် မဲ နာ တူ မွှိုမ် ဒီ အုဝ်။း”

5 အာဆောလူ ဝီ တဝ်း၊ “အာဆေ မဲ မုး၊ မဲ ဇဝ်။း”

အန် ဝီ တဝ်း၊ “အုဝ် မုး ဇဝ် ယေဆူ၊ ဝီ ပီ ဘူင် မဲ နာ တူ မွှိုမ်။ 6 ဒေါ တီ နီ၊ တဲး မဲ ယိတ့် ဟာဝ် မိူင် ဒါမာခူ။ န့ ဒီ မိုဝ်း ဒူအီ အူ ဝီ၊ အန် ဒီ ဝီ ကာလာင် တဲး မဲ နပ် ပီ လုဝ် ဘူင် မဲ။”

7 ဂေ ဒူအီ အီ ဟာဝ် ဒူပ် အာဆောလူ တွိုန်၊ ဂေ အာမ် ကာဆဝ်၊ အာဝ် ဟူ ပွိုန် တဝ်း မာဆေ။ ဂေ ဟဲ့ ယိုဝ် ဂြုဝ်း၊ ယီ တူ ယိုဝ် အာဆေ၊ အီ ကာလာင် ဂြုဝ်း တီ။ 8 အာဆောလူ ယီ ဝီ ယိတ့် ဒူင် ဂိုပ် အန် တွိုန်၊ ဝီ ဘ့လာင် ငါယ် အန်၊ ယီ တူ ပွိုန် ယိုဝ် မာဆေ။ ခုဝ်၊ ဂေ ဝီ ပါ ဒဲ အန်၊ တိုယ် အန် ဟာဝ် လိုပ် ခဲင် မိူင် ဒါမာခူ။ 9 အာဒါ အူယ် ဆီငဲ ငါယ် အန် အပ်၊ အာဝ် ပွိုန် ယိုဝ် မာဆေ။ ဒေါ အန် တီ အန် မိူဝ် တူ ဟူမ် တူ ဒျီင် မာဆေ။

10 ခဲင် မိူင် ဒါမာခူ တွိုန်၊ န့ ယီ မိုဝ်း ဒီဘဲ ဇဝ် ယေဆူ အူ ဝီ။ အန် စိူဝ် အာနာနီ။ အာနာနီ တွိုန် ဝီ ယိုဝ် အာရူင် ပီ ဘျ ဇဝ်ဖြာ ဒီ အန်။ အန် ဇဝ် ဝီ ဒဲ့ အန် တဝ်း၊ “အိုယ်၊ အာနာနီ။”

အာနာနီ ဝီ တဝ်း၊ “အိုယ် မဲ ဇဝ်၊ အုဝ် ကွယ် ဒီ နီ။ အုဝ် ထူမ် ဂြုဝ်း မဲ။”

11 ဟဲ့ ဟွတ့်၊ ဇဝ်ဖြာ ဝီ တဝ်း၊ “တဲး မဲ ယိတ့် ဟာဝ် ဒူပ် န့တေန့်၊ အီ စိူဝ် န့တေန့် ဆိူဝ် တွိုန်။ တဲး မဲ ဟာဝ် လိုပ် ခဲင် ကာင် အာယူဒတ် တွိုန်။ တဲး မဲ ဒီမွှတ် ဒူအီ ခဲင် ကာင်၊ ယုဝ် န့ မိုဝ်း ဒူအီ အူ ဝီ၊ အီ တး မိူင် ထာဆူ၊ စိူဝ် အာဆောလူ။ ဒူအီ တီ၊ အန် ကွယ် ခဲင် ကာင် တီ၊ ဆာခိုဝ် ဒီ အုဝ်။ 12 အန် မိူဝ် ဟဲ့ ယိုဝ် အာရူင် ပီ ဘျ အုဝ် ဒီ အန်။ အန် ဟဲ့ ယိုဝ် ဒူအီ အူ ဝီ အီ စိူဝ် အာနာနီ၊ ဟဲ့ တး ဒူင် ကွယ် အန် ဘော ဒါင် ဒဲ ဒဲင် ဂိန့် အန်၊ တဲး အန် ဝီ ပွိုန် ယိုဝ်။”

13 ဇဝ်ဖြာ ဟဲ့ ဟွတ့် ကာလာင် ဂြုဝ်း တီ၊ အာနာနီ တွိုန် ဝီ တဝ်း၊ “အိုယ် မဲ ဇဝ်၊ အုဝ် ဟဲ့ ယိုဝ် ဂေ ဒူအီ ကိူန် ကာလာင် လွင် အန် တဝ်း၊ အန် ဟဲ့ ဘူင် နာ တူ မွှိုမ် ဒွန် မျုဝ် ဒီ ဂေ ဒူအီ ဘွတ်၊ ဒူအီ အီ ညှိုမ် မဲ ခဲင် မိူင် ယေရူဆာလဲမ်။ 14 ဂေ တဝ်း၊ အန် ဟဲ့ တး ဇမ် ဒူင် ကွယ် ယေ နီ။ ဂေ ဒါ တာင် အီ ယဲတ့် ဂေ ဒူအီ အီ လှူ ဒီ ဇဝ်ဖြာ ဂေ ဟဲ့ ခ့ဝါင် အန်၊ တဲး အန် ဝီ မှေတ့် ဂေ ဒူအီ ညှိုမ် မဲ ဇဝ်၊ တဲး အန် ဝီ ခြွင့် ဂေ ခဲင် ကာပိုမ်။”

15 ဇဝ်ဖြာ ယီ ကာလာင် ဒီ အာနာနီ။ အန် တဝ်း၊ “တဲး မဲ ဟာဝ်။ ဒူအီ တီ၊ အန် မုး ဒူအီ ပီ ရဝ်း အုဝ်၊ တဲး အန် စွယ် အုဝ်၊ တဲး အန် ကာလာင် လွင် အုဝ် ဒီ အာတ့် ဂေ ဒူအီ အာမျုဝ် ဟဝ်။ အန် ဘော လုဝ် ကာလာင် လွင် အုဝ် ဒီ အာတ့် ခုန်ဒီခမ် အီ အိုပ် မိူင် အီ ဟဝ် ဘော ဒီ ဒူအီ အီဆာရေလ၊ တဲး ဂေ ထူမ်။ 16 အုဝ် ဒီ ဘော ဘျ ဒီ အန်၊ ခဲ့ ကိူန် ဒုက် ပီ လုဝ် ခမ် အန် ကူပ် ကာလာင် အန် ဒီ အီ ဟဝ် လွင် အုဝ်။”

17 ဇဝ်ဖြာ ဟဲ့ ဟွတ့် ကာလာင် ဂြုဝ်း တီ၊ အာနာနီ ဝီ ဟာဝ် လိုပ် ခဲင် ကာင် တွိုန်၊ ဝီ ကာတုန့် အာဆောလူ၊ ဝီ ဒါင် ဒဲ အန် ဒဲင် ဂိန့် အာဆောလူ။ အန် ဝီ တဝ်း၊ “အိုယ် အာဆောလူ၊ မဲ မုး ဝါ အုဝ်။ ဇဝ် ယေဆူ ဟဲ့ ကာပ့လုး ဒီ မဲ ဒေါ ဟာဝ် မဲ ဒူပ် န့တေန့်၊ တး မိူင် နီ။ အန် ဇဝ် ဟဲ့ စ်ု အုဝ် တး ဒူင် ကွယ် မဲ နီ၊ တဲး ငါယ် မဲ ဝီ ဘ့လာင်၊ တဲး နဝ်း ဖွိုမ် ဇဝ်ဖြာ လိုပ် ခဲင် နဝ်း မဲ။” 18 ဒေါ ကာလာင် အန် ဂြုဝ်း တီ အူ ဇေန့်၊ န့ ပီ ဂဲတ် မာဂါ စုဝ်း လေး ဒီ ငါယ် အာဆောလူ တွိုန်။ ဟဲ့ ဟွတ့်၊ ငါယ် အန် ဝီ ဘ့လာင်၊ ဝီ ပွိုန် ယိုဝ်။ အန် ဝီ ယိတ့် ဟာဝ်၊ တဲး အာနာနီ ဝီ စိုပ် အန် ခဲင် အိုမ်။ 19 ဝါယ် အန် တီ အန် ဝီ ဟူမ် ဘူမ်၊ တဲး အန် ဝီ မိုဝ်း ပ့လူမ်။

20 ဝါယ် အန် တီ အာဆောလူ ကွယ် ခဲင် မိူင် ဒါမာခူ အာဒါ ဖွုန် ဖန် ဆီငဲ။ အန် ယီ စုး ဒီ ဟာဝ် လိုပ် ခဲင် ဇူင် ကြိုပ် ဂေ ဒူအီ အာယူဒါ ဇဝ်ဖြာ၊ ဟုဝ် ဒါရာ အူ ဇေန့်။ အန် တဝ်း၊ ဇဝ် ယေဆူ မုး ဂွန် ဇဝ်ဖြာ။ 21 ဂေ ဒူအီ ထူမ် ဂြုဝ်း ပီ ကာလာင် အန်၊ ဂေ ဘောကာဂ့လျီတ် ဝီ အာမ် ကာဆဝ်။ ဂေ တဝ်း၊ “အန် မုး ဒူအီ အီ မှေတ့် ဂေ ဒူအီ ညှိုမ် ဇဝ် ယေဆူ ခဲင် မိူင် ယေရူဆာလဲမ်။ အန် မိူဝ် ဟဲ့ တး ဒီ နီ၊ တဲး အန် ဝီ မှေတ့် ဘော ဂေ အီ ညှိုမ်၊ တဲး အန် ဝီ တိုယ် ဂေ ဇမ် ဒီ အာတ့် ဂေ ဒါ တာင် အီ ယဲတ့် ဂေ ဒူအီ အီ လှူ ဒီ ဇဝ်ဖြာ။ မှဝ် န့ ပါယ် ပီ ဘျွင် အန် နဝ်း။း” 22 ပွုန် ဇဝ်ဖြာ ယီ ဟဲ့ ကြဲ ဒီ ကိူန် ခဲင် နဝ်း အာဆောလူ၊ တဲး ဘော ဂေ ဒူအီ အာယူဒါ အီ ကွယ် ခဲင် မိူင် ဒါမာခူ တွိုန် ဝီ အာမ် ကာပွါ။ အန် ကာလာင် ဒီ ဂေ၊ တဲး ဂေ နပ် ဆီချာ၊ ဇဝ် ယေဆူ မုး ဒူအီ ပီ ရဝ်း ပီ တိုယ် ဇဝ်ဖြာ တဲး အန် ချွတ် ဒူအီ။

23 ဝါယ် အန် တီ အာဝ် ဘော လှေန့်၊ ဂေ ဒူအီ အာယူဒါ ဝီ တဝ်း ဒီ ငဝ်း ဝဲန် အာဆာက် အန်။ 24 န့ ယီ မိုဝ်း ဒူအီ အီ ကာလာင် ဒီ အန်၊ တဲး အန် နပ် လွင် ပီ ခြာမ် ဂေ။ ဂေ ဟဲ့ ဘ်ု ဒီ မာလုဝ်း မိူင် နွင် ခိူန် နွင် ဝန်၊ ဘ်ု ဒီ ငဝ်း ဝဲန် အန်။ 25 ခဲင် မှိုဝ်၊ ဂေ ဒီဘဲ ဇဝ် ယေဆူ ယီ ဒိုဝ်း ကြိုက် အူ ဘူင့်၊ တဲး အာဆောလူ ကွယ် နာ ခဲင်၊ ဘျွာ လူင် အန် ခဲင် ကာဒဝ် ရဲင် မိူင်၊ စွယ် အန် ပြာ ဒီ လေး ခဲင် မိူင် ဒါမာခူ တွိုန်။

26 ဝါယ် အန် တီ အာဆောလူ ဝီ ဟာဝ် ဇမ် မိူင် ယေရူဆာလဲမ်။ အန် တဝ်း ဒီ ကွယ် ရိုမ် ဒူပ် ဂေ ဒူအီ အီ ညှိုမ် ဇဝ် ယေဆူ။ ဂေ ဘောကာဂ့လျီတ် ယီ ယုဝ် အန်။ ဂေ တူ ညှိုမ် အန် ဟဲ့ ဟွတ့် ဘျွင် နဝ်း အန်၊ ဝီ ဘဲန် ဒီဘဲ ဇဝ် ယေဆူ။ 27 န့ ယီ မိုဝ်း ဒူအီ အူ ဝီ၊ အန် စိူဝ် အာဘာနာဘ။ အန် ဝီ ဒဲ့ အာဆောလူ၊ တိုယ် အန် ဟာဝ် ဇမ် ဒီ အာတ့် ဂေ ဒူအီ ပီ ရဝ်း ပီ တိုယ် ဇဝ် ယေဆူ။ အန် ဝီ ခဲ ဒီ ဂေ လွင် ပီ ပါယ် အာဆောလူ ဒီ ယိုဝ် ဇဝ် ယေဆူ ဒေါ ဟာဝ် အန် ဒူပ် န့တေန့် တွိုန်။ အန် ဘော ခဲ လွင် ဇဝ် ယေဆူ ဟဲ့ ကာလာင် ဂြုဝ်း ဒီ အာဆောလူ။ ဟဲ့ ဟွတ့်၊ အန် ဝီ ခဲ တဲး ဂေ နပ် လွင် အာဆောလူ ဟဲ့ ဝီ ကာလာင် ဂြုဝ်း ဆိူဝ်၊ တဲး ဂေ ဒူအီ ခဲင် မိူင် ဒါမာခူ ကော နပ် လွင် ဇဝ် ယေဆူ ချွတ် ဒူအီ။ 28 အာဘာနာဘ ဟဲ့ ဟွတ့် ကာလာင် ဒီ ဂေ လွင် အန် တီ၊ အာဆောလူ ဝီ ကွယ် ရိုမ် ဒူပ် ဂေ ခဲင် မိူင် ယေရူဆာလဲမ်။ အန် မိူဝ် တူ ယုဝ် မာဆေ၊ ဟာဝ် ဒွန် နာ ဒွန် ပ့လုဝ့်၊ ဝီ ကာလာင် လွင် ဇဝ် ယေဆူ ဒီ ဂေ ဒွန် အီ။ 29 အန် ဝီ ကာလာင် ဂြုဝ်း ဆိူဝ် ဒီ ဂေ ဒူအီ အာယူဒါ အီ ကာလာင် ဂြုဝ်း ဂြိက်။ ဂေ ယီ တဝ်း ဒီ ငဝ်း ဝဲန် အန်။ 30 ဂေ ဘီနွင် ဘော နပ် လွင် အန် တီ၊ ဂေ ဝီ တိုယ် အာဆောလူ၊ တဲး အန် လူင် မိူင် ကေဆာရေ။ ဟဲ့ ဟွတ့်၊ ဂေ ဝီ တိုယ် အန် ဟာဝ် ဇမ် မိူင် ထာဆူ။

31 ဝါယ် အန် တီ ဂေ ဒူအီ ခဲင် ဖိုင် ဇဝ် ယေဆူ၊ ဂေ အီ ကွယ် ခဲင် အိူင် ယူဒါ၊ အိူင် ဂါလီလေ ဘော အိူင် ဆာမာရီ၊ ဂေ ပွိုန် ကွယ် ဒါခိုယ်၊ အာဝ် ဟူ မိုဝ်း ဒူအီ အီ ဆီ မှေတ့် ဂေ။ နဝ်း ညှိုမ် ဂေ၊ န့ ကြဲ ဒီ မန်၊ ဂေ ဘော ယုဝ် ဒီ ဘူင် ပီ တူ အိုင် ဇဝ်ဖြာ။ ပါယ် တီ နဝ်း ဖွိုမ် ဇဝ်ဖြာ ဘော စွယ် ဂေ၊ တဲး ဂေ ဝီ ဝဲ ကိူန် လွှိုမ် ခါ အာတ့်။

32 ဝါယ် အန် တီ အာပေတာရူ တွိုန် ဝီ ဟာဝ် ဘဲန် ပ့လုဝ့် ဘဲန် ပ့လုဝ့် ခဲင် မိူင် ဘော မိူင်။ အန် ဘော ဟာဝ် ယွတ် ဂေ ဒူအီ အီ ညှိုမ် ဇဝ် ယေဆူ၊ အီ ကွယ် ခဲင် မိူင် လူဒါ။ 33 ခဲင် မိူင် လူဒါ တွိုန်၊ န့ မိုဝ်း ဒူအီ အူ ဝီ။ အန် စိူဝ် အာနေအာတ်။ ဘော ဒဲ ဘော ပ့လဝ် အန် ဟဲ့ ယမ်။ ဟဲ့ ပွိုန် ဒါ ဆီနမ် အန် ဟဲ့ ကွယ် အိတ် ဒူင် အိတ် အန်။ 34 အာပေတာရူ ဝီ တဝ်း ဒီ အန်၊ “အိုယ် အာနေအာတ်၊ ဇဝ် ယေဆူ တဲး ဆဝ် မဲ ကဲန် ဒေါ တီ နီ။ တဲး မဲ ယိတ့် ဒိုဝ်း အုန် မ့ဘေ၀် မဲ။” အန် ဟဲ့ ဟွတ့် ကာလာင် ဂြုဝ်း တီ၊ အာနေအာတ် ဝီ ယိတ့် အူ ဇေန့်။ 35 ဂေ ဒူအီ အီ ကွယ် ခဲင် မိူင် လူဒါ တွိုန် ဘော ဂေ ဒူအီ အီ ကွယ် ခဲင် မိူင် ဆာရူန်၊ ဂေ ဘော ယိုဝ် အန်၊ ဂေ ဝီ ဘျွင် နဝ်း၊ ညှိုမ် ဇဝ် ယေဆူ။

36 ခဲင် မိူင် ယုဝ်ဖာ န့ ယီ မိုဝ်း အီဘိုန့် အူ ဝီ၊ အန် စိူဝ် ထာဘီထာ။ ဂေ ဘော တဲး အန် စိူဝ် ဒုဝ်ခါ။ ဘော အန် ဟဲ့ မုး ဒီဘဲ ဇဝ် ယေဆူ။ ဆေဆေ အန် ဟဲ့ ဒွိုမ် ဘူင် နာ မွှိုမ်၊ စွယ် ဂေ ဒူအီ ဂိန်။ 37 ဒေါ ကွယ် အာပေတာရူ ခဲင် မိူင် လူဒါ တွိုန်၊ ထာဘီထာ တီ ဟဲ့ ဆဝ် ဘော ယမ်။ ဂေ ဝီ ဟပ် အန် တာ အိုမ်။ ဟဲ့ ဟွတ့်၊ ဂေ ဝီ ဘ့လေး အုန် အန် ခဲင် ဟူင် ခြွင့် ဒဲင်။ 38 မိူင် လူဒါ ဂါယ် မိူင် ယုဝ်ဖာ အာဝ် လာယ် ကာတူင့်။ ခုဝ်၊ ဂေ ဒီဘဲ ဇဝ် ယေဆူ အီ ကွယ် ခဲင် မိူင် ယုဝ်ဖာ ဘော နပ် လွင် အာပေတာရူ ကွယ် မိူင် လူဒါ၊ ဂေ ဝီ တိုယ် ဒူအီ အာ ဝီ၊ တဲး ဂါယ် ဟာဝ် ဒဲ့၊ တဲး အန် တး ခြန် ခြန်။

39 ပန် တီ အာပေတာရူ ဟာဝ် ဒူပ် ဂါယ်၊ ဇမ် မိူင် ယုဝ်ဖာ။ အန် ဟဲ့ ဟွတ့် ဇမ်၊ ဂေ ဝီ တိုယ် အန် ဟုဝ့် နာ ဒဲင် ဟာဝ် လိုပ် ခဲင် ဟူင် တွိုန် အူ ဇေန့်။ ဂေ ယာ ဆီပြး ဘောကာဂ့လျီတ်၊ ဝီ တး ကွယ် ရူပ် အာပေတာရူ ဘော ယာမ်။ ဂေ ဝီ ဘျ ဒီ အန် ခြိုင် တာ ပဲ့ ဟဲ့ ဘူင် ဒွါ ထာဘီထာ ဒီ ဂေ ဒေါ အိမ် အန်။

40 အာပေတာရူ ယီ စ်ု ဂေ ဒွန် အီ လေး ခဲင် ဟူင် တွိုန်။ ဟဲ့ ဟွတ့်၊ အန် ဝီ ခြိုပ်ခြဝ်၊ ဆာခိုဝ် ဇဝ်ဖြာ။ အန် ဝီ မာငး ယွတ် ဒုဝ် ဘူင့် အီဘိုန့် တွိုန်၊ ဝီ တဝ်း၊ “အိုယ် ထာဘီထာ၊ တဲး မဲ ယိတ့်။” ဝါယ် အန် တီ ထာဘီထာ ဝီ ဘ့လာင် ငါယ် အန်။ အန် ဘော ယိုဝ် အာပေတာရူ၊ အန် ဝီ ယိတ့် တုတ့် ဒူင် အိတ် အန်။ 41 အာပေတာရူ ဝီ စွယ် အန် တဲး အန် ယိတ့် စွင့်။ ဟဲ့ ဟွတ့်၊ အာပေတာရူ ဝီ ဒဲ့ ဂေ ဒူအီ ညှိုမ် ဇဝ် ယေဆူ ဘော ယာ ဆီပြး ဂေ တွိုန်၊ တဲး ဂေ ပွိုန် ဒီ ယိုဝ်၊ ထာဘီထာ ဟဲ့ ဝီ ယိတ့် ဝီ အိမ်။ အန် ဝီ အာပ် ဒွါ ထာဘီထာ ဒီ ဂေ၊ တဲး ဂေ ဝီ ကွယ် ရိုမ်။ 42 ဂေ ဒူအီ ခဲင် မိူင် ယုဝ်ဖာ ဘော မိူင် ကော နပ် လွင် အန် တီ၊ တဲး ဂေ ဒူအီ ကိူန် ကော ညှိုမ် ဇဝ် ယေဆူ။ 43 အာပေတာရူ ယီ ကွယ် လှေန့် ခဲင် မိူင် ယုဝ်ဖာ။ အန် ကွယ် ခဲင် ကာင် ဒူအီ အူ ဝီ၊ အီ စဲ ဟုန် ဒုဝ် ဆတ်ဒါဝါ အီ စိူဝ် အာဆီမူန်။