1 န့ ယီ မိုဝ်း ဒူအီ အာမျုဝ် ရုဝ်မာ အူ ဝီ၊ အန် ကွယ် မိူင် ကေဆာရေ။ အန် စိူဝ် အာကောနေလီ။ အန် မုး ဘုဝ် အီ အိုပ် ဒါ ဆိုက် အူ မာယဝ်း။ ဒါ ဆိုက် ပီ အိုပ် အန်၊ ဂေ ကွယ် ခဲင် ဒပ် အီတာလီ။ 2 ဒူအီ တီ ဘော ဂေ ဒူအီ အီ ကွယ် ခဲင် ကာင် အန်၊ ဂေ ဘောကာဂ့လျီတ် ဒူပ် ဒါရာ။ ဂေ ညှိုမ် ဇဝ်ဖြာ အာခါခ်ု။ အန် ဘော မိုဝ်း နဝ်း ဒီဟာင်၊ ဒွါ ရွိုန် ကိူန် ဒီ ဒူအီ ဂိန် ခဲင် အိူင် ယူဒါ။ ဒွန် ဆီငဲ၊ ဒွန် ဆီငဲ အန် ဘော ဆာခိုဝ် ဒီ ဇဝ်ဖြာ။ 3 အူ ဆီငဲ၊ ဒေါ နုဝ့် အူယ် နာရီ ဝါယ် ဆီငဲ ကာတဲ၊ အန် ဘော ယိုဝ် အာရူင် ပီ ဘျ ဇဝ်ဖြာ ဒီ အန်။ အန် ယိုဝ် အာမူ အာမာတ် ဇဝ်ဖြာ အူ ကာဒင်၊ ဟဲ့ တး ဇမ် ဒူင် ကွယ် အန် တဝ်း၊ “အိုယ်၊ အာကောနေလီ။”

4 အာကောနေလီ ယီ ယုဝ် ကာဆဝ်။ အန် ဝီ ဆီတွင့် ယွတ် အာမူ အာမာတ် ဇဝ်ဖြာ တီ။ အန် ဝီ ဒီမွှတ် တဝ်း၊ “မာဆေ ပီ လုဝ် မဲ ဇဝ် ဒီ အုဝ်။း”

အာမူ အာမာတ် ဇဝ်ဖြာ ဝီ တဝ်း၊ “ပီ ဆာခိုဝ် မဲ ဒွန် မျုဝ် ဘော ပီ ဘူင် မဲ နာ မွှိုမ် ဒွန် မျုဝ်၊ န့ ဟဲ့ ဟုဝ့် ဇမ် ဒီ အာတ့် ဇဝ်ဖြာ။ ဇဝ်ဖြာ မိူဝ် လှုဝ်း ဇိုဝ် တီ ဒွန် မျုဝ်။ 5 ဒေါ တီ နီ၊ မဲ လုဝ် ဒဲ့ ဒူအီ မင် အီ၊ စ်ု ဂေ ဟာဝ် မိူင် ယုဝ်ဖာ၊ တဲး ဂေ ဟာဝ် ဟြေတ့် ဒူအီ အူ ဝီ၊ အီ စိူဝ် အာဆီမူန်။ အန် စိူဝ် ဘော အာပေတာရူ။ 6 အန် ကွယ် ခဲင် ကာင် ဒူအီ အူ ဝီ အီ စဲ ဟုန်။ ဘော အန် စိူဝ် အာဆီမူန်။ ကာင် အန် ကွယ် ခူပ် အိုမ် တာင်။”

7 အာမူ အာမာတ် ဇဝ်ဖြာ ဟဲ့ ဟွတ့် ကာလာင် ဂြုဝ်း တီ၊ အန် ဝီ ဟြာယ် ဝွင့် ဒီ အာတ့် အာကောနေလီ တွိုန်။ ပန် တီ အာကောနေလီ ဝီ ဒဲ့ ဒဲစေန့် အန် အာ ဝီ ဘော ဒါ ဆိုက် အီ ညှိုမ် ဇဝ်ဖြာ အူ ဝီ၊ အီ ကွယ် ရိုမ် ဒူပ် အန် ဆေဆေ။ 8 အန် ဝီ ကာလာင် တူတ့် ပဲ့ ဟဲ့ ယိုဝ် အန် ဒီ ဂေ။ ဟဲ့ ဟွတ့်၊ အန် စ်ု ဂေ ဟာဝ် မိူင် ယုဝ်ဖာ။

9 ပါ ခဲညှာ ဂေ ဝီ ဟာဝ် ဒူပ် န့တေန့်။ ဒေါ ဟဲ့ ကာတတ် ဂေ ဒီ ဇမ် မိူင် ယုဝ်ဖာ တွိုန်၊ န့ ယီ မုး အာပေတာရူ။ အန် ဟဲ့ ဟုဝ့် ကွယ် ဒီ ခြွင့် နာ ဒဲင်။ အန် တဝ်း ဒီ ဆာခိုဝ် ဇဝ်ဖြာ။ ဒေါ အန် တီ ဟဲ့ မုး ကာတဲ ဆီငဲ။ 10 အန် မိူဝ် ကာပြာန့် ပီ ဒီ ဟူမ်။ ဂေ အီ ကွယ် ခဲင် ကာင် ဝီ ရဲန် ပီ ဒီ ဟူမ်။ ဒေါ အန် တီ အန် ဝီ ယိုဝ် အာရူင် ပီ ဘျ ဇဝ်ဖြာ ဒီ အန်။ 11 အန် ဝီ ယိုဝ် ဂါင်ဟြာဝ် ဟဲ့ န့ဝိုဝ်း။ န့ မိုဝ်း ဘိက် တာင် အူ ဖိူန် အီ မိုဝ်း ဘော ဝန် ဟဲ့ ပက် ဒီ ဖွုန် ကာတုဝ့်၊ ဟဲ့ လေး လူင် ဂါင်ဟြာဝ်၊ ဇမ် ဒီ အာတ့် အန်။ 12 နာ ခဲင် ဘိက် တီ၊ န့ မိုဝ်း ဒုဝ် ဆတ်ဒါဝါ ဒွန် မျုဝ်။ မင် ဒုဝ် မိုဝ်း ပ့လဝ် ဖွုန် ဘ့လာက်။ မင် ဒုဝ် မုး အာမျုဝ် အီ ကွယ် ခဲင် ကာဒဝ် ကာဒါယ်။ မင် ဒုဝ် မုး မာဆိမ် အီ ဘိုန့် ခဲင် ဘ့လေန့်။ 13 အန် ဘော ယိုဝ် ဂြုဝ်း အီ တဝ်း ဒီ အန်၊ “အိုယ် အာပေတာရူ၊ တဲး မဲ ယိတ့်၊ ငဝ်း ဟူမ် ဒုဝ် ဂေ တီ။”

14 အာပေတာရူ ဝီ တဝ်း၊ “အိုယ် မဲ ဇဝ်၊ အာဝ် ပွိုန် ဘူင် ပါယ် တီ ဒေါ မှဝ်။ အုဝ် တူ ဒွိုမ် ဟူမ် ပီ ဒီ ဟူမ် အီ တူ ဆီငါ၊ ပီ တူ တဲး ဒါရာ ယေ ဟူမ်။”

15 ဂြုဝ်း တွိုန် ဝီ တဝ်း ဒီ အန်၊ “ခဲ့ ပီ ဘူင် ဇဝ်ဖြာ တဲး န့ ဆီငါ၊ မဲ ကွဲ့ တဝ်း၊ န့ တူ ဆီငါ။”

16 အူယ် စိုပ် အာပေတာရူ ယိုဝ် ဇိုဝ် တီ။ ဟဲ့ ဟွတ့်၊ ဘိက် တွိုန် ဝီ ဟုဝ့် ဂါင်ဟြာဝ် အူ ဇေန့်။

17 ဝါယ် အန် တီ အာပေတာရူ ဝီ ကွယ်၊ ဇေန့်ဇာ လွင် မာဆေ န့ မုး လွင် ဒါင် အာရူင် ပီ ဘျ ဇဝ်ဖြာ ဒီ အန်။ ဒေါ အန် တီ ဂေ ဒူအီ ပီ တိုယ် အာကောနေလီ တွိုန်၊ ဂေ ဘော နပ်၊ ကာင် အာဆီမူန် တွိုန် ကွယ် ဒီ မှဝ်။ ဟဲ့ ဟွတ့် ဂေ ဟဲ့ ဇမ် ဒီ အာတ့် မာလုဝ်း ကာင် အန်။ 18 ဂေ မိူဝ် ဒီမွှတ် တဝ်း၊ “အာဆီမူန် အီ စိူဝ် ဘော အာပေတာရူ၊ အန် ကွယ် ခဲင် ကာင် နီ။း”

19 ဒေါ အန် တီ အာပေတာရူ ယီ ဆီ ကွယ် ဇေန့်ဇာ လွင် အာရူင် တွိုန်၊ နဝ်း ဖွိုမ် ဇဝ်ဖြာ ဝီ တဝ်း ဒီ အန်၊ “န့ မိုဝ်း ဒူအီ အူယ် ဝီ၊ ဂေ ဟဲ့ တး၊ ဟြေတ့် မဲ။ 20 တဲး မဲ ယိတ့် လူင် နာ ခြိုမ်၊ ဟာဝ် ဒူပ် ဂေ။ ကွဲ့ တဲး မဲ ဇေန့်ဇာ မာဆေ၊ ယုဝ် န့ မှာန် အာဝ် မှာန်။ အုဝ် ဟဲ့ တိုယ် ဂေ တး ဒဲ့ မဲ။”

21 ပန် တီ အာပေတာရူ မိူဝ် လူင်။ အန် တဝ်း ဒီ ဂေ ဒူအီ တွိုန်၊ “န့ မုး အုဝ်၊ ဒူအီ ပီ ဟြေတ့် ဘေ။ မှဝ် န့ ပါယ်၊ ပီ တး ဇမ် ဘေ ဒီ နီ။း မာဆေ ပီ လုဝ် ဘေ။း”

22 ဂေ တဝ်း၊ “န့ မိုဝ်း ဒါ ကာညာ ယေ၊ အန် စိူဝ် အာကောနေလီ။ အန် မုး ဘုဝ် အီ အိုပ် ဒါ ဆိုက် အူ မာယဝ်း။ အန် ဘော မုး ဒူအီ မွှိုမ်၊ အီ ညှိုမ် ဇဝ်ဖြာ အာခါခ်ု။ ဂေ ဒူအီ အာမျုဝ် ယူဒါ ဒွန် အီ နပ် ဒီ ကာလာင် နာ မွှိုမ် လွင် အန်။ အာမူ အာမာတ် ဇဝ်ဖြာ အူ ကာဒင် ဟဲ့ တး စ်ု အန်၊ တဲး အန် တိုယ် ယေ ဟာဝ် ဇမ် ဒူင် ကွယ် မဲ၊ တဲး ယေ ဒဲ့ မဲ တး ဇမ် ကာင် အန်။ ပန် တီ အန် ဒီ ပွိုန် ဒီ ထူမ် ဂြုဝ်း ပီ လုဝ် မဲ ကာလာင် ဒီ အန်။” 23 ဂေ ဟဲ့ ဟွတ့် ကာလာင် ဂြုဝ်း တီ၊ အာပေတာရူ ဝီ ဘာင် ဂေ လိုပ် ခဲင် ကာင် အန်၊ တဲး ဂေ ဘဲန် ခဲတ့် အန်။ 24 ပါ ခဲညှာ အာပေတာရူ ဝီ ဟာဝ် ဒူပ် ဂေ။ ဘော ဂေ ဘီနွင် မင် အီ၊ အီ ကွယ် ခဲင် မိူင် ယုဝ်ဖာ တွိုန်၊ ဂေ ဟာဝ် ရိုမ် ဒူပ် အန်။ 25 ပေါ အူ ဆီငဲ အန် ဝီ တး ဇမ် မိူင် ကေဆာရေ။ အာကောနေလီ တွိုန် ဟဲ့ နှဝ့် ဂေ တး။ အန် ဟဲ့ ဟွတ့် ဒဲ့ ဝေါဝဲ အန် ဂေ ဂိုက် အန်၊ တဲး ဂေ တး ကာဇု ခဲင် ကာင် အန်။ ပန် တီ အာပေတာရူ လိုပ် ခဲင် ကာင် အာကောနေလီ။ အာကောနေလီ မိူဝ် တး ရွုး အန်။ အန် မိူဝ် ဂိုပ် ဒီ အာတ့် အာပေတာရူ။ 26 အာပေတာရူ ယီ စ်ု အန် ယိတ့် တဝ်း၊ “တဲး မဲ ယိတ့်။ ဘော အုဝ် မုး ဒူအီ ပီ မဲ။”

27 ပန် တီ ဂါယ် ဝီ လာယ် ကာလာင် ဂြုဝ်း၊ ဟာဝ် လိုပ် ခဲင် ကာင်။ အန် ဘော ယိုဝ် ဂေ ဒူအီ ကိူန် ဟဲ့ တး ဇမ် ခဲင် ကာင် တီ။

28 အာပေတာရူ ဝီ ကာလာင် ဂြုဝ်း ဒီ ဂေ တဝ်း၊ “ဘေ ဟဲ့ နပ်၊ ဒါရာ ယေ ဒူအီ အာယူဒါ တူ တဲး ယေ ဟာဝ် ဘဲန် ဂိုက် ဂေ ဒူအီ အာမျုဝ် ဟဝ်။ ဒါရာ တူ တဲး ယေ ဟာဝ် လိုပ် ခဲင် ကာင် ဂေ။ ဇဝ်ဖြာ ယီ ဟဲ့ ဘျ ဒီ အုဝ်၊ ကွဲ့ တဲး အုဝ် တဝ်း၊ ဂေ ဒူအီ အာမျုဝ် ဟဝ် တူ ဘွတ်၊ တူ ခမ် ဒါရာ။ 29 ခုဝ်၊ ဒေါ မိုဝ်း ဂိုက် ဘေ တး ဒူင် ကွယ် အုဝ်၊ ဒဲ့ အုဝ် တး ဒူင် ကွယ် ဘေ၊ အုဝ် မိူဝ် တူ တဝ်း မာဆေ။ အုဝ် မိူဝ် ဟာဝ် ဒူပ် ဂေ အူ ဇေန့်။ ဒေါ တီ နီ အုဝ် ယီ ဒီမွှတ် ဘေ၊ တဲး အုဝ် နပ်၊ မှဝ် န့ ပါယ် ပီ ဒဲ့ ဘေ အုဝ် တး ဒူင် ကွယ် ဘေ။း”

30 အာကောနေလီ ဝီ တဝ်း၊ “န့ ဟဲ့ ပွိုန် ဖွုန် ဆီငဲ၊ အုဝ် ဟဲ့ ကွယ် ခဲင် ကာင် နီ၊ ယိူန် ဘူမ်။ ဒေါ မုး အာခြာဝ် ပီ ဒေါ တီ နီ၊ ကာဘက် အူယ် နာရီ ဝါယ် ကာတဲ ဆီငဲ၊ အုဝ် ဘော ဆာခိုဝ် ဇဝ်ဖြာ။ ဒေါ ဆာခိုဝ် အုဝ် တီ အူ ဇေန့်၊ န့ မိုဝ်း ဒါ အူ ဝီ အီ ဟဲ့ စှိုပ် ခြိုင် ဘ့လာင် ရာဝ် တး ကာပ့လုး ဒူင် ကွယ် အုဝ်။ 31 အန် ဟဲ့ တဝ်း၊ ‘အိုယ် မဲ အာကောနေလီ၊ ဇဝ်ဖြာ ဟဲ့ ဟွတ့် ယိုဝ် ပီ ဆာခိုဝ် မဲ ဒွန် မျုဝ်။ အန် မိူဝ် ဟဲ့ လှုဝ်း နာ မွှိုမ် ဒွန် မျုဝ် ပဲ့ ဟဲ့ ဘူင် မဲ၊ ပီ ဒွါ မဲ ဒီ ဂေ ဒူအီ ဂိန်။ 32 ဒေါ တီ နီ၊ မဲ လုဝ် ဒဲ့ ဒူအီ မင် အီ၊ စ်ု ဂေ ဟာဝ် မိူင် ယုဝ်ဖာ၊ တဲး ဂေ ဟာဝ် ဟြေတ့် ဒူအီ အူ ဝီ၊ အီ စိူဝ် အာဆီမူန်။ အန် စိူဝ် ဘော အာပေတာရူ။ အန် ကွယ် ခဲင် ကာင် ဒူအီ စဲ ဟုန် အူ ဝီ။ ဘော အန် စိူဝ် အာဆီမူန်။ ကာင် အန် ကွယ် ခူပ် အိုမ် တာင်။’ 33 အန် ဟဲ့ ဟွတ့် ကာလာင် ဂြုဝ်း တီ အူ ဇေန့် အုဝ် ဟဲ့ တိုယ် ဒူအီ ဟာဝ် ဒူင် ကွယ် မဲ၊ တဲး ဂေ ဒဲ့ မဲ တး ဒီ နီ။ မဲ မိူဝ် ဟဲ့ တး။ ဒေါ တီ နီ ယေ ဒွန် အီ ဟဲ့ တး ကာဇု ဒီ နီ။ ယေ ဘော နပ်၊ ဘော ဇဝ်ဖြာ ကွယ် ရိုမ် ဒူပ် ယေ။ ယေ ဆီ ထူမ် တူတ့် ဒွန် မျုဝ် ပီ ကာလာင် ဇဝ်ဖြာ ဒီ မဲ။”

34 အန် ဟဲ့ ဟွတ့် ကာလာင် ဂြုဝ်း တီ၊ အာပေတာရူ ဝီ တဝ်း၊ “ဒေါ တီ နီ အုဝ် ဟဲ့ နပ် ဆီချာ လွင် ဇဝ်ဖြာ။ အန် တူ တဝ်း၊ အာမျုဝ် ဒူအီ အူ မျုဝ် ဟဲ့ ဘွတ် လွှိုမ် အာမျုဝ် ဒူအီ ပေါ အူ မျုဝ်။ 35 ခဲင် ဒူအီ ဒွန် မျုဝ်၊ အာဆေ ဟဲ့ ညှိုမ် ဇဝ်ဖြာ ဘော ဘူင် နာ မှာန် နာ မွှိုမ်၊ ဇဝ်ဖြာ ဒီ ဘော အိုင် အန်။ 36 ဘေ ဒွန် အီ ဟဲ့ နပ် လွင် ဒါရာ ကာမာယ် ပီ ဒွါ ဇဝ်ဖြာ ဒီ ဒူအီ အီဆာရေလ။ ဇဝ်ဖြာ ဟဲ့ တဝ်း ဒီ ဒွါ နဝ်း ဂျီတ် ဒီ ဒူအီ ဒွန် အီ၊ အီ ညှိုမ် ဇဝ် ယေဆူ။ အန် မုး ဒါ အီ ပီ တိုယ် ဇဝ်ဖြာ တဲး အန် ချွတ် ဒူအီ။ အန် ဘော မုး အန် ဇဝ် အီ အိုပ် တူတ့် ဒွန် မျုဝ်။ 37 ဘေ ဟဲ့ နပ် လွင် ဇဝ် ယေဆူ။ ခါ အာတ့် ဒါ ဆာရာ အာယောဟာန် တွိုန် ဟဲ့ မာနုဝ်၊ ဂေ ဒူအီ လုဝ် ခမ် ဒီ စိုပ် ခဲင် အိုမ်။ ဟဲ့ ဟွတ့်၊ ဇဝ် ယေဆူ ဟဲ့ ဝီ ဟာဝ် ဟုဝ် ဒါရာ ဇဝ်ဖြာ ဘော စုး ခဲင် အိူင် ဂါလီလေ ကော ဇမ် ခဲင် အိူင် ယူဒါ ဘော အိူင်။ 38 ဘေ မိူဝ် ဟဲ့ နပ် လွင် ဇဝ်ဖြာ။ အန် ဟဲ့ ဒွါ နဝ်း ဖွိုမ် အန် ဘော ပွုန် အန် ဒီ ဇဝ် ယေဆူ၊ အီ တး မိူင် နာဆာရေတ့်။ ဟဲ့ ဟွတ့်၊ ဇဝ် ယေဆူ ဟဲ့ ဟာဝ် ဒွန် နာ ဒွန် ပ့လုဝ့် ခဲင် မိူင် ဘော မိူင်၊ ဘူင် နာ မွှိုမ် ဒွန် မျုဝ်။ ခဲ့ မိုဝ်း ဒူအီ ပီ လိုပ် ကာနမ်၊ အန် ဟဲ့ တဲး ဂေ ဘောကာဂ့လျီတ် ဝီ ကဲန်။ ပါယ် တီ န့ လိုဝ်း ဆီချာ၊ ဇဝ်ဖြာ ဟဲ့ ကွယ် ရိုမ် ဒူပ် အန်၊ စွယ် အန်။

39 ယေ ယီ မုး ဒူအီ အီ ကွယ် ရိုမ် ဒူပ် ဇဝ် ယေဆူ။ ဒေါ ကွယ် အန် ခဲင် မိူင် ဂေ ဒူအီ အာယူဒါ ဘော ခဲင် မိူင် ယေရူဆာလဲမ် အန် ဟဲ့ ဘူင် တူတ့် ဒွန် မျုဝ် ပီ တဝ်း အုဝ် ဒေါ တီ နီ။ ဟဲ့ ဟွတ့်၊ ဂေ ဝီ ငဝ်း အာဆာက် အန်၊ တဲး အန် ယမ် ဒဲင် ရွင့် ကာဝဲ့။ 40 အန် ဟဲ့ ဟွတ့် ယမ်၊ ဘော နုဝ့် အူယ် ဆီငဲ၊ ဇဝ်ဖြာ ဟဲ့ တဲး အန် ဝီ ယိတ့် ဝီ အိမ်၊ တဲး ဒူအီ ယိုဝ် အန်။ 41 ဂေ ဒွန် အီ ယီ တူ ပွိုန် ယိုဝ် အန်။ န့ ယီ မုး ယေ၊ ဝီ ပီ ရဝ်း ဇဝ်ဖြာ ခါ အာတ့်။ ယေ ဟဲ့ ပွိုန် ယိုဝ် အန်၊ တဲး ယေ ဝီ ပွိုန် ကာလာင် ဒီ အီ ဟဝ်။ ယေ မိူဝ် ဟဲ့ ကွယ် ရိုမ် ဒူပ် အန်၊ ဟူမ် ဘူမ်၊ ဒျီင် အိုမ် ရိုမ် ဒူပ် အန် ဝါယ် ဝီ ယိတ့် ဝီ အိမ် အန်။ 42 ဇဝ် ယေဆူ မိူဝ် ဟဲ့ စ်ု ယေ ဟာဝ် ကာလာင် ဒီ ဒူအီ လွင် အာဆာက် အန်။ အန် မုး ဒူအီ ပီ ရဝ်း ဇဝ်ဖြာ၊ တဲး အန် ဘဲန် ဒါ တာင် အီ ဆုင်ဖျာတ် ဒါရာ ဒီ ဒူအီ ဒွန် အီ။ ဘော ဂေ ဒူအီ အိမ်၊ ဘော ဂေ ဒူအီ အီ ဟဲ့ ဟွတ့် ယမ်၊ ဇဝ် ယေဆူ ဒီ ဆုင်ဖျာတ် ပဲ့ ဟဲ့ ဘူင် ဂေ၊ ယုဝ် န့ မွှိုမ်၊ အာဝ် မွှိုမ်။ 43 န့ ဘော မိုဝ်း ဂေ ဒူအီ အီ ဘျာန် ဂြုဝ်း ဇဝ်ဖြာ၊ ဂေ ဒွန် အီ ဟဲ့ ဒွိုမ် ကာလာင် လွင် ဇဝ် ယေဆူ တဝ်း၊ ‘ဒွန် အီ၊ အီ ညှိုမ် ဇဝ် ယေဆူ၊ အန် ဇဝ် ဒီ ဘော ဂဝ်း ဝဲန် မှာပ် ဂေ။ အန် ဟဲ့ မိုဝ်း ပွုန် တာင် ပါယ် တီ။’”

44 ဒေါ ဆီငျာ ကာလာင် အာပေတာရူ ဂြုဝ်း တီ၊ နဝ်း ဖွိုမ် ဇဝ်ဖြာ ဘော တး လူင် လိုပ် ခဲင် နဝ်း ဒွန် အီ၊ အီ ထူမ် ဂြုဝ်း ပီ ကာလာင် အန်။ 45 ဂေ ဒူအီ အာယူဒါ အီ ဟဲ့ ညှိုမ် ဇဝ် ယေဆူ၊ အီ ဟဲ့ တး ဒူပ် အာပေတာရူ၊ ဂေ ဟဲ့ အာမ် ကာဆဝ်။ ဂေ တူ ဒွိုမ် ယိုဝ် ဇဝ်ဖြာ ဒွါ နဝ်း ဖွိုမ် အန်၊ တဲး န့ လိုပ် ခဲင် နဝ်း ဒူအီ၊ အီ တူ မုး အာမျုဝ် ယူဒါ။ 46 ဂေ ယိုဝ် ဒူအီ အီ ကွယ် ခဲင် ကာင် အာကောနေလီ တွိုန်၊ ဟဲ့ ကာလာင် ဂြုဝ်း ပီ တူ ဒွိုမ် နပ် ဂေ ဘော အိူပ် ဇဝ်ဖြာ။

47 ပန် တီ အာပေတာရူ ဝီ တဝ်း၊ “နဝ်း ဖွိုမ် ဇဝ်ဖြာ ဟဲ့ လိုပ် ဘော ခဲင် နဝ်း ဒူအီ ဂေ နီ။ န့ ပီ နဝ်း ဖွိုမ် ဇဝ်ဖြာ ဟဲ့ ဒွိုမ် လိုပ် ခဲင် နဝ်း ယေ။ ခုဝ်၊ ယေ တူ ပွိုန် ခြဲ ဂေ ခမ် ဒီ စိုပ် ခဲင် အိုမ်။” 48 အန် ဝီ စ်ု ဂေ ဒွန် အီ၊ တဲး ဂေ ခမ် ဒီ စိုပ် ဂေ ခဲင် အိုမ်၊ တဲး ဒွန် အီ နပ်၊ ဂေ ဟဲ့ ညှိုမ် လိုပ် ဇဝ် ယေဆူ။ ဂေ ဟဲ့ ဟွတ့် ခမ် ဒီ စိုပ် ခဲင် အိုမ်၊ ဂေ ဝီ မှာန့်၊ တဲး အာပေတာရူ ကွယ် ရိုမ် ဒူပ် ဂေ အာဒါ ဖွုန် ဖန် ဆီငဲ။