1 ဂေ ဒူအီ ပီ ရဝ်း ပီ တိုယ် ဇဝ် ယေဆူ ဘော ဂေ ဘီနွင် အီ ကွယ် ခဲင် အိူင် ယူဒါ၊ ဂေ ဘော နပ် လွင် ဂေ ဒူအီ အာမျုဝ် ဟဝ် ဟဲ့ ညှိုမ် ဂြုဝ်း ဇဝ်ဖြာ။ 2 ခုဝ် အန် တီ ဝါယ် ဝီ တး ဇမ် အာပေတာရူ ခဲင် မိူင် ယေရူဆာလဲမ်၊ ဂေ ဒူအီ အာမျုဝ် ယူဒါ အီ ဟဲ့ ညှိုမ် ဇဝ် ယေဆူ၊ ဂေ ဝီ ဖျာက် အန်။ 3 ဂေ တဝ်း၊ “မှဝ် န့ ပါယ် ပီ ဟာဝ် လိုပ် မဲ ခဲင် ကာင် ဂေ ဒူအီ အာမျုဝ် ဟဝ်။း မှဝ် န့ ပါယ် ပီ ဟူမ် ရိုမ် ကွယ် ရိုမ် မဲ ဒူပ် ဂေ ခဲင် ကာင် ဂေ။း”

4 အာပေတာရူ ယီ စုး ဒီ ခဲ တူတ့် ဒွန် မျုဝ်၊ တဲး ဂေ နပ် ဆီချာ လွင် ပဲ့ ဟဲ့ ဘူင် ဇဝ်ဖြာ။ 5 အန် တဝ်း၊ “အုဝ် ဟဲ့ ကွယ် ခဲင် မိူင် ယုဝ်ဖာ။ ဒေါ ဆာခိုဝ် အုဝ်၊ အုဝ် ဟဲ့ ယိုဝ် အာရူင် ပီ ဘျ ဇဝ်ဖြာ ဒီ အုဝ်။ ပီ ယိုဝ် အုဝ်၊ န့ ပီ ဘိက် တာင် အူ ဖိူန် လေး လူင် ခဲင် ဂါင်ဟြာဝ်။ န့ ဘော မိုဝ်း ဝန် ပက် ဖွုန် ကာတုဝ့်။ န့ လူင် ဇမ် ဒီ အာတ့် အုဝ်။ 6 အုဝ် ဘော ယွတ် ဆီချာ၊ မာဆေ န့ မုး၊ အီ ကွယ် ခဲင် ဘိက် တီ။ အုဝ် ဝီ ယိုဝ်၊ န့ မိုဝ်း ဒုဝ် ဆတ်ဒါဝါ မျုဝ် ဖွုန် ပ့လဝ် ကွယ် နာ ခဲင်။ ဘော ဒုဝ် ဆတ်ဒါဝါ အီ ကွယ် ခဲင် ပြဲ၊ ဘော အာမျုဝ် အီ ကွယ် ခဲင် ကာဒဝ် ကာဒါယ်၊ ဘော မာဆိမ် အီ ဘိုန့် ခဲင် ဘ့လေန့် ဘော ဒွန် မျုဝ် ဟဲ့ ကွယ် နာ ခဲင်။ 7 န့ ဘော မိုဝ်း ဂြုဝ်း အီ တဝ်း ဒီ အုဝ်၊ ‘အိုယ် အာပေတာရူ၊ တဲး မဲ ယိတ့်၊ ငဝ်း ဟူမ် ဒုဝ် ဂေ တီ။’

8 အုဝ် ယီ တဝ်း၊ ‘အိုယ် မဲ ဇဝ်၊ အာဝ် ပွိုန် ဘူင် ပါယ် တီ ဒေါ မှဝ်။ အုဝ် တူ ဒွိုမ် ဟူမ် ပီ ဒီ ဟူမ် အီ တူ ဆီငါ၊ ပီ တူ တဲး ဒါရာ ယေ ဟူမ်။’

9 ဂြုဝ်း တွိုန် ဝီ တဝ်း ဒီ အုဝ်၊ ‘ခဲ့ ပီ ဘူင် ဇဝ်ဖြာ တဲး န့ ဆီငါ၊ မဲ ကွဲ့ တဝ်း၊ န့ တူ ဆီငါ။’ 10 အူယ် စိုပ် အုဝ် ဝီ ယိုဝ် ဇိုဝ် တီ။ ဟဲ့ ဟွတ့်၊ ဘိက် တွိုန် ဝီ ဟုဝ့် ဂါင်ဟြာဝ် အူ ဇေန့်။

11 ဒေါ အန် တီ အူ ဇေန့်၊ န့ ယီ မိုဝ်း ဒူအီ အူယ် ဝီ တး ဇမ် ကာင် ဒူင် ကွယ် အုဝ်။ ဒါ ကာညာ အီ အိုပ် ဂေ ခဲင် မိူင် ကေဆာရေ တွိုန်၊ အန် ဟဲ့ စ်ု ဂေ ဟာဝ် ဇမ် ဒူင် ကွယ် အုဝ်။ 12 နဝ်း ဖွိုမ် ဇဝ်ဖြာ ဝီ စ်ု အုဝ်၊ တဲး အုဝ် ဟာဝ် ဒူပ် ဂေ၊ ကွဲ့ တဲး အုဝ် ဇေန့်ဇာ မာဆေ၊ ယုဝ် န့ မှာန် အာဝ် မှာန်။ ဘော ဂေ ဘီနွင် ဒဝ် ဝီ၊ အီ ကွယ် ဒီ နီ၊ ဂေ ဟဲ့ ဟာဝ် ဒူပ် အုဝ်။ ယေ ယီ တး ဇမ် မိူင် ကေဆာရေ၊ ယေ ဘော လိုပ် ခဲင် ကာင် ဒါ ကာညာ ဂေ ဒူအီ အီ ဟဲ့ တး ဒဲ့ အုဝ် တီ။ 13 ဒေါ အန် တီ ဒါ ကာညာ တွိုန် ဝီ ကာလာင် ဒီ ယေ၊ တဲး ယေ ထူမ်။ အန် မိူဝ် ခဲ လွင် ဟဲ့ ယိုဝ် အန် အာမူ အာမာတ် ဇဝ်ဖြာ အူ ကာဒင် တး ဇမ် ဒူင် ကွယ် အန်။ အာမူ အာမာတ် ဇဝ်ဖြာ တီ ဝီ တဝ်း ဒီ အန်၊ ‘မဲ လုဝ် ဒဲ့ ဒူအီ မင် အီ၊ စ်ု ဂေ ဟာဝ် မိူင် ယုဝ်ဖာ၊ တဲး ဂေ ဟာဝ် ဟြေတ့် ဒူအီ အူ ဝီ၊ အီ စိူဝ် အာဆီမူန်။ အန် စိူဝ် ဘော အာပေတာရူ။ တဲး ဂေ ဒဲ့ အန် တး ဒူင် ကွယ် မဲ။ 14 ဂြုဝ်း ပီ ကာလာင် အန် ဒီ မဲ၊ န့ ဒီ ချွတ် ဘော မဲ ဘော န့ဟူမ် မဲ။’ ပါယ် တီ အာကောနေလီ ဝီ ခဲ ဒီ အုဝ်။

15 ပန် တီ အုဝ် ဝီ ကာလာင် ဂြုဝ်း ဇဝ်ဖြာ ဒီ ဂေ။ ဒေါ ကာလာင် အုဝ်၊ န့ ဘော မိုဝ်း နဝ်း ဖွိုမ် ဇဝ်ဖြာ တး လိုပ် ခဲင် နဝ်း ဂေ၊ တဲး န့ ပီ ဒေါ ဟဲ့ ဒွိုမ် တး လိုပ် နဝ်း ဖွိုမ် ဇဝ်ဖြာ ခဲင် နဝ်း ယေ။ 16 ပန် တီ အုဝ် ယီ လှုဝ်း ဂြုဝ်း ပီ ဒွိုမ် ကာလာင် ဇဝ် ယေဆူ ဒီ ယေ။ အန် ဟဲ့ ဒွိုမ် တဝ်း၊ ‘ဒါ ဆာရာ အာယောဟာန် ဟဲ့ စိုပ် ဒူအီ ခဲင် အိုမ်။ အုဝ် ယီ ဒီ တဲး နဝ်း ဖွိုမ် ဇဝ်ဖြာ လိုပ် ခဲင် နဝ်း ဘေ။’ 17 ဝါယ် ညှိုမ် ဂေ ဇဝ် ယေဆူ အီ ဟဲ့ ချွတ် ဂေ၊ ပီ ဒွါ ဇဝ်ဖြာ ဒီ ဂေ ဘော ပီ ဒွိုမ် ဒွါ ဇဝ်ဖြာ ဒီ ယေ၊ န့ မုး အူ မျုဝ်။ ခုဝ် အန် တီ အုဝ် တူ ပွိုန် ခြဲ ဇဝ်ဖြာ ဘူင် ပီ အိုင် အန်။”

18 အာပေတာရူ ဟဲ့ ဟွတ့် ကာလာင် ဂြုဝ်း တီ ဒီ ဂေ ဒူအီ ညှိုမ် ဇဝ် ယေဆူ ခဲင် မိူင် ယေရူဆာလဲမ် တွိုန်၊ ဂေ တူ ဝီ တဝ်း မာဆေ။ ဂေ ဝီ အိူပ် ဇဝ်ဖြာ။ ဂေ တဝ်း၊ “န့ ဘော ပါယ် တီ။ ဇဝ်ဖြာ ဟဲ့ တဲး ဘော ဂေ ဒူအီ အီ တူ မုး အာမျုဝ် ယူဒါ ဝီ ဝဲန် နဝ်း ဘြိမ် ဂေ၊ တဲး ဂေ ဝီ ဒိုဝ်း နဝ်း ကာမာယ် ပီ ဒွါ ဇဝ်ဖြာ ဒီ ဂေ၊ တဲး ဘော ဂေ ပွိုန် ဒီ ကွယ် ရိုမ် ဒူပ် ဇဝ်ဖြာ ဆေဆေ။”

19 ဝါယ် ငဝ်း ယမ် ဂေ ဒူအီ အာယူဒါ အာဆာထေဖာန်၊ န့ ယီ မိုဝ်း ဂေ ဒူအီ အီ ညှိုမ် ဇဝ် ယေဆူ၊ ဂေ ဟဲ့ ဇမ် ဒုက် တာင်။ ဟဲ့ ဟွတ့်၊ ဂေ ဟဲ့ တဝ် ကာယဝ်း၊ ဟာဝ် ဘဲန် ပ့လုဝ့် ဘဲန် ပ့လုဝ့်။ မင် အီ၊ ဂေ ဟဲ့ ဟာဝ် တူင့်၊ ဇမ် မိူင် ဖီနိက်၊ ဂုန် အိုမ် အီ စိူဝ် ခူဖြုဝ် ဘော မိူင် အန်ထီအုဝ့်။ ခဲင် မိူင် ဂေ တီ၊ ဂေ ဝီ ကာလာင် လွင် ဇဝ် ယေဆူ ဒီ ဂေ ဒူအီ အာယူဒါ ဒီလူယ်။ ဂေ တူ ကာလာင် မာဆေ ဒီ ဂေ ဒူအီ အာမျုဝ် ဟဝ်။ 20 န့ ယီ မိုဝ်း ဒူအီ အီ ညှိုမ် ဇဝ် ယေဆူ မင် အီ၊ ဂေ တး ဂုန် အိုမ် အီ စိူဝ် ခူဖြုဝ် ဂါယ် မိူင် ကူရေန့်။ ဂေ ဘော ဟာဝ် မိူင် အန်ထီအုဝ့်၊ စုး ဒီ ကာလာင် ဒီ ဂေ ဒူအီ အာမျုဝ် ဂြိက်၊ ကာလာင် ဒီ ဂေ လွင် ဇဝ် ယေဆူ ချွတ် အီ။ 21 ဂေ ဘော မိုဝ်း ပွုန် ဇဝ်ဖြာ၊ တဲး ဒူအီ ကိူန် ကော ညှိုမ် ဇဝ် ယေဆူ။

22 ဂေ ဒူအီ ခဲင် ဖိုင် ဇဝ် ယေဆူ၊ အီ ကွယ် ခဲင် မိူင် ယေရူဆာလဲမ်၊ ဂေ ဘော နပ် လွင် အန် တီ။ ဟဲ့ ဟွတ့်၊ ဂေ ဝီ တိုယ် အာဘာနာဘ၊ တဲး အန် ဟာဝ် မိူင် အန်ထီအုဝ့်။ 23 အန် ဟဲ့ ဟွတ့် ဇမ် မိူင် အန်ထီအုဝ့်၊ အန် ဝီ ယိုဝ် ဇဝ်ဖြာ ဟဲ့ ကာဝေ ဘော ဂေ။ အန် ဝီ အိူပ် ဇဝ်ဖြာ၊ ဝီ မာနုဝ် ဂေ၊ တဲး ဂေ ဘောကာဂ့လျီတ် ဒူပ် ဆီချာ ဇဝ် ယေဆူ၊ တဲး ဘော နဝ်း ဂေ ရွက့် ကာဆဝ် ဇဝ် ယေဆူ။ 24 အာဘာနာဘ ဟဲ့ မုး ဒူအီ မွှိုမ်။ နဝ်း ဖွိုမ် ဇဝ်ဖြာ ဟဲ့ နုဝ့် ခဲင် နဝ်း အန်။ အန် မိူဝ် ညှိုမ် ဆီချာ ဇဝ်ဖြာ။ ခုဝ်၊ ဘော ဂေ ဒူအီ ကိူန် ကော ညှိုမ် အန် ဇဝ်၊ ဝီ လိုပ် ဖိုင် ဇဝ် ယေဆူ။

25 ဝါယ် အန် တီ အာဘာနာဘ ဝီ ဟာဝ် မိူင် ထာဆူ၊ တဲး အန် ဝီ ဟြေတ့် အာဆောလူ တွိုန်။ 26 အန် ဟဲ့ ဟွတ့် ဝီ ကာတုန့် အာဆောလူ၊ အန် ဝီ ဒဲ့ အာဆောလူ ဒူပ် အန်၊ တဲး ဂါယ် ဝီ ဟာဝ် မိူင် အန်ထီအုဝ့်။ အာဒါ အူ ဆီနမ် ဂါယ် ကွယ် ခဲင် မိူင် တီ၊ မာနုဝ် ဂေ ဒူအီ ခဲင် ဖိုင် ဇဝ် ယေဆူ။ ခဲင် မိူင် အန်ထီအုဝ့် တွိုန်၊ ဂေ စုး ဒီ တဲး ဂေ ဒူအီ ညှိုမ် ဇဝ် ယေဆူ စိူဝ် ဒူအီ ခိတ်။ (ဂြုဝ်း “ခိတ်” တီ၊ ဆီဖဝ် အန် လေး၊ “အီ ဒူပ် ဒူအီ ပီ ရဝ်း ပီ တိုယ် ဇဝ်ဖြာ”)။

27 ဒေါ အန် တီ န့ မိုဝ်း ဒူအီ အီ ဘျာန် ဂြုဝ်း ဇဝ်ဖြာ မင် အီ၊ ဂေ လေး မိူင် ယေရူဆာလဲမ်၊ ဝီ ဟာဝ် မိူင် အန်ထီအုဝ့်။ 28 ဒူအီ အူ ဝီ၊ အန် စိူဝ် အာဂါဘူ။ အန် ဘော ယိတ့် ကာလာင် ပီ ဘျ နဝ်း ဖွိုမ် ဇဝ်ဖြာ ဒီ အန် လွင် အီ ဒီ ပါယ် နာ အာတ့်။ အန် တဝ်း၊ န့ ဒီ မိုဝ်း အာခါန် အေတ့် ဘူမ် တး ဇမ် ခဲင် မိူင် ဒွန် မိူင် ပီ အိုပ် ဂေ ဒူအီ ရုဝ်မာ။ (ဟဲ့ ဘဲန် အာခါန် အေတ့် ဘူမ် တီ ဒေါ အိုပ် ခုန်ဒီခမ် အာကာလုဝ်ဒီလက် မိူင် ရုဝ်မာ)။ 29 ဂေ ဒီဘဲ ဇဝ် ယေဆူ၊ အီ ကွယ် ခဲင် မိူင် အန်ထီအုဝ့်၊ ဂေ ဒွန် အီ တဝ်း ဒီ စွယ် ဂေ ဘီနွင် အီ ကွယ် ခဲင် အိူင် ယူဒါ။ ဒွန် အီ ဒွါ ခဲ့ ပွိုန် အန် ဒွါ။ 30 ပါယ် တီ၊ ဂေ ဝီ ကာဇု ရွိုန် ဂေ၊ ဒွါ ဒီ အာဘာနာဘ ဂါယ် အာဆောလူ၊ တဲး ဂါယ် ဝီ ဒွါ ဒီ ဒါ တာင် အီ အိုပ် ဖိုင် ဇဝ် ယေဆူ။