1 ဒေါ အန် တီ န့ မိုဝ်း ခုန်ဒီခမ် အာဟေရူတ် တွိုန်။ အန် ဟဲ့ မှေတ့် ဂေ ဒူအီ အီ လိုပ် ဖိုင် ဇဝ် ယေဆူ မင် အီ၊ တဲး ဂေ ကာဒုး ဒုက် တာင်။ 2 န့ ဘော မိုဝ်း အာယာကူပ်၊ အီ မုး အီကတ် အာယောဟာန်။ ခုန်ဒီခမ် အာဟေရူတ် ဟဲ့ စ်ု အီ ငဝ်း ယမ် အန်၊ တာ မာပွါ့ လာင်၊ ဒဲပ် ဂိန့် အန်။ 3 အန် ဘော နပ်၊ ဂေ ဒူအီ အာယူဒါ အိုင် ပီ ဘူင် အန် ဇိုဝ် တီ၊ အန် တဝ်း ဒီ ဝီ မှေတ့် ဘော အာပေတာရူ။ အန် ဘူင် ပါယ် တီ ဒေါ ဘူင် ဂေ ဒူအီ အီဆာရေလ ဘ့လွယ် တူ ဟပ် ဆီနမ် ဘြး ခဲင် ခါမုန်။ 4 အာဟေရူတ် တွိုန် ဝီ မှေတ့် အာပေတာရူ၊ ဝီ ခြွင့် အန် ခဲင် ကာပိုမ်။ အန် ဘော စ်ု ဂေ ဒါ ဆိုက် ဂိုဝ် ဒီ ဒဝ် ဝီ၊ တဲး ဂေ လာယ် ကာပ့လု ဘ်ု အာပေတာရူ အူ ဇေန့် ဖွုန် ဝီ။ အန် တဝ်း ဒီ ဘူင် တဲး န့ ဘဲန် အာမူ တာင် ဝါယ် ဟွတ့် ဘူင် ဂေ ဘ့လွယ် တွိုန်၊ တဲး ဂေ ဒူအီ ကိူန် ပွိုန် ဒီ ယွတ် ဒေါ ဆုင်ဖျာတ် ဂေ အာမူ အန်။

5 ပါယ် တီ၊ အာပေတာရူ ကွယ် ခဲင် ကာပိုမ်။ ဂေ ဒူအီ ခဲင် ဖိုင် ဇဝ် ယေဆူ၊ ဂေ ယီ ဆာခိုဝ် ဆေဆေ ဒါင် အန်၊ တဲး ဇဝ်ဖြာ စွယ် အန်။

6 အာတ့် ဇမ် ဆီငဲ ဒီ ဆုင်ဖျာတ် အာဟေရူတ် အာမူ အန်၊ အာပေတာရူ ဟဲ့ အိတ် ခဲင် မှိုဝ်။ အန် အိတ် ကာတဲ ဒါ ဆိုက် အာ ဝီ။ ဂေ ဟဲ့ ပက် ဒဲ အန် ဘော အာ ဘ့လာက်၊ တဲး ဒဲ အန် ကာဒိုက် ဒီ ဒဲ ဒါ ဆိုက် အာ ဝီ တွိုန်။ ဒါ ဆိုက် ပေါ အူ ဝီ ကွယ် ဘ်ု ဒီ အာတ့် မာလုဝ်း။ 7 ဒေါ အန် တီ န့ မိုဝ်း အာမူ အာမာတ် ဇဝ်ဖြာ တး ကာပ့လုး ဒီ အန် အူ ဇေန့်။ ဒူင် ကွယ် အာပေတာရူ ကော ဘ့လာင်။ အာမူ အာမာတ် ဇဝ်ဖြာ တီ ဟဲ့ တး ဒုး အာပေတာရူ၊ ဘျိတ့် အန်၊ တဲး အန် ယိတ့်။ အန် တဝ်း ဒီ အာပေတာရူ၊ “တဲး မဲ ယိတ့် နင်ဂန်။” ဒေါ အန် တီ ဝန် ဟိန် ပီ ပက် ဂေ ဒီ ဒဲ အန်၊ ဝီ ကာဂဝ်း စုဝ်း ရာင် အန်။

8 ပန် တီ အာမူ အာမာတ် ဇဝ်ဖြာ ဝီ တဝ်း ဒီ အာပေတာရူ၊ “တဲး မဲ ရိတ် ဆဲ့ ဒီ ညွယ် မဲ၊ ဝီ စှိုပ် ခူဒိန့် မဲ။” အန် ဝီ ဘူင် ပီ စ်ု အာမူ အာမာတ် ဇဝ်ဖြာ အန် ဘူင်။ အာမူ အာမာတ် ဇဝ်ဖြာ ပီ ဝီ တဝ်း၊ “တဲး မဲ စှိုပ် ဘော ဆီတုဝ် တာင် မဲ ဟာဝ် ဒူပ် အုဝ်။” ဟဲ့ ဟွတ့်၊ အန် ဝီ ဘူင် ပီ စ်ု အာမူ အာမာတ် တီ။ 9 ပါယ် တီ၊ အာပေတာရူ ဝီ လေး ခဲင် ကာပိုမ် တွိုန်၊ ဝီ ဟာဝ် ဒူပ် အာမူ အာမာတ် ဇဝ်ဖြာ။ အန် ယီ တူ ထာင် ပီ ဘူင် အာမူ အာမာတ် ဇဝ်ဖြာ တီ ဟဲ့ မုး အာခါခ်ု။ အန် ထာင်၊ န့ မုး အာရူင် ပီ ဘျ ဇဝ်ဖြာ ဒီ အန်။ 10 ဂါယ် ဟဲ့ ဟွတ့် ကာလုဝ်း ပွုန် ဒူအီ ဘ်ု ကာပိုမ် ဘော အာ ပ့လုဝ့်၊ ဂါယ် ဝီ တး ဇမ် မာလုဝ်း တာင်၊ အီ မုး မာလုဝ်း ဟိန်၊ အီ ဝီ လိုပ် ဟာဝ် ခဲင် မိူင်။ ဘော မာလုဝ်း တီ ဝီ န့ဝိုဝ်း ရာင် အန်၊ တဲး ဂါယ် ပွိုန် ဒီ လေး။ ဂါယ် ဟဲ့ ဟွတ့် ဟာဝ် ဒူပ် န့တေန့် ခဲင် မိူင်၊ အာမူ အာမာတ် ဇဝ်ဖြာ ဘော ဟြာယ် အူ ဇေန့်။

11 ဝါယ် အန် တီ အာပေတာရူ ဝီ နပ်၊ န့ ပါယ် မှဝ် ဒီ အန်။ အန် ဝီ တဝ်း၊ “ဒေါ တီ နီ အုဝ် ဟဲ့ နပ် ဆီချာ၊ န့ မုး ဇဝ်ဖြာ။ အန် ဟဲ့ တိုယ် အာမူ အာမာတ် အန်၊ တဲး အန် ချွတ် အုဝ်၊ ကွဲ့ တဲး အာဟေရူတ် ပွိုန် ဒီ ဘူင် ပီ ခြာမ် အန်၊ ကွဲ့ တဲး န့ ဘဲန် ပီ နှဝ့် န့ဒဝ့် ဂေ ဒူအီ အာယူဒါ ဒွန် အီ။”

12 ဝါယ် ဟဲ့ ဟွတ့် လိုဝ်း ဒီ အာပေတာရူ လွင် အန် တီ၊ အန် ဝီ ဟာဝ် ဒီ ကာင် နာင် မာရီ အူ ဇေန့်။ နာင် မာရီ တီ၊ အန် မုး မာ အာယောဟာန် အီ စိူဝ် ဘော အာမာကူ။ ခဲင် ကာင် နာင် မာရီ တီ၊ ဂေ ဒူအီ ကိူန် ဟဲ့ တး ဆာခိုဝ် ဒီ ဇဝ်ဖြာ။ 13 အာပေတာရူ ဟဲ့ တး ဇမ် ကာင် တီ၊ အန် ဝီ ဒွယ် မာလုဝ်း ကာင်။ န့ မိုဝ်း ဂွန် အီဘိုန့် အူ ဝီ အီ မုး ဒဲစေန့် ခဲင် ကာင် တီ။ အန် စိူဝ် ရုဝ်ဒေ။ ဂွန် တီ ဘော တဝ်း ဒီ ဟာဝ် ဝိုဝ်း မာလုဝ်း။ 14 အန် ဝီ ယိုဝ် ဂြုဝ်း အာပေတာရူ၊ အန် မိူဝ် ဟဲ့ နပ် န့ မုး အာပေတာရူ၊ နဝ်း အန် ဘော ဒါခိုယ် ကာဆဝ်၊ တဲး အန် ကော ပိဝ် ဒီ ဝိုဝ်း မာလုဝ်း။ အန် ဝီ ဟာဝ် လိုပ် ခဲင် ကာင် အူ ဇေန့်၊ တဝ်း ဒီ ဂေ ဒူအီ ကိူန်၊ “အာပေတာရူ ဟဲ့ တး ကွယ် ဒီ အာတ့် မာလုဝ်း။”

15 ဂေ အီ ကွယ် ခဲင် ကာင် တွိုန် ယီ တဝ်း ဒီ အန်၊ “မဲ ဟဲ့ ရိုဝ်။ အာဝ် မုး အန်။” အန် ယီ နဲ့ တဝ်း၊ “ဟဲ့ မုး၊ ဟဲ့ မုး။” ပန် တီ ဂေ တဝ်း၊ “အန် ဟဲ့ ယိုဝ် အာမူ အာမာတ် ဇဝ်ဖြာ အီ ဘ်ု အာပေတာရူ။”

16 အာပေတာရူ ယီ ဆီ နဲ့ ကွယ် ဒွယ် မာလုဝ်း။ ဟဲ့ ဟွတ့်၊ ဂေ ဘော ဟာဝ် ဝိုဝ်း မာလုဝ်း။ ဂေ ဝီ အာမ် ကာဆဝ် လွင် အန် တီ။ 17 ပန် တီ အာပေတာရူ ဝီ စုဝ့် ဒဲ အန်၊ တဲး ဂေ ထူမ် ဂြုဝ်း အန်။ ဟဲ့ ဟွတ့်၊ အန် ဝီ ခဲ တူတ့်၊ တဲး ဂေ နပ် ဆီချာ လွင် ပီ ပါယ် ဇဝ်ဖြာ ဒီ ဘူင်၊ တဲး အန် ပွိုန် ဒီ လေး ခဲင် ကာပိုမ် တွိုန်။ အန် ဟဲ့ ဟွတ့် ကာလာင် တူတ့်၊ အန် ဝီ တဝ်း၊ “တဲး ဘေ ခဲ တူတ့် ဇိုဝ် တီ ဒီ အာယာကူပ် ဘော ဂေ ဘီနွင် အီ တူ ကွယ် ဒီ နီ၊ တဲး ဘော ဂေ နပ် လွင် အန် တီ။” အာပေတာရူ ဟဲ့ ဟွတ့် ကာလာင် ဂြုဝ်း တီ၊ အန် ဝီ လေး ခဲင် ကာင် ဂေ တီ၊ ဝီ ဟာဝ် ပေါ အူ ပ့လုဝ့်။

18 ပါ ခဲညှာ ဆိန့်ဝး၊ ဂေ ဒါ ဆိုက် ဝီ ဆီနန် ဆီနိူင် ကူပ် တူ နပ် ဂေ မှဝ် န့ ပါယ်၊ အာပေတာရူ ဆော နပ် ဒီ ဟြာယ်။ 19 ခုန်ဒီခမ် အာဟေရူတ် တွိုန် ယီ တဲး ဂေ ဟြေတ့် ဆီချာ အာပေတာရူ။ ဂေ ဟဲ့ ဟွတ့် ဟြေတ့်၊ ယီ တူ ယိုဝ် အန်။ ပန် တီ အန် ဝီ ဒီမွှတ် ဆီချာ ဂေ ဒါ ဆိုက် အီ ဘ်ု ကာပိုမ် တွိုန်၊ ဟဲ့ ဟွတ့် အန် ဝီ ဒွါ အာမိင် တဲး ဂေ ငဝ်း ယမ် ဒါ ဆိုက် ဒွန် အီ၊ အီ ဟဲ့ ဘ်ု အာပေတာရူ။

ဝါယ် အန် တီ ခုန်ဒီခမ် အာဟေရူတ် တွိုန် ဝီ လေး ခဲင် အိူင် ယူဒါ၊ ဝီ ဟာဝ် ကွယ် ခဲင် မိူင် ကေဆာရေ။ 20 အန် ယီ ရူ ကာဆဝ် ဒီ ဒူအီ ခဲင် မိူင် ထူရုဝ် ဂါယ် မိူင် ဆီဒူန်။ ဂေ ဒူအီ ခဲင် မိူင် အာ မိူင် တီ၊ ဂေ ယီ လုဝ် စိုဝ်း ပီ ဒီ ဟူမ် ဂေ ခဲင် မိူင် ပီ အိုပ် အာဟေရူတ် တွိုန်။ ခုဝ် အန် တီ ဘော အာ မိူင် တီ ဟဲ့ လာယ် ဖြူမ်၊ တဲး ဂေ တိုယ် ဒူအီ မင် အီ ဟာဝ် ဇမ် ဒီ အာတ့် ခုန်ဒီခမ် အာဟေရူတ်၊ တဲး အန် ကာပ့လု နဝ်း၊ တဲး အန် ဝီ ကာလဝ့် ဒီ ဂေ။ အာတ့် ဟာဝ် ဂေ ဒူင် ကွယ် ခုန်ဒီခမ် အာဟေရူတ်၊ ဂေ ဟဲ့ ဟွတ့် ကာလာင် ဂြုဝ်း ဒီ အာဘ့လာထူ၊ အီ အိုပ် ကြုဝ်ကြာမ် ခုန်ဒီခမ် အာဟေရူတ်၊ တဲး ဘော အန် ဝီ ဘဲန် ဂိုက် ဂေ။

21 ဆီငဲ ဒီ တး ဇမ် ဂေ ဒီ အာတ့် ခုန်ဒီခမ် အာဟေရူတ် တီ၊ အန် ဟဲ့ စှိုပ် ခြိုင် ခုန်ဒီခမ် အန် ဘော ကွယ် ဒဲင် မာလာင် အန်။ အန် မိူဝ် ကာလာင် ဂြုဝ်း တဲး ဒူအီ ဒွန် အီ ထူမ်။ 22 ဂေ ဒူအီ ကိူန် အီ ယိုဝ် ဂြုဝ်း အန် တီ၊ ဂေ ဝီ ကာဖြူမ် ဒီ ဒတ် ဒွန် အီ တဝ်း၊ “ဂြုဝ်း အန် မုး ဂြုဝ်း ဇဝ်ဖြာ၊ အာဝ် မုး ဂြုဝ်း ဒူအီ။” အာဟေရူတ် မိူဝ် အိုင် ဂေ အိူပ် အန်။ အန် တူ တဝ်း၊ ဂေ လုဝ် အိူပ် မီ ဇဝ်ဖြာ။ 23 ခုဝ် အန် တီ ဇဝ်ဖြာ မိူဝ် တိုယ် အာမူ အာမာတ် အန် အူ ကာဒင်၊ တဲး အန် ဒမ် မှာပ် ဒီ အာဟေရူတ် အူ ဇေန့်။ ဟဲ့ ဟွတ့်၊ မင်ပြတ့် ဘော ဟူမ် ယင် အန်၊ တဲး အန် ကော ယမ်။

24 ဒေါ အန် တီ ဂေ ဒူအီ ကိူန် မိူဝ် ထူမ် ဂြုဝ်း ဇဝ်ဖြာ၊ ဘော မိုဝ်း ဒူအီ ကိူန် အီ ညှိုမ် ဇဝ် ယေဆူ။

25 အီ မုး အာဘာနာဘ ဂါယ် အာဆောလူ တွိုန်၊ ဂါယ် ဟဲ့ ဟွတ့် တိုယ် ရွိုန် ဒွါ ဒီ ဂေ ဒူအီ ညှိုမ် ဇဝ် ယေဆူ ခဲင် မိူင် ယေရူဆာလဲမ်၊ ဂါယ် မိူဝ် ဝီ ဝိဝ် မိူင် အန်ထီအုဝ့်။ ဂါယ် ဟဲ့ ဒဲ့ ဘော အာယောဟာန်၊ အီ စိူဝ် ဘော အာမာကူ၊ တဲး ဘော အန် ဟာဝ် ရိုမ် ဒူပ် ဂါယ်။