1 ကာတဲ ဂေ ဒူအီ ခဲင် ဖိုင် ဇဝ် ယေဆူ အီ ကွယ် ခဲင် မိူင် အန်ထီအုဝ့်၊ န့ မိုဝ်း ဒူအီ အီ ဘျာန် ဂြုဝ်း ဇဝ်ဖြာ ဘော ဂေ ဒါ ဆာရာ အီ မာနုဝ် ဒါရာ ဇဝ်ဖြာ မင် အီ၊ ဂေ စိူဝ် အာဘာနာဘ၊ အာဆီမေအူန် အီ စိူဝ် ဘော အာနီကေ၊ အာလူဆီ အီ တး မိူင် ကူရေန့်၊ ဘော အာမာနေန် အီ ဟဲ့ ဘဲန် ဂိုက် ခုန်ဒီခမ် အာဟေရူတ် ဆိန့် ဒီတဲတ် အန်၊ ဘော အာဆောလူ တွိုန်။ 2 အူ ဆီငဲ၊ ဂေ ကွယ် ရိုမ်၊ ကြိုပ် ဆာခိုဝ် ဇဝ်ဖြာ။ ဂေ ဘော ယိူန် ပီ ဒီ ဟူမ် ဂေ။ ဒေါ အန် တီ နဝ်း ဖွိုမ် ဇဝ်ဖြာ ကာလာင် ဂြုဝ်း ဒီ ဂေ တဝ်း၊ “အုဝ် ဟဲ့ ဒွိုမ် ရဝ်း ဒူအီ အာ ဝီ ခဲင် ဖိုင် ဘေ။ ဒေါ တီ နီ၊ တဲး အာဆောလူ ဂါယ် အာဘာနာဘ ဝီ ကာယဝ်း ဘေ၊ တဲး ဂါယ် ပွိုန် ဒီ ဘူင် ဂါန် ပီ ဒွိုမ် စ်ု အုဝ် ဂါယ် ဘူင်။” 3 ပန် တီ ဂေ ဝီ ဆာခိုဝ် ပေါ အူ ဇေန့် ဘော ဝီ ယိူန် ပီ ဒီ ဟူမ်။ ဟဲ့ ဟွတ့်၊ ဂေ ဝီ ဒါင် ဒဲ ဂေ ဒဲင် ဂိန့် ဂါယ်၊ ခ့ဝါင် ဂါယ် ဟာဝ်။

4 ပါယ် တီ၊ နဝ်း ဖွိုမ် ဇဝ်ဖြာ ဟဲ့ ဟွတ့် တိုယ် ဂါယ် ဟာဝ်၊ ဂါယ် မိူဝ် ဟာဝ် ဇမ် မိူင် ဆာလူခီ။ ဘော အာမာကူ အီ စိူဝ် ဘော အာယောဟာန် ဟဲ့ ဒူပ် ဂါယ် ဘော စွယ် ဂါယ်။ ဂေ အူယ် ဝီ ပဝ့် ရိုဝ် ဆင်ဖုဝ်၊ ဟာဝ် ဇမ် အူ ပ့လုဝ့် အီ မုး ဂုန် အိုမ် အီ စိူဝ် ခူဖြုဝ်။ 5 ဂေ ဟဲ့ ဇမ် မိူင် ဆာလာမီ၊ အီ ကွယ် ဒဲင် ဂုန် အိုမ် တီ၊ ဂေ ဝီ ဟာဝ် ဟုဝ် ဒါရာ ဇဝ်ဖြာ ခဲင် ဇူင် ကြိုပ် ဂေ ဒူအီ အာယူဒါ ဇဝ်ဖြာ။

6 ဂေ ဘော ဟာဝ် ဇမ် ဒွန် နာ ဒွန် ပ့လုဝ့် ဒဲင် ဂုန် အိုမ် တွိုန်၊ တဲး ကော ဇမ် မိူင် ဖာဖူ။ ခဲင် မိူင် တီ၊ ဂေ ကာတုန့် ဒူအီ အာယူဒါ အူ ဝီ၊ အီ မုး ဒါ ဆာရာ အီ နပ် ဒီ ဘူင် မျလှယ့်။ အန် ကာလုဝ် တဝ်း၊ အန် မုး ဒူအီ အီ ဘျာန် ဂြုဝ်း ဇဝ်ဖြာ။ ဒူအီ တီ၊ အန် စိူဝ် အာဘာယေဆူ။ 7 အန် ကွယ် ရိုမ် ဒူပ် ဒါ ကာညာ အီ အိုပ် မိူင်။ ဒါ ကာညာ တီ၊ အန် စိူဝ် အာဆေရာခီ ပေါလူ။ အန် မိုဝ်း အာငျာန်။ အန် ဘော ဒဲ့ အာဆောလူ ဂါယ် အာဘာနာဘ၊ တဲး ဂါယ် တး ဒူင် ကွယ် အန်၊ ကာလာင် ဂြုဝ်း ဇဝ်ဖြာ ဒီ အန်။ 8 န့ ယီ မုး ဒါ ဆာရာ အီ နပ် ဒီ ဘူင် မျလှယ့် တွိုန်။ အန် စိူဝ် ဘော အာအေလီမာတ်။ အန် ယီ တူ အိုင် ဂါယ်။ အန် ထေဝ် ဒီ ခြဲ ဒါ ကာညာ တွိုန်၊ ကွဲ့ တဲး အန် ညှိုမ် ဇဝ် ယေဆူ။ 9 အာဆောလူ တွိုန်၊ အန် စိူဝ် ဘော အာပေါလူ၊ အန် ယီ ငွိုပ် ခဲမ် အာအေလီမာတ်။ နဝ်း ဖွိုမ် ဇဝ်ဖြာ မိူဝ် ဟဲ့ နုဝ့် ခဲင် နဝ်း အန်။ အန် ဝီ တဝ်း၊ 10 “မဲ မုး ဂွန် ကာနမ် ဟာယ်၊ အီ စိူဝ် ဆာတာန်။ ခဲ့ ဘော မိုဝ်း နာ ဘွတ်၊ မဲ တူ အိုင်။ မဲ ဘော မုး ဒူအီ အီ နပ် ဒီ ကာလုဝ် ဆေဆေ။ မှဝ် န့ ပါယ် ပီ ထေဝ် မဲ ဒီ ဘူင်၊ တဲး န့တေန့် ဆိူဝ်၊ န့တေန့် ဘွတ် ဝီ ဘဲန် န့တေန့် တူ ဘွတ်။ 11 ဒေါ တီ နီ၊ တဲး မဲ ယွတ်၊ ဇဝ်ဖြာ ဒီ ဘူင် တဲး ငါယ် မဲ အပ်၊ ကွဲ့ တဲး မဲ ပွိုန် ဒီ ယိုဝ် မာဆေ။ န့ ဒီ လှေန့်၊ မဲ တူ ဒီ ပွိုန် ယိုဝ် ဘ့လာင် ဆီငဲ။”

အာပေါလူ ဟဲ့ ဟွတ့် ကာလာင် ဂြုဝ်း တီ၊ ငါယ် အန် မိူဝ် အပ် အူ ဇေန့်။ အန် ဘော ဝိန် ဒီ ဘုန်၊ ဟြေတ့် ဒူအီ အီ ဒီ ပါ ဒဲ အန်၊ တိုယ် အန် ဟာဝ်။ 12 ဒါ ကာညာ တွိုန် ဟဲ့ ဟွတ့် ယိုဝ် ဇိုဝ် တီ၊ အန် မိူဝ် အာမ် ကာဆဝ် ဒီ ဒါရာ ဇဝ်ဖြာ တီ၊ န့ တဲး အန် ကော ညှိုမ် ဇဝ်ဖြာ။

13 ဝါယ် အန် တီ ဒါ ဆာရာ အာပေါလူ ဘော ဒူအီ အီ ဒူပ် အန်၊ ဂေ ဝီ ပဝ့် ရိုဝ် ဆင်ဖုဝ်၊ ဇမ် မိူင် ဖေရေဂေ၊ အီ ကွယ် ခဲင် အိူင် အီ စိူဝ် ဖမ်ဖူလီ။ ဒေါ ကွယ် ဂေ ဒူင် တီ၊ အာမာကူ တွိုန် အီ စိူဝ် ဘော အာယောဟာန်၊ အန် အာဝ် ဟူ ဒူပ် အာဘာနာဘ ဂါယ် အာပေါလူ။ အန် ဝီ ဝိဝ် မိူင် ယေရူဆာလဲမ်။ 14 အာဘာနာဘ ဂါယ် အာပေါလူ ဝီ လေး ခဲင် မိူင် ဖေရေဂေ တွိုန်၊ ဟာဝ် မိူင် အန်ထီအုဝ့် အီ ကွယ် ခဲင် အိူင် ဖီဆီဒီ။ ဒေါ ဇမ် ဆီငဲ ဒီလှဝ်၊ ဂါယ် ဝီ ဟာဝ် ခဲင် ဇူင် ကြိုပ် ဂေ ဒူအီ အာယူဒါ ဇဝ်ဖြာ၊ ထူမ် ပီ ကာလာင် ဂေ။ 15 ဂေ ဟဲ့ ဟွတ့် တိး ထမ် ဒါရာ ဘော ထမ် ပီ ဒဲမ် အုန် ဒူအီ အီ ဘျာန် ဂြုဝ်း ဇဝ်ဖြာ၊ ဂေ ဒါ အီ အိုပ် ခဲင် ဇူင် တီ၊ ဂေ ဝီ တဝ်း ဒီ အာပေါလူ ဂါယ်၊ “အိုယ် ဘာယ် ဘီနွင်၊ ဆေ ဘာယ် မိုဝ်း ဂြုဝ်း ပီ ဒီ မာနုဝ် အီ၊ တဲး ဘာယ် မာနုဝ် ဘော ယေ။”

16 ပန် တီ အာပေါလူ ဘော ယိတ့်၊ စုဝ့် ဒဲ အန် တဝ်း၊ “အိုယ် ဘေ ဒူအီ အီဆာရေလ ဘော ဘေ ဒူအီ အာမျုဝ် ဟဝ်၊ ဘေ မုး ဒူအီ အီ ညှိုမ် ဇဝ်ဖြာ အာခါခ်ု။ တဲး ဘေ ထူမ် ဂြုဝ်း အုဝ်။ 17 ဇဝ်ဖြာ ပီ ကြိုပ် အေ ဒူအီ အာမျုဝ် အီဆာရေလ၊ အန် ဟဲ့ ဒွိုမ် ရဝ်း ဂုန့် ဒင် အေ ခါ အာတ့်။ ဒေါ ကွယ် ဂေ ခဲင် မိူင် အဲဂိုပ် တွိုန်၊ အန် ဟဲ့ ရဝ်း ဂေ၊ ဟဲ့ တဲး ဂေ ဝီ ဘဲန် ဒူအီ ကိူန်၊ ဒူအီ အာမျုဝ် တာင်။ ဟဲ့ ဟွတ့်၊ အန် ဝီ ဘျ ခဲ့ တာင် ပွုန် အန်၊ ဒေါ လေး ဂေ ခဲင် မိူင် အဲဂိုပ်။ 18 အာဒါ ဖွုန် ဂိုဝ် ဆီနမ် ဇဝ်ဖြာ ဟဲ့ ယွတ် လိုမ်လာ ဂေ ဒေါ ဟာဝ် ဂေ ခဲင် ပြဲ ကာဟဝ်း။ 19 ဒေါ အန် တီ ခဲင် မိူင် ကာနန့် နီ၊ ဟဲ့ မိုဝ်း ဒူအီ ဘူ မျုဝ်။ ဇဝ်ဖြာ ဟဲ့ တဲး ဂေ စှိုမ် တူတ့်။ ဟဲ့ ဟွတ့် ပါယ် တီ၊ အန် ဝီ ဒိုဝ်း မာန် မိူင် ဒူအီ ဂေ တီ၊ တဲး န့ ဝီ ဘဲန် မာန် မိူင် အာမျုဝ် အေ။ ပဲ့ ဟဲ့ ဘူင် ဇဝ်ဖြာ ဇိုဝ် တီ ဒွန် မျုဝ်၊ န့ မုး ကာန်ု ဖွုန် မာယဝ်း ဒီ ဖန် ဂိုဝ် ဆီနမ်။ 20 ပန် တီ ဇဝ်ဖြာ ဒွါ ဂေ မိုဝ်း ဒါ ဆာရာ အီ ဆုင်ဖျာတ် အာမူ ဂေ၊ တဲး န့ ကော ဇမ် ဘာန် ဒေါ ကွယ် ဒူအီ အီ ဘျာန် ဂြုဝ်း ဇဝ်ဖြာ၊ အီ စိူဝ် အာဆာမူအေန်။ 21 ဒေါ အန် တီ ဂေ ဒူအီ အီဆာရေလ ဆီ ပွိုန် ခုန်ဒီခမ်။ ဂေ မှာန့်၊ တဲး ဇဝ်ဖြာ ဒွါ ဒီ ဂေ။ ဟဲ့ ဟွတ့်၊ ဇဝ်ဖြာ ဝီ ဒွါ ဂေ မိုဝ်း ခုန်ဒီခမ် အီ စိူဝ် အာဆောလူ။ ဂုန့် အန် စိူဝ် အာကီဆာ၊ အီ မုး ခြိုဝ် အာဘေန်ယာမ်။ အာဒါ ဖွုန် ဂိုဝ် ဆီနမ် ခုန်ဒီခမ် အာဆောလူ ဟဲ့ အိုပ် မိူင် ဂေ။ 22 ဟဲ့ ဟွတ့်၊ ဇဝ်ဖြာ ဝီ ဘ့လွာ့ ဝဲန် အန်၊ ကွဲ့ ဟူ တဲး အန် အိုပ် မိူင်၊ ဝီ တဲး အာဒါဝိတ် ဘဲန် ခုန်ဒီခမ် အီ အိုပ် ဂေ။ ဇဝ်ဖြာ ဟဲ့ ကာလာင် လွင် အာဒါဝိတ် တဝ်း၊ ‘အုဝ် ဟဲ့ ယိုဝ် အာဒါဝိတ် အီ မုး ဂွန် အာယေဆေ။ အန် မုး ဒူအီ ပီ အိုင် အုဝ်။ အန် ဒီ ဘူင် တူတ့် ဒွန် မျုဝ်၊ တဲး န့ လဝ့် နဝ်း အုဝ်။’

23 န့ ယီ မုး လှုက်လှာန် အာဒါဝိတ် တွိုန် အူ ဝီ။ ဇဝ်ဖြာ ဟဲ့ တဝ်း ဒီ တဲး အန် ဘဲန် ဒူအီ ပီ ရဝ်း ပီ တိုယ် ဇဝ်ဖြာ တဲး အန် ချွတ် ဒူအီ။ အန် စိူဝ် အာယေဆူ။ 24 အာတ့် တး အာယေဆူ ဒဲင် ကာဒါယ်၊ န့ ယဲ့ ဟဲ့ မိုဝ်း ဒါ ဆာရာ အာယောဟာန်။ အန် ဟဲ့ ဟုဝ် ဒါရာ ဇဝ်ဖြာ ဒီ ဂေ ဒူအီ အီဆာရေလ ဘော မိူင်၊ တဲး ဂေ လှုဝ်း မှာပ် ဂေ၊ ဝဲန် နာ တူ မွှိုမ်၊ တဲး အန် စိုပ် ဂေ ခဲင် အိုမ်။ 25 အာတ့် တူတ့် အာဆာက် ဒါ ဆာရာ အာယောဟာန် တီ၊ အန် ဟဲ့ တဝ်း၊ ‘ဘေ ထာင် အုဝ် မုး အာဆေ။း အုဝ် တူ မုး ဒူအီ ပီ ရဝ်း ပီ တိုယ် ဇဝ်ဖြာ။ တဲး ဘေ ဆာဒိက်။ ဒူအီ ပီ ရဝ်း ပီ တိုယ် ဇဝ်ဖြာ၊ အန် ဒီ တး ဒီ ပန် အုဝ်။ ဝန် ခူဒိန့် အန် မိူဝ်၊ အုဝ် ညှမ် ကာအာပ် ဂဝ်း။’

26 အိုယ် ဘေ ဘီနွင်၊ ဘေ လှုက်လှာန် ဒါ အာဘြာဟမ်၊ ဘော ဘေ ဒူအီ အာမျုဝ် ဟဝ်၊ အီ ညှိုမ် ဇဝ်ဖြာ အာခါခ်ု၊ ဇဝ်ဖြာ ဟဲ့ တဲး အေ ဒွန် အီ ထူမ် လွင် ဒူအီ ပီ ရဝ်း ပီ တိုယ် ဇဝ်ဖြာ၊ အီ ချွတ် ဒူအီ။ 27 ဂေ ဒူအီ အီ ကွယ် မိူင် ယေရူဆာလဲမ် ဘော ဂေ ဒါ ကာညာ အီ အိုပ် ဂေ၊ ဂေ ဘောကာဂ့လျီတ် တူ နပ်၊ အာယေဆူ တွိုန် မုး ဒူအီ ပီ ရဝ်း ပီ တိုယ် ဇဝ်ဖြာ တဲး အန် ချွတ် ဒူအီ။ ဂေ မိူဝ် တူ နပ် ပီ ဒဲမ် အုန် ဂေ ဒူအီ အီ ဘျာန် ဂြုဝ်း ဇဝ်ဖြာ၊ ပီ တိး ဂေ တဲး အီ ထူမ် ဒွန် ဇေန့် ဒွန် ဇေန့် ဒေါ ဇမ် ဆီငဲ ဒီလှဝ်။ ဒေါ ဒမ် ဂေ မှာပ် ဒီ အာယေဆူ၊ ဂေ ယီ ဘူင် ပီ ဒွိုမ် ကာလာင် ဂေ ဒူအီ အီ ဘျာန် ဂြုဝ်း ဇဝ်ဖြာ။ 28 ဂေ တူ ယိုဝ် မှာပ် ပီ ကာအာပ် အန် ယမ်။ ဂေ ယီ မှာန့် ဒီ အာဖီလာတ်၊ တဲး အန် ခ့ဝါင် ဂေ ငဝ်း ဝဲန် အန်။ 29 ပါယ် တီ၊ ဂေ ဟဲ့ ဟွတ့် ဘူင် တူတ့် ဒွန် မျုဝ် ပီ ဒွိုမ် ဒဲမ် အုန် ခဲင် ဘပ် ဇဝ်ဖြာ လွင် အန်။ ဂေ ဝီ ဒိုဝ်း ဒုဝ် ဘူင့် အန်၊ ဒိုဝ်း လူင် ဒဲင် ရွင့် ကာဝဲ့၊ ဝီ ဘ့လေး အုန် အန် ခဲင် ကာဒဝ် ဘာရေဝ်။ 30 ဇဝ်ဖြာ ယီ တဲး အန် ဝီ ယိတ့် ဝီ အိမ်၊ တဲး အန် ဝီ လေး ခဲင် ကာဒဝ် ဘာရေဝ်။ 31 ဟဲ့ ဟွတ့်၊ ဘဲန် ဆီငဲ ဘဲန် ဆီငဲ၊ အာယေဆူ ဝီ ကာပ့လုး ဒီ ဒူအီ အီ ဒွိုမ် ဟာဝ် ရိုမ် ဒူပ် အန်၊ ဒေါ လေး အန် ခဲင် အိူင် ဂါလီလေ၊ ဝီ ဟာဝ် မိူင် ယေရူဆာလဲမ်။ ဂေ ဒူအီ အီ ယိုဝ် အန် ဝါယ် ဟဲ့ ဝီ ယိတ့် ဝီ အိမ် အန်၊ ဂေ ဟဲ့ ဝီ ဘဲန် ဆက်ဆေ၊ ဘော နပ် ဒီ ကာလာင် လွင် အန်၊ တဲး ဂေ ဒူအီ အာမျုဝ် အေ ကော နပ်။

32 ဘော ယာယ် ဝီ ကာလာင်၊ တဲး ဘော ဘေ ဝီ နပ် လွင် အန် တီ။ ကာဒိက် ဆတ်ဇာ ပီ ဒွိုမ် ဒွါ ဇဝ်ဖြာ ဒီ ဂုန့် ဒင် အေ၊ အန် ဟဲ့ ဟွတ့် ဘူင်၊ 33 တဲး န့ ဘဲန် အာဂျိုဝ် ဒီ အေ၊ အီ မုး လှုက်လှာန် ဂေ။ ဇဝ်ဖြာ ဟဲ့ တဲး ဇဝ် ယေဆူ ဝီ ယိတ့် ဝီ အိမ်၊ တဲး န့ ပီ ပီ ဒွိုမ် ဒဲမ် ခဲင် ဘပ် ပီ မှုဝ် ထမ်။ ခဲင် ခါန် ဟာအာ ဟဲ့ တဝ်း၊ ‘မဲ မုး ဂွန် အုဝ်။ အာတိုဝ် နီ အုဝ် ဟဲ့ ဘဲန် ဂုန့် မဲ။’ 34 ပေါ အူ ပ့လုဝ့် ဇဝ်ဖြာ ဟဲ့ ကာလာင် ဒီ အာတ့် လွင် ဇဝ် ယေဆူ ဒီ ဝီ ယိတ့် ဝီ အိမ် ဝါယ် ယမ် အန်။ န့ တဝ်း၊ ‘မွင့်ကာရာ ဘွတ်၊ ဂေ မွင့်ကာရာ အီ မှာန် အာခါခ်ု၊ ပီ ဒွိုမ် ဒွါ အုဝ် ဒီ ခုန်ဒီခမ် အာဒါဝိတ်၊ အုဝ် ဒီ ဝီ ဒွါ ဘော ဒီ ဘေ။’ 35 ဟဲ့ ဒဲမ် အုန် ခဲင် ဘပ် ဇဝ်ဖြာ ပေါ အူ ခါန် တဝ်း၊ ‘မဲ ဇဝ်ဖြာ၊ မဲ တူ တဲး ဒူအီ ဘွတ် မဲ ဝီ အုး အမ်၊ တူ တဲး ယင် အန် လာတ့်။’

36 အီ မုး ခုန်ဒီခမ် အာဒါဝိတ်၊ အန် ဟဲ့ ဟွတ့် ဘူင် ပီ အိုင် ဇဝ်ဖြာ၊ အန် ဘော ယမ်။ ဂေ ဝီ ဒိပ် ဒုဝ် ဘူင့် အန် ပီ ဂုန့် ဒါ အန်။ ဟဲ့ ဟွတ့်၊ ဒုဝ် အန် ဝီ လာတ့်။ 37 န့ ယီ မုး ဒူအီ ပီ တဲး ဇဝ်ဖြာ ဝီ ယိတ့် ဝီ အိမ် ဝါယ် ယမ် အန်၊ ဒူအီ တီ တူ ယိုဝ် ဒုဝ် ဘူင့် အန် လာတ့်။

38 ခုဝ် အန် တီ အုဝ် တဝ်း ဒီ ဘေ ဘီနွင် အုဝ်၊ တဲး ဘော ဘေ နပ်၊ ဇဝ် ယေဆူ ပဲ ဒီ ဂဝ်း ဝဲန် မှာပ် ဘေ။ 39 အာဆေ ညှိုမ် ဇဝ် ယေဆူ၊ ဇဝ်ဖြာ ဒီ တဝ်း၊ အန် ဟဲ့ ပွိုန် နဝ်း မှာန်။ ဒါရာ ပီ ဒွိုမ် ဒွါ ဒါ ဆာရာ အာမုဝ်ဆဲ တွိုန်၊ န့ တူ ပဲ ဒီ တဲး ဒူအီ မိုဝ်း နဝ်း မှာန် ဇိုဝ် တီ။ 40 ခုဝ် အန် တီ ဘေ လုဝ် ဆာဒိက်၊ ကွဲ့ တဲး န့ ဘဲန် ဒီ ဘေ ပီ ဒွိုမ် ကာလာင် ဒူအီ အီ ဘျာန် ဂြုဝ်း ဇဝ်ဖြာ အူ ဝီ။ ဒါ ဆာရာ တီ ဟဲ့ ဒွိုမ် တဝ်း၊ 41 ‘အိုယ် ဘေ ဒူအီ အီ ကာညး နာ ဘွတ်၊ တဲး ဘေ အာမ် ပီ ဘူင် ဇဝ်ဖြာ၊ တဲး ဘေ ယီ စှိုမ်။ ဒေါ မုး စုဝ် ဘေ၊ အုဝ် ဒီ ဘူင် နာ ဘွတ်။ ဘေ ယီ တူ ညှိုမ် ပီ ဘူင် အုဝ် ဇိုဝ် တီ။ န့ ပီ ဘော မိုဝ်း ဒူအီ အီ ဘျ တဲး ဘေ ယွတ် မိူဝ်၊ ဘေ တူ ညှိုမ် ဒေါ မှဝ်။’” ပါယ် တီ အာပေါလူ မာနုဝ် ခဲင် ဇူင် တွိုန်။

42 ဒေါ ဝီ တဝ်း အာပေါလူ ဂါယ် အာဘာနာဘ ဒီ လေး ခဲင် ဇူင် တွိုန်၊ ဂေ ဒူအီ ဝီ မှာန့်၊ တဲး ဂါယ် ဝီ တး ပေါ အူ ဇေန့်။ ဟီ ဇမ် ဆီငဲ ဒီလှဝ် ပေါ အူ ဇေန့်၊ တဲး ဂါယ် ဝီ မာနုဝ် လွင် အန် တီ။ 43 ဂေ ဟဲ့ ဟွတ့် ကြိုပ် ဇဝ်ဖြာ၊ ဂေ မိူဝ် ဝီ လေး ခဲင် ဇူင် တီ။ န့ မိုဝ်း ဂေ ဒူအီ အာယူဒါ ဘော ဂေ ဒူအီ အာမျုဝ် ဟဝ် အီ ဟဲ့ လိုပ် ဒူအီ အာယူဒါ၊ ဂေ ကိူန် ဟာဝ် ဒူပ် အာပေါလူ ဂါယ် အာဘာနာဘ။ ဂါယ် ဝီ ကာလာင် ဂြုဝ်း ဒီ ဒူအီ ဂေ တီ၊ ကာဆုး ဂေ၊ တဲး ဂေ ညှိုမ် ဘိုင် ဇဝ်ဖြာ အီ မိုဝ်း နဝ်း ကာဝေ ဂေ။

44 ဟဲ့ ဝီ ဇမ် ဆီငဲ ဒီလှဝ် ပေါ အူ ဇေန့်၊ ဂေ ဒူအီ ဘော မိူင် ဝီ တး ကာဇု၊ တဲး ဂေ ဝီ ထူမ် ဂြုဝ်း ဇဝ်ဖြာ။ 45 ဂေ ဒူအီ အာယူဒါ၊ ဂေ ယီ ယွတ်၊ န့ မိုဝ်း ဒူအီ ကိူန် ကာဆဝ်၊ န့ ဘော ဘဲန် နဝ်း လှယ့် ဒီ ဂေ။ ခုဝ်၊ ဂေ တဝ်း၊ ဒါရာ ပီ ကာလာင် အာပေါလူ ဂါယ် အာဘာနာဘ၊ အာဝ် မှာန်၊ အာဝ် မွှိုမ်။ ဂေ ဘော ကာလာင် ဂြုဝ်း ကာခဲန့် ဒီ ဇဝ်ဖြာ။

46 ဂါယ် ယီ ကာလာင် ဂြုဝ်း ဆိူဝ် ဒီ ဒူအီ အာယူဒါ ဂေ တီ တဝ်း၊ “ယာယ် လုဝ် ကာလာင် ဂြုဝ်း ဇဝ်ဖြာ၊ တဲး ဘေ နပ် ဒီ ထူမ် အာတ့် ထူမ် အီ ဟဝ်။ ဘေ ယီ ဟဲ့ ဝဲန် ဒါရာ ဇဝ်ဖြာ တီ။ န့ ပီ ဘေ ထာင် ဘေ တူ ကာအာပ် ကွယ် ရိုမ် ဒူပ် ဇဝ်ဖြာ ဆေဆေ။ ခုဝ်၊ ဘော ယာယ် ဒီ ဘ့လေး ဝဲန် ဘေ၊ ဝီ ဟာဝ် ကာလာင် တဲး ဂေ ဒူအီ အာမျုဝ် ဟဝ် ပွိုန် ဒီ ထူမ် လွင် အန် တီ။ 47 ဇဝ်ဖြာ ဟဲ့ ဒွိုမ် စ်ု ယာယ် ဘူင် ပါယ် တီ။ အန် ဟဲ့ ဒွိုမ် တဝ်း၊ ‘အုဝ် ဟဲ့ ဘူင် တဲး မဲ ပီ ဘ့လာင် အီ တး ဇမ် ဒူင် ကွယ် ဒူအီ ဒွန် မျုဝ်၊ တဲး မဲ ဟာဝ် ဇမ် ဒွန် နာ ဒွန် ပ့လုဝ့်၊ တဲး အီ နပ် လွင် ဇဝ်ဖြာ ချွတ် ဒူအီ။’”

48 ဒေါ ထူမ် ဂေ ဒူအီ အာမျုဝ် ဟဝ် ဂြုဝ်း တီ၊ န့ ဝီ ဘဲန် နဝ်း ဒါခိုယ် ဒီ ဂေ။ ဂေ ဘော ရုဝ်ဆေ ဒါရာ ဇဝ်ဖြာ။ ခဲ့ မိုဝ်း ဒူအီ ပီ ရဝ်း ဇဝ်ဖြာ၊ တဲး ဂေ ပွိုန် အာဆာက် ကာမာယ် အီ ကွယ် ဆေဆေ၊ ဂေ ဒွန် အီ ဘော ညှိုမ် ဇဝ်ဖြာ။

49 ပန် တီ ဂေ ဒူအီ ခဲင် မိူင် ဘော မိူင် ကော နပ် လွင် ဂြုဝ်း ဇဝ်ဖြာ။ 50 ခဲင် မိူင် အန်ထီအုဝ့် တီ၊ န့ ယီ မိုဝ်း အီဘိုန့် မင် အီ၊ ဂေ မိုဝ်း အာယာ ဒီ ဆုင်ဖျာတ် လွင် မာန် မိူင်။ ဂေ ဘော ကြိုပ် ဇဝ်ဖြာ အာခါခ်ု။ ဂေ ဒူအီ အာယူဒါ၊ ဂေ တး ကာလာင် ဂြုဝ်း၊ တဲး ဘော ဂေ အီဘိုန့် တီ ဘော ဂေ ဒါ တာင် အီ အိုပ် မိူင် ဘဲန် နဝ်း တူ အိုင် အာပေါလူ ဂါယ် အာဘာနာဘ၊ တဲး ဂေ လာယ် ဖြူမ် ဒီ ဘူင် နာ တူ မွှိုမ် ဒီ ဂါယ်။ ဟဲ့ ဟွတ့်၊ တဲး ဂေ ဝီ ဆုတ့် ဂါယ် လေး ခဲင် မိူင် ဂေ။ 51 ပန် တီ ဂါယ် ဒီယိုဝ်း ကာပုး ဒီ ပ့လဝ် ဂါယ်၊ တဲး ဂေ ဒူအီ အာယူဒါ နပ်၊ ဂါယ် တူ မိုဝ်း မှာပ် မာဆေ။ ဟဲ့ ဟွတ့်၊ ဂါယ် ဝီ ဟာဝ် ဇမ် မိူင် အီခုဝ်နီ။ 52 ဂေ ဒီဘဲ ဇဝ် ယေဆူ အီ ကွယ် ဒီ ပန် ခဲင် မိူင် အန်ထီအုဝ့် တီ၊ ဂေ ယီ မိုဝ်း နဝ်း ဒါခိုယ် ကာဆဝ်။ နဝ်း ဖွိုမ် ဇဝ်ဖြာ မိူဝ် ဟဲ့ နုဝ့် ခဲင် နဝ်း ဂေ။