1 ဒေါ အန် တီ ခဲင် မိူင် အီခုဝ်နီ၊ အာပေါလူ ဂါယ် အာဘာနာဘ၊ ဝီ ဟာဝ် လိုပ် ခဲင် ဇူင် ကြိုပ် ဂေ ဒူအီ အာယူဒါ ဇဝ်ဖြာ။ ဂါယ် ဝီ မာနုဝ် ဆီချာ၊ တဲး ဂေ ဒူအီ ကိူန် ကော ညှိုမ် ဇဝ် ယေဆူ။ ဘော ဒူအီ အာယူဒါ ဘော ဒူအီ ဂြိက်၊ ဂေ ကိူန် ကော ညှိုမ်။ 2 ဂေ ဒူအီ အာယူဒါ အီ တူ ဆီ ညှိုမ် ဇဝ် ယေဆူ၊ ဂေ ဝီ ကာလာင် ဂြုဝ်း တူ မွှိုမ် ဒီ ဒူအီ အာမျုဝ် ဟဝ်၊ တဲး ဂေ ရူ ဒီ ဘီနွင် အီ ညှိုမ် ဇဝ် ယေဆူ။ 3 အာပေါလူ ဂါယ် အာဘာနာဘ ယီ ဝီ ကွယ် လှေန့် ခဲင် မိူင် တီ၊ တူ ယုဝ် ဒီ ကာလာင် လွင် ဇဝ်ဖြာ ချွတ် ဒူအီ။ ဇဝ်ဖြာ မိူဝ် ဘျ ပွုန် အန်၊ တဲး ဂါယ် ဘော ဘူင် နာ မွှိုမ် အာမ် ကာဆဝ်။ ပါယ် တီ ဇဝ်ဖြာ မိူဝ် တဲး ဒွန် အီ နပ်၊ ဂြုဝ်း ပီ ကာလာင် ဂါယ် လွင် ဇဝ်ဖြာ ကာဝေ ဒူအီ၊ န့ ဟဲ့ မှာန်၊ ဟဲ့ မုး။ 4 ဂေ ဒူအီ ခဲင် မိူင် တီ၊ ဂေ ယီ တူ လာယ် ဖြူမ်။ မင် အီ ဂေ အိုင် ဒူအီ ပီ ရဝ်း ပီ တိုယ် ဇဝ် ယေဆူ။ မင် အီ ဂေ ဒူပ် နဝ်း ဂေ ဒူအီ အာယူဒါ။ 5 ဘော ဂေ ဒူအီ အာယူဒါ၊ ဘော ဂေ ဒူအီ အာမျုဝ် ဟဝ်၊ ဘော ဂေ ဒါ တာင် အီ အိုပ် ဂေ၊ ဂေ ဟဲ့ ခြာမ် ဒီ ဘူင် နာ တူ မွှိုမ် ဒီ အာပေါလူ ဂါယ် အာဘာနာဘ။ ဟဲ့ ဟွတ့်၊ ဂေ တဝ်း ဒီ ဒိုဝ်း မာဝ် ဝိုန့်၊ တဲး ဂါယ် ယမ်။ 6 ဒေါ အန် တီ ဂါယ် မိူဝ် ဟဲ့ နပ် လွင် ပီ ခြာမ် ဂေ ဒီ ဘူင်။ ခုဝ်၊ ဂါယ် ဝီ လေး ခဲင် မိူင် တီ၊ ဝီ တဝ် ဟာဝ်၊ ဇမ် မိူင် လူထာရာ ဂါယ် မိူင် ဒေဘေ အီ ကွယ် ခဲင် အိူင် လူကောနီ။ 7 ခဲင် မိူင် အာ မိူင် တီ ဘော ခဲင် ရဝ် အီ ကွယ် ကာတတ် မိူင် တီ၊ ဂါယ် ဝီ ကာလာင် လွင် ဇဝ်ဖြာ ချွတ် ဒူအီ။

8 ခဲင် မိူင် လူထာရာ တွိုန်၊ န့ မိုဝ်း ဒူအီ အူ ဝီ၊ ပ့လဝ် အန် ဟဲ့ ယမ်။ အူ ဆိန့် ဒေါ ဂွိုတ် အန်၊ အန် တူ ပွိုန် ယိတ့် ဟာဝ် ဒေါ မှဝ်။ 9 ဒူအီ တီ၊ အန် ထူမ် ဂြုဝ်း ပီ ကာလာင် အာပေါလူ တွိုန်။ အာပေါလူ ဘော ယွတ် ဆီချာ ဒူအီ တီ၊ အန် ဘော နပ်၊ ဒူအီ ဆဝ် တီ ဟဲ့ ညှိုမ် ဇဝ်ဖြာ ပဲ ဒီ ပီကဲန် အန်။ 10 ပန် တီ အန် ဝီ ကာလာင် ဂြုဝ်း တာင် တဝ်း၊ “မဲ ယိတ့်၊ စွင့် ဆွန် ပ့လဝ် မဲ။” ဟဲ့ ဟွတ့် ကာလာင်၊ ဒူအီ တီ မိူဝ် ယိတ့်၊ စွင့် ဇာပ် ဟာဝ် အူ ဇေန့်။

11 ဂေ ဒူအီ ကိူန် အီ ဟဲ့ ယိုဝ် ပီ ဘူင် အာပေါလူ၊ ဂေ ဝီ စုး ဒီ ဒတ် တာင် ခဲင် ဂြုဝ်း လူကောနီ။ ဂေ တဝ်း၊ “ဇဝ်ဖြာ အာ ကာဒင် ဟဲ့ ဘဲန် ဒူအီ၊ ဟဲ့ တး ဇမ် ဒူင် ကွယ် အေ။” 12 ဂေ ဘော တဝ်း၊ အာဘာနာဘ မုး ဇဝ် ဆူဆ၊ ဘော အာပေါလူ မုး ဇဝ် ဟေရေမေ။ ဇဝ် ဂါယ် အာ ကာဒင် တီ မုး ဇဝ်ဖြာ ပီ ကြိုပ် ဂေ။ ကူပ် ကာလာင် အာပေါလူ ဂြုဝ်း ကိူန် ဒီ ဂေ၊ ဂေ တဝ်း၊ အန် မုး ဇဝ် ဟေရေမေ ပီ ကြိုပ် ဂေ။ 13 ဂေ ဟဲ့ ဟွတ့် တဝ်း ပါယ် တီ၊ န့ ဘော မိုဝ်း ဒူအီ အီ လှူ ဒီ ဇဝ် ဆူဆ တွိုန်။ ဟုဝ် ပီ ကြိုပ် ဂေ အန် ဇဝ် ဆူဆ ကွယ် နာ ရေတ့် မိူင်။ ဒါ ဆာရာ တီ၊ အန် တး တိုယ် မက် အာလူင့် မင် ဒုဝ် ဘော ကာဝင် ဘုဝ်း၊ တး ဇမ် ဒီ ဘာင် မာလုဝ်း မိူင်။ ဘော အန် ဘော ဒူအီ ကိူန် တဝ်း ဒီ လှူ ကြုဝ် ဇိုဝ် တီ ဒီ အာပေါလူ ဂါယ် အာဘာနာဘ။

14 ဒေါ ယိုဝ် ဂါယ် လွင် အန် တီ၊ ဂါယ် တူ အိုင်။ ဂါယ် ကာယာတ့် ဆီတုဝ် ဂါယ် ကူပ် တူ အိုင် ဂါယ်။ ဟဲ့ ဟွတ့်၊ ဂါယ် ဝီ လေး ဟာဝ် ဒူင် ကွယ် ဂေ ဒူအီ ကိူန်၊ ဒတ် တာင်၊ တဲး ဂေ ထူမ်။ 15 ဂါယ် တဝ်း၊ “အိုယ် ဘေ ဒူအီ ကိူန်၊ မှဝ် န့ ပါယ် ပီ ဘူင် ဘေ ဇိုဝ် တီ။း ယာယ် မုး ဒူအီ ပီ ဘေ။ ယာယ် တူ မုး ဇဝ်ဖြာ။ ယာယ် ယီ ဟဲ့ ခဲ ဒီ ဘေ လွင် ဇဝ်ဖြာ အီ ချွတ် ဘေ။ ယာယ် မှာန့်၊ တဲး ဘေ ဝဲန် အာရိုပ် ပီ ကြိုပ် ဘေ နီ။ ဂေ တူ မိုဝ်း ပွုန် မာဆေ။ တဲး ဘေ ဝီ ကြိုပ် ဇဝ်ဖြာ အာခါခ်ု၊ အီ မိုဝ်း အာဆာက်၊ အီ ဘူင် ဘ့လေး ဘော ဂါင်ဟြာဝ် ဘော ကာဒါယ်၊ ဘော အိုမ် နမ်မုက်ဆာရာ။ ခဲ့ ကွယ် ဒဲင် ကာဒါယ်၊ ခဲ့ ကွယ် ခဲင် အိုမ်၊ ဇဝ်ဖြာ တီ ဟဲ့ ဘူင် တူတ့် ဒွန် မျုဝ်။ 16 ခါ အာတ့် ဇဝ်ဖြာ ဟဲ့ ဒွိုမ် တဲး ဒူအီ ဒွန် မျုဝ် ဘူင် ပီ အိုင် ဂေ။ 17 အန် ယီ တဲး ဒူအီ နပ် လွင် အန်။ ဇဝ်ဖြာ ဟဲ့ တဲး န့ မိုဝ်း အိုမ် ဂ့လာယ် လေး ခဲင် ဂါင်ဟြာဝ် လူင်၊ တဲး ငှုဝ် ဘေ လတ့်၊ တဲး န့ မိုဝ်း ဒီဂါဝ် ဒေါ ဇမ် အာခြာဝ် အန်။ ပါယ် တီ၊ ဇဝ်ဖြာ တဲး ဘေ မိုဝ်း ပီ ဒီ ဟူမ်၊ တဲး ဘော နဝ်း ဘေ ဒါခိုယ်။” 18 အာပေါလူ ဟဲ့ ဟွတ့် ကာလာင် ဂြုဝ်း တီ၊ အန် ကော ရိန် ဒီ ဟူ ပဲ ဒီ ခြဲ ဂေ၊ ကွဲ့ တဲး ဂေ လှူ ဒီ ဂါယ်။

19 ဝါယ် အန် တီ ဂေ ဒူအီ အာယူဒါ တး ခဲင် မိူင် အန်ထီအုဝ့် ဂါယ် မိူင် အီခုဝ်နီ။ ဂေ တး ကာလာင် ဂြုဝ်း တူ မွှိုမ် လွင် အာပေါလူ ဂါယ် အာဘာနာဘ၊ တဲး ဂေ ဒူအီ ကိူန် အာဝ် ဟူ အိုင် ဂါယ်။ ပန် တီ ဂေ ဒူအီ ကိူန် ဝီ ဒိုဝ်း မာဝ် ဝိုန့် ဒီ အာပေါလူ၊ တဲး အန် ကော ရိန် ဒီ ယမ်။ ဂေ ထာင် အန် ဟဲ့ ဟွတ့် ယမ်၊ ခုဝ်၊ ဂေ ဝီ လာက် ဒုဝ် ဘူင့် အန် လေး ဟာဝ် တ မိူင်။ 20 ဂေ ဒီဘဲ ဇဝ် ယေဆူ ယီ ဟဲ့ တး ကော ရူပ် အန်။ အန် ဝီ ယိတ့်၊ ဝီ ဟာဝ် ဝိန် ဒီလဲ ခဲင် မိူင်။ ပါ ခဲညှာ အာပေါလူ ဂါယ် အာဘာနာဘ၊ ဂါယ် ဝီ လေး ခဲင် မိူင် တွိုန်၊ ဟာဝ် ခဲင် မိူင် ဒေဘေ။

21 ခဲင် မိူင် ဒေဘေ တွိုန်၊ အာပေါလူ ဂါယ် အာဘာနာဘ ဝီ ကာလာင် လွင် ဇဝ်ဖြာ ချွတ် ဒူအီ။ ဟဲ့ ဟွတ့်၊ န့ ဝီ မိုဝ်း ဒူအီ ကိူန်၊ ဝီ ဘဲန် ဒီဘဲ ဇဝ် ယေဆူ။ ပန် တီ ဂါယ် ဝီ ဝိဝ် မိူင် လူထာရာ၊ မိူင် အီခုဝ်နီ ဘော မိူင် အန်ထီအုဝ့်။ 22 ဒေါ ကွယ် ဂါယ် ခဲင် မိူင် ဂေ တီ၊ ဂါယ် ဝီ မာနုဝ် ဂေ ဒူအီ ညှိုမ် ဇဝ် ယေဆူ၊ တဲး ဂေ ဝီ ညှိုမ် ဆီချာ။ ဂါယ် ဝီ တဝ်း၊ “အေ ဒွန် အီ လုဝ် ခမ် ဒုက် ကိူန် ဒွန် မျုဝ်။ ဟဲ့ ဟွတ့်၊ ဟဲ့ ပွိုန် လိုပ် ခဲင် မိူင် ပီ အိုပ် ဇဝ်ဖြာ။” 23 ဝါယ် အန် တီ အာပေါလူ ဂါယ် အာဘာနာဘ ဝီ ရဝ်း ဒါ တာင် မင် အီ၊ တဲး ဂေ ဘဲန် ဒါ တာင် အီ အိုပ် ဖိုင် ဇဝ် ယေဆူ အီ ကွယ် ခဲင် မိူင် ဂေ တီ ဒွန် မိူင်။ ဂေ ဝီ ယိူန် ပီ ဒီ ဟူမ်၊ တဲး ဂေ ဝီ ဆာခိုဝ် ဒီ ဇဝ်ဖြာ ဒါင် ဂေ ဒူအီ အီ ညှိုမ်၊ တဲး ဇဝ်ဖြာ ဝီ ဘ်ု ရိတ် အာဆာက် ဂေ ဒွန် အီ။ 24 ဝါယ် အန် တီ ဂါယ် ဝီ ဟာဝ် ကာလုဝ်း မိူင် ဖီဆီဒီ၊ ဝီ ဟာဝ် ဇမ် မိူင် ဖမ်ဖူလီ။ 25 ဂါယ် ဝီ ဟာဝ် ကာလာင် ဂြုဝ်း ဇဝ်ဖြာ ခဲင် မိူင် ဖေရေဂေ။ ဟဲ့ ဟွတ့်၊ ဂါယ် ဘော ဝီ လူင် ခဲင် မိူင် အာထာလီ။

26 ခဲင် မိူင် အာထာလီ၊ ဂါယ် ဝီ ပဝ့် ရိုဝ် ဆင်ဖုဝ်၊ ဝီ ဝိဝ် မိူင် အန်ထီအုဝ့်၊ အီ မုး မိူင် ဒူင် လေး ဂါယ် ဒေါ ဂုဝ်။ ခဲင် မိူင် တီ၊ ဂေ ဒီဘဲ ဇဝ် ယေဆူ ဟဲ့ ဒွိုမ် ဆာခိုဝ် ဇဝ်ဖြာ၊ တဲး အန် မွင့်ကာရာ ဒွါ ဒီ ဂါယ်၊ တဲး ဂါယ် ပွိုန် ဒီ ဘူင် ဂါန် ပီ လုဝ် ဘူင် ဂါယ်။ ဒေါ တီ နီ၊ ဂါယ် ဟဲ့ ဟွတ့် ဘူင် ဂါန် ဇိုဝ် တီ။ 27 ဂါယ် ဝီ ဒဲ့ ဂေ ဒူအီ ဖိုင် ဇဝ် ယေဆူ တး ကာဇု၊ တဲး ဂေ ဝီ ထူမ် တူတ့် ဒွန် မျုဝ် ပီ ခဲ ဂါယ် လွင် ပဲ့ ဟဲ့ ဘူင် ဇဝ်ဖြာ။ တဲး ဂေ ဝီ နပ် လွင် ဇဝ်ဖြာ ဟဲ့ တဲး ဘော ဂေ ဒူအီ အာမျုဝ် ဟဝ် ဝီ ညှိုမ် ဇဝ်ဖြာ အာခါခ်ု။ 28 ဝါယ် အန် တီ ဂါယ် ဝီ ကွယ် ရိုမ် ဒူပ် ဂေ ဒီဘဲ ဇဝ် ယေဆူ ခဲင် မိူင် တီ ကော လှေန့်။