1 န့ ယီ မိုဝ်း ဒူအီ မင် အီ၊ ဂေ တး အိူင် ယူဒါ၊ ဟာဝ် ဇမ် မိူင် အန်ထီအုဝ့် တွိုန်။ ဂေ တး မာနုဝ် ဂေ ဘီနွင်၊ တဲး ဂေ ဆွာ့ ဝဲန် ဟုန် လခါနာ အီမာယ်၊ ဒူပ် ဆီချာ ပီ မာနုဝ် ဒါ ဆာရာ အာမုဝ်ဆဲ တွိုန်။ ဂေ တဝ်း၊ “ဆေ ဘေ တူ ဘူင် ပါယ် တီ၊ ဇဝ်ဖြာ တူ ချွတ် ဘေ။” 2 ကူပ် မာနုဝ် ဂေ ဇိုဝ် တီ၊ အာပေါလူ ဂါယ် အာဘာနာဘ ဝီ လာယ် ဆင်ချာင် ကိူန် ဒီ ဂေ လွင် အန် တီ။ ဂေ ယီ တူ လာယ် ဖြူမ်။ ပန် တီ ဂေ ဒီဘဲ ဇဝ် ယေဆူ ခဲင် မိူင် တီ၊ ဂေ ဝီ လာယ် ဖြူမ် ဒီ ဝီ တိုယ် အာပေါလူ ဂါယ် အာဘာနာဘ ဘော ဂေ အီ ဟဝ် မင် အီ၊ တဲး ဂေ ဟာဝ် မိူင် ယေရူဆာလဲမ်၊ တဲး ဂေ ဟာဝ် ဒီမွှတ် ဂေ ဒါ တာင် ခဲင် ဖိုင် ဇဝ် ယေဆူ ဘော ဂေ ဒူအီ ပီ ရဝ်း ပီ တိုယ် ဇဝ် ယေဆူ။ 3 ဂေ ဒူအီ ခဲင် ဖိုင် ဇဝ် ယေဆူ အီ ကွယ် ခဲင် မိူင် အန်ထီအုဝ့်၊ ဝီ တိုယ် ဂေ ဟာဝ်။ ဒေါ ဟာဝ် ဂေ ဒူပ် န့တေန့်၊ ဂေ ဘော ဇမ် မိူင် ဖီနိက် ဂါယ် မိူင် ဆာမာရီ။ ဂေ ဝီ ကာလာင် လွင် ဇဝ်ဖြာ၊ မှဝ် အန် ဟဲ့ ပါယ် ဒီ ဘူင် တဲး ဘော ဂေ ဒူအီ အာမျုဝ် ဟဝ် ကော ညှိုမ် ဇဝ် ယေဆူ။ ဒေါ ထူမ် ဂေ လွင် အန် တီ၊ ဂေ ဘီနွင် ခဲင် မိူင် တီ၊ ဂေ ကော ဒါခိုယ် ကာဆဝ်။ 4 ဒေါ တး ဇမ် ဂေ ခဲင် မိူင် ယေရူဆာလဲမ်၊ ဂေ ဒူအီ ပီ ရဝ်း ပီ တိုယ် ဇဝ် ယေဆူ၊ ဘော ဂေ ဒါ တာင် ခဲင် ဖိုင် ဇဝ် ယေဆူ၊ ဂေ ဝီ ရွုး အာပေါလူ ဘော ဂေ ဒူအီ အီ ဒူပ် အန်။ ပန် တီ အာပေါလူ ဂါယ် အာဘာနာဘ ဝီ ကာလာင် တူတ့် ဒွန် မျုဝ် ပဲ့ ဟဲ့ ဘူင် ဇဝ်ဖြာ ဒေါ ဟာဝ် ဘူင် ဂါယ် ဂါန် အန်။

5 န့ ယီ မိုဝ်း ဒူအီ မင် အီ၊ ဂေ ဟဲ့ ဒွိုမ် ဘဲန် ဒူအီ ဖိုင် ဖာရီဆဲ။ ဟဲ့ ဟွတ့်၊ ဂေ ဟဲ့ ညှိုမ် ဇဝ် ယေဆူ။ ဂေ ဒူအီ တီ၊ ဂေ ဝီ ယိတ့် တဝ်း၊ “ဆေ န့ မုး ဒူအီ အာမျုဝ် ဟဝ်၊ ဂေ လုဝ် ဆွာ့ ဝဲန် ဟုန် လခါနာ အီမာယ်။ ဘေ ဘော လုဝ် မာနုဝ် ဂေ၊ တဲး ဂေ ဒူပ် တူတ့် ဒါရာ ပီ ဒွိုမ် ဒွါ ဒါ အာမုဝ်ဆဲ။”

6 ဂေ ဒူအီ ပီ ရဝ်း ပီ တိုယ် ဇဝ် ယေဆူ ဘော ဂေ ဒါ တာင် ခဲင် ဖိုင် ဇဝ် ယေဆူ၊ ဂေ ဝီ လာယ် ဆင်ချာင် လွင် အန် တီ။ 7 ဂေ ဟဲ့ ဟွတ့် ကာလာင် ဘဲန် မျုဝ် ဘဲန် မျုဝ်၊ အာပေတာရူ ဝီ ယိတ့် တဝ်း၊ “ဘေ ဘီနွင် အုဝ်၊ ဘေ ဟဲ့ နပ်၊ ခါ အာတ့် ဇဝ်ဖြာ ဟဲ့ ရဝ်း အုဝ်၊ တဲး အုဝ် ဟာဝ် ကာလာင် ဒီ ဒူအီ အာမျုဝ် ဟဝ်၊ တဲး ဂေ ပွိုန် ထူမ် လွင် ဇဝ်ဖြာ ချွတ် ဒူအီ၊ တဲး ဘော ဂေ ညှိုမ် ဇဝ် ယေဆူ။ 8 န့ ယီ မုး ဇဝ်ဖြာ အီ နပ် နဝ်း ဒူအီ ဒွန် အီ၊ အန် ဟဲ့ ဝီ ဒွါ နဝ်း ဖွိုမ် အန် ဒီ ဂေ၊ တဲး န့ ပီ ပီ ဒွိုမ် ဒွါ အန် ဒီ အေ။ ပါယ် တီ၊ အေ မိူဝ် ဟဲ့ နပ်၊ ဇဝ်ဖြာ ဟဲ့ ဒဲ့ ဘော ဂေ။ 9 ဇဝ်ဖြာ တူ တဝ်း၊ လုဝ် ကာယဝ်း ဒူအီ အာမျုဝ် ဟဝ် ဘော ဒူအီ အာယူဒါ ကူပ် တူ မုး ဂေ အူ မျုဝ်။ ကူပ် ညှိုမ် ဂေ ဒူအီ အာမျုဝ် ဟဝ်၊ အန် ဇဝ် တဲး ဘော ဂေ မိုဝ်း နဝ်း လုယ်။ 10 ဒေါ တီ နီ၊ မှဝ် န့ ပါယ် ပီ ဝီ ထေဝ် ဘေ နဝ်း ဇဝ်ဖြာ၊ စ်ု ဂေ ဒီဘဲ ဇဝ် ယေဆူ ဒူပ် ဒါရာ၊ တဲး န့ ပီ၊ ဘေ ဒွါ ဂေ ပး စန် ပီယေန့်။ ဘော အေ ဘော ဒါ တာင် အေ အီ ကွယ် ခါ အာတ့် အေ တူ ပဲ ဒီ ဒူပ် ဒါရာ တီ။ 11 ကူပ် မိုဝ်း ဇဝ် ယေဆူ နဝ်း ကာဝေ အေ၊ အန် ဟဲ့ ချွတ် အေ။ ပါယ် တီ အန် မိူဝ် ဟဲ့ ချွတ် ဘော ဂေ ဒူအီ ဟဝ်။”

12 ဒေါ အန် တီ ဂေ ဒူအီ အီ ထူမ် ဂြုဝ်း ပီ ကာလာင် အာပေတာရူ၊ ဂေ တူ ဝျီ့ ဂြုဝ်း အန်။ ဂေ ဘောကာဂ့လျီတ် ဝီ ကွယ် ထူမ် ဂြုဝ်း ပီ ကာလာင် အာပေါလူ ဂါယ် အာဘာနာဘ။ ဂါယ် ယီ ဝီ ကာလာင် တူတ့် ဒွန် မျုဝ် လွင် နာ မွှိုမ် အာမ် ကာဆဝ် ပီ ဒွါ ဇဝ်ဖြာ ဂါယ် ဘူင် ဒေါ ကွယ် ဂါယ် ကာတဲ ဒူအီ အာမျုဝ် ဟဝ်။ 13 ဂါယ် ဟဲ့ ဟွတ့် ကာလာင် လွင် အန် တီ၊ န့ မိုဝ်း အာယာကူပ်၊ အန် ဝီ စုး ဒီ ကာလာင် ဂြုဝ်း။ အန် တဝ်း၊ “အိုယ် ဘေ ဘီနွင် အုဝ်၊ တဲး ဘေ ဝီ ထူမ် ဂြုဝ်း အုဝ်။ 14 အာပေတာရူ ဟဲ့ ဟွတ့် ကာလာင် ဒီ အေ လွင် ဇဝ်ဖြာ ဟဲ့ ဒဲ့ ဒူအီ မင် အီ အီ တူ မုး အာမျုဝ် ယူဒါ၊ တဲး ဂေ တး ဒူပ် အန်။ ပါယ် တီ ဇဝ်ဖြာ ဟဲ့ တဲး အေ နပ်၊ အန် ရွက့် ဘော ဂေ။ 15 ဘော ဂြုဝ်း ဂေ ဒူအီ အီ ဘျာန် ဂြုဝ်း ဇဝ်ဖြာ အီ ကွယ် ခါ အာတ့် ဂေ ဟဲ့ ဒဲမ် အုန် ခဲင် ဘပ် ဇဝ်ဖြာ တဝ်း၊

16 ‘ဟဲ့ ဟွတ့် ပန် တီ အုဝ် ဇဝ်ဖြာ ဒီ ဝီ တး ဇမ် ဒူင် ကွယ် ဘေ။ အုဝ် ဒီ ဝီ တး ကာဝေ ဂေ ဒူအီ အာမျုဝ် ခုန်ဒီခမ် အာဒါဝိတ်။ ဂေ ဒူအီ အာမျုဝ် အန်၊ ဂေ ပီ ကာင် အီ ဟဲ့ ကာပျာတ့် လိုဝ်။ အုဝ် ဒီ ဝီ ဆမ် ကာင် အန် တီ၊ တဲး န့ ဝီ စှိတ် ပီ ဘြိမ်။

17 ဂေ ဒူအီ အာမျုဝ် အန်၊ အီ ဆီ ကွယ်၊ အုဝ် ဒီ ဝီ တဲး ဂေ ဒူပ် အုဝ်။ ဘော ဂေ ဘော ဒူအီ အာမျုဝ် ဟဝ်၊ ခဲ့ ကွယ် အီ ညှိုမ် အုဝ်၊ ဂေ ဒီ ဘော တး ဒူပ် အုဝ်။ 18 ပါယ် တီ အုဝ် ဇဝ်ဖြာ ဟဲ့ တဝ်း။ အုဝ် ဒီ ဘော ဘူင် ပါယ် တီ။’ ခဲင် ဘပ် ဇဝ်ဖြာ ဟဲ့ ဒဲမ် အုန် ပါယ် တီ။ ဆိန့် ဒေါ မွိုန် အေ ဟဲ့ ဟွတ့် နပ် ဂြုဝ်း တီ။

19 ခုဝ် အန် တီ အုဝ် တဝ်း၊ ဆေ န့ မိုဝ်း ဒူအီ အာမျုဝ် ဟဝ် အီ ဆီ ညှိုမ် ဇဝ်ဖြာ၊ ကွဲ့ တဲး အေ စ်ု ဂေ ဒူပ် ဒါရာ အီ ညှာပ် ဒူပ်။ 20 အုဝ် ယီ တဝ်း၊ တဲး အေ ဒဲမ် ပဲ့ ဒွါ ဒီ ဂေ၊ ကွဲ့ တဲး ဂေ ဟူမ် ပီ ဒွိုမ် လှူ အီ ဟဝ် ဒီ အာရိုပ် ရာင်။ ကွဲ့ လုတ့် အီဘိုန့် အီ ဟဝ်၊ ကွဲ့ ဟူမ် ယင် ဒုဝ် ဆတ်ဒါဝါ အီ မိုဝ်း နှာမ် တူ လေး ဆီချာ။ 21 ဂေ ဒူအီ အာမျုဝ် ဟဝ် ဒွန် အီ၊ ဂေ ဟဲ့ ဟွတ့် နပ် လွင် အန် တီ။ အူ ဆိန့် ဒေါ ဂုဝ် အန် ကော ဇမ် အာတိုဝ်၊ ဒေါ ဇမ် ဆီငဲ ဒီလှဝ်၊ ဂေ ဟဲ့ တိး ဒါရာ အာမုဝ်ဆဲ ခဲင် ဇူင်။ ခဲင် မိူင် ဒွန် မိူင် ဂေ ဟဲ့ ဘူင် ပါယ် တီ။ ခုဝ် အန် တီ အုဝ် တဝ်း၊ တဲး အေ စ်ု ဂေ ဒူအီ အာမျုဝ် ဟဝ် ဘူင် ခဲ့ တီ။”

22 အာယာကူပ် ဟဲ့ ဟွတ့် ကာလာင် ဂြုဝ်း တီ၊ ဂေ ဒူအီ ပီ ရဝ်း ပီ တိုယ် ဇဝ် ယေဆူ ဘော ဂေ ဒါ တာင် ဘော ဂေ ဒူအီ ခဲင် ဖိုင် ဇဝ် ယေဆူ၊ ဂေ လာယ် ဖြူမ်၊ တဝ်း ဒီ ဘူင် ပါယ် တီ။ ဂေ တဝ်း ဒီ ရဝ်း ဒူအီ မင် အီ၊ တဲး ဂေ ဟာဝ် ရိုမ် ဒူပ် အာပေါလူ ဂါယ် အာဘာနာဘ ဒေါ ဝီ ဝိဝ် ဂါယ် ခဲင် မိူင် အန်ထီအုဝ့်။ ဟဲ့ ဟွတ့်၊ ဂေ မိူဝ် ရဝ်း အာယူဒတ် အီ စိူဝ် ဘော အာဘာဆာဘာ ဘော အာဆီလာတ်။ ဂါယ် အာ ဝီ တီ၊ ဂါယ် မုး ဒါ တာင် ကာတဲ ဂေ ဘီနွင် အီ ညှိုမ် ဇဝ် ယေဆူ။

23 ဂေ ဝီ ဒဲမ် ဘော ပဲ့ တဝ်း၊ “အိုယ်၊ ဘေ ဘီနွင် ယေ အီ ကွယ် ခဲင် မိူင် အန်ထီအုဝ့်၊ မိူင် ဆူရီ ဘော အိူင် ခီလီခီ၊ ဘေ ဒွန် အီ အီ တူ မုး အာမျုဝ် ယူဒါ။ ယေ ဒူအီ ပီ ရဝ်း ပီ တိုယ် ဇဝ် ယေဆူ၊ ဘော ဂေ ဘီနွင် အီ မုး ဒါ တာင်၊ ယေ ဟဲ့ ဒဲမ် ပဲ့ နီ တိုယ် ဒီ ဘေ၊ တဲး ဘေ ဂျာမ်ဆာ ဒွန် အီ။

24 ယေ ဟဲ့ ယိုဝ် လွင် ဒူအီ ခဲင် ဖိုင် ဇဝ် ယေဆူ မင် အီ။ ပီ ကာလာင် ဂေ ဒီ ဘေ၊ န့ ဟဲ့ တဲး ဘေ မင် အီ ဘဲန် နဝ်း လိုဝ်။ ဂေ ဒူအီ အီ ဘူင် ပါယ် တီ၊ ဂေ တူ မုး ဒူအီ ပီ တိုယ် ဟာဝ် ယေ ဒူင် ကွယ် ဘေ။ 25 ဒေါ တီ နီ၊ ယေ ယီ ဟဲ့ လာယ် ဖြူမ် ဒီ ရဝ်း ဒူအီ အာ ဝီ၊ တဲး ဂါယ် ဒူပ် အာပေါလူ ဂါယ် အာဘာနာဘ အီ မုး ဘီနွင် ပီ ရွက့် ယေ၊ တဲး ဂေ ဝီ ဟာဝ် ဇမ် ဒူင် ကွယ် ဘေ။ 26 အာပေါလူ ဂါယ် အာဘာနာဘ၊ ဂါယ် မိူဝ် ဟဲ့ ဒွိုမ် ရိန် ဒီ ယမ် ကူပ် ဘူင် ဂါယ် ဂါန် ဇဝ် ယေဆူ၊ အီ မုး ဒါ ကာညာ အီ အိုပ် အေ ဒွန် အီ။ 27 အာယူဒတ် ဂါယ် အာဆီလာတ်၊ ဝီ ပီ တိုယ် ဟာဝ် ယေ ဒူင် ကွယ် ဘေ၊ ဂါယ် ဒီ ဝီ ကာလာင် ဒီ ဘေ လွင် ပီ ဒဲမ် ယေ ဒေါ တီ နီ၊ တဲး ဂြုဝ်း ဂါယ် ဘော ပဲ့ ပီ ဒဲမ် ယေ တီ မုး အူ မျုဝ်။ 28 နဝ်း ဖွိုမ် ဇဝ်ဖြာ ဘော ယေ ဟဲ့ လာယ် ဖြူမ်၊ ကွဲ့ တဲး ယေ စ်ု ဘေ ဒူပ် ဒါရာ ယူဒါ အီ ညှာပ် ကာဆဝ်။ 29 ခဲ့ ပီ စ်ု ယေ ဘေ ဘူင် ဒေါ တီ နီ၊ ဘေ လုဝ် ဘူင်။ ဘေ လုဝ် ယိူန် ကွဲ့ ဟူမ် ယင် ပဲ့ ဟဲ့ ဟွတ့် လှူ အီ ဒီ အာရိုပ် ရာင်။ ဘေ ကွဲ့ ဟူမ် နှာမ် ဘော ယင် ဒုဝ် ဆတ်ဒါဝါ အီ မိုဝ်း နှာမ် တူ လေး ဆီချာ။ ကွဲ့ လုတ့် အီဘိုန့် အီ ဟဝ်။ ဆေ ဘေ ဘူင် ပါယ် တီ၊ န့ ဒီ ဘဲန် ဂျာမ်ဆာ ဒီ ဘေ။ ခဲ့ တီ ယေ ဒဲမ် ပဲ့ ဒီ ဘေ၊ တဲး ဘေ ဘူင်။”

30 ဝါယ် အန် တီ ဂေ ဒူအီ ခဲင် မိူင် ယေရူဆာလဲမ် ခ့ဝါင် ဂေ ဟာဝ်။ ဂေ ဘော ဇမ် မိူင် အန်ထီအုဝ့်၊ ဂေ ဝီ ဒဲ့ ဒူအီ အီ ညှိုမ် ဇဝ် ယေဆူ တး ကာဇု၊ ဝီ ဒွါ ပဲ့ တီ ဒီ ဂေ။ 31 ဂေ ဟဲ့ ဟွတ့် တိး ပဲ့ တီ၊ န့ တဲး ဂေ ဝီ ဘဲန် နဝ်း ဒါခိုယ်။ 32 အာယူဒါ ဂါယ် အာဆီလာတ် တွိုန်၊ ဂါယ် မုး ဒူအီ အီ ဘျာန် ဂြုဝ်း ဇဝ်ဖြာ။ ခုဝ်၊ ဂါယ် ဝီ မာနုဝ် ဂေ ဘီနွင် ဘဲန် မျုဝ် ဘဲန် မျုဝ်၊ တဲး ဂေ ကော ညှိုမ် ဆီချာ။ 33 ဂါယ် ဟဲ့ ဟွတ့် ကွယ် ရာမ် လှေန့်၊ ဂေ ဘီနွင် မိူဝ် ဝီ ခ့ဝါင် ဂါယ် ဝိဝ် ဒူင် ကွယ် ဂါယ်။ ဂေ တဝ်း၊ “တဲး ဘာယ် ဟာဝ် ဒါခိုယ်၊ ကွယ် ဒါခိုယ်။” 34 န့ ယီ မုး အာဆီလာတ်၊ အန် တဝ်း ဒီ ကွယ် မိူင် အန်ထီအုဝ့်၊ တူ ဝီ ဝိဝ် မိူင် ယေရူဆာလဲမ်။ ခုဝ်၊ အာယူဒါ အူ ဝီ ဝိဝ်။ 35 အာပေါလူ ဂါယ် အာဘာနာဘ၊ ဂါယ် ဘော ကွယ် ခဲင် မိူင် အန်ထီအုဝ့် တီ။ ဘော ဂါယ် ဘော အီ ဟဝ် ဝီ မာနုဝ် ဂြုဝ်း ဇဝ်ဖြာ။

36 ဝါယ် အန် တီ အာဝ် ဘော လှေန့်၊ အာပေါလူ ဝီ တဝ်း ဒီ အာဘာနာဘ၊ “တဲး အာယ် ဝီ ဟာဝ် ခဲင် မိူင် ဒွန် မိူင် ဒူင် ဟဲ့ ဒွိုမ် ဟာဝ် အာယ်၊ တဲး အာယ် ဝီ ယွတ် ပီ ပါယ် ဂေ ဘီနွင် ဒူင် ကွယ် ဂေ တီ။” 37 အာဘာနာဘ ယီ ဆီ ဒဲ့ အာယောဟာန် အီ စိူဝ် ဘော အာမာကူ တွိုန်၊ တဲး အန် ဒူပ် ဂါယ်။ 38 အာယောဟာန် တီ ဟဲ့ ဒွိုမ် ဟာဝ် ဒူပ် ဂါယ်။ ဒေါ ဟဲ့ ဇမ် ဂေ ခဲင် မိူင် ဖမ်ဖူလီ၊ အန် ယီ ဘ့လေး ဝဲန် ဂါယ်၊ အာဝ် ဟူ ဒူပ် ဂါယ်။ ကူပ် ဒွိုမ် ဘူင် အန် ပါယ် တီ၊ အာပေါလူ တူ ဆီ ဒဲ့ အန် ပေါ အူ ဇေန့်။ 39 လွင် အန် တီ ဂါယ် အာ ဝီ တူ ဝီ လာယ် ဖြူမ်။ န့ တဲး ဂါယ် ကာယဝ်း၊ အာဝ် ဟူ ဟာဝ် ရိုမ်။ အာဘာနာဘ ဝီ ဒဲ့ အာမာကူ တွိုန်၊ တဲး ဂါယ် ပဝ့် ရိုဝ် ဆင်ဖုဝ် ဝီ ဟာဝ် ဂုန် အိုမ် အီ စိူဝ် ခူဖြုဝ်။ 40 အာပေါလူ ယီ ရဝ်း အာဆီလာတ် တွိုန် ဒူပ် အန်။ ဂေ ဘီနွင်၊ ဂေ ဝီ ဆာခိုဝ် ဒါင် ဂါယ်၊ တဲး ဇဝ်ဖြာ ဝီ ကာဝေ ဂါယ်။ 41 ဟဲ့ ဟွတ့်၊ ဂါယ် ဝီ ဟာဝ် မိူင် ဆူရီ ဘော အိူင် ခီလီခီ၊ မာနုဝ် ဂေ ဒူအီ ခဲင် ဖိုင် ဇဝ် ယေဆူ၊ တဲး ဂေ ညှိုမ် ဆီချာ။