1 ဝါယ် အန် တီ အာပေါလူ ဝီ ဟာဝ် ဇမ် မိူင် ဒေဘေ။ ဟဲ့ ဟွတ့်၊ အန် ဝီ ဟာဝ် ဘော မိူင် လူထာရာ။ ခဲင် မိူင် လူထာရာ န့ ယီ မိုဝ်း ဒီဘဲ ဇဝ် ယေဆူ အူ ဝီ၊ အန် စိူဝ် အာထီမုဝ်ထေ။ ဘော မာ အန် ညှိုမ် ဇဝ် ယေဆူ။ မာ အန် မုး ဒူအီ အာမျုဝ် ယူဒါ။ ဂုန့် အန် ယီ မုး ဒူအီ အာမျုဝ် ဂြိက်။ 2 ဂေ ဘီနွင် အီ ကွယ် ခဲင် မိူင် လူထာရာ ဘော ခဲင် မိူင် အီခုဝ်နီ၊ ဂေ ဘောကာဂ့လျီတ် နပ် ဒီ ကာလာင် ဂြုဝ်း မွှိုမ် လွင် အာထီမုဝ်ထေ တီ။ 3 ဘော အာပေါလူ အိုင် အန်။ အာပေါလူ ဆီ ဒဲ့ အာထီမုဝ်ထေ ဟာဝ် ရိုမ် ဒူပ် အန်။ န့ ယီ မိုဝ်း ဒူအီ အာယူဒါ အီ ကွယ် ဒူင် တီ၊ ဂေ ဘောကာဂ့လျီတ် နပ် လွင် ဂုန့် အာထီမုဝ်ထေ မုး ဒူအီ အာမျုဝ် ဂြိက်။ ခုဝ်၊ အာပေါလူ မိူဝ် ဒိုဝ်း အာထီမုဝ်ထေ၊ ဝီ ဆွာ့ ဝဲန် ဟုန် လခါနာ အီမာယ်၊ တဲး အန် ပီ ဂေ ဒူအီ အာယူဒါ။ 4 ဝါယ် အန် တီ ဒေါ ဟာဝ် ဇမ် ဂေ ခဲင် မိူင် ဘဲန် မိူင် ဘဲန် မိူင်၊ ဂေ ဝီ တဲး ဒွန် အီ တိး ပဲ့ ပီ ဒဲမ် ဂေ ဒူအီ ပီ ရဝ်း ပီ တိုယ် ဇဝ် ယေဆူ ဘော ဂေ ဒါ တာင် ခဲင် ဖိုင် ဇဝ် ယေဆူ၊ ဂေ အီ ကွယ် ခဲင် မိူင် ယေရူဆာလဲမ်။ ဂေ ဒွါ ပဲ့ တီ ဒီ ဒွန် အီ၊ တဲး ဂေ ဝီ ပွိုန် ဒီ ဘူင် ဒူပ် ပီ စ်ု ဒါ တာင် ဂေ ဘူင်။ 5 ပါယ် တီ၊ ဂေ ဒူအီ ခဲင် ဖိုင် ဇဝ် ယေဆူ ဒွန် နာ ဒွန် ပ့လုဝ့် ဘော ညှိုမ် ဆီချာ။ ဒွန် ဆီငဲ၊ ဒွန် ဆီငဲ၊ ဂေ ဘော ကြဲ ဒီ ကိူန် ကာပွါ။

6 အာပေါလူ ဂေ အီ ဒူပ် အန်၊ ဂေ ဝီ ဟာဝ် ဘဲန် ပ့လုဝ့် ဘဲန် ပ့လုဝ့် ခဲင် အိူင် ဖူဂီ ဘော အိူင် ဂါလာထီ။ နဝ်း ဖွိုမ် ဇဝ်ဖြာ ဟဲ့ ခြဲ ဂေ ဟာဝ် အိူင် အာဆီယာ။ ခုဝ်၊ ဂေ ဝီ ဟာဝ် ခဲင် အိူင် အာ အိူင် တီ။ 7 ဂေ ဟဲ့ ဟွတ့် တး ဇမ် မိူင် မူဆီ၊ ဂေ ဝီ ထေဝ် ဒီ ဟာဝ် မိူင် ဘီဆီနာ။ နဝ်း ဖွိုမ် ဇဝ်ဖြာ ယီ တူ တဲး ဂေ ဟာဝ်။ 8 ခုဝ်၊ ဂေ ဝီ ကာလုဝ်း မိူင် မူဆီ ဟာဝ် ဇမ် မိူင် ထာရုဝ်။ ဒေါ အန် တီ ဘော အုဝ် အာလူကာ စုး ဒီ ဒူပ် ဂေ။ 9 ခဲင် မှိုဝ် ဇဝ်ဖြာ ဘော ဘျ အာရူင် အန် ဒီ အာပေါလူ၊ တဲး အန် ဝီ ယိုဝ် ဒူအီ အူ ဝီ၊ အီ မုး အာမျုဝ် မာခေဒူန်။ အန် ဟဲ့ တး ဇမ် ဒူင် ကွယ် အာပေါလူ တဝ်း၊ “တဲး မဲ တး ဒူင် ကွယ် ယေ၊ တဲး မဲ စွယ် ယေ။” 10 အာပေါလူ ဟဲ့ ဟွတ့် ယိုဝ် အာရူင် တီ၊ ယေ မိူဝ် တဝ်း ဒီ ဟာဝ် အိူင် မာခေဒူန် တီ အူ ဇေန့်။ ယေ တဝ်း၊ ဇဝ်ဖြာ ဟဲ့ ဒဲ့ ယေ၊ တဲး ယေ ဝီ ကာလာင် လွင် ဇဝ်ဖြာ ချွတ် ဒူအီ၊ တဲး ဘော ဂေ ဒူအီ ခဲင် အိူင် မာခေဒူန် ပွိုန် ဒီ ထူမ်။

11 ပန် တီ ယေ ဝီ ပဝ့် ရိုဝ် ဆင်ဖုဝ်၊ ဝီ လေး ခဲင် မိူင် ထာရုဝ်၊ ဝီ ဟာဝ် ဆိူဝ် ဒီ မိူင် ဆာမုဝ်ထာရာ။ ပါ ခဲညှာ ယေ ဝီ ဟာဝ် ဇမ် မိူင် နာဖုဝ်လိတ်။ 12 ယေ ဟဲ့ ဟွတ့် ဇမ် ခဲင် မိူင် တီ၊ ယေ ဝီ ဟာဝ် ဇမ် မိူင် ဖီလီဖီ။ မိူင် ဖီလီဖီ တီ ကွယ် ခဲင် ကာဒါယ် အိူင် မာခေဒူန်။ ဂေ ဒူအီ ရုဝ်မာ ဟဲ့ အိုပ် မိူင် ဖီလီဖီ တီ။ ယေ ဘော ကွယ် ခဲင် မိူင် တီ အာဒါ ဖွုန် ဖန် ဆီငဲ။

13 ဘော ဇမ် ဆီငဲ ဒီလှဝ်၊ ယေ ဝီ လေး ဟာဝ် နာ ရေတ့် မိူင်၊ ဝီ ဟာဝ် ဇမ် ခူပ် ဘ့လဲင် အူ ပ့လုဝ့်။ ယေ ထာင်၊ န့ မိုဝ်း ဒူင် ဆာခိုဝ် ဂေ ဒူအီ အီ ညှိုမ် ဇဝ်ဖြာ။ ယေ ဟဲ့ ဟွတ့် ဇမ် ဒူင် တီ၊ ယေ ဝီ စုး ဒီ ကာလာင် ဒီ အီဘိုန့် မင် အီ အီ ဟဲ့ တး ကာဇု ဒူင် တီ။ 14 န့ မိုဝ်း အီဘိုန့် အူ ဝီ၊ အန် စိူဝ် ယာ လူဒီ။ မိူင် ဘြိမ် အန် မုး မိူင် ထီအာထီရာ။ အန် ယွင့် ဘိက် ရေန့် ဂဲ အီ ဘွတ် ကာဆဝ်။ အန် ဘော ကြိုပ် ဇဝ်ဖြာ အာခါခ်ု။ ယာ လူဒီ တီ၊ အန် ဟဲ့ ထူမ် ဂြုဝ်း ပီ ကာလာင် အာပေါလူ။ ဇဝ်ဖြာ ဝီ တဲး အန် မိုဝ်း နဝ်း ဆီ ထူမ်။ ဟဲ့ ဟွတ့်၊ အန် မိူဝ် ညှိုမ် ဇဝ်ဖြာ။ 15 ဝါယ် အန် တီ ဘော အန် ဘော ဂေ အီ ကွယ် ခဲင် န့ဟူမ် အန်၊ ဂေ ဘောကာဂ့လျီတ် ခမ် ဒီ စိုပ် ခဲင် အိုမ်။ ယေ ဟဲ့ ဟွတ့် စိုပ် ဂေ ခဲင် အိုမ်၊ ယာ လူဒီ တွိုန် ဝီ တဝ်း ဒီ ယေ၊ “ဆေ ဘေ မာတ် အုဝ် မုး အီဘိုန့် အီ ညှိုမ် ဆီချာ ဇဝ် ယေဆူ၊ တဲး ဘေ တး တမ် ကာင် အုဝ်။” အန် ဟဲ့ ဘာင် ယေ ဘဲန် ဇေန့် ဘဲန် ဇေန့် ပါယ် တီ။

16 ဝါယ် အန် တီ ယေ ဝီ ဟာဝ် ဒူင် ဆာခိုဝ် ဂေ ပေါ အူ ဇေန့်။ ဒေါ ဟာဝ် ယေ ဒူပ် န့တေန့်၊ ယေ ကာတုန့် ဂွန် အီဘိုန့် အူ ဝီ၊ အန် မိုဝ်း ကာနမ် အီ တဲး အန် နပ် ဒီ ကာလာင် လွင် အီ ဒီ ပါယ် နာ အာတ့်။ ဂွန် အီဘိုန့် တီ၊ အန် မုး မှာယ် အီ ဟဝ်။ ကူပ် နပ် အန် ဒီ ကာလာင် လွင် အီ ဒီ ပါယ် နာ အာတ့် တီ၊ ဒါ ကာညာ အန် ပွိုန် ရွိုန် ကိူန်။ 17 ဂွန် အီဘိုန့် တီ ဝီ ဟာဝ် ဒူပ် ဒီ ပန် ယေ။ အန် မိူဝ် ဒတ် ဆေဆေ တဝ်း၊ “ဒူအီ ဂေ နီ၊ ဂေ မုး ဒူအီ အီ ဘူင် ဂါန် ဇဝ်ဖြာ အီ မုး ဇဝ်ဖြာ အီ တာင် လွှိုမ် တူတ့်။ ဂေ နပ် ဒီ ကာလာင် ဒီ ဘေ လွင် ပီ ပါယ် ဇဝ်ဖြာ ဒီ ချွတ် အေ။” 18 ဘဲန် ဆီငဲ ဘဲန် ဆီငဲ အန် ကာလာင် ပါယ် တီ။ အာပေါလူ ယီ တူ အိုင် အန် ကာလာင် ပါယ် တီ။ အန် ဝီ ယွတ် နာ ပန်၊ ဝီ ကာလာင် ဂြုဝ်း ဒီ ကာနမ် တဝ်း၊ “ဇဝ် ယေဆူ အီ မုး အန် ဇဝ် ပီ ရဝ်း ပီ တိုယ် ဇဝ်ဖြာ၊ အန် ဟဲ့ ဒွါ ပွုန် အန် ဒီ အုဝ်။ ခုဝ်၊ အုဝ် စ်ု မဲ ကာနမ်၊ တဲး မဲ လေး ခဲင် ဒုဝ် ဘူင့် ဂွန် အီဘိုန့် တီ။” ဟဲ့ ဟွတ့် ကာလာင်၊ ကာနမ် ဝီ လေး ခဲင် ဒုဝ် ဘူင့် အန် အူ ဇေန့်။

19 ဝါယ် အန် တီ ဒါ ကာညာ ဂွန် အီဘိုန့် တီ၊ ဂေ ဘော နပ်၊ ဂေ အာဝ် ဟူ ပွိုန် ရွိုန် ဒီ ဂွန် အီဘိုန့် တီ၊ ဂေ ဝီ မှေတ့် အာပေါလူ ဂါယ် အာဆီလာတ်၊ ဝီ ဒိုဝ်း ဟာဝ် ဂါယ် ဒီ ကာလး၊ ဝီ တိုယ် ဂါယ် ဇမ် ဒီ အာတ့် ဂေ ဒါ တာင်။ 20 ဂေ ဟဲ့ တိုယ် ဂါယ် ဇမ် ဒီ အာတ့် ဂေ ဒါ တာင် အီ အိုပ် မိူင်၊ အီ မုး ဒူအီ ရုဝ်မာ၊ ဂေ ဝီ တဝ်း၊ “ဒူအီ ဂါယ် နီ၊ ဂါယ် မုး ဒူအီ အာယူဒါ။ ဂါယ် ယီ ဘူင် တဲး န့ ဆီနန် ဆီနိူင် ခဲင် မိူင် အေ။ 21 ဂါယ် မိူဝ် မာနုဝ် လွင် ဟိတ် ဂါယ် အီ တူ ဒူပ် ဒါရာ အေ ဒူအီ ရုဝ်မာ။ အာဝ် ကာအာပ် အေ ဘူင် ဒူပ် ပီ မာနုဝ် ဂါယ်။”

22 ဂေ ဒူအီ ကိူန် ကော ရူ ကာဆဝ် ဒီ ဂါယ်။ ဒါ တာင် အီ အိုပ် မိူင် မိူဝ် ဘုတ့် ဝဲန် ခြိုင် အာပေါလူ ဂါယ် အာဆီလာတ်၊ စ်ု ဒါ ဆိုက် မး ဂါယ်။ 23 ဂေ ဟဲ့ ဟွတ့် မး ကာဆဝ် ဂါယ်၊ ဂေ ဝီ ခြွင့် ဂါယ် ခဲင် ကာပိုမ်၊ ဝီ စ်ု ဒူအီ ဘ်ု ကာပိုမ်၊ တဲး အန် ဘ်ု ဆီချာ ဂါယ်။ 24 ဒူအီ အီ ဘ်ု ကာပိုမ် တွိုန်၊ အန် ဟဲ့ ဟွတ့် ရပ် ဂါယ်၊ အန် ဝီ ဘ့လေး ဂါယ် ခဲင် ဟူင် အီ ကွယ် ဒီ ကာတဲ ကာပိုမ်။ အန် ဘော စှိုပ် ထာင် ဒီ ပ့လဝ် ဂါယ် ကွဲ့ တဲး ဂါယ် ပွိုန် ရ်ု။

25 ခဲင် မှိုဝ် တီ၊ ကာတဲ ဆွိုမ်၊ အာပေါလူ ဂါယ် အာဆီလာတ်၊ ဂါယ် ကွယ် ဆာခိုဝ် တဝ်း မှုဝ် ထမ်၊ အိူပ် ဇဝ်ဖြာ။ ဂေ အီ ဟဝ် အီ ကွယ် ခဲင် ကာပိုမ် တွိုန်၊ ဂေ ဘော ထူမ် ပီ တဝ်း ဂါယ်။ 26 ဒေါ အန် တီ အူ ဇေန့်၊ မာအိမ် ဝီ ယေန့် ကာဆဝ်၊ တဲး စေန့် ရွင့် ဘော ရဲင် ခဲင် ကာပိုမ် ကာပျာတ့် လိုဝ် တူတ့် အူ ဇေန့်။ မာလုဝ်း ဒွန် မာလုဝ်း ဘော န့ ဝိုဝ်း။ ဝန် ဟိန် ပီ ပက် ဂေ ဒီ ဒဲ ဘော ပ့လဝ် ဒွန် အီ ဘော ကာဝိုဝ်း စုဝ်း တူတ့်။ 27 ဒေါ အန် တီ ဒါ အီ ဘ်ု ကာပိုမ်၊ အန် ဟဲ့ အိတ်။ အန် ဝီ န့ဆိုဝ်း၊ ဝီ ယိတ့် ဘော ယိုဝ် မာလုဝ်း ခဲင် ကာပိုမ် ဟဲ့ န့ဝိုဝ်း တူတ့်။ အန် ဝီ ထွတ် မာပွါ့ လာင် အန်၊ တဝ်း ဒီ ငဝ်း အာဆာက် အန်။ အန် ထာင်၊ ဂေ ဒူအီ အီ ကွယ် ခဲင် ကာပိုမ် ဘောကာဂ့လျီတ် ဟဲ့ ဟွတ့် လေး တဝ် တူတ့်။ 28 အာပေါလူ ယီ ဒတ် ဒီ အန် တဝ်း၊ “မဲ ကွဲ့ ငဝ်း အာဆာက် မဲ၊ ကွဲ့ ဘူင် မာဆေ။ ယေ ဒွန် အီ ဆီ ကွယ် ခဲင် ကာပိုမ် နီ။”

29 ပန် တီ ဒါ အီ ဘ်ု ကာပိုမ် တွိုန်၊ အန် ဝီ မှာန့်၊ တဲး ဂေ ပီဒဝ့် ဒေန်၊ တဲး န့ ဘ့လာင်။ ဟဲ့ ဟွတ့်၊ အန် ဝီ ဟာဝ် ဇမ် ဒူင် ကွယ် အာပေါလူ ဂါယ် အာဆီလာတ်။ အန် မိူဝ် ဟဲ့ ယုဝ်၊ တဲး အန် ကော ဒီယေန့်၊ ဝီ ဂူမ် ဒီ အာတ့် ဂါယ်။ 30 အန် ဟဲ့ ဟွတ့် တဲး ဂါယ် လေး ခဲင် ကာပိုမ်၊ အန် ဝီ တဝ်း၊ “ဘာယ် ဒါ ဆာရာ အုဝ်၊ မာဆေ ပီ လုဝ် ဘူင် အုဝ်၊ တဲး န့ ချွတ် အုဝ်။း”

31 အာပေါလူ ဂါယ် အာဆီလာတ်၊ ဂါယ် ဝီ တဝ်း၊ “တဲး မဲ ညှိုမ် ဇဝ် ယေဆူ။ ဟဲ့ ဟွတ့်၊ ဇဝ်ဖြာ ဒီ ချွတ် ဘော မဲ၊ ဘော န့ဟူမ် မဲ။” 32 ဝါယ် အန် တီ ဂါယ် ဝီ ကာလာင် လွင် ဇဝ် ယေဆူ တဲး ဘော ဒါ အီ ဘ်ု ကာပိုမ် ဘော ဂေ အီ ကွယ် ခဲင် ကာင် အန် ပွိုန် ဒီ ထူမ် ဒွန် အီ။ 33 ဒေါ အန် တီ ခဲင် မှိုဝ် န့ ဆီ အပ် ဝွင့်၊ ဒါ အီ ဘ်ု ကာပိုမ် တွိုန်၊ ဝီ ဒဲ့ အာပေါလူ ဂါယ် အာဆီလာတ်၊ တဲး အန် ပွိုန် ဒီ ဘာယ် ဒိမ် ဂါယ် ကာဆိူဝ် မး အီ။ ဟဲ့ ဟွတ့် ဘော အန် ဘော န့ဟူမ် အန်၊ ဂေ ဘောကာဂ့လျီတ်၊ ဝီ ခမ် ဒီ စိုပ် ခဲင် အိုမ်။ 34 ဝါယ် အန် တီ အန် ဝီ ဒဲ့ ဂါယ် ဝေန့် ဒီ ကာင် အန်၊ ဝီ ဘ့လေး ပီ ဒီ ဟူမ်၊ တဲး ဂါယ် ဟူမ်။ အန် မိူဝ် ဟဲ့ မိုဝ်း နဝ်း ဒါခိုယ် ကာဆဝ် ကူပ် ညှိုမ် လိုပ် ဂေ ဇဝ်ဖြာ။

35 ပါ ခဲညှာ၊ ပြဲ ဘော ဝီ ဘ့လာင်၊ ဂေ ဒါ တာင် ရုဝ်မာ ဝီ တိုယ် ဒါ ဆိုက်၊ တဲး ဂေ စ်ု ဒါ အီ ဘ်ု ကာပိုမ်၊ တဲး အန် ဘ့လေး ဂါယ် အာ ဝီ၊ တဲး ဂါယ် ပွိုန် ဒီ လေး ဟာဝ်။ 36 ဒါ အီ ဘ်ု ကာပိုမ် ဝီ ကာလာင် လွင် အန် တီ ဒီ အာပေါလူ။ အန် တဝ်း၊ “ဂေ ဒါ တာင် ရုဝ်မာ ဟဲ့ တိုယ် ဒါ ဆိုက် တဝ်း၊ ဂေ ဟဲ့ ဘ့လေး ဘာယ်၊ တဲး ဘာယ် ဟာဝ်။ ခုဝ်၊ ဘာယ် ပွိုန် ဟာဝ် ဒူပ် န့တေန့် ဘာယ်။ တဲး ဘာယ် ဟာဝ် ဒါခိုယ်။”

37 အာပေါလူ ယီ တဝ်း ဒီ ဒါ ဆိုက် တွိုန်၊ “ယာယ် ဟဲ့ မုး ဒူအီ ရုဝ်မာ။ ဂေ ယီ တူ ဆုင်ဖျာတ် အာမူ ယာယ်၊ ဝီ မး ယာယ် ပီယေန့်၊ တဲး ဒွန် အီ ယိုဝ်။ ဟဲ့ ဟွတ့်၊ ဂေ ဟဲ့ ဝီ ခြွင့် ယာယ် ခဲင် ကာပိုမ်။ ဒေါ တီ နီ ဂေ ဆီ ဝီ စ်ု ယာယ် လေး ဒီ နီ၊ ကွဲ့ တဲး အီ ဟဝ် နပ် လွင် အန် တီ။ အာဝ် ပွိုန် ဘူင် ပါယ် တီ။ ဂေ ဒါ တာင် လုဝ် တး ရာင် ဂေ၊ တဲး ဂေ တိုယ် ယာယ် လေး၊ တဲး ဒွန် အီ ကော နပ်။”

38 အာပေါလူ ဟဲ့ ဟွတ့် ကာလာင် ဂြုဝ်း တီ၊ ဂေ ဒါ ဆိုက် ဝီ ဟာဝ် ကာလာင် လွင် အန် တီ ဒီ ဒါ တာင် ရုဝ်မာ တွိုန်။ ဒေါ နပ် ဂေ လွင် အာပေါလူ ဂါယ် အာဆီလာတ် မုး ဒူအီ ရုဝ်မာ၊ ဂေ ဝီ ယုဝ်။ (ကူပ် ဘူင် ဂေ နာ တူ မွှိုမ် အီ တူ ကာအာပ် ဘူင်။) 39 ခုဝ်၊ ဂေ ဝီ ဟာဝ် ဇမ် ဒူင် ကွယ် ဂါယ်၊ ဝီ ကာလာင် ဂြုဝ်း ဒါခိုယ် ဒီ ဂါယ်။ ဟဲ့ ဟွတ့်၊ ဂေ ဝီ တိုယ် ဂါယ် လေး ခဲင် ကာပိုမ်၊ ဝီ မှာန့်၊ တဲး ဂါယ် လေး ခဲင် မိူင် ဂေ၊ ဟာဝ် ပေါ အူ ပ့လုဝ့်။ 40 ဝါယ် အန် တီ အာပေါလူ ဂါယ် အာဆီလာတ် ဝီ လေး ခဲင် ကာပိုမ်၊ ဟာဝ် လိုပ် ကာင် ယာ လူဒီ တွိုန်။ ဂါယ် ဘော ယိုဝ် ဂေ ဘီနွင် အီ ကွယ် ခဲင် ကာင် အန်၊ ဂါယ် ဝီ မာနုဝ် ဂေ၊ တဲး ဂေ မိုဝ်း နဝ်း ပ့လူမ်။ ဟဲ့ ဟွတ့်၊ ဂါယ် ဘော ဝီ လေး ဒူင် ကွယ် ဂေ တီ။