1 ဝါယ် အန် တီ။ အာပေါလူ ဂါယ် အာဆီလာတ်၊ ဟာဝ် ဇမ် မိူင် အမ်ဖီဖုဝ်လီ ဘော မိူင် အာဖုဝ်လူန်။ ဟဲ့ ဟွတ့်၊ ဂါယ် ဝီ ဟာဝ် ဘော မိူင် ထေဆာလူန်။ ခဲင် မိူင် ထေဆာလူန် တီ၊ န့ မိုဝ်း ဇူင် ကြိုပ် ဂေ ဒူအီ အာယူဒါ ဇဝ်ဖြာ။ 2 အာပေါလူ ဝီ ဘူင် ပီ ပီ ဒွိုမ် ဘူင် အန် ဒွန် နာ ဒွန် ပ့လုဝ့်။ ဘော ဇမ် ဆီငဲ ဒီလှဝ်၊ အန် ဟာဝ် လိုပ် ခဲင် ဇူင် တွိုန်။ အာဒါ အူယ် ဆီငဲ ဒီလှဝ် အန် ကာမွုန် ဒီ ဂေ၊ ကာလာင် လွင် ဘပ် ဇဝ်ဖြာ။ 3 အန် ဝီ မာနုဝ် ဂေ၊ တဲး ဂေ နပ် လွင် ဇဝ် ယေဆူ။ အန် တဝ်း၊ “အူ ဆိန့် ဒေါ ဂုဝ် ဇဝ်ဖြာ ဟဲ့ ခ့ဝါင် တဲး ဒူအီ ပီ တိုယ် အန် ကာဒုး ဒုက် ဒွန် မျုဝ်၊ တဲး အန် ကော ယမ်။ ဟဲ့ ဟွတ့် ယမ်၊ ဇဝ်ဖြာ ဝီ တဲး အန် ဝီ ယိတ့် ဝီ အိမ်။” အန် ဟဲ့ ဟွတ့် ကာလာင် ဒီ ဂေ လွင် အန် တီ၊ အန် ဝီ တဝ်း၊ “ဇဝ် ယေဆူ ဝီ ပီ ကာလာင် အုဝ် ဒီ ဘေ လွင် အန်၊ အန် မုး ဒူအီ ပီ ရဝ်း ပီ တိုယ် ဇဝ်ဖြာ တဲး အန် ချွတ် ဒူအီ။” 4 ဂေ ဒူအီ အာယူဒါ အီ ထူမ် ဂြုဝ်း တီ၊ မင် အီ ဘော ညှိုမ်။ ဂေ ဘော ဒူပ် အာပေါလူ ဂါယ် အာဆီလာတ်။ ဒူအီ ကိူန် အီ မုး အာမျုဝ် ဂြိက် အီ ညှိုမ် ဇဝ်ဖြာ၊ ဘော အီဘိုန့် အီ မုး ယာ တာင် မင် အီ၊ ဂေ ဘောကာဂ့လျီတ် ညှိုမ် ပီ ကာလာင် အာပေါလူ ဂါယ် အာဆီလာတ် ဒီ ဂေ။

5 ဂေ ဒူအီ အာယူဒါ၊ ဂေ ယီ တူ အိုင် အာတီ။ ဂေ ဟာဝ် ဒီ ကာလး၊ ဒဲ့ ဒူအီ ဟဝ် မင် အီ အီ ကွယ် ဒီလူယ် ဒီလာယ် ကာဆုး ဂေ ဘူင် ဆီနန် ဆီနိူင်၊ တဲး ဒူအီ ကိူန် ဘော ဒူပ် ဂေ။ ဂေ ဒတ် တာင် ဟာဝ် ဇမ် ကာင် အာယာဆူန်၊ ဟြေတ့် အာပေါလူ ဂါယ် အာဆီလာတ် ခဲင် ကာင် အာယာဆူန် တီ။ ဂေ တဝ်း ဒီ ဒဲ့ ဂါယ် လေး ခဲင် ကာင်၊ ဝီ ဟာဝ် ဒူပ် ဂေ။ 6 ဂေ ယီ တူ ယိုဝ် ဂါယ်။ ဟဲ့ ဟွတ့်၊ ဂေ ဝီ တိုယ် အာယာဆူန် ဘော ဂေ ဘီနွင် မင် အီ၊ တဲး ဂေ ဟာဝ် ဇမ် ဒူင် ကွယ် ဂေ ဒါ တာင် အီ အိုပ် မိူင်။ ဒေါ အန် တီ ဂေ ဝီ ဒတ် တာင် တဝ်း၊ “ဒူအီ ဂေ နီ၊ ဂေ ဘူင် ဆီနန် ဆီနိူင် ဒွန် နာ ဒွန် ပ့လုဝ့်။ ဂေ ဟဲ့ ဝီ တး ဇမ် ဘော ဒီ နီ။ 7 အာယာဆူန် ယီ ဟဲ့ တဲး ဂေ ကွယ် ခဲင် ကာင် အန်။ ဒူအီ ဂေ တီ၊ ဂေ ဘောကာဂ့လျီတ်၊ ဂေ တူ ဒူပ် ဒါရာ ပီ ဒွါ အာကဲဆာ။ ဂေ တဝ်း၊ န့ မိုဝ်း ခုန်ဒီခမ် ပေါ အူ ကာဒင်။ ဂေ တဝ်း၊ အန် စိူဝ် အာယေဆူ။” 8 ဒေါ ထူမ် ဂေ ဂြုဝ်း တီ ဘော ဂေ ဒူအီ ကိူန် ဘော ဂေ ဒါ တာင် အီ အိုပ် မိူင် ဝီ ဘဲန် နဝ်း ရူ ဒီ ဂေ။ 9 ပန် တီ ဂေ ဝီ မှာန့် တဲး အာယာဆူန် ဘော ဂေ ဘီနွင် တွိုန် ဝီ ဒွါ ရွိုန်၊ ခမ် ဘော ကာဒိက် ဆတ်ဇာ။ ဟဲ့ ဟွတ့် ဂေ ဘော ဝီ ဘ့လေး၊ တဲး ဂေ ဝေန့်။

10 ခဲင် မှိုဝ် တီ၊ ဂေ ဘီနွင် ဝီ တိုယ် အာပေါလူ ဂါယ် အာဆီလာတ် တဲး ဂါယ် လေး တ မိူင် ဂေ၊ ဟာဝ် ဇမ် မိူင် ဘေရေ။ ဂါယ် ဟဲ့ ဟွတ့် ဇမ် ခဲင် မိူင် ဘေရေ၊ ဂါယ် ဝီ ဟာဝ် လိုပ် ခဲင် ဇူင် ကြိုပ် ဂေ ဒူအီ အာယူဒါ ဇဝ်ဖြာ။ 11 ဂေ ဒူအီ အီ ကွယ် ခဲင် မိူင် ဘေရေ၊ ဂေ မိုဝ်း နဝ်း ဘွတ်။ ဂေ တူ ပီ ဂေ ဒူအီ အီ ကွယ် ခဲင် မိူင် ထေဆာလူန် တွိုန်။ ဂေ မိုဝ်း နဝ်း ဆီ ထူမ် ကာဆဝ် ဂြုဝ်း ဇဝ်ဖြာ၊ ဝီ တဲး န့ လိုပ် ခဲင် နဝ်း ဂေ။ ဒွန် ဆီငဲ ဒွန် ဆီငဲ ဂေ ဝီ တိး ဒီ ယွတ် ခဲင် ဘပ် ဇဝ်ဖြာ၊ တဲး ဂေ နပ် ဆီချာ၊ ယုဝ် န့ ဟဲ့ မှာန် ပီ မာနုဝ် အာပေါလူ။ 12 ဂေ ဒူအီ အာယူဒါ ဟဲ့ ကိူန် အီ ညှိုမ် ဇဝ် ယေဆူ။ ဘော ဂေ အီမာယ် အာမျုဝ် ဂြိက် ဘော ဂေ အီဘိုန့် အီ မုး ယာ တာင် ခဲင် ဒူအီ အာမျုဝ် ဂြိက် ဟဲ့ ညှိုမ် ဇဝ် ယေဆူ။

13 ဝါယ် အန် တီ ဂေ ဒူအီ အာယူဒါ အီ ကွယ် ခဲင် မိူင် ထေဆာလူန် တွိုန်၊ ဂေ ဘော နပ် လွင် အာပေါလူ ဟဲ့ မာနုဝ် လွင် ဇဝ်ဖြာ ဘော ခဲင် မိူင် ဘေရေ၊ ဂေ ဝီ ဟာဝ် ဇမ် ဒူင် ကွယ် ဂေ တီ။ ဂေ ဝီ တး ကာလာင် ဂြုဝ်း တူ မွှိုမ် လွင် အာပေါလူ၊ တဲး ဂေ ဒူအီ ကိူန် ဝီ ဘဲန် နဝ်း ရူ ဒီ အန်။ 14 ဒေါ အန် တီ အူ ဇေန့် ဂေ ဘီနွင် ဝီ တိုယ် အာပေါလူ၊ တဲး အန် ဟာဝ် ဇမ် ဘာင် အိုမ် တာင်။ အီ မုး အာဆီလာတ် ဂါယ် အာထီမုဝ်ထေ၊ ဂါယ် ဆီ ကွယ် ခဲင် မိူင် ဘေရေ တွိုန်။ 15 ဂေ ဒူအီ အီ တိုယ် အာပေါလူ လေး ခဲင် မိူင် ဘေရေ၊ ဂေ ဝီ တိုယ် အန် ဟာဝ် ဇမ် မိူင် အေထေန်။ ဂေ ဟဲ့ ဟွတ့် ဇမ် မိူင် အေထေန် တီ၊ အာပေါလူ ဝီ ခ့ဝါင် ဂေ ဝေန့်။ အန် ဝီ ဒမ် ဂေ၊ တဲး အာဆီလာတ် ဂါယ် အာထီမုဝ်ထေ ဝီ တး နင်ဂန် ဒူင် ကွယ် အန်။

16 အာပေါလူ ကွယ် ခဲင် မိူင် အေထေန် နှဝ့် အာဆီလာတ် ဂါယ် အာထီမုဝ်ထေ ဝီ တး ဒူင် ကွယ် အန်။ ဒေါ အန် တီ အန် ဘော ယိုဝ် ခဲင် မိူင် ဘော မိူင် မိုဝ်း အာရိုပ် ကိူန် ပီ ကြိုပ် ဂေ ဒူအီ။ န့ ဝီ ဘဲန် နဝ်း လိုဝ် ဒီ အန်။ 17 ခုဝ်၊ အန် ဝီ ဟာဝ် ဒီ ဇူင် ဒူင် ကြိုပ် ဂေ ဒူအီ အာယူဒါ ဇဝ်ဖြာ၊ ဝီ ကာမွုန် ဒီ ဒူအီ အာယူဒါ ဘော ဒူအီ အာမျုဝ် ဂြိက် အီ ကွယ် ခဲင် မိူင် တီ၊ အီ မုး ဒူအီ အီ ညှိုမ် ဇဝ်ဖြာ အာခါခ်ု။ အန် ဘော ဟာဝ် ခဲင် ကာလး၊ ကာလာင် ဒီ ဒူအီ အီ ဟဲ့ ကွယ် ခဲင် ကာလး၊ အီ ဝီ ထူမ် ဂြုဝ်း အန်။ 18 န့ ဘော မိုဝ်း ဒူအီ ခဲင် ဖိုင် အေဖီခူရူ ဘော ဒူအီ ခဲင် ဖိုင် ဆန်ဒုဝ် မင် အီ၊ ဂေ တး လာယ် ကာမွုန် ဒီ အန်။ ဂေ မုး ဒူအီ မိုဝ်း အာငျာန်။ မင် အီ ဂေ တဝ်း၊ “မာဆေ န့ မုး၊ ပီ ကာလာင် ဒူအီ နီ။ န့ မုး ဂြုဝ်း ပီယေန့်၊ အာဝ် မိုဝ်း ဒီခုဝ်။” မင် အီ ဘော တဝ်း၊ “န့ နှဲန် အန် မာနုဝ် လွင် ဇဝ်ဖြာ အူ ကာဒင် ပီ တူ နပ် အေ။” အာပေါလူ ဟဲ့ မာနုဝ် လွင် ဇဝ် ယေဆူ ဘော လွင် ဒူအီ ဒီ ဝီ ယိတ့် ဝီ အိမ် ဝါယ် ယမ် ဂေ။ ကူပ် ကာလာင် အန် ပါယ် တီ၊ ဂေ ထာင်၊ အန် မာနုဝ် လွင် ဇဝ်ဖြာ ပီ တူ နပ် ဂေ။ 19 ပန် တီ ဂေ ဝီ ဒဲ့ အာပေါလူ တိုယ် အန် ဟာဝ် ဇမ် ခဲင် ဖိုင် အီ လာယ် ဆင်ချာင် ဒဲင် နွန် အာရေ။ ဂေ ဝီ တဝ်း ဒီ အန်၊ “တဲး မဲ ကာလာင် ဒီ ယေ၊ တဲး ယေ နပ် မာဆေ န့ မုး၊ အီ ကာမာယ် ပီ မာနုဝ် မဲ။ 20 ယေ တူ ဒွိုမ် ယိုဝ် လွင် ပီ မာနုဝ် မဲ။ ခုဝ်၊ ယေ ဆီ နပ် လွင် မာဆေ န့ မုး၊ ပီ တဝ်း မဲ။” 21 ဂေ ဒူအီ အီ ကွယ် ခဲင် မိူင် အေထေန် တွိုန်၊ ဘော ဂေ ဒူအီ အာမျုဝ် ဟဝ် အီ တး ကွယ် ခဲင် မိူင် အေထေန် တီ၊ ဂေ ကွယ် ဒီလူယ် ဒီလာယ် ဘော ဝီ လာယ် ကာမွုန် ဘော ဝီ ထူမ်၊ ယုဝ် န့ မိုဝ်း အီ ကာမာယ်၊ ပီ တူ ဒွိုမ် ယိုဝ် ဂေ။

22 ဒေါ ကွယ် ဂေ ဒဲင် နွန် အာရေ တွိုန်၊ အာပေါလူ ဝီ ယိတ့် စွင့်၊ စုး ဒီ ကာလာင် ဂြုဝ်း။ အန် တဝ်း၊ “အိုယ် ဘေ ဒူအီ အီ ကွယ် မိူင် အေထေန် နီ။ အုဝ် ဟဲ့ နပ်၊ ဘေ မုး ဒူအီ အီ ဂျုဝ်ဂျာ ကာဆဝ် ဒီ ကြိုပ် ဇဝ်ဖြာ ဘဲန် ကာဒင် ဘဲန် ကာဒင်။ 23 ဒေါ ဟာဝ် ဝိန် ဒီလဲ အုဝ် ခဲင် မိူင် ဘေ၊ အုဝ် ဟဲ့ ယွတ် ဆီချာ အာရိုပ် ဘဲန် မျုဝ် ဘဲန် မျုဝ် ပီ ကြိုပ် ဘေ။ ဒေါ အန် တီ အုဝ် ဟဲ့ ယိုဝ် ဒူင် လှူ ဘေ အူ ပ့လုဝ့် အီ မိုဝ်း ပဲ့ အီ ဒဲမ် အုန် နာ ဒဲင် တဝ်း၊ ‘ဒူင် လှူ ဒီ ဇဝ်ဖြာ ပီ တူ နပ် အေ။’ ဇဝ်ဖြာ ပီ ကြိုပ် ဘေ ဒီ တီ၊ ဇဝ်ဖြာ ပီ တူ နပ် ဘေ တီ၊ အုဝ် ဒီ ဝီ ကာလာင် ဒီ ဘေ လွင် အန် ဇဝ် အူ ကာဒင် တီ။

24 ဇဝ်ဖြာ တီ၊ အန် ဟဲ့ ဖာန် ဘ့လေး ကာဒါယ် ဘော အီ ကွယ် ဒဲင် ကာဒါယ် တူတ့် ဒွန် မျုဝ်။ ဇဝ်ဖြာ တီ၊ အန် ဘော မုး အီ အိုပ် တူတ့် ဒွန် မျုဝ်။ ဘော ကာဒါယ် ဘော ဂါင်ဟြာဝ် အန် အိုပ်။ ခုဝ်၊ အန် တူ ကွယ် ခဲင် ဇူင် ခဲင် ဟုဝ် ပီ ဘူင် ဒူအီ တာ ဒဲ ဂေ။ 25 ဇဝ်ဖြာ တီ၊ အန် မိူဝ် တူ လုဝ် ဒူအီ စွယ် အန်။ ဘော အာဆာက် အေ ဘော ဖွိုမ် အေ၊ ဘော ပီ လုဝ် အေ ဒွန် မျုဝ်၊ အန် ဒွါ တူတ့် ဇိုဝ် တီ ဒီ ဒူအီ ဒွန် အီ။ ခုဝ် အန် တီ အန် တူ လုဝ် မာဆေ ပီ ဘူင် အေ ဒွါ ဒီ အန်။ 26 အူ ဆိန့် ဒေါ ဂုဝ် အန်၊ ဇဝ်ဖြာ ဟဲ့ ဖာန် ဘ့လေး အူ ဝီ။ ဟဲ့ ဟွတ့်၊ အန် တဲး လှုက်လှာန် ဝီ တီ ဝီ ဘဲန် ဒူအီ ဘဲန် မျုဝ် ဘဲန် မျုဝ် ဒဲင် ကာဒါယ်၊ တဲး ဂေ ကွယ် ဒွန် နာ ဒွန် ပ့လုဝ့်။ ဇဝ်ဖြာ မိူဝ် ဟဲ့ ပွက့် အုန် ဒီ အာတ့်၊ ခဲ့ မှဝ် အာဆာက် ဂေ ဒီ တူင့်။ အန် ဘော နပ် ဒီ အာတ့် ဒူင် ဒီ ကွယ် ဂေ။ 27 ဇဝ်ဖြာ ဟဲ့ ဘူင် ပါယ် တီ၊ တဲး ဒူအီ ဟြေတ့် အန်၊ တဲး ဂေ မိုဝ်း နဝ်း ဆီ ဒူပ် အန်၊ တဲး ဂေ ပွိုန် ဒီ ကာတုန့် အန်။ ဇဝ်ဖြာ ယီ တူ ကွယ် ကာတူင့် ဒီ အေ ဒူအီ ဒွန် အီ။ 28 ကူပ် မိုဝ်း ဇဝ်ဖြာ တီ၊ အေ ကော မိုဝ်း အာဆာက်၊ မိုဝ်း ဖွိုမ် ဘော ပွိုန် ဒီ ဟာဝ်။ ဘော ဒါ ဆာရာ ဘေ မင် အီ ဂေ ဟဲ့ ဒွိုမ် တဝ်း၊ ‘အေ မုး လှုက်လှာန် အန်။’

29 ကူပ် မုး အေ လှုက်လှာန် ဇဝ်ဖြာ၊ အာဝ် ကာအာပ် အေ တဝ်း၊ ဇဝ်ဖြာ ပီ ခြိဝ်၊ ပီ ရွိုန် ဂေ မာဝ်။ အာဝ် ကာအာပ် အေ တဝ်း၊ ဇဝ်ဖြာ မုး အာရိုပ် ရာင် ပီ ဘူင် ဒူအီ၊ အီ လေး ခဲင် အာငျာန် ဒူအီ။ 30 ဒေါ မွိုန် ဇဝ်ဖြာ ဟဲ့ နပ်၊ ဘေ တူ နပ် လွင် ပီ လုဝ် ဇဝ်ဖြာ။ ခုဝ်၊ အန် တူ ဒမ် မှာပ် ဒီ ဘေ။ ဒေါ တီ နီ၊ ဇဝ်ဖြာ ယီ စ်ု ဒူအီ ဒွန် အီ၊ အီ ကွယ် ဒွန် နာ ဒွန် ပ့လုဝ့်၊ တဲး ဂေ ဝီ လှုဝ်း မှာပ် ဂေ၊ တဲး ဂေ ဝဲန် မှာပ် ဂေ။ 31 အန် ဟဲ့ ဟွတ့် ရဝ်း အူ ဆီငဲ ပန် ဒီ ဆုင်ဖျာတ် အန် အာမူ ဒွန် အီ၊ အီ ကွယ် ဒဲင် ကာဒါယ်။ န့ ဘော မိုဝ်း ဒါ အူ ဝီ၊ ဇဝ်ဖြာ ဟဲ့ စ်ု အန်၊ တဲး အန် ဆုင်ဖျာတ် အာမူ ဒူအီ၊ တဲး န့ ဒူပ် နာ မှာန်။ ဒူအီ ဝီ တီ ဟဲ့ ဒွိုမ် ယမ်။ ဟဲ့ ဟွတ့်၊ ဇဝ်ဖြာ ဟဲ့ တဲး အန် ဝီ ယိတ့် ဝီ အိမ်။ ဇဝ်ဖြာ ဟဲ့ ဘူင် ပါယ် တီ၊ တဲး ဒူအီ ဒွန် အီ နပ်၊ အာဆေ ဟဲ့ မိုဝ်း ပွုန် ဒီ ဆုင်ဖျာတ် အာမူ ဒူအီ ဒွန် အီ။”

32 ဒေါ ဟဲ့ ဟွတ့် ကာလာင် အာပေါလူ လွင် ဒူအီ ဒီ ဝီ ယိတ့် ဝီ အိမ် ဝါယ် ဟဲ့ ဟွတ့် ယမ်၊ န့ မိုဝ်း မင် အီ၊ ဂေ စုး ဒီ ကာညး အန်။ မင် အီ ယီ တဝ်း၊ “ယေ ဒီ ဝီ တး ထူမ် ဂြုဝ်း မဲ လွင် အန် တီ ပေါ အူ ဇေန့်။” 33 ဟဲ့ ဟွတ့် ပန် တီ အာပေါလူ ဝီ လေး ဒူင် ကွယ် ဂေ။ 34 န့ ယီ မိုဝ်း ဒူအီ မင် အီ၊ ဂေ ဝီ ဒူပ် အာပေါလူ။ ဂေ ဘော ညှိုမ် ဇဝ် ယေဆူ။ ကာတဲ ဂေ ဒူအီ အီ ညှိုမ် တီ၊ န့ ဘော မိုဝ်း ဒူအီ အူ ဝီ အီ စိူဝ် အာဒီအူန်။ အန် မုး ဒါ တာင် ခဲင် ဖိုင် အီ လာယ် ဆင်ချာင် ဒဲင် နွန် အာရေ တွိုန်။ န့ မိုဝ်း ဘော အီဘိုန့် အူ ဝီ အီ စိူဝ် နာင် ဒေမာရီ၊ ဘော အီ ဟဝ် မင် အီ အီ ညှိုမ် ဇဝ် ယေဆူ။