1 ဝါယ် အန် တီ အာပေါလူ ဝီ လေး ခဲင် မိူင် အေထေန် တွိုန်၊ ဝီ ဟာဝ် ဇမ် မိူင် ခုဝ်ရိန်ထူ။ 2 ခဲင် မိူင် ခုဝ်ရိန်ထူ အာပေါလူ ကာတုန့် ဒူအီ အာယူဒါ အူ ဝီ၊ အန် စိူဝ် အာခီလာ။ အန် တး မိူင် ဖူန်ထူ။ ခါ အာတ့် ညှမ် ဘော လှေန့်၊ ဘော အန် ဘော အီဘိုန့် အန်၊ အီ စိူဝ် ဖီခီလာ၊ ဂါယ် ဟဲ့ လေး ခဲင် ကာဒါယ် မိူင် အီတာလီ၊ ဝီ ဟာဝ် မိူင် ခုဝ်ရိန်ထူ တီ။ ခုန်ဒီခမ် အာကာလုဝ်ဒီလက် ဟဲ့ ဒွိုမ် ဟုဝ် လေး ဂေ ဒူအီ အာယူဒါ ဒွန် အီ ခဲင် မိူင် ရုဝ်မာ၊ အီ ကွယ် ခဲင် ကာဒါယ် မိူင် အီတာလီ။ ခုဝ်၊ ဂါယ် ဟဲ့ တဝ် တး ဇမ် ခဲင် မိူင် ခုဝ်ရိန်ထူ။ အာပေါလူ ဘော ယိုဝ် ဂါယ်၊ အန် ဘော ဟာဝ် ဒူင် ကွယ် ဂါယ်။ 3 ဘော အန် ဘော ဂါယ် နပ် ဒီ ဘူင် ထိုပ် ဘိက်။ ခုဝ်၊ ဂေ ဝီ ကွယ် ရိုမ်၊ ဘူင် ရိုမ် ဂါန်။ 4 ဒေါ မုး ဒွန် ဆီငဲ ဒီလှဝ်၊ ဂေ ဝီ ဟာဝ် ခဲင် ဇူင် ကြိုပ် ဂေ ဒူအီ အာယူဒါ ဇဝ်ဖြာ။ ဂေ ကာမွုန် ဒီ အီ၊ တဲး ဂေ ကာဆုး ဘော ဂေ ဒူအီ အာယူဒါ ဘော ဂေ ဒူအီ ဂြိက်၊ တဲး ဂေ ညှိုမ် ဇဝ် ယေဆူ။

5 ဝါယ် အန် တီ န့ ယီ မုး အာဆီလာတ် ဂါယ် အာထီမုဝ်ထေ တွိုန်၊ ဂါယ် တး ဒီ အိူင် မာခေဒူန်၊ ဝီ ဟာဝ် ဇမ် မိူင် ခုဝ်ရိန်ထူ အီ မုး ဒူင် ကွယ် အာပေါလူ။ ဒေါ တး ဇမ် ဂါယ် တီ၊ အာပေါလူ မိူဝ် စူ ဘူင် ထိုပ်။ အန် ဝီ စုး ဒီ ဟုဝ် မီ ဒါရာ ဇဝ်ဖြာ ဆေဆေ။ ဒွန် ဆီငဲ၊ ဒွန် ဆီငဲ၊ အန် ဝီ ကာလာင် ဒီ ဒူအီ အာယူဒါ လွင် ဇဝ် ယေဆူ မုး ဒူအီ ပီ ရဝ်း ပီ တိုယ် ဇဝ်ဖြာ တဲး အန် ချွတ် ဒူအီ။ 6 ဂေ ယီ တူ အိုင် ဒီ ထူမ် လွင် အန် တီ၊ ဂေ ဝီ ကာညး အန် ဘော ကာလာင် ဂြုဝ်း စီစိဝ် ဒီ အန်။ အာပေါလူ ယီ ဒီယိုဝ်း ဆီတုဝ် အန်၊ တဲး ဂေ နပ်၊ ဂေ တူ ကာအာပ် ကာလာင် ဂြုဝ်း တီ။ အန် ဘော တဝ်း၊ “တဲး ဘေ ခမ် မှာပ် ဘေ။ အုဝ် ဟဲ့ ဟွတ့် ကာလာင် တူတ့် ဂြုဝ်း ဇဝ်ဖြာ ဒီ ဘေ။ ဆေ ဘေ တူ ညှိုမ်၊ န့ တူ မုး ကူပ် တူ နပ် ဘေ လွင် အန်။ အူ ဆိန့် ဒေါ တီ နီ၊ အုဝ် ယီ ဒီ ဟာဝ် ကာလာင် ဒီ ဒူအီ အာမျုဝ် ဟဝ် လွင် ဇဝ်ဖြာ ချွတ် ဘော ဂေ။”

7 ပန် တီ အာပေါလူ ဝီ လေး ခဲင် ဇူင် ကြိုပ် ဂေ ဒူအီ အာယူဒါ ဇဝ်ဖြာ။ န့ ယီ မိုဝ်း ဒူအီ အူ ဝီ၊ အန် စိူဝ် အာထီဒီယူထူ။ အန် မုး ဒူအီ အီ ကြိုပ် ဇဝ်ဖြာ အာခါခ်ု။ အာပေါလူ ဝီ ဟာဝ် လိုပ် ခဲင် ကာင် အန်၊ အီ ကွယ် ခူပ် ဇူင် တွိုန်။ 8 န့ ယီ မုး ဒါ အီ အိုပ် ဇူင် တီ၊ အန် စိူဝ် အာခါရီဖူ။ ဘော အန် ဘော န့ဟူမ် အန်၊ ဂေ ဘောကာဂ့လျီတ် ညှိုမ် ဇဝ် ယေဆူ။ ဘော ဂေ ဒူအီ အီ ကွယ် မိူင် ခုဝ်ရိန်ထူ၊ ဂေ ကိူန် ဝီ ထူမ် ဘော ညှိုမ် ဂြုဝ်း အာပေါလူ။ ဟဲ့ ဟွတ့် ဂေ ဝီ ခမ် ဒီ စိုပ် ခဲင် အိုမ်။

9 အူ မှိုဝ်၊ ဇဝ်ဖြာ ဝီ ကာလာင် ဂြုဝ်း ဒီ အာပေါလူ၊ ဝီ တဲး အန် ယိုဝ် အာရူင် ပီ ဘျ ဇဝ်ဖြာ ဒီ အန်။ အန် တဝ်း၊ “အိုယ် အာပေါလူ။ မဲ ကွဲ့ ယုဝ်။ တဲး မဲ ကာလာင် ဟာဝ်၊ ကွဲ့ တဲး မဲ စူ ကာလာင် ဂြုဝ်း။ 10 အုဝ် ဇဝ်ဖြာ၊ အုဝ် ဒီ ကွယ် ရိုမ် ဒူပ် မဲ။ န့ တူ မိုဝ်း အာဆေ၊ အီ ပဲ ဒီ ဘူင် နာ စီစိဝ် ဒီ မဲ။ အာဝ် မိုဝ်း အာဆေ အီ ပဲ ဒီ ဘူင် နာ တူ မွှိုမ် ဒီ မဲ။ ခုဝ်၊ ခဲင် မိူင် တီ၊ န့ ဒီ မိုဝ်း ဒူအီ ကိူန် အီ ဒီ ညှိုမ် ဒူပ် အုဝ်။” 11 ဝါယ် အန် တီ အာပေါလူ ဘော ကွယ် ခဲင် မိူင် ခုဝ်ရိန်ထူ တွိုန် အာဒါ အူ ဆီနမ် ဒီ ဒဝ် မာဂျီန်။ အန် ဘော မာနုဝ် လွင် ဂြုဝ်း ဇဝ်ဖြာ ဒီ ဒူအီ အီ ကွယ် ခဲင် မိူင် တီ။

12 န့ မိုဝ်း ဒါ ကာညာ ရုဝ်မာ အူ ဝီ။ အန် စိူဝ် အာဂါလီအူန်။ ဒေါ အိုပ် အန် အိူင် အာခါယာ၊ ဂေ ဒူအီ အာယူဒါ ဟဲ့ လာယ် ဖြူမ် ဒီ ဖျာက် အာပေါလူ။ ဂေ ဝီ ဒိုဝ်း တး တိုယ် အန် ဒီ အာတ့် ဒါ ကာညာ တီ။ 13 ဂေ တဝ်း၊ “ဒူအီ နီ၊ အန် ကာဆုး ဒွန် အီ၊ တဲး ဂေ ကြိုပ် ဇဝ်ဖြာ၊ ကွဲ့ တဲး ဂေ ဒူပ် ဒါရာ ခဲင် မိူင် ယေ။”

14 အာပေါလူ ယီ ဆီ ကာလာင် ဂြုဝ်း ဒီ အာဂါလီအူန် တွိုန်။ အာဂါလီအူန် ယီ တူ တဲး အန် ကာလာင်။ အန် ဝီ စုး ဒီ ကာလာင် ဂြုဝ်း ဒီ ဒူအီ အာယူဒါ တဝ်း၊ “အိုယ် ဘေ ဒူအီ အာယူဒါ၊ ဆေ န့ ဘော မုး အာမူ လွင် ဒူအီ အီ ဘူင် နာ တူ မွှိုမ်၊ ဆေ န့ ဘော မုး အာမူ လွင် ဒူအီ အီ တူ ဒူပ် ဒါရာ မိူင် အေ၊ အုဝ် ဘော လုဝ် ထူမ် ဆီချာ ဂြုဝ်း ဘေ။ 15 အာမူ ဘေ ယီ မုး လွင် ဂြုဝ်း မင် ဒုဝ် ဘော စိူဝ် ဒူအီ မင် အီ ပီ တူ လာယ် ဖြူမ် ဘေ လွင် ဒါရာ ဘေ။ အာတီ ဘေ လုဝ် တဲး န့ ကာဆိူဝ် ကာတဲ ဘေ။ အုဝ် တူ ဆုင်ဖျာတ် အာမူ ဇိုဝ် တီ။” 16 ပန် တီ ဒါ ကာညာ အာဂါလီအူန် ဝီ စ်ု ဂေ လေး ဒူင် ကွယ် အန်။ 17 ဝါယ် အန် တီ ဂေ ဒူအီ ကိူန် ဝီ မှေတ့် အာဆူထိင်၊ အီ မုး ဒါ အီ အိုပ် ဇူင်။ ဂေ ဝီ စုး ဒီ မး အန် ဒီ အာတ့် ဂေ ဒါ တာင် အီ ဆုင်ဖျာတ် အာမူ အီ။ ဒါ ကာညာ အာဂါလီအူန် တွိုန် ယီ တူ ဘူင် မာဆေ။

18 ဝါယ် အန် တီ အာပေါလူ ဘော ကွယ် ရာမ် လှေန့် ခဲင် မိူင် ခုဝ်ရိန်ထူ တွိုန်။ ဟဲ့ ဟွတ့်၊ အန် ဝီ မှာန့်၊ တဲး ဂေ ဘီနွင် ခ့ဝါင် အန် ဟာဝ် ပေါ အူ ပ့လုဝ့်။ အန် ဝီ ပဝ့် ရိုဝ် ဆင်ဖုဝ် ဟာဝ် မိူင် ဆူရီ။ ယာ ဖီခီလာ ဂါယ် အာခီလာ တွိုန်၊ ဂါယ် ဘော ဒူပ် အန်။ ဒေါ ဟာဝ် ဂေ ဒူပ် န့တေန့်၊ အာပေါလူ ဟဲ့ ဒွါ ကာဒိက် ဆတ်ဇာ ဒီ ဇဝ်ဖြာ။ ဒေါ ဟဲ့ ဟွတ့် ပွုန် အာခြာဝ် ပီ ခမ် အန် တီ၊ ဒေါ ဝီ ဇမ် ဂေ ခဲင် မိူင် ကေန်ဆေ၊ အန် ဝီ ကပ် ဂိန့် အန်။ 19 ဂေ ဝီ တး ဇမ် မိူင် အဲဖဲ၊ အန် ဝီ တဲး ယာ ဖီခီလာ ဂါယ် အာခီလာ ကွယ် ခဲင် မိူင် တီ။ အန် အူ ဝီ ယီ ဟာဝ် လိုပ် ခဲင် ဇူင် ကြိုပ် ဂေ ဒူအီ အာယူဒါ ဇဝ်ဖြာ၊ တဲး အန် ဝီ ကာမွုန် ဒီ ဂေ။ 20 ဂေ ဝီ မှာန့်၊ တဲး အာပေါလူ ကွယ် လှေန့် ခဲင် မိူင် ဂေ။ အာပေါလူ ယီ တူ ဖြူမ်။ 21 ဒေါ လေး အန် ဒူင် ကွယ် ဂေ၊ အန် ဝီ တဝ်း၊ “ဆေ န့ မုး ပီ လုဝ် ဇဝ်ဖြာ၊ အုဝ် ဒီ ဝီ တး ဒူင် ကွယ် ဘေ ပေါ အူ ဇေန့်။” အန် ဟဲ့ ဟွတ့် ကာလာင် ဂြုဝ်း တီ၊ အန် ဝီ ပဝ့် ရိုဝ် ဆင်ဖုဝ်၊ လေး ခဲင် မိူင် အဲဖဲ။ 22 အန် ဟဲ့ ဝီ ဇမ် မိူင် ကေဆာရေ၊ အန် ဝီ ဟာဝ် ကာလာင် ဂြုဝ်း ဒီ ဂေ ဒူအီ ခဲင် ဖိုင် ဇဝ် ယေဆူ။ ဟဲ့ ဟွတ့်၊ အန် ဝီ ဟာဝ် လူင် မိူင် အန်ထီအုဝ့်။

23 အာပေါလူ ဟဲ့ ဟွတ့် ကွယ် ခဲင် မိူင် အန်ထီအုဝ့် အာဒါ ဖွုန် ဖန် ဆီငဲ၊ အန် ဝီ ဟာဝ် ဘဲန် ပ့လုဝ့် ဘဲန် ပ့လုဝ့် ခဲင် အိူင် ဂါလာထီ ဘော ခဲင် အိူင် ဖူဂီ။ အန် ဝီ မာနုဝ် ဂေ ဒီဘဲ ဇဝ် ယေဆူ တဲး ဂေ ဝီ ညှိုမ် ဆီချာ။

24 ဒေါ အန် တီ န့ မိုဝ်း ဒူအီ အာယူဒါ အူ ဝီ၊ အန် စိူဝ် အာဖောလူန်။ မိူင် ဘြိမ် အန် မုး မိူင် အာလေဆန်ဒါရေန်။ အန် ဝီ တး ဇမ် မိူင် အဲဖဲ တွိုန်။ အန် မိုဝ်း အာငျာန်၊ နပ် ဆီချာ ဘပ် ဇဝ်ဖြာ။ 25 အီ ဟဝ် ဟဲ့ ဟွတ့် မာနုဝ် အန် လွင် န့တေန့် ဒီ ဒူပ် ဇဝ် ယေဆူ။ နဝ်း အန် ဟဲ့ အိုင် ကာဆဝ်။ အန် ဘော နပ် ဆီချာ ဒီ ကာလာင် ဒီ အီ ဟဝ် လွင် ဇဝ် ယေဆူ။ အန် နပ် မီ အူ မျုဝ် လွင် ဒါ ဆာရာ အာယောဟာန် စိုပ် ဒူအီ ခဲင် အိုမ်၊ တဲး ဂေ လှုဝ်း ဝဲန် မှာပ် ဂေ။ လွင် ဆီဖဝ် စိုပ် အီ ခဲင် အိုမ် ပေါ အူ မျုဝ် အန် ယီ တူ နပ်။ 26 ဒါ ဆာရာ တီ၊ အန် စုး ဒီ ကာလာင် ဆိူဝ် ခဲင် ဇူင် ကြိုပ် ဂေ ဒူအီ အာယူဒါ ဇဝ်ဖြာ။ ဘော အာခီလာ ဂါယ် ယာ ဖီခီလာ တွိုန် ထူမ် ဂြုဝ်း ပီ ကာလာင် အန်။ ပန် တီ ဂါယ် ဝီ ဘာင် အန် တး လိုပ် ခဲင် ကာင် ဂါယ်၊ တဲး ဂါယ် ဝီ မာနုဝ် အန် ကာပွါ လွင် န့တေန့် ဒီ ဒူပ် ဇဝ် ယေဆူ။

27 အာဖောလူန် ယီ တဝ်း ဒီ ဟာဝ် အိူင် အာခါယာ။ ဂေ ဘီနွင် မိူဝ် ဖြူမ် ဘော အိုင် ကာဆဝ် လွင် အန် တီ။ ဂေ ဘော ဒဲမ် ပဲ့ တဲး ဂေ ဒီဘဲ ဇဝ် ယေဆူ အီ ကွယ် ခဲင် အိူင် အာခါယာ ဝီ ရွုး အန်၊ တဲး အန် ဘဲန် ခဲတ့် ဂေ။ အန် ဟဲ့ ဟွတ့် ဇမ် ဒူင် ကွယ် ဂေ၊ အန် ဝီ ပွိုန် ဒီ စွယ် ကိူန် ဂေ ဒူအီ အီ ညှိုမ် ဇဝ် ယေဆူ။ ခါ အာတ့် ဇဝ်ဖြာ ဟဲ့ ဟွတ့် ကာဝေ ဂေ၊ တဲး ဂေ မိူဝ် ညှိုမ် ဇဝ် ယေဆူ။ 28 အန် နပ် ဒီ ကာလာင် ဆီချာ ဒီ ဂေ ဒူအီ အာယူဒါ၊ တဲး ဂေ နပ်၊ ပီ ထာင် ဂေ လွင် ဇဝ် ယေဆူ အာဝ် မှာန်။ အန် နပ် ဒီ ဘျ ဒီ ဂေ ခဲင် ဘပ် ဇဝ်ဖြာ၊ န့ ဟဲ့ ဒဲမ် အုန် ပါယ် မှဝ် လွင် ဇဝ် ယေဆူ အီ မုး ဒူအီ ပီ ရဝ်း ပီ တိုယ် ဇဝ်ဖြာ တဲး အန် ချွတ် ဒူအီ။