1 ဒေါ ကွယ် အာဖောလူန် ခဲင် မိူင် ခုဝ်ရိန်ထူ (အီ ကွယ် ခဲင် အိူင် အာခါယာ)၊ အာပေါလူ ယီ ဟာဝ် ခဲင် မိူင် ဒွန် မိူင် အီ ကွယ် နာ ကွာ။ ဟဲ့ ဟွတ့်၊ အန် ဝီ ဇမ် မိူင် အဲဖဲ။ ခဲင် မိူင် အဲဖဲ တွိုန်၊ အန် ဝီ ကာတုန့် ဒီဘဲ ဇဝ် ယေဆူ မင် အီ။ 2 အန် ဒီမွှတ် ဂေ တဝ်း၊ “ဒေါ ညှိုမ် ဘေ ဇဝ် ယေဆူ၊ နဝ်း ဖွိုမ် ဇဝ်ဖြာ ဟဲ့ လိုပ် ခဲင် နဝ်း ဘေ။း”

ဂေ ဝီ တဝ်း ဒီ အန်၊ “ယေ တူ နပ် မာဆေ လွင် နဝ်း ဖွိုမ် ဇဝ်ဖြာ၊ တူ ဒွိုမ် ယိုဝ် အီ ကာလာင် လွင် အန် တီ။”

3 ပန် တီ အာပေါလူ ဝီ တဝ်း၊ “ဆေ န့ ပါယ် တီ၊ မာဆေ ပီ ညှိုမ် ဘေ ဒေါ ခမ် ဘေ ဒီ စိုပ် ခဲင် အိုမ်။း”

ဂေ ဝီ တဝ်း၊ “ယေ ညှိုမ် ပီ မာနုဝ် ဒါ ဆာရာ အာယောဟာန် တွိုန် လွင် လုဝ် စိုပ် ခဲင် အိုမ်။”

4 အာပေါလူ ဝီ တဝ်း၊ “ဒါ ဆာရာ အာယောဟာန် တွိုန် စိုပ် ဒူအီ ခဲင် အိုမ် ဝါယ် လှုဝ်း ဂေ မှာပ် ဂေ၊ တဲး ဂေ ဝဲန် မှာပ် ဂေ။ အန် ယီ မာနုဝ် ဒူအီ၊ တဲး ဂေ ညှိုမ် ဒါ ဆာရာ ပေါ အူ ဝီ၊ အီ ဒီ တး ဒီ ပန် အန်၊ အီ မုး ဇဝ် ယေဆူ။ 5 ဂေ ဘော နပ် လွင် အန် တီ၊ ဂေ ဝီ ခမ် ဒီ စိုပ် ခဲင် အိုမ် ကူပ် ညှိုမ် ဂေ ဇဝ် ယေဆူ။” 6 ပန် တီ အာပေါလူ ဝီ ဒါင် ဒဲ အန် ဒဲင် ဂိန့် ဂေ။ ဒေါ အန် တီ နဝ်း ဖွိုမ် ဇဝ်ဖြာ ဘော လိုပ် ခဲင် နဝ်း ဂေ။ ဂေ ဝီ စုး ဒီ ကာလာင် ဂြုဝ်း ပီ တူ ဒွိုမ် နပ် ဂေ။ ဂေ ဘော ဘျာန် ဂြုဝ်း ဇဝ်ဖြာ။ 7 ဒူအီ ဂေ တီ၊ န့ မုး အီမာယ် ဂိုဝ် ဒီ အာ ဝီ။

8 ဝါယ် အန် တီ အာပေါလူ ဝီ လိုပ် ခဲင် ဇူင် ကြိုပ် ဂေ ဒူအီ အာယူဒါ ဇဝ်ဖြာ။ အာဒါ အူယ် မာဂျီန် အန် ဝီ လာယ် ဆင်ချာင် ဒီ ဂေ ဘော ကာဆုး ဂေ၊ ဝီ ကာလာင် ဆိူဝ် တဲး ဂေ ညှိုမ် ဒါရာ ဇဝ်ဖြာ လွင် ဒီ အိုပ် အန် ကာဒါယ်။ 9 န့ ယီ ဝီ မိုဝ်း မင် အီ၊ ဂေ ဝီ ကာဘိတ် နဝ်း ဂေ။ ဂေ တူ အိုင် ဒီ ညှိုမ် ပီ မာနုဝ် အာပေါလူ။ ဂေ ဝီ စုး ဒီ ကာလာင် ဂြုဝ်း တူ မွှိုမ် ဒီ ဒူအီ ကိူန် လွင် န့တေန့် ဒီ ဒူပ် ဇဝ် ယေဆူ တီ။ ခုဝ်၊ အာပေါလူ မိူဝ် တူ ဝီ ဟာဝ် လိုပ် ခဲင် ဇူင် တွိုန်။ အန် ဝီ ဒဲ့ ဂေ ဒီဘဲ အီ ညှိုမ် ဇဝ် ယေဆူ၊ တဲး ဂေ ဟာဝ် ဒူပ် အန်။ ဒွန် ဆီငဲ အန် ဝီ မာနုဝ် ဂေ ခဲင် ဟူင် ဟေန် အီ မုး ကြုဝ် အာထူရာနူ။ 10 အာဒါ အာ ဆီနမ် အန် မာနုဝ် ဂေ ဒူအီ ပါယ် တီ။ န့ တဲး ဂေ ဒူအီ အီ ကွယ် ခဲင် အိူင် အာဆီယာ ဘော အိူင် ကော နပ် လွင် ဇဝ် ယေဆူ။ ဂေ ဒူအီ အာယူဒါ ဘော ဂေ ဒူအီ ဂြိက် နပ် ဒီ ထူမ် ပါယ် တီ။

11 ဇဝ်ဖြာ မိူဝ် ဒွါ ပွုန် အန် ဒီ အာပေါလူ၊ တဲး အန် ဘူင် အီ မွှိုမ် အာမ် ကာဆဝ်။ 12 ဂေ ဒူအီ ကိူန် နပ် ဒီ ဒိုဝ်း ခြိုင် ပီ ဒွိုမ် ပါ အန်၊ ဝီ ဘ့လေး ဒဲင် ဒုဝ် ဘူင့် ဒူအီ ဆဝ်၊ တဲး ဆဝ် ဝီ ကဲန် ဝီ ဟြာယ်။ ဘော ကာနမ် ဟာယ် အီ ကွယ် ခဲင် ဒုဝ် ဘူင့် ဒူအီ နပ် ဒီ လေး တဝ်။

13 န့ ယီ မိုဝ်း ဒူအီ အာယူဒါ မင် အီ အီ ဟာဝ် ဒွန် နာ ဒွန် ပ့လုဝ့် စ်ု ကာနမ် ဟာယ် လေး ခဲင် ဒုဝ် ဘူင့် အီ ဟဝ်။ ဂေ ဝီ ထေဝ် ဒီ ဂါဝ် ပွုန် ဇဝ် ယေဆူ၊ စ်ု ကာနမ် လေး ခဲင် ဒုဝ် ဘူင့် ဒူအီ။ ဂေ တဝ်း၊ “ယေ ဂါဝ် ပွုန် ဇဝ် ယေဆူ ဝီ ပီ မာနုဝ် အာပေါလူ၊ စ်ု ဘေ ကာနမ် လေး ခဲင် ဒုဝ် ဒူအီ။” 14 န့ မိုဝ်း ဒါ တာင် အီ ယဲတ့် ဂေ ဒူအီ အီ လှူ ဒီ ဇဝ်ဖြာ အူ ဝီ၊ အီ စိူဝ် အာဝီဝါ။ ဘော အန် ဘော ဂွန် အီမာယ် အန် ဘူ ဝီ ထေဝ် ဒီ ဘူင် ပါယ် တီ။ 15 အူ ဆီငဲ၊ ကာနမ် ဟာယ် ဝီ ဝျီ့ ဂြုဝ်း ဂေ တီ တဝ်း၊ “အုဝ် ဟဲ့ နပ် ဇဝ် ယေဆူ။ အုဝ် မိူဝ် ဟဲ့ ဒွိုမ် ယိုဝ် လွင် အာပေါလူ။ အီ မုး ဘေ၊ အာဆေ ဘေ မုး။း” 16 ပန် တီ ဒူအီ အီ မိုဝ်း ကာနမ် ဟာယ် ခဲင် ဒုဝ် အန်၊ အန် ဝီ ယိတ့် မှေတ့် ဂေ ဘော ပဲ ဂေ၊ ဝီ မး ကာဆဝ် ဂေ။ ပန် တီ ဂေ ဝီ တဝ် လေး ခဲင် ကာင်၊ အာဝ် ဟူ မိုဝ်း ခြိုင် အီ ဒိုက် ဒီ ဒုဝ် ဂေ၊ ဂေ မိူဝ် ဟဲ့ ဒိမ် ဟဲ့ လေး နှာမ် ဘော ဒုဝ်။

17 ဘော ဂေ ဒူအီ အာယူဒါ ဘော ဂေ ဒူအီ ဂြိက် အီ ကွယ် ခဲင် မိူင် အဲဖဲ၊ ဂေ ဘော နပ် လွင် အန် တီ။ န့ တဲး ဂေ ဘောကာဂ့လျီတ် ယုဝ် ကာဆဝ် ဘော ရုဝ်ဆေ ဇဝ် ယေဆူ။ 18 ဂေ ဒူအီ အီ ညှိုမ် ဇဝ် ယေဆူ၊ ဂေ ကိူန် ဝီ တး ကာလာင် လွင် မှာပ် ပီ ဒွိုမ် ဘူင် ဂေ၊ တဲး ဒွန် အီ နပ် ဒီ ထူမ်။ 19 ဂေ ဒူအီ အီ ဒွိုမ် ဘူင် မျလှယ့် ဂေ ဝီ ဒိုဝ်း တး ဘပ် ဂေ၊ ဝီ ဘ့လေး ကာဇု၊ ဝီ ဒုဝ့် ကာဆိုမ် တူတ့် ခဲင် ငဝ်။ ဂေ ဝီ တိး တူတ့် ငဝ်း ဘပ် ဂေ တီ၊ န့ ကော ဝီ ဘဲန် ရွိုန် ဖန် မှိုန့် ဘူင့်။ 20 ပါယ် တီ ဘော မိုဝ်း ဂေ ဒူအီ ကိူန် ကော နပ် လွင် ဇဝ်ဖြာ ချွတ် ဒူအီ။ ဂေ ဒူအီ အီ ညှိုမ် ဇဝ် ယေဆူ ဘော ကြဲ ဒီ ကိူန် ကာပွါ။

21 ဝါယ် အန် တီ အာပေါလူ ဝီ ခြာမ် ဒီ ဟာဝ် အိူင် မာခေဒူန် ဂါယ် အိူင် အာခါယာ၊ တဲး အန် ဝီ ဟာဝ် ဇမ် မိူင် ယေရူဆာလဲမ်။ အန် တဝ်း၊ “ဝါယ် အန် တီ အုဝ် ဘော လုဝ် ဟာဝ် ဇမ် မိူင် ရုဝ်မာ။” 22 အန် ဟဲ့ ဟွတ့် တဝ်း ပါယ် တီ၊ အန် ဝီ တိုယ် အီ စွယ် အန် အာ ဝီ၊ အီ စိူဝ် အာထီမုဝ်ထေ ဂါယ် အာရာထူ၊ တဲး ဂါယ် ယဲတ့် ဒီ အာတ့် ဟာဝ် အိူင် မာခေဒူန် တွိုန်။ အာပေါလူ ယီ ဆီ ကွယ် ခဲင် အိူင် အာဆီယာ တွိုန် အာဒါ အီ စဲက်။

23 ဒေါ အန် တီ န့ ယီ ဘဲန် ဆီနန် ဆီနိူင် ခဲင် မိူင် အဲဖဲ ကူပ် န့တေန့် ဒီ ဒူပ် ဇဝ် ယေဆူ။ 24 န့ မိုဝ်း ဒူအီ အူ ဝီ၊ အန် စိူဝ် အာဒေမေတ်။ အန် မုး ဒါ အီ စိုမ် ရွိုန်၊ ဘူင် အာရိုပ် ရာင် နာင် ကာနမ် အီ စိူဝ် အေထေမီ။ အာဆေ ဘူင် ဂါန် ဇိုဝ် တီ၊ အန် ပွိုန် ရွိုန် ကိူန် ကာဆဝ်။ 25 ဒါ အာဒေမေတ် ယီ ဒဲ့ ကာဇု ဂေ ဒွန် အီ၊ အီ ဘူင် ဂါန် ပီ အန်။ အန် တဝ်း ဒီ ဂေ “အိုယ် ဘေ ဂိုက်၊ ဘေ ဟဲ့ နပ် ဂါန် ပီ ဘူင် အေ နီ၊ န့ တဲး အေ ခြမ်။ 26 ဘေ ယီ နပ် လွင် အာပေါလူ တွိုန်။ ခဲင် မိူင် အဲဖဲ ဘော မိူင် အန် ဟဲ့ ကာဆုး ဒူအီ ကိူန်၊ တဲး ဂေ ဝဲန် ပီ ညှိုမ် ဂေ၊ တဲး ဂေ ဝီ ဒူပ် အန်။ အာဝ် ဝန် မီ ခဲ့ တီ။ အန် ဟဲ့ ဟွတ့် ဇမ် ဒွန် နာ ဒွန် ပ့လုဝ့် ခဲင် အိူင် အာဆီယာ ဘော အိူင်။ အန် တဝ်း၊ အာရိုပ် ပီ ဘူင် ဒူအီ အာဝ် မုး ဇဝ်ဖြာ။ 27 ခုဝ်၊ ပီ ဘူင် အန် ဟဲ့ မွှိုမ် ယုဝ်။ အေ လုဝ် ယုဝ် ဒူအီ ဒီ တဝ်း၊ ‘ဂါန် ပီ ဘူင် အေ အာဝ် ဘွတ်၊ အာဝ် မွှိုမ်။’ အာဝ် ဝန် မီ ခဲ့ တီ။ အာဝ် လှေန့်၊ ဂေ ဒီ ဘော တဝ်း၊ ဘော ဟုဝ် ဒူင် ကွယ် နာင် အေထေမီ အေ အာဝ် ဘွတ်။ ဘော နာင် အေထေမီ ပီ ကြိုပ် အေ ဒွန် အီ အီ ကွယ် ခဲင် အိူင် အာဆီယာ ဘော ဒွန် နာ ဒွန် ပ့လုဝ့် ဒဲင် ကာဒါယ်၊ ဂေ ဒီ ဘော ဝဲန် အန်။”

28 အန် ဟဲ့ ဟွတ့် ကာလာင် ဂြုဝ်း တီ၊ ဂေ ဒူအီ အီ ထူမ် ဂြုဝ်း အန်၊ ဂေ ဝီ ရူ ကာဆဝ်။ ဂေ ဝီ စုး ဒီ ဒတ် တာင် တဝ်း၊ “နာင် အေထေမီ ခဲင် မိူင် အဲဖဲ ဟဲ့ ဘွတ် ကာဆဝ်။” 29 ပန် တီ ဂေ ဒူအီ ခဲင် မိူင် ဘော မိူင် ဘော ဆီနန် ဆီနိူင် အူ ဇေန့်။ ဂေ ဘော ဖိုင် ဝီ ဖူင့် ဟာဝ် ကာဇု ဒူင် ဘူင် ဂေ ဘ့လွယ်။ ဂေ ဘော ဒိုဝ်း အာဂါယူ ဂါယ် အာရီထာခူ အီ ဟဲ့ တး အိူင် မာခေဒူန်၊ ဟာဝ် ဒူပ် အာပေါလူ။ ဂေ စ်ု ဂါယ် ဒူပ် ဂေ၊ ဟာဝ် ဇမ် ဒူင် ကာဇု ဂေ။ 30 အာပေါလူ တဝ်း ဒီ ဟာဝ် ဒူင် ကာဇု ဂေ ဒူအီ ကိူန်၊ တဲး အန် ဝီ ကာလာင် ဂြုဝ်း ဒီ ဂေ။ ဂေ ဒီဘဲ ဇဝ် ယေဆူ ယီ တူ တဲး အန် ဟာဝ်။ 31 န့ ဘော မိုဝ်း ဒါ တာင် အီ အိုပ် မိူင် မင် အီ။ ဂေ မုး ဂိုက် အာပေါလူ။ ဂေ ဘော တိုယ် ဒူအီ အူ ဝီ၊ တဲး အန် ကာလာင် ဒီ အာပေါလူ၊ ကွဲ့ တဲး အာပေါလူ ဟာဝ် ဒူင် ကွယ် ဂေ ဒူအီ ကိူန်။

32 ဒူင် ကွယ် ဂေ ဒူအီ ကိူန်၊ ဂေ ယီ ဒတ် တာင်၊ အူ ဝီ အူ မျုဝ်။ ဂေ ကိူန် တူ နပ်၊ မာဆေ န့ မုး၊ မှဝ် န့ ပါယ် ပီ တး ကာဇု ဂေ။ 33 ဂေ ဒူအီ အာယူဒါ ဝီ တိုယ် အာလေဆန်ဒါရူ၊ တဲး အန် ဟာဝ် ဇမ် ဒီ အာတ့် ဂေ ဒူအီ ကိူန်။ ဂေ ထာင် န့ မုး အာမူ အန်။ အာလေဆန်ဒါရူ ဝီ စုဝ့် ဒဲ အန်၊ တဲး အန် ပွိုန် ကာလာင် ဂြုဝ်း ဒီ ဒူအီ ကိူန်။ 34 ဂေ ဝီ ယိုဝ်၊ အန် ဟဲ့ မုး ဒူအီ အာယူဒါ၊ ဂေ ဝီ စုး ဒီ ဒတ် တာင် အူ ဇေန့် ကော နုဝ့် အာဒါ အာ နာရီ။ ဂေ တဝ်း၊ “နာင် အေထေမီ ခဲင် မိူင် အဲဖဲ ဟဲ့ ဘွတ် ကာဆဝ်။”

35 န့ ယီ မိုဝ်း ဒါ စာရေ ခဲင် မိူင် တွိုန်။ အန် ပဲ ပီယေန် ဂေ ဒူအီ ကိူန်။ အန် တဝ်း၊ “အိုယ် ဘေ ဒူအီ အီ ကွယ် ခဲင် မိူင် အဲဖဲ နီ။ ဒွန် အီ ဟဲ့ နပ် လွင် အေ ဒူအီ ခဲင် မိူင် အဲဖဲ၊ အေ ဘ်ု လိုမ်လာ ဟုဝ် တာင် အီ မုး ဒူင် ကွယ် နာင် အေထေမီ အီ ဘွတ်။ အေ ဘ်ု အာရိုပ် အန် အီ ဟဲ့ စုဝ်း လူင် ခဲင် ဂါင်ဟြာဝ်၊ ဇမ် ဒီ နီ။ 36 အေ ဒွန် အီ နပ် လွင် အန် တီ။ အာဝ် မိုဝ်း အီ တူ နပ်။ ခုဝ် အန် တီ ဘေ ကာအာပ် ကွယ် ဆီချာ၊ တူ ဘူင် ဆီနန် ဆီနိူင်၊ ဘေ လုဝ် ဇေန့်ဇာ ဒီ အာတ့် ပီ ဒီ ဘူင် ဘေ။ 37 ဘေ ဟဲ့ တိုယ် ဒူအီ ဂါယ် တီ တး ဒီ နီ။ ဂါယ် ယီ တူ ဘူင် နာ တူ မွှိုမ် မာဆေ။ ဂါယ် တူ ပြာ ကြုဝ် ခဲင် ဟုဝ် ဘွတ်။ ဂါယ် မိူဝ် တူ ကာလာင် ဂြုဝ်း အီ ခဲန့် နာင် အေထေမီ အေ။ 38 န့ ယီ မုး အာဒေမေတ် ဘော ဂေ ဂိုက် အန် အီ ဘူင် ဂါန် ပီ အန်၊ ဆေ ဂေ တူ အိုင် ဒူအီ ဝီ မှဝ်၊ တဲး ဂေ ဟာဝ် ကာလာင် ဒီ ဒါ တာင် အီ ဆုင်ဖျာတ် အာမူ အီ။ ဂေ ဒါ တာင် အီ ဆုင်ဖျာတ် အာမူ အီ၊ ဂေ ကွယ် ဆေဆေ ခဲင် မိူင် အေ နီ။ ဘော ဒါ တာင် အီ အိုပ် မိူင် ဟဲ့ မိုဝ်း။ 39 ဆေ န့ ဘော မိုဝ်း ပေါ အူ မျုဝ် ပီ တူ အိုင် ဘေ၊ တဲး ဘေ ဒူပ် ဒါရာ ခဲင် မိူင် အေ၊ တဲး ဂေ ဒါ တာင် တး ကာဇု၊ တဲး ဂေ ပွိုန် ဒီ ဘူင် တဲး န့ ဒါခိုယ် ဒွန် မျုဝ်။ 40 ပီ ဘူင် ဘေ ဒေါ တီ နီ၊ န့ မွှိုမ် ယုဝ်။ အေ လုဝ် ယုဝ် ဂေ ဒါ တာင် ရုဝ်မာ တဝ်း၊ အေ ဟဲ့ ထေဝ် ဒီ ဝဲန် ဂေ။ ဆေ ဂေ ထာင် ပါယ် တီ၊ အေ မိူဝ် တူ ပွိုန် တဝ်း မာဆေ၊ ကွဲ့ တဲး ဂေ ရူ ဒီ အေ။ အာဝ် မိုဝ်း ဒီခုဝ် ပီ ဆီနန် ဆီနိူင် ဘေ။” 41 ဒါ စာရေ ဟဲ့ ဟွတ့် ကာလာင် ဂြုဝ်း တီ၊ အန် ဝီ စ်ု ဒူအီ ကိူန် ဂေ တီ ဝေန့် ကာင် ဂေ။