1 ဝါယ် ဟဲ့ ဝီ ယေန် ပီ ဆီနန် ဆီနိူင် ဂေ တွိုန်၊ အာပေါလူ ဝီ ဒဲ့ ဂေ ဒီဘဲ အီ ညှိုမ် ဇဝ် ယေဆူ။ အန် မှာန့်၊ တဲး ဂေ ခ့ဝါင် အန် ဝိဝ်။ ဟဲ့ ဟွတ့်၊ အန် လေး ဒူင် ကွယ် ဂေ၊ ဝီ ဟာဝ် ဇမ် ခဲင် အိူင် မာခေဒူန်။ 2 ဒေါ ဟာဝ် အာပေါလူ ခဲင် အိူင် မာခေဒူန် တီ၊ အန် ဟဲ့ မာနုဝ် ကိူန် ဂေ ဒူအီ။ ဟဲ့ ဟွတ့်၊ အန် ဝီ ဟာဝ် ဇမ် ခဲင် ကာဒါယ် မိူင် ဂြိက်။ 3 အာဒါ အူယ် မာဂျီန် အာပေါလူ ကွယ် ခဲင် ကာဒါယ် မိူင် ဂြိက်။ ဝါယ် အန် တီ အန် တဝ်း ဒီ ဝီ ပဝ့် ရိုဝ် ဆင်ဖုဝ်၊ တဲး အန် ဟာဝ် ဇမ် ကာဒါယ် မိူင် ဆူရီ။ ဒေါ အန် တီ အန် ဝီ ယိုဝ် ဂြုဝ်း လွင် ဂေ ဒူအီ အာယူဒါ ဟဲ့ ကာဇု၊ တဝ်း ဒီ ငဝ်း ယမ် အန် ဒေါ ပဝ့် အန် ရိုဝ် ဆင်ဖုဝ် တီ။ ခုဝ်၊ အန် မိူဝ် ဝီ ဝိဝ် အိူင် မာခေဒူန်။ 4 န့ ယီ မိုဝ်း ဒူအီ ဘူ ဝီ အီ ဟာဝ် ရိုမ် ဒူပ် အာပေါလူ၊ တိုယ် အန် ဇမ် အိူင် အာဆီယာ။ ဒူအီ ဂေ တီ ဘော စိူဝ် အာဆုဝ်ဖာထာ၊ အီ မုး ဂွန် အာဖူရူ။ အန် တး ခဲင် မိူင် ဘေရေ။ န့ မုး ဘော အာရီထာခူ ဂါယ် အာဆေခုန်ဒူ၊ အီ တး မိူင် ထေဆာလူန်၊ ဘော အာဂါယူ အီ တး မိူင် ဒေဘေ၊ ဘော အာထီမုဝ်ထေ၊ အာထူခိတ် ဘော အာထုဝ်ဖီမူ၊ အီ ကွယ် ခဲင် အိူင် အာဆီယာ။ 5 ဒူအီ ဂေ တီ ဟဲ့ ပဝ့် ရိုဝ် ဆင်ဖုဝ် ယဲတ့် ဒီ အာတ့် ယေ၊ ဝီ နှဝ့် ယေ ခဲင် မိူင် ထာရုဝ်။ 6 ယေ ယီ ဟာဝ် ကွယ် ခဲင် မိူင် ဖီလီဖီ ဒေါ ဘူင် ဂေ ဘ့လွယ် ဟူမ် ခါမုန် အီ တူ ဟပ် ဆီနမ် ဘြး။ ဝါယ် အန် တီ ဖန် ဆီငဲ၊ ယေ ဝီ ပဝ့် ရိုဝ် ဆင်ဖုဝ်၊ ဇမ် မိူင် ထာရုဝ်၊ ဝီ ကာတုန့် ဂေ အီ ဟဲ့ ယဲတ့် ဒီ အာတ့် တွိုန်။ ယေ ဝီ ကွယ် မိူင် ထာရုဝ် အာဒါ ဘူ ဆီငဲ။

7 န့ ဘော ဇမ် ဆီငဲ ဒေါ ဂုဝ် ခဲင် အူ ခါနာ တိုင်၊ ဂေ ဒီဘဲ ဇဝ် ယေဆူ ဂေ တး ကာဇု ဟူမ် ခါမုန် ပီ စ်ု ဇဝ် ယေဆူ ဂေ ဟူမ်။ ဒေါ အန် တီ အာပေါလူ ဝီ စုး ဒီ ကာလာင် ဂြုဝ်း ဒီ ဒီဘဲ ဇဝ် ယေဆူ။ ကူပ် ခြာမ် အန် ဒီ လေး ဒူင် ကွယ် ဂေ ပါ ခဲညှာ၊ အန် ကာလာင် ဂြုဝ်း ကိူန်၊ တဲး ကော ဇမ် ကာတဲ ဆွိုမ်။ 8 ဂေ ဟဲ့ ပီဒဝ့် ငဝ် အွမ် နုဝ့် ခဲင် ဟူင် ကွယ် ကာဇု ဂေ။ ဟူင် တီ၊ န့ ကွယ် ခြွင့် နာ ဒဲင် ခဲင် ကာင် တာင်။ 9 န့ ယီ မိုဝ်း ကာညူမ် အူ ဝီ၊ အန် စိူဝ် အာအူထူခူ။ အန် တုတ့် ဘာင် မာလုဝ်း။ အန် ဘဲန် ဆီ အိတ် ကာဆဝ်။ အာပေါလူ ဝီ ကာလာင် ဟာဝ် ဂြုဝ်း၊ တဲး ကာညူမ် တွိုန် ကော ပွိုန် ဒီ အိတ် လိုက်၊ ဝီ ကေး ဘျွာ လေး နာ ရေတ့် မာလုဝ်း၊ စုဝ်း ဇမ် အီ ခြိုမ်။ အန် ဟဲ့ စုဝ်း နာ စာ အူယ် ခြွင့်။ ဂေ ဘော လူင် ပါ အန်၊ အန် ဟဲ့ ဟွတ့် ယမ်။ 10 အာပေါလူ ဝီ ယိတ့် လူင် နာ ခြိုမ်၊ အန် ဝီ မုတ် ယွတ် ဂြူပ် ကာညူမ် တီ၊ ငျီမ် ဆီချာ အန်။ အန် ဝီ တဝ်း ဒီ ဂေ၊ “ဘေ ကွဲ့ ယုဝ်၊ အန် ဆီ မိုဝ်း ဖွိုမ်။” 11 ဝါယ် အန် တီ အာပေါလူ ဝီ ဟုဝ့် နာ ဒဲင်၊ ဝီ ကာဘက် ခါမုန်၊ တဲး ဂေ ဟူမ် ဒူပ် ပီ စ်ု ဇဝ် ယေဆူ ဒီ ဂေ။ ဂေ ဝီ ထူမ် ဂြုဝ်း အာပေါလူ ကော လှေန့်၊ တဲး ကော ဇမ် ဘာင် ဒီ ဝး ပြဲ။ ဒေါ အန် တီ အန် ဘော လေး ဟာဝ်။ 12 ကာညူမ် တွိုန် မိူဝ် ဝီ ဝေန့် ရိုမ် ဒူပ် ဂေ ဒူအီ ဟဝ်။ အန် ဟဲ့ ဝီ အိမ်၊ ဟဲ့ ခ။ န့ ဘော ဝီ လှဝ် နဝ်း ဂေ ဒွန် အီ၊ ဝီ တဲး နဝ်း ဂေ ဒါခိုယ်။

13 ယေ အီ မုး ဖိုင် အီ ဟာဝ် ရိုမ် ဒူပ် အာပေါလူ၊ ယေ ဝီ ပဝ့် ရိုဝ် ဆင်ဖုဝ် ဟာဝ် ယဲတ့် ဒီ အာတ့်၊ ဇမ် မိူင် အာဆုဝ်။ အာပေါလူ ဟဲ့ စ်ု ယေ ဟာဝ် ပါယ် တီ၊ အန် ယီ ဝီ ဟာဝ် ဒီ ပ့လဝ် ဒူပ် န့တေန့် အီ ဇမ် မိူင် အာဆုဝ်။ အန် ဟဲ့ ဟွတ့် ဇမ် မိူင် အာဆုဝ်၊ အန် တဝ်း ဒီ ဝီ ပဝ့် ရိုဝ် ဆင်ဖုဝ် ရိုမ် ဒူပ် ယေ။ 14 ပန် တီ အန် ဟဲ့ ဟွတ့် ဇမ် မိူင် အာဆုဝ် တွိုန်၊ အန် ဘော လိုပ် ခဲင် ရိုဝ် ဆင်ဖုဝ် ယေ၊ တဲး ယေ ဘောကာဂ့လျီတ် ဝီ ပဝ့် ဇမ် မိူင် မီထူလေန်။ 15 ဟဲ့ ဟွတ့် ဇမ် မိူင် မီထူလေန်၊ ပါ ခဲညှာ ယေ ဝီ ပဝ့် ဟာဝ်၊ တဲး န့ ကော ဇမ် ကာတတ် မိူင် ခီအုဝ်။ ဝါယ် အန် တီ ပေါ အူ ဆီငဲ၊ ယေ ဝီ ပဝ့် ဇမ် မိူင် ဆာမုဝ်။ ဆီငဲ ဟာအူယ်၊ ယေ ဟဲ့ ဝီ ဇမ် မိူင် မီလေတ်။ 16 အာပေါလူ ဟဲ့ ဒွိုမ် တဝ်း၊ အန် ဆီ ခြပ် ဘ့လွယ် ဖေန်ထေခူတ် ခဲင် မိူင် ယေရူဆာလဲမ်။ ခုဝ်၊ အန် ဆီ ဟာဝ် ဟဲ ဟဲ၊ တဲး အန် ဇမ်။ အန် တူ ဆီ ဂိူတ် ခဲင် အိူင် အာဆီယာ၊ တူ ဆီ တဲး န့ လှေန့်။ ခုဝ် အန် တီ အန် တဝ်း ဒီ ကာလုဝ်း မိူင် အဲဖဲ တွိုန်။

17 ဒေါ ဝီ ဇမ် အန် ခဲင် မိူင် မီလေတ် တွိုန်၊ အန် ဝီ စ်ု ဒူအီ မင် အီ၊ တဲး ဂေ ဟာဝ် ဒဲ့ ဂေ ဒါ တာင် ခဲင် ဖိုင် ဇဝ် ယေဆူ ခဲင် မိူင် အဲဖဲ၊ ဝီ တး ဒူင် ကွယ် အန်။ 18 ဂေ ဟဲ့ ဟွတ့် တး ဇမ်၊ အန် ဝီ ကာလာင် ဂြုဝ်း ဒီ ဂေ။ အန် တဝ်း၊ “ဘေ ဒွန် အီ ဟဲ့ နပ် လွင် အုဝ် အူ ဆိန့် ဒေါ တး ဇမ် အုဝ် ခဲင် မိူင် ဘေ။ 19 အုဝ် ဟဲ့ ဘူင် ဂါန် ဇဝ်ဖြာ၊ ကွယ် ကာတဲ ဘေ၊ တူ ပီစာ နဝ်း အုဝ် ဒဲင် ဘေ ဒွန် အီ။ အုဝ် ဟဲ့ ဒွိုမ် ယာမ် ကူပ် ညှာပ် ဂါန် အုဝ်။ အုဝ် မိူဝ် ဟဲ့ ခမ် ဒုက် ဒီ ဒူအီ အာယူဒါ ဒေါ ခြာမ် ဂေ ဒီ ငဝ်း ဝဲန် အုဝ်။ လွင် အန် တီ၊ ဘေ နပ် တူတ့် ဒွန် အီ။ 20 ဘေ မိူဝ် ဟဲ့ နပ်၊ အီ ဘွတ် အီ မွှိုမ် အီ စွယ် ဘေ၊ အုဝ် ဟဲ့ ဟွတ့် မာနုဝ် တူတ့် ဘေ ဒွန် မျုဝ်။ အာဝ် ဟူ မိုဝ်း မာဆေ ပီ ဒီ လုဝ် မာနုဝ် အုဝ် ဒီ ဘေ။ ဘော မုး ဒူအီ ကိူန်၊ ဘော မုး ဒူအီ ပြေတ့် အီ ထူမ်၊ ဆေဆေ အုဝ် ဟဲ့ မာနုဝ် ဆီချာ ဘေ ခဲင် ကာင် ဒွန် ကာင်။ 21 အုဝ် ဟဲ့ ကာလာင်၊ ဘော ဒီ ဂေ ဒူအီ အာယူဒါ၊ ဘော ဒီ ဂေ ဒူအီ ဂြိက်၊ တဲး ဂေ ဝဲန် မှာပ် ဂေ၊ ဝီ ဒူပ် န့တေန့် ဇဝ်ဖြာ၊ တဲး ဘော ဂေ ဝီ ညှိုမ် ဇဝ် ယေဆူ အီ မုး အန် ဇဝ် အီ အိုပ် အေ။

22 ဒေါ တီ နီ၊ နဝ်း ဖွိုမ် ဇဝ်ဖြာ ဟဲ့ စ်ု အုဝ် ဟာဝ် မိူင် ယေရူဆာလဲမ်။ ယုဝ် အုဝ် ဒီ ကာဒုး ဒုက် မာဆေ၊ အုဝ် တူ နပ်။ 23 အုဝ် ယီ နပ် အူ မျုဝ်။ အုဝ် ဘော ဟာဝ် မိူင် မှဝ်၊ ခဲင် မိူင် ဒွန် မိူင် နဝ်း ဖွိုမ် ဇဝ်ဖြာ ဟဲ့ ဘျ ဒီ အုဝ် လွင် ဒီ ကာဒုး အုဝ် ဒုက်၊ ဘော လွင် ဒီ ခြွင့် အီ ဒီ အုဝ် ခဲင် ကာပိုမ် ပန် ဒီ ဇမ် အုဝ် ခဲင် မိူင် ယေရူဆာလဲမ်။ 24 အုဝ် ယီ တူ ကာဝေ အာဆာက် အုဝ်။ ဆေ အုဝ် ပဲ ဒီ ဘူင် ဟွတ့် တူတ့် ဂါန် အုဝ်၊ ဂါန် ပီ ဒွါ ဇဝ် ယေဆူ အုဝ် ဘူင်၊ အုဝ် ဟဲ့ ဒါခိုယ်။ ဂါန် တီ၊ န့ မုး ဂါန် ဒီ လုဝ် ဟာဝ် ကာလာင် ဒီ အီ လွင် ဇဝ်ဖြာ ကာဝေ ဂေ။

25 ဒေါ တီ နီ၊ အုဝ် ဟဲ့ နပ် ဆီချာ။ န့ မုး ဘေ ဒွန် အီ အီ ဟဲ့ ထူမ် ဂြုဝ်း ပီ ကာလာင် အုဝ် လွင် ဇဝ်ဖြာ ဒီ အိုပ် ကာဒါယ်၊ ဘေ အာဝ် ဟူ ပွိုန် ဒီ ဝီ ယိုဝ် အုဝ် ပေါ အူ ဇေန့်။ 26 ခုဝ် အန် တီ အာတိုဝ် အုဝ် ကာလာင် ဒီ ဘေ။ ဆေ န့ မိုဝ်း ဒူအီ အီ စုဝ်း ကာလုဝ့် ငါရာယ်၊ အာဝ် မုး ကူပ် အုဝ်။ 27 အုဝ် တူ ဒွိုမ် ကြာန် ဒီ ကာလာင် ဒီ ဘေ အီ ဒီ တဲး ဘေ နပ် တူတ့် ဒွန် မျုဝ် ပီ လုဝ် ဇဝ်ဖြာ။ 28 ဒေါ တီ နီ၊ ဘေ ဒါ တာင် ခဲင် ဖိုင် ဇဝ် ယေဆူ၊ ဘေ လုဝ် ဆာဒိက် အာဆာက် ဘေ။ ဘေ ဘော လုဝ် ဘ်ု ဂေ ဒူအီ အီ ညှိုမ် ဇဝ် ယေဆူ ဘော ဖိုင်၊ တဲး န့ ပီ ဒူအီ အီ ဟျီင် မာဘူ အီ ဘ်ု ဖိုင် မာဘူ အန်။ နဝ်း ဖွိုမ် ဇဝ်ဖြာ ဟဲ့ တဲး ဘေ ဘူင် ဂါန် ဇိုဝ် တီ။ ခုဝ်၊ တဲး ဘေ ဘ်ု ဖိုင် ဇဝ် ယေဆူ။ ဇဝ် ယေဆူ ဟဲ့ တဲး ဂေ ဘဲန် ဒူအီ အာမျုဝ် အန်၊ ကူပ် ယမ် အန် ကာဒါင် ဂေ။ 29 အုဝ် ဟဲ့ နပ်၊ ဝါယ် လေး ဟာဝ် အုဝ် ဒူင် ကွယ် ဘေ၊ န့ ဒီ မိုဝ်း ဒူအီ အီ ပီ မာဆုဝ် ပြဲ။ ဂေ ဒီ တး လိုပ် ခဲင် ဖိုင် ဘေ။ ဂေ တူ မိုဝ်း နဝ်း ကာဝေ ဘေ ဘော ဖိုင်။ 30 ဘော ကာတဲ ဘေ န့ ဒီ မိုဝ်း ဒူအီ မင် အီ၊ ဂေ ဒီ ဝီ ကာလာင် ဂြုဝ်း တူ မှာန် ဘော ကာဆုး ဂေ ဒီဘဲ ဇဝ် ယေဆူ၊ တဲး ဂေ ဝဲန် ဇဝ် ယေဆူ၊ ဝီ ဘဲန် ဒီဘဲ ဂေ။ 31 ခုဝ် အန် တီ တဲး ဘေ ဆာဒိက်၊ တဲး ဘေ ဘ်ု ဆီချာ။ တဲး ဘေ ဘော လှုဝ်း အုဝ်။ အာဒါ အူယ် ဆီနမ်၊ ဒွန် မှိုဝ် ဒွန် ညှာ အုဝ် ဟဲ့ မာနုဝ် ဘေ ဒွန် အီ။ အုဝ် မိူဝ် တူ ဒီလှဝ်။ တဲး ဘေ ဘော လှုဝ်း ခဲ့ တာင် ဒုက် ပဲ့ ဟဲ့ ကာဒုး အုဝ်။

32 ဒေါ တီ နီ၊ အုဝ် ဝီ အာပ် ဘေ ဒီ ဇဝ်ဖြာ၊ တဲး အန် ကာဝေ ဘေ၊ ဝီ ကာလာင် ဂြုဝ်း အန် ဒီ ဘေ၊ တဲး နဝ်း ဘေ ဝီ မိုဝ်း ပ့လူမ်၊ တဲး ဘော ဘေ ပွိုန် ခါဂုန် ပီ ဒွါ ဇဝ်ဖြာ ဒီ ဂေ ဒူအီ အီ ဆီငါ ဘွတ် ဒွန် အီ။ 33 အုဝ် တူ ဒွိုမ် မိုဝ်း နဝ်း ဆီ ပွိုန် ခြိဝ် ဂေ ရွိုန် ဘေ။ အုဝ် တူ မှာန့် ပီ ဒီ တာ ဒီ ဘေ။ 34 ဘေ ဟဲ့ နပ်၊ ဒဲ အုဝ် နီ ဟဲ့ ဘူင် ဂါန်၊ တဲး ဘော အုဝ် ဘော ဂေ ဒူအီ အီ ဒူပ် အုဝ် မိုဝ်း ဒီ ဟူမ် ဒီ တာ။ 35 အုဝ် ဟဲ့ ဘူင် ဇိုဝ် တီ ဒွန် မျုဝ်၊ တဲး ဘေ နပ် ဘော ဘေ လုဝ် ဘူင် နင်ဂန် ဂါန် ဘေ၊ တဲး ဘေ ဘူင် ညိုင် အုဝ်။ တဲး ဘေ ဘော နပ်၊ အေ လုဝ် စွယ် ဂေ ဒူအီ အီ တူ ပ့လူမ် ခ။ အုဝ် ဆီ တဲး ဘေ လှုဝ်း ဂြုဝ်း ဇဝ် ယေဆူ။ အန် ဟဲ့ ဒွိုမ် တဝ်း၊ ‘အာဆေ ဒွါ ဒီ အီ၊ အန် ဟဲ့ ဒါခိုယ် လွှိုမ် ဒူအီ အီ ဒိုဝ်း။’” ပါယ် တီ အာပေါလူ ကာလာင် ဂြုဝ်း ဒီ ဂေ ဒါ တာင် ခဲင် ဖိုင် ဇဝ် ယေဆူ အီ တး မိူင် အဲဖဲ။

36 အာပေါလူ ဟဲ့ ဟွတ့် ကာလာင် ဂြုဝ်း တီ၊ ဂေ ဝီ ခြိုပ်ခြဝ် ဒွန် အီ။ အာပေါလူ ဘော ဆာခိုဝ် ဒါင် ဂေ။ 37 ဝါယ် အန် တီ ဂေ ဒွန် အီ စုး ဒီ ယာမ် တာင်၊ ဝီ ငျီမ် အာပေါလူ ဘော အုး အန်။ 38 ကူပ် ကာလာင် အန် ဒီ ဂေ၊ လွင် ဟူ ပွိုန် ဂေ ဒီ ဝီ ယိုဝ် အန်၊ န့ တဲး နဝ်း ဂေ ကော က့လိုဝ် ကာဆဝ်။ ဟဲ့ ဟွတ့် ပန် တီ ဂေ ဝီ ဟာဝ် ရိုမ် ဒူပ် အန်၊ ဟာဝ် တိုယ် အန် ဇမ် ဒီ ရိုဝ် ဆင်ဖုဝ်။