1 ယေ ဟဲ့ ဟွတ့် လာယ် ကာယဝ်း ဒီ ဂေ ဒါ တာင် တွိုန်၊ ယေ ဝီ ပဝ့် ရိုဝ် ဆင်ဖုဝ် ဟာဝ် ဆိူဝ် ဇမ် မိူင် ခုဝ်ဆ။ ပါ ခဲညှာ ယေ ဝီ ဟာဝ် ဇမ် မိူင် ရုဝ်ဒူ၊ ဟဲ့ ဟွတ့်၊ ယေ ဝီ ဟာဝ် ဇမ် ဘော မိူင် ဖာထာရာ။ 2 ခဲင် မိူင် ဖာထာရာ တီ၊ ယေ ယိုဝ် ရိုဝ် ဆင်ဖုဝ် အူ လှာင်၊ အီ ဟာဝ် ဆိူဝ် ဇမ် မိူင် ဖီနိက်။ ယေ ဝီ လိုပ် ပဝ့် ရိုဝ် ဆင်ဖုဝ် တီ။ 3 ပန် တီ ရိုဝ် ဆင်ဖုဝ် ဝီ ကာလုဝ်း ဟာဝ် ဂုန် အိုမ် အီ စိူဝ် ခူဖြုဝ် အီ ကွယ် ဘ့လာက် အာဂ ယေ။ ဟဲ့ ဟွတ့်၊ ယေ ဝီ ဇမ် မိူင် ထူရုဝ်၊ အီ ကွယ် ခဲင် ကာဒါယ် မိူင် ဆူရီ။ ဒီ မိူင် ထူရုဝ် တီ၊ ဂေ ချ ဘော ဒိုဝ်း လေး ကြုဝ်ကြာမ် ပီ ဒါင် ရိုဝ် ဆင်ဖုဝ်။ 4 ဝါယ် အန် တီ ယေ ဝီ ဟာဝ် ဒူင် ကွယ် ဂေ ဒီဘဲ ဇဝ် ယေဆူ ခဲင် မိူင် တီ။ ယေ ဘော ကွယ် ခဲင် မိူင် တီ အာဒါ ဘူ ဆီငဲ။ ဂေ ဒူအီ အီ ညှိုမ် ဇဝ် ယေဆူ ခဲင် မိူင် တီ၊ ဂေ ဝီ ကာလာင် ဒီ အာပေါလူ ခဲ့ ပီ ဘျ နဝ်း ဖွိုမ် ဇဝ်ဖြာ ဒီ ဂေ။ ဂေ တဝ်း၊ “ကွဲ့ ဟာဝ် လိုပ် မိူင် ယေရူဆာလဲမ်။” 5 ဝါယ် ဟဲ့ နုဝ့် ဘူ ဆီငဲ၊ ယေ ဝီ လေး ခဲင် မိူင် ထူရုဝ်။ ဒေါ လေး ဟာဝ် ယေ ခဲင် မိူင် တီ၊ ဂေ ဒီဘဲ ဇဝ် ယေဆူ ဘောကာဂ့လျီတ်၊ ဘော ဂေ အီဘိုန့် ဘော ဂွန်၊ ဂေ ဝီ ဟာဝ် ရိုမ် ဒူပ် ယေ၊ တိုယ် န့တေန့် ယေ။ ယေ ဟဲ့ ဟွတ့် တး ဇမ် ခူပ် အိုမ်၊ ယေ ဘောကာဂ့လျီတ် ဝီ ခြိုပ်ခြဝ်၊ ဆာခိုဝ် ဇဝ်ဖြာ။ 6 ဟဲ့ ဟွတ့်၊ ယေ ဘော ဝီ ခ့ဝါင် ဂေ ဝေန့်။ အီ မုး ယေ၊ ယေ ဘော ဝီ ဟာဝ် လိုပ် ခဲင် ရိုဝ် ဆင်ဖုဝ်။

7 ယေ ဟဲ့ ဟွတ့် လေး ခဲင် မိူင် ထူရုဝ်၊ ဝီ တး ဇမ် မိူင် ဖာထုဝ်လဲမ်။ ခဲင် မိူင် ဖာထုဝ်လဲမ် တီ မိူဝ်၊ ယေ ဝီ ဟာဝ် ဝိန် ဒီ ဂေ ဘီနွင်၊ ဝီ ကွယ် ရိုမ် ဒူပ် ဂေ အာဒါ အူ ဆီငဲ။ 8 ပါ ခဲညှာ ယေ ဝီ လေး၊ ဝီ ဟာဝ် ဇမ် မိူင် ကေဆာရေ။ ယေ ဝီ ဟာဝ် ကွယ် ခဲင် ကာင် ဒူအီ အူ ဝီ အီ စိူဝ် အာဖီလိပ်။ အန် မုး ဒူအီ အီ ဟုဝ် ဒါရာ လွင် ဇဝ်ဖြာ ချွတ် ဒူအီ။ ခဲင် ဒူအီ ဘူ ဝီ ပီ ဒွိုမ် ရဝ်း ဂေ ခဲင် မိူင် ယေရူဆာလဲမ်၊ န့ ဘာ့ ဘော အန်။ 9 အာဖီလိပ် တီ၊ အန် မိုဝ်း ဂွန် အီဘိုန့် ဖွုန် ဝီ။ ဂေ မုး ဒီဘျာ ဘော နပ် ဒီ ဘျာန် ဂြုဝ်း ဇဝ်ဖြာ။

10 ဒေါ ကွယ် ယေ ခဲင် ကာင် အာဖီလိပ်၊ ဝါယ် ဖွုန် ဖန် ဆီငဲ၊ န့ ဝီ မိုဝ်း ဒူအီ အူ ဝီ အီ ဘျာန် ဂြုဝ်း ဇဝ်ဖြာ။ အန် စိူဝ် အာဂါဘူ။ အန် ဟဲ့ တး အိူင် ယူဒါ ဟာဝ် ဇမ် ဒူင် ကွယ် ယေ တီ။ 11 အန် ဟဲ့ ဟွတ့် တး ဇမ်၊ အန် ဝီ ဒိုဝ်း ဆဲ့ အာပေါလူ၊ ဝီ ပက် ဒဲ ဂေ ပ့လဝ် အန်။ ဟဲ့ ဟွတ့် အန် တဝ်း၊ “န့ မုး နဝ်း ဖွိုမ် ဇဝ်ဖြာ အီ တဝ်း၊ ‘ဒူအီ အီ မုး ဒါ ကာညာ ဆဲ့ နီ၊ အန် ဒီ ခမ် ဂေ ဒူအီ အာယူဒါ မှေတ့် ပက် အန် ပါယ် နီ ဒေါ ဇမ် အန် ခဲင် မိူင် ယေရူဆာလဲမ်။ ဂေ ဒီ ဘော အာပ် အန် ဒီ ဒူအီ အီ တူ နပ် ဇဝ်ဖြာ။’”

12 ဝါယ် ဟဲ့ ယိုဝ် ယေ ဂြုဝ်း တီ၊ ယေ ဘောကာဂ့လျီတ်၊ ဘော ယေ အီ ဟာဝ် ရိုမ် ဒူပ် အာပေါလူ၊ ဘော ဂေ ဒူအီ အီ ကွယ် မိူင် ကေဆာရေ တီ၊ ယေ ဝီ ကာဆုး အာပေါလူ၊ ကွဲ့ တဲး အန် ဟုဝ့် ဇမ် မိူင် ယေရူဆာလဲမ်။ 13 အာပေါလူ ယီ တဝ်း၊ “မှဝ် န့ ပါယ် ပီ ယာမ် ဘေ။း ဘေ ဘူင် တဲး နဝ်း အုဝ် က့လိုဝ် ကာဆဝ်။ အုဝ် ဟဲ့ ဟွတ့် အုန် နဝ်း ဒီ ဟုဝ့် မိူင် ယေရူဆာလဲမ်။ ဒဲင် တီ၊ ဆေ အုဝ် ဘော လုဝ် ယမ် ခဲင် မိူင် ယေရူဆာလဲမ် ကူပ် ညှိုမ် အုဝ် ဇဝ် ယေဆူ၊ အုဝ် တူ ယုဝ်။” 14 န့ ယီ ဟဲ့ လိုဝ်း ဆီချာ၊ အာပေါလူ တူ ထူမ် ဂြုဝ်း ယေ။ ခုဝ်၊ ယေ မိူဝ် ဟူ တဝ်း မာဆေ။ ယေ ဝီ တဝ်း၊ “တဲး န့ ဘဲန် ပီ လုဝ် ဇဝ်ဖြာ။”

15 ဝါယ် အန် တီ ယေ ဝီ ရဲန် တူတ့် ဒွန် မျုဝ်၊ တဲး ယေ ဟာဝ် ဒူပ် န့တေန့် ဇမ် မိူင် ယေရူဆာလဲမ်။ 16 ဂေ ဒီဘဲ ဇဝ် ယေဆူ အီ ကွယ် ခဲင် မိူင် ကေဆာရေ မင် အီ၊ ဘော ဂေ ဟာဝ် ရိုမ် ဒူပ် ယေ။ ဂေ တိုယ် ယေ ဟာဝ် ဇမ် ကာင် ဒါ အူ ဝီ အီ စိူဝ် အာမာဆူန်။ အာမာဆူန် မုး ဒူအီ အီ တး ခဲင် ဂုန် အိုမ် အီ စိူဝ် ခူဖြုဝ်။ အန် ဘော မုး ဒူအီ အီ ညှိုမ် ဇဝ် ယေဆူ အူ ဆိန့် ဒေါ ဂုဝ် အန်။ ဂေ ဝီ ဘာင် ယေ တမ် ခဲင် ကာင် အန် တီ။

17 ဝါယ် အန် တီ ယေ ဝီ ဇမ် မိူင် ယေရူဆာလဲမ်။ ဂေ ဘီနွင် ဟဲ့ ရွုး ယေ၊ တဲး နဝ်း ယေ ဒါခိုယ်။ 18 ပါ ခဲညှာ၊ ဘော အာပေါလူ ဘော ယေ အီ ဒူပ် အန် ဒွန် အီ၊ ယေ ဝီ ဟာဝ် ဒူင် ကွယ် အာယာကူပ် တွိုန်။ ဘော အန် ဘော ဂေ ဒါ တာင် ခဲင် ဖိုင် ဇဝ် ယေဆူ၊ ဂေ ဒွန် အီ ဟဲ့ ကွယ် ခဲင် ကာင် အန်။ 19 အာပေါလူ ဟဲ့ ဟွတ့် ဇမ် ဒူင် ကွယ် ဂေ တီ၊ အန် ဝီ ဒီမွှတ် ဂေ တဝ်း၊ “ဘေ ဟဲ့ ခ ဂျာမ်ဆာ ဒွန် အီ။း” ဟဲ့ ဟွတ့်၊ အန် ဝီ စုး ဒီ ကာလာင် တူတ့် ဒွန် မျုဝ် လွင် ပဲ့ ဟဲ့ ဘူင် ဇဝ်ဖြာ ဒီ ဂေ ဒူအီ အီ တူ မုး အာမျုဝ် ယူဒါ။ လွင် ပဲ့ ဟဲ့ ဘူင် ဇဝ်ဖြာ တီ၊ န့ မုး ဒေါ ကွယ် ရိုမ် အာပေါလူ ဒူပ် ဂေ၊ ဘူင် ဂါန် ဇဝ်ဖြာ။

20 ဂေ ဟဲ့ ဟွတ့် ထူမ် ဂြုဝ်း ပီ ကာလာင် အာပေါလူ တီ၊ ဂေ ဝီ စုး ဒီ အိူပ် ဇဝ်ဖြာ။ ဝါယ် အန် တီ ဂေ စုး ဒီ ကာလာင် ဂြုဝ်း ဒီ အာပေါလူ။ ဂေ တဝ်း၊ “မဲ အီကတ် ယေ၊ မဲ ဟဲ့ နပ် လွင် ဂေ ဒူအီ အာယူဒါ အီ ညှိုမ် လိုပ် ဇဝ် ယေဆူ။ ဂေ ဟဲ့ ကိူန် ဘဲန် ဟြဲန့် ဘဲန် ဟြဲန့်။ ဂေ ဒွန် အီ ယီ အွန် ဒီ ဒူပ် ဒါရာ ယူဒါ။ 21 ဒူအီ ဂေ တီ၊ ဂေ ဟဲ့ ကာလာင် လွင် မဲ တဝ်း၊ မဲ ဟဲ့ မာနုဝ် ဘော ဒူအီ အာယူဒါ အီ ကွယ် ကာတဲ ဂေ ဒူအီ အာမျုဝ် ဟဝ်၊ ကွဲ့ တဲး ဂေ ဒူပ် ဒါရာ အာမုဝ်ဆဲ တွိုန်။ ဂေ မိူဝ် တဝ်း၊ မဲ မာနုဝ် ဂေ၊ ကွဲ့ တဲး ဂေ ဆွာ့ ဝဲန် ဟုန် လခါနာ ဂွန် အီမာယ်၊ ကွဲ့ တဲး ဂေ ဒူပ် ဟိတ် အေ။ 22 ဒေါ တီ နီ၊ ယေ တူ နပ် ပီ ဒီ ပါယ် ယေ ဒီ ဘူင်။ ဂေ ဒိူန် ဒီ နပ် ဆီချာ လွင် ဟဲ့ တး ဇမ် မဲ ခဲင် မိူင် ယေရူဆာလဲမ်။ 23 ခုဝ်၊ ယေ တဝ်း ဒီ မဲ၊ တဲး မဲ ထူမ် ဒူပ် ပီ ကာလာင် ယေ ဒီ မဲ။ န့ မိုဝ်း ဒူအီ ဖွုန် ဝီ၊ အီ ဟဲ့ ဒွါ ကာဒိက် ဆတ်ဇာ ဒီ ဇဝ်ဖြာ။ 24 တဲး မဲ ဒဲ့ ဒူအီ ဂေ တီ၊ တဲး မဲ ဟာဝ် ရိုမ် ဒူပ် ဂေ၊ တဲး ဘေ ဘူင် ခဲ့ ပီ လုဝ် ဘူင် အီ ဒီ တဲး ဘေ ဆီငါ ဘွတ်၊ တဲး န့ ပီ ပီ ဒမ် အုန် ဒါရာ ယူဒါ။ ဟဲ့ ဟွတ့်၊ တဲး မဲ ဘော ဒွါ ရွိုန် ပီ လုဝ် ဂေ၊ တဲး ဂေ ကပ် ဂိန့် ဂေ။ ဆေ မဲ ဘူင် ပါယ် တီ တဲး ဒွန် အီ ယိုဝ်၊ ဂေ ဒီ ဘော နပ်၊ ဂြုဝ်း ပီ ကာလာင် အီ ဟဝ် လွင် မဲ အာဝ် မှာန်၊ အာဝ် မုး။ ပန် တီ ဂေ ဒီ ဘော နပ်၊ ဘော မဲ မုး ဒူအီ အီ ဒူပ် ဒါရာ ယူဒါ။ 25 န့ ယီ မုး ဒူအီ အာမျုဝ် ဟဝ်၊ အီ ညှိုမ် ဇဝ် ယေဆူ၊ ယေ ဟဲ့ ဟွတ့် ဒဲမ် ပဲ့ ဒီ ဂေ လွင် ပီ ဆုင်ဖျာတ် ယေ။ ကွဲ့ တဲး ဂေ ဟူမ် ပီ ဒွိုမ် လှူ အီ ဟဝ် ဒီ အာရိုပ် ရာင်။ ကွဲ့ တဲး ဂေ ဟူမ် နှာမ် ဂေ ယင် ဒုဝ် ဆတ်ဒါဝါ အီ တူ လေး ဆီချာ နှာမ် အန်။ ကွဲ့ တဲး ဂေ လာယ် အီဘိုန့် အီ ဟဝ်။”

26 ဝါယ် အန် တီ ပါ ခဲညှာ၊ အာပေါလူ ဝီ ဒဲ့ ဂေ ဒူအီ ဖွုန် ဝီ၊ တဲး ဂေ ဝီ လိုပ် ခဲင် ဟုဝ် ဇဝ်ဖြာ၊ ဝီ ဘူင် ပီ ဒမ် ဒါရာ ယူဒါ။ ဂေ မိူဝ် ဟာဝ် ကာလာင် ဒီ ဒူအီ အီ လှူ ဒီ ဇဝ်ဖြာ လွင် ဆီငဲ အန်၊ နှာင် ဆီငဲ ဆီ ကွယ်၊ န့ ကော ဒီ ဇမ် ဆီငဲ ဒီ လုဝ် လှူ ဒုဝ် ဆတ်ဒါဝါ ဒီ ဇဝ်ဖြာ အာဒါ ဖွုန် ဝီ တီ။

27 ပီ ခမ် ဂေ ကာဒိက် ဆတ်ဇာ အာဒါ ဘူ ဆီငဲ၊ ဟဲ့ ရိန် ဒီ တူတ့်။ ဒေါ အန် တီ န့ မိုဝ်း ဒူအီ အာယူဒါ မင် အီ။ ဂေ တး အိူင် အာဆီယာ။ ဂေ ဝီ ယိုဝ် အာပေါလူ ခဲင် ဟုဝ် ဇဝ်ဖြာ၊ ဂေ ဝီ ကာဆုး ဒူအီ ကိူန်၊ တဲး ဂေ မှေတ့် အန်။ 28 ဂေ ဝီ ဆီနန် ဆီနိူင်၊ ဒတ် တာင် တဝ်း၊ “အိုယ် ဘေ ဒူအီ အီဆာရေလ၊ တဲး ဘေ စွယ် ယေ။ ဒူအီ နီ မုး ဒူအီ အီ မာနုဝ် ဒွန် နာ ဒွန် ပ့လုဝ့်၊ ကွဲ့ တဲး ဒူအီ ရုဝ်ဆေ ဒါရာ အေ ဘော ဒူင် ဘွတ်၊ ဒူင် ကွယ် အေ နီ။ ဒဲင် တီ၊ အန် ဟဲ့ ဒဲ့ ဘော ဒူအီ ဂြိက် ဒူပ် အန်၊ လိုပ် ခဲင် ဒူင် ဘွတ် နီ။ အန် ဟဲ့ ဘူင် တဲး ဟုဝ် နီ ကာဒါတ့်။” 29 (ဒူအီ ဂေ တီ၊ ဂေ ဟဲ့ ဒွိုမ် ယိုဝ် အာပေါလူ ခဲင် မိူင်၊ ဒေါ ကွယ် ရိုမ် ဒူအီ ဂြိက် အူ ဝီ ဒူပ် အန်။ ဒူအီ ဝီ တီ စိူဝ် အာထုဝ်ဖီမူ။ အန် တး မိူင် အဲဖဲ။ ဒေါ တီ နီ၊ ဂေ ထာင်၊ အာထုဝ်ဖီမူ ဟဲ့ ဝီ ဒူပ် အာပေါလူ ဒေါ ဟာဝ် လိုပ် အန် ခဲင် ဟုဝ် ဇဝ်ဖြာ။ ခုဝ်၊ ဂေ ဒတ် ဆီနန် ဆီနိူင် ပါယ် တီ။)

30 ပန် တီ ဂေ ဒူအီ ခဲင် မိူင် ဘော မိူင်၊ ဂေ ဝီ ဆီနန် ဆီနိူင်။ ဂေ ကာဘ့လဲပ် တး ဒွန် နာ ဒွန် ဘ့လာက်၊ တး ကာဇု အူ ပ့လုဝ့်။ ဂေ ဟဲ့ ဟွတ့် မှေတ့် အာပေါလူ၊ ဂေ ဝီ ဒိူတ် အန် လေး ခဲင် ဟုဝ် ဇဝ်ဖြာ။ ဟဲ့ ဟွတ့်၊ ဂေ ဝီ ကာဘိတ် မာလုဝ်း ခဲင် ဟုဝ် ဇဝ်ဖြာ အူ ဇေန့်။ 31 ဂေ တဝ်း ဒီ ငဝ်း ယမ် အန်။ ဒေါ အန် တီ ဘုဝ် တာင် ရုဝ်မာ အီ အိုပ် ဒါ ဆိုက် အူ ဟြဲန့်၊ အန် ဘော နပ် လွင် မိူင် ယေရူဆာလဲမ် ဘော မိူင် ဟဲ့ ဆီနန် ဆီနိူင်။ 32 အန် ဝီ ဒဲ့ ဒါ ဘုဝ် အီ အိုပ် ဒါ ဆိုက် အူ မာယဝ်း ဘော ဒါ ဆိုက် မင် အီ၊ တဲး ဂေ ဟာဝ် ဒူင် ကွယ် ဂေ ဒူအီ ကိူန် အူ ဇေန့်။ ဂေ ဒူအီ ကိူန် ဘော ယိုဝ် ဒါ ဘုဝ် ရုဝ်မာ ဟဲ့ တး၊ ဂေ ဘော စူ မး အာပေါလူ။

33 ဒေါ တး ဇမ် ဘုဝ် တာင် တီ၊ အန် ဟာဝ် ဆိူဝ် ဒူင် ကွယ် အာပေါလူ။ အန် ဝီ စ်ု အီ ဟဝ် ပက် အာပေါလူ တာ ဝန် ဟိန် အာ ညွင့်။ ဟဲ့ ဟွတ့်၊ အန် ဝီ ဒီမွှတ်၊ အာဆေ အန် မုး၊ မာဆေ ပီ ဘူင် အန်။ 34 ဂေ ဒူအီ ကိူန်၊ ဂေ ဝီ ဒတ် ဆီနန် ဆီနိူင် အူ ဝီ အူ မျုဝ်။ ခုဝ်၊ ဘုဝ် တာင် တူ ဝီ နပ် အီ မုး အီ မှာန်။ ဟဲ့ ဟွတ့်၊ အန် ဝီ စ်ု ဂေ ဒါ ဆိုက် ဝီ ဒိုဝ်း ဟာဝ် အာပေါလူ ဒူင် ကွယ် ဂေ။ 35 ဂေ ဟဲ့ ဟာဝ် ဇမ် ဒီ န့တဲင်၊ တဝ်း ဒီ ဟုဝ့် လိုပ် ခဲင် ဟုဝ် ဒူင် ကွယ် ဘုဝ် တာင်၊ ဂေ ဒူအီ ကိူန် ဝီ ဆီနန် ဆီနိူင် လွှိုမ် ခါ အာတ့်။ ခုဝ်၊ ဂေ ဒါ ဆိုက် ကော ကာဒုး ဒီ စုဝ့် ဟုဝ့် အာပေါလူ။ 36 ဂေ ဒူအီ ကိူန် ယီ ဟာဝ် ဒူပ် ဂေ ဒါ ဆိုက်။ ဂေ ဝီ ဒတ် ဆေဆေ တဝ်း၊ “ငဝ်း ဝဲန် အန်။”

37 ဒေါ တး တိုယ် ဂေ ဒါ ဆိုက် ဒီ အာပေါလူ၊ တဲး အန် လိုပ် ဒူင် ကွယ် ဂေ တီ၊ အာပေါလူ ဝီ တဝ်း ဒီ ဒါ ဘုဝ် တွိုန်၊ “အုဝ် မှာန့် ဒီ ကာလာင် ဂြုဝ်း ဒီ မဲ။”

ဘုဝ် တာင် တီ ဝီ ဒီမွှတ် တဝ်း၊ “မဲ နပ် ဒီ ကာလာင် ဂြုဝ်း ဂြိက်။း 38 ဆေ န့ ပါယ် တီ၊ မဲ တူ မုး ဒူအီ အာမျုဝ် အဲဂိုပ် အီ ဟဲ့ ဒွိုမ် ဘူင် ဆီနန် ဆီနိူင်၊ ဘော ယဲတ့် ဒူအီ ဖွုန် မာယဝ်း ဝီ၊ တဲး ဂေ ဒူပ် အန် ဟာဝ် ခဲင် ပြဲ ကာဟဝ်း။း”

39 အာပေါလူ ဝီ တဝ်း၊ “အုဝ် မုး ဒူအီ အာယူဒါ အူ ဝီ။ အုဝ် တး မိူင် ထာဆူ ခဲင် အိူင် ခီလီခီ။ မိူင် ဘြိမ် အုဝ် တီ၊ အာဝ် မုး မိူင် ဒီတဲတ်။ အုဝ် မိူဝ် မှာန့်၊ တဲး မဲ ခ့ဝါင် အုဝ် ကာလာင် ဂြုဝ်း ဒီ ဒူအီ ကိူန် ဂေ နီ။”

40 ဘုဝ် တာင် ဘော ခ့ဝါင် အန် ကာလာင် ဂြုဝ်း။ ပန် တီ အာပေါလူ ကွယ် နာ ဒဲင် န့တဲင် တွိုန်။ အန် ဝီ စုဝ့် ဒဲ အန်၊ တဲး ဂေ ဒူအီ ကိူန် ထူမ်။ ဂေ ဘော ယေန် ဆီတွင့် ဒီ ထူမ် အူ ဇေန့်။ အာပေါလူ ဝီ စုး ဒီ ကာလာင် ဂြုဝ်း ဟဲဘြဲ ဒီ ဂေ။