ဝါယ် အန် တီ အာပေါလူ ဝီ တဝ်း၊ “အိုယ် ဘေ ဘီနွင်၊ ဘေ ဘိုဝ် ဘေ ဒါ၊ တဲး ဘေ ထူမ် ဂြုဝ်း ပီ ဒီ ကာလာင် အုဝ် ဒေါ တီ နီ၊ တဲး ဘေ နပ် ပီ ဘူင် အုဝ်။”

2 ဂေ ဒူအီ ကိူန်၊ ဒေါ ယိုဝ် ဂေ အာပေါလူ ကာလာင် ဂြုဝ်း ဟဲဘြဲ ဒီ ဂေ၊ ဂေ ဝီ ယေန် လွှိုမ် ခါ အာတ့်။ အာပေါလူ ဝီ တဝ်း၊ 3 “အုဝ် မုး ဒူအီ အာယူဒါ မှာန် အာခါခ်ု။ မိူင် ဘြိမ် အုဝ် မုး မိူင် ထာဆူ ခဲင် ကာဒါယ် အိူင် ခီလီခီ။ ဆိန့် ဒီတဲတ် အုဝ်၊ အုဝ် ယီ ဟဲ့ ကွယ် မိူင် ယေရူဆာလဲမ် နီ။ အုဝ် ဟဲ့ ဘဲန် ဒီဘဲ ဒါ ဆာရာ တာင် အီ စိူဝ် အာဂါမာလေန်။ အုဝ် ဟဲ့ ဟေန် ဒီ အန်၊ မှဝ် ဒီ ပါယ် ဒီ ဒူပ် ဆီချာ ဒါရာ ပီ ဒူပ် ဂေ ဂုန့် ဒါ အေ အီ ကွယ် ခါ အာတ့်။ အုဝ် မိူဝ် ဟဲ့ ဂျုဝ်ဂျာ ကာဆဝ် ဒီ ဒူပ် ဇဝ်ဖြာ ပီ ဘေ ဘောကာဂ့လျီတ် ဟဲ့ ဂျုဝ်ဂျာ ဒီ ဒူပ် ဇဝ်ဖြာ အာတိုဝ် နီ။ 4 အုဝ် မိူဝ် ဟဲ့ ဒွိုမ် ဒွါ ဒုက် တာင် ဒီ ဂေ ဒူအီ ဒူပ် န့တေန့် ဇဝ် ယေဆူ။ အုဝ် ဟဲ့ ဘူင် တဲး ဂေ ယမ်။ အုဝ် ဟဲ့ မှေတ့် ဘော ဂေ အီမာယ် အီဘိုန့်၊ ဘ်ု ရိတ် ဂေ၊ ခြွင့် ဂေ ခဲင် ကာပိုမ်။ 5 လွင် ပဲ့ ဟဲ့ ဘူင် အုဝ် ဇိုဝ် တီ၊ ဘော ဒါ တာင် အီ အိုပ် တူတ့် ဒူအီ အီ လှူ ဒီ ဇဝ်ဖြာ ဘော ဂေ ဒါ တာင် အီ အိုပ် မိူင် ဟဲ့ နပ် လွင် အန် တီ။ ဂေ ဟဲ့ ဒွိုမ် ဒွါ ပဲ့ ဒီ အုဝ်၊ တဲး အုဝ် ဟာဝ် တိုယ် ဒီ ဂေ ဒူအီ အာယူဒါ အီ မုး ဘီနွင် ဂေ။ ပန် တီ အုဝ် ဟဲ့ ဟာဝ် ဒူပ် န့တေန့် ဇမ် မိူင် ဒါမာခူ၊ တဲး အုဝ် ပွိုန် ဒီ ဝီ မှေတ့် ဂေ ဒူအီ အီ ညှိုမ် ဇဝ် ယေဆူ ခဲင် မိူင် ဒါမာခူ၊ တဲး အုဝ် ပွိုန် ဒီ တိုယ် ဂေ ဟာဝ် ဇမ် မိူင် ယေရူဆာလဲမ်၊ တဲး ဂေ ဒါ တာင် ဝီ ဆုင်ဖျာတ် အာမူ ဂေ။

6 ဒေါ ဟာဝ် အုဝ် ဒူပ် န့တေန့် တီ၊ အုဝ် ဟဲ့ ရိန် ဒီ ဇမ် မိူင် ဒါမာခူ။ ဒေါ အန် တီ န့ မုး ဒေါ ကာတဲ ဆီငဲ။ အုဝ် ဟဲ့ ယိုဝ် ဘ့လာင် တာင် ကာဆဝ် လူင် ဂါင်ဟြာဝ် လဲပ် ရူပ် အုဝ် အူ ဇေန့်။ 7 အုဝ် မိူဝ် ဝီ ဂိုပ် ဒဲင် ကာဒါယ်။ ဟဲ့ ဟွတ့်၊ အုဝ် ဝီ ယိုဝ် ဂြုဝ်း အီ တဝ်း၊ ‘အိုယ်၊ အာဆောလူ၊ မှဝ် န့ ပါယ် ပီ ဘူင် မဲ နာ စာဝ် ဒီ အုဝ်။’

8 အုဝ် ဝီ ဝျီ့ ဂြုဝ်း တီ တဝ်း၊ ‘အာဆေ မဲ မုး၊ မဲ ဇဝ်။း’

အန် ဝီ တဝ်း၊ ‘အုဝ် မုး ဇဝ် ယေဆူ၊ အီ တး မိူင် နာဆာရေတ့်၊ ဝီ ပီ ခမ် မဲ ဒီ ဘူင် နာ တူ မွှိုမ် တွိုန်။’ 9 ဂေ ဒူအီ အီ ဟာဝ် ရိုမ် ဒူပ် အုဝ်၊ ဘော ဂေ ဟဲ့ ယိုဝ် ဆီချာ ဘ့လာင် တီ၊ ဂေ ယီ တူ ပွိုန် ယိုဝ် ဂြုဝ်း အီ ကာလာင် ဒီ အုဝ်။

10 အုဝ် ဝီ တဝ်း၊ ‘မာဆေ ပီ လုဝ် မဲ ဇဝ်၊ တဲး အုဝ် ဘူင်။း’ ဇဝ် ယေဆူ ဝီ တဝ်း၊ ‘မဲ ယိတ့် ဟာဝ် လိုပ် ခဲင် မိူင် ဒါမာခူ။ ခဲင် မိူင် တီ၊ န့ ဒီ မိုဝ်း ဒူအီ အူ ဝီ၊ အန် ဒီ ဝီ ကာလာင် ဒီ မဲ မာဆေ ပီ လုဝ် ဘူင် မဲ။’ 11 ကူပ် ဘ့လာင် တာင် တီ၊ ငါယ် အုဝ် အာဝ် ဟူ ပွိုန် ယိုဝ် မာဆေ။ ခုဝ်၊ ဂေ ဒူအီ အီ ဒူပ် အုဝ် လုဝ် ပါ ဒဲ အုဝ်၊ တိုယ် အုဝ် ဟာဝ် လိုပ် ခဲင် မိူင် ဒါမာခူ။

12 အုဝ် ဟဲ့ ဟွတ့် ဇမ် ခဲင် မိူင်၊ န့ ယီ မိုဝ်း ဒူအီ အူ ဝီ၊ အန် စိူဝ် အာနာနီ။ အန် မုး ဒူအီ အီ ဒူပ် ဆီချာ ဒါရာ ဇဝ်ဖြာ။ ဂေ ဒူအီ အာယူဒါ အီ ကွယ် ခဲင် မိူင် တီ၊ ဂေ ဒွန် အီ ရုဝ်ဆေ ကာဆဝ် အန်။ 13 ဒူအီ တီ ဟဲ့ တး ဒူင် ကွယ် အုဝ်။ အန် တး ကွယ် ခူပ် အုဝ်၊ ဝီ တဝ်း၊ ‘အိုယ် အာဆောလူ၊ မဲ မုး ဝါ အုဝ်။ တဲး ငါယ် မဲ ဝီ ဘ့လာင်။’ အန် ဟဲ့ ဟွတ့် ကာလာင် ဂြုဝ်း တီ၊ အုဝ် ဝီ ပွိုန် ဒီ ယိုဝ် အန် အူ ဇေန့်။

14 အာနာနီ တွိုန် ဝီ တဝ်း၊ ‘ဇဝ်ဖြာ ပီ ဒွိုမ် ကြိုပ် ဒူအီ အာမျုဝ် အေ ဆိန့် ဒေါ မွိုန်၊ အန် ဟဲ့ ရဝ်း မဲ၊ တဲး မဲ နပ် ပီ လုဝ် အန်၊ တဲး မဲ ဝီ ပွိုန် ဒီ ယိုဝ် ဒူအီ အီ တူ ဒွိုမ် ဘူင် မှာပ်၊ တဲး မဲ ပွိုန် ဒီ ထူမ် ဂြုဝ်း အန် ဒီ ဟျုဝ့် မဲ။ 15 လွင် ပဲ့ ဟဲ့ ယိုဝ် မဲ တီ၊ မဲ ဒီ ဝီ ခဲ ဒီ ဂေ ဒူအီ ဒွန် အီ။ 16 ဒေါ တီ နီ၊ ကွဲ့ တဲး မဲ ကွယ် ဒီလိန့် ပီယေန့်။ တဲး မဲ ယိတ့် ဟာဝ်၊ ခမ် ဒီ စိုပ် ခဲင် အိုမ်၊ တဲး မဲ မှာန့် ဒီ ဇဝ် ယေဆူ၊ တဲး အန် ဂဝ်း ဝဲန် မှာပ် မဲ။’

17 ဝါယ် အန် တီ အုဝ် ဟဲ့ ဟွတ့် ဝီ ဝိဝ် ဇမ် မိူင် ယေရူဆာလဲမ်၊ အုဝ် ဘော ဟာဝ် ဆာခိုဝ် ခဲင် ဟုဝ် ဇဝ်ဖြာ။ ဒေါ အန် တီ အုဝ် ဟဲ့ ဝီ ယိုဝ် အာရူင် ပီ ဘျ ဇဝ်ဖြာ ဒီ အုဝ်။ 18 နဝ်း ဖွိုမ် ဇဝ်ဖြာ ဟဲ့ ပ့လိုက် အုဝ်။ အုဝ် ဟဲ့ ယိုဝ် ဇဝ် ယေဆူ ဝီ ကာလာင် ဂြုဝ်း ဒီ အုဝ်။ အန် တဝ်း၊ ‘မဲ ယိတ့် ဟာဝ် အူ ဇေန့်၊ တဲး မဲ လေး ခဲင် မိူင် ယေရူဆာလဲမ် နီ။ ဂေ ဒူအီ အီ ကွယ် ဒီ နီ၊ ဂေ တူ ဆီ ထူမ် ဂြုဝ်း ပီ ဒီ ကာလာင် မဲ ဒီ ဂေ။ ခုဝ်၊ တဲး မဲ ဟာဝ် ပေါ အူ ပ့လုဝ့်။’

19 အုဝ် ဟဲ့ ဟွတ့် ယိုဝ် ဂြုဝ်း တီ၊ အုဝ် ဝီ တဝ်း၊ ‘မဲ ဇဝ်၊ ဂေ ဒွန် အီ ဟဲ့ နပ်၊ အုဝ် ဟဲ့ ဒွိုမ် ဟာဝ် ခဲင် ဇူင် ဘဲန် ဇူင် ဘဲန် ဇူင် မး ဂေ ဒူအီ ညှိုမ် မဲ။ ဟဲ့ ဟွတ့်၊ အုဝ် ဝီ မှေတ့် ခြွင့် ဂေ ခဲင် ကာပိုမ်။ 20 ဒေါ ငဝ်း ဂေ အာဆာထေဖာန် အီ ဟဲ့ ခဲ ဒီ အီ လွင် မဲ၊ ဘော အုဝ် ဟဲ့ ကွယ် ရိုမ် ဒူပ် ဂေ၊ ယွတ် ဂေ၊ ဘော ဖြူမ် ပီ ဘူင် ဂေ။ အုဝ် မိူဝ် ဟဲ့ ဘ်ု ခြိုင် ဂေ ဒူအီ အီ ငဝ်း အန်။’

21 ပန် တီ အန် ဇဝ် ဝီ ကာလာင် ဒီ အုဝ် တဝ်း၊ ‘တဲး မဲ ဟာဝ်။ အုဝ် ဒီ တိုယ် မဲ ဟာဝ် ဇမ် မိူင် တူင့်၊ ဒူင် ကွယ် ဂေ ဒူအီ အာမျုဝ် ဟဝ်။’”

22 အာပေါလူ ဟဲ့ ဟွတ့် ကာလာင် ဂြုဝ်း တီ၊ ဂေ ဒူအီ ကိူန် ဝီ ဒတ် တာင် တဝ်း၊ “ငဝ်း ဝဲန် ဒူအီ တီ၊ အာဝ် ကာအာပ် တဲး အန် ကွယ် ဒဲင် ကာဒါယ် နီ။”

23 ဂေ ဘော ဒတ် ဘော ဘုတ့် ဝဲန် ခြိုင် ဂေ၊ ဝီ ဒီ ဇုး တဲး ကာပုး ကော ကာဟိုင် လှိုပ် ဂေ။ 24 ပန် တီ ဘုဝ် တာင် ဝီ ဒွါ အာမိင်၊ တဲး ဂေ ဟာဝ် တိုယ် အာပေါလူ နာ ခဲင် ကာင် ဂေ ဒါ ဆိုက်၊ စ်ု ဂေ ဆီဘျြီ့ အန်၊ တဲး အန် ကော နပ် ဆီချာ မှဝ် န့ ပါယ် ပီ ဒတ် ကာဆဝ် ဂေ ဒူအီ ကိူန်။ 25 ဝါယ် အန် တီ ဂေ ဟဲ့ ဟွတ့် ပက် အာပေါလူ၊ တဝ်း ဒီ ဆီဘျြီ့ အန်၊ အာပေါလူ ဝီ ကာလာင် ဒီ ဒါ ဘုဝ် အီ အိုပ် ဒါ ဆိုက် အူ မာယဝ်း၊ အီ ကွယ် ဒီ ခူပ် အန်။ အန် တဝ်း၊ “ဟဲ့ မှာန် ဒါရာ အေ တဲး အေ ဆီဘျြီ့ ဒူအီ ရုဝ်မာ အာတ့် ဆုင်ဖျာတ် ဂေ ဒါ တာင် လွင် မိုဝ်း တူ မိုဝ်း အန် အာဘြဲတ်။း”

26 ဘုဝ် တီ ဟဲ့ ဟွတ့် ထူမ် ဂြုဝ်း အာပေါလူ တီ၊ အန် ဝီ ဟာဝ် ဒူင် ကွယ် ဘုဝ် တာင် အူ ဇေန့်။ အန် တဝ်း၊ “မာဆေ ပီ ဒီ ဘူင် မဲ။း ဒူအီ တီ မုး ဒူအီ ရုဝ်မာ။”

27 ဘုဝ် တာင် ဝီ ဟာဝ် ဇမ် ဒူင် ကွယ် အာပေါလူ။ အန် တဝ်း၊ “ဟဲ့ မှာန် မုး မဲ ဒူအီ ရုဝ်မာ။း”

အာပေါလူ ဝီ တဝ်း၊ “ဟဲ့ မှာန်။”

28 ဘုဝ် တာင် တီ ဝီ တဝ်း၊ “အုဝ် ဟဲ့ ဒွါ ကိူန် ရွိုန်၊ တဲး အုဝ် ပွိုန် ဒီ ဘဲန် ဒူအီ ရုဝ်မာ။”

အာပေါလူ ယီ တဝ်း၊ “အီ မုး အုဝ်၊ အုဝ် ဟဲ့ မုး ဒူအီ ရုဝ်မာ ဆိန့် ဒေါ ဂွိုတ် အုဝ်။”

29 ဂါယ် ဟဲ့ ဟွတ့် ကာလာင် ဂြုဝ်း တီ၊ ဂေ ဒူအီ အီ ဒွိုမ် တဝ်း ဒီ ဆီဘျြီ့ ဇဲတ် အန်၊ ဂေ ဝီ ဂဝ်း ဝဲန် ဝန် ပီ ပက် ဂေ ဒီ အန် အူ ဇေန့်။ ဘော ဘုဝ် တာင် တွိုန် ဘော ယုဝ် ဒေါ ဟဲ့ ဝီ နပ် အန် အာပေါလူ မုး ဒူအီ ရုဝ်မာ။ ခုဝ်၊ အာဝ် ကာအာပ် ပက် ဒူအီ ရုဝ်မာ တာ ဝန် ဟိန်။

30 ပါ ခဲညှာ၊ ဘုဝ် တာင် တွိုန် ဆီ နပ် ဆီချာ၊ မှဝ် န့ ပါယ် ပီ ဖျာက် ဂေ ဒူအီ အာယူဒါ ဒီ အာပေါလူ။ အန် ဝီ ဂဝ်း ဝန် ပီ ပက် ဂေ ဒီ အာပေါလူ။ အန် ဝီ စ်ု ဒါ တာင် အီ ယဲတ့် ဂေ ဒူအီ အီ လှူ ဒီ ဇဝ်ဖြာ ဘော ဂေ ဒါ တာင် ယူဒါ၊ တဲး ဂေ ဘော ဖိုင် တး ကာဇု။ ဟဲ့ ဟွတ့်၊ အန် ဘော တိုယ် အာပေါလူ ဟာဝ် ဇမ် ဒီ အာတ့် ဂေ။