ပန် တီ အာပေါလူ ဝီ ယွတ် ဆိူဝ် ဒီ ဂေ ဒွန် အီ အီ ကွယ် ကာဇု။ အန် ဝီ တဝ်း “အိုယ် ဘေ ဒါ တာင်၊ ဘေ ဘီနွင် အုဝ်။ အူ ဆိန့် ဒေါ ဂုဝ် ကော ဇမ် အာတိုဝ် အုဝ် ဟဲ့ ဒူပ် ဆီချာ ဇဝ်ဖြာ။ နဝ်း အုဝ် တူ တဝ်း၊ ပဲ့ ဟဲ့ ဘူင် အုဝ် အာဝ် မှာန်။” 2 အန် ဟဲ့ ဟွတ့် တဝ်း ပါယ် တီ၊ န့ မုး ဒါ တာင် အီ အိုပ် တူတ့် ဒူအီ အီ လှူ ဒီ ဇဝ်ဖြာ။ အန် စိူဝ် အာနာနီ။ အန် ကာလာင် ဒီ ဒူအီ အီ ကွယ် ကာတတ် အာပေါလူ၊ စ်ု ဂေ ကာထ မူတ့် အန်။ 3 အာပေါလူ ဝီ တဝ်း ဒီ အာနာနီ တွိုန်၊ “ဇဝ်ဖြာ ဒီ ဝီ ကာထ မူတ့် မဲ။ မဲ ပီ ရဲင် အီ ဖဝ်း ထုန်။ မဲ ဟဲ့ တး ကွယ် ဒီ နီ၊ တဝ်း ဒီ ဆုင်ဖျာတ် အာမူ အုဝ် ကူပ် တူ ဒူပ် အုဝ် ဒါရာ။ ဟဲ့ ဟွတ့် မဲ ဝီ စ်ု အီ ကာထ မူတ့် အုဝ်။ န့ ဝီ မုး မဲ အီ တူ ဒူပ် ဒါရာ။”

4 ဂေ ဒူအီ အီ ကွယ် ကာတတ် အာပေါလူ ဝီ တဝ်း ဒီ အန်၊ “မှဝ် န့ ပါယ် ပီ ယ ကာလာင် မဲ ဂြုဝ်း တူ မွှိုမ် ဒီ ဒါ တာင် အီ အိုပ် တူတ့် ဒူအီ အီ လှူ ဒီ ဇဝ်ဖြာ။း”

5 အာပေါလူ ဝီ တဝ်း၊ “အိုဝ် ဘေ ဘီနွင်၊ အုဝ် တူ နပ် လွင် အန် တီ။ အုဝ် တူ နပ် လွင် မုး အန် ဒါ တာင် အီ အိုပ် တူတ့် ဒူအီ အီ လှူ ဒီ ဇဝ်ဖြာ။ န့ ဟဲ့ ဒဲမ် အုန် ခဲင် ဘပ် ဇဝ်ဖြာ တဝ်း၊ ‘ဘေ ကွဲ့ ကာလာင် ဂြုဝ်း တူ မွှိုမ် လွင် ဒါ တာင် အီ အိုပ် ဘေ။’”

6 ဟဲ့ ဟွတ့် ပန် တီ အာပေါလူ ဝီ ယိုဝ်၊ ဂေ ဒါ တာင် အီ ကွယ် ဒီ အာတ့် အန်၊ ဂေ မုး အာ ဖိုင်။ မင် အီ ဂေ မုး ဒူအီ ဖိုင် ဖာရီဆဲ။ ဘော မင် အီ ဂေ မုး ဖိုင် ဆာဒူခဲ။ အာပေါလူ ဟဲ့ ယိုဝ် လွင် အန် တီ၊ အန် စုး ဒီ ကာလာင် ဂြုဝ်း တာင်၊ တဲး ဂေ ဒါ တာင် ပွိုန် ဒီ ထူမ် ဆီချာ။ အန် တဝ်း၊ “ဘေ ဘီနွင် အုဝ်၊ အုဝ် မုး ဒူအီ ဖိုင် ဖာရီဆဲ။ ဘော ဂုန့် အုဝ် ဟဲ့ မုး ဒူအီ ဖိုင် ဖာရီဆဲ။ ဒေါ တီ နီ ဂေ ဟဲ့ တဝ်း၊ အုဝ် မိုဝ်း မှာပ် ကူပ် နှဝ့် န့ဒဝ့် အုဝ် လွင် ဂေ ဒူအီ ယမ် ဒီ ဝီ ယိတ့် ဝီ အိမ်။” 7 အာပေါလူ ဟဲ့ ဟွတ့် ကာလာင် ဂြုဝ်း တီ၊ ဂေ ဒူအီ ဖိုင် ဖာရီဆဲ ဘော ဂေ ဒူအီ ဖိုင် ဆာဒူခဲ၊ ဂေ ဝီ လာယ် ကာထဲန့် တူ လာယ် ဖြူမ်။ ဂေ အာဝ် ဟူ မုး အူ နဝ်း။ 8 ဂေ ဒူအီ ဖိုင် ဆာဒူခဲ၊ ဂေ တဝ်း၊ ဆေ ဒူအီ ဟဲ့ ဟွတ့် ယမ်၊ အာဝ် ပွိုန် ဝီ ယိတ့် ဝီ အိမ်။ ဂေ ဘော တဝ်း၊ အာမူ အာမာတ် ဇဝ်ဖြာ ဘော ကာနမ် မိူဝ် တူ မိုဝ်း။ ဂေ ဖိုင် ဖာရီဆဲ၊ ဂေ ယီ တဝ်း၊ ပီ မာနုဝ် ဂေ ဖိုင် ဆာဒူခဲ အူယ် မျုဝ် တီ အာဝ် မှာန်။

9 ပန် တီ ဂေ ကြဲ ဒီ နန် ကိူန်၊ ကာလာင် ဂြုဝ်း တာင်၊ ဘော ဆီနန် ဆီနိူင်။ ဂေ ဒါ ဆာရာ အီ မာနုဝ် ဒါရာ ယူဒါ မင် အီ၊ ဂေ အီ မုး ဖိုင် ဖာရီဆဲ၊ ဂေ ဝီ ယိတ့်၊ ကာလာင် ဂြုဝ်း တာင်။ ဂေ တဝ်း၊ “ဒူအီ တီ၊ အန် တူ မိုဝ်း မှာပ် မာဆေ။ ဆေ ဂြုဝ်း အန် ဟဲ့ မုး ဟဲ့ မှာန်၊ ဘော မုး ကာနမ်၊ ဘော မုး အာမူ အာမာတ် ဇဝ်ဖြာ အီ ဟဲ့ ကာလာင် ဂြုဝ်း ဒီ အန်၊ အန် တူ မိုဝ်း မှာပ် မာဆေ။” 10 ပန် တီ ဂေ ငှာ ဒီ လာယ် ကာလုတ့်။ ဘုဝ် တာင် ရုဝ်မာ တွိုန်၊ အန် ယုဝ် ဂေ ဝီ ဒိူတ် ကာယာတ့် ဒုဝ် အာပေါလူ။ ခုဝ်၊ ဘုဝ် တာင် ဝီ ဒဲ့ ဒါ ဆိုက် မင် အီ၊ စ်ု ဂေ ဟာဝ် ဒိုဝ်း လေး အာပေါလူ ဒူင် ကွယ် ဂေ ဖိုင် ဒါ တာင် ယူဒါ။ ဂေ ဝီ တိုယ် အန် ဝိဝ် ခဲင် ဒပ် ဂေ ဒါ ဆိုက်။

11 ခဲင် မှိုဝ် တီ၊ ဇဝ် ယေဆူ ယီ တး ဇမ် ဒူင် ကွယ် အာပေါလူ၊ ကွယ် ခူပ် အန်။ အန် တဝ်း ဒီ အာပေါလူ၊ “မဲ ကွဲ့ ယုဝ်။ မဲ ဟဲ့ ယ ကာလာင် ဂြုဝ်း ဆိူဝ် ခဲင် မိူင် ယေရူဆာလဲမ် နီ။ ပါယ် တီ၊ မဲ ဘော လုဝ် ကာလာင် လွင် အုဝ် ဘော ခဲင် မိူင် ရုဝ်မာ။”

12 ပါ ခဲညှာ၊ ပြဲ ဟဲ့ ဟွတ့် ဝး၊ ဂေ ဒူအီ အာယူဒါ မင် အီ ဝီ တး ကာဇု ဘဲန် အူ ဖိုင် ဘော ဒိူင် တဝ်း၊ “တဲး ဇဝ်ဖြာ ဝဲန် အေ၊ ဆေ အေ ဟီ ဟူမ် ဘူမ်၊ ဟီ ဒျီင် အိုမ် အာတ့် ပွိုန် ဒီ ငဝ်း ဝဲန် အေ အာပေါလူ။” 13 ဂေ ဒူအီ အီ ဟဲ့ ဒိူင် တီ၊ ဂေ ကွယ် ဖွုန် ဂိုဝ် လူယ်။ 14 ဂေ ယီ ဟာဝ် ဇမ် ဒူင် ကွယ် ဂေ ဒါ တာင် အီ ယဲတ့် ဂေ ဒူအီ အီ လှူ ဒီ ဇဝ်ဖြာ။ ဂေ တဝ်း၊ “ယေ မုး ဖိုင် အီ ဟဲ့ ဒိူင် တဝ်း၊ ယေ တူ ဟူမ် မာဆေ အာတ့် ငဝ်း ဝဲန် ယေ အာပေါလူ တွိုန်။ 15 ခုဝ် အန် တီ ဘေ ဒါ တာင် အီ ယဲတ့် ဂေ ဒူအီ အီ လှူ ဒီ ဇဝ်ဖြာ ဘော ဘေ ဒါ တာင် အီ အိုပ် မိူင်၊ တဲး ဘေ ဝီ ဟာဝ် ဒီ ဘုဝ် တာင်၊ မှာန့် ဒီ အန်၊ တဲး အန် တိုယ် အာပေါလူ တး ဇမ် ဒူင် ကွယ် ဘေ။ တဲး ဘေ ညိုင်ရာင် ဒီ ဒီမွှတ် ဆီချာ အာပေါလူ ပေါ အူ ဇေန့်။ အီ မုး ယေ၊ ယေ ဒီ နှဝ့် ဘ်ု န့တေန့် အန်၊ တဲး ယေ ပွိုန် ဒီ ငဝ်း ယမ် အန် အာတ့် တး ဇမ် အန် ဒူင် ကွယ် ဘေ။”

16 ဒေါ ကာလာင် ဂေ ဂြုဝ်း တီ ဒီ ဒါ တာင် ယူဒါ၊ န့ မိုဝ်း ဒူအီ အူ ဝီ တာ ယိုဝ် ဂြုဝ်း တီ။ အန် မုး လှာန် အာပေါလူ။ အန် ဟဲ့ ဟွတ့် ထူမ် ပီ လာယ် ဖြူမ် ဂေ၊ အန် ဝီ ဟာဝ် ဆိူဝ် ဒူင် ကွယ် ဂေ ဒါ ဆိုက်၊ ဝီ ကာလာင် ဒီ အာပေါလူ လွင် အန် တီ။

17 အာပေါလူ ယီ ဒဲ့ ဘုဝ် အီ အိုပ် အူ မာယဝ်း၊ တဲး အန် တး ဒူင် ကွယ် အန်။ အန် ဝီ တဝ်း ဒီ ဘုဝ် တီ၊ “တဲး မဲ ဟာဝ် တိုယ် ကာညူမ် နီ၊ တဲး အန် ဇမ် ဒီ အာတ့် ဘုဝ် တာင်။ အန် လုဝ် ကာလာင် ဂြုဝ်း ဒီ ဘုဝ် တာင်။” 18 ပါယ် တီ၊ ဘုဝ် တီ ဝီ တိုယ် အန် ဟာဝ် ဇမ် ဒူင် ကွယ် ဘုဝ် တာင်။ အန် ဝီ တဝ်း ဒီ ဘုဝ် တာင်၊ “အာပေါလူ ပီ ခြွင့် မဲ ခဲင် ကာပိုမ်၊ အန် ဟဲ့ ဒဲ့ အုဝ် တး ဒီ အန်။ အန် ဟဲ့ စ်ု အုဝ် တိုယ် ကာညူမ် နီ ဒီ မဲ။ အန် မိုဝ်း ဂြုဝ်း ပီ ဆီ ကာလာင် ဒီ မဲ။”

19 ဘုဝ် တာင် ဝီ ပါ ဒဲ ကာညူမ် တီ၊ ဝီ ဟာဝ် ပေါ အူ ပ့လုဝ့်၊ ဝီ ဒီမွှတ် အန်၊ “မာဆေ ပီ ဆီ ကာလာင် မဲ ဒီ အုဝ်။း”

20 ကာညူမ် တွိုန် ဝီ တဝ်း၊ “ဂေ ဒူအီ အာယူဒါ၊ ဂေ ဟဲ့ လာယ် ဖြူမ် ဒီ မှာန့်၊ တဲး မဲ တိုယ် ဝိဝ် အာပေါလူ ဒူင် ကွယ် ဂေ။ ဂေ ဒီ ညိုင်ရာင် တဝ်း၊ ဂေ ဒီ ဝီ ဒီမွှတ် ဆီချာ အန်။ 21 ခုဝ်၊ ကွဲ့ တဲး မဲ ဘူင် ပီ မှာန့် ဂေ။ န့ မိုဝ်း ဒူအီ ဖွုန် ဂိုဝ် လူယ်။ ဂေ ဟဲ့ ဟွတ့် ဒိူင် တဝ်း၊ ဂေ တူ ဟူမ် တူ ဒျီင် မာဆေ အာတ့် ငဝ်း ယမ် ဂေ အာပေါလူ။ ဂေ ဟဲ့ တဝ်း ဒီ ကွယ် နှဝ့် ဒေါ ဟာဝ် အန် ဒူပ် န့တေန့်။ ဂေ ဟဲ့ ဟွတ့် ရဲန် တူတ့် ဒွန် မျုဝ်။ န့ ဂိတ် မီ ပီ ဒီ ဖြူမ် မဲ။”

22 ဘုဝ် တာင် ဟဲ့ ဟွတ့် ထူမ် ဂြုဝ်း တီ၊ အန် ဝီ တဲး ဂွန် ကာညူမ် တွိုန် ဝေန့်။ အန် တဝ်း၊ “မဲ ကွဲ့ ကာလာင် ဒီ အာဆေ လွင် တး ကာလာင် မဲ ဂြုဝ်း ဒီ အုဝ်။”

23 ဝါယ် အန် တီ ဘုဝ် တာင် တွိုန် ဝီ ဒဲ့ ဘုဝ် အီ အိုပ် ဒါ ဆိုက် အူ မာယဝ်း အာ ဝီ။ ဂါယ် ဟဲ့ ဟွတ့် တး ဇမ် ဒူင် ကွယ် အန်၊ အန် ဝီ တဝ်း၊ “ဘာယ် လုဝ် ရဲန် ဒါ ဆိုက် အာ မာယဝ်း ဝီ၊ ဒါ ဆိုက် အီ ပဝ့် မ့ပြွင့် ဘူ ဂိုဝ် ဝီ ဘော ဒါ ဆိုက် အီ ဂူင့် လျီး အာ မာယဝ်း ဝီ၊ တဲး ဘာယ် ယဲတ့် ဂေ ဟာဝ် မိူင် ကေဆာရေ။ ဟီ နုဝ့် ဒိမ် နာရီ ခဲင် မှိုဝ် နီ၊ ဘေ လုဝ် လေး ဟာဝ်။ 24 ဘာယ် လုဝ် ရဲန် ဘော မ့ပြွင့် မင် ဒုဝ် တဲး အာပေါလူ ပဝ့်၊ တဲး ဘာယ် ဝီ တိုယ် အန် ဇမ် ဆီချာ ဒူင် ကွယ် ဒါ ကာညာ ရုဝ်မာ အီ အိုပ် ကာဒါယ် မိူင် အေ နီ၊ အီ စိူဝ် အာ​ဖေလိက်။”

25 ဘုဝ် တာင် ဘော ဒဲမ် ပဲ့ တိုယ် ဒီ အာ​ဖေလိက်။ အန် ဒဲမ် တဝ်း၊ 26 “အုဝ် အီ စိူဝ် အာကာလုဝ်ဒီလက် လူဆီယ၊ အုဝ် ဒဲမ် ပဲ့ ဒီ မဲ အာ​ဖေလိက်၊ အီ မုး ဒါ ကာညာ အီ မွှိုမ် ကာဆဝ် အီ အိုပ် မိူင် အေ။ အိုယ်၊ မဲ ဒါ ကာညာ၊ တဲး မဲ ဂျာမ်ဆာ။

27 ဂေ ဒူအီ အာယူဒါ ဟဲ့ မှေတ့် ဒူအီ ဝီ နီ။ ဂေ ဟဲ့ ငှာ ဒီ ငဝ်း ယမ် အန်။ ဒေါ အန် တီ အုဝ် ဘော နပ်၊ အန် မုး ဒူအီ ရုဝ်မာ။ ခုဝ်၊ ဘော အုဝ် ဘော ဒါ ဆိုက် အုဝ် ဟဲ့ ဟာဝ် ချွတ် အန်။ 28 အုဝ် ယီ လုဝ် နပ် ဆီချာ မှဝ် န့ ပါယ် ပီ မှေတ့် ဂေ ဒီ အန်။ ခုဝ်၊ အုဝ် ဟဲ့ တိုယ် အန် ဟာဝ် ဇမ် ဒီ အာတ့် ဂေ ဒါ တာင် အီ အိုပ် ခဲင် ကာဒါယ် မိူင် ယူဒါ။ 29 ပန် တီ အုဝ် ဘော နပ်၊ န့ မုး လွင် ဒါရာ ဂေ။ န့ တူ မိုဝ်း မာဆေ ပီ ဘူင် အန်၊ အီ ကာအာပ် မှေတ့် ငဝ်း အန်။ 30 ဝါယ် အန် တီ အုဝ် ဝီ ယိုဝ် လွင် ဂေ ဒူအီ အာယူဒါ ဟဲ့ လာယ် ဖြူမ် ဒီ ပြာ ဒီ ငဝ်း ဝဲန် အန်။ ဒေါ အန် တီ အူ ဇေန့်၊ အုဝ် ဝီ တိုယ် အန် ဟာဝ် ဇမ် ဒူင် ကွယ် မဲ။ အုဝ် မိူဝ် ဟဲ့ တဝ်း ဒီ ဒူအီ အီ မှေတ့် အန်၊ တဲး ဂေ ဟာဝ် ကာလာင် ပီ ဒီ ဖျာက် ဂေ ဒီ အန် ဒူင် ကွယ် မဲ။ ခဲ့ တီ အုဝ် ဒဲမ်။”

31 ဝါယ် အန် တီ ဂေ ဒါ ဆိုက် ဝီ ဘူင် ခဲ့ ပီ စ်ု ဘုဝ် တာင် တွိုန်။ ဂေ ဝီ ဟာဝ် ခဲင် မှိုဝ်၊ တိုယ် အာပေါလူ၊ တဲး အန် ဇမ် မိူင် အန်ထီဖာထာရီ။ 32 ပါ ခဲညှာ ဂေ ဒါ ဆိုက် ဝီ ဝိဝ် မိူင် ယေရူဆာလဲမ်၊ ဒူင် ကွယ် ဂေ။ န့ ဂိတ် မီ ဂေ ဒါ ဆိုက် အီ ပဝ့် မ့ပြွင့် အီ ဆီ ကွယ် ဒူပ် အာပေါလူ။ ဂေ ဝီ တိုယ် အာပေါလူ ဟာဝ် ဒူပ် န့တေန့် ဇမ် မိူင် ကေဆာရေ။ 33 ဂေ ဟဲ့ ဟွတ့် ဇမ် မိူင် ကေဆာရေ၊ ဂေ ဝီ အာပ် ပဲ့ တွိုန် ဒီ ဒါ ကာညာ ရုဝ်မာ၊ အာပ် ဘော အာပေါလူ ဒီ အန်။ 34 ဒါ ကာညာ မိူဝ် ဝီ တိး ပဲ့ တီ။ ဟဲ့ ဟွတ့်၊ အန် ဝီ ဒီမွှတ် မိူင် ဘြိမ် အာပေါလူ၊ န့ မုး မိူင် မှဝ်။ 35 ဒေါ ဝီ နပ် အန်၊ မိူင် ဘြိမ် အာပေါလူ မုး အိူင် ခီလီခီ၊ အန် ဝီ တဝ်း ဒီ အာပေါလူ၊ “ဆေ ဂေ ဒူအီ ဖျာက် မဲ ဟီ တး၊ အုဝ် ဒီ ဝီ ထူမ် အာမူ မဲ။” ဟဲ့ ဟွတ့် ပန် တီ အန် ဝီ စ်ု ဂေ ဘ်ု အာပေါလူ ခဲင် ဟုဝ် ခုန်ဒီခမ် အာဟေရူတ်။