1 ဝါယ် အန် တီ ဘော ပွိုန် ဖန် ဆီငဲ၊ ဒါ တာင် အီ အိုပ် တူတ့် ဒူအီ အီ လှူ ဒီ ဇဝ်ဖြာ၊ အီ စိူဝ် အာနာနီ၊ အန် ဝီ ဟာဝ် ဇမ် မိူင် ကေဆာရေ။ ဘော ဒါ တာင် မင် အီ၊ ဘော အာထေထူလူ၊ အီ ကျ ဒီ ကာလာင် ဂြုဝ်း ဒါင် ဂေ၊ ဂေ ဒွန် အီ ဟဲ့ ဟာဝ် ဒူပ် အန်။ ဂေ ဟဲ့ ဟွတ့် တး ဇမ် ဒူင် ကွယ် ဒါ ကာညာ ရုဝ်မာ၊ ဂေ ဝီ ဖျာက် အာပေါလူ။ 2 ဟဲ့ ဟွတ့်၊ ဒါ ကာညာ ဝီ ဒဲ့ တဲး အာပေါလူ တး ဒူင် ကွယ် ဂေ။ ပန် တီ အာထေထူလူ တွိုန်၊ အန် စုး ဒီ ဖျာက် အာပေါလူ။ အန် တဝ်း ဒီ ဒါ ကာညာ ရုဝ်မာ၊ 3 “အိုယ် မဲ ဒါ ကာညာ တာင်၊ န့ မုး မဲ၊ အီ တဲး ယေ ကွယ် ဒါခိုယ်၊ တဲး န့ ယေန် ခဲင် မိူင်။ ယေ မိူဝ် နပ်၊ န့ မုး အာငျာန် မဲ ဘော ပဲ့ ဟဲ့ ဘူင် မဲ၊ တဲး န့ ဘဲန် နာ ဘွတ် နာ မွှိုမ် ဒွန် မျုဝ်၊ ပီ ညှမ် ဒွိုမ် ယိုဝ် ယေ ခဲင် မိူင် ယေ။ ခုဝ်၊ ယေ ဝီ အိူပ် မဲ ဒါ ကာညာ အာ​ဖေလိက်။ ဂုင် ဂေဇူ မဲ ဟဲ့ တာင် ကာဆဝ်။ 4 ဒေါ တီ နီ၊ အုဝ် တူ ဆီ တဲး မဲ နုန် ဒီ ထူမ်။ ခုဝ်၊ အုဝ် မှာန့်၊ တဲး မဲ ခ့ဝါင် အုဝ် ကာလာင် ဂြုဝ်း အာဒါ အူ ကာစန်၊ တဲး မဲ ထူမ်။

5 အာမူ ဒူအီ တီ၊ န့ ပါယ် နီ။ ယေ ဟဲ့ နပ် ဒူအီ တီ၊ အန် မုး ဒူအီ အီ ဘူင် တဲး န့ ဒုက် ဒီ ဒွန် အီ။ အန် ဘော ဘူင် တဲး ဂေ ဒူအီ အာယူဒါ ဆီနန် ဆီနိူင် ဒွန် နာ ဒွန် ပ့လုဝ့် ဒဲင် ကာဒါယ်။ အန် ဘော မုး ဒါ တာင် ဂေ ဒူအီ ခဲင် ဖိုင် အီ ကြိုပ် ဒူအီ အီ တး မိူင် နာဆာရေတ့် တွိုန်။ 6 အန် မိူဝ် ဟဲ့ တဝ်း ဒီ ဘူင် တဲး ဟုဝ် ဇဝ်ဖြာ ယေ ကာဒါတ့်။ ဒေါ အန် တီ ယေ ဟဲ့ မှေတ့် အန်။ 7 ယေ တဝ်း ဒီ ဆုင်ဖျာတ် အာမူ အန်၊ တဲး န့ ဒူပ် ဒါရာ ယေ အာမျုဝ် ဒူအီ အာယူဒါ။ န့ ယီ မိုဝ်း ဘုဝ် တာင်၊ အီ စိူဝ် အာလူခီ၊ အန် တး ဒူင် ကွယ် ယေ၊ ဝီ ဖာတ် ဒိုဝ်း လေး အာပေါလူ ဒီ ယေ။ ဟဲ့ ဟွတ့်၊ အန် ဝီ စ်ု ယေ ဟာဝ် ကာလာင် လွင် အာမူ တီ ဒွန် မျုဝ် ဒီ မဲ။ 8 ဆေ မဲ ဆီ ဒီမွှတ် ဘော အီ ဟဝ် လွင် အန် တီ၊ မဲ ဒီ ဘော နပ်၊ ဂြုဝ်း ယေ ဟဲ့ မှာန်။”

9 ဘော ဂေ ဒူအီ အာယူဒါ ဝီ တဝ်း၊ “ဂြုဝ်း ပီ ကာလာင် ဂေ ဟဲ့ မုး၊ ဟဲ့ မှာန်။”

10 ဝါယ် အန် တီ ဒါ ကာညာ အီ အိုပ် မိူင် ဝီ တဲး အာပေါလူ နပ်၊ အန် ဟဲ့ ပွိုန် ကာလာင် ဂြုဝ်း။ ပန် တီ အာပေါလူ ဝီ ယိတ့်။ အန် တဝ်း၊ “အိုယ် မဲ ဒါ ကာညာ၊ အုဝ် ဟဲ့ နပ်၊ န့ ဟဲ့ လှေန့် ဘဲန် ဆီနမ် ဘဲန် ဆီနမ်၊ မဲ ဟဲ့ ဘဲန် ဒါ တာင် အီ ဆုင်ဖျာတ် အာမူ ဂေ ဒူအီ အာမျုဝ် ယူဒါ။ ခုဝ်၊ နဝ်း အုဝ် ဟဲ့ ဒါခိုယ် ဒီ ပွိုန် ကာလာင် ဂြုဝ်း လွင် အုဝ်။ 11 မဲ ဟဲ့ ပွိုန် ဒီမွှတ် ဘော ဂေ အီ ဟဝ်၊ တဲး မဲ နပ်၊ ဂြုဝ်း အုဝ် ဟဲ့ မှာန်။ ဟဲ့ ပွိုန် ဂိုဝ် ဒီ အာ ဆီငဲ လူယ် အာတိုဝ် နီ၊ အုဝ် ဟဲ့ တး ဇမ် မိူင် ယေရူဆာလဲမ်၊ တဲး အုဝ် ပွိုန် ဒီ ကြိုပ် ဇဝ်ဖြာ။ 12 ဘော မုး ခဲင် ဟုဝ် ဇဝ်ဖြာ၊ ဘော မုး ခဲင် ဇူင် ကြိုပ် ဂေ ဒူအီ အာယူဒါ ဇဝ်ဖြာ၊ ဘော မုး ခဲင် မိူင်၊ ဂေ ဒူအီ အီ ဖျာက် အုဝ်၊ ဂေ တူ ယိုဝ် အုဝ် လာယ် ဆင်ချာင် ဒီ ဒူအီ ဟဝ်။ ဂေ တူ ယိုဝ် အုဝ် ဘူင် ဆီနန် ဆီနိူင် ဒေါ မှဝ်။ 13 ဒဲင် တီ၊ ဂြုဝ်း ပီ ဖျာက် ဂေ ဒီ အုဝ် ဒေါ တီ နီ၊ ဂေ တူ ပဲ ဒီ ဘျ ဒီ မဲ၊ တဲး န့ လိုဝ်း ဆီချာ ယုဝ် ဟဲ့ မှာန် အာဝ် မှာန်။ 14 န့ ယီ မိုဝ်း အူ မျုဝ်၊ ပီ လုဝ် ကာလာင် အုဝ် ဒီ မဲ။ အုဝ် ကြိုပ် ဇဝ်ဖြာ ပီ ဒွိုမ် ကြိုပ် ဂေ ဂုန့် ဒင် ယေ။ အုဝ် မိူဝ် ဒူပ် န့တေန့် ပီ တဝ်း ဂေ၊ န့ တူ မှာန်။ အုဝ် ဘော ညှိုမ် တူတ့် ဒွန် မျုဝ် အီ ဒူပ် ဒါရာ ဇဝ်ဖြာ ခဲင် ဘပ် ပီ ဒဲမ် အုန် ဂေ ဒူအီ အီ ဘျာန် ဂြုဝ်း ဇဝ်ဖြာ။ 15 အုဝ် ဘော နှဝ့် န့ဒဝ့် ပီ နှဝ့် န့ဒဝ့် ဂေ ဒူအီ အီ ကွယ် ဒီ နီ။ ဘော အုဝ် ဘော ဂေ ဟဲ့ ညှိုမ်၊ န့ ဒီ ဇမ် ဆီငဲ ပန် ဒီ တဲး ဇဝ်ဖြာ ဂေ ဒူအီ ယမ် ဝီ ယိတ့် ဝီ အိမ်။ ဘော ဂေ ဒူအီ မွှိုမ်၊ ဘော ဂေ ဒူအီ အီ တူ မွှိုမ်၊ ဂေ ဒီ ဝီ ယိတ့် ဝီ အိမ်။ 16 ကူပ် ညှိုမ် အုဝ် ပါယ် တီ၊ ခဲ့ ပွိုန် အုဝ် ဘူင်၊ အုဝ် မိူဝ် ဘူင်၊ တဲး အုဝ် မိုဝ်း နဝ်း ဆိူဝ် နဝ်း မှာန်၊ တဲး န့ လဝ့် နဝ်း ဇဝ်ဖြာ။

17 အာတ့် နီ၊ န့ ဟဲ့ လှေန့် ဘဲန် ဆီနမ် ဘဲန် ဆီနမ်၊ အုဝ် တူ တး ခဲင် မိူင် ယေရူဆာလဲမ်။ ဝါယ် အန် တီ အုဝ် ဘော ဝီ တး၊ တဲး အုဝ် ပွိုန် ဒီ ဒွါ ရွိုန် ဒီ ဒူအီ အာမျုဝ် အုဝ်၊ ဘော တဲး အုဝ် လှူ ဒီ ဇဝ်ဖြာ။ 18 ဒေါ အန် တီ အုဝ် ဟဲ့ ဟွတ့် ဘူင် အီ ဒီ တဲး ဒုဝ် ဘူင့် အုဝ် ဆီငါ ဘွတ်။ အုဝ် ဝီ လိုပ် ခဲင် ဟုဝ် ဇဝ်ဖြာ၊ တဝ်း ဒီ လှူ ဒီ ဇဝ်ဖြာ။ ဒေါ ကွယ် အုဝ် ခဲင် ဟုဝ် ဇဝ်ဖြာ၊ ဒူအီ ဂေ နီ မိူဝ် ယိုဝ် အုဝ်။ အုဝ် ယီ တူ မိုဝ်း ဒီ ကွယ် ရိုမ် ဒူပ် ဖိုင် ဒူအီ ကိူန်။ န့ မိူဝ် တူ မိုဝ်း ဆီနန် ဆီနိူင် မာဆေ။ 19 ဂေ ဒူအီ အာယူဒါ အီ တး မိူင် အာဆီယာ မင် အီ၊ ဂေ ဟဲ့ ကာအာပ် တး ဒီ အာတ့် မဲ ဒါ ကာညာ။ ဆေ ဂေ မိုဝ်း ပီ ဒီ ဖျာက် အုဝ်၊ တဲး ဂေ တး ကာလာင်။ 20 ဘော ဂေ ဒူအီ၊ အီ ဟဲ့ ကွယ် ဒီ နီ၊ တဲး ဂေ ကာလာင်၊ မှာပ် မာဆေ န့ မုး ပီ ယိုဝ် ဂေ ဒေါ ကွယ် အုဝ် ဒီ အာတ့် ဒါ တာင် ဂေ။ 21 န့ ယီ မိုဝ်း မီ အူ မျုဝ်၊ ပဲ့ ဟဲ့ ဘူင် အုဝ်။ အုဝ် ဟဲ့ ကာလာင် ဂြုဝ်း တာင် တဝ်း၊ ‘အာတိုဝ် နီ ဘေ တဝ်း၊ အုဝ် မိုဝ်း မှာပ် ကူပ် ညှိုမ် အုဝ် ဂေ ဒူအီ ယမ် ဒီ ဝီ ယိတ့် ဝီ အိမ်။’ ခဲ့ တီ အုဝ် ဟဲ့ ဘူင်။”

22 ဒါ ကာညာ အာ​ဖေလိက် တွိုန်၊ အန် မုး ဒူအီ အီ နပ် ဆီချာ လွင် န့တေန့် ဒီ ဒူပ် ဇဝ် ယေဆူ။ ခုဝ်၊ အန် ဝီ တဲး ဂေ စူ ခဲ့ တီ။ အန် ဝီ တဝ်း ဒီ အာပေါလူ၊ “ဆေ ဘုဝ် တာင် အာလူဆီယ ဟီ တး ဇမ် ဒီ နီ၊ အုဝ် ဒီ ဆုင်ဖျာတ် အာမူ မဲ။” 23 အန် ဘော စ်ု ဘုဝ် အီ အိုပ် ဒါ ဆိုက် အူ မာယဝ်း၊ တဲး အန် ဘ်ု အာပေါလူ ခဲင် ကာပိုမ်၊ ခ့ဝါင် အန် ဘူင် ပီ အိုင် အန်၊ ဘော တူ ခြဲ ဂိုက် အာပေါလူ တး စ်ု ဘော ယွတ် မဲန် အန်။

24 ဝါယ် အန် တီ ဖွုန် ဖန် ဆီငဲ၊ အာ​ဖေလိက် ဘော အီဘိုန့် အန်၊ အီ စိူဝ် နာင် ဒီရူဆီလာ၊ အီ မုး ဒူအီ အာမျုဝ် ယူဒါ၊ ဂါယ် ဝီ တး ဒဲ့ အာပေါလူ။ အာ​ဖေလိက် ဝီ ထူမ် ဂြုဝ်း ပီ ကာလာင် အာပေါလူ ဒီ အန် လွင် လုဝ် ညှိုမ် ဇဝ် ယေဆူ၊ အီ မုး ဒူအီ ပီ ရဝ်း ပီ တိုယ် ဇဝ်ဖြာ တဲး အန် ချွတ် ဒူအီ။ 25 အာပေါလူ ဝီ ကာလာင် လွင် နဝ်း ဆီငါ ဘွတ် ပီ လုဝ် မိုဝ်း အေ။ အန် ဘော ကာလာင် လွင် ပီ ဒီ ပါယ် ဒီ အူတ် နဝ်း။ အန် ဘော ကာလာင် လွင် ဇဝ်ဖြာ ဒီ တး ဒမ် မှာပ် ဒီ ဒူအီ။ ဒေါ အန် တီ အာ​ဖေလိက် တွိုန် ကော ယုဝ် ခဲင် နဝ်း အန်။ ဟဲ့ ဟွတ့်၊ အန် ဝီ တဝ်း၊ “ဒေါ တီ နီ၊ တဲး မဲ စူ ခဲ့ တီ။ အုဝ် ခ့ဝါင် မဲ ဝေန့် ဒူင် ကွယ် မဲ။ ဆေ ဟီ ဆင်ဒုဝ်၊ အုဝ် ဒီ ဒဲ့ မဲ ပေါ အူ ဇေန့်။” 26 အာ​ဖေလိက် တဝ်း ပါယ် တီ၊ ကူပ် ထာင် အန် အာပေါလူ ဒီ တး ဒူင် ကွယ် အန် ဒွါ ရွိုန် ဒီ အန်၊ တဲး အန် ဘ့လေး အာပေါလူ။ ခုဝ်၊ အန် ဝီ ဒဲ့ အာပေါလူ ဘဲန် ဇေန့်၊ ဘဲန် ဇေန့်၊ ဝီ ကာလာင် ဂြုဝ်း ဒီ အန်။

27 ဝါယ် အန် တီ န့ ဘော နုဝ့် အာ ဆီနမ်၊ အာ​ဖေလိက် တွိုန် အာဝ် ဟူ ဘဲန် ဒါ ကာညာ အီ အိုပ် ခဲင် ကာဒါယ် မိူင် တီ။ န့ မိုဝ်း ပေါ အူ ဝီ၊ အီ ဝီ ပ့လု အန်။ အန် စိူဝ် အာဖုဝ်ခီ ဖေထူ။ အာ​ဖေလိက် ယီ ဆီ ဘူင် ပီ အိုင် ဂေ ဒူအီ အာယူဒါ။ ခုဝ်၊ အန် တူ ဘ့လေး အာပေါလူ။ အန် တဲး အာပေါလူ ကွယ် ဟာဝ် ခဲင် ကာပိုမ်။