1 ဝါယ် အန် တီ အာဖေထူ တွိုန် ဟဲ့ ဟွတ့် ဇမ် ခဲင် မိူင် တီ အာဒါ အူယ် ဆီငဲ၊ အန် ဝီ လေး ခဲင် မိူင် ကေဆာရေ ဝီ ဟုဝ့် မိူင် ယေရူဆာလဲမ်။ 2 ခဲင် မိူင် ယေရူဆာလဲမ်၊ န့ ယီ မိုဝ်း ဂေ ဒါ တာင် အီ ယဲတ့် ဂေ ဒူအီ အီ လှူ ဒီ ဇဝ်ဖြာ၊ ဘော ဂေ ဒါ တာင် အီ အိုပ် အိူင် ယူဒါ။ ဂေ ဝီ တး ဒူင် ကွယ် ဒါ ကာညာ ကာမာယ် တီ၊ ဝီ ဖျာက် အာပေါလူ။ ဂေ မှာန့် ဘဲန် ဇေန့် ဘဲန် ဇေန့်၊ တဲး ဒါ ကာညာ ကာမာယ် ဝီ ဘူင် ပီ အိုင် ဂေ။ 3 ဂေ မှာန့်၊ တဲး အန် ဝီ တိုယ် အာပေါလူ တး ဇမ် ခဲင် မိူင် ယေရူဆာလဲမ်။ ဂေ ဟဲ့ ဟွတ့် လာယ် ဆင်ချာင်၊ တဲး ဂေ စ်ု ဒူအီ ဟာယ် ဘ်ု အာပေါလူ၊ တဲး ဂေ ဘ်ု ဒီ ငဝ်း ဝဲန် အန် ဒေါ ဟာဝ် အန် ဒူပ် န့တေန့်။ 4 ဒါ ကာညာ အာဖေထူ ယီ တဝ်း ဒီ ဂေ၊ “အာပေါလူ လုဝ် ကွယ် ခဲင် မိူင် ကေဆာရေ။ အာဝ် လှေန့်၊ ဘော အုဝ် ဒီ ဝီ လူင် မိူင် ကေဆာရေ။ 5 ခုဝ်၊ ဆေ အန် ဟဲ့ ဘူင် နာ တူ မွှိုမ်၊ တဲး ဘေ တိုယ် ဒါ တာင် ဘေ မင် အီ၊ တဲး ဂေ ဟာဝ် ဒူပ် အုဝ်၊ ဝီ ဖျာက် အန်။”

6 အာဖေထူ ယီ ကွယ် မိူင် ယေရူဆာလဲမ် အာဒါ ဒိမ် ဆီငဲ။ ဘော နုဝ့် ဆီငဲ ဂိုဝ်၊ အန် ဝီ လူင် မိူင် ကေဆာရေ။ အန် ဟဲ့ ဟွတ့် ဇမ် မိူင် ကေဆာရေ၊ ပါ ခဲညှာ၊ အန် ဝီ တဝ်း ဒီ ဆုင်ဖျာတ် အာမူ အီ။ အန် ဘော စ်ု ဂေ ဒဲ့ အာပေါလူ တး ဒူင် ကွယ် အန်။ 7 အာပေါလူ ဟဲ့ ဟွတ့် ဇမ်၊ ဂေ ဒူအီ အာယူဒါ၊ အီ ဟဲ့ တး မိူင် ယေရူဆာလဲမ်၊ ဝီ လူင် ဇမ် ဒူင် ကွယ် အာဖေထူ၊ ဂေ ကွယ် ကော ရူပ် အာပေါလူ။ ဂေ ဝီ ဖျာက် အန်၊ ဝီ ကာလာင် ကိူန် နာ တူ မွှိုမ် လွင် အန်။ မာလဲ၊ ဂေ ယီ တူ ပဲ ဒီ ဘျ၊ တဲး အီ နပ်၊ ဂြုဝ်း ဂေ ဟဲ့ မှာန်။

8 ပန် တီ အာပေါလူ ဝီ စုး ဒီ ကာလာင် လွင် ဂြုဝ်း ဂေ တီ၊ အန် တဝ်း၊ “အုဝ် တူ ဘူင် နာ တူ မွှိုမ် မာဆေ။ န့ ဘော မုး ဒါရာ ယူဒါ၊ ဘော မုး ဒေါ ကွယ် အုဝ် ခဲင် ဟုဝ် ဇဝ်ဖြာ၊ ဘော မုး ခုန်ဒီခမ် တာင် အီ အိုပ် ဒူအီ ရုဝ်မာ၊ အုဝ် တူ ဘူင် မာဆေ အီ တူ မွှိုမ် ဒီ ဂေ ဇိုဝ် တီ။”

9 အာဖေထူ တွိုန် ဟဲ့ ဟွတ့် ထူမ် ဂြုဝ်း တီ၊ အန် ဆီ ဘူင် ပီ အိုင် ဂေ ဒူအီ အာယူဒါ။ ခုဝ်၊ အန် ဝီ ဒီမွှတ် အာပေါလူ။ အန် တဝ်း၊ “မဲ ဆီ ဝီ ဟုဝ့် ဇမ် မိူင် ယေရူဆာလဲမ်၊ တဲး အုဝ် ဆုင်ဖျာတ် အာမူ မဲ ခဲင် မိူင် တီ။း”

10 အာပေါလူ ဝီ ဝျီ့ ဂြုဝ်း အန် တဝ်း၊ “ဒေါ တီ နီ၊ အုဝ် ဟဲ့ ဟွတ့် ကွယ် ဒီ အာတ့် ဒါ တာင် အီ ဆုင်ဖျာတ် အာမူ အုဝ်။ ဒါ တာင် တီ၊ အန် မုး ဒူအီ ပီ တိုယ် ခုန်ဒီခမ် တာင် အာကဲဆာ။ ဒူင် ကွယ် အုဝ် နီ၊ အုဝ် လုဝ် ဂေ ဆုင်ဖျာတ် အာမူ အုဝ်။ ဘော မဲ ဟဲ့ နပ် ဆီချာ လွင် တူ ဘူင် အုဝ် နာ တူ မွှိုမ် မာဆေ ဒီ ဒူအီ အာယူဒါ။ 11 ဆေ န့ ယီ မှာန် ပီ တဝ်း ဂေ၊ ဆေ အုဝ် ဟဲ့ ဘူင် အီ တူ မွှိုမ် အီ ကာအာပ် ယမ်၊ အုဝ် တူ တဝ်း၊ အုဝ် တူ ခမ် မှာပ် တီ။ ဆေ ပီ ဖျာက် ဂေ ဒူအီ အာယူဒါ ယီ တူ မှာန်၊ န့ တူ မိုဝ်း အာဆေ အီ ပွိုန် ဒီ အာပ် အုဝ် ဒီ ဂေ။ အုဝ် မှာန့်၊ တဲး ခုန်ဒီခမ် တာင် အာကဲဆာ ဆုင်ဖျာတ် အာမူ အုဝ်။”

12 အာပေါလူ ဟဲ့ ဟွတ့် ကာလာင် ဂြုဝ်း တီ၊ အာဖေထူ တွိုန် ဝီ ဒီမွှတ် ဂေ ဒူအီ အီ ကွယ် ဒူပ် အန်။ ဂေ ဝီ လာယ် ဆင်ချာင်။ ဟဲ့ ဟွတ့်၊ အန် ဝီ တဝ်း ဒီ အာပေါလူ၊ “မဲ ဟဲ့ မှာန့်၊ တဲး ခုန်ဒီခမ် တာင် အာကဲဆာ ဆုင်ဖျာတ် အာမူ မဲ။ ခုဝ်၊ မဲ ဘော လုဝ် ဟာဝ် ဇမ် ဒူင် ကွယ် အန်။”

13 ဝါယ် အန် တီ ဘော နုဝ့် ဖွုန် ဖန် ဆီငဲ၊ န့ မိုဝ်း ခုန်ဒီခမ် အီ စိူဝ် အာဂြိပ်။ ဘော အန်၊ ဘော အီဘိုန့် အန် အီ စိူဝ် နာင် ဘေနိက်၊ ဂါယ် ဝီ တး ဇမ် ဒူင် ကွယ် ဒါ ကာညာ အာဖေထူ တွိုန်၊ တဲး ဂေ လာယ် ရီမာတ်။ 14 ဂါယ် ဘော ကွယ် ရာမ် လှေန့် ခဲင် မိူင် ကေဆာရေ။ ဒေါ အန် တီ အာဖေထူ ဝီ ကာလာင် ဒီ ခုန်ဒီခမ်၊ တဲး အန် နပ် လွင် အာပေါလူ။ အန် တဝ်း၊ “န့ မိုဝ်း ဒူအီ အူ ဝီ၊ အာ​ဖေလိက် တွိုန် ဟဲ့ ခြွင့် အန် ခဲင် ကာပိုမ်။ ကော ဇမ် အာတိုဝ်၊ အန် ဆီ ကွယ် ခဲင် ကာပိုမ်။ 15 ဒေါ ကွယ် အုဝ် ခဲင် မိူင် ယေရူဆာလဲမ်၊ ဂေ ဒါ တာင် အီ ယဲတ့် ဂေ ဒူအီ အီ လှူ ဒီ ဇဝ်ဖြာ ဘော ဂေ ဒါ တာင် အီ အိုပ် ဒူအီ အာယူဒါ၊ ဂေ ဟဲ့ တး ဇမ် ဒူင် ကွယ် အုဝ်၊ ကာလာင် ဂြုဝ်း တူ မွှိုမ် လွင် ဒူအီ တီ။ ဂေ မှာန့် ဒီ အုဝ်၊ တဲး အုဝ် ဒမ် မှာပ် ဒီ အန်။

16 အုဝ် ယီ ဝီ တဝ်း ဒီ ဂေ၊ ဟိတ် ယေ ဒူအီ ရုဝ်မာ အာဝ် မုး ပါယ် တီ။ ယေ ဒူအီ ရုဝ်မာ လုဝ် တဲး ဒူအီ အီ ဖျာက် ဘော ဒူအီ အီ ကာဒုး ဖျာက် ဝီ လာယ် ကာတုန့် ဒီ အာတ့်၊ တဲး ဒူအီ အီ ကာဒုး ဖျာက် ပွိုန် ဒီ ကာလာင် လွင် ပီ ဖျာက် ဂေ၊ ယုဝ် န့ မှာန် တူ မှာန်။ အာတ့် ဘူင် ယေ ပါယ် တီ၊ ယေ တူ ဒမ် မှာပ် ဒီ အာဆေ။ 17 ခုဝ် အန် တီ ဂေ ဘော တး ဒူပ် အုဝ်၊ ဇမ် ဒီ နီ။ အုဝ် တူ ဆီ တဲး ဂေ ဂျာ လှေန့်။ ပါ ခဲညှာ အုဝ် ဝီ တဝ်း ဒီ ထူမ် လွင် အာမူ တီ။ အုဝ် မိူဝ် စ်ု ဒူအီ တွိုန် တး။ 18 ဟဲ့ ဟွတ့်၊ ဂေ ဒူအီ အီ ဖျာက် အန်၊ ဂေ ဝီ ယိတ့် ကာလာင် နာ တူ မွှိုမ် ဒွန် မျုဝ် လွင် အန်။ န့ ယီ တူ မုး နာ တူ မွှိုမ် ပီ ထာင် အုဝ်။ 19 ပီ ကာလာင် ဂေ၊ န့ မုး လွင် ဒါရာ ဂေ၊ ဘော လွင် ပီ တူ လာယ် ဖြူမ် ဂေ လွင် ပီ မာနုဝ် ဒါရာ ဂေ။ န့ ဘော မုး လွင် ဒူအီ အူ ဝီ အီ စိူဝ် အာယေဆူ၊ အန် ဟဲ့ ဟွတ့် ယမ်။ အာပေါလူ ယီ တဝ်း၊ အန် နပ် ဆီချာ လွင် ဒူအီ ဝီ တီ၊ အန် ဟဲ့ ဝီ ယိတ့် ဝီ အိမ်။ 20 အာမူ ဇိုဝ် တီ၊ အုဝ် တူ နပ် မှဝ် ဒီ ပါယ် ဒီ ဆုင်ဖျာတ်။ ခုဝ်၊ အုဝ် ဝီ ဒီမွှတ် ဒူအီ တီ၊ ယုဝ် အန် ဆီ ဟာဝ် မိူင် ယေရူဆာလဲမ်၊ တဲး ဂေ ဆုင်ဖျာတ် အာမူ အန် ခဲင် မိူင် ယေရူဆာလဲမ်။ 21 အာပေါလူ တွိုန် ယီ မှာန့်၊ တဲး အန် ကွယ် ဒီ နီ၊ တဲး ခုန်ဒီခမ် တာင် အာကဲဆာ ဆုင်ဖျာတ် အာမူ အန်။ ဟဲ့ ဟွတ့်၊ အုဝ် စ်ု ဂေ ဝီ ဘ်ု အန်၊ တဲး န့ ကော ဇမ် အာခြာဝ် ဒီ ပွိုန် အုဝ် တိုယ် အန် ဟာဝ် ဇမ် ဒီ အာတ့် ခုန်ဒီခမ် တာင် အာကဲဆာ။”

22 အာဖေထူ ဟဲ့ ဟွတ့် ကာလာင် ဂြုဝ်း တီ၊ ခုန်ဒီခမ် အာဂြိပ် ဝီ တဝ်း၊ “အုဝ် ဆီ ထူမ် အာမူ ဒူအီ တီ။”

အာဖေထူ ဝီ တဝ်း၊ “ခဲညှာ အုဝ် ဒီ တဲး မဲ ထူမ်။”

23 ဘော ဇမ် ပါ ခဲညှာ၊ ခုန်ဒီခမ် အာဂြိပ် ဂါယ် နာင် ဘေနိက်၊ ဂါယ် ဘော တး လိုပ် ခဲင် ဟုဝ် တာင်။ ဂါယ် ဘော စှိုပ် ခြိုင် စှိတ် ကာဆဝ်၊ တဲး ဒွန် အီ အာမ် ဂါယ်။ ဘော ဂေ ဒါ တာင် ခဲင် မိူင်၊ ဘော ဂေ ဘုဝ် တာင် ဟဲ့ တး ဒူပ် ခုန်ဒီခမ် အာဂြိပ်။ ဂေ ဟဲ့ ဟွတ့် တး ကာဇု၊ အာဖေထူ ဝီ စ်ု ဂေ ဒဲ့ အာပေါလူ တး ဇမ် ဒူင် ကွယ် ဂေ။ 24 အာပေါလူ ဟဲ့ ဟွတ့် လိုပ် ခဲင် ဟုဝ် တွိုန်၊ အာဖေထူ ဝီ တဝ်း၊ “အိုယ် မဲ ခုန်ဒီခမ် အာဂြိပ် ဘော ဘေ ဒွန် အီ အီ ကွယ် ရိုမ် ဒူပ် အုဝ် ဒေါ တီ နီ၊ တဲး ဘေ ယွတ် ဒူအီ နီ။ ဂေ ဒူအီ အာယူဒါ အီ ကွယ် ခဲင် မိူင် နီ၊ ဘော ဂေ ဒူအီ အာယူဒါ အီ ကွယ် ခဲင် မိူင် ယေရူဆာလဲမ်၊ ဂေ ဘောကာဂ့လျီတ် ဟဲ့ မှာန့် ဒီ အုဝ်၊ တဲး အုဝ် ဒမ် မှာပ် ဒီ အန်။ ဂေ ဟဲ့ ဒတ် တာင် တဝ်း၊ အန် အာဝ် ဟူ ကာအာပ် ကွယ် ဒဲင် ကာဒါယ်။ 25 အုဝ် ယီ ထာင်၊ အန် တူ ဘူင် မာဆေ အီ ကာအာပ် ငဝ်း ယမ် အန်။ အန် ယီ ဟဲ့ မှာန့်၊ တဲး ခုန်ဒီခမ် တာင် အာကဲဆာ ဆုင်ဖျာတ် အာမူ အန်။ ခုဝ်၊ အုဝ် တဝ်း ဒီ တိုယ် အန် ဇမ် မိူင် ရုဝ်မာ။ 26 အုဝ် ယီ တူ နပ် ဆီချာ၊ မာဆေ ပီ လုဝ် ဒဲမ် အုဝ် ဒီ ခုန်ဒီခမ် တာင် လွင် အန်။ ခုဝ်၊ အုဝ် ဟဲ့ ဒဲ့ အန် တး ဒီ နီ၊ တဲး ဘေ ဒွန် အီ ပွိုန် ဒီ ထူမ် ဂြုဝ်း အန်။ မဲ ခုန်ဒီခမ် အာဂြိပ်၊ အုဝ် ဆီ မှာန့်၊ တဲး မဲ ထူမ် ဆီချာ ဂြုဝ်း အန်။ ဆေ အေ ဟဲ့ ဟွတ့် ထူမ်၊ အုဝ် ဒီ ဘော နပ် မာဆေ ပီ ဒီ လုဝ် ဒဲမ် အုဝ်။ 27 အုဝ် ထာင်၊ ဆေ အုဝ် တိုယ် ဒူအီ အူ ဝီ ဒီ ခုန်ဒီခမ် တာင်၊ အုဝ် ဘော လုဝ် ကာလာင် ဆီချာ လွင် ပီ ဖျာက် အီ ဒီ အန်။ ဆေ အာဝ် မိုဝ်း ဒီခုဝ်၊ အာဝ် လုဝ် တိုယ် အန်။”