ဝါယ် အန် တီ ခုန်ဒီခမ် အာဂြိပ် ဝီ တဝ်း ဒီ အာပေါလူ၊ “ယေ ခ့ဝါင် မဲ ကာလာင် ဂြုဝ်း လွင် အာမူ မဲ။”

အန် ဟဲ့ ဟွတ့် ကာလာင် ပါယ် တီ၊ အာပေါလူ ဝီ စုဝ့် ဒဲ အန်၊ ဝီ စုး ဒီ ကာလာင် ဂြုဝ်း။ 2 အန် တဝ်း၊ “အိုယ် မဲ ခုန်ဒီခမ် အာဂြိပ်၊ နဝ်း အုဝ် ဟဲ့ ဒါခိုယ်။ အာတိုဝ် အုဝ် ဟဲ့ ပွိုန် ဒီ ကာလာင် ဂြုဝ်း ဒီ မဲ လွင် ဘဲန် မျုဝ် ဘဲန် မျုဝ် ပီ ဖျာက် ဂေ ဒူအီ အာယူဒါ ဒီ အုဝ်။ ဂေ ကာလာင် နာ တူ မွှိုမ် ဒွန် မျုဝ် လွင် အုဝ်။ 3 အုဝ် ဟဲ့ နပ်၊ မဲ မုး ဒါ တာင် အူ ဝီ၊ အီ နပ် ဆီချာ လွင် ဟိတ် ဒူအီ အာယူဒါ ဒွန် မျုဝ်။ ဘော ပီ မာနုဝ် ဂေ ဒွန် မျုဝ် မဲ ဟဲ့ နပ် ဆီချာ။ ခုဝ်၊ အုဝ် မှာန့်၊ တဲး မဲ ထူမ် ဂြုဝ်း အုဝ်၊ တဲး န့ ကော ဟွတ့်။

4 န့ ပါယ် နီ။ ဂေ ဒူအီ အာယူဒါ၊ ဂေ ဘောကာဂ့လျီတ် ဟဲ့ နပ် လွင် အာဆာက် အုဝ်။ အူ ဆိန့် ဒီတဲတ် အုဝ် ဘော ခဲင် မိူင် ဘြိမ် အုဝ် ဘော ခဲင် မိူင် ယေရူဆာလဲမ်၊ အုဝ် ဟဲ့ ကွယ် ကာတဲ ဂေ ဒူအီ အာမျုဝ် အေ။ 5 ဆေ ဂေ ဆီ ကာလာင် လွင် အုဝ်၊ ဂေ ဟဲ့ နပ် ဒီ ကာလာင်။ အုဝ် ဟဲ့ မုး ဒူအီ ဖိုင် ဖာရီဆဲ ဆိန့် ဒေါ ဂွိုတ် အုဝ်။ ဖိုင် ဖာရီဆဲ တီ၊ ဂေ ဒူပ် တူတ့် ဒါရာ ယူဒါ ဒွန် မျုဝ်။ 6 အာတိုဝ် နီ၊ အုဝ် ဟဲ့ ကွယ် ဒီ အာတ့် ဘေ၊ တဲး ဘေ ဒါ တာင် ဆုင်ဖျာတ် အာမူ အုဝ်။ လွင် ဒါင် အန်၊ န့ မုး ကူပ် နှဝ့် န့ဒဝ့် အုဝ် ဇဝ်ဖြာ ဒီ ဒွါ ကာဒိက် ဆတ်ဇာ ပီ ဒွိုမ် ဒွါ အန် ဒီ ဂုန့် ဒါ အေ၊ အီ ဟဲ့ ကွယ် ဒီ အာတ့် အေ။ 7 ဂေ ခြိုဝ် ဂိုဝ် ဒီ အာ မျုဝ် ခဲင် ဒူအီ အာမျုဝ် အေ၊ ဂေ ဘောကာဂ့လျီတ် နှဝ့် န့ဒဝ့် ဇဝ်ဖြာ ဒီ ဒွါ ကာဒိက် ဆတ်ဇာ ဇိုဝ် တီ ဒီ ဂေ။ ကူပ် ညှိုမ် ဂေ ပါယ် တီ၊ ဂေ ဘော ဂျုဝ်ဂျာ ဒီ ဘူင် ပီ အိုင် ဇဝ်ဖြာ ဒွင် ဝန် ဒွင် ခိူန်။ မဲ ခုန်ဒီခမ်၊ အုဝ် ကာလာင် ဒီ မဲ၊ ကူပ် နှဝ့် န့ဒဝ့် အုဝ် ဇိုဝ် တီ၊ ဂေ ဒူအီ အာယူဒါ ဟဲ့ ဖျာက် အုဝ်။ 8 ဆေ ဇဝ်ဖြာ ဟဲ့ တဲး ဒူအီ ယမ် ဝီ အိမ်၊ မှဝ် န့ ပါယ် ပီ တဝ်း ဘေ၊ န့ တူ မှာန်၊ ဒူအီ ယမ် တူ ပွိုန် ဝီ အိမ်။

9 အာတ့် နီ၊ အုဝ် မိူဝ် ဟဲ့ ဒွိုမ် ထာင်၊ အုဝ် လုဝ် ဘူင် ဒွန် မျုဝ် ခဲ့ ပီ ပွိုန် အုဝ် ဘူင်၊ တဲး န့ ဘဲန် နာ တူ မွှိုမ် ဒီ ဇဝ် ယေဆူ အီ တး မိူင် နာဆာရေတ့် တွိုန်။ 10 ပါယ် တီ အုဝ် ဟဲ့ ဒွိုမ် ဘူင် ခဲင် မိူင် ယေရူဆာလဲမ်။ ဂေ ဒါ တာင် အီ ယဲတ့် ဂေ ဒူအီ အီ လှူ ဒီ ဇဝ်ဖြာ၊ ဂေ ဟဲ့ ခ့ဝါင် တဲး အုဝ် မှေတ့် ဒူအီ အီ ညှိုမ် ဇဝ် ယေဆူ။ ဟဲ့ ဟွတ့် အုဝ် မိူဝ် ဟဲ့ မှေတ့် ကိူန် ဂေ၊ ခြွင့် ဂေ ခဲင် ကာပိုမ်။ ဒေါ ယမ် ဂေ ဒူအီ အီ ညှိုမ် ဇဝ် ယေဆူ တီ၊ ဘော အုဝ် ဟဲ့ ဖြူမ် ပီ ဘူင် ဂေ ဘော တဝ်း၊ ဟဲ့ မုး ဟဲ့ မှာန်။ 11 ဘဲန် ဇေန့် ဘဲန် ဇေန့်၊ အုဝ် ဟဲ့ ဟာဝ် လိုပ် ခဲင် ဇူင် ကြိုပ် ဂေ ဒူအီ အာယူဒါ၊ ဝီ တဲး တမ် ဒီ ဂေ ဒူအီ အီ ညှိုမ် ဇဝ် ယေဆူ။ ဟဲ့ ဟွတ့် အုဝ် ဝီ ကာဆုး ဂေ၊ တဲး ဂေ ကာလာင် ဂြုဝ်း အီ ခဲန့် ဇဝ်ဖြာ။ အုဝ် ယီ ရူ ကာဆဝ် ဒီ ဂေ။ န့ တဲး အုဝ် ကော ဟာဝ် ဇမ် ဘော ခဲင် မိူင် ဟဝ်၊ ဝီ ဘူင် တဲး န့ ဒုက် ဒီ ဂေ။

12 အူ ဆီငဲ၊ အုဝ် ဝီ ဟာဝ် ဒီ မိူင် ဒါမာခူ။ ဂေ ဒါ တာင် အီ ယဲတ့် ဂေ ဒူအီ အီ လှူ ဒီ ဇဝ်ဖြာ၊ ဂေ ဟဲ့ ခ့ဝါင် အုဝ် ဟာဝ်၊ ဒွါ ပွုန် ဂေ ဒီ အုဝ်။ 13 န့ ဘော ဇမ် ကာတဲ ဆီငဲ၊ ဒေါ ဟာဝ် အုဝ် ဒူပ် န့တေန့်၊ အုဝ် ဘော ယိုဝ် ဘ့လာင် အီ တး ဂါင်ဟြာဝ် အူ ဇေန့်။ ဘ့လာင် တီ ယီ ဘ့လာင် တာင် လွှိုမ် ဘ့လာင် ဆီငဲ။ ဘ့လာင် တီ ဟဲ့ တး လူင်၊ လဲပ် အုဝ် ဘော ဂေ ဒူအီ အီ ဟာဝ် ရိုမ် ဒူပ် အုဝ်။ 14 ယေ ဘောကာဂ့လျီတ် ဝီ ဂိုပ် ဒဲင် ကာဒါယ် အူ ဇေန့်။ အုဝ် မိူဝ် ဟဲ့ ယိုဝ် ဂြုဝ်း ဟဲဘြဲ။ န့ တဝ်း၊ ‘အိုယ်၊ အာဆောလူ၊ မှဝ် န့ ပါယ် ပီ ဘူင် မဲ နာ တူ မွှိုမ် ဒီ အုဝ်။း ပီ ဘူင် မဲ၊ န့ ညှာပ် ဒီ မဲ။ န့ ပီ မာ မက် အီ တူ ဒူပ် ဝန် မုး၊ ဝီ တဲး န့ ဆဝ် ဒီ အန်။’ 15 ဟဲ့ ဟွတ့် ထူမ် ဂြုဝ်း တီ၊ အုဝ် ဝီ တဝ်း၊ ‘မဲ ဇဝ်၊ မဲ မုး အာဆေ။း’ အန် ဝီ တဝ်း၊ ‘အုဝ် မုး ဇဝ် ယေဆူ ဝီ ပီ ဘူင် မဲ နာ တူ မွှိုမ်။ 16 ဒေါ တီ နီ၊ တဲး မဲ ယိတ့် စွင့်။ အုဝ် ဟဲ့ တး ဒီ မဲ၊ တဲး မဲ ပွိုန် ဒီ ယိုဝ် အုဝ်။ ခုဝ်၊ အုဝ် ဒီ စ်ု မဲ ဝီ ကာလာင် ဒီ အီ ဟဝ် လွင် ပဲ့ ဟဲ့ ယိုဝ် မဲ လွင် အုဝ်၊ တဲး မဲ ဘော ကာလာင် လွင် ပီ ဒီ ဘျ အုဝ် ဒီ မဲ။ အုဝ် ဒီ တဲး မဲ ဘဲန် မှာယ် အုဝ်။ 17 အုဝ် မိူဝ် ဒီ ချွတ် မဲ၊ ကွဲ့ တဲး ဂေ ဒူအီ အာမျုဝ် မဲ ဘော ဂေ ဒူအီ အာမျုဝ် ဟဝ် ဘူင် နာ စာဝ် ဒီ မဲ။ အုဝ် ဘော တိုယ် မဲ၊ တဲး မဲ ဟာဝ် ဒူင် ကွယ် ဂေ ဒူအီ အာမျုဝ် ဟဝ်၊ 18 တဲး မဲ စွယ် ဂေ၊ န့ ပီ တဲး ငါယ် ဂေ ဘ့လာင်၊ တဲး န့ ပီ ဂေ လေး ခဲင် အပ် ဝွင့်၊ ဝီ လိုပ် ခဲင် ဘ့လာင်၊ ကွဲ့ တဲး ဘုဝ် ကာနမ် အီ စိူဝ် ဆာတာန် ဝီ ပွိုန် ဒီ အိုပ် ဂေ၊ တဲး ဇဝ်ဖြာ ဝီ အိုပ် ဂေ ဘော ဘ့လွာ့ ဝဲန် မှာပ် ဂေ၊ တဲး အန် ဝီ ဒွါ ဂေ ကွယ် ရိုမ် ဒူပ် ဂေ ဒူအီ အီ မိုဝ်း နဝ်း ဆီငါ ဘွတ် ကူပ် ညှိုမ် ဂေ ဇဝ်ဖြာ။’

19 မဲ ခုန်ဒီခမ် အာဂြိပ်၊ ဒေါ ဟဲ့ ယိုဝ် အုဝ် ဂြုဝ်း တီ၊ အုဝ် ဘော ထူမ် ဒူပ် ပီ ယိုဝ် အုဝ် ဒေါ ဘျ ဇဝ်ဖြာ အာရူင် ဒီ အုဝ် အီ မုး အာရူင် အီ တး လူင် ခဲင် ဂါင်ဟြာဝ်။ 20 အုဝ် စုး ဒီ ကာလာင် ဒီ ဒူအီ တဲး ဂေ လှုဝ်း ဝဲန် မှာပ် ဂေ၊ ဝီ ဒူပ် ဇဝ်ဖြာ။ ဘော ပီ ဘူင် ဂေ ဒွန် မျုဝ်၊ န့ လုဝ် ဘျ ဒီ အီ လွင် ဂေ ဟဲ့ ဘျွင် နဝ်း။ အုဝ် စုး ဒီ ဟုဝ် ဒါရာ ပါယ် တီ ခဲင် မိူင် ဒါမာခူ တွိုန်။ ဟဲ့ ဟွတ့် အုဝ် ဝီ ဟာဝ် ကာလာင် ခဲင် မိူင် ယေရူဆာလဲမ် ဘော ခဲင် အိူင် ယူဒါ ဘော မိူင်။ ဟဲ့ ဟွတ့်၊ အုဝ် ဝီ ဟာဝ် ဘော ဒူင် ကွယ် ဂေ ဒူအီ အာမျုဝ် ဟဝ်။ 21 ကူပ် ကာလာင် အုဝ် ဇိုဝ် တီ ဒွန် နာ ဒွန် ပ့လုဝ့်၊ ဂေ ဒူအီ အာယူဒါ ဝီ မှေတ့် အုဝ် ဒေါ ကွယ် အုဝ် ခဲင် ဟုဝ် ဇဝ်ဖြာ။ ဂေ ဘော တဝ်း ဒီ ငဝ်း ယမ် အုဝ်။ 22 ကော ဇမ် အာတိုဝ် ဇဝ်ဖြာ ယီ စွယ် အုဝ်၊ တဲး အုဝ် ဇမ် ဒူင် ကွယ် မဲ နီ၊ တဲး အုဝ် ဝီ ပွိုန် ဒီ ကာလာင် လွင် ဇဝ် ယေဆူ ဒီ ဂေ ဒါ တာင် ဘော ဒီ ဂေ ဒူအီ ရဝ် ဒူအီ ကာင်။ ပီ ကာလာင် အုဝ် တီ၊ န့ မုး ခဲ့ ပီ ကာလာင် ဂေ ဒူအီ အီ ဘျာန် ဂြုဝ်း ဇဝ်ဖြာ ဘော ဒါ ဆာရာ အာမုဝ်ဆဲ တွိုန်။ န့ မုး ပီ ကာလာင် အုန် ဂေ လွင် အီ ဒီ ဘဲန် နာ အာတ့် ဟာဝ်။ 23 ဂေ ဟဲ့ ဒွိုမ် တဝ်း လွင် ဒူအီ ပီ ရဝ်း ပီ တိုယ် ဇဝ်ဖြာ တဲး အန် ချွတ် ဒူအီ၊ အန် လုဝ် ခမ် ဒုက် ကော ယမ်။ ဟဲ့ ဟွတ့်၊ အန် ဒီ ဝီ ယိတ့် ဝီ အိမ်။ ပါယ် တီ အန် ဒီ ယဲတ့် ဒီ အာတ့် ဒူအီ ဒွန် အီ။ ဟဲ့ ဟွတ့်၊ အန် ဒီ ဝီ ဟုဝ် ဒါရာ ဇဝ်ဖြာ၊ တဲး န့ ဝီ ဘ့လာင် ခဲင် နဝ်း ဒူအီ အာယူဒါ ဘော ခဲင် နဝ်း ဒူအီ အာမျုဝ် ဟဝ်။ ပါယ် တီ ဘော အုဝ် ဟဲ့ ကာလာင် ဒီ အီ ဟဝ်။”

24 အာပေါလူ ဟဲ့ ဟွတ့် ကာလာင် ခဲ့ တီ လွင် ပဲ့ ဟဲ့ ဘူင် အန်၊ ဒါ ကာညာ အာဖေထူ တွိုန်၊ ဝီ ကာလာင် တာင် တဝ်း၊ “အိုယ် မဲ အာပေါလူ၊ မဲ ဟဲ့ ရိုဝ်။ မဲ ဟဲ့ မိုဝ်း အာငျာန် ကိူန်။ န့ တဲး မဲ ကော ဝီ ရိုဝ်။”

25 အာပေါလူ ဝီ တဝ်း၊ “အာဝ် မုး၊ မဲ ဒါ ကာညာ၊ အုဝ် တူ ရိုဝ်။ ဂြုဝ်း ပီ ကာလာင် အုဝ်၊ န့ မှာန်၊ ဟဲ့ မိုဝ်း ဒီလွင် ဒီဒါင် အန်။ 26 ဘော ခုန်ဒီခမ် နီ၊ အန် ဟဲ့ နပ် လွင် အန် တီ ဒွန် မျုဝ်။ ခုဝ်၊ နဝ်း အုဝ် ဟဲ့ ဒါခိုယ် ကူပ် ဟဲ့ ပွိုန် အုဝ် ဒီ ကာလာင် ဂြုဝ်း ဆိူဝ် ဒီ အန်။ အုဝ် မိူဝ် ဟဲ့ နပ်၊ န့ တူ မိုဝ်း မာဆေ လွင် အန် တီ ပီ တူ နပ် ခုန်ဒီခမ်။ ပီ ကာလာင် အုဝ် တီ၊ ဇဝ်ဖြာ တူ ချြီင် ဒီ အာဆေ။ ဒွန် အီ ဟဲ့ ပွိုန် ယိုဝ်။ 27 မဲ ခုန်ဒီခမ် အာဂြိပ်၊ မဲ ညှိုမ် ဂြုဝ်း ပီ ဒွိုမ် ကာလာင် ဂေ ဒါ တာင် အီ ဘျာန် ဂြုဝ်း ဇဝ်ဖြာ တွိုန်။း အုဝ် ဟဲ့ နပ်၊ မဲ ဟဲ့ ညှိုမ်။”

28 အာပေါလူ ဟဲ့ ဟွတ့် ကာလာင် ဂြုဝ်း တီ၊ ခုန်ဒီခမ် အာဂြိပ် ဝီ တဝ်း ဒီ အာပေါလူ၊ “အာဝ် ဘော လှေန့် ဘော အုဝ် ဒီ ဘော ညှိုမ် ဇဝ် ယေဆူ ကူပ် ဟဲ့ ကာဆုး မဲ ဒီ အုဝ်။”

29 အာပေါလူ ဝီ တဝ်း၊ “ယုဝ် န့ ဒီ လှေန့်၊ တူ လှေန့်၊ အုဝ် ဆာခိုဝ် ဇဝ်ဖြာ၊ တဲး ဘေ ဒွန် အီ ဝီ ဘဲန် ပီ အုဝ်။ ဘော မဲ ဘော ဘေ ဒွန် အီ၊ အီ ထူမ် ဂြုဝ်း ပီ ကာလာင် အုဝ် အာတိုဝ် နီ၊ အုဝ် ဆီ တဲး ဘေ ဘဲန် ပီ အုဝ်။ န့ ယီ မုး မီ ဝန် ဟိန် အူ မျုဝ် နီ၊ အုဝ် တူ ဆီ တဲး ဘေ မိုဝ်း။”

30 ဟဲ့ ဟွတ့် ပန် တီ ခုန်ဒီခမ် ဝီ ယိတ့်။ ဘော ဒါ ကာညာ အာ​ဖေလိက် ဘော နာင် ဘေနိက်၊ ဘော ဂေ ဒွန် အီ အီ ကွယ် ရိုမ် ဒူပ် ဂေ၊ ဂေ ဘောကာဂ့လျီတ် ဝီ ယိတ့် ဝီ လေး ဒူင် ကွယ် ဂေ တီ။ 31 ဝါယ် လေး ဂေ ခဲင် ဟုဝ် တွိုန်၊ ဂေ ဝီ လာယ် ကာမွုန် တဝ်း၊ “ဒူအီ တီ၊ အန် တူ မိုဝ်း ဒီ ဘူင် အီ တူ မွှိုမ် မာဆေ။ အာဝ် ကာအာပ် အန် ကွယ် ခဲင် ကာပိုမ်။ အာဝ် ကာအာပ် အန် ယမ်။”

32 ခုန်ဒီခမ် အာဂြိပ် ဝီ တဝ်း ဒီ အာဖေထူ၊ “ဒူအီ နီ၊ ဆေ အန် တူ မှာန့်၊ တဲး ခုန်ဒီခမ် အာကဲဆာ ဆုင်ဖျာတ် အာမူ အန်၊ မဲ ဟဲ့ ပွိုန် ဘ့လေး တဲး အန် လေး ခဲင် ကာပိုမ်။”