1 ဝါယ် အန် တီ ဒါ ကာညာ ရုဝ်မာ ဝီ တဝ်း ဒီ တိုယ် ယေ ဟာဝ် ဇမ် ခဲင် မိူင် အီတာလီ။ ဂေ ဝီ ဒဲ့ အာပေါလူ ဘော ဂေ အီ ဟဝ် မင် အီ အီ ကွယ် ခဲင် ကာပိုမ်၊ ဝီ အာပ် ဂေ ဒီ ဘုဝ် အီ အိုပ် ဒါ ဆိုက် ပေါ အူ ဝီ၊ တဲး အန် ဝီ ဘ်ု ဂေ။ ဘုဝ် တီ မုး ဘုဝ် အီ အိုပ် ဒါ ဆိုက် အူ မာယဝ်း။ အန် စိူဝ် အာယူလီ။ ဒါ ဆိုက် ပီ အိုပ် အန်၊ ကွယ် ခဲင် ဒပ် အီ စိူဝ် ဒပ် ခုန်ဒီခမ် တာင်။ 2 ပန် တီ ယေ ဝီ လိုပ် ခဲင် ရိုဝ် ဆင်ဖုဝ် အီ တး မိူင် အာရာမုတ်။ အန် ဒီ ဟာဝ် ချ ဘဲန် ပ့လုဝ့် ဘဲန် ပ့လုဝ့် ခဲင် အိူင် အာဆီယာ တွိုန်။ န့ ဘော မိုဝ်း ဒူအီ အူ ဝီ အီ စိူဝ် အာရီထာခူ၊ အီ တး မိူင် ထေဆာလူန် အီ ကွယ် ခဲင် အိူင် မာခေဒူန်။ ဘော အန် ဟဲ့ ကွယ် ရိုမ် ဒူပ် ယေ။

3 ယေ ဟဲ့ ဟွတ့် ပဝ့် ရိုဝ် ဆင်ဖုဝ်၊ ပါ ခဲညှာ၊ ယေ ဝီ ချ ခဲင် မိူင် ဆီဒူန်။ ဘုဝ် အာယူလီ တွိုန်၊ အန် မိုဝ်း နဝ်း မွှိုမ်။ အန် ခ့ဝါင် အာပေါလူ၊ တဲး အန် ပွိုန် လေး တ ရိုဝ် ဆင်ဖုဝ် ဟာဝ် ဒူင် ကွယ် ဂိုက် အန် ခဲင် မိူင် တီ၊ တဲး ဂေ ဝီ ပွိုန် ဒီ ယွတ် မဲန် အန် ဘော ဒွါ ခဲ့ ပီ လုဝ် အန်။ 4 ဟဲ့ ဟွတ့်၊ ယေ ဝီ ပဝ့် ရိုဝ် ဆင်ဖုဝ်၊ ဟာဝ် ဘ့လာက် နာ ကွာ ဂုန် အိုမ် အီ စိူဝ် ခူဖြုဝ်။ ကူပ် ဟဲ့ ဘုတ် ဒွက် ခုန် ဒီ ရိုဝ် ယေ၊ ယေ ဘော လုဝ် ဝီ ပဝ့် ဟာဝ် ဘ့လာက် တီ။ 5 ပန် တီ ယေ ဝီ ဟာဝ် ကာလုဝ်း အိုမ် တာင်၊ ဟာဝ် ဒီ ခူပ် အိူင် ခီလီခီ ဂါယ် မိူင် ဖမ်ဖူလီ။ ယေ ဘော ဟာဝ် ချ မိူင် မူရာ၊ အီ ကွယ် ခဲင် အိူင် လူခီ။ 6 ခဲင် မိူင် မူရာ တီ၊ ဘုဝ် တွိုန် ဝီ ယိုဝ် ရိုဝ် ဆင်ဖုဝ် ပေါ အူ လှာင်၊ အီ တး မိူင် အာလေဆန်ဒါရေန် ဝီ ဟာဝ် မိူင် အီတာလီ။ အန် ဝီ တဲး ယေ ဟာဝ် ပဝ့် ရိုဝ် ဆင်ဖုဝ် တီ။ 7 ဒေါ ကွယ် ယေ ခဲင် ရိုဝ် ဆင်ဖုဝ် တီ၊ ယေ ဝီ ကြဲ ဒီ ပဝ့် ဟာဝ် ဘဲန် ဆီငဲ ဘဲန် ဆီငဲ။ န့ ယီ ညှာပ် ဒီ တဲး ယေ ဟာဝ် ဇမ် နာ ရေတ့် မိူင် ခါနီဒူ။ ပန် တီ ခုန် ဝီ တာ ဘုတ် ကာဆဝ် ရိုဝ်၊ တူ တဲး ယေ ပွိုန် ဒီ ဟာဝ် နာ ဆီ ဟာဝ် ယေ။ ခုဝ်၊ ယေ ဝီ ဝဝ့် ဒီ ခူပ် ဂုန် အိုမ် အီ စိူဝ် ကြေထာ၊ ဝီ ဇမ် ကာတတ် မိူင် ဆာလူမ်။ 8 ဝါယ် အန် တီ ယေ ဝီ ပဝ့် ဟာဝ် ဒီ ခူပ် ဂုန် အိုမ် တွိုန်။ န့ ယီ ညှာပ် ကာဆဝ်။ ဟဲ့ ဟွတ့် ယေ ဝီ ဇမ် အူ ပ့လုဝ့် အီ စိူဝ် ဒူင် ချ ဒါခိုယ် ရိုဝ် ဆင်ဖုဝ်။ ဒူင် တီ ကွယ် ကာတတ် မိူင် လာဆဲ။

9 ဒေါ အန် တီ ယေ ဟဲ့ ပဝ့် ရိုဝ် ဟဲ့ လှေန့် ကာဆဝ်။ ဆီငဲ ယိူန် ပီ ဒီ ဟူမ်^a မိူဝ် ဟဲ့ ဟွတ့် ပွုန်။ အာခြာဝ် ဒီ ပွိုန် ပဝ့် ရိုဝ် ဆင်ဖုဝ် မိူဝ် ဟဲ့ ရိန် ဒီ တူတ့်။ ဆေ ယေ ဒီ ဟာဝ် ကာပွါ၊ န့ မွှိုမ် ယုဝ် ကာဆဝ်။ 10 ခုဝ် အန် တီ အာပေါလူ ဝီ ကာလာင် ဒီ ဒူအီ အီ အိုပ် ရိုဝ် တဝ်း၊ “ဆေ ဘေ ဒီ ဟာဝ် ပေါ န့ ပွါ၊ အုဝ် ဟဲ့ နပ် ဒီ အာတ့်၊ အေ ဒီ ကာဒုး ဒုက် တာင်။ ဘော ရိုဝ် ဆင်ဖုဝ် ဘော ကြုဝ် ပီ ဒါင် ဘေ ခဲင် ရိုဝ်၊ န့ ဒီ စှိုမ်။ အေ ဒွန် အီ၊ အီ ပဝ့် ရိုဝ် ဆင်ဖုဝ် နီ၊ အေ ဘောကာဂ့လျီတ် ဒီ ဇမ် ဒုက် တာင်။ လုဝ် ယုဝ် ဘော အာဆာက် အေ ဒီ စှိုမ်။” 11 န့ ယီ မုး ဒါ ဘုဝ် တွိုန်၊ အန် တူ ထူမ် ဂြုဝ်း အာပေါလူ။ အန် ဝီ ထူမ် ဂြုဝ်း ဒါ အီ အိုပ် ရိုဝ် ဘော ဒါ ကာညာ ရိုဝ် ဆင်ဖုဝ်၊ တဝ်း ဒီ ဘူင် ပီ ထာင် ဂါယ်။ 12 ဒူင် ချ ဂေ ရိုဝ် ဆင်ဖုဝ် ဒေါ အန် တီ န့ တူ မွှိုမ်။ န့ တူ ဆီချာ ဒီ ကွယ် နှဝ့် ဒေါ အာခြာဝ် ဂတ် ဂျီတ်။ ခုဝ်၊ ဂေ ဒူအီ ကိူန် ဂေ တဝ်း ဒီ ဟာဝ်၊ ထေဝ် ဒီ ပဝ့် တဲး ကော ဇမ် မိူင် ဖုဝ်နိက်၊ တဲး ဂေ ပွိုန် ဒီ ကွယ် နှဝ့် ဒေါ အာခြာဝ် ဂတ် ဂျီတ် ခဲင် မိူင် တီ။ မိူင် ဖုဝ်နိက် တီ မိုဝ်း ဒူင် ချ ရိုဝ် ဆင်ဖုဝ် အီ မ့ဘ့လး ဒိန့် ဒီ ကာတဲ ဘ့လာက် နာ တေတ့် ဂါယ် နာ ဂေတ့် ဆီငဲ ဘော ဒီ ကာတဲ ဘ့လာက် နာ ကွာ ဂါယ် နာ ဂေတ့် ဆီငဲ။ ဒူင် တီ မုး ခဲင် ဂုန် အိုမ် အီ စိူဝ် မိူင် ကြေထာ။

13 ဒေါ အန် တီ န့ မိုဝ်း ဟိုတ့် တး နာ တေတ့်၊ တး ဘုတ် ဒါခိုယ်။ ခုဝ်၊ ဂေ တဝ်း၊ ဂေ ဒီ ပွိုန် ဟာဝ် ဆီချာ။ ဂေ ဝီ စုဝ့် ဟုဝ့် ဟိန် အီ ဒိုက် ဒီ ကာဒမ် အိုမ်၊ တဲး ရိုဝ် ဆင်ဖုဝ် ဝီ ပွိုန် ဟာဝ်။ ဟဲ့ ဟွတ့်၊ ဂေ ဝီ ပဝ့် ဟာဝ် ဒီ ခူပ် မိူင် ကြေထာ။ 14 အာဝ် ဒန် လှေန့်၊ န့ ယီ မိုဝ်း ခုန် တာင် တး ဘုတ် ဒီယုး ရိုဝ် ဆင်ဖုဝ်။ ခုန် တီ၊ အန် စိူဝ် “ခုန် တး နာ ကွာ ဂါယ် နာ လေး ဆီငဲ။” 15 ခုန် တီ ဝီ ဘုတ် ကာဆဝ် ရိုဝ် ဆင်ဖုဝ်၊ တူ တဲး ရိုဝ် ပွိုန် ဒီ ဟာဝ် ဒူပ် နာ လုဝ် ဟာဝ် အန်။ ဟဲ့ ဟွတ့်၊ အာဝ် ဟူ ပွိုန် ဘတ်။ ယေ လုဝ် ဘ့လေး ရိုဝ် ဆင်ဖုဝ်၊ တဲး အန် ဟာဝ် နာ ဘုတ် ခုန်။ 16 ဒေါ ကာလုဝ်း ပွုန် ယေ ဂုန် ဒီတဲတ်၊ အီ စိူဝ် ခေါဒါ၊ ယေ ဝီ ထေဝ် ဒီ ပက် ဆီချာ ရိုဝ် ဒီတဲတ် အီ ဒူပ် ဒီ ပန် ရိုဝ် တာင်၊ ကွဲ့ တဲး အန် ဘျုဝ်း။ ယီ တူ ပွိုန်။ 17 ဟဲ့ ဟွတ့်၊ ဂေ ဝီ ဒိူတ် ရိုဝ် ဒီတဲတ် ဟုဝ့် နာ ဒဲင်၊ ဝီ ဘ့လေး အုန် ခဲင် ရိုဝ် တာင်။ ဂေ ဝီ ဒိုဝ်း ဝန် တာင်၊ ဝီ ပက် ရူပ် နာ ရေတ့် ရိုဝ် ဆင်ဖုဝ်၊ ကွဲ့ တဲး န့ ကာပျာတ့်။ ဂေ ဘော ယုဝ် ကာဒမ် ရိုဝ် ဒီ ဒုး န့ ပိုမ် ကာဟာတ့် ကာတဲ အိုမ်။ ဒူင် ပီ ယုဝ် ဂေ တီ၊ န့ စိူဝ် ဆူထေ။ ကူပ် ယုဝ် ဂေ မ့ပိုမ် ကာဟာတ့် တီ၊ ဂေ ဝီ ဘျွာ ဟိန် တာင်၊ တဲး ရိုဝ် ဝီ ကြဲ။ ဟဲ့ ဟွတ့် ဂေ ဝီ တဲး ရိုဝ် ဆင်ဖုဝ် ဟာဝ် နာ ဘုတ် ဟာဝ် ခုန်။ 18 ပါ ခဲညှာ ခုန် ဟဲ့ ဘုတ် ဂ့လူဂ့လာက် ကာဆဝ် ရိုဝ် ဆင်ဖုဝ်။ ခုဝ်၊ ဂေ ဝီ စုး ဒီ ဘျွာ ဝဲန် ကြုဝ်ကြာမ် ပီ ဒါင် ဂေ ခဲင် ရိုဝ်၊ 19 ဘော ဇမ် ဆီငဲ ဟာအူယ်၊ ဂေ ဝီ ဒိုဝ်း လေး ဘော ရွင့် ဘော ဘိက် တာင်၊ ဝီ ဘျွာ ဝဲန် ခဲင် အိုမ်။ 20 ဟဲ့ ဟွတ့်၊ ဘဲန် ဆီငဲ ဘဲန် ဆီငဲ၊ ယေ တူ ပွိုန် ယိုဝ် ဘ့လာင် ဆီငဲ ဘော ဘ့လာင် မာဂျီန်။ န့ အပ် ဝွင့်။ ခုန် တာင် ယီ ဘုတ် ဒီယုး ကာဆဝ်၊ အာဝ် ယေန် ဒေါ မှဝ်။ ဒေါ အန် တီ ယေ ဒွန် အီ ဘဲန် နဝ်း ဒီတဲတ်၊ တူ ဝီ နှဝ့် န့ဒဝ့် နှဝ့် န့လှုဝ်း မာဆေ။ ယေ ထာင် အာဝ် ဟူ မိုဝ်း မာဆေ အီ ပဲ ဒီ ချွတ် ယေ။

21 န့ ယီ ဟဲ့ လှေန့်၊ ဂေ ဒွန် အီ တူ ဟူမ် မာဆေ။ ခုဝ်၊ အာပေါလူ ဝီ ယိတ့်၊ တဲး ဒွန် အီ ယိုဝ် အန်။ အန် တဝ်း၊ “အိုယ် ဘေ ဒွန် အီ၊ ခါ အာတ့် အုဝ် ဟဲ့ ဟွတ့် တဝ်း ဒီ ဘေ၊ တဲး ဘေ ကွယ် မိူင် ကြေထာ တွိုန်။ ဆေ ဘေ ထူမ် ဂြုဝ်း အုဝ် ဒေါ အန် တီ ဘေ တူ ဝီ လုဝ် ခမ် ဒုက် ဒေါ တီ နီ။ ဘေ မိူဝ် တူ လုဝ် စှိုမ် ခဲ့ နီ။ 22 ဒေါ တီ နီ အုဝ် ယီ တဝ်း ဒီ ဘေ၊ တဲး ဘေ မိုဝ်း နဝ်း ပ့လူမ်။ န့ တူ မိုဝ်း ခေါ အူ ဝီ၊ အီ ဒီ စှိုမ် အာဆာက် အန်။ မီ ရိုဝ် ဆင်ဖုဝ် နီ အီ ဒီ စှိုမ်။ 23 ဟူ မွိုန် ဇဝ်ဖြာ အီ မုး ဇဝ်ဖြာ ပီ ကြိုပ် အုဝ်၊ အန် ဟဲ့ တိုယ် အာမူ အာမာတ် အန် အူ ကာဒင် တး ဇမ် ဒီ ခူပ် အုဝ်။ 24 အာမူ အာမာတ် ဇဝ်ဖြာ တီ၊ အန် ဟဲ့ တဝ်း၊ ‘မဲ အာပေါလူ၊ ကွဲ့ ယုဝ်။ မဲ လုဝ် ဟာဝ် ဇမ် ဒီ အာတ့် ခုန်ဒီခမ် အာကဲဆာ၊ တဲး အန် ဆုင်ဖျာတ် အာမူ မဲ။ ဇဝ်ဖြာ မိူဝ် ဟဲ့ ကာဝေ ဂေ ဒူအီ အီ ဟာဝ် ရိုမ် ဒူပ် မဲ။ အန် ဟဲ့ ဒွါ ပီ မှာန့် မဲ၊ တူ တဲး အာဆာက် ဂေ စှိုမ်။’ 25 ခုဝ် အန် တီ ကွဲ့ တဲး ဘေ မိုဝ်း နဝ်း ယုဝ်။ အုဝ် ညှိုမ် ဇဝ်ဖြာ ဒီ ဘူင် တူတ့် ဒွန် မျုဝ်၊ တဲး န့ ဘဲန် ပီ ပီ ဒွိုမ် ကာလာင် အန် ဒီ အုဝ်။ 26 အေ ယီ ဒီ ဇမ် ဒီ ခူပ် ဂုန် အိုမ်။ ဟဲ့ ဟွတ့် ရိုဝ် ဆင်ဖုဝ် အေ ဒီ ဟာ ဒုး ကာဒါယ်။”

27 န့ ဘော နုဝ့် ဂိုဝ် ဒီ ဖွုန် ဆီငဲ။ ခုန် တာင် ယီ ဆီ နဲ့ ဘုတ် ဟာဝ် ရိုဝ် ဆင်ဖုဝ်၊ အာဝ် ပွိုန် ဘတ်။ ဒူင် တး ဇမ် ယေ၊ န့ စိူဝ် အိုမ် တာင် အာဒါရီ။ ဒေါ အန် တီ ခဲင် မှိုဝ် ကာတဲ ဆွိုမ်၊ ဂေ ဒူအီ အီ လိုမ်လာ ရိုဝ် ဆင်ဖုဝ် ဂေ ထာင်၊ ဂေ ဟဲ့ တး ဇမ် ချြီ့ ကာဒါယ်။ 28 ခုဝ်၊ ဂေ ဝီ ဘျွာ မင် ဂဝ် အိုမ်၊ တဲး ဂေ နပ် ခဲ့ လိုက် အန်။ အိုမ် ဆီ လိုက် ဒါ ဂိုဝ် ကာနိး။ ဝါယ် အန် တီ အာဝ် လှေန့်၊ ဂေ ဝီ ဂဝ် အိုမ် ပေါ အူ ဇေန့်။ ဟဲ့ ဂိတ် ဖွုန် ဂိုဝ် ဒီ ဖန် ကာနိး။ 29 ဒေါ အန် တီ ဂေ ဝီ ယုဝ်၊ ဂေ ဒီ တး ဒုး ဒီ မာဝ် တာင် အီ ကွယ် ခဲင် အိုမ်။ ခုဝ်၊ ဂေ ဝီ ဒိုဝ်း ဟိန် ဘော ဖွုန် ဘူင့်၊ ဝီ ဘျွာ လူင် ခဲင် အိုမ် နာ ဆီပူင့် ရိုဝ် ဆင်ဖုဝ်။ ဟဲ့ ဟွတ့် ဂေ ဝီ ဆာခိုဝ် တဲး ပြဲ ဝး။ 30 န့ ယီ မုး ဂေ ဒူအီ အီ လိုမ်လာ ရိုဝ် ဆင်ဖုဝ်၊ ဂေ ဆီ ပြာ ဒီ လေး ခဲင် ရိုဝ် ဆင်ဖုဝ်။ ဂေ ညိုင်ရာင် ဒီ ဘျွာ ဟိန် နာ ဂိန့် ရိုဝ် ဆင်ဖုဝ်။ မာလဲ၊ ဂေ ယီ ထေဝ် ဒီ ဘျွာ လူင် ရိုဝ် ဒီတဲတ်၊ တဲး ဂေ ပွိုန် ဒီ တဝ်။ 31 အာပေါလူ ယီ ဟာဝ် ကာလာင် ဂြုဝ်း ဒီ ဘုဝ် အီ အိုပ် ဒါ ဆိုက် အူ မာယဝ်း ဘော ဒီ ဂေ ဒါ ဆိုက်။ အန် တဝ်း၊ “ဆေ ဒူအီ အီ လိုမ်လာ ရိုဝ် ဆင်ဖုဝ် နီ တူ ကွယ် ခဲင် ရိုဝ်၊ ဘေ ဒွန် အီ ဒီ စှိုမ် အာဆာက် ဘေ။” 32 အန် ဟဲ့ ဟွတ့် ကာလာင် ဂြုဝ်း တီ၊ ဂေ ဒါ ဆိုက် ဝီ ဒဲပ် ဝန် ပီ ပက် ဂေ ဒီ ရိုဝ် ဒီတဲတ် တွိုန်၊ တဲး န့ စုဝ်း ဟြာယ် ခဲင် အိုမ်။

33 ပန် တီ အာတ့် ဝး ပြဲ၊ အာပေါလူ ဝီ ကာဆုး ဂေ ဒွန် အီ၊ တဲး ဂေ ဝီ ဟူမ် အီ စဲက်။ အန် ဝီ တဝ်း၊ “ဘေ တူ ဟူမ် မာဆေ အာဒါ ဂိုဝ် ဒီ ဖွုန် ဆီငဲ။ ဘေ ဟဲ့ ဘ်ု ဆေဆေ ဘော ယိူန် ပီ ဒီ ဟူမ်။ 34 ဒေါ တီ နီ၊ အုဝ် တဝ်း၊ တဲး ဘေ ဟူမ်။ ဘေ လုဝ် ဟူမ်၊ တဲး ဘေ မိုဝ်း ပ့လူမ်၊ ကွဲ့ တဲး ဘေ စှိုမ်။ ဘေ ဒွန် အီ၊ အီ ကွယ် ခဲင် ရိုဝ် ဆင်ဖုဝ် နီ၊ ဟိုက် ဂိန့် ဘေ အူ ညွင့် မိူဝ် တူ စှိုမ်။” 35 အာပေါလူ ဟဲ့ ဟွတ့် ကာလာင် ဂြုဝ်း တီ၊ အန် ဝီ ဒိုဝ်း ခါမုန်၊ ဝီ ဆာခိုဝ် ဒါင် ဂုင် ဂေဇူ ဒီ ဇဝ်ဖြာ၊ တဲး ဂေ ဘောကာဂ့လျီတ် ပွိုန် ဒီ ယိုဝ်။ ဟဲ့ ဟွတ့်၊ အန် ဝီ ကာဘက် ခါမုန် တီ၊ ဝီ စုး ဒီ ဟူမ်၊ တဲး ဂေ ယွတ်။ 36 ပန် တီ ဂေ ဒွန် အီ အာဝ် ဟူ မိုဝ်း နဝ်း ယုဝ်။ ဘော ဂေ ဝီ ဟူမ်။ 37 ဒူအီ အီ ကွယ် ခဲင် ရိုဝ် ဆင်ဖုဝ် တီ၊ ယေ ကွယ် အာ မာယဝ်း ဒီ ဘူ ဂိုဝ် ဒီ ဒဝ် ဝီ။ 38 ဂေ ဒွန် အီ ဟဲ့ ဟွတ့် ဟူမ် ခါမုန် ခဲ့ ပီ လုဝ် ဂေ၊ ဂေ ဝီ ဝဲန် တူတ့် ငှုဝ် ပီ ဒါင် ဂေ ခဲင် ရိုဝ် ဆင်ဖုဝ်၊ တဲး န့ ဝီ န့ စိုဝ်။

39 ပြဲ ဘော ဝီ ဘ့လာင်၊ ဂေ အာဝ် ဟူ ဝီ နပ် ဒူင် ဟဲ့ တး ဇမ် ဂေ။ ဂေ ယီ ယိုဝ်၊ န့ မိုဝ်း ဒီ ကာတုဝ့် အိုမ် အူ ပ့လုဝ့်။ ဒီ ဘာင် အိုမ် ဘော မိုဝ်း ကာဟာတ့်။ ခုဝ်၊ ဂေ တဝ်း၊ ဆေ န့ ပွိုန်၊ ဂေ ဒီ တဲး ရိုဝ် ဆင်ဖုဝ် ဒုး ကာဒါယ် ဒီ တီ။ 40 ခုဝ်၊ ဂေ ဝီ ဒဲပ် ဝဲန် ဝန် တာင် ပီ ပက် ဂေ ဒီ ဟိန်။ ဂေ ဘော ဒဲပ် ဝဲန် ဝန် ပီ ပက် ဂေ ဒီ မင် ဘတ် ရိုဝ် ဆင်ဖုဝ်။ ဟဲ့ ဟွတ့် ဂေ ဝီ ဘ့လေး ဘိက် ဒီတဲတ် ဒီ ဂိန့် ရိုဝ် ဆင်ဖုဝ်၊ တဲး ခုန် ဝီ ဘုတ် ဟာဝ် ရိုဝ်။ ပါယ် တီ ရိုဝ် ဆင်ဖုဝ် ဝီ ဟာဝ် ဆိူဝ် ဒီ ဘာင် အိုမ်။ 41 ရိုဝ် ဆင်ဖုဝ် ဘော ဝီ ဟာ ဒုး မ့ပိုမ် ကာဟာတ့် အီ ကွယ် ခဲင် အိုမ်။ ဂိန့် ရိုဝ် ဘော ဟဝ့် ခဲင် ကာဟာတ့်၊ အာဝ် ဟူ ပွိုန် ရ်ု။ မာ အိုမ် တာင် ယီ ဇုး ကာဆဝ် ဆီပူင့် ရိုဝ်၊ တဲး န့ ကော ကာလာတ့် ကာပျာတ့် လိုဝ် တူတ့်။

42 ဂေ ဒါ ဆိုက် ယီ ယုဝ် ဒူအီ ပီ လုဝ် ဘ်ု ဂေ ဒီ ဝါယ် အိုမ် တဝ်။ ခုဝ်၊ ဂေ တဝ်း ဒီ ငဝ်း ယမ် ဒွန် အီ။ 43 အီ မုး ဘုဝ် အီ အိုပ် အူ မာယဝ်း တွိုန်၊ အန် ဆီ ချွတ် အာပေါလူ။ ခုဝ်၊ အန် ဝီ ခြဲ ဂေ ဒါ ဆိုက်၊ ကွဲ့ တဲး ဂေ ပွိုန် ဒီ ဘူင် ပီ ခြာမ် ဂေ။ အန် ယီ ဝီ စ်ု ဂေ၊ အာဆေ နပ် ဒီ ဝါယ် အိုမ်၊ တဲး အန် ဒဲန် ဘျွာ ခဲင် အိုမ် ဒီ အာတ့်၊ တဲး အန် ဝါယ် ဇမ် ဒီ ဘာင် အိုမ်။ 44 ပန် တီ အန် စ်ု ဂေ ဒူအီ အီ ကွယ် ဒီ ပန် ဝီ ဒိုဝ်း ဘဲန် ဘော ဒူန့် ရိုဝ် အီ ဟဲ့ ကာပျာတ့် တွိုန်၊ ကွဲ့ တဲး ဂေ စေတ့် ခဲင် အိုမ်၊ တဲး ဂေ ဇမ် ဘာင် အိုမ်။ ပါယ် တီ၊ ခဲ့ ကွယ် ဂေ အီ ပဝ့် ရိုဝ် ဆင်ဖုဝ် တီ၊ ဂေ ဘောကာဂ့လျီတ် ပွိုန် ဒီ လေး ဇမ် တူတ့် ဒီ ဘာင် အိုမ်။ အာဝ် မိုဝ်း အီ ယမ် ခေါ အူ ဝီ။