1 ယေ ဘောကာဂ့လျီတ် ဟဲ့ ဟွတ့် ဇမ် ဆီချာ ဘာင် အိုမ်၊ ယေ ဘော နပ်၊ ကာဒါယ် ဂုန် အိုမ် တီ၊ န့ စိူဝ် မေလီထေ။ 2 ဂေ ဒူအီ အီ ကွယ် ဒီ တီ၊ ဂေ ယီ နပ် ဒီ ကာဝေ ယေ ဘော လိုမ်လာ ယေ။ ကူပ် ဟဲ့ ဂ့လာယ် ဘော ဟဲ့ ဂတ် ဂျီတ်၊ ဂေ ဝီ ဘုတ် ငဝ်၊ ဝီ ဒဲ့ ယေ ဘောကာဂ့လျီတ် တး ဝါတ် ငဝ်။ 3 အာပေါလူ ဝီ ဂြူပ် ဟေ ဟာ ဒုဝ့် ခဲင် ငဝ်။ ငဝ် ဘော ဒဝ့် ဒီ ဟေ တီ၊ န့ ဝီ မိုဝ်း ဟန့် ငျီန် ဝီ လေး ခဲင် ဟေ တီ၊ ဝီ ဇုဝ့် ဘော ဒိုက် ဒီ ဒဲ အန်။ 4 ဂေ ဒူအီ ဘော ယိုဝ် ဟန့် ဟဲ့ ဒိုက် ဒီ ဒဲ အာပေါလူ၊ ဂေ ဝီ လာယ် တဝ်း ကာတဲ ဂေ၊ “ဟဲ့ မုး ဟဲ့ မှာန်၊ ဒူအီ နီ မုး ဒူအီ ဟာယ်။ အန် ဟဲ့ ဒွိုမ် ငဝ်း အာဆာက် အီ။ အန် ဟဲ့ လွတ် ယမ် ခဲင် အိုမ်။ ဒေါ တီ နီ နာင် ကာနမ် အီ ဆုင်ဖျာတ် ဒွန် မျုဝ် တူ ဝီ တဲး အန် လွတ် ယမ်။” 5 အာပေါလူ ယီ ဟြတ် ဒဲ အန်၊ တဲး ဟန့် ငျီန် ဝီ စုဝ်း ခဲင် ငဝ်။ အန် ယီ တူ ပါယ် မှဝ်။ 6 ဂေ ဒူအီ ယီ ဘ်ု ဒီ ယွတ်၊ ယုဝ် န့ ဒီ အဝ်း၊ ယုဝ် အန် ဒီ ကေး ယမ် အူ ဇေန့်။ ဂေ ယီ နှဝ့် လှေန့်၊ တူ ယိုဝ် မာဆေ။ ပန် တီ ဂေ ဝီ ကာဘ့လျီ့ ဂြုဝ်း၊ ဝီ တဝ်း၊ အန် မုး ဇဝ်ဖြာ။

7 ဒူင် ကွယ် ယေ တီ၊ န့ မိုဝ်း ဒူအီ ခြမ် အူ ဝီ၊ အန် စိူဝ် အာဖူဘောလီ။ အန် ဘော မုး ဒါ တာင် ဒဲင် ဂုန် အိုမ် တီ။ မာန် မိူင် တီ ဘော မုး မာန် မိူင် အန်။ ဒူအီ တီ၊ အန် ဝီ ဘာင် ယေ တး တမ် ကာင် အန်၊ အာဒါ အူယ် ဆီငဲ အန် ဟျီင် ယေ ဟူမ်၊ တဲး ယေ ကွယ် ခဲင် ကာင် အန်။ 8 န့ ယီ မိုဝ်း ဂုန့် ဒါ တာင် တီ၊ အန် အိတ် ဒဲင် ဒူင် အိတ် အန် ကူပ် ဟဲ့ ဆဝ် ဝတ့် အန်၊ ဒုဝ် အန် မိူဝ် ဟဲ့ ဒါတ်။ အာပေါလူ ဝီ ဟာဝ် ဒူင် ကွယ် အန်၊ ဝီ ဆာခိုဝ်၊ ဒါင် ဒဲ အန် ဒဲင် ဂိန့် ဒူအီ တီ။ ဟဲ့ ဟွတ့် ဆာခိုဝ်၊ အန် ဝီ ကဲန်။ 9 ဝါယ် အန် တီ ဂေ ဒူအီ ဆဝ် ဘောကာဂ့လျီတ် အီ ကွယ် ဒီ တီ၊ ဝီ တး ဒူင် ကွယ် ယေ။ ဘော ဂေ ဝီ ကဲန် တူတ့် ဒွန် အီ။ 10 ခုဝ်၊ ဂေ ဘောကာဂ့လျီတ် ရုဝ်ဆေ ယေ ဘော စွယ် ယေ ဘဲန် မျုဝ် ဘဲန် မျုဝ်။ ဘော ဇမ် အာခြာဝ် လုဝ် ဝီ ဟာဝ် ယေ၊ ဂေ ဝီ ဒွါ တူတ့် ဒွန် မျုဝ် ပီ လုဝ် ယေ။

11 ယေ ဟဲ့ ကွယ် ခဲင် မိူင် မေလီထေ တီ အာဒါ အူယ် မာဂျီန်။ ဟဲ့ ဟွတ့် ပန် တီ ယေ ဝီ လုဝ် ပဝ့် ရိုဝ် ဆင်ဖုဝ် ပေါ အူ လှာင်။ ရိုဝ် ဆင်ဖုဝ် တီ ဟဲ့ ကွယ် နှဝ့် ခဲင် မိူင် တီ ဒေါ အာခြာဝ် ဂတ် ဂျီတ်။ မိူင် ဘြိမ် ရိုဝ် တီ မုး မိူင် အာလေဆန်ဒါရေန်။ ဒီ ဂိန့် ရိုဝ် တီ၊ န့ မိုဝ်း အာရိုပ် ကာနမ် အီ မုး ဂွန် ရာပ်။ 12 ယေ ဝီ ပဝ့် ရိုဝ် ဆင်ဖုဝ် တီ၊ ဟာဝ် ဇမ် မိူင် ဆူရာခူ၊ ဝီ ကွယ် ခဲင် မိူင် တီ အာဒါ အူယ် ဆီငဲ။ 13 ဟဲ့ ဟွတ့် ပန် တီ ယေ ဝီ ပဝ့် ဟာဝ် ဇမ် မိူင် ရေဂီအူန်။ ပါ ခဲညှာ ခုန် ယီ တး နာ တေတ့်။ ပေါ အူ ဆီငဲ၊ ယေ ဝီ ဟာဝ် ဇမ် မိူင် ဖူထုဝ်လီ။ 14 ခဲင် မိူင် ဖူထုဝ်လီ တီ၊ ယေ ဝီ ကာတုန့် ဂေ ဘီနွင် မင် အီ။ ဂေ ဝီ ဘာင် ယေ ကွယ် ရိုမ် ဒူပ် ဂေ အာဒါ ဘူ ဆီငဲ။ ဝါယ် အန် တီ ယေ ဘော ဝီ ဟာဝ် မိူင် ရုဝ်မာ။ 15 န့ ယီ မိုဝ်း ဂေ ဘီနွင် အီ ကွယ် ခဲင် မိူင် ရုဝ်မာ၊ ဂေ ဘော နပ် လွင် ဟဲ့ တး ယေ၊ ဟဲ့ ဟာဝ် ယေ ဒူပ် န့တေန့်၊ ဂေ ဝီ တး ရွုး ယေ၊ ဝီ လာယ် ကာတုန့် ဒီ ယေ ဒူင် ကွယ် ကာလး အီ စိူဝ် အာဖီ။ ဒူင် တီ၊ အန် စိူဝ် ဘော အူယ် ဇေရူပ်။ အာပေါလူ ယီ ယိုဝ် ဂေ ဘီနွင်၊ န့ တဲး အန် ဝီ မိုဝ်း နဝ်း ပ့လူမ်။ အန် ဝီ ကာလာင် ဂုင် ဂေဇူ ဒီ ဇဝ်ဖြာ။ 16 ဝါယ် ဟဲ့ ဇမ် ယေ ခဲင် မိူင် ရုဝ်မာ၊ ဂေ ဝီ ခ့ဝါင် အာပေါလူ၊ တဲး အန် ပွိုန် ဒီ ခါတ် ဒီ ကွယ် ခဲင် ကာင် ပီ အိုင် အန်။ န့ ယီ မိုဝ်း ဒါ ဆိုက် အူ ဝီ၊ အီ လုဝ် ဘ်ု အာပေါလူ ဘော ကွယ် ရိုမ် ဒူပ် အန်။

17 ဝါယ် အန် တီ အူယ် ဆီငဲ၊ အာပေါလူ ဝီ ဒဲ့ ဂေ ဒါ တာင် ယူဒါ အီ ကွယ် ခဲင် မိူင် ရုဝ်မာ၊ တဲး ဂေ တး ဒူင် ကွယ် အန်။ အန် ဝီ ကာလာင် ဂြုဝ်း ဒီ ဂေ။ အန် တဝ်း၊ “အိုယ် ဘေ ဘီနွင် အုဝ်။ အုဝ် တူ ဘူင် မာဆေ နာ တူ မွှိုမ် ဒီ ဂေ ဒါ တာင် အာမျုဝ် အေ။ ဘော မုး ဟိတ် အာမျုဝ် အေ၊ ဘော မုး ဂုန့် ဒင် အေ အီ ကွယ် ခါ အာတ့် အုဝ် တူ ဒွိုမ် ဘူင် မာဆေ အီ တူ မွှိုမ် ဒီ ဂေ။ ဂေ ယီ ဟဲ့ မှေတ့် အုဝ် ခဲင် မိူင် ယေရူဆာလဲမ်၊ ဝီ အာပ် အုဝ် ဒီ ဒူအီ ရုဝ်မာ။ 18 ဂေ ဒူအီ ရုဝ်မာ တီ ဟဲ့ ဝီ ဒီမွှတ် အုဝ်၊ ဝီ တဝ်း ဒီ ဘ့လေး အုဝ်၊ ကူပ် တူ ယိုဝ် ဂေ မှာပ် အီ ကာအာပ် ငဝ်း ယမ် အုဝ်။ 19 ဂေ ဒူအီ အာယူဒါ ယီ တူ အိုင် ပီ ဆုင်ဖျာတ် ဂေ ဒါ တာင် ရုဝ်မာ တီ။ ခုဝ်၊ အုဝ် ဟဲ့ ဝီ မှာန့်၊ တဲး ခုန်ဒီခမ် အာကဲဆာ ဝီ ဆုင်ဖျာတ် အာမူ အုဝ်။ ပီ မှာန့် အုဝ် တီ၊ အာဝ် မုး ကူပ် ဆီ ဖျာက် အုဝ် ဂေ ဒူအီ အာယူဒါ ဒီ အာတ့် ခုန်ဒီခမ် အာကဲဆာ။ 20 ခုဝ်၊ အုဝ် ဟဲ့ ဒဲ့ ဘေ၊ တဲး ဘေ တး ဒီ နီ၊ တဲး အုဝ် ပွိုန် ဒီ ကာလာင် ဂြုဝ်း ဒီ ဘေ။ ဂေ ဟဲ့ ပက် ဝန် ဟိန် ဒီ ဒဲ အုဝ် ကူပ် ဟဲ့ နှဝ့် န့ဒဝ့် အုဝ် ပီ ပီ နှဝ့် န့ဒဝ့် ဂေ ဒူအီ အီဆာရေလ ဒွန် အီ။”

21 ဂေ ဒါ တာင် တွိုန်၊ ဂေ ဝီ တဝ်း၊ “ဂေ ဒူအီ အီ ကွယ် ခဲင် အိူင် ယူဒါ၊ ဂေ တူ ဒွိုမ် ဒဲမ် ပဲ့ ဒီ ယေ လွင် အာမူ မဲ။ န့ မိူဝ် တူ မိုဝ်း ဘီနွင် အီ ဟဲ့ တး အိူင် ယူဒါ၊ အီ ဟဲ့ ကာလာင် အီ တူ မွှိုမ် လွင် မဲ။ 22 ယေ ယီ ဆီ ထူမ် ဂြုဝ်း မဲ၊ တဲး ယေ နပ် မာဆေ န့ မုး အာငျာန် မဲ။ ယေ ဟဲ့ နပ်၊ ဂေ ဒူအီ ဒွန် နာ ဒွန် ပ့လုဝ့် ဝီ ကာလာင် နာ တူ မွှိုမ် လွင် ဖိုင် မဲ။ ခုဝ်၊ ယေ ဆီ ထူမ် ဂြုဝ်း မဲ။”

23 ဝါယ် အန် တီ ဂေ လာယ် ဖြူမ် ဒီ ဝီ တး ပေါ အူ ဆီငဲ၊ တဲး ဂေ တး ထူမ်။ ဒေါ ဇမ် ဆီငဲ အန် တီ၊ ဂေ ကိူန် ဝီ တး ဒူင် ကွယ် အာပေါလူ။ အာပေါလူ ယီ စုး ဒီ ကာလာင် ဂြုဝ်း ဒီ ဂေ အူ ဆိန့် ဆိန့်ဝး ကော ဇမ် ခဲင် မှိုဝ်။ အန် ဝီ မာနုဝ် ဆီချာ ဂေ လွင် အာခြာဝ် ဒီ အိုပ် ဇဝ်ဖြာ ကာဒါယ်။ အန် မိူဝ် ထေဝ် ဒီ ကာလာင်၊ တဲး န့ လိုဝ်း ဒီ ဂေ လွင် ဇဝ် ယေဆူ။ ဘော မုး ဘပ် လွင် အာမုဝ်ဆဲ၊ ဘော မုး ဘပ် ပီ ဒဲမ် ဂေ ဒူအီ အီ ဘျာန် ဂြုဝ်း ဇဝ်ဖြာ၊ အာပေါလူ ဘျ ဒီ ဂေ ခဲ့ ပီ ဒဲမ် အုန် လွင် ဇဝ် ယေဆူ ခဲင် ဘပ် ဂေ တီ။ 24 န့ ယီ မိုဝ်း ဒူအီ မင် အီ၊ ဂေ ယီ နပ် ခဲင် နဝ်း ဂေ၊ ဂြုဝ်း အာပေါလူ ဟဲ့ မှာန်။ န့ ဘော မိုဝ်း ဘဲန် ဝီ ဘဲန် ဝီ၊ အီ တူ ညှိုမ် လွင် အန် တီ။ 25 ဂေ ဒူအီ အီ တူ ညှိုမ်၊ ဂေ တူ ဝီ လာယ် ဖြူမ် ကာတဲ ဂေ။ အာပေါလူ ဟဲ့ တဝ်း၊ “နဝ်း ဖွိုမ် ဇဝ်ဖြာ ဟဲ့ ကာလာင် ဂြုဝ်း မှာန် ဒီ ဂုန့် ဒင် ဘေ။ အန် ဟဲ့ ဒွိုမ် စ်ု အာအီဆာယ အီ မုး ဒူအီ အီ ဘျာန် ဂြုဝ်း ဇဝ်ဖြာ၊ တဲး အန် ကာလာင် ဒီ ဂေ တဝ်း၊ 26 ‘တဲး မဲ ဟာဝ် ကာလာင် ဂြုဝ်း ဒီ ဒူအီ အာမျုဝ် နီ။ မဲ လုဝ် တဝ်း၊ “တဲး ဘေ ထူမ် ဆေဆေ၊ ယီ တူ တဲး န့ လိုပ် ခဲင် နဝ်း ဘေ။ တဲး ဘေ ဘော ယွတ် ဆေဆေ၊ ယီ တူ တဲး ဘေ ယိုဝ် မာဆေ။” 27 ခုဝ်၊ နဝ်း ဂေ ဒူအီ ဇိုဝ် တီ ဟဲ့ ဒိူဝ်၊ အာဝ် ဟူ နပ် ဒီ ဘျွင်။ ဟျုဝ့် ဂေ မိူဝ် ဟဲ့ ကာအာဝ်၊ တူ နပ် ဒီ ထူမ်။ ဂေ ဘော ကာဘိတ် ငါယ် ဂေ၊ တူ တဲး ဂေ ယိုဝ် မာဆေ။ ဆေ ဂေ တူ ဘူင် ပါယ် တီ၊ န့ ဒီ ဘော လိုဝ်း ဆီချာ ဒီ ငါယ် ဂေ။ ဂေ ဒီ ဘော ပွိုန် ဒီ ထူမ်၊ တဲး န့ ဆီဘြုဝ်း ဒီ ဟျုဝ့် ဂေ။ ဟဲ့ ဟွတ့်၊ န့ ဒီ ဘော လိုပ် ခဲင် နဝ်း ဂေ၊ တဲး ဂေ ဘော ပွိုန် ဒီ ဘျွင် နဝ်း ဂေ။ ဆေ ဂေ ဘူင် ပါယ် တီ၊ အုဝ် ဒီ ဘော တဲး ဂေ ဝီ ကဲန်။’”

28 ဟဲ့ ဟွတ့် အာပေါလူ ဝီ တဝ်း ဒီ ဂေ၊ “အုဝ် ဆီ တဲး ဘေ နပ်၊ ဇဝ်ဖြာ ဟဲ့ ဆီ ချွတ် ဘော ဂေ ဒူအီ အာမျုဝ် ဟဝ်။ ဂေ ဒီ ထူမ် ဒူပ် ဂြုဝ်း ဇဝ်ဖြာ လွင် ဇဝ် ယေဆူ ချွတ် ဂေ။” 29 အာပေါလူ ဟဲ့ ဟွတ့် ကာလာင် ဂြုဝ်း တီ၊ ဂေ ဝီ စုး ဒီ လေး ဒူင် ကွယ် အန်၊ ဝီ လာယ် ကာထဲန့် ကူပ် ဂြုဝ်း အန်။

30 အာပေါလူ ဝီ ကွယ် ခဲင် ကာင် ပီ ခါတ် အန် ခဲင် မိူင် ရုဝ်မာ တွိုန် ကော နုဝ့် အာ ဆီနမ်။ အန် မိူဝ် ဘာင် ဂေ ဒွန် အီ၊ တဲး ဂေ တး ဝိန် ဒီ အန်။ 31 အန် ဝီ ကာလာင် ဒီ ဂေ လွင် ဇဝ်ဖြာ ဒီ အိုပ် ကာဒါယ်။ အန် ဘော မာနုဝ် ဆီချာ လွင် ဇဝ် ယေဆူ မုး ဒူအီ ပီ ရဝ်း ပီ တိုယ် ဇဝ်ဖြာ တဲး အန် ချွတ် ဒူအီ။ အန် ဝီ ကာလာင် ဆိူဝ် ဂြုဝ်း တီ ဒွန် မျုဝ်။ န့ မိူဝ် တူ မိုဝ်း အာဆေ အီ ခြဲ အန် မာနုဝ် ပါယ် တီ။