1 ဝါယ် အန် တီ ဇဝ် ယေဆူ ဝီ ကာပ့လုး ဒီ ဒီဘဲ အန် ဒေါ ကွယ် ဂေ ဒီ ခူပ် အိုမ် ဒိုင် အီ စိူဝ် အိုမ် ထီဘေရီ။ န့ ပါယ် နီ။

2 န့ မိုဝ်း အာဆီမူန်၊ အီ စိူဝ် ဘော အာပေတာရူ ဘော အာထုဝ်မာတ်၊ အီ စိူဝ် ဘော အာဒီဒါမာတ်၊ ဘော အာနာထာနေလ အီ တး မိူင် ခါနာ၊ အီ ကွယ် ခဲင် အိူင် ဂါလီလေ၊ ဘော ဂွန် အာဇေဘေဒေ အာ ဝီ တွိုန်၊ ဘော ဒီဘဲ ဇဝ် ယေဆူ အာ ဝီ၊ ဂေ မိူဝ် ဟဲ့ ကွယ် ရိုမ်။ 3 ဒေါ အန် တီ အာပေတာရူ ဝီ တဝ်း ဒီ ဂေ၊ “အုဝ် ဒီ ဟာဝ် မှေတ့် ဂါ။” ဂေ ဝီ တဝ်း၊ “ယေ ဒီ ဟာဝ် ဒူပ် မဲ။” ပန် တီ ဂေ ဝီ လေး ခဲင် ကာင် ဒူင် ကွယ် ဂေ၊ ဝီ ဟာဝ် လိုပ် ခဲင် ရိုဝ်။ ခဲင် မှိုဝ် တီ၊ ဂေ ယီ တူ ပွိုန် မာဆေ။

4 ဆိန့်ဝး စေဝ်၊ ဇဝ် ယေဆူ ကွယ် ဒီ ခူပ် ဘာင် အိုမ်။ ဂေ ဒီဘဲ အန် ယီ တူ နပ်၊ န့ မုး အန်။

5 အန် ယီ ဒဲ့ ဂေ တဝ်း၊ “အိုယ်၊ ဂိုက် အုဝ်၊ ဘေ တူ မိုဝ်း ဒီ ပွိုန် မာဂါ။း” ဂေ ဝီ တဝ်း၊ “အာဝ် ပွိုန်။”

6 ပန် တီ အန် ဝီ တဝ်း၊ “တဲး ဘေ ဘျွာ န့ရပ် ဘေ ဘ့လာက် အာအး ရိုဝ် ဘေ။ ဘေ ဒီ ဘော ပွိုန် မာဂါ မင် ဒုဝ်။” ဂေ ဘော ဘူင် ပါယ် တီ၊ ဘော မိုဝ်း မာဂါ ကိူန် ကာဆဝ် လိုပ် ခဲင် န့ရပ် ဂေ။ ဂေ ကော ဟူ ပဲ ဒီ ဒိူတ် န့ရပ် တဲး မာဂါ လိုပ် ခဲင် ရိုဝ်။

7 ဒေါ အန် တီ န့ မုး ဒီဘဲ ပီ ရွက့် ဇဝ် ယေဆူ တွိုန်။ အန် ဝီ တဝ်း ဒီ အာပေတာရူ၊ “န့ မုး အန် ဇဝ်။” အာပေတာရူ ကော နပ်၊ န့ မုး အန် ဇဝ်၊ အန် ဝီ ဒိုဝ်း ဆီတုဝ် တာင် အန် ပီ ဘုတ့် အုန် အန် ခါ အာတ့် ဝီ စှိုပ်၊ ဘော ဒဲန် လိုပ် ခဲင် အိုမ်။ 8 ဂေ ဒီဘဲ အီ ဆီ ကွယ် ခဲင် ရိုဝ်၊ ဂေ ဝီ ပဝ့် ရိုဝ်၊ ဒူပ် အာပေတာရူ။ ဂေ ဘော လာက် ဘော န့ရပ် ဂေ၊ အီ မိုဝ်း မာဂါ နုဝ့် နာ ခဲင်။ ကူပ် ကွယ် ဂေ ကာတတ် ဘာင် အိုမ်၊ အာဝ် ဟူ ကာတူင့် ကာဘက် အာ မာယဝ်း ကာနိး။ 9 ဒေါ ဇမ် ဂေ ဒီ ခူပ် ဘာင် အိုမ် တွိုန်၊ ဂေ ဝီ ယိုဝ်၊ န့ မိုဝ်း ငဝ်၊ ဘော မာဂါ ဟဲ့ တာတ် ဒဲင် န့ကိုဝ် ငဝ်၊ ဘော ခါမုန် အီ စဲက်။

10 ဇဝ် ယေဆူ ဝီ တဝ်း ဒီ ဂေ၊ “တဲး ဘေ ဒွါ မာဂါ မင် ဒုဝ် ပဲ့ ဟဲ့ မှေတ့် ဘေ ဒီ အုဝ်။”

11 အာဆီမူန် အီ စိူဝ် ဘော အာပေတာရူ ဝီ လိုပ် ခဲင် ရိုဝ်၊ ဝီ ဒိူတ် န့ရပ်၊ တဲး န့ ကော ဇမ် ဒီ ခူပ် ဘာင် အိုမ်။ မာဂါ အီ ကွယ် ခဲင် န့ရပ် တီ မုး မာဂါ တာင် ဒီလူယ် အာဒါ အူ မာယဝ်း ဒီ ဖန် ဂိုဝ် ဒီ အူယ် ဒုဝ်။ မာဂါ ပီ ဘော ဟဲ့ ကိူန် ခဲ့ တီ၊ န့ရပ် ယီ တူ ကာယာတ့်။ 12 ဇဝ် ယေဆူ ဝီ တဝ်း ဒီ ဂေ၊ “တဲး ဘေ တး ဟူမ် ဘူမ် ညှာ ဘေ။” ဂေ ဒီဘဲ ဇဝ် ယေဆူ တွိုန်၊ အာဝ် မိုဝ်း အာဆေ အီ ယ ဒီမွှတ် တဝ်း၊ “အာဆေ မဲ မုး။း” ခဲင် နဝ်း ဂေ၊ ဂေ ဟဲ့ နပ်၊ အန် မုး အန် ဇဝ်။ 13 ပန် တီ ဇဝ် ယေဆူ ဝီ တး ကာတတ် ဒူင် ကွယ် ဂေ၊ ဝီ ဒိုဝ်း ခါမုန်၊ ဒွါ ဒီ ဂေ။ အန် ဒိုဝ်း ဘော မာဂါ၊ ဝီ ဒွါ ဒီ ဂေ။ 14 န့ မုး အူယ် ဇေန့် ခါ နီ၊ ဇဝ် ယေဆူ ဟဲ့ တး ကာပ့လုး ဒီ ဒီဘဲ အန် ဝါယ် ဟဲ့ ဝီ ယိတ့် ဝီ အိမ် အန်။

15 ဂေ ဘောကာဂ့လျီတ် ဟဲ့ ဟွတ့် ဟူမ် ဘူမ် ညှာ ဂေ၊ ဇဝ် ယေဆူ ဝီ တဝ်း ဒီ အာဆီမူန်၊ အီ စိူဝ် ဘော အာပေတာရူ၊ “မဲ အာဆီမူန် အီ မုး ဂွန် အာယောဟာန်၊ တဲး မဲ ကာလာင် ဒီ အုဝ်။ ဟဲ့ မှာန်၊ မဲ ရွက့် အုဝ် လွှိုမ် ဂေ နီ ရွက့် အုဝ်။း” အာပေတာရူ ဝီ တဝ်း၊ “ဟဲ့ မှာန်။ မဲ ဇဝ်၊ မဲ နပ်၊ အုဝ် ရွက့် မဲ။” ဇဝ် ယေဆူ ဝီ တဝ်း၊ “တဲး မဲ ဟျီင် ဂေ ဒူအီ အီ ပီ ဂွန် မာဘူ အုဝ်။”

16 ပေါ အူ ဇေန့် ဇဝ် ယေဆူ တဝ်း၊ “မဲ အာဆီမူန် အီ မုး ဂွန် အာယောဟာန်၊ တဲး မဲ ကာလာင် ဒီ အုဝ်။ ဟဲ့ မှာန်၊ မဲ ရွက့် အုဝ်။း” အန် ဝီ တဝ်း၊ “ဟဲ့ မှာန်။ မဲ နပ်၊ အုဝ် ရွက့် မဲ။” ဇဝ် ယေဆူ ပီ ဝီ တဝ်း၊ “တဲး မဲ ဟျီင် ဂေ ဒူအီ အီ ပီ မာဘူ အုဝ်။”

17 ပေါ အူ ဇေန့် ဇဝ် ယေဆူ ပီ ဝီ တဝ်း၊ “မဲ အာဆီမူန် အီ မုး ဂွန် အာယောဟာန်၊ တဲး မဲ ကာလာင် ဒီ အုဝ်။ ဟဲ့ မှာန်၊ မဲ ရွက့် အုဝ်။း” ဒေါ အန် တီ အာပေတာရူ ဝီ က့လိုဝ် ကူပ် ဒီမွှတ် ဇဝ် ယေဆူ ဒီ အန် အူယ် ဇေန့် တဝ်း၊ “ဟဲ့ မှာန်၊ မဲ ရွက့် အုဝ်။း” အန် ပီ ဝီ တဝ်း၊ “မဲ ဇဝ်၊ မဲ နပ် တူတ့် ဒွန် မျုဝ်။ မဲ ဘော နပ်၊ အုဝ် ဟဲ့ ရွက့် မဲ။”

ဇဝ် ယေဆူ ပီ ဝီ တဝ်း၊ “တဲး မဲ ဟျီင် ဂေ ဒူအီ အီ ပီ မာဘူ အုဝ်။ 18 အုဝ် တဝ်း အာခ်ု ဒီ မဲ။ ခါ အာတ့် ဒေါ ဆီ နှိုမ် မဲ၊ မဲ နပ် ဒီ စှိုပ် ခြိုင် စှိုပ် ဆဲ့ ရာင် မဲ၊ ဝီ ဟာဝ် ဒွန် နာ ဒွန် ပ့လုဝ့်၊ ဒူပ် ပီ အိုင် မဲ။ ဆေ မဲ ဟီ ကတ်၊ မဲ ဒီ ဒပ် ဒဲ မဲ။ န့ ဒီ ဘော မိုဝ်း အီ ဟဝ်၊ ဂေ ဒီ စှိုပ် ဆဲ့ ပေါ အူ မျုဝ် ဒီ မဲ၊ တိုယ် မဲ ဟာဝ် ဒူင် တူ ဆီ ဟာဝ် မဲ။” 19 ဇဝ် ယေဆူ ကာလာင် ဂြုဝ်း တီ၊ တဲး အာပေတာရူ နပ် ဒီ အာတ့် လွင် ပီ ဒီ ပါယ် အန် ဒီ ယမ်၊ တဲး အာဖုင် ဒင်ခုဝ် ဇဝ်ဖြာ ဘော လိုဝ်း ဒီ အီ။ ဟဲ့ ဟွတ့်၊ ဇဝ် ယေဆူ ဝီ တဝ်း၊ “တဲး မဲ ဟာဝ် ဒူပ် အုဝ်။”

20 ပန် တီ အာပေတာရူ ဝီ ယွတ် နာ ပန်၊ ဝီ ယိုဝ် ဒီဘဲ ဝီ ပီ ရွက့် ဇဝ် ယေဆူ။ အန် ဟဲ့ ဒူပ် ဂါယ်။ ဒီဘဲ တီ မုး အီ ဒွိုမ် နေ ဒီ ဇဝ် ယေဆူ ဒေါ ဟူမ် ဂေ ဘ့လွယ် တွိုန်၊ ဝီ အီ တဝ်း၊ “မဲ ဇဝ်၊ အာဆေ ဒီ အာပ် မဲ ဒီ ရန်ဆူ မဲ။း”

21 အာပေတာရူ ယီ ယိုဝ် ဒူအီ တီ၊ အန် ဝီ ဒီမွှတ် ဇဝ် ယေဆူ၊ ဝီ တဝ်း၊ “မဲ ဇဝ်၊ ဝီ တီ အန် ဒီ ပါယ် မှဝ်။း”

22 ဇဝ် ယေဆူ ဝီ တဝ်း၊ “ဆေ အုဝ် ဆီ တဲး အန် ကွယ်၊ တဲး ကော ဇမ် အာခြာဝ် ပန် ဒီ ဝီ တး အုဝ်၊ န့ တူ မုး အာရေ မဲ။ မဲ လုဝ် ဒူပ် အုဝ်။” 23 ကူပ် ကာလာင် ဇဝ် ယေဆူ ဂြုဝ်း တီ၊ ဂေ ဒူအီ ညှိုမ် ဇဝ် ယေဆူ၊ ဂေ ဝီ လာယ် ကာလာင် ကော ကာလတ့် လွင် ဒီဘဲ ဝီ တီ။ ဂေ တဝ်း၊ အန် တူ ဒီ ယမ်။ ဇဝ် ယေဆူ ယီ တူ တဝ်း၊ အန် တူ ဒီ ယမ်။ အန် တဝ်း၊ “ဆေ အုဝ် ဆီ တဲး အန် ကွယ် တဲး ကော ဇမ် အာခြာဝ် ပန် ဒီ ဝီ တး အုဝ်၊ န့ တူ မုး အာရေ မဲ။”

24 အုဝ် မုး ဒီဘဲ ဇဝ် ယေဆူ၊ အီ ဟဲ့ ခဲ ဆက်ဆေ လွင် ဇိုဝ် တီ ဒွန် မျုဝ်။ အုဝ် မိူဝ် ဟဲ့ ဒဲမ် အုန် တူတ့်။ အေ ဘော နပ်၊ ဂြုဝ်း တီ ဟဲ့ မှာန်။

25 ဇဝ် ယေဆူ မိူဝ် ဟဲ့ ဘူင် ဘဲန် မျုဝ် ဘဲန် မျုဝ်။ ဆေ န့ ဒီ ဒဲမ် အုန် တူတ့် ဒွန် မျုဝ်၊ အုဝ် ထာင်၊ ဒဲင် ကာဒါယ် အာဝ် မိုဝ်း ဒူင် ဒီ အုန်။