1 ဟဲ့ ဇမ် ဆီငဲ ဝါယ် ဆီငဲ ဒီလှဝ်၊ ဆိန့်ဝး စေဝ် န့ မုး နာင် မာရီ အီ တး မိူင် မာက်ဒါလာ၊ အန် ဟာဝ် ဒူင် ကွယ် ဘာရေဝ်။ အန် ယီ ယွတ်၊ ဘော ယိုဝ်၊ မာဝ် တာင် ပီ ကာဘိတ် ဂေ ကာဒဝ် ဘာရေဝ် အာဝ် ဟူ ကွယ် ဒီ အာတ့် ကာဒဝ်။ 2 ခုဝ်၊ အန် ဝီ ကာဘ့လဲပ် ဟာဝ် ဒူင် ကွယ် အာပေတာရူ ဂါယ် ဒီဘဲ ပီ ရွက့် ဇဝ် ယေဆူ တွိုန်။ အန် ဝီ တဝ်း၊ “ဂေ ဟဲ့ ဒိုဝ်း လေး ဒုဝ် ဘူင့် ဇဝ် ယေဆူ ခဲင် ဘာရေဝ်။ ယေ မိူဝ် တူ နပ်၊ ဂေ ဝီ အုန် နာ မှဝ်။”

3 အန် ဟဲ့ ဟွတ့် ကာလာင် ပါယ် တီ၊ အာပေတာရူ ဘော ဒီဘဲ ဇဝ် ယေဆူ ပေါ အူ ဝီ တွိုန်၊ ဂါယ် ဝီ ဟာဝ် ဒူင် ကွယ် ကာဒဝ် ဘာရေဝ်။ 4 ဂါယ် မိူဝ် ကာဘ့လဲပ် ဟာဝ်။ ဒီဘဲ ပေါ အူ ဝီ တွိုန်၊ အန် ယီ ကာဘ့လဲပ် ဟဲ လွှိုမ် အာပေတာရူ တဲး အန် ဇမ် ဒီ အာတ့်။ 5 အန် ဝီ မုတ် ယွတ်၊ ဘော ယိုဝ် ဘိက် အီ ကွယ် ဒီ တီ။ အန် ယီ တူ လိုပ် နာ ခဲင်။ 6 အာဆီမူန် အီ စိူဝ် ဘော အာပေတာရူ၊ အီ ဒူပ် ဒီ ပန်၊ အန် ဘော ဇမ် ဒူင် ကွယ် ကာဒဝ် ဘာရေဝ်၊ ဝီ ဟာဝ် လိုပ် နာ ခဲင်။ အန် ဝီ ယိုဝ် ဘိက် ပီ ကာဘန် ဂေ ဒီ ဒုဝ် ဇဝ် ယေဆူ၊ န့ ဆီ ကွယ် ခဲင် ကာဒဝ် ဘာရေဝ်။ 7 ဘော ကာမဲ့ အီ ကာဘိတ် နာ အန် ဟဲ့ ဒီဂပ် အုန် ပေါ ပ့လုဝ့်၊ အာဝ် ကွယ် ဒူပ် ဘိက် တွိုန်။ 8 ဝါယ် အန် တီ ဒီဘဲ ပေါ အူ ဝီ၊ အီ ဟဲ့ တး ဇမ် ဒီ အာတ့်၊ အန် ဘော ဝီ လိုပ် ခဲင် ကာဒဝ် ဘာရေဝ်။ ဒေါ ယိုဝ် အန် တူတ့် ဒွန် မျုဝ်၊ အန် မိူဝ် ညှိုမ်။ 9 န့ ယီ ညှမ် ကာလှုး ဒီ နဝ်း ဂါယ် ပီ ဒဲမ် အုန် ခဲင် ဘပ် ဇဝ်ဖြာ လွင် ဇဝ် ယေဆူ လုဝ် ဝီ ယိတ့် ဝီ အိမ် ဝါယ် ဟဲ့ ဟွတ့် ယမ် အန်။

10 ဟဲ့ ဟွတ့်၊ ဂါယ် မိူဝ် ဝီ ဝေန့် ကာင် ဂေ။ 11 နာင် မာရီ ယီ ကွယ် နာ ရေတ့် ကာဒဝ် ဘာရေဝ်၊ ဝီ ယာမ်။ ဒေါ ယာမ် အန် ပါယ် တီ၊ အန် ဝီ မုတ် ယွတ် နာ ခဲင် ကာဒဝ် ဘာရေဝ်။ 12 အန် ဘော ယိုဝ် အာမူ အာမာတ် ဇဝ်ဖြာ အာ ကာဒင် အီ ဟဲ့ တာ ခြိုင် လုယ်၊ ကွယ် ဒူင် ဒွိုမ် ဘ့လေး ဂေ ဒုဝ် ဘူင့် ဇဝ် ယေဆူ။ အူ ကာဒင် ကွယ် နာ ဒဲင် ဂိန့်။ ပေါ အူ ကာဒင် ကွယ် နာ ဒဲင် စေန့်။

13 ဂါယ် ဝီ ဒီမွှတ် နာင် မာရီ တွိုန်၊ ဝီ တဝ်း၊ “မဲ နာင်၊ မှဝ် န့ ပါယ် ပီ ယာမ် မဲ။း” အန် တဝ်း၊ “ဂေ ဟဲ့ ဒိုဝ်း ဝဲန် ဒုဝ် ဘူင့် အန် ဇဝ် အုဝ်။ အုဝ် တူ နပ် နာ မှဝ် ဂေ ဟဲ့ ဝီ ဘ့လေး အုန် အန်။” 14 အန် ဟဲ့ ဟွတ့် ကာလာင် ဂြုဝ်း တီ၊ အန် ဝီ ယွတ် နာ ပန်၊ ဝီ ယိုဝ် ဇဝ် ယေဆူ ကွယ် ဒီ တီ။ အန် ယီ တူ နပ်၊ န့ မုး ဇဝ် ယေဆူ။

15 ဇဝ် ယေဆူ ဝီ တဝ်း၊ “အိုယ် နာင်၊ မှဝ် န့ ပါယ် ပီ ယာမ် မဲ။း မဲ ဟြေတ့် အာဆေ။း” နာင် မာရီ ယီ ထာင် န့ မုး ဒူအီ ရန့် ကာပိုမ် တွိုန်။ ခုဝ်၊ အန် တဝ်း၊ “အိုယ် ဒါ၊ ဆေ မဲ ဟဲ့ ဒိုဝ်း ဝဲန် ဒုဝ် ဘူင့် အန်၊ တဲး မဲ ကာလာင် ဒီ အုဝ် ဒူင် ဘ့လေး မဲ ဒုဝ် အန်၊ တဲး အုဝ် ပွိုန် ဒီ ဟာဝ် ဒိုဝ်း တး အန်။”

16 ပန် တီ ဇဝ် ယေဆူ ပီ ဝီ တဝ်း ဒီ အန်၊ “နာင် မာရီ။” နာင် မာရီ ဝီ ယွတ် နာ အန်၊ ဝီ တဝ်း ခဲင် ဂြုဝ်း ဟဲဘြဲ၊ “ရာဘုဝ်နီ။” လွင် ဒါင် အန် လေး၊ “ဒါ ဆာရာ။”

17 ဇဝ် ယေဆူ ဝီ တဝ်း၊ “ကွဲ့ ပါ ဒုဝ် အုဝ်။ ခုဝ်၊ အုဝ် ညှမ် ဝေန့် ဒူင် ကွယ် ဂုန့် အုဝ်။ တဲး မဲ ဟာဝ် ဒီ ဘီနွင် အုဝ်၊ တဲး မဲ ကာလာင် ဒီ ဂေ လွင် အုဝ်၊ ‘အုဝ် ဒီ ဝေန့် ဒူင် ကွယ် ဂုန့် အုဝ် ဘော ဒူင် ကွယ် ဂုန့် ဘေ၊ အီ မုး ဇဝ်ဖြာ ပီ ကြိုပ် အုဝ် ဘော ဇဝ်ဖြာ ပီ ကြိုပ် ဘေ။’”

18 ပန် တီ နာင် မာရီ အီ တး မိူင် မာက်ဒါလာ၊ အန် ဝီ ဝေန့် ဒူင် ကွယ် ဂေ ဒီဘဲ ဇဝ် ယေဆူ တွိုန်၊ ဝီ တဝ်း ဒီ ဂေ၊ “အုဝ် ဟဲ့ ယိုဝ် အန် ဇဝ်။” ဟဲ့ ဟွတ့်၊ အန် ဝီ ခဲ ဒီ ဂေ လွင် ပဲ့ ဟဲ့ ကာလာင် ဇဝ် ယေဆူ ဒီ အန်။

19 ဒေါ မုး ဆီငဲ ဝါယ် ဆီငဲ ဒီလှဝ် ခဲင် မှိုဝ်၊ ဂေ ဒီဘဲ ဇဝ် ယေဆူ ဟဲ့ တး ကွယ် ရိုမ်။ ဂေ မိူဝ် ဟဲ့ ယုဝ် ကာဆဝ် ဂေ ဒါ တာင် ယူဒါ။ ဂေ ဟဲ့ ကာဘိတ် မာလုဝ်း ခဲင် ကာင် ဒူင် ကွယ် ဂေ။ ဒေါ အန် တီ ဇဝ် ယေဆူ ဝီ ကာပ့လုး ဒူင် ကွယ် ဂေ တီ။ အန် ဝီ တဝ်း၊ “တဲး ဘေ မိုဝ်း နဝ်း ဂျီတ်။” 20 အန် ဟဲ့ ဟွတ့် ကာလာင် ဂြုဝ်း တီ၊ အန် ဝီ ဘျ ဒီ ဂေ ဘော ဒဲ ဘော ဘြေတ့် အန်။ ဂေ ဒီဘဲ အန် ယီ ဒါခိုယ် ကာဆဝ် ဒေါ ယိုဝ် ဂေ ဒီ အန်။

21 ဇဝ် ယေဆူ ဝီ တဝ်း ပေါ အူ ဇေန့်၊ “တဲး ဘေ မိုဝ်း နဝ်း ဂျီတ်။ အုဝ် ဒီ တိုယ် ဘေ၊ တဲး န့ ပီ ဇဝ်ဖြာ ဟဲ့ တိုယ် အုဝ်၊ တဲး ဘေ ကာလာင် လွင် အုဝ် ဒီ အီ ဟဝ်။” 22 အန် ဟဲ့ ကာလာင် ဂြုဝ်း တီ၊ အန် ဝီ ဘုတ် ဖွိုမ် အန် ဒီ ဂေ၊ ဝီ တဝ်း၊ “တဲး ဘေ ဒိုဝ်း နဝ်း ဖွိုမ် ဇဝ်ဖြာ။ 23 ဆေ ဘေ ဘ့လွာ့ ဝဲန် မှာပ် အီ ဟဝ်၊ ဘော အုဝ် ဘ့လွာ့ ဝဲန် မှာပ် ဂေ တီ။ ဆေ ဘေ တူ ဘ့လွာ့ ဝဲန် မှာပ် အီ ဟဝ်၊ ဘော အုဝ် တူ ဘ့လွာ့ ဝဲန် မှာပ် ဂေ တီ။”

24 န့ ယီ မုး အာထုဝ်မာတ်၊ အီ စိူဝ် ဘော အာဒီဒါမာတ်၊ အီ ဘာ့ ခဲင် ဖိုင် ဒီဘဲ ဇဝ် ယေဆူ ဂိုဝ် ဒီ အာ ဝီ တွိုန်။ အန် စိူဝ် ဘော အာဒီမူတ်။ အန် တူ ကွယ် ဒူင် ကွယ် ဒီဘဲ ဇဝ် ယေဆူ ဒေါ ကာပ့လုး ဇဝ် ယေဆူ ဒီ ဂေ။ 25 ခုဝ်၊ ဂေ ဒီဘဲ အီ ဟဲ့ ယိုဝ် ဇဝ် ယေဆူ၊ ဂေ ဝီ တဝ်း ဒီ အန်၊ “ယေ ဟဲ့ ယိုဝ် ဇဝ် ယေဆူ။” အန် ယီ တဝ်း ဒီ ဂေ၊ “ဆေ အုဝ် တူ ယိုဝ် ဒိမ် ပီ ဒွက် ဂေ မာဟိန် ဒီ ဒဲ အန်၊ ဆေ အုဝ် တူ ပွိုန် ဒီ ပါ ဒိမ် တီ ဘော ပါ ဘြေတ့် အန်၊ အုဝ် တူ ညှိုမ် ဂြုဝ်း ဘေ။”

26 ဝါယ် အန် တီ ဘူ ဆီငဲ၊ ဂေ ဒီဘဲ ဇဝ် ယေဆူ ဝီ ကွယ် ရိုမ် ခဲင် ကာင်။ ခါ နီ ဘော အာထုဝ်မာတ် ကွယ် ရိုမ် ဒူပ် ဂေ။ ဂေ ဟဲ့ ကာဘိတ် မာလုဝ်း။ ဇဝ် ယေဆူ ယီ ကာပ့လုး ဒီ ဂေ၊ ကွယ် ကာတဲ ဂေ၊ ဝီ တဝ်း၊ “တဲး ဘေ မိုဝ်း နဝ်း ဂျီတ်။” 27 အန် ဝီ တဝ်း ဒီ အာထုဝ်မာတ်၊ “တဲး မဲ ဘ့လေး ဒဲ မဲ ဒီ နီ။ တဲး မဲ ယွတ် ဘော ဒဲ အုဝ်၊ ဒိုဝ်း ဒဲ မဲ ပါ ဘြေတ့် အုဝ်။ ကွဲ့ တဲး မဲ မိုဝ်း နဝ်း ကာလိင် ကာလဲ။ တဲး မဲ ညှိုမ်။”

28 အာထုဝ်မာတ် ဝီ တဝ်း၊ “မဲ မုး အန် ဇဝ်၊ အီ အိုပ် အုဝ်၊ မဲ ဘော မုး ဇဝ်ဖြာ ပီ ကြိုပ် အုဝ်။”

29 ဇဝ် ယေဆူ ဝီ တဝ်း ဒီ အန်၊ “ကူပ် ယိုဝ် မဲ ဒုဝ် အုဝ်၊ မဲ ဟဲ့ ညှိုမ်။ ဂေ ဒူအီ အီ တူ ပွိုန် ယိုဝ် မာဆေ၊ ဆေ ဂေ ယီ ညှိုမ်၊ ဂေ ဒီ ဘဲန် နဝ်း ဒါခိုယ်။”

30 ဇဝ် ယေဆူ ဘော ဘူင် နာ မွှိုမ် အာမ် ကာဆဝ် ဘဲန် မျုဝ် ဘဲန် မျုဝ်၊ တဲး ဒီဘဲ အန် ပွိုန် ဒီ ယိုဝ်။ လွင် အန် တီ ယီ တူ ဒဲမ် အုန် ခဲင် ဘပ် နီ။ 31 ခဲ့ ပီ ဒဲမ် အုန် ခဲင် ဘပ် နီ၊ အုဝ် ဟဲ့ ဒဲမ် အုန်၊ တဲး ဘေ ညှိုမ်၊ ဇဝ် ယေဆူ မုး ဒူအီ ပီ ရဝ်း ပီ တိုယ် ဇဝ်ဖြာ တဲး အန် ချွတ် ဒူအီ။ အန် ဘော မုး ဂွန် ဇဝ်ဖြာ။ အုဝ် မိူဝ် ဟဲ့ ဒဲမ် လွင် အန် တီ၊ တဲး ဘေ ပွိုန် အာဆာက် ကာမာယ် ပီ ဒွါ ဇဝ်ဖြာ ဒီ ဘေ ကူပ် ညှိုမ် ဘေ ဇဝ် ယေဆူ။