1 ဝါယ် အန် တီ အာဖီလာတ် စ်ု ဂေ ဒါ ဆိုက် ဆီဘျြီ့ ဇဝ် ယေဆူ။ 2 ဂေ ဘော ဒိုဝ်း ယွုန် မာအာတ့်၊ ဘူင် တဲး န့ ပီ မင်ဂိုမ်၊ ဝီ ဘ့လေး ဒဲင် ဂိန့် အန်။ ဂေ ဘော ဒိုဝ်း ခြိုင် ရေန့် ဂဲ ပီ စှိုပ် ခုန်ဒီခမ်၊ တဲး အန် စှိုပ်။ 3 ဟဲ့ ဟွတ့် ဂေ တး ကာတတ် ဒီ အန် ဝီ တဝ်း၊ “အိုယ် မဲ ခုန်ဒီခမ် အေ ဒူအီ အာယူဒါ၊ တဲး မဲ ဂျာမ်ဆာ။” ဂေ ဝီ ကာထ ကာလာ အန် ဘဲန် ဇေန့် ဘဲန် ဇေန့်။

4 အာဖီလာတ် ဝီ လေး ခဲင် ဟုဝ် အန်၊ ဟာဝ် ဒူင် ကွယ် ဂေ ဒူအီ အာယူဒါ၊ ဝီ တဝ်း ဒီ ဂေ၊ “တဲး ဘေ ထူမ်။ အုဝ် ဒီ တဲး အန် လေး ဒူင် ကွယ် ဘေ၊ တဲး ဘေ နပ်၊ အုဝ် တူ ယိုဝ် မာဆေ ပီ လုတ့် အန်။” 5 ဇဝ် ယေဆူ ဘော လေး ခဲင် ဟုဝ် တွိုန်၊ တာ ခြိုင် ရေန့် ဘော စှိုပ် မင်ဂိုမ် မာအာတ့်။ အာဖီလာတ် ဝီ တဝ်း၊ “နီ၊ ယွတ် ဒူအီ တီ။”

6 ဂေ ဒါ တာင် အီ ယဲတ့် ဂေ ဒူအီ အီ လှူ ဒီ ဇဝ်ဖြာ ဘော ဂေ ဒူအီ ပီ တိုယ် ဒါ တာင် အီ အိုပ် မိူင်၊ ဂေ ကော ယိုဝ် ဇဝ် ယေဆူ၊ ဂေ ဝီ ဒတ် အူ ဇေန့် တဝ်း၊ “ငဝ်း ဝဲန် အန် ဒဲင် ရွင့် ကာဝဲ့။ ငဝ်း ဝဲန် အန် ဒဲင် ရွင့် ကာဝဲ့။” အာဖီလာတ် ဝီ တဝ်း၊ “တဲး ဘေ ဒိုဝ်း အန်၊ ငဝ်း ယမ် အန် ဒဲင် ရွင့် ကာဝဲ့။ အုဝ် ယီ တူ ယိုဝ် ပီ လုတ့် အန်။”

7 ဂေ ဒူအီ အာယူဒါ ဝီ တဝ်း၊ “ယေ မိုဝ်း ဒါရာ အီ တဝ်း၊ အန် လုဝ် ယမ် ကူပ် ဟဲ့ တဝ်း အန်၊ အန် မုး ဂွန် ဇဝ်ဖြာ။”

8 အာဖီလာတ် ဟဲ့ ဟွတ့် ထူမ် ဂြုဝ်း ဂေ တီ၊ အန် ဘော ယုဝ် ကာပွါ။ 9 အန် ပီ ဝီ လိုပ် ခဲင် ဟုဝ် ဝီ တဝ်း ဒီ ဇဝ် ယေဆူ၊ “နာ မှဝ် မဲ တး။း” ဇဝ် ယေဆူ ယီ တူ ဝျီ့ ဂြုဝ်း တီ။ 10 အာဖီလာတ် ဝီ ဒီမွှတ် တဝ်း၊ “မဲ တူ ဆီ ကာလာင် ဂြုဝ်း ဒီ အုဝ်။း မဲ တူ နပ်၊ န့ မုး အုဝ်၊ အုဝ် မိုဝ်း ပွုန် အီ ပွိုန် ဘ့လေး မဲ ဘော ပွိုန် ငဝ်း ယမ် မဲ ဒဲင် ရွင့် ကာဝဲ့။း”

11 ဇဝ် ယေဆူ ဝီ တဝ်း၊ “ဆေ ဇဝ်ဖြာ တူ တဲး ပွုန် ဒီ မဲ၊ မဲ တူ မိုဝ်း ပွုန် မာဆေ။ ခုဝ် အန် တီ ဒူအီ အီ အာပ် အုဝ် ဒီ မဲ၊ မှာပ် အန် ဟဲ့ တာင် လွှိုမ် မှာပ် မဲ။”

12 ဝါယ် အန် တီ အာဖီလာတ် ဆီ ဘ့လေး ဇဝ် ယေဆူ။ ဂေ ဒူအီ အာယူဒါ ဝီ ဒတ် ဟာဝ် တဝ်း၊ “ဆေ မဲ ဘ့လေး ဒူအီ တီ၊ မဲ တူ မုး ဂိုက် ခုန်ဒီခမ် အာကဲဆာ။ ဆေ ဒူအီ အူ ဝီ တဝ်း၊ အန် မုး ခုန်ဒီခမ်၊ အန် ဘဲန် ရန်ဆူ အာကဲဆာ။”

13 အာဖီလာတ် ဝီ ထူမ် ဂြုဝ်း ဂေ တီ၊ အန် ဝီ တဲး ဇဝ် ယေဆူ လေး ခဲင် ဟုဝ်။ အန် ဝီ တုတ့် ဒီ မာလာင် ပီ ဆုင်ဖျာတ် အန် အာမူ အီ။ မာလာင် တီ ကွယ် ဒူင် ဒီ မိုဝ်း ဂ့လင် ဒူင် ဘ့လေး ဂေ မာဝ် ဒီဖ့လ၊ တဲး န့ ဆိူဝ်။ ဂြုဝ်း ဟဲဘြဲ ဂေ တဲး ဒူင် တီ စိူဝ် “ဂါဘာထာ။” 14 ဒေါ အန် တီ န့ မုး ဆီငဲ အာတ့် ဘူင် ဂေ ဘ့လွယ် ဒေါ လှုဝ်း ဂေ ဇဝ်ဖြာ ကာလုဝ်း ကာင် ဂေ။ ဟဲ့ ရိန် ဒီ ဇမ် ကာတဲ ဆီငဲ။ အာဖီလာတ် ဝီ တဝ်း ဒီ ဂေ၊ “နီ၊ ဒူအီ ဝီ တီ မုး ခုန်ဒီခမ် ဘေ။”

15 ဂေ ယီ ဒတ် တဝ်း၊ “ဝဲန် အန်၊ ဝဲန် အန်။ ငဝ်း ယမ် အန် ဒဲင် ရွင့် ကာဝဲ့။” အာဖီလာတ် ဝီ ဒီမွှတ် တဝ်း၊ “ဘေ ဆီ တဲး အုဝ် ငဝ်း ယမ် ခုန်ဒီခမ် ဘေ ဒဲင် ရွင့် ကာဝဲ့။း” ဂေ ဒါ တာင် အီ ယဲတ့် ဂေ ဒူအီ အီ လှူ ဒီ ဇဝ်ဖြာ ဝီ တဝ်း၊ “န့ မုး မီ အာကဲဆာ၊ အီ မုး ခုန်ဒီခမ် ယေ။ အာဝ် မိုဝ်း ခုန်ဒီခမ် ပေါ အူ ဝီ။”

16 ပန် တီ အာဖီလာတ် ဝီ ခ့ဝါင် ဂေ၊ တဲး ဂေ ဒိုဝ်း ဇဝ် ယေဆူ ဟာဝ် ငဝ်း ယမ် အန် ဒဲင် ရွင့် ကာဝဲ့။ ဟဲ့ ဟွတ့်၊ ဂေ ဒါ ဆိုက် မိူဝ် ဒိုဝ်း ဟာဝ် အန်။

17 ဇဝ် ယေဆူ လုဝ် ဂွတ် ရွင့် ကာဝဲ့ အန်၊ ဟာဝ် နာ ရေတ့် မိူင်၊ ဟာဝ် ဇမ် ဒူင် အီ စိူဝ် ဒူင် ကွယ် ကာအာင် ဂိန့် ဒူအီ။ ခဲင် ဂြုဝ်း ဟဲဘြဲ န့ စိူဝ် “ဂေါလဂုဝ်ထာ။” 18 ဂေ မိူဝ် ဒိုက် အန် ဒီ ရွင့် ကာဝဲ့ ဒူင် တီ၊ ဝီ ဆမ် ရွင့် တီ၊ တဲး န့ ကွယ် ဒီ ကာတဲ အာ ဝီ အီ ကွယ် ဒဲင် ရွင့် ဂါယ်၊ အူ ဝီ အူ ဘ့လာက် ဇဝ် ယေဆူ။

19 အာဖီလာတ် ဝီ စ်ု ဂေ ဒဲမ် ပဲ့ ဒိုက် ဒီ ကာဒဲ့ ရွင့်။ န့ တဝ်း၊ “အာယေဆူ၊ အီ တး မိူင် နာဆာရေတ့်၊ အီ မုး ခုန်ဒီခမ် ဒူအီ အာယူဒါ။” 20 ဂေ ဒူအီ အာယူဒါ၊ ဂေ ကိူန် ပွိုန် တိး ပဲ့ တီ။ ခုဝ်၊ ဒူင် ပီ ငဝ်း ဂေ ဇဝ် ယေဆူ ဒီ ရွင့် ကာဝဲ့၊ န့ ကွယ် ကာတတ် မိူင်။ ပဲ့ တီ ဂေ မိူဝ် ဟဲ့ ဒဲမ် ဂြုဝ်း ဟဲဘြဲ၊ ဂြုဝ်း လာထိန် ဘော ဂြုဝ်း ဂြိက်။ 21 ဂေ ဒါ တာင် ယူဒါ အီ ယဲတ့် ဂေ ဒူအီ အီ လှူ ဒီ ဇဝ်ဖြာ၊ ဂေ ယီ တူ အိုင် အာတီ။ ဂေ တဝ်း ဒီ အာဖီလာတ်၊ “ကွဲ့ ဒဲမ် ‘အန် မုး ခုန်ဒီခမ် ဒူအီ အာယူဒါ။’ တဲး မဲ ဒဲမ်၊ အန် တဝ်း၊ ‘အန် မုး ခုန်ဒီခမ် ဒူအီ အာယူဒါ။’”

22 အာဖီလာတ် ယီ တဝ်း၊ “အုဝ် ဟဲ့ ဟွတ့် ဒဲမ် ပါယ် တီ။”

23 ဂေ ဒါ ဆိုက် တွိုန်၊ ဒေါ ဒိုက် ဂေ ဇဝ် ယေဆူ ဒီ ရွင့် ကာဝဲ့ တွိုန်၊ ဂေ ဘုတ့် ဝဲန် ခြိုင် အန်၊ ဝီ ကာဆာင်၊ တဲး န့ ဘဲန် ကြုဝ် ဂေ ဖွုန် ဝီ၊ အူ ဝီ အူ မျုဝ်။ န့ ဆီ ဂိတ် ဆီတုဝ် နာ ခဲင်။ ဆီတုဝ် တီ မုး အူ ဖိူန် အူ ဆိန့် ဒေါ ဒဝ့် ဂေ၊ ဘော နာ ဒဲင် ကော ဇမ် နာ ဘြုဝ်၊ အာဝ် မိုဝ်း ဒူင် ကာစိန့်။

24 ဂေ ဝီ တဝ်း၊ “ကွဲ့ တဲး အေ ကာယာတ့် ခြိုင် တီ။ တဲး အေ ကာဒုဝ်၊ အာဆေ ဒီ ပွိုန်။” ဂေ ဘူင် ပါယ် တီ တဲး န့ ဘဲန် ပီ ဒွိုမ် ဒဲမ် အုန် ခဲင် ဘပ် ဇဝ်ဖြာ။ န့ တဝ်း၊ “ဂေ ကာယဝ်း ခြိုင် အုဝ် ကာတဲ ဂေ၊ ဝီ ကာဒုဝ်၊ တဲး ဂေ ပွိုန် ဆီတုဝ် အုဝ်။” ခုဝ်၊ ဂေ ဒါ ဆိုက် ဟဲ့ ဘူင် ပါယ် တီ။

25 န့ ယီ မုး မာ ဇဝ် ယေဆူ ဘော မာဒဝ် အန် အီ စိူဝ် နာင် မာရီ၊ အီ မုး အီဘိုန့် အာခါလုဝ်ဖာတ် တွိုန်၊ ဘော နာင် မာရီ၊ အီ တး မိူင် မာက်ဒါလာ။ ဂေ အူယ် ဝီ တီ၊ ဂေ ကွယ် ကာတတ် ရွင့် ဒူင် ဒိုက် ဂေ ဇဝ် ယေဆူ။

26 ဇဝ် ယေဆူ ဘော ယိုဝ် မာ အန် ဘော ဒီဘဲ ဝီ ပီ ရွက့် အန်။ ဂါယ် ကွယ် လာယ် ကာချြီ့။ အန် ဝီ တဝ်း ဒီ မာ အန်၊ “အိုယ် မာ၊ ဝီ တီ ဟဲ့ ဝီ ဘဲန် ဂွန် မဲ။” 27 အန် ဘော တဝ်း ဒီ ဒီဘဲ အန် တွိုန်၊ “ယွတ် မာ အုဝ်၊ အန် ဟဲ့ ဝီ ဘဲန် မာ မဲ။” အူ ဆိန့် ဒေါ တဝ်း ဇဝ် ယေဆူ ဂြုဝ်း တီ၊ ဒီဘဲ အန် တွိုန် ဘော ဒဲ့ မာ ဇဝ် ယေဆူ တး ကွယ် ခဲင် ကာင် အန်။

28 ဝါယ် အန် တီ ဇဝ် ယေဆူ ဘော နပ်၊ န့ ဟဲ့ ဟွတ့် ဘဲန် တူတ့် ဒွန် မျုဝ် ပီ ဒွိုမ် ဒဲမ် အုန် ခဲင် ဘပ် ဇဝ်ဖြာ။ ခုဝ်၊ အန် ဝီ တဝ်း၊ “အုဝ် ဟဲ့ ဆီ ဒျီင် အိုမ်။” 29 န့ ယီ မိုဝ်း ကာလုဝ့် အိုမ် မာငုန် အီ ပြာင်။ ဂေ ဝီ ဒိုဝ်း ဒိး အိုမ်၊ စိုပ် ခဲင် အိုမ် မာငုန် ပြာင် တွိုန်၊ ဝီ စျှီပ် ဒီ ရာ ဟေ ဟူဆူပ်၊ ဝီ ဘ့လေး ကာဆိူဝ် ဒီ မူတ့် အန်။ 30 ဇဝ် ယေဆူ ဟဲ့ ဟွတ့် ညွှတ် ပါယ် တီ၊ အန် ဝီ တဝ်း၊ “ဟဲ့ ဟွတ့် တူတ့် ဒွန် မျုဝ်။” အန် ဟဲ့ ဟွတ့် ကာလာင် ဂြုဝ်း တီ၊ ဂိန့် အန် ဘော ဒီလှး၊ ဖွိုမ် အန် ဘော တူတ့်။

31 ဆီငဲ အန် တီ ယီ မုး ဆီငဲ အာတ့် ဆီငဲ ဒီလှဝ်။ ပါ ခဲညှာ ဒီ မုး ဆီငဲ ဒီလှဝ်၊ ဆီငဲ ဒီ ဘူင် ဂေ ဘ့လွယ်။ ဂေ ဒူအီ အာယူဒါ တူ ဆီ တဲး ဒူအီ ယမ် ဒိုက် ဒီ ရွင့် ကာဝဲ့ ဒေါ မုး ဆီငဲ ဒီလှဝ်။ ခုဝ်၊ ဂေ ဝီ မှာန့် ဒီ အာဖီလာတ်၊ တဲး အန် ခ့ဝါင် ဂေ ကာဘက် ကာအာင် ပ့လဝ်၊ တဲး ဂေ ဝီ ဒိုဝ်း လူင် ဒုဝ် ဘူင့် ဒူအီ တွိုန် ဒီ ရွင့်။ 32 ဂေ ဒါ ဆိုက် ဘော တး ကာဘက် ပ့လဝ် ဒူအီ အူ ဝီ၊ အီ ကွယ် ခူပ် ဇဝ် ယေဆူ။ ဟဲ့ ဟွတ့်၊ ဂေ ဝီ ဘူင် ပါယ် တီ ဒီ ဒူအီ ပေါ အူ ဝီ။ 33 ဒေါ တး ဂေ ဒီ ရွင့် ဇဝ် ယေဆူ၊ ဂေ ကော နပ်၊ အန် ဟဲ့ ဟွတ့် ယမ်။ ခုဝ်၊ ဂေ တူ ကာဘက် ပ့လဝ် အန်။ 34 ဒါ ဆိုက် အူ ဝီ ယီ ဒိုဝ်း ဘ့လာ လျီး၊ ဆတ် ဘြေတ့် အန်၊ တဲး အိုမ် ဂေ နှာမ် လေး အူ ဇေန့်။ 35 န့ မိုဝ်း ဒူအီ အူ ဝီ၊ အန် ဟဲ့ ယိုဝ် တူတ့် ဒွန် မျုဝ် ဇိုဝ် တီ။ အန် ဘော ကာလာင် ဆက်ဆေ လွင် အန် တီ။ ပီ ကာလာင် အန် ဟဲ့ မှာန်။ အန် နပ်၊ ဂြုဝ်း အန် ဟဲ့ မှာန်။ အန် ကာလာင် ဘော ဒီ ဘေ၊ တဲး ဘော ဘေ ညှိုမ်။ 36 န့ ဘော ဘဲန် တူတ့် ဒွန် မျုဝ် ပီ ပီ ဒွိုမ် ဒဲမ် အုန် ခဲင် ဘပ် ဇဝ်ဖြာ။ န့ တဝ်း၊ “ဂေ တူ ကာဘက် ကာအာင် အန်။ အာဒါ အူ ဘူင့် မိူဝ် ဂေ တူ ကာဘက်။” 37 ပေါ အူ ပ့လုဝ့် န့ ဟဲ့ ဒဲမ် အုန် ခဲင် ဘပ် ဇဝ်ဖြာ တဝ်း၊ “ဂေ ဒီ ငွိုပ် ဝီ ပဲ့ ဟဲ့ ဆတ် ဂေ တာ ဘ့လာ လျီး။”

38 ဝါယ် အန် တီ န့ မုး အာယုဝ်ဆဲပ်၊ အီ တး ခဲင် မိူင် အေရီမာထီ။ အန် ဟာဝ် ဒူင် ကွယ် အာဖီလာတ် ဝီ မှာန့်၊ တဲး အန် ဒိုဝ်း ဒုဝ် ဘူင့် ဇဝ် ယေဆူ။ အာယုဝ်ဆဲပ် တီ မုး ဒီဘဲ ဇဝ် ယေဆူ။ အန် ယီ တူ တဲး အီ နပ် လွင် အန် တီ ကူပ် ယုဝ် အန် ဂေ ဒါ တာင် ယူဒါ။ အာဖီလာတ် ဟဲ့ ဟွတ့် ခ့ဝါင် အန် ဒိုဝ်း ဒုဝ် ဘူင့် ဇဝ် ယေဆူ၊ အန် ဘော တး ဒိုဝ်း ဒုဝ် ဇဝ် ယေဆူ လေး ဒီ ရွင့်။ 39 ဘော အာနီခုဝ်ဒေမ် အီ ဟဲ့ ဒွိုမ် တး ဒီ ဇဝ် ယေဆူ ခဲင် မှိုဝ်၊ အန် ကွယ် ရိုမ် ဒူပ် အာယုဝ်ဆဲပ် တွိုန်။ အန် မိုဝ်း ဒီ ဂူင့် ဆီနမ် အီ ကာဝ်ု ဘော ဒဝ် မောရာ ဘော ဒဝ် အာလုဝ်၊ ဟဲ့ စန် ကာဘက် အာ ဂိုဝ် ဆ။ 40 ဂါယ် ဝီ ဒိုဝ်း ဒုဝ် ဘူင့် ဇဝ် ယေဆူ၊ ဝီ ကာဘန် ဒီ ဘိက် အီ ဟဲ့ ဟွတ့် ဟပ် ဆီနမ် တွိုန်။ ဂေ ဘူင် ပါယ် တီ၊ တဲး န့ ဒူပ် ဟိတ် ဂေ ဒူအီ အာယူဒါ အာတ့် ဒိပ် ဂေ ဒူအီ ယမ်။ 41 န့ ယီ မိုဝ်း ကာပိုမ် အီ ကွယ် ဒီ ခူပ် ဒူင် ဆမ် ဂေ ရွင့် ကာဝဲ့ တွိုန်။ ဘော ကာဒဝ် ဘာရေဝ် ကွယ် ခဲင် ကာပိုမ် တီ။ န့ မုး ကာဒဝ် ဘာရေဝ် ကာမာယ်။ ဂေ တူ ဒွိုမ် ဘ့လေး ဒူအီ ယမ် နာ ခဲင်။ 42 ဂါယ် ဝီ ဘ့လေး ဒုဝ် ဘူင့် ဇဝ် ယေဆူ ခဲင် ကာဒဝ် ဘာရေဝ် တီ။ ခုဝ်၊ န့ ကွယ် ကာတတ် ဒူင် ငဝ်း ဂေ ဇဝ် ယေဆူ ဘော ဟဲ့ ချြီ့ ဆီငဲ ဒီလှဝ်။