1 ဇဝ် ယေဆူ ဟဲ့ ဟွတ့် ဆာခိုဝ် ပါယ် တီ၊ ဘော အန် ဘော ဒီဘဲ အန် လေး ဒူင် ကွယ် ဂေ၊ ဝီ ဟာဝ် ကာလုဝ်း ဒီလယ့် ဘ့လဲင် ခီဒါရူန်။ နာ တ ဒီလယ့် တွိုန်၊ န့ မိုဝ်း ကာပိုမ် ဟေ နာမန်။ ဂေ ဝီ ဟာဝ် ဇမ် ခဲင် ကာပိုမ် တီ။

2 န့ ယီ မုး အာယူဒတ် အီ ဒီ အာပ် ဇဝ် ယေဆူ ဒီ ရန်ဆူ အန်၊ အန် ဟဲ့ နပ် ဒူင် တီ။ ခုဝ်၊ ဇဝ် ယေဆူ ဘော ဒီဘဲ အန် ဟဲ့ ဒွိုမ် ဟာဝ် ဆိူဝ် တီ ဘဲန် ဇေန့် ဘဲန် ဇေန့်။ 3 ပန် တီ အာယူဒတ် တး ဇမ် ဒူင် ကွယ် ဂေ။ အန် ယဲတ့် ဖိုင် ဒါ ဆိုက် ဘော ဂေ ဒါ တာင် အီ အိုပ် တူတ့် ဒူအီ အီ လှူ ဒီ ဇဝ်ဖြာ မင် အီ ဘော ဂေ ဒူအီ ဖိုင် ဖာရီဆဲ မင် အီ။ ဂေ ဒွန် အီ ဟဲ့ ဂူင့် ငဝ် ရာင် ဂေ ငဝ် အွမ် ဘော ခြိုင် ကာဂုဝ်း ဘဲန် မျုဝ် ဘဲန် မျုဝ်။

4 ဇဝ် ယေဆူ ယီ နပ် ဒီ အာတ့် ပီ ဒီ ပါယ် ဒွန် မျုဝ်။ ခုဝ်၊ အန် ဝီ လေး ဒူင် ကွယ် ဒီဘဲ အန်၊ ဝီ ဟာဝ် ဒီမွှတ် ဂေ။ အန် တဝ်း၊ “ဘေ ဟြေတ့် အာဆေ။း” 5 ဂေ ဝျီ့ ဂြုဝ်း တီ တဝ်း၊ “ယေ ဟြေတ့် အာယေဆူ၊ အီ တး မိူင် နာဆာရေတ့်။” ပန် တီ ဇဝ် ယေဆူ ဝီ တဝ်း၊ “န့ မုး အုဝ်။” ဘော အာယူဒတ် အီ ဒီ အာပ် ဇဝ် ယေဆူ ဒီ ရန်ဆူ အန်၊ အန် ကွယ် ရိုမ် ဒူပ် ဂေ အီ ဒီ မှေတ့် ဇဝ် ယေဆူ။ 6 ဇဝ် ယေဆူ ဟဲ့ ဟွတ့် တဝ်း၊ “န့ မုး အုဝ်၊” ဂေ ဝီ ဆီတတ်၊ ဝီ ကေး နာ ပန်။

7 အန် ဝီ ဒီမွှတ် ဂေ ပေါ အူ ဇေန့် တဝ်း၊ “ဘေ ဟြေတ့် အာဆေ။း” ဂေ ပီ ဝီ တဝ်း၊ “အာယေဆူ၊ အီ တး မိူင် နာဆာရေတ့်။”

8 အန် ဝီ တဝ်း၊ “အုဝ် ဟဲ့ ဟွတ့် ကာလာင် ဒီ ဘေ၊ န့ မုး အုဝ်။ ဆေ ဘေ ဟြေတ့် အုဝ်၊ ကွဲ့ မှေတ့် ဂေ နီ၊ တဲး ဂေ ဟာဝ်။”

9 အန် ကာလာင် ပါယ် တီ၊ ကူပ် ဒွိုမ် ကာလာင် အန် ဒီ ဂုန့် အန်၊ “န့ တူ မိုဝ်း ဒူအီ ပီ ဒွါ မဲ ဒီ အုဝ် အီ ဟဲ့ ဘျုဝ်း။ အူ ဝီ မိူဝ် တူ ဘျုဝ်း။”

10 ပန် တီ န့ မုး အာဆီမူန်၊ အီ စိူဝ် ဘော အာပေတာရူ။ အန် မိုဝ်း ဒီ ဂူင့် မာပွါ့ လာင်။ အန် ဝီ ထွတ်၊ ဒဲပ် ဝဲန် ဟျုဝ့် ဒူအီ အူ ဝီ၊ အီ မုး ဒဲစေန့် ဒါ တာင် အီ အိုပ် တူတ့် ဒူအီ အီ လှူ ဒီ ဇဝ်ဖြာ။ ဒဲစေန့် တီ၊ အန် စိူဝ် အာမာလာခူ။ န့ မုး ဟျုဝ့် အန် ဘ့လာက် အာအး ပဲ့ ဟဲ့ ဒဲပ် ဝဲန် အာပေတာရူ။

11 ဇဝ် ယေဆူ ယီ စ်ု အာပေတာရူ တဝ်း၊ “မဲ ဝီ စျှီပ် အုန် မာပွါ့ လာင် မဲ ခဲင် ဘြာမ် အန်။ မှဝ် န့ ပါယ် ပီ တူ ဆီ တဲး မဲ အုဝ် ခမ် ခဲ့ ပီ တဲး ဂုန့် အုဝ် အုဝ် ခမ်။း”

12 ပန် တီ ဂေ ဒါ ဆိုက် ဘော အီ ယဲတ့် ဂေ၊ ဘော ဂေ ဒူအီ ပီ တိုယ် ဒါ တာင် ခဲင် အိူင် ယူဒါ၊ ဂေ ဝီ မှေတ့် ဇဝ် ယေဆူ။ ဂေ ပက် အန်၊ 13 ဝီ တိုယ် အန် ဇမ် ဒူင် ကွယ် ဒါ တာင် အာနာတ်၊ အီ မုး ဘိုဝ် အာကာယ်ဖာ။ ဆီနမ် တီ အာကာယ်ဖာ တွိုန် မုး ဒါ တာင် အီ အိုပ် တူတ့် ဒူအီ အီ လှူ ဒီ ဇဝ်ဖြာ။ 14 အန် ဘော မုး ဒူအီ အီ ဒွိုမ် ကာလာင် ဒီ ဂေ ဒူအီ အာယူဒါ၊ “ဆေ ဒူအီ အူ ဝီ ခမ် ဒီ ယမ် ကာဒါင် အေ ဒွန် အီ၊ န့ ဒီ မွှိုမ် လွှိုမ် အေ ဒွန် အီ လုဝ် ယမ်။”

15 န့ ယီ မုး အာဆီမူန် အီ စိူဝ် ဘော အာပေတာရူ။ ဘော အန် ဘော ဒီဘဲ ပေါ အူ ဝီ ဟဲ့ ဒူပ် ဇဝ် ယေဆူ။ ဒါ တာင် အီ အိုပ် တူတ့် ဒူအီ အီ လှူ ဒီ ဇဝ်ဖြာ ဟဲ့ နပ် ဒီဘဲ ဇဝ် ယေဆူ ပေါ အူ ဝီ တွိုန်။ ခုဝ်၊ အန် ဝီ ဟာဝ် ဒူပ် ဇဝ် ယေဆူ ဘော လိုပ် ခဲင် ဝဲင် ကာင် ဒါ တာင် တီ။ 16 အာပေတာရူ ယီ လုဝ် ကွယ် နာ ရေတ့် ဝဲင်၊ ကွယ် ဒီ ခူပ် မာလုဝ်း။ ဒီဘဲ ပေါ အူ ဝီ အီ နပ် ဒါ တာင် တွိုန်၊ အန် ဝီ တး ဒီ မာလုဝ်း၊ ဝီ ကာလာင် ဂြုဝ်း ဒီ အီဘိုန့် အီ ဘ်ု မာလုဝ်း။ ဟဲ့ ဟွတ့် အန် ဒဲ့ ဘော အာပေတာရူ လိုပ်။

17 ဒေါ အန် တီ အီဘိုန့် အီ ဘ်ု မာလုဝ်း တွိုန် ဝီ တဝ်း ဒီ အာပေတာရူ၊ “ဘော မဲ မုး ဒီဘဲ ဒူအီ တွိုန်။” အာပေတာရူ ဝီ တဝ်း၊ “အာဝ် မုး။”

18 ဒေါ အန် တီ န့ ယီ ဂတ်။ ဂေ ဒဲစေန့် မင် အီ ကွယ် ဝါတ် ငဝ် ပဲ့ ဟဲ့ ဘုတ် ဂေ၊ ကွဲ့ တဲး ဂေ ယိုဝ် ဂတ်။ ဘော အာပေတာရူ ဟဲ့ ကွယ် ရိုမ် ဒူပ် ဂေ၊ ဝါတ် ငဝ်။

19 န့ ယီ မုး ဒါ တာင် အီ အိုပ် တူတ့် ဒူအီ အီ လှူ ဒီ ဇဝ်ဖြာ၊ အန် ဒီမွှတ် ဇဝ် ယေဆူ လွင် ဒီဘဲ အန် ဘော လွင် ပဲ့ ဟဲ့ မာနုဝ် အန် ဘဲန် မျုဝ် ဘဲန် မျုဝ်။

20 ဇဝ် ယေဆူ တဝ်း ဒီ အန်၊ “အုဝ် ဟဲ့ ကာလာင် ဂြုဝ်း၊ တဲး ဒူအီ ဒွန် အီ အီ ကွယ် ဒဲင် ကာဒါယ် နီ ပွိုန် ဒီ ထူမ်။ ဆေဆေ အုဝ် ဟဲ့ မာနုဝ် ဘော ခဲင် ဇူင် ဘေ ဘော ခဲင် ဟုဝ် ဇဝ်ဖြာ၊ အီ မုး ဒူင် ဒီ တး ကာဇု ဂေ ဒူအီ အာယူဒါ ဘောကာဂ့လျီတ်။ အုဝ် တူ ဒွိုမ် ချြီင် ပီ မာနုဝ် အုဝ်။ 21 ခုဝ်၊ မှဝ် န့ ပါယ် ပီ လုဝ် ဘေ ဒီမွှတ် အုဝ်။း တဲး ဘေ ဒီမွှတ် ဂေ အီ ထူမ် ဂြုဝ်း အုဝ်။ ဂေ ဟဲ့ နပ် ဒီ ကာလာင် လွင် ပီ မာနုဝ် အုဝ်။”

22 ဇဝ် ယေဆူ ဟဲ့ ဟွတ့် ကာလာင် ဂြုဝ်း တီ၊ န့ မိုဝ်း ဒဲစေန့် ဒါ တာင် အူ ဝီ၊ အီ ကွယ် ကာတတ် ဇဝ် ယေဆူ။ အန် ကာထ ကာလာ ဇဝ် ယေဆူ။ အန် တဝ်း၊ “အာဝ် ကာအာပ် မဲ ကာလာင် ဂြုဝ်း တီ ဒီ ဒါ တာင် အီ အိုပ် တူတ့် ဒူအီ အီ လှူ ဒီ ဇဝ်ဖြာ။”

23 ဇဝ် ယေဆူ ဝီ တဝ်း၊ “ဆေ အုဝ် ဟဲ့ ကာလာင် ဂြုဝ်း တူ မှာန်၊ တဲး မဲ ဘျ လွင် အန် တီ။ ဆေ ဂြုဝ်း အုဝ် ယီ မှာန်၊ မှဝ် န့ ပါယ် ပီ ကာထ မဲ ကာလာ အုဝ်။း” 24 ပန် တီ အာနာတ် တူ ဂဝ်း ဝန် ပီ ပက် ဂေ ဇဝ် ယေဆူ၊ အန် ဝီ စ်ု ဂေ တိုယ် ဇဝ် ယေဆူ ဒီ အာကာယ်ဖာ၊ အီ မုး ဒါ တာင် အီ အိုပ် တူတ့် ဒူအီ အီ လှူ ဒီ ဇဝ်ဖြာ။

25 အာပေတာရူ ယီ ဝါတ် ငဝ် တွိုန်။ န့ ဝီ မိုဝ်း ပေါ အူ ဝီ ဒီမွှတ် အန်၊ “ဟဲ့ မှာန်၊ မဲ မုး ဒီဘဲ ဒူအီ တွိုန်။း” အာပေတာရူ ဝီ တဝ်း၊ “အာဝ် မုး။”

26 ပန် တီ န့ ဝီ မုး ဒဲစေန့် ဒါ တာင် အီ အိုပ် တူတ့် ဒူအီ အီ လှူ ဒီ ဇဝ်ဖြာ ပေါ အူ ဝီ။ အန် မုး ဝေါဝဲ အီ ပီ ဒဲပ် ဝဲန် အာပေတာရူ ဟျုဝ့် အန် တွိုန်။ ဒူအီ ဝီ တီ တဝ်း၊ “ဟဲ့ မုး၊ အုဝ် ဟဲ့ ယိုဝ် မဲ ဒေါ ကွယ် ရိုမ် မဲ ဒူပ် အာယေဆူ ခဲင် ကာပိုမ် ဟေ နာမန် တွိုန်။” 27 ပေါ အူ ဇေန့် အာပေတာရူ ဝီ ကာလုဝ် တဝ်း၊ “အာဝ် မုး။” အန် ဟဲ့ ဟွတ့် တဝ်း ပါယ် တီ၊ ဒေါ အန် တီ အူ ဇေန့် အျီန် ဘော ကာတွုန်။

28 ဝါယ် အန် တီ ဂေ တိုယ် ဇဝ် ယေဆူ လေး ဒူင် ကွယ် အာကာယ်ဖာ၊ တိုယ် အန် ဟာဝ် ဒူင် ကွယ် ဒါ ကာညာ ရုဝ်မာ။ ဒေါ အန် တီ န့ မုး ဆိန့်ဝး စေဝ်။ ဂေ ဒူအီ အာယူဒါ ယီ တူ လိုပ် ဒူင် ကွယ် ဒါ ကာညာ ရုဝ်မာ တွိုန်။ ဂေ ယုဝ်၊ ဆေ ဂေ လိုပ် ဒူင် ကွယ် ဒူအီ အီ တူ မုး ဒူအီ အာယူဒါ၊ န့ ဒီ တဲး ဂေ တူ ဆီငါ ဒူပ် ပီ မာနုဝ် ဒါရာ ဂေ။ ဟဲ့ ဟွတ့်၊ ဂေ တူ ဝီ ပွိုန် ဒီ ဟူမ် ဘ့လွယ် ဒေါ လှုဝ်း ဂေ ဇဝ်ဖြာ ကာလုဝ်း ကာင် ဂေ။ ဂေ ယီ ဆီ ဟူမ် ဘ့လွယ် တီ။ ခုဝ်၊ ဂေ တူ လိုပ် ဒူင် ကွယ် ဒါ ကာညာ ရုဝ်မာ တွိုန်။ 29 အာဖီလာတ် အီ မုး ဒါ ကာညာ ရုဝ်မာ တွိုန်၊ ဝီ ဟာဝ် ဒူင် ဂေ၊ ဝီ ဒီမွှတ် တဝ်း၊ “မာဆေ ပီ ဖျာက် ဘေ ဒူအီ ဝီ နီ။း”

30 ဂေ ဝီ တဝ်း ဒီ အန်၊ “အန် မုး ဒူအီ အီ ဘူင် နာ တူ မွှိုမ် ဘဲန် မျုဝ် ဘဲန် မျုဝ်။ ဆေ အန် တူ မုး ဒူအီ ဟာယ်၊ ယေ တူ တး အာပ် အန် ဒီ မဲ။” 31 အာဖီလာတ် ဝီ တဝ်း၊ “တဲး ဘေ ဆုင်ဖျာတ် အာမူ အန်၊ တဲး န့ ဒူပ် ဒါရာ ဘေ။” ဂေ ဒူအီ အာယူဒါ ပီ ဝီ တဝ်း၊ “ဘေ ဒူအီ ရုဝ်မာ တူ ခ့ဝါင် ယေ ငဝ်း အာဆာက် အီ။” 32 ဂေ ဟဲ့ ဟွတ့် တဝ်း ပါယ် တီ၊ တဲး န့ ပီ ဂြုဝ်း ပီ ဒွိုမ် ကာလာင် ဇဝ် ယေဆူ လွင် ဂေ ဒီ ပါယ် မှဝ် ဒီ ငဝ်း အာဆာက် အန်။

33 အာဖီလာတ် ဝီ လိုပ် ခဲင် ဟုဝ် အန်၊ ဝီ ဒဲ့ ဇဝ် ယေဆူ ဒူပ် အန်၊ ဒီမွှတ် အန် တဝ်း၊ “ဟဲ့ မှာန်၊ မုး မဲ ခုန်ဒီခမ် အီ အိုပ် ဂေ ဒူအီ အာယူဒါ။း”

34 ဇဝ် ယေဆူ ဝီ ဒီမွှတ် တဝ်း၊ “ဂြုဝ်း မဲ တီ၊ န့ မုး ပီ ကာဖာ မဲ ခဲင် နဝ်း မဲ။း န့ မုး ပီ ကာလာင် အီ ဟဝ် ဒီ မဲ လွင် အုဝ်။း”

35 အာဖီလာတ် ဝီ တဝ်း၊ “အုဝ် တူ မုး ဒူအီ အာယူဒါ။ န့ မုး ဂေ ဒူအီ အာမျုဝ် မဲ၊ ဂေ ဒါ တာင် အီ ယဲတ့် ဂေ ဒူအီ အီ လှူ ဒီ ဇဝ်ဖြာ ဘေ၊ ဂေ ဟဲ့ တး အာပ် မဲ ဒီ အုဝ်။ တဲး မဲ ကာလာင် ဒီ အုဝ်၊ မာဆေ န့ မုး၊ ပဲ့ ဟဲ့ လုတ့် မဲ။း”

36 ဇဝ် ယေဆူ ပီ ဝီ တဝ်း၊ “မိူင် ပီ အိုပ် အုဝ် တူ မုး ဒဲင် ကာဒါယ် နီ။ ဆေ န့ ကွယ် ဒဲင် ကာဒါယ် နီ၊ ဂေ အာမူ အာမာတ် အုဝ်၊ ဂေ ဒီ ဘော ကာဂုဝ်း ဒါင် အုဝ်၊ ကွဲ့ တဲး ဂေ ဒူအီ အာယူဒါ မှေတ့် အုဝ်။ မိူင် ပီ အိုပ် အုဝ်၊ န့ တူ မုး ပါယ် တီ။”

37 ပန် တီ အာဖီလာတ် ဝီ ဒီမွှတ် တဝ်း၊ “ဆေ န့ ပါယ် တီ၊ ဟဲ့ မှာန်၊ မဲ မုး ခုန်ဒီခမ်။း” ဇဝ် ယေဆူ ပီ ဝီ တဝ်း၊ “ဟဲ့ မှာန် ဆေ မဲ တဝ်း၊ အုဝ် မုး ခုန်ဒီခမ်။ အုဝ် ဟဲ့ တး ဒဲင် ကာဒါယ် နီ။ အုဝ် မိူဝ် ဟဲ့ ဘဲန် ဒူအီ၊ တဲး အုဝ် ခဲ ဆက်ဆေ လွင် နာ မှာန်။ အာဆေ အိုင် နာ မှာန်၊ အန် ဒီ ထူမ် ဂြုဝ်း အုဝ်။”

38 အာဖီလာတ် ဝီ တဝ်း ဒီ အန်၊ “မာဆေ န့ မုး၊ နာ မှာန်။း” အန် ဟဲ့ ဟွတ့် ကာလာင် ဂြုဝ်း တီ၊ အန် ဝီ လေး ခဲင် ဟုဝ်၊ ဝီ ဟာဝ် ဒူင် ကွယ် နှဝ့် ဂေ ဒူအီ အာယူဒါ တွိုန်၊ ဝီ တဝ်း၊ “အုဝ် တူ ယိုဝ် မာဆေ ပီ လုတ့် အန်။ 39 ဒေါ ဘူင် ဘေ ဘ့လွယ် ဘေ၊ န့ ယီ မိုဝ်း ဟိတ်၊ တဲး အုဝ် ဘ့လေး ဒူအီ အာမျုဝ် ဘေ အူ ဝီ။ ဘေ ဆီ တဲး အုဝ် ဘ့လေး အီ မုး ခုန်ဒီခမ် ဘေ ဒူအီ အာယူဒါ နီ။း”

40 ပန် တီ ဂေ ဘောကာဂ့လျီတ် ဒတ် တာင် တဝ်း၊ “ကွဲ့ ဘ့လေး ဒူအီ ဝီ တီ။ ဘ့လေး အာဘာရာဘ။” အာဘာရာဘ တွိုန် ယီ မုး ဒါ ဇူန်။