1 ဇဝ် ယေဆူ ဟဲ့ ဟွတ့် ကာလာင် ဂြုဝ်း ဇိုဝ် တီ ဒွန် မျုဝ်၊ အန် ဝီ ဆာကိုဝ်း ဂါင်ဟြာဝ်၊ ဆာခိုဝ်။ အန် တဝ်း၊ “အိုယ် ဂုန့် အုဝ်၊ ဒေါ တီ နီ ဟဲ့ ဟွတ့် ဇမ် အာခြာဝ် ဒီ လုဝ် အုဝ် ခမ် ဒုက်။ တဲး မဲ ဘျ ဒီ အီ လွင် အာဖုင် ဒင်ခုဝ် ပဲ့ ဟဲ့ ဒွါ မဲ ဒီ အုဝ် အီ မုး ဂွန် မဲ၊ တဲး ဘော အုဝ် ဝီ ဘျ အာဖုင် ဒင်ခုဝ် မဲ ဒီ အီ။ 2 မဲ ဟဲ့ ဒွါ ပွုန် ဒီ အုဝ်၊ တဲး အုဝ် အိုပ် ဂေ ဒူအီ ဒွန် အီ၊ တဲး အုဝ် ပွိုန် ဒီ ဒွါ အာဆာက် ကာမာယ် ဒီ ဒူအီ ပီ ဒွါ မဲ ဒီ အုဝ်၊ တဲး ဂေ ပွိုန် ဒီ ကွယ် ရိုမ် ဒူပ် မဲ ဇဝ်ဖြာ ဆေဆေ။ 3 အာဆာက် ကာမာယ် တီ၊ န့ ဒီ တဲး ဂေ နပ် ဆီချာ မဲ ဇဝ်၊ အီ မုး ဇဝ်ဖြာ အာခါခ်ု။ န့ မိူဝ် တဲး ဂေ နပ်၊ န့ မိုဝ်း မီ မဲ အူ ကာဒင် နီ။ န့ ဘော တဲး ဂေ နပ် အုဝ်၊ အီ မုး ဇဝ် ယေဆူ၊ ဝီ ပီ တိုယ် မဲ တး ကွယ် ဒီ နီ။ 4 အုဝ် ဟဲ့ ကွယ် ဒဲင် ကာဒါယ်၊ ဘူင် ဂါန် ပီ စ်ု မဲ အုဝ် ဘူင်။ ပါယ် တီ အုဝ် ဟဲ့ ဘျ အာဖုင် ဒင်ခုဝ် မဲ ဒီ အီ။ 5 ဒေါ တီ နီ၊ အုဝ် ဝီ မှာန့် ဒီ မဲ ဂုန့် အုဝ်၊ တဲး မဲ ဘျ အာဖုင် ဒင်ခုဝ် အုဝ် ဒီ ဂေ အီ ကွယ် ဒီ အာတ့် မဲ၊ တဲး န့ ပီ ဒေါ ကွယ် ရိုမ် အုဝ် ဒူပ် မဲ ဆိန့် အာတ့် ဘူင် မဲ ကာဒါယ် နီ။

6 န့ မိုဝ်း ဂေ ဒူအီ အီ ကွယ် ဒဲင် ကာဒါယ် နီ၊ ဝီ ပီ ဒွါ မဲ ဒီ အုဝ်၊ တဲး ဂေ ဒူပ် အုဝ်။ အုဝ် ဟဲ့ ဘျ ဒွန် မျုဝ် လွင် မဲ ဇဝ် ဒီ ဂေ ဒူအီ ဇိုဝ် တီ။ ဂေ မိူဝ် ဟဲ့ ထူမ် ဒူပ် ဂြုဝ်း ပီ ကာလာင် မဲ။ 7 ဒေါ တီ နီ၊ ဂေ ဟဲ့ နပ် လွင် ပီ ဒွါ မဲ ဒီ အုဝ် ဒွန် မျုဝ်၊ န့ တး ဒီ မဲ။ 8 ဂေ နပ် လွင် အန် တီ ကူပ် ကာလာင် အုဝ် ဒီ ဂေ လွင် ဂြုဝ်း ပီ ဒွိုမ် ကာလာင် မဲ ဒီ အုဝ်။ ဂေ မိူဝ် ဟဲ့ ညှိုမ် ဂြုဝ်း တီ၊ ဂေ နပ် ဆီချာ လွင် ဟဲ့ တး အုဝ် ဒူင် ကွယ် မဲ။ ခုဝ်၊ ဂေ ညှိုမ် မဲ ဟဲ့ တိုယ် အုဝ် တး ကွယ် ဒူင် ကွယ် ဂေ။ 9 အုဝ် မိူဝ် ဆာခိုဝ် ဒါင် ဂေ ဒူအီ ဇိုဝ် တီ။ အုဝ် တူ ဆာခိုဝ် ဒါင် ဂေ ဒူအီ ဒွန် အီ အီ ကွယ် ဒဲင် ကာဒါယ် နီ။ အုဝ် ယီ ဆာခိုဝ် ဒါင် ဂေ ဒူအီ ပီ ဒွါ မဲ ဒီ အုဝ်။ ခုဝ်၊ ဂေ မုး ဒူအီ မဲ။ 10 ခဲ့ မိုဝ်း အုဝ် ဒွန် မျုဝ်၊ န့ မုး ကြုဝ် မဲ။ ဘော ခဲ့ မိုဝ်း မဲ၊ န့ ဘော မုး ကြုဝ် အုဝ်။ ကူပ် ညှိုမ် ဂေ၊ န့ ဟဲ့ ဘျ အာဖုင် ဒင်ခုဝ် အုဝ်။ 11 အာဝ် လှေန့်၊ အုဝ် အာဝ် ဟူ ကွယ် ဒဲင် ကာဒါယ်။ အုဝ် ဒီ ဝီ တး ဇမ် ဒူင် ကွယ် မဲ။ ယီ မုး ဂေ၊ ဂေ အီ ဆီ ကွယ် ဒဲင် ကာဒါယ်။ မဲ ဂုန့် အုဝ်၊ အီ ဘွတ် ကာဆဝ်၊ တဲး မဲ ဒိုဝ်း ပွုန် မဲ၊ အီ မုး ပွုန် ပီ ဒွါ မဲ ဒီ အုဝ်၊ တဲး မဲ ဘ်ု ရိတ် အာဆာက် ဂေ၊ တဲး ဂေ လာယ် ဘဲန် အူ နဝ်း ပီ အာယ် ဟဲ့ ဘဲန် အူ နဝ်း။ 12 ဒေါ ကွယ် ရိုမ် အုဝ် ဒူပ် ဂေ၊ အုဝ် ဟဲ့ ဒိုဝ်း ပွုန် မဲ တီ၊ ဝီ ယွတ် မဲန် ဂေ၊ တဲး ဂေ ကွယ် ဆီချာ။ အာဝ် မိုဝ်း အာဆေ အီ ဟဲ့ ဘျုဝ်း။ န့ မိုဝ်း မီ အူ ဝီ တွိုန်၊ အီ ဒီ စှိုမ် အာဆာက် အန်၊ တဲး န့ ဘဲန် ပီ ဒွိုမ် ဒဲမ် ခဲင် ဘပ် ဇဝ်ဖြာ။

13 ဒေါ တီ နီ၊ အုဝ် ဒီ ဝီ တး ဇမ် ဒူင် ကွယ် မဲ။ အုဝ် ယီ မှာန့် ဇိုဝ် တီ ဒေါ ဆီ ကွယ် အုဝ် ဒဲင် ကာဒါယ် နီ၊ တဲး အီ ဒါခိုယ် ကော နုဝ့် ခဲင် နဝ်း ဂေ။ 14 အုဝ် ဟဲ့ ဟွတ့် ကာလာင် ဂြုဝ်း မဲ ဒီ ဂေ။ ဂေ ဒူအီ အီ ကွယ် ဒဲင် ကာဒါယ် မိူဝ် ဟဲ့ ဇွင့် ဂေ ကူပ် တူ ပီ ဂေ ဒူအီ ဒဲင် ကာဒါယ်။ ဂေ ပီ အုဝ်။ ဘော အုဝ် တူ ပီ ဂေ ဒူအီ ဒဲင် ကာဒါယ် နီ။ 15 အုဝ် တူ မှာန့်၊ တဲး မဲ တဲး ဂေ လေး ဒဲင် ကာဒါယ် နီ။ အုဝ် မှာန့်၊ တဲး မဲ ဂွင့် ရဲ ဂေ၊ ကွဲ့ တဲး ဂေ ကာဒုး အီ ဟာယ်။ 16 ဂေ တူ ပီ ဂေ ဒူအီ အီ ကွယ် ဒဲင် ကာဒါယ်။ န့ ပီ ဘော အုဝ် တူ ပီ ဂေ အီ ကွယ် ဒဲင် ကာဒါယ်။ 17 မဲ ဇဝ်၊ တဲး နာ မှာန် လိုပ် ခဲင် နဝ်း ဂေ၊ ဘူင် တဲး ဂေ ဘဲန် ဒူအီ အီ ဆီငါ ဘွတ်။ ဂြုဝ်း ပီ ကာလာင် မဲ တီ ဟဲ့ မုး နာ မှာန်။ 18 မဲ မိူဝ် ဟဲ့ တိုယ် အုဝ်၊ တဲး အုဝ် ကွယ် ဒဲင် ကာဒါယ် နီ။ ပါယ် တီ အုဝ် မိူဝ် ဝီ တိုယ် ဂေ၊ တဲး ဂေ ကွယ် ဒဲင် ကာဒါယ် နီ။ 19 အုဝ် ဟဲ့ ဘူင် တဲး ဒုဝ် အုဝ် ဆီငါ ဘွတ် လှူ ဒီ မဲ ဇဝ်၊ တဲး ဘော ဂေ ဝီ ဘဲန် ဒူအီ အီ ဆီငါ ဘွတ် အာခါခ်ု။

20 အုဝ် ယီ တူ ဆာခိုဝ် မီ ဒါင် ဂေ။ အုဝ် ဆာခိုဝ် ဘော ဒါင် ဂေ ဒူအီ အီ ညှိုမ် အုဝ် ဒေါ ထူမ် ဂေ ဂြုဝ်း ပီ ကာလာင် ဒီဘဲ အုဝ် ဒီ ဂေ။ 21 အုဝ် ဆာခိုဝ် ဒါင် ဂေ ဒူအီ ဇိုဝ် တီ၊ တဲး ဂေ ဘောကာဂ့လျီတ် ဘဲန် အူ နဝ်း၊ တဲး န့ ပီ ဘော မဲ အီ မုး ဂုန့် အုဝ် ဟဲ့ ကွယ် ရိုမ် ဒူပ် အုဝ်၊ အာဝ် ပွိုန် ကာယဝ်း။ တဲး ဂေ အီ ညှိုမ် ဘောကာဂ့လျီတ် ကွယ် ရိုမ် ဒူပ် အာယ်၊ တဲး ဘော ဂေ ဒူအီ ဟဝ် အီ ကွယ် ဒဲင် ကာဒါယ် ကော ဝီ ညှိုမ် အုဝ်။ ပါယ် တီ ဂေ ဒီ ဘော နပ်၊ န့ မုး မဲ အီ ဟဲ့ တိုယ် အုဝ် တး ကွယ် ဒီ နီ။ 22 အုဝ် ဟဲ့ ဟွတ့် ဒွါ ဒီ ဂေ အာဖုင် ဒင်ခုဝ် ပီ ဒွါ မဲ ဒီ အုဝ်၊ တဲး ဂေ ဝီ ဘဲန် အူ နဝ်း၊ တဲး န့ ပီ အာယ် ဟဲ့ ဘဲန် အူ နဝ်း။ 23 တဲး န့ ပီ အုဝ် ကွယ် ခဲင် နဝ်း ဂေ ပီ မဲ ကွယ် ခဲင် နဝ်း အုဝ်။ တဲး မဲ ဘူင် တဲး ဂေ ဘဲန် အူ နဝ်း၊ ကွဲ့ ဟူ တဲး န့ မိုဝ်း အာဆေ အီ ပဲ ဒီ လာယ် ကာယဝ်း ဂေ။ ပါယ် တီ ဂေ ဒူအီ ဒဲင် ကာဒါယ် ဒီ ဘော နပ်၊ န့ မုး မဲ၊ မဲ ဟဲ့ တိုယ် အုဝ်။ ဂေ ဒီ ဘော နပ်၊ အုဝ် ဟဲ့ ရွက့် ဂေ ပီ မဲ ဟဲ့ ရွက့် အုဝ်။

24 မဲ ဂုန့် အုဝ်၊ ဒူအီ ပဲ့ ဟဲ့ ဒွါ မဲ ဒီ အုဝ်၊ အုဝ် ဆီ တဲး ဂေ ကွယ် ရိုမ် ဒူပ် အုဝ် ဒူင် ကွယ် အုဝ်၊ တဲး ဂေ ဘော ပွိုန် ဒီ ယိုဝ် အာဖုင် ဒင်ခုဝ် အုဝ်။ န့ မုး အာဖုင် ဒင်ခုဝ် ပဲ့ ဟဲ့ ဒွါ မဲ ဒီ အုဝ် ကူပ် ရွက့် မဲ ဒီ အုဝ်။ မဲ ဟဲ့ ရွက့် အုဝ် အူ ဆိန့် အာတ့် ဖာန် ဘ့လေး မဲ ကာဒါယ် နီ။

25 အိုယ် မဲ ဂုန့် အုဝ်၊ မဲ ဘူင် နာ မှာန် ဆေဆေ။ ဂေ ဒူအီ အီ ကွယ် ဒဲင် ကာဒါယ်၊ ဂေ တူ နပ် မဲ။ န့ မုး အုဝ် အီ နပ် မဲ။ ဂေ အီ ညှိုမ် အုဝ် ယီ နပ်၊ န့ မုး မဲ၊ အီ ဟဲ့ တိုယ် အုဝ် တး ကွယ် ဒီ နီ။ 26 အုဝ် ဟဲ့ ကာလာင် ဒီ ဂေ လွင် မဲ၊ တဲး ဂေ ဘော နပ် မဲ။ အုဝ် ဒီ ဘော ကာလာင် ဟာဝ် လွင် မဲ။ ပါယ် တီ န့ ဒီ တဲး မဲ ရွက့် ဂေ ပီ မဲ ရွက့် အုဝ်။ ပါယ် တီ ဘော အုဝ် ဒီ ကွယ် ခဲင် နဝ်း ဂေ။”