ဇဝ် ယေဆူ ဝီ တဝ်း ဒီ ဒီဘဲ အန်၊ “ဇိုဝ် တီ ဒွန် မျုဝ် အုဝ် ဟဲ့ ကာလာင် ဒီ ဘေ၊ ကွဲ့ တဲး ဘေ ကာလိုပ် ဒေါ ကာဒုး ဘေ ဒုက်။ 2 ဂေ ဒီ ဆုတ့် လေး ဘေ ခဲင် ဖိုင် ဂေ၊ တူ တဲး ဘေ ကွယ် ခဲင် ဇူင် ဂေ။ န့ ဒီ ဘော တး အာခြာဝ် ဒေါ ထာင် ဂေ၊ ဂေ ဒီ ဘူင် ပီ အိုင် ဇဝ်ဖြာ၊ ဆေ ဂေ ငဝ်း ယမ် ဘေ။ 3 ဂေ ဒီ ဘူင် ပါယ် တီ ကူပ် တူ ဒွိုမ် နပ် ဂေ ဘော ဇဝ်ဖြာ ဘော အုဝ်။ 4 အုဝ် ဟဲ့ ကာလာင် ဒီ ဘေ လွင် အန် တီ၊ တဲး ဘေ လှုဝ်း ဂြုဝ်း အုဝ်။ အုဝ် ဟဲ့ ဒွိုမ် ဒမ် ဆာဒိက် ဒီ ဘေ။ ကူပ် ကွယ် ရိုမ် အုဝ် ဒူပ် ဘေ ခါ အာတ့် အုဝ် တူ ဒွိုမ် ကာလာင် လွင် အန် တီ ဒီ ဘေ။”

5 ဇဝ် ယေဆူ ဝီ တဝ်း၊ “ဒေါ တီ နီ၊ အုဝ် ဒီ ဝေန့် ဒူင် ကွယ် အန် ဇဝ် အီ ဟဲ့ တိုယ် အုဝ်။ ဘေ ယီ တူ ဒီမွှတ် အုဝ်၊ တဝ်း၊ ‘မှဝ် မဲ ဒီ ဝဝ့်။း’ 6 ကူပ် ကာလာင် အုဝ် ဂြုဝ်း ဇိုဝ် တီ ဒွန် မျုဝ်၊ န့ တဲး ဘေ ဘဲန် နဝ်း က့လိုဝ်။ 7 အုဝ် ယီ တဝ်း အာခ်ု ဒီ ဘေ၊ ဆေ အုဝ် လေး တ ဒူင် ကွယ် ဘေ၊ န့ ဒီ ဘဲန် အာဂျိုဝ် ဒီ ဘေ။ ဆေ အုဝ် တူ ဟာဝ်၊ အီ ဒီ စွယ် ဘေ တူ တး။ ဆေ အုဝ် ယီ ဟာဝ်၊ အုဝ် ဒီ တိုယ် အန် တး ဒီ ဘေ။ 8 ဆေ အန် တး၊ အန် ဒီ တဲး ဒူအီ ဒဲင် ကာဒါယ် နပ် ဆီချာ လွင် မှာပ် ဂေ။ အန် ဒီ ဘော တဲး ဂေ နပ် လွင် နာ မှာန် နာ မွှိုမ် ဘော လွင် ဇဝ်ဖြာ ဒီ ဒမ် မှာပ် ဒီ အီ။ 9 အန် တဲး ဂေ နပ် ဆီချာ လွင် မှာပ် ကူပ် တူ ညှိုမ် ဂေ ဒီ အုဝ်။ 10 အန် ဒီ မာနုဝ် လွင် နာ မှာန် နာ မွှိုမ်။ ခုဝ်၊ အုဝ် ဟာဝ် ဒူင် ကွယ် ဂုန့် အုဝ်။ ပန် တီ ဘေ အာဝ် ဟူ ပွိုန် ယိုဝ် အုဝ်။ 11 အန် ဒီ မာနုဝ် အီ လွင် ဇဝ်ဖြာ ဒမ် မှာပ် ဒီ ဂေ။ ခုဝ်၊ ဇဝ်ဖြာ ဟဲ့ ဟွတ့် ဒမ် မှာပ် ဒီ ဒါ ကာညာ အီ အိုပ် ကာဒါယ် နီ။

12 ဒဲင် တီ၊ အုဝ် ဆီ မိုဝ်း ကိူန် ပီ ဒီ ကာလာင် ဒီ ဘေ။ ဘေ ယီ ညှမ် ပဲ ဒီ ခမ် တူတ့်။ 13 န့ ယီ မုး နဝ်း ဖွိုမ် ဇဝ်ဖြာ အီ တဲး ဘေ နပ် နာ မှာန်၊ ဆေ အန် ဟီ တး၊ အန် ဒီ ဘျ တူတ့် ဒွန် မျုဝ် ဒီ ဘေ လွင် အီ မှာန် အီ မုး။ အန် တူ ကာလာင် ဒီ ဘေ အီ လေး ခဲင် အာငျာန် အန်။ အန် ဒီ ဝီ ခဲ ဒီ ဘေ ခဲ့ ယိုဝ် အန် ဂြုဝ်း ဇဝ်ဖြာ။ အန် ဒီ ဘော ခဲ ဒီ ဘေ လွင် ပီ ဒီ ပါယ် ဘဲန် မျုဝ် ဘဲန် မျုဝ် အီ ဒီ ဘဲန် နာ အာတ့်။ 14 အန် ဒီ ထူမ် ဂြုဝ်း အုဝ်၊ ပီ ဝီ ကာလာင် ဒီ ဘေ။ ပါယ် တီ န့ ဒီ တဲး အာဖုင် ဒင်ခုဝ် အုဝ် လိုဝ်း ဒီ ဘေ။ 15 ခဲ့ မိုဝ်း ဂုန့် အုဝ် ကြုဝ်ကြာမ်၊ န့ မုး တူတ့် ကြုဝ်ကြာမ် အုဝ်။ ခုဝ် အန် တီ အုဝ် ဟဲ့ တဝ်း၊ နဝ်း ဖွိုမ် ဇဝ်ဖြာ တီ၊ အန် ဒီ ထူမ် ဂြုဝ်း အုဝ်၊ ပီ ဝီ ကာလာင် ဒီ ဘေ။ 16 အာဝ် လှေန့်၊ ဘေ အာဝ် ဟူ ယိုဝ် အုဝ်။ ဟဲ့ ဟွတ့်၊ ပေါ အူ ကာစန်၊ ဘေ ဒီ ဝီ ယိုဝ် အုဝ်။”

17 ဇဝ် ယေဆူ ဟဲ့ ဟွတ့် ကာလာင် ဂြုဝ်း တီ၊ ဂေ ဒီဘဲ အန် ဝီ လာယ် ကာမွုန်၊ ဝီ တဝ်း၊ “မှဝ် န့ ပါယ် ပီ တဝ်း အန်၊ ‘အာဝ် လှေန့် ဘေ အာဝ် ဟူ ယိုဝ် အုဝ်။ ဟဲ့ ဟွတ့်၊ ပေါ အူ ကာစန်၊ ဘေ ဒီ ဝီ ယိုဝ် အုဝ်’။း မှဝ် န့ ပါယ် ပီ တဝ်း အန်၊ ‘ခုဝ်၊ အုဝ် ဟာဝ် ဒူင် ကွယ် ဂုန့် အုဝ်’။း” 18 ဂေ ဝီ တဝ်း၊ “ယေ တူ နပ် လွင် ဒါင် ဂြုဝ်း အန်၊ ဒေါ တဝ်း အန်၊ ‘အာဝ် ဟူ လှေန့်’ လွင် မာဆေ န့ မုး။း”

19 ဇဝ် ယေဆူ ဝီ နပ်၊ ဂေ ဆီ ဒီမွှတ် အန် လွင် အန် တီ။ ခုဝ်၊ အန် ဝီ တဝ်း ဒီ ဂေ၊ “မာဆေ ပီ လာယ် ကာလာင် ဘေ။း န့ မုး၊ ဘေ လာယ် ဒီမွှတ် လွင် ဒါင် ဂြုဝ်း အုဝ် ဒေါ တဝ်း အုဝ်၊ ‘အာဝ် လှေန့် ဘေ အာဝ် ဟူ ယိုဝ် အုဝ်။ ဟဲ့ ဟွတ့်၊ ပေါ အူ ကာစန် ဘေ ဒီ ဝီ ယိုဝ် အုဝ်’။း 20 အုဝ် တဝ်း အာခ်ု ဒီ ဘေ။ ဂေ ဒူအီ ဒဲင် ကာဒါယ်၊ ဂေ ဒီ ခူယ် ကာဆဝ်။ ဒေါ အန် တီ ဘေ ယီ ဒီ ယာမ် ဘော မိုဝ်း နဝ်း က့လိုဝ်။ နဝ်း က့လိုဝ် ဘေ တီ၊ ယီ ဒီ ဝီ ဘဲန် နဝ်း ဒါခိုယ်။

21 န့ ပီ အီဘိုန့် အူ ဝီ၊ ဆေ ဂွန် အန် ဟီ ဒီ ဂွိုတ်၊ အန် ဒီ ဘော လုဝ် ခမ် ဆဝ် ကာဆဝ်။ ဆေ ဂွန် အန် ဟီ ဟွတ့် ဂွိုတ်၊ အန် ပိဝ် ဆဝ် အန် ဒွန် မျုဝ် ကူပ် ဒါခိုယ် နဝ်း အန် လွင် ဂွန် ကာမာယ် တီ၊ အီ ဟဲ့ တး ဂွိုတ် ကွယ် ဒဲင် ကာဒါယ်။ 22 န့ ဘော ပါယ် တီ ဒီ နဝ်း ဘေ။ ဒေါ တီ နီ နဝ်း ဘေ ဟဲ့ က့လိုဝ်။ အုဝ် ဒီ ဝီ တး၊ တဲး ဘေ ဝီ ယိုဝ် အုဝ်။ ဒေါ အန် တီ နဝ်း ဘေ ဒီ ဝီ ဒါခိုယ်။ ဟဲ့ ဟွတ့်၊ န့ တူ ဝီ မိုဝ်း အာဆေ အီ ပဲ ဒီ ဘူင် ကွဲ့ တဲး ဘေ ဒါခိုယ်။ 23 ဆေ န့ ဟီ ဇမ် အာခြာဝ် တီ၊ ဘေ တူ ဝီ ဒီမွှတ် အုဝ် လွင် ဘဲန် မျုဝ် ဘဲန် မျုဝ်။ အုဝ် ယီ တဝ်း အာခ်ု ဒီ ဘေ။ ဆေ ဘေ မှာန့် ဒီ ဇဝ်ဖြာ၊ ဂါဝ် ပွုန် အုဝ်၊ ဂုန့် အုဝ် ဒီ ဒွါ တူတ့် ဒွန် မျုဝ် ပီ မှာန့် ဘေ။ 24 ကော ဇမ် အာတိုဝ်၊ ဘေ တူ ဒွိုမ် မှာန့် မာဆေ ဒီ ဇဝ်ဖြာ ကူပ် ညှိုမ် ဘေ ဒီ အုဝ်။ တဲး ဘေ မှာန့်၊ ဘေ ဒီ ဘော ပွိုန် ခဲ့ ပီ မှာန့် ဘေ တီ။ ပန် တီ နဝ်း ဘေ ဒီ ဒါခိုယ်၊ အာဝ် ဟူ လုဝ် မာဆေ။

25 အုဝ် ဟဲ့ ဒွိုမ် ကာလာင် အူဖာမာ ဒီ ဘေ၊ တဲး ဘေ နပ် လွင် ဇဝ်ဖြာ။ န့ ယီ ဒီ မိုဝ်း အာခြာဝ် ဒေါ ဟူ ကာလာင် အုဝ် ဒီ ဘေ ဂြုဝ်း ဇိုဝ် တီ။ အုဝ် ဒီ ဝီ ကာလာင် ဆိူဝ် ဒီ ဘေ လွင် ဂုန့် အုဝ်။ 26 ဒေါ အန် တီ ဘေ ဒီ မှာန့် ဒီ ဇဝ်ဖြာ၊ ဂါဝ် ပွုန် အုဝ်။ အုဝ် မိူဝ် တူ ဝီ မှာန့် ဒီ ဇဝ်ဖြာ ဒါင် ဘေ။ 27 န့ မုး ဇဝ်ဖြာ၊ အန် ဟဲ့ ရွက့် ဘေ ကူပ် ရွက့် ဘေ ဒီ အုဝ်။ ဘေ မိူဝ် ညှိုမ်၊ န့ မုး ဇဝ်ဖြာ အီ ဟဲ့ တိုယ် အုဝ်။ 28 ပါယ် တီ၊ အုဝ် ဟဲ့ လေး ဒူင် ကွယ် ဇဝ်ဖြာ၊ တး ကွယ် ဒဲင် ကာဒါယ် နီ။ ဒေါ တီ နီ အုဝ် ယီ ဝီ လေး တ ဒဲင် ကာဒါယ် နီ၊ ဝီ ဟုဝ့် ဒူင် ကွယ် ဂုန့် အုဝ်။”

29 ဇဝ် ယေဆူ ဟဲ့ ဟွတ့် ကာလာင် ဂြုဝ်း တီ၊ ဂေ ဒီဘဲ အန် ဝီ တဝ်း၊ “ဒေါ တီ နီ မဲ ကာလာင် ဂြုဝ်း ဆိူဝ် ဒီ ယေ။ အာဝ် မုး အူဖာမာ။ 30 ဒေါ တီ နီ၊ န့ ဘော ကာလှုး ဒီ နဝ်း ယေ လွင် မဲ။ မဲ နပ် တူတ့် ဒွန် မျုဝ် အာတ့် ဒီမွှတ် ယေ ဒီ မဲ။ အာဝ် လုဝ် ကာလာင် ဒီ မဲ၊ တဲး မဲ နပ် ပီ ထာင် အီ။ ခုဝ် အန် တီ ယေ ညှိုမ်၊ မဲ ဟဲ့ လေး ဒူင် ကွယ် ဇဝ်ဖြာ၊ တး ကွယ် ဒီ နီ။”

31 ဇဝ် ယေဆူ ဝီ ဒီမွှတ် တဝ်း၊ “ဆေ န့ ပါယ် တီ၊ ဒေါ တီ နီ ဘေ ညှိုမ်။း” 32 ဟဲ့ ဟွတ့်၊ အန် ဝီ တဝ်း၊ “န့ ဒီ ဇမ် အာခြာဝ် အန်၊ မာလဲ၊ ဟဲ့ ဟွတ့် ဇမ် ဒေါ တီ နီ။ ဒေါ အန် တီ ဘေ ဒီ ဘော ကာယဝ်း။ ဘေ ဒွန် အီ ဒီ ဝေန့် ကာင် ဘေ။ ဘေ ဒီ ဘော ဝဲန် အုဝ်၊ တဲး အုဝ် ကွယ် အူ ဝီ။ အုဝ် ယီ တူ ကွယ် အူ ဝီ ဒေါ မှဝ်။ ဂုန့် အုဝ် ကွယ် ရိုမ် ဒူပ် အုဝ် ဆေဆေ။

33 အုဝ် ဟဲ့ ကာလာင် ဒီ ဘေ လွင် ဇိုဝ် တီ ဘဲန် မျုဝ် ဘဲန် မျုဝ်၊ တဲး ဘေ ညှိုမ် အုဝ်၊ တဲး ဘေ မိုဝ်း နဝ်း ဂျီတ်။ ဒဲင် ကာဒါယ် နီ ဘေ ဒီ ကာဒုး ဒုက်။ ကွဲ့ တဲး န့ ဘဲန် နဝ်း လိုဝ် ဒီ ဘေ။ အုဝ် ဟဲ့ ပဲ တူတ့် ဒွန် မျုဝ် အီ ကွယ် ဒဲင် ကာဒါယ် နီ။”