1 ဝါယ် အန် တီ ဇဝ် ယေဆူ ဝီ တဝ်း၊ “န့ မုး အုဝ်၊ အုဝ် ပီ ဟေ မာငုန် မှာန် အာခါခ်ု။ ဂုန့် အုဝ် ဘော ပီ ဒူအီ ရန့် မာန် မာငုန် တီ။ 2 အာဆေ ကွယ် ရိုမ် ဒူပ် အုဝ်၊ အန် ပီ ရာ ဟေ မာငုန် တီ။ ဆေ န့ ယီ မိုဝ်း ရာ အီ တူ မိုဝ်း ဘ့လေ၊ ဒူအီ ရန့် မာန် မာငုန် တွိုန် ဒီ ဝီ ဒဲပ် ဝဲန် ရာ ဇိုဝ် တီ ဒွန် ရာ။ ရာ အီ မိုဝ်း ဘ့လေ၊ အန် ဘော ခြး တဲး န့ ဆီငါ၊ တဲး ဘ့လေ အန် ဝီ ဂ့လမ်။ 3 န့ ယီ မုး ဘေ၊ ကူပ် လိုပ် ဂြုဝ်း ပဲ့ ဟဲ့ ကာလာင် အုဝ် ခဲင် နဝ်း ဘေ၊ န့ ပီ၊ နဝ်း ဘေ ဟဲ့ လုယ် ဆီငါ။ 4 တဲး ဘေ ကွယ် ရိုမ် ဒူပ် အုဝ်။ ဘော အုဝ် ဒီ ကွယ် ရိုမ် ဒူပ် ဘေ။ န့ ပီ ရာ ဟေ မာငုန် တွိုန်။ ဆေ ရာ တူ ဒိုက် ဒီ ဒင် အန် အာဝ် ပွိုန် လေး ဘ့လေ အန်။ ပါယ် တီ ဘော ဘေ၊ ဆေ ဘေ တူ ကွယ် ရိုမ် ဒူပ် အုဝ်၊ အာဝ် မိုဝ်း အာဂျိုဝ် မာဆေ။

5 အုဝ် ပီ ဟေ မာငုန် တွိုန်။ ဘေ ဘော ပီ ရာ အန်။ အာဆေ ကွယ် ရိုမ် ဒူပ် အုဝ်၊ ဘော အုဝ် ဒီ ကွယ် ရိုမ် ဒူပ် အန်။ န့ မုး ဒူအီ ဝီ တီ၊ အန် ပီ ဟေ အီ မိုဝ်း ဘ့လေ ကိူန်။ ခုဝ်၊ ဆေ ဘေ တူ ကွယ် ရိုမ် ဒူပ် အုဝ်၊ ဘေ တူ ပွိုန် ဘူင် မာဆေ။ 6 ဆေ န့ ယီ မိုဝ်း ဒူအီ အီ တူ ကွယ် ရိုမ် ဒူပ် အုဝ် ဆေဆေ၊ အန် ကာဒုး ဒီ ကာယဝ်း ဒီ အုဝ် ပီ ရာ တွိုန် ပီ ဒဲပ် ဝဲန် အီ။ ရာ တီ ဟီ ဟျီ့၊ ဂေ ဝီ ကာနူမ် ဒုဝ့် ခဲင် ငဝ်၊ တဲး န့ ကာဆိုမ် တူတ့်။ 7 ဆေ ဘေ ယီ ကွယ် ရိုမ် ဒူပ် အုဝ်၊ ဆေ ဘေ ဘော လှုဝ်း ဂြုဝ်း အုဝ် ဆေဆေ၊ တဲး ဘေ မှာန့် ပီ ဆီ မှာန့် ဘေ။ အုဝ် ဒီ ဒွါ ဒီ ဘေ။ 8 ဆေ ပီ ဘူင် ဘေ ဝီ ဘဲန် အာဂျိုဝ် ဘဲန် မျုဝ် ဘဲန် မျုဝ်၊ န့ တဲး အာဖုင် ဒင်ခုဝ် ဇဝ်ဖြာ လိုဝ်း ဆီချာ ဒီ အီ၊ န့ ဘော တဲး ဂေ နပ် လွင် မုး ဘေ ဒီဘဲ အုဝ်။

9 အုဝ် ဟဲ့ ရွက့် ဘေ၊ တဲး န့ ပီ ဇဝ်ဖြာ ဟဲ့ ရွက့် အုဝ်။ ခုဝ်၊ တဲး ဘေ ကွယ် ရိုမ် ဒူပ် အုဝ် ဆေဆေ၊ တဲး အုဝ် ရွက့် ဘေ ဆေဆေ။ 10 ဆေ ဘေ ဘော ထူမ် ဘူင် ပီ စ်ု အုဝ် ဒီ ဘေ၊ ဘေ ဒီ ဘော ကွယ် ရိုမ် ဒူပ် အုဝ် ဆေဆေ၊ တဲး အုဝ် ရွက့် ဘေ ဆေဆေ။ ပါယ် တီ ဘော အုဝ် ဟဲ့ ထူမ် ဒူပ် ပီ တဝ်း ဂုန့် အုဝ်၊ တဲး အန် ရွက့် အုဝ် ဆေဆေ။ 11 အုဝ် ဟဲ့ မိုဝ်း နဝ်း ဒါခိုယ်။ အုဝ် ဆီ တဲး ဘော ဘေ မိုဝ်း နဝ်း ဒါခိုယ် ပီ ဒွါ အုဝ် ဒီ ဘေ။ အုဝ် ဆီ တဲး နဝ်း ဘေ ဒါခိုယ် ဆိူတ်၊ အာဝ် ဟူ လုဝ် မာဆေ ပေါ န့ ပွါ။ ခုဝ်၊ အုဝ် ဟဲ့ ကာလာင် ဒီ ဘေ ပါယ် တီ ဒွန် မျုဝ်။ 12 အုဝ် စ်ု ဘေ ဘူင် အူ မျုဝ် နီ၊ တဲး ဘေ လာယ် ရွက့်၊ တဲး န့ ပီ ပီ ရွက့် အုဝ် ဒီ ဘေ။ 13 ဆေ ဒူအီ ခမ် ဒီ ယမ် ကာဒါင် ဂိုက် အန်၊ အန် ရွက့် ကာဆဝ် ဂိုက် အန် တီ။ အာဝ် မိုဝ်း အာဆေ အီ နပ် ဒီ ရွက့် ဒဲင် တီ။ 14 ဆေ ဘေ ဘူင် ပီ စ်ု အုဝ် ဒီ ဘေ၊ ဘေ မုး ဂိုက် အုဝ်။ 15 အုဝ် အာဝ် ဟူ ဒဲ့ ဘေ မုး မှာယ် အုဝ်။ ခုဝ်၊ ဆေ န့ မုး မှာယ် အီ၊ အန် တူ နပ် မာဆေ လွင် ပီ ပါယ် ဒါ ကာညာ အန်။ အုဝ် ယီ ဒဲ့ ဘေ မုး ဂိုက် အုဝ်။ ခုဝ်၊ အုဝ် ဟဲ့ ဟွတ့် ကာလာင် ဒီ ဘေ ဒွန် မျုဝ် ပီ မာနုဝ် ဂုန့် အုဝ် ဒီ အုဝ်၊ တဲး ဘော ဘေ နပ် ခဲ့ တီ။ 16 အာဝ် မုး ဘေ အီ ရဝ်း အုဝ်။ န့ မုး အုဝ်၊ အုဝ် ဟဲ့ ရဝ်း ဘေ၊ တဲး ဘေ ဟာဝ် ဘူင် ဘဲန် မျုဝ် ဘဲန် မျုဝ် အီ ဒီ ဘဲန် အာဂျိုဝ် ဒီ အီ ဆေဆေ၊ ကွဲ့ ဟူ တဲး န့ တူတ့်။ ဆေ ဘေ ဘူင် ပါယ် တီ၊ ဂုန့် အုဝ် ဒီ ဒွါ ဒီ ဘေ ခဲ့ ပီ မှာန့် ဘေ ဒီ အန် ကူပ် ညှိုမ် ဘေ ဒီ အုဝ်။ 17 အုဝ် ဝီ စ်ု ဘေ၊ တဲး ဘေ လာယ် ရွက့်။”

18 ဇဝ် ယေဆူ ဝီ တဝ်း၊ “ဆေ ဂေ ဒူအီ ဒဲင် ကာဒါယ် အီ တူ ညှိုမ် အုဝ် ဝီ ဇွင့် ဘေ၊ တဲး ဘေ ဝီ လှုဝ်း လွင် ဂေ ဟဲ့ ဇွင့် အုဝ် ဒီ အာတ့်။ 19 ဆေ ဘေ ဘော ကွယ် ခဲင် ဖိုင် ဂေ၊ ဂေ ဒီ ဘော ရွက့် ဘေ ကူပ် မုး ဘေ အူ မျုဝ်။ ဘေ ယီ တူ မုး အာမျုဝ် ဂေ အီ ကွယ် ဒဲင် ကာဒါယ်၊ အီ တူ ညှိုမ် အုဝ်။ အုဝ် ဟဲ့ ရဝ်း ဘေ၊ တဲး ဘေ လေး တ ဖိုင် ဂေ။ ခုဝ် အန် တီ ဂေ ဝီ ဇွင့် ဘေ။ 20 တဲး ဘေ လှုဝ်း ဂြုဝ်း ပဲ့ ဟဲ့ ဒွိုမ် ကာလာင် အုဝ် ဒီ ဘေ ခါ အာတ့်။ အုဝ် ဟဲ့ ဒွိုမ် တဝ်း၊ ‘ဆေ န့ မုး မှာယ် အီ၊ အန် ကွယ် ခြိုမ် ဒါ ကာညာ အန်၊ အာဝ် တာင် လွှိုမ် ဒါ ကာညာ အန်။’ ဆေ ဂေ ဟဲ့ ဘူင် နာ တူ မွှိုမ် ဒီ အုဝ်၊ ဂေ ဒီ ဘော ဘူင် နာ တူ မွှိုမ် ဘော ဒီ ဘေ။ ဆေ ဂေ ထူမ် ဂြုဝ်း ပီ မာနုဝ် အုဝ်၊ ဂေ ဒီ ထူမ် ဘော ပီ မာနုဝ် ဘေ။ 21 ဂေ ဒီ ဘူင် ဇိုဝ် တီ ဒီ ဘေ ကူပ် ညှိုမ် ဘေ ဒီ အုဝ်၊ ကူပ် တူ နပ် ဂေ အန် ဇဝ် အီ ဟဲ့ တိုယ် အုဝ်။ 22 ဆေ အုဝ် တူ တး ကာလာင် ဒီ ဂေ၊ ဂေ တူ မိုဝ်း မှာပ်။ ကူပ် တး ကာလာင် အုဝ် ဒီ ဂေ၊ ဂေ မိုဝ်း မှာပ်၊ အာဝ် ပွိုန် လွတ်။ 23 အာဆေ ယီ ဇွင့် အုဝ်၊ အန် ဇွင့် ဘော ဂုန့် အုဝ်။

24 အုဝ် ဟဲ့ ဘူင် ပီ တူ ဒွိုမ် ဘူင် အီ ဟဝ်။ ခုဝ် အန် တီ ဂေ မိုဝ်း မှာပ်။ ဒေါ တီ နီ၊ ဂေ ဟဲ့ ယိုဝ် နာ မွှိုမ် အာမ် ကာဆဝ် ပဲ့ ဟဲ့ ဘူင် အုဝ်၊ ဂေ ယီ ဆီ ဇွင့် ဘော အုဝ် ဘော ဂုန့် အုဝ်။ 25 ပါယ် တီ၊ န့ မှာန် ပဲ့ ဟဲ့ ဒဲမ် အုန် ခဲင် ဘပ် ဒါရာ ဂေ။ န့ တဝ်း၊ ‘ပဲ့ ဟဲ့ ဇွင့် ဂေ ဒီ အုဝ် အာဝ် မိုဝ်း ဒီခုဝ်။’

26 အုဝ် ယီ ဒီ တိုယ် အီ ဒီ စွယ် တွိုန်၊ တဲး အန် လေး ဒူင် ကွယ် ဂုန့် အုဝ်၊ ဝီ လိုပ် ခဲင် နဝ်း ဘေ။ န့ မုး နဝ်း ဖွိုမ် ဇဝ်ဖြာ၊ အီ ဒီ တဲး ဘေ နပ် နာ မှာန်။ အန် ဒီ ကာလာင် ဆက်ဆေ လွင် အုဝ်။ 27 ဘော ဘေ လုဝ် ကာလာင် ဆက်ဆေ လွင် အုဝ်။ ခုဝ်၊ ဘေ မိူဝ် ဟဲ့ ကွယ် ရိုမ် ဒူပ် အုဝ် အူ ဆိန့် ဒေါ ဂုဝ် ဒေါ စုး အုဝ် ဒီ မာနုဝ် အီ။” ခဲ့ တီ ဇဝ် ယေဆူ ကာလာင် ဒီ ဒီဘဲ အန်။