1 ဝါယ် အန် တီ ဇဝ် ယေဆူ ဝီ တဝ်း ဒီ ဒီဘဲ အန်၊ “ကွဲ့ တဲး န့ ဘဲန် ဒုက် ဒီ နဝ်း ဘေ၊ တဲး ဘေ ညှိုမ် ဇဝ်ဖြာ၊ ဘော ညှိုမ် အုဝ်။ 2 ခဲင် ကာင် ဂုန့် အုဝ်၊ န့ မိုဝ်း ဟူင် ဒူင် ဒီ ကွယ် ကိူန်။ ဆေ န့ တူ မုး ပါယ် တီ၊ အုဝ် ဒီ ဘော ကာလာင် ဒီ ဘေ။ အုဝ် ဒီ ဟုဝ့် ဒူင် ကွယ် ဂုန့် အုဝ်၊ တဲး အုဝ် ရဲန် ဒူင် ဒီ ကွယ် အာဒါ ဘေ။ 3 အုဝ် ဟီ ဟွတ့် ရဲန် ဒူင် တီ၊ အုဝ် ဒီ ဝီ တး ဒဲ့ ဘော ဘေ တး ဒူပ် အုဝ်၊ တဲး ဘေ ကွယ် ရိုမ် ဒူပ် အုဝ် ဒူင် ကွယ် အုဝ်။ 4 ဘေ ဘော နပ် န့တေန့်၊ အီ ဒီ တဲး ဘေ ဇမ် ဒူင် ဝဝ့် အုဝ်။”

5 အာထုဝ်မာတ် ဝီ တဝ်း ဒီ ဇဝ် ယေဆူ၊ “ဆာရာ၊ ယေ တူ နပ် ဒူင် ဒီ ဝဝ့် မဲ။ မှဝ် ယေ ဒီ ပါယ် ဒီ နပ် န့တေန့် အီ ဒီ ဇမ် ဒူင် ကွယ် မဲ တီ။း” 6 ဇဝ် ယေဆူ ဝီ တဝ်း၊ “န့ မုး အုဝ်။ အုဝ် ပီ န့တေန့် တီ။ အုဝ် တဲး ဘေ နပ် နာ မှာန်၊ ပီ လုဝ် ဒူပ် ဘေ။ အုဝ် ဘော နပ် ဒီ ဒွါ အာဆာက် ကာမာယ် ဒီ ဘေ။ ဆေ ဒူအီ တူ ညှိုမ် ဘိုင် အုဝ်၊ အာဝ် မိုဝ်း အာဆေ အီ ပွိုန် ဇမ် ဒူင် ကွယ် ဂုန့် အုဝ်။ 7 ဆေ ဘေ နပ် ဆီချာ အုဝ်၊ ဘေ ဒီ နပ် ဘော ဂုန့် အုဝ်။ အူ ဆိန့် ဒေါ တီ နီ ဘေ ဘော နပ် အန်။ န့ ပီ ဘေ ဟဲ့ ယိုဝ် အန် ကူပ် ဟဲ့ ယိုဝ် ဘေ ဒီ အုဝ်။”

8 ပန် တီ အာဖီလိပ် တဝ်း၊ “ဆာရာ၊ တဲး မဲ ဘျ ဂုန့် မဲ ဒီ ယေ။ ခဲ့ တီ ယေ မှာန့်။”

9 ဇဝ် ယေဆူ ဝီ တဝ်း၊ “မဲ အာဖီလိပ်၊ န့ ဟဲ့ လှေန့် အုဝ် ဟဲ့ ကွယ် ရိုမ် ဒူပ် ဘေ။ မှဝ် န့ ပါယ် ပီ ညှမ် နပ် ဘေ ဒီ အုဝ်။း အာဆေ ဟဲ့ ယိုဝ် အုဝ်၊ အန် ဟဲ့ ယိုဝ် ဘော ဂုန့် အုဝ်။ မှဝ် န့ ပါယ် ပီ ဆီ တဝ်း မဲ၊ ‘တဲး မဲ ဘျ ဂုန့် မဲ ဒီ ယေ’။း 10 န့ ပီ မဲ တူ ညှိုမ် ယာယ် ဂုန့် အုဝ် ကွယ် ကာဒူပ်၊ အာဝ် ပွိုန် ကာယဝ်း။ ဂြုဝ်း ပီ ကာလာင် အုဝ် အာဝ် မုး မီ ဂြုဝ်း အုဝ်။ န့ မုး ဂုန့် အုဝ်၊ အီ ကွယ် ရိုမ် ဒူပ် အုဝ်၊ အန် တဲး အုဝ် ဘူင် ခဲ့ ပီ လုဝ် အန်။ 11 ဆေ အုဝ် တဝ်း၊ ဘော အုဝ် ဘော ဂုန့် အုဝ်၊ ယာယ် ကွယ် ကာဒူပ်၊ အာဝ် ပွိုန် ကာယဝ်း၊ တဲး မဲ ညှိုမ် ဂြုဝ်း အုဝ်။ ဆေ မဲ တူ ညှိုမ် ဂြုဝ်း အုဝ် တီ၊ တဲး မဲ ညှိုမ် ပဲ့ ဟဲ့ ဘူင် အုဝ် နာ မွှိုမ် အာမ် ကာဆဝ်၊ အီ ဘျ ပွုန် ဇဝ်ဖြာ ခဲင် ဒုဝ် အုဝ်။ 12 အုဝ် တဝ်း အာခ်ု ဒီ ဘေ။ အာဆေ ညှိုမ် အုဝ်၊ အန် ဒီ ဘော ပွိုန် ဒီ ဘူင် ခဲ့ ပီ ဘူင် အုဝ်။ အာဝ် ဝန် ခဲ့ တီ။ အာဆေ ညှိုမ် အုဝ်၊ အန် ဒီ ဘူင် ဘဲန် မျုဝ် ဘဲန် မျုဝ် အီ မွှိုမ် အာမ် လွှိုမ် ပဲ့ ဟဲ့ ဘူင် အုဝ် ကူပ် ဟုဝ့် အုဝ် ဒူင် ကွယ် ဂုန့် အုဝ်။ 13 ပီ မှာန့် ဘေ ဒီ ဇဝ်ဖြာ ဒွန် မျုဝ် အုဝ် ဒီ ဘူင် ဒွါ ဒီ ဘေ ကူပ် ညှိုမ် ဘေ ဒီ အုဝ်။ ပါယ် တီ၊ န့ မုး ဂွန် ဇဝ်ဖြာ အီ တဲး န့ လိုဝ်း အာဖုင် ဒင်ခုဝ် ဇဝ်ဖြာ။ 14 ကူပ် ညှိုမ် ဘေ ဒီ အုဝ် ဘေ ပွိုန် မှာန့် ဒီ ဇဝ်ဖြာ ခဲ့ ပီ ဆီ မှာန့် ဘေ။ အုဝ် ဒီ ဘော ဘူင် ဒွါ ပီ မှာန့် ဘေ။”

15 ဇဝ် ယေဆူ ဝီ တဝ်း၊ “ဆေ ဘေ ရွက့် အုဝ်၊ ဘေ ဒီ ဘော ထူမ် ဘူင် ဒူပ် ပီ စ်ု အုဝ် ဘေ ဘူင်။ 16 အုဝ် ဒီ ဘော မှာန့် ဒီ ဇဝ်ဖြာ။ ဟဲ့ ဟွတ့် အန် ဒီ ဝီ ဒွါ ဒီ ဘေ အီ ဒီ စွယ် ဘေ ပေါ အူ ဝီ။ အန် ဒီ ကွယ် ရိုမ် ဒူပ် ဘေ ဆေဆေ။ 17 န့ မုး နဝ်း ဖွိုမ် ဇဝ်ဖြာ အီ တဲး ဘေ နပ် နာ မှာန်။ ဂေ ဒူအီ အီ ကွယ် ဒဲင် ကာဒါယ် တူ နပ် ဇဝ်ဖြာ၊ ဂေ တူ ပွိုန် တဲး နဝ်း ဖွိုမ် ဇဝ်ဖြာ လိုပ် ခဲင် နဝ်း ဂေ။ ခုဝ်၊ ဂေ တူ ပွိုန် ယိုဝ် အန်။ ဂေ မိူဝ် တူ နပ် အန်။ ဘေ ယီ နပ် အန် ကူပ် ကွယ် ရိုမ် အန် ဒူပ် ဘေ ဒေါ တီ နီ။ ဟဲ့ ဟွတ့်၊ အန် ဒီ လိုပ် ခဲင် နဝ်း ဘေ။ 18 အုဝ် တူ ဝဲန် ဘေ၊ တူ တဲး ဘေ ပီ ဂွန် ဆီပြး။ အုဝ် ဒီ ဝီ တး ဒူင် ကွယ် ဘေ။ 19 အာဝ် လှေန့် ဂေ ဒူအီ ဒဲင် ကာဒါယ် အာဝ် ဟူ ပွိုန် ယိုဝ် အုဝ်။ ဘေ ယီ ဒီ ဝီ ယိုဝ် အုဝ်။ ကူပ် ဒီ ဝီ အိမ် အုဝ်၊ ဘော ဘေ ဒီ မိုဝ်း အာဆာက် ပီ ဒွါ အုဝ် ဒီ ဘေ။ 20 ဒေါ အန် တီ ဘေ ဒီ ဘော နပ် ဆီချာ လွင် ယာယ် ဂုန့် အုဝ် ကွယ် ကာဒူပ်၊ အာဝ် ပွိုန် ကာယဝ်း။ န့ ဘော ပီ ဘေ ကွယ် ခဲင် နဝ်း အုဝ်၊ ဘော အုဝ် ကွယ် ခဲင် နဝ်း ဘေ။ 21 အာဆေ နပ် ပီ စ်ု အုဝ်၊ အာဆေ ဘော ဘူင် ပီ စ်ု အုဝ် တီ၊ န့ မုး ဒူအီ ဝီ တီ၊ အန် ရွက့် အုဝ်။ ဆေ ဒူအီ အူ ဝီ ယီ ရွက့် အုဝ်၊ ဘော ဂုန့် အုဝ် ဒီ ရွက့် အန်။ ဘော အုဝ် ဒီ ရွက့် ဒူအီ ဝီ တီ။ အုဝ် ဒီ ဘော တဲး အန် နပ် ဆီချာ အုဝ်။”

22 ဇဝ် ယေဆူ ဟဲ့ ဟွတ့် ကာလာင် ဂြုဝ်း တီ၊ န့ ဝီ မုး အာယူဒတ် ပေါ အူ ဝီ။ (အာဝ် မုး အာယူဒတ် အီ စိူဝ် ဘော အာဆာခါရီအူတ်)။ အန် တဝ်း၊ “ဆာရာ၊ မှဝ် န့ ပါယ် ပီ တဝ်း မဲ ဒီ တဲး ယေ နပ် ဆီချာ မဲ။ မှဝ် န့ ပါယ် ပီ တူ တဲး မဲ ဒွန် အီ နပ် ဆီချာ လွင် မဲ။း”

23 ဇဝ် ယေဆူ ဝီ ဝျီ့ ဂြုဝ်း တီ။ အန် တဝ်း၊ “အာဆေ ရွက့် အုဝ်၊ အန် ဒီ ထူမ် ဒူပ် ပီ မာနုဝ် အုဝ်၊ ဘော ဇဝ်ဖြာ ဒီ ရွက့် အန်။ ပန် တီ ယေ ဒီ တး ကွယ် ရိုမ် ဒူပ် အန် ဆေဆေ။ 24 အာဆေ ယီ တူ ရွက့် အုဝ်၊ အန် တူ ထူမ်၊ တူ ဒူပ် ပီ မာနုဝ် အုဝ်။ ခုဝ်၊ ဂြုဝ်း ပီ ကာလာင် အုဝ် ဒေါ တီ နီ၊ န့ တူ မုး ဂြုဝ်း အုဝ်။ န့ မုး ဂြုဝ်း ဂုန့် အုဝ် အီ ဟဲ့ တိုယ် အုဝ် တး ဒူင် ကွယ် ဘေ။

25 အုဝ် ယီ ခဲ ဇိုဝ် တီ ဒွန် မျုဝ် ဒေါ ဆီ ကွယ် ရိုမ် အုဝ် ဒူပ် ဘေ။ 26 န့ ယီ မုး အီ ဒီ စွယ် ဘေ တွိုန်၊ အီ မုး နဝ်း ဖွိုမ် ဇဝ်ဖြာ ပီ တိုယ် ဇဝ်ဖြာ ဒီ ဘေ၊ တဲး အန် ကာဒါင် အုဝ်၊ အန် ဒီ မာနုဝ် ဘေ၊ တဲး ဘေ နပ် တူတ့် ဒွန် မျုဝ်၊ တဲး ဘေ ဝီ လှုဝ်း ဒွန် မျုဝ် ပဲ့ ဟဲ့ ဒွိုမ် ကာလာင် အုဝ် ဒီ ဘေ။ 27 အုဝ် တဲး ဘေ မိုဝ်း နဝ်း ဂျီတ်၊ တဲး န့ ပီ နဝ်း ဂျီတ် အုဝ်။ ပီ ဒွါ အုဝ် တီ၊ န့ တူ ပီ ပီ ဒွါ ဂေ ဒူအီ အီ ကွယ် ဒဲင် ကာဒါယ်၊ ဂေ အီ တူ နပ် ဇဝ်ဖြာ။ ခုဝ်၊ ကွဲ့ တဲး န့ ဘဲန် ဒုက် ဒီ နဝ်း ဘေ၊ ကွဲ့ တဲး ဘေ ယုဝ်။

28 အုဝ် မိူဝ် ဟဲ့ ဒွိုမ် ကာလာင် ဒီ ဘေ တဝ်း၊ ‘အုဝ် ဒီ လေး ဒူင် ကွယ် ဘေ။ ဟဲ့ ဟွတ့် အုဝ် ပီ ဒီ ဝီ တး ဇမ် ဒူင် ကွယ် ဘေ။’ ဆေ ဘေ ရွက့် အုဝ်၊ နဝ်း ဘေ ဒီ ဘော ဒါခိုယ် ကူပ် ဟာဝ် ကွယ် ရိုမ် အုဝ် ဒူပ် ဂုန့် အုဝ်။ ခုဝ်၊ ဂုန့် အုဝ် ဟဲ့ တာင် လွှိုမ် အုဝ်။ 29 ဘော လွင် အန် တီ အုဝ် ဟဲ့ ကာလာင် ဒီ ဘေ ဒေါ တီ နီ အာတ့် ဘဲန် ပီ တဝ်း အုဝ်။ ဆေ န့ ဘဲန် ပီ တဝ်း အုဝ် ဒေါ တီ နီ၊ ဘေ ဒီ ဘော ညှိုမ် အုဝ်။ 30 အာဝ် ဟူ လှေန့်၊ အုဝ် အာဝ် ဟူ ပွိုန် ကာလာင် ဂြုဝ်း ဒီ ဘေ။ န့ ဒီ မိုဝ်း ဒါ ကာညာ အီ အိုပ် ကာဒါယ် နီ၊ အန် ဟဲ့ ရိန် ဒီ တး။ အန် ယီ တူ ပဲ ဒီ အိုပ် အုဝ်။ 31 ဂေ ဒူအီ အီ ကွယ် ဒဲင် ကာဒါယ်၊ ဂေ လုဝ် နပ် လွင် အုဝ် ရွက့် ဂုန့် အုဝ်။ ဂေ လုဝ် နပ် ဘော လွင် အုဝ် ထူမ် ဘူင် ဒူပ် ပဲ့ ဟဲ့ စ်ု ဂုန့် အုဝ် ဘူင် ဒွန် မျုဝ်။”

ဇဝ် ယေဆူ ဟဲ့ ဟွတ့် ကာလာင် ဂြုဝ်း တီ။ အန် ဝီ တဝ်း၊ “ဒေါ တီ နီ၊ တဲး အေ ဟာဝ်၊ လေး ဒူင် ကွယ် နီ။”