1 န့ ယီ ဇမ် အာခြာဝ် အာတ့် ဘူင် ဂေ ဘ့လွယ် လှုဝ်း ဂေ ဒူအီ အာယူဒါ ဒေါ ကာလုဝ်း ဇဝ်ဖြာ ကာင် ဂေ။ ဒေါ အန် တီ ဇဝ် ယေဆူ ဟဲ့ နပ်၊ အာခြာဝ် ဒီ လုဝ် လေး အန် တ ဒဲင် ကာဒါယ် နီ ဟဲ့ တး။ အန် ဒီ ဝီ ဟုဝ့် ကွယ် ရိုမ် ဒူပ် ဂုန့် အန်။ အန် မိူဝ် ဟဲ့ ရွက့် ဆေဆေ ဒူအီ အီ ကွယ် ဒဲင် ကာဒါယ်၊ အီ ဒူပ် အန်။ အန် မိူဝ် ခမ် ယမ် ဒီ ရွက့် ဂေ။

2 ဘော ဇဝ် ယေဆူ ဘော ဒီဘဲ အန်၊ ဂေ ယီ ကွယ် ရိုမ် ဟူမ် ဘူမ် မှိုဝ် ဂေ။ ဘော ဘုဝ် ကာနမ် အီ စိူဝ် ဆာတာန်၊ အန် ဟဲ့ ဟွတ့် ဟပ် နာ တူ မွှိုမ် ခဲင် နဝ်း အာယူဒတ် အီ မုး ဂွန် အာဆီမူန် တွိုန်၊ အီ စိူဝ် ဘော အာဆာခါရီအူတ်။ အန် ဟဲ့ ဟပ် တဲး အာယူဒတ် နပ်၊ ပီ ဒီ ပါယ် ဒီ အာပ် ဇဝ် ယေဆူ ဒီ ရန်ဆူ အန်။ 3 ဒေါ အန် တီ ဇဝ် ယေဆူ ဟဲ့ နပ် ဆီချာ၊ န့ မုး ဂုန့် အန် ဟဲ့ ဒွါ ပွုန် ဒီ အန်၊ တဲး အန် ပွိုန် ဒီ အိုပ် တူတ့် ဒွန် မျုဝ်။ ဇဝ် ယေဆူ ဘော နပ်၊ အန် ဟဲ့ ဒွိုမ် လေး ဒူင် ကွယ် ဇဝ်ဖြာ။ ဟဲ့ ဟွတ့်၊ ဒေါ တီ နီ၊ အန် ဒီ ဝီ ဝေန့် ဒူင် ကွယ် အန်။ 4 ခုဝ်၊ အန် ဝီ ယိတ့် ဒူင် ကွယ် ဟူမ် ရိုမ် ဂေ၊ ဝီ ဘုတ့် ဆီတုဝ် အန်၊ ဝီ ဒိုဝ်း ကာမဲ့ ဝီ ပက် ဒီ ညွယ် အန်။ 5 ဟဲ့ ဟွတ့်၊ အန် ဝီ ဒိုဝ်း မ့ပါန်၊ လှုဝ် အိုမ် နာ ခဲင်၊ ဝီ စုး ဒီ ဘာယ် ပ့လဝ် ဒီဘဲ အန်။ အန် ဝီ ဒိုဝ်း ကာမဲ့ တွိုန်၊ ဝီ ခုတ် ပ့လဝ် ဂေ။

6 ဒေါ ဇမ် အန် ဒီ အာပေတာရူ၊ အာပေတာရူ ဝီ တဝ်း ဒီ ဇဝ် ယေဆူ၊ “မဲ ဇဝ်၊ မဲ ဆီ ဘာယ် ပ့လဝ် အုဝ်။း”

7 ဇဝ် ယေဆူ ဝီ တဝ်း၊ “ဒေါ တီ နီ၊ မဲ ညှမ် နပ် လွင် ဒါင် ပီ ဘူင် အုဝ် နီ။ ဝါယ် နီ၊ န့ ယီ ဒီ ကာလှုး ဒီ နဝ်း မဲ။”

8 အာပေတာရူ ဝီ တဝ်း၊ “အာဝ် ပွိုန်။ မဲ တူ ပွိုန် ဘာယ် ပ့လဝ် အုဝ် ဒေါ မှဝ်။”

ဇဝ် ယေဆူ ဝီ တဝ်း၊ “ဆေ အုဝ် တူ ပွိုန် ဘာယ် ပ့လဝ် မဲ၊ မဲ တူ ပွိုန် ကွယ် ရိုမ် ဒူပ် အုဝ်။”

9 အာပေတာရူ ပီ ဝီ တဝ်း၊ “ဆေ န့ ပါယ် တီ၊ မဲ ဇဝ်၊ ကွဲ့ တဲး မဲ ဘာယ် မီ ပ့လဝ် အုဝ်။ တဲး မဲ ဘာယ် ဘော ဒဲ ဘော ဂိန့် အုဝ်။”

10 ဇဝ် ယေဆူ ဝီ တဝ်း၊ “ဆေ ဒူအီ အူ ဝီ ဟဲ့ ဟွတ့် တာ အိုမ်၊ အန် လုဝ် ဝီ ဘာယ် မီ ပ့လဝ် အန်။ ဒုဝ် အန် ဟဲ့ ဟွတ့် လုယ်။ ဘော ဘေ ဟဲ့ လုယ်။ န့ ယီ တူ မုး ဘေ ဒွန် အီ အီ ဟဲ့ လုယ် ပါယ် တီ။” 11 ဇဝ် ယေဆူ ဟဲ့ ဟွတ့် ကာလာင် လွင် တူ မုး ဒွန် အီ အီ ဟဲ့ လုယ်၊ ကူပ် နပ် အန် အာဆေ ဒီ အာပ် အန် ဒီ ရန်ဆူ အန်။

12 ဇဝ် ယေဆူ ဟဲ့ ဟွတ့် ဘာယ် ပ့လဝ် ဂေ ဒီဘဲ အန်၊ အန် ဝီ စှိုပ် ဆီတုဝ် အန်၊ ဝီ ဟာဝ် ဒူင် ဒွိုမ် ကွယ် အန်။ ပန် တီ အန် ဝီ ဒီမွှတ် ဂေ၊ အန် တဝ်း၊ “ဘေ နပ်၊ မှဝ် န့ ပါယ် ပီ ဘူင် အုဝ် ဇိုဝ် တီ။း 13 ဘေ နပ် ဒီ ဒဲ့ အုဝ် တဝ်း၊ ‘ဆာရာ။’ အာတီ ဟဲ့ မှာန် ဟဲ့ မုး။ အုဝ် ဟဲ့ မုး ဒါ ဆာရာ ဘေ။ 14 ဒေါ တီ နီ၊ ဘေ ယီ ဟဲ့ ယိုဝ်၊ အုဝ် ဟဲ့ မုး ဒါ ကာညာ ဘေ ဘော ဒါ ဆာရာ ဘေ၊ အုဝ် ယီ ဟဲ့ ဘာယ် ပ့လဝ် ဘေ။ ခုဝ်၊ တဲး ဘော ဘေ လာယ် ဘာယ် ပ့လဝ် ဘေ။ 15 အုဝ် ဟဲ့ ဘူင် ဘျ ဒီ ဘေ၊ တဲး ဘေ ဝီ ဘူင် ပဲ့ ဟဲ့ ဘူင် အုဝ် ဒီ ဘေ။ 16 အုဝ် တဝ်း အာခ်ု ဒီ ဘေ။ ဆေ န့ မုး မှာယ် အီ၊ အန် တူ တာင် လွှိုမ် ဒါ ကာညာ အန်။ ဆေ န့ ဘော မုး အာမူ အာမာတ် အီ ကာလာင် ဂြုဝ်း ဒါ ကာညာ အီ တိုယ် အန်၊ ဘော အန် တူ တာင် လွှိုမ် ဒါ အီ စ်ု အန်။ 17 ခုဝ်၊ ဒေါ တီ နီ၊ ဘေ ဟဲ့ ဟွတ့် နပ် လွင် အန် တီ။ ဆေ ဘေ ဘော ဘူင် ခဲ့ ပီ နပ် ဘေ၊ ဇဝ်ဖြာ ဒီ မွင့်ကာရာ တဲး ဒီ ဘေ။”

18 ဝါယ် အန် တီ ဇဝ် ယေဆူ ဝီ တဝ်း၊ “ပီ ဒီ ကာလာင် အုဝ် ဒေါ တီ နီ၊ အာဝ် ဘာ့ ဘေ ဒွန် အီ။ အုဝ် နပ် ဒွန် အီ ဝီ ပီ ရဝ်း အုဝ်။ န့ ယီ လုဝ် ဘဲန် ပီ ပီ ဒွိုမ် ဒဲမ် အုန် ခဲင် ဘပ် ဇဝ်ဖြာ။ န့ တဝ်း၊ ‘ဒူအီ အူ ဝီ၊ အီ ဟူမ် ရိုမ် ဒူပ် အုဝ်၊ အန် ဟဲ့ ဝီ ဘဲန် ရန်ဆူ အုဝ်။’ ဂြုဝ်း တီ အုဝ် ဝီ ကာလာင် ဒီ ဘေ ဒေါ တီ နီ။

19 အုဝ် ကာလာင် လွင် အန် တီ ဒီ ဘေ အာတ့် ဘဲန် အန်။ ဆေ န့ ဟီ ဘဲန် ပီ တဝ်း အုဝ်၊ ဘေ ဒီ ဘော နပ် ဘော ညှိုမ်၊ န့ မုး အုဝ်၊ အီ ဒီ ချွတ် ဒူအီ။ 20 အုဝ် တဝ်း အာခ်ု ဒီ ဘေ၊ အာဆေ ရွုး ဒူအီ ပီ တိုယ် အုဝ်၊ န့ ပီ အန် ရွုး ဘော အုဝ်။ အာဆေ ယီ ရွုး အုဝ်၊ အန် ရွုး ဘော အန် ဇဝ် အီ ဟဲ့ တိုယ် အုဝ်။”

21 ဇဝ် ယေဆူ ဟဲ့ ဟွတ့် ကာလာင် ဂြုဝ်း တီ၊ န့ ဝီ ဘဲန် ဒုက် ဒီ နဝ်း အန်။ အန် ဝီ တဝ်း၊ “အုဝ် တဝ်း အာခ်ု ဒီ ဘေ။ န့ မိုဝ်း ဒူအီ အူ ဝီ ကာတဲ ဘေ၊ အန် ဒီ အာပ် အုဝ် ဒီ ရန်ဆူ အုဝ်။”

22 ပန် တီ ဂေ ဒီဘဲ အန် ဝီ လာယ် ယွတ်။ ဂေ တူ နပ် အာဆေ န့ မုး၊ ဝီ ပီ ကာလာင် အန်။ 23 န့ ယီ မုး ဒီဘဲ ဇဝ် ယေဆူ အူ ဝီ၊ ဝီ ပီ ရွက့် ဇဝ် ယေဆူ။ အန် ကွယ် ချြီ့ ဇဝ် ယေဆူ။ 24 အာဆီမူန်၊ အီ စိူဝ် ဘော အာပေတာရူ၊ အန် ဝီ ဆီကူ ဝီ ကွယ် ချြီ့ ဇဝ် ယေဆူ ဝီ တဝ်း ဒီ အန်၊ “တဲး မဲ ဒီမွှတ် ဒါ ဆာရာ၊ အန် တဝ်း လွင် အာဆေ ပါယ် တီ။”

25 ဒီဘဲ အီ တွိုန် ဝီ နေ ဒီ ဇဝ် ယေဆူ၊ ဝီ ဒီမွှတ် အန် တဝ်း၊ “ဆာရာ၊ အာဆေ အန် မုး။း”

26 ဇဝ် ယေဆူ ဝီ ဝျီ့ ဂြုဝ်း တီ တဝ်း၊ “န့ မုး ဝီ ပီ ဒီ ဒွါ အုဝ် ခါမုန် နီ။ အုဝ် ဟီ စိုပ် ခဲင် ဆီလယ့်၊ အုဝ် ဒီ ဒွါ ဒီ အန်။” ပန် တီ အန် ဝီ ဒိုဝ်း ခါမုန်၊ ဝီ စိုပ် ခဲင် ဆီလယ့်၊ ဝီ ဒွါ ဒီ အာယူဒတ် တွိုန်၊ အီ မုး ဂွန် အာဆီမူန်၊ အီ စိူဝ် ဘော အာဆာခါရီအူတ်။ 27 အူ ဆိန့် ဒေါ ဒိုဝ်း အာယူဒတ် ခါမုန် တီ၊ ဘုဝ် ကာနမ် ဝီ လိုပ် ခဲင် ဒုဝ် ဘူင့် အန် အူ ဇေန့်။ ခုဝ်၊ ဇဝ် ယေဆူ ဝီ တဝ်း ဒီ အန်၊ “ပီ ဒီ ဘူင် မဲ၊ တဲး မဲ ဘူင် နင်ဂန်။” 28 ဂေ အီ ကွယ် ရိုမ် ဟူမ် ရိုမ်၊ အာဝ် မိုဝ်း အာဆေ နပ် မှဝ် န့ ပါယ် ပီ တဝ်း ဇဝ် ယေဆူ ဂြုဝ်း တီ ဒီ အာယူဒတ်။ 29 မင် အီ ယီ ထာင်၊ ဇဝ် ယေဆူ ဟဲ့ စ်ု အန် စိုဝ်း ပီ ဒီ လုဝ် ဂေ ဒေါ ဘ့လွယ် တီ ကူပ် မုး အန် ဒါ အီ ဂူင့် ရွိုန် ဂေ။ မင် အီ ဘော ထာင်၊ ဇဝ် ယေဆူ စ်ု အန် ဒွါ ဒီ ဒူအီ ဂိန်။ 30 အာယူဒတ် ဟဲ့ ဟွတ့် ဒိုဝ်း ခါမုန် တီ၊ အန် ဝီ လေး ဒူင် ကွယ် ဂေ။ ဒေါ အန် တီ ယီ အပ် ဝွင့်။

31 အာယူဒတ် ဟဲ့ ဟွတ့် လေး ဒူင် ကွယ် ဂေ၊ ဇဝ် ယေဆူ ဝီ တဝ်း၊ “ဒေါ တီ နီ၊ အာဖုင် ဒင်ခုဝ် အုဝ်၊ အီ ဟဲ့ ဘဲန် ဂွန် ဒူအီ၊ န့ ဒီ လိုဝ်း ဆီချာ၊ တဲး အီ ယိုဝ်။ ပီ ဒီ ခမ် အုဝ် ဒေါ တီ နီ ဒီ တဲး ဘော အာဖုင် ဒင်ခုဝ် ဇဝ်ဖြာ လိုဝ်း ဆီချာ ဒီ ဒူအီ ဒွန် အီ။ 32 ကူပ် ဘူင် ဂွန် ဇဝ်ဖြာ တဲး အာဖုင် ဒင်ခုဝ် ဇဝ်ဖြာ လိုဝ်း ဆီချာ၊ ဘော ဇဝ်ဖြာ ဒီ ဝီ ဘူင် တဲး ဘော ဂွန် အန် မိုဝ်း အာဖုင် ဒင်ခုဝ် ဇဝ်ဖြာ။ ဇဝ်ဖြာ ဒီ ဘော ဘူင် ပါယ် တီ အူ ဇေန့်။

33 ဘေ ဒူအီ ပီ ရွက့် အုဝ်၊ အုဝ် ဒီ ကွယ် ရိုမ် ဒူပ် ဘေ ခေါ အီ စဲက်။ ဘေ ဒီ ဘော ဝီ ဟြေတ့် အုဝ်။ ပီ ဒွိုမ် ကာလာင် အုဝ် ဒီ ဂေ ဒူအီ အာယူဒါ၊ အုဝ် ဒီ ဝီ ကာလာင် ဒီ ဘေ ဒေါ တီ နီ၊ ဘေ တူ ပွိုန် ဒူပ် ဟာဝ် ဒူင် ဒီ ဟာဝ် အုဝ် ဒေါ တီ နီ။

34 အုဝ် ယီ ဒွါ ဒါရာ ကာမာယ် ဒီ ဘေ။ ဘေ လုဝ် လာယ် ရွက့်။ အုဝ် ဟဲ့ ရွက့် ဘေ။ ပါယ် တီ ဘော ဘေ လုဝ် လာယ် ရွက့်။ 35 ဆေ ဘေ လာယ် ရွက့်၊ န့ ဒီ တဲး အီ ဟဝ် ဒွန် အီ နပ် လွင် မုး ဘေ ဒီဘဲ အုဝ်။”

36 ပန် တီ အာဆီမူန်၊ အီ စိူဝ် ဘော အာပေတာရူ၊ အန် ဝီ ဒီမွှတ် ဇဝ် ယေဆူ တဝ်း၊ “မဲ ဇဝ်၊ မဲ ဒီ ဟာဝ် နာ မှဝ်။း”

ဇဝ် ယေဆူ ဝီ တဝ်း၊ “ဒူင် ဒီ ဟာဝ် အုဝ်၊ မဲ တူ ပွိုန် ဒူပ် ဒေါ တီ နီ။ ဝါယ် နီ၊ မဲ ဒီ ဝီ ဒူပ်။”

37 အာပေတာရူ ဝီ တဝ်း၊ “မဲ ဇဝ်၊ မှဝ် န့ ပါယ် ပီ တူ ပွိုန် အုဝ် ဒူပ် မဲ ဒေါ တီ နီ။း အုဝ် ဒီ ခမ် ဒီ ယမ် ကာဒါင် မဲ။”

38 ဇဝ် ယေဆူ ဝီ တဝ်း၊ “မဲ တူ ဇေန့်ဇာ ဆီချာ လွင် ပီ တဝ်း မဲ၊ မဲ ဒီ ခမ် ဒီ ယမ် ကာဒါင် အုဝ်။ အုဝ် တဝ်း အာခ်ု ဒီ မဲ။ အာတ့် ကာတွုန် အျီန်၊ မဲ ဒီ ကာလာင် အူယ် ဇေန့် တဝ်း၊ မဲ တူ နပ် အုဝ်။”