1 န့ ဆီ ကွယ် ဒဝ် ဆီငဲ အာတ့် ဘူင် ဂေ ဘ့လွယ် လှုဝ်း ဂေ ဒူအီ အာယူဒါ ဇဝ်ဖြာ ဒေါ ကာလုဝ်း အန် ကာင် ဂေ။ ဒေါ အန် တီ ဇဝ် ယေဆူ တး ဇမ် ရဝ် ဘေထာနီ။ န့ မုး ရဝ် ဒူင် ကွယ် အာလာဇာရုတ်၊ အီ မုး ဒူအီ ပီ ပီအိမ် ဇဝ် ယေဆူ အီ ဟဲ့ ဟွတ့် ယမ် တွိုန်။ 2 ဂေ ကွယ် ရိုမ်၊ ရဲန် ပီ ဒီ ဟူမ် ဘဲန် မျုဝ် ဘဲန် မျုဝ် ကူပ် ဟဲ့ တး ဇဝ် ယေဆူ။ နာင် မာထာ တွိုန် ဘဲ လိုမ်လာ ဂေ ဒူအီ အီ ဟူမ်။ အာလာဇာရုတ် ယီ တုတ့် ဟူမ် ရိုမ် ဒူပ် ဇဝ် ယေဆူ။ 3 ဒေါ အန် တီ န့ မုး နာင် မာရီ တွိုန်။ အန် ဒိုဝ်း နာမန် အုး ငှုန် အူ ကာပဝ်၊ န့ စန် ကာဘက် အူယ် ခန်။ နာမန် တီ မုး နာမန် နာဒူ ဇဲတ်၊^a ဟဲ့ ငဝ်း ကာဆဝ်။ အန် ဒိုဝ်း နာမန် တီ လှုဝ် တူတ့် ဒဲင် ပ့လဝ် ဇဝ် ယေဆူ။ ဟဲ့ ဟွတ့်၊ အန် ဝီ ခုတ် တာ ဟိုက် ဂိန့် အန်။ န့ ကော အုး ငှုန် ဘော ကာင်။

4 န့ ယီ မိုဝ်း ဒီဘဲ ဇဝ် ယေဆူ အူ ဝီ အီ ဒီ အာပ် ဇဝ် ယေဆူ ဒီ ရန်ဆူ အန်။ အန် စိူဝ် အာယူဒတ် အီ စိူဝ် ဘော အာဆာခါရီအူတ်။ ဂုန့် အန် စိူဝ် အာဆီမူန်။ အန် တဝ်း၊ 5 “မှဝ် န့ ပါယ် ပီ တူ ယွင့် ဘေ နာမန် အုး ငှုန် တီ၊ ဝီ ဒွါ ရွိုန် ပီ ပွိုန် ဘေ ဒီ ဒူအီ ဂိန်။း ငဝ်း အန် ပွိုန် ရွိုန် ဇဲတ် အူယ် မာယဝ်း ဘူင့်။”^b 6 အန် တူ ကာလာင် ဂြုဝ်း တီ ကူပ် ကာဝေ အန် ဒူအီ ဂိန်။ မာလဲ အန် မုး ဒါ ပြာ။ အန် ဘဲ ဂူင့် ဟူ ရွိုန် ဂေ။ အန် ဘော နပ် ဒီ ပြာ ရွိုန် ဂေ တီ မင် ဇေန့် မင် ဇေန့်။

7 ဇဝ် ယေဆူ ဝီ တဝ်း၊ “ကွဲ့ အေး အီဘိုန့် တီ။ နာမန် ပီ လုဝ် ဖဝ်း ဒီ ဒူအီ ယမ်၊ အန် ဟဲ့ ဟွတ့် ဖဝ်း ဒီ အုဝ် အာတ့် ယမ် အုဝ်၊ အာတ့် ဘ့လေး ဂေ ဒုဝ် ဘူင့် အုဝ် ခဲင် ကာဒဝ် ဘာရေဝ်။ 8 ဂေ ဒူအီ ဂိန် ဒီ ကွယ် ရိုမ် ဒူပ် ဘေ ဆေဆေ။ အုဝ် ယီ တူ ကွယ် ရိုမ် ဒူပ် ဘေ ဆေဆေ။”

9 ဒေါ အန် တီ န့ မိုဝ်း ဒူအီ အာယူဒါ ဂေ ကိူန် ကာဆဝ်၊ ဂေ ဘော နပ် လွင် ဇဝ် ယေဆူ ကွယ် ခဲင် ရဝ် ဘေထာနီ တွိုန်။ ဂေ မိူဝ် ဟာဝ် ဇမ် ဒူင် ကွယ် အန်။ အာဝ် မုး၊ ဂေ တး မီ ကူပ် ဇဝ် ယေဆူ။ ဂေ ဘော တး၊ တဲး ဂေ ယိုဝ် ဘော အာလာဇာရုတ်၊ ဝီ ပီ တဲး ဇဝ် ယေဆူ အန် ဝီ ယိတ့် ဝီ အိမ် ဝါယ် ဟဲ့ ဟွတ့် ယမ် အန်။ 10-11 ကူပ် အာလာဇာရုတ် တီ၊ ဂေ ဒူအီ ကိူန် အာဝ် ဟူ ဒူပ် ဒါ တာင် ယူဒါ။ ဂေ ဝီ ညှိုမ် ဇဝ် ယေဆူ။ ခုဝ်၊ ဂေ ဒါ တာင် အီ ယဲတ့် ဂေ ဒူအီ အီ လှူ ဒီ ဇဝ်ဖြာ၊ ဂေ ခြာမ် ဒီ ငဝ်း ဘော အာလာဇာရုတ်၊ တဲး ဘော အန် ယမ်။

12 ပါ ခဲညှာ န့ မိုဝ်း ဒူအီ ကိူန် ကာဆဝ်။ ဂေ ဘောကာဂ့လျီတ် ဟဲ့ တး တဝ်း ဒီ လိုပ် ဘ့လွယ် တွိုန်။ ဂေ ယီ ယိုဝ် လွင် ဇဝ် ယေဆူ ဒီ တး ဇမ် မိူင် ယေရူဆာလဲမ်။ 13 ဒေါ အန် တီ ဂေ ဝီ ဒိုဝ်း လှာ ဟေ စိုက်၊ ဝီ လေး ခဲင် မိူင်၊ ဟာဝ် ရွုး ဇဝ် ယေဆူ။

ဂေ ဒတ် တာင် တဝ်း၊ “အေ အိူပ် ဇဝ်ဖြာ။ အေ အိူပ် ဘော အန် ဇဝ် အီ ဒီ တး ဒေါ တီ နီ။ ဇဝ်ဖြာ ဟဲ့ တိုယ် အန် တး။ အေ အိူပ် ခုန်ဒီခမ် အီ ဒီ အိုပ် မိူင် အီဆာရေလ။”

14 အာတ့် ဟာဝ် ဇဝ် ယေဆူ ဒီ မိူင် ယေရူဆာလဲမ် အန် ဟဲ့ ယိုဝ် မာလာ၊ ဝီ ဒိုဝ်း ပဝ့် မာလာ တီ။ ပါယ် တီ၊ န့ ပီ ပီ ဒွိုမ် ဒဲမ် အုန် ခဲင် ဘပ် ဇဝ်ဖြာ။ န့ တဝ်း၊ “ကွဲ့ တဲး ဘေ ယုဝ်၊ 15 ဘေ ဒူအီ အီ ကွယ် ခဲင် မိူင် ဇီအူန်၊^c တဲး ဘေ ယွတ်၊ န့ မုး ခုန်ဒီခမ် ဘေ၊ အီ ဟဲ့ တး။ အန် ဟဲ့ ပဝ့် ဂွန် မာလာ တး ဇမ် ဒူင် ကွယ် ဘေ။”

16 ဒေါ ယိုဝ် ဂေ ဒီဘဲ ဇဝ် ယေဆူ ပီ ဘူင် ဂေ ဒူအီ ကိူန်၊ လွင် ဒါင် အန် တီ၊ န့ တူ ကာလှုး ဒီ နဝ်း ဂေ။ ဒေါ ဝီ ဇမ် အာခြာဝ် ဝါယ် ဟဲ့ ပွိုန် ဇဝ် ယေဆူ အာဖုင် ဒင်ခုဝ် အန်၊ န့ ကော ဝီ လိုဝ်း ဒီ နဝ်း ဂေ လွင် ပဲ့ ဟဲ့ ဘူင် ဒူအီ တွိုန်။ န့ ပီ ပီ ဒွိုမ် ဒဲမ် အုန် ခဲင် ဘပ် ဇဝ်ဖြာ။

17 န့ ယီ မိုဝ်း ဒူအီ ကိူန်၊ အီ ဟဲ့ ဒွိုမ် ယိုဝ် ဇဝ် ယေဆူ ဒဲ့ အာလာဇာရုတ် လေး ခဲင် ကာဒဝ် ဘာရေဝ်၊ တဲး အန် ဝီ အိမ်။ ဒူအီ ဂေ တီ၊ ဂေ ဝီ ကာလာင် ဒီ အီ ဟဝ် လွင် အန် တီ။ 18 ပန် တီ န့ မိုဝ်း ဒူအီ ကိူန်၊ ဂေ ဝီ ဟာဝ် ဒူင် ကွယ် ဇဝ် ယေဆူ၊ တဲး ဂေ ယိုဝ် အန်။ ဂေ ဟဲ့ ဟာဝ် ကူပ် ထူမ် ဂေ ဂြုဝ်း အီ ဟဝ်၊ အီ ကာလာင် လွင် နာ မွှိုမ် အာမ် ကာဆဝ် ပဲ့ ဟဲ့ ဘူင် ဇဝ် ယေဆူ။ 19 ဂေ ဒူအီ ဖိုင် ဖာရီဆဲ ဝီ တဝ်း၊ “အေ တူ ပဲ ဒီ ဘူင် မာဆေ။ တဲး ဘေ ယွတ်၊ ဟဲ့ မိုဝ်း ဂေ ဒူအီ ဘော ကာဒါယ်၊ ဂေ ဘောကာဂ့လျီတ် ဒူပ် အန်။”

20 ကာတဲ ဂေ ဒူအီ အီ ဟုဝ့် မိူင် ယေရူဆာလဲမ်၊ န့ မိုဝ်း ဒူအီ အာမျုဝ် ဂြိက် မင် အီ။ ဘော ဂေ ဟဲ့ ဟုဝ့် မိူင် ယေရူဆာလဲမ် ဒေါ ဘူင် ဂေ ဘ့လွယ် တီ၊ တဲး ဘော ဂေ ကြိုပ် ဇဝ်ဖြာ။ 21 ဂေ တး ဒီ အာဖီလိပ်၊ အီ တး မိူင် ဘေတ်ဆီဒါ ခဲင် အိူင် ဂါလီလေ။ ဂေ တဝ်း ဒီ အန်၊ “အိုယ် ဂိုက်၊ ယေ ဆီ ယိုဝ် အာယေဆူ တွိုန်။” 22 အာဖီလိပ် ဝီ ဟာဝ် ကာလာင် လွင် အန် တီ ဒီ အာအန်ဒါရူ။ ဘော အာအန်ဒါရူ ဘော အာဖီလိပ် ဝီ ဟာဝ် ကာလာင် ဒီ ဇဝ် ယေဆူ လွင် အန် တီ။

23 ဇဝ် ယေဆူ ဝီ တဝ်း၊ “ဒေါ တီ နီ ဟဲ့ ဇမ် အာခြာဝ် ဒီ ဒွါ ဇဝ်ဖြာ အာဖုင် ဒင်ခုဝ် ဒီ အုဝ် အီ ဟဲ့ ဘဲန် ဂွန် ဒူအီ။ 24 အုဝ် တဝ်း အာခါခ်ု ဒီ ဘေ။ ဆေ န့ မိုဝ်း ဂဝ် ငှုဝ်၊ ဆေ ဒူအီ တူ ဆမ် အန် ခဲင် ကာဒါယ်၊ ဆေ အန် တူ အမ် လာတ့်၊ န့ ဒီ မိုဝ်း မီ ခဲ့ အူ ဂဝ် တီ။ ဆေ ဂဝ် တီ ယီ အမ် လာတ့် ခဲင် ကာဒါယ်၊ န့ ပီ အန် ယမ်။ ပန် တီ န့ ဒီ ဝီ လေး ကိူန် ဂဝ် ကာမာယ်။ 25 ဒူအီ မိူဝ် ပီ ဂဝ် ငှုဝ် တီ။ ဆေ ဒူအီ အူ ဝီ ရွက့် အာဆာက် အန်၊ အာဆာက် အန် ဒီ ဘော စှိုမ်။ ဆေ န့ ယီ မိုဝ်း ဒူအီ အီ ခမ် ဒီ ဝဲန် အာဆာက် အန် ဒေါ ကွယ် အန် ဒဲင် ကာဒါယ် နီ၊ အန် ဒီ ပွိုန် ဒီ ကွယ် ရိုမ် ဒူပ် ဇဝ်ဖြာ ဆေဆေ။ 26 ဆေ န့ မိုဝ်း ဒူအီ အီ ဆီ ဘူင် ဂါန် အုဝ်၊ အန် လုဝ် ဒူပ် အုဝ်။ ဒူင် ကွယ် အုဝ် ဘော ဒဲစေန့် အုဝ် လုဝ် ကွယ်။ ဂုန့် အုဝ် ယီ ဒွါ အာဖုင် ဒီ ဒွန် အီ အီ ဘူင် ဂါန် အုဝ်။

27 ဒေါ တီ နီ၊ န့ ဘဲန် ဒုက် ဒီ နဝ်း အုဝ်။ ခုဝ်၊ အုဝ် တူ နပ် ပီ ဒီ လုဝ် အုဝ် ကာလာင်။ ယုဝ် အုဝ် လုဝ် တဝ်း။ ‘ဂုန့် အုဝ်၊ ကွဲ့ တဲး န့ မိုဝ်း အာခြာဝ် ဒီ ဇမ် အုဝ် ဒုက်။’ အာဝ် ပွိုန် တဝ်း ပါယ် တီ။ အုဝ် ဟဲ့ တး ဒဲင် ကာဒါယ် နီ၊ တဲး အုဝ် ခမ် ဒုက် တီ။ 28 ခုဝ်၊ အုဝ် မှာန့်၊ ‘မဲ ဂုန့် အုဝ်၊ တဲး ဒုက် တီ ဝီ ဘျ အာဖုင် ဒင်ခုဝ် မဲ ဒီ အီ။’”

ဝါယ် အန် တီ န့ မိုဝ်း ဂြုဝ်း အီ လေး ခဲင် ဂါင်ဟြာဝ် တဝ်း၊ “အုဝ် ဟဲ့ ဟွတ့် ဘျ အာဖုင် ဒင်ခုဝ် အုဝ် ဒီ အီ၊ အုဝ် ယီ ဒီ ဝီ ဘျ ပေါ အူ ဇေန့်။” 29 ဂေ ဒူအီ အီ ထူမ် ဂြုဝ်း တီ၊ ဂေ တဝ်း၊ န့ မုး ဟမ် ကာနမ်။ ဒူအီ မင် အီ ဘော တဝ်း၊ န့ မုး အာမူ အာမာတ် ဇဝ်ဖြာ ဟဲ့ ကာလာင် ဂြုဝ်း။

30 ဇဝ် ယေဆူ ဝီ တဝ်း၊ “ဇဝ်ဖြာ ဟဲ့ ကာလာင် ဂြုဝ်း တီ၊ တဲး န့ ဘဲန် အာဂျိုဝ် ဒီ ဘေ။ အန် တူ ကာလာင် ဂြုဝ်း တီ၊ တဲး န့ ဘဲန် အာဂျိုဝ် ဒီ အုဝ်။ 31 ဒေါ တီ နီ ဟဲ့ ဇမ် အာခြာဝ် ဒီ ဒမ် ဇဝ်ဖြာ မှာပ် ဒီ ဒူအီ ဒဲင် ကာဒါယ်။ ဇဝ်ဖြာ ဒီ ဝဲန် ဘုဝ် ကာနမ် အီ အိုပ် ကာဒါယ် နီ၊ ကွဲ့ ဟူ တဲး အန် အိုပ် မာဆေ။ 32 ဆေ ဂေ ဒီ ဘ့လေး အုဝ် ဒဲင် ရွင့်၊ အုဝ် ဒီ တဲး ဒူအီ ဒွန် အီ တး ဒူပ် အုဝ်။” 33 ဇဝ် ယေဆူ ကာလာင် ဂြုဝ်း တီ၊ တဲး ဂေ နပ် လွင် ပီ ဒီ ပါယ် အန် ဒီ လုဝ် ယမ်။

34 ဂေ ဒူအီ ကိူန် ဝီ တဝ်း၊ “ယေ ဟဲ့ ဒွိုမ် ထူမ် ဒါရာ ဇဝ်ဖြာ။ န့ တဝ်း လွင် ဒူအီ ပီ ရဝ်း ပီ တိုယ် ဇဝ်ဖြာ တဲး အန် ချွတ် ဒူအီ၊ အန် ဒီ ကွယ် ဆေဆေ၊ တူ ယမ်။ ခုဝ်၊ မှဝ် န့ ပါယ် ပီ တဝ်း မဲ၊ ‘ဂေ ဒီ ဒိုက် ဒူအီ အီ ဟဲ့ ဘဲန် ဂွန် ဒူအီ ဒဲင် ရွင့်။း’ ဒူအီ အီ ဘဲန် ဂွန် ဒူအီ တီ၊ အာဆေ အန် မုး။း”

35 ဇဝ် ယေဆူ ဝီ တဝ်း၊ “အုဝ် ပီ ဘ့လာင်။ အုဝ် ဒီ ကွယ် ရိုမ် ဒူပ် ဘေ အာဒါ အူ ကာစန်။ ခုဝ်၊ တဲး ဘေ ဒူပ် န့တေန့် ဇဝ်ဖြာ ဒေါ ဆီ မိုဝ်း ဘ့လာင်။ ဆေ အုဝ် အာဝ် ဟူ ကွယ် ရိုမ် ဒူပ် ဘေ၊ န့ ဒီ ပီ ဘေ ကွယ် ခဲင် အပ် ဝွင့်။ ဒူအီ အီ ဟာဝ် ဒူပ် န့တေန့် ဒေါ အပ် ဝွင့်၊ အန် တူ နပ် ဒူင် မှဝ် အန် ဒီ ဟာဝ်။ 36 တဲး ဘေ ညှိုမ် ဘိုင် ဘ့လာင် တီ ဒေါ ဆီ မိုဝ်း ဘ့လာင်။ ပါယ် တီ ဘေ ဒီ ဘော ဘဲန် ဒူအီ အီ ဒူပ် နာ ဘ့လာင် ဆေဆေ။” ဇဝ် ယေဆူ ဟဲ့ ဟွတ့် ကာလာင် ဂြုဝ်း တီ၊ အန် ဝီ ဟာဝ် ပေါ အူ ပ့လုဝ့်၊ တူ ဝီ တဲး အီ ဟဝ် ယိုဝ် အန်။

37 ဇဝ် ယေဆူ ဟဲ့ ဟွတ့် ဘူင် နာ မွှိုမ် အာမ် ကာဆဝ်၊ တဲး ဂေ ဒူအီ ကိူန် ယိုဝ်။ ဂေ ယီ တူ ညှိုမ် အန်။ 38 န့ ပီ ပီ ဒွိုမ် ကာလာင် ဒူအီ အီ ဘျာန် ဂြုဝ်း ဇဝ်ဖြာ အီ စိူဝ် အာအီဆာယ။ အန် ဟဲ့ ဒွိုမ် ဒဲမ် တဝ်း၊

“မဲ ဇဝ်၊ အာဝ် မိုဝ်း အာဆေ အီ ညှိုမ် ဂြုဝ်း ပီ ကာလာင် ယေ။ အာဝ် မိုဝ်း အာဆေ အီ နပ် ဆီချာ လွင် ပွုန် မဲ ဇဝ်ဖြာ။”

39 ခုဝ်၊ ဂေ တူ ပွိုန် ညှိုမ်။ န့ ပီ ပီ ဒဲမ် အုန် အာအီဆာယ ပေါ အူ ပ့လုဝ့်။ အန် တဝ်း၊

40 “အန် ဇဝ် ဟဲ့ ဘူင် တဲး န့ ပီ ငါယ် ဂေ ဟဲ့ အပ်၊ တဲး နဝ်း ဂေ ဝီ ဒိူဝ် ဒန်။ ပါယ် တီ န့ တူ လိုဝ်း မာဆေ ဒီ ငါယ် ဂေ။ န့ မိူဝ် တူ မိုဝ်း မာဆေ အီ လိုပ် ခဲင် နဝ်း ဂေ။ န့ တူ တဲး ဂေ ဘျွင် နဝ်း။ ဆေ ဂေ ယီ ဘျွင် နဝ်း၊ အုဝ် ဒီ ဘော တဲး အီ ဆဝ် ခဲင် နဝ်း ဂေ ဝီ ကဲန်။”

41 ဒေါ ကာလာင် အာအီဆာယ ဂြုဝ်း တီ၊ အန် ဟဲ့ ယိုဝ် အာဖုင် ဒင်ခုဝ် ဇဝ် ယေဆူ။ ခုဝ်၊ အန် ဝီ ကာလာင် ဂြုဝ်း တီ လွင် ဇဝ် ယေဆူ။ 42 ဒေါ ဝီ ကာလာင် ဇဝ် ယေဆူ ဂြုဝ်း တီ ဒီ ဒူအီ၊ န့ မိုဝ်း ဘော ဂေ ဒါ တာင် ယူဒါ၊ ဂေ ကိူန်၊ ဂေ ဝီ ညှိုမ် အန်။ ဂေ ယီ ယုဝ် ဒူအီ ဖိုင် ဖာရီဆဲ။ ခုဝ်၊ ဂေ တူ ယ ကာလာင် ဒီ အီ ဟဝ် လွင် ညှိုမ် ဂေ။ ဂေ ယုဝ် ဂေ ဒူအီ ခဲင် ဖိုင် ဖာရီဆဲ တူ တဲး ဂေ ဝီ လိုပ် ခဲင် ဇူင် ဂေ။ 43 ဂေ ယုဝ် ပါယ် တီ ခုဝ်၊ ဂေ ဆီ တဲး ဒူအီ အိူပ် ဂေ လွှိုမ် ဂေ ဆီ တဲး ဇဝ်ဖြာ အိူပ် ဂေ။

44 ဇဝ် ယေဆူ ယီ ကာလာင် ဂြုဝ်း တာင် တဝ်း၊ “ဆေ ဒူအီ အူ ဝီ ညှိုမ် အုဝ်၊ အာဝ် မုး အန် ညှိုမ် မီ အုဝ်။ အန် ညှိုမ် ဘော အန် ဇဝ် အီ တိုယ် အုဝ် တး ဒီ နီ။ 45 ဆေ ဒူအီ တီ ယိုဝ် အုဝ်၊ န့ ပီ၊ အန် ယိုဝ် ဘော အန် ဇဝ် အီ တိုယ် အုဝ် တး ဒီ နီ။ 46 အုဝ် ဟဲ့ တး ဒဲင် ကာဒါယ် နီ၊ တဲး အုဝ် ဘဲန် ပီ ဘ့လာင်၊ ကွဲ့ တဲး ဂေ အီ ညှိုမ် အုဝ် ကွယ် ခဲင် အပ် ဝွင့်။

47 ဆေ န့ မိုဝ်း ဒူအီ အီ ထူမ် ဂြုဝ်း အုဝ်၊ ယီ တူ ဒူပ် အုဝ်၊ အုဝ် တူ ဒမ် မှာပ် ဒီ အန်။ ခုဝ်၊ အုဝ် တူ တး ဒီ နီ၊ တဲး အုဝ် ဒမ် မှာပ် ဒီ အီ။ အုဝ် ဟဲ့ တး တဲး အုဝ် ချွတ် ဂေ။ 48 ဆေ ဒူအီ ဝဲန် ဂြုဝ်း အုဝ်၊ န့ မိုဝ်း ပေါ အူ မျုဝ်၊ အီ ဒီ ဒမ် မှာပ် ဒီ အန်။ ဟီ ဇမ် ဆီငဲ ကာဒဲ့၊ န့ ပီ ဂြုဝ်း ပီ ဒွိုမ် ကာလာင် အုဝ် ဒွန် ဒုဝ် ဒီ ဝီ ဖျာက် အန်၊ တဝ်း အန် မိုဝ်း မှာပ် ကူပ် တူ ညှိုမ် အန် ဂြုဝ်း အုဝ်။ 49 ခုဝ်၊ အာဝ် မုး အုဝ် ကာလာင် ဂြုဝ်း အီ လေး ခဲင် အာငျာန် အုဝ်။ န့ မုး ဂုန့် အုဝ်၊ အီ ဟဲ့ တိုယ် အုဝ် တး ဒီ နီ၊ အန် ဟဲ့ စ်ု အုဝ် ကာလာင်။ 50 အုဝ် မိူဝ် နပ် ဆီချာ၊ ပီ စ်ု ဇဝ်ဖြာ အီ ဘူင်၊ န့ တဲး ဂေ ပွိုန် ဒီ ကွယ် ရိုမ် ဒူပ် ဇဝ်ဖြာ ဆေဆေ။ ခုဝ်၊ ဂြုဝ်း အုဝ် မုး ခဲ့ ပီ စ်ု ဂုန့် အုဝ်၊ တဲး အုဝ် ကာလာင် ဒီ ဘေ။”