1 ဝါယ် အန် တီ န့ မိုဝ်း ဒူအီ အူ ဝီ အီ စိူဝ် အာလာဇာရုတ်။ အန် ကွယ် ခဲင် ရဝ် ဘေထာနီ။ န့ မုး ရဝ် ဒူင် ကွယ် နာင် မာထာ ဂါယ် ဝါ အန် အီ စိူဝ် နာင် မာရီ။ 2 နာင် မာရီ တွိုန် ဟဲ့ ဒွိုမ် လှုဝ် နာမန် အုး ငှုန် ဒီ ပ့လဝ် ဇဝ် ယေဆူ၊ ဝီ ခုတ်၊ တာ ဟိုက် ဂိန့် အန်။ ဝါ အန် အီ မုး အာလာဇာရုတ် တွိုန် ဟဲ့ ဆဝ်။ 3 အီကတ် အန် ဂါယ် ဝီ တိုယ် ဒူအီ အူ ဝီ၊ တဲး အန် ဟာဝ် ဇမ် ဒူင် ကွယ် ဇဝ် ယေဆူ၊ ကာလာင် ဒီ အန်၊ “မဲ ဇဝ်၊ ဒူအီ ပီ ရွက့် မဲ၊ အန် ဟဲ့ ဆဝ်။”

4 အန် ဟဲ့ ဟွတ့် ကာလာင် ဂြုဝ်း တီ ဒီ ဇဝ် ယေဆူ၊ ဇဝ် ယေဆူ ဝီ တဝ်း၊ “ဆဝ် အန် တီ တူ တဲး အန် ယမ်။ ကူပ် ဆဝ် အန် တီ၊ ဇဝ်ဖြာ ဒီ ဘျ အာဖုင် ဒင်ခုဝ် အန်။ အန် ဒီ ဘော တဲး ဒွန် အီ ယိုဝ် လွင် အာဖုင် ဒင်ခုဝ် ပီ ဒွါ အန် ဒီ ဂွန် အန်။” 5 ဇဝ် ယေဆူ ရွက့် နာင် မာထာ ဘော နာင် မာရီ။ အန် ရွက့် ဘော အာလာဇာရုတ်။ 6 ဒေါ ဟဲ့ နပ် အန် လွင် အာလာဇာရုတ် ဟဲ့ ဆဝ်၊ အန် တူ ဟာဝ် အူ ဇေန့်။ အန် ဝီ ကွယ် ဒူင် ကွယ် အန် ပေါ အာ ဆီငဲ။

7 ဟဲ့ ဟွတ့်၊ အန် ဝီ တဝ်း ဒီ ဒီဘဲ အန်၊ “တဲး အေ ဟာဝ် အိူင် ယူဒါ။”

8 ဂေ ဝီ တဝ်း၊ “ဆာရာ၊ ညှမ် ဘော လှေန့်၊ ဂေ ဒူအီ အာယူဒါ ဟဲ့ ဒွိုမ် ဒိုဝ်း မာဝ် တဝ်း ဒီ ဝိုန့် ယမ် မဲ။ ဒေါ တီ နီ၊ မှဝ် န့ ပါယ် ပီ ဆီ ဟာဝ် မဲ ဒူင် ကွယ် ဂေ။း”

9 ဇဝ် ယေဆူ ဝီ တဝ်း၊ “န့ မိုဝ်း ဂိုဝ် ဒီ အာ နာရီ ဒေါ ဘ့လာင် ဆီငဲ။ ဆေ ဒူအီ ဟာဝ် ဒေါ ဘ့လာင်၊ အန် တူ တာ ဒုး ဒီ မာဆေ။ ခုဝ်၊ ဘ့လာင် အီ ကွယ် ဒဲင် ကာဒါယ် နီ ဝီ တဲး အန် ယိုဝ်။ 10 ဆေ ဒူအီ ယီ ဟာဝ် ဒေါ အပ် ဝွင့် ခဲင် မှိုဝ်၊ အန် နပ် ဒီ တာ ဒုး ကူပ် တူ မိုဝ်း အန် တာ ဒီ ဆွိုန်။”

11 အန် ဟဲ့ ဟွတ့် ကာလာင် ဂြုဝ်း တီ၊ အန် ဝီ ဟာဝ် ကာလာင် ဒီ ဂေ။ အန် တဝ်း၊ “ဂိုက် အေ အီ စိူဝ် အာလာဇာရုတ် ဟဲ့ အိတ်။ အုဝ် ဒီ ဟာဝ် ဘျိတ့် အန်။”

12 ဂေ ဒီဘဲ အန် ဝီ တဝ်း၊ “ဆေ အန် အိတ်၊ အန် ဒီ ဝီ ကဲန်။” 13 မာလဲ ဇဝ် ယေဆူ ဟဲ့ ကာလာင် လွင် အန် ဟဲ့ ယမ်။ ဂေ ဒီဘဲ အန်၊ ယီ ထာင်၊ အန် ကာလာင် လွင် အိတ် ဒီလှဝ်။

14 ခုဝ် အန် တီ ဇဝ် ယေဆူ ဝီ ကာလာင် ဂြုဝ်း ဆိူဝ် ဒီ ဂေ၊ “အန် ဟဲ့ ဟွတ့် ယမ်။ 15 အုဝ် မိူဝ် ဒါခိုယ်၊ ကူပ် တူ ကွယ် အုဝ် ဒူပ် အန် ဒေါ ယမ် အန်။ န့ ဒီ တဲး ဘေ ညှိုမ် အုဝ် ကူပ် ယိုဝ် ဘေ ပီ ဒီ ဘူင် အုဝ်။ ဒေါ တီ နီ၊ တဲး အေ ဝီ ဟာဝ် ဒူင် ကွယ် အန်။”

16 ပန် တီ န့ မုး အာထုဝ်မာတ်၊ အန် ဘော စိူဝ် အာဒီဒါမာတ်။ အန် ဝီ ကာလာင် ဒီ ဂေ ဒီဘဲ ဒွန် အီ တဝ်း၊ “တဲး အေ ဘောကာဂ့လျီတ် ဟာဝ်၊ တဲး ဘော အေ ယမ် ဒူပ် ဇဝ် ယေဆူ။”

17 ဂေ ဟဲ့ ဟွတ့် ဇမ် ဒူင် ကွယ် အာလာဇာရုတ် တွိုန်၊ ဇဝ် ယေဆူ ကော နပ်၊ အာလာဇာရုတ် ဟဲ့ ကွယ် ခဲင် ကာဒဝ် ဘာရေဝ် အာဒါ ဖွုန် ဆီငဲ။ 18 ရဝ် ဘေထာနီ ဂါယ် မိူင် ယေရူဆာလဲမ် ဟဲ့ လာယ် ကာတူင့် အာဝ် ဘော နုဝ့် အာ လွှက့်။^a 19 ဂေ ဒူအီ အာယူဒါ အီ ကွယ် ခဲင် မိူင် ယေရူဆာလဲမ်၊ ဂေ ကိူန် ဟဲ့ တး ဘဲန် ဂိုက် ဂါယ်၊ ကွဲ့ တဲး ဂါယ် က့လိုဝ် ကာဆဝ် ကူပ် ဟဲ့ ယမ် ဝါ ဂါယ်။ 20 န့ မုး နာင် မာထာ တွိုန်၊ ဒေါ ယိုဝ် အန် လွင် ဇဝ် ယေဆူ ဟဲ့ တး၊ အန် ဟာဝ် ရွုး ဇဝ် ယေဆူ။ နာင် မာရီ တွိုန် ယီ ကွယ် ခဲင် ကာင်။

21 နာင် မာထာ ဝီ တဝ်း ဒီ ဇဝ် ယေဆူ၊ “မဲ ဇဝ်၊ ဆေ မဲ စေဝ် တး၊ ဝါ အုဝ် တူ ယမ်။ 22 ဘော ဒေါ တီ နီ အုဝ် ဟဲ့ နပ်၊ ဆေ မဲ မှာန့် ဒီ ဇဝ်ဖြာ မျုဝ် မှဝ်၊ အန် ဒီ ဒွါ ဒီ မဲ။”

23 ဇဝ် ယေဆူ ဝီ တဝ်း ဒီ အန်၊ “ဝါ မဲ ဒီ ဝီ ယိတ့် ဝီ အိမ်။”

24 နာင် မာထာ ဝီ တဝ်း၊ “အုဝ် ဟဲ့ နပ်၊ ဆေ န့ ဟီ ဇမ် ဆီငဲ ကာဒဲ့ ပန် ဒီ ဝီ တး မဲ၊ အန် ဒီ ဝီ ယိတ့် ဝီ အိမ်။”

25 ဇဝ် ယေဆူ ဝီ တဝ်း၊ “အုဝ် မုး ဒူအီ အီ တဲး ဒူအီ ဝီ ယိတ့် ဝီ အိမ်။ အုဝ် ဒွါ အာဆာက် ကာမာယ် ဒီ အီ။ ဒွန် အီ၊ အီ ညှိုမ် အုဝ်၊ အန် ဒီ ကွယ် ဆေဆေ။ ဒုဝ် အန် ပီ ဘော ဟဲ့ ယမ်၊ နဝ်း ဖွိုမ် အန် ယီ တူ ယမ် ဒေါ မှဝ်။ 26 အာဆေ ယီ ကွယ် ဒေါ တီ နီ၊ အာဆေ ညှိုမ် အုဝ် ဒေါ တီ နီ၊ အန် တူ ဝီ ယမ် ဒေါ မှဝ်။ အာတီ မဲ ညှိုမ်။း”

27 အန် ဝီ တဝ်း၊ “အိုဝ်၊ မဲ ဇဝ်။ အုဝ် ဟဲ့ ညှိုမ်၊ မဲ မုး ဒူအီ ပီ ရဝ်း ပီ တိုယ် ဇဝ်ဖြာ တဲး မဲ ချွတ် ဒူအီ။ မဲ မုး ဂွန် ဇဝ်ဖြာ အီ ဟဲ့ တး ဇမ် ဒဲင် ကာဒါယ် နီ။”

28 အန် ဟဲ့ ဟွတ့် ကာလာင် ဂြုဝ်း တီ၊ အန် ဝီ ဝေန့်၊ ဝီ ဒဲ့ ဝါ အန် အီ စိူဝ် နာင် မာရီ။ အန် တူ တဲး အီ ဟဝ် ယိုဝ် ဒေါ တဝ်း အန်၊ “ဒါ ဆာရာ အာယ် ဟဲ့ တး၊ အန် ဒဲ့ မဲ။” 29 ဒေါ ယိုဝ် နာင် မာရီ ဂြုဝ်း တီ၊ အန် ဝီ ယိတ့် နင်ဂန်၊ ဝီ ဟာဝ် ဒူင် ကွယ် ဇဝ် ယေဆူ။ 30 ဇဝ် ယေဆူ ယီ ညှမ် လိုပ် ခဲင် ရဝ်။ အန် ဆီ ကွယ် ဒူင် ကာတုန့် အန် ဒီ နာင် မာထာ တွိုန်။ 31 န့ ယီ မုး ဂေ ဒူအီ အာယူဒါ အီ ဟဲ့ တး ကွယ် ရိုမ် ဒူပ် နာင် မာရီ ခဲင် ကာင် အန်၊ ဂေ ဟဲ့ ယိုဝ် အန် ယိတ့် အူ ဇေန့်၊ လေး ခဲင် ကာင်။ ပန် တီ ဘော ဂေ အီ ဒူပ် အန်။ ဂေ တဝ်း၊ “အန် ဟာဝ် ဒီ ကာဒဝ် ဘာရေဝ်၊ အန် ဆီ ယာမ် ဒီ ဒွယ်။”

32 နာင် မာရီ ယဲ့ ဟဲ့ ဇမ် ဒူင် ကွယ် ဇဝ် ယေဆူ၊ ဝီ ခြိုပ်ခြဝ် ဒီ အာတ့် အန် တဝ်း၊ “မဲ ဇဝ်၊ ဆေ မဲ ကွယ် ဒီ နီ ဒေါ ဆဝ် ဝါ အုဝ်၊ အန် တူ ယမ်။”

33 ဇဝ် ယေဆူ ယိုဝ် အန် ယာမ်။ အန် ဘော ယိုဝ် ဂေ ဒူအီ အာယူဒါ အီ တး ဒူပ် အန်။ ဘော ဂေ ဟဲ့ ယာမ်။ န့ ဘော ဘဲန် ဒုက် ဒီ နဝ်း အန်။ 34 အန် ဝီ ဒီမွှတ် တဝ်း၊ “ဒီ မှဝ် ဘေ ဟဲ့ ဘ့လေး အန်။း” ဂေ ဝီ တဝ်း၊ “မဲ ဆာရာ၊ တဲး မဲ တး ယွတ်။”

35 ဇဝ် ယေဆူ ဘော ယာမ်။

36 ပန် တီ ဂေ ဒူအီ အာယူဒါ ဝီ တဝ်း၊ “အန် ဟဲ့ ရွက့် ကာဆဝ် အာလာဇာရုတ် တွိုန်။”

37 မင် အီ ယီ တဝ်း၊ “ဒူအီ တီ ဟဲ့ ဒွိုမ် ဘူင် တဲး ဒူအီ ငါယ် အပ် ဝီ ယိုဝ်။ မှဝ် န့ ပါယ် ပီ တူ စွယ် အန်၊ ကွဲ့ တဲး အာလာဇာရုတ် ယမ်။း”

38 န့ ဝီ ဘဲန် ဒုက် ဒီ နဝ်း ဇဝ် ယေဆူ ပေါ အူ ဇေန့်။ အန် ဟာဝ် ကာတတ် ဘာရေဝ် အီ မုး ကာဒဝ် မာဝ်။ န့ ဘော မိုဝ်း မာဝ် တာင် အီ ကာဘိတ် ဒီ မာလုဝ်း ကာဒဝ် ဘာရေဝ် တီ။ 39 ဇဝ် ယေဆူ ဝီ တဝ်း၊ “ထုဝ် မာဝ် တီ၊ တဲး န့ ဝိုဝ်း။”

နာင် မာထာ တွိုန် အီ မုး အီကတ် ဒူအီ ယမ် တွိုန်၊ အန် တဝ်း၊ “မဲ ဇဝ်၊ ဒေါ တီ နီ အန် ဟဲ့ အုး အမ်။ အန် ဟဲ့ ကွယ် ခဲင် ကာဒဝ် ဘာရေဝ် တီ အာဒါ ဖွုန် ဆီငဲ။”

40 ဇဝ် ယေဆူ တဝ်း ဒီ အန်၊ “အုဝ် ဟဲ့ ဟွတ့် တဝ်း ဒီ မဲ၊ ဆေ မဲ ညှိုမ် မဲ ဒီ ပွိုန် ယိုဝ် အာဖုင် ဒင်ခုဝ် ဇဝ်ဖြာ။”

41 ပန် တီ ဂေ ဝီ ကာထုဝ့် မာဝ် တွိုန်၊ တဲး အန် ကွယ် ဒီ ခူပ် မာလုဝ်း။ ဟဲ့ ဟွတ့်၊ ဇဝ် ယေဆူ ဝီ ယွတ် ဂါင်ဟြာဝ်၊ ဝီ တဝ်း၊ “ဂုန့် အုဝ်၊ အုဝ် ဒါင် ဂုင် ဂေဇူ ဒီ မဲ။ ခုဝ်၊ မဲ ဟဲ့ ထူမ် ဂြုဝ်း အုဝ်။ 42 အုဝ် ဟဲ့ နပ်၊ မဲ ထူမ် ဆေဆေ ပီ မှာန့် အုဝ်။ အုဝ် ယီ တဝ်း ဂြုဝ်း တီ၊ တဲး ဂေ အီ ကွယ် ဒီ နီ ဘော ပွိုန် ဒီ ယိုဝ်၊ တဲး ဘော ဂေ ညှိုမ်၊ န့ မုး မဲ၊ အီ ဟဲ့ တိုယ် အုဝ် တး ဒီ နီ။”

43 ဇဝ် ယေဆူ ဟဲ့ ဟွတ့် ကာလာင် ဂြုဝ်း တီ၊ အန် ဝီ ဒဲ့၊ တဝ်း ဂြုဝ်း တာင်၊ “မဲ အာလာဇာရုတ်၊ တဲး မဲ လေး ဒူင် ကွယ် မဲ တီ။” 44 ပန် တီ ဒူအီ ယမ် ဝီ လေး တး ခဲင် ကာဒဝ် ဘာရေဝ်။ ဘော ဒဲ ဘော ပ့လဝ် အန် ဆီ မိုဝ်း ဘိက် ပီ ပက် ဂေ ဒီ အန် ဒေါ ဘ့လေး ဂေ ဒုဝ် အန် ခဲင် ကာဒဝ် ဘာရေဝ်။ ဘော ကာမဲ့ ကာဘိတ် နာ အန်။

ဇဝ် ယေဆူ ဝီ တဝ်း၊ “တဲး ဘေ ဂဝ်း ဝဲန် ဘိက် ပီ ကာဘန် ဘေ ဒီ အန်၊ တဲး အန် ပွိုန် ဒီ ဟာဝ်။”

45 ကူပ် ပီ ဘူင် ဇဝ် ယေဆူ တီ၊ န့ ဘော မိုဝ်း ဒူအီ အာယူဒါ ကိူန် အီ ညှိုမ် ဇဝ် ယေဆူ။ န့ မုး ဂေ အီ ဟဲ့ တး ငွိုပ် နာင် မာရီ၊ အီ ဟဲ့ ယိုဝ် ပဲ့ ဟဲ့ ဘူင် အန်။ 46 န့ ယီ မိုဝ်း ဒူအီ ဂေ တီ မင် အီ၊ ဂေ ဟာဝ် ဒီ ဒူအီ ဖိုင် ဖာရီဆဲ၊ ကာလာင် ဒီ ဂေ လွင် ပဲ့ ဟဲ့ ဘူင် ဇဝ် ယေဆူ။ 47 ပန် တီ န့ မုး ဂေ ဒါ တာင် အီ ယဲတ့် ဂေ ဒူအီ အီ လှူ ဒီ ဇဝ်ဖြာ ဘော ဂေ ဒူအီ ဖိုင် ဖာရီဆဲ၊ ဂေ ဒဲ့ ဂေ ဒါ တာင် အီ အိုပ် မိူင်၊ တဲး ဂေ တး ကာဇု၊ လာယ် ဆင်ချာင်။

ဂေ တဝ်း၊ “မာဆေ ပီ ဒီ ဘူင် အေ။း ဒူအီ တီ၊ အန် ဘူင် နာ မွှိုမ် အာမ် ကာဆဝ် ဘဲန် မျုဝ် ဘဲန် မျုဝ်။ 48 ဆေ အေ တဲး အန် ဘူင် ဟာဝ် ပီ ဘူင် အန် ဒေါ တီ နီ၊ ဒွန် အီ ဒီ ညှိုမ် အန်။ ဟဲ့ ဟွတ့်၊ ဂေ ဒူအီ ရုဝ်မာ ဒီ တး ပျာတ့် မိူင် အေ။ ဂေ ဒီ ဘော ဘူင် ကွဲ့ ဟူ တဲး အေ ကွယ် ရိုမ် ဘဲန် အူ မျုဝ်။”

49 န့ ယီ မိုဝ်း ဒူအီ အူ ဝီ ကာတဲ ဂေ။ အန် ဘဲန် ဒါ တာင် အီ အိုပ် တူတ့် ဂေ ဒူအီ အီ လှူ ဒီ ဇဝ်ဖြာ ဒေါ မုး ဆီနမ် တီ။ အန် စိူဝ် အာကာယ်ဖာ။ အန် တဝ်း ဒီ ဂေ၊ “ဘေ တူ နပ် မာဆေ။ 50 ဘေ မိူဝ် တူ ဇေန့်ဇာ။ ဆေ ဒူအီ အူ ဝီ ဒီ ယမ် ကာဒါင် အေ ဒွန် အီ၊ န့ ဟဲ့ မွှိုမ် လွှိုမ် အာမျုဝ် အေ ဒွန် အီ လုဝ် ယမ်။”

51 ဂြုဝ်း တီ န့ ယီ တူ မုး ပီ ဇေန့်ဇာ အန်။ ကူပ် မုး အန် ဒါ တာင် အီ အိုပ် တူတ့် ဂေ ဒူအီ အီ လှူ ဒီ ဇဝ်ဖြာ ဒေါ မုး ဆီနမ် တီ၊ အန် နပ် ဒီ ဘျာန် ဂြုဝ်း ဇဝ်ဖြာ ဒေါ ကာလာင် အန် လွင် ဇဝ် ယေဆူ ဒီ ခမ် ဒီ ယမ် ကာဒါင် ဂေ ဒူအီ အာမျုဝ် ယူဒါ။ 52 အာဝ် မုး ဇဝ် ယေဆူ ခမ် ဒီ ယမ် မီ အာဒါ ဂေ ဒူအီ အာမျုဝ် ယူဒါ။ အန် ဘော ခမ် ဒီ ယမ်၊ တဲး အန် ဝီ ဒဲ့ ကာဇု ဂေ ဂွန် ဇဝ်ဖြာ အီ ကွယ် ဘဲန် ပ့လုဝ့် ဘဲန် ပ့လုဝ့်၊ တဲး ဂေ ဘဲန် အူ ဖိုင်။ 53 ဆိန့် ဒေါ အန် တီ ဂေ ဘော လာယ် ဆင်ချာင် လွင် ဒီ ငဝ်း ဂေ ဇဝ် ယေဆူ။

54 ခုဝ်၊ ဇဝ် ယေဆူ အာဝ် ဟူ ဟာဝ် ဘဲန် ပ့လုဝ့် ဘဲန် ပ့လုဝ့် တဲး ဂေ ဒူအီ အာယူဒါ ပွိုန် ဒီ ယိုဝ် အန်။ အန် ဟာဝ် ဇမ် အူ ပ့လုဝ့် အီ ကွယ် ကာတတ် ပြဲ ကာဟဝ်း။ မိူင် တီ၊ အန် စိူဝ် မိူင် အေဖာရိမ်။ ဘော အန် ဘော ဒီဘဲ အန် ကွယ် ခဲင် မိူင် တီ။

55 အာခြာဝ် အန် တီ ယီ ကာတတ် ဒီ ဇမ် ဘ့လွယ် လှုဝ်း ဂေ ဒူအီ အာယူဒါ ဇဝ်ဖြာ ဒေါ ကာလုဝ်း အန် ကာင် ဂေ။ ဒေါ အန် တီ ဂေ ဝီ လေး ဒူင် ကွယ် ဂေ တွိုန်၊ ဝီ ဟုဝ့် မိူင် ယေရူဆာလဲမ်။ ဂေ လုဝ် ဘူင် တဲး န့ ဆီငါ ဒွန် မျုဝ် အာတ့် ဘူင် ဂေ ဘ့လွယ် တီ၊ တဲး န့ ဒူပ် ဒါရာ။ 56 ဂေ ဒါ တာင် ယူဒါ ဝီ ဟြေတ့် ဇဝ် ယေဆူ။ ဂေ ကွယ် ခဲင် ဝဲင် ဟုဝ် ဇဝ်ဖြာ၊ လာယ် ကာလာင် တဝ်း၊ “မာဆေ ပီ ထာင် ဘေ။း ဘေ ထာင်၊ အန် ဒီ တး လိုပ် ဘ့လွယ် တီ။း” 57 ဂေ ဒါ တာင် အီ ယဲတ့် ဂေ ဒူအီ အီ လှူ ဒီ ဇဝ်ဖြာ ဘော ဂေ ဒူအီ ခဲင် ဖိုင် ဖာရီဆဲ၊ ဂေ ဟဲ့ ဒမ် ဒူအီ ဒွန် အီ၊ ဆေ ဂေ ယိုဝ် ဇဝ် ယေဆူ၊ တဲး ဂေ တး ကာလာင်။ ပါယ် တီ ဂေ ထာင် ဂေ ဒီ ပွိုန် ဒီ မှေတ့် အန်။