1 ဇဝ် ယေဆူ ဝီ တဝ်း၊ “အုဝ် တဝ်း အာခါခ်ု ဒီ ဘေ။ ဆေ န့ မိုဝ်း ဝဲင် မာဘူ၊ ဆေ န့ ဘော မိုဝ်း ဒူအီ လိုပ် ခဲင် ဝဲင် တီ၊ ဆေ အန် တူ လိုပ် ဒီ မာလုဝ်း၊ ဆေ အန် ဟာဝ် ဟုဝ့် လူင့် ပေါ အူ ပ့လုဝ့်၊ ဒူအီ တီ မုး ဒါ ပြာ၊ ဒါ ဇူန်။ 2 အာဆေ ယီ လိုပ် ဒီ မာလုဝ်း၊ အန် မုး ဒူအီ အီ ဟျီင် မာဘူ တီ။ 3 ဆေ န့ မိုဝ်း ဒူအီ ဘ်ု မာလုဝ်း၊ အန် ဒီ ဝိုဝ်း မာလုဝ်း၊ တဲး ဒါ အီ ဟျီင် မာဘူ တွိုန် ဝီ လိုပ်။ မာဘူ မိူဝ် နုဝ် ဂြုဝ်း အန်။ အန် ဒီ ဘော ဒဲ့ စိူဝ် ဂေ မာဘူ အန်၊ တဲး ဂေ လေး ခဲင် ဝဲင်။ 4 ဆေ မာဘူ ဟဲ့ ဟွတ့် လေး၊ ဒါ အီ ဟျီင် ဂေ၊ အန် ဒီ ဝီ ယဲတ့် ဒီ အာတ့် ဂေ။ ဂေ မိူဝ် နပ် ဒီ ဒူပ် အန် ကူပ် နုဝ် ဂေ ဂြုဝ်း အန်။ 5 ဆေ န့ ယီ မုး ဒူအီ ပီ တူ နပ် ဂေ မာဘူ၊ ဂေ တူ ဒူပ် အန် ဒေါ မှဝ်။ ဂေ ဒီ တဝ် တ အန် ကူပ် တူ ဒွိုမ် ဂေ ဂြုဝ်း အန်။” 6 ဇဝ် ယေဆူ ကာလာင် အူဖာမာ တီ ဒီ ဂေ ဒါ တာင် ယူဒါ တွိုန်။ ဂေ ယီ တူ နပ် လွင် မာဆေ ပီ ကာလာင် အန်။

7 ခုဝ်၊ ဇဝ် ယေဆူ ဝီ ကာလာင် ပေါ အူ ဇေန့်။ အန် တဝ်း၊ “အုဝ် ကာလာင် အာခ်ု ဒီ ဘေ။ အုဝ် ပီ မာလုဝ်း ဝဲင်၊ တဲး မာဘူ ပွိုန် ဒီ လိုပ်။ 8 ဒွန် အီ အီ ဟဲ့ တး အာတ့် တး အုဝ်၊ ဂေ ပီ ဒါ ပြာ ဂေ ဒါ ဇူန်။ ဂေ မာဘူ ယီ တူ ထူမ် ဒူပ် ဂြုဝ်း ဂေ။

9 အုဝ် ပီ မာလုဝ်း တဲး အီ လိုပ် ဒူင် ကွယ် ဇဝ်ဖြာ။ အာဆေ လိုပ် ခဲင် မာလုဝ်း တီ၊ အုဝ် ဒီ ဘော ချွတ် အန်။ န့ ပီ၊ အန် ဒီ ဟာဝ် လိုပ် လိုပ် လေး လေး ခဲင် ဝဲင်၊ တဲး အန် ပွိုန် ဒီ ဟူမ် ပေတ့်။ 10 ဆေ န့ မုး ဒါ ပြာ၊ အန် တး၊ တဲး အန် ပွိုန် ဒီ ပြာ၊ ပွိုန် ဒီ ငဝ်း ဂေ မာဘူ၊ တဲး ဂေ စှိုမ်။ အုဝ် ယီ တး၊ တဲး အုဝ် ဒွါ အာဆာက် ကာမာယ် ဒီ ဒူအီ အီ ပီ မာဘူ၊ တဲး န့ ဘွတ်၊ တဲး န့ မွှိုမ် ဒီ ဂေ။

11 အုဝ် ပီ ဒူအီ ဟျီင် မာဘူ အီ မွှိုမ်။ ဒူအီ ဟျီင် မာဘူ တီ၊ အန် ဒီ ခမ် ဒီ ယမ် ကာဒါင် မာဘူ အန်။ 12 ဆေ န့ ယီ မုး အီ ဇာင် ဒီ ဘ်ု မာဘူ၊ အန် လုဝ် ဘ်ု မာဘူ အီ ဟဝ် အီ တူ မုး မာဘူ အန်။ အန် ဟီ ယိုဝ် မာဆုဝ် ပြဲ တး၊ အန် ဒီ ဘော နပ် ဒီ တဝ် ဝဲန် မာဘူ တီ။ ပန် တီ မာဆုဝ် ပြဲ တီ တး ဘူင် တဲး မာဘူ ဒိူန် ကာယဝ်း။ 13 ဒူအီ အီ ဇာင် ဒီ ဘ်ု မာဘူ အီ၊ အန် ဒီ တဝ် ကူပ် မုး အန် ဒူအီ ဇာင်။ အန် တူ ကာဝေ မာဘူ တီ။

14 အုဝ် ယီ ပီ ဒူအီ အီ ဟျီင် မာဘူ အီ မွှိုမ်။ အုဝ် နပ် မာဘူ အီ မုး ကြုဝ် အုဝ်။ ဘော မာဘူ အုဝ် ဂေ တီ ဂေ မိူဝ် နပ် အုဝ်။ 15 ပါယ် တီ၊ ဘော ဇဝ်ဖြာ နပ် အုဝ်၊ ဘော အုဝ် နပ် ဇဝ်ဖြာ။ အုဝ် မိူဝ် ဒီ ခမ် ဒီ ယမ် ကာဒါင် ဒူအီ အီ ပီ မာဘူ။ 16 အုဝ် ဘော မိုဝ်း မာဘူ ဘဲန် ပ့လုဝ့် ဘဲန် ပ့လုဝ့်၊ အီ တူ ကွယ် ခဲင် ဝဲင် နီ။ အုဝ် လုဝ် ဒဲ့ ဘော ဂေ တဲး ဂေ တး။ ဘော ဂေ ဒီ ထူမ် ဂြုဝ်း အုဝ်။ ဟဲ့ ဟွတ့်၊ န့ ဒီ မိုဝ်း မီ ဖိုင် မာဘူ အူ ဖိုင်။ ဘော ဒူအီ အီ ဟျီင် မာဘူ ဒီ မိုဝ်း မီ အူ ဝီ။ 17 ကူပ် ခမ် အုဝ် ဒီ ယမ်၊ ဂုန့် အုဝ် ရွက့် အုဝ်။ ကူပ် ရွက့် အန် ဒီ အုဝ်၊ အန် ဒီ ဝီ ဒွါ အာဆာက် ဒီ အုဝ်။ 18 အာဝ် မိုဝ်း အာဆေ ပွိုန် ဒီ ငဝ်း ယမ် အုဝ် ဆေ အုဝ် တူ ခ့ဝါင်။ အုဝ် မိုဝ်း ပွုန် ဒီ ခ့ဝါင် ဂေ ငဝ်း အာဆာက် အုဝ်။ အုဝ် ဘော မိုဝ်း ပွုန် ဒီ ဝီ ယိတ့် ဝီ အိမ်။ န့ မုး ဂုန့် အုဝ်၊ အန် ဟဲ့ စ်ု အုဝ် ဘူင် ပါယ် တီ။”

19 ဂေ ဒါ တာင် ယူဒါ ဝီ ထူမ် ဂြုဝ်း တီ၊ န့ ဝီ တဲး ဂေ တူ လာယ် ဖြူမ် ပေါ အူ ဇေန့်။ 20 ဂေ ကိူန် တဝ်း၊ “အန် မိုဝ်း ကာနမ် ကွယ် ခဲင် ဒုဝ် အန်။ ရိုဝ်၊ မိူဝ် အန် ရိုဝ်။ မှဝ် န့ ပါယ် ပီ ထူမ် ဘေ ဂြုဝ်း အန်။း”

21 မင် အီ တဝ်း၊ “ဂြုဝ်း ပီ ကာလာင် အန် တူ ပီ ဂြုဝ်း ပီ ကာလာင် ဒူအီ အီ မိုဝ်း ကာနမ်။ ဆေ န့ မုး ကာနမ်၊ အန် တူ ပဲ ဒီ ဘူင် တဲး ဒူအီ ငါယ် အပ် ဝီ ယိုဝ်။”

22 ပန် တီ န့ မုး အာခြာဝ် ဒီ ဘူင် ဂေ ဘ့လွယ် လှုဝ်း ဂေ ဟုဝ် ဇဝ်ဖြာ၊ ဒေါ ဘာင် ဂေ ဇဝ်ဖြာ ကွယ် နာ ခဲင်။ ဒေါ ဘူင် ဂေ ဘ့လွယ် တီ၊ န့ မုး အာခြာဝ် ဂတ် ဂျီတ်။ 23 ဒေါ အန် တီ ဇဝ် ယေဆူ ဟာဝ် ခဲင် ဝဲင် ဟုဝ် ဇဝ်ဖြာ။ အန် ကွယ် ကာတတ် ဇေရူပ် အီ စိူဝ် ဇေရူပ် အာဆာလုဝ်မုဝ်။ 24 ဂေ ဒူအီ အာယူဒါ ဝီ တး ဒူင် ကွယ် အန် တဝ်း၊ “န့ ဒီ ဘော လှေန့် ခဲ့ မှဝ်၊ မဲ ကော ဒီ တဲး ယေ နပ် ဆီချာ အာဆေ မဲ မုး။း တဲး မဲ ကာလာင် ဂြုဝ်း ဆိူဝ် ဒီ ယေ၊ ဆေ မဲ မုး ဒူအီ ပီ ရဝ်း ပီ တိုယ် ဇဝ်ဖြာ၊ အီ ဒီ ချွတ် ယေ။”

25 ဇဝ် ယေဆူ ဝီ တဝ်း၊ “အုဝ် ဟဲ့ ဟွတ့် ကာလာင် ဆိူဝ် ဒီ ဘေ။ ဘေ ယီ တူ ညှိုမ် အုဝ်။ အီ မွှိုမ် အာမ် ကာဆဝ် ပဲ့ ဟဲ့ ဘူင် အုဝ် ဘဲန် မျုဝ် ဘဲန် မျုဝ်၊ န့ တဲး ဘေ နပ် ဆီချာ လွင် အုဝ်။ န့ မုး ပီ စ်ု ဇဝ်ဖြာ အုဝ် ဘူင်။ 26 ကူပ် တူ မုး ဘေ မာဘူ အုဝ်၊ ဘေ တူ ညှိုမ် ပီ ဒွိုမ် ကာလာင် အုဝ် ဒီ ဘေ။ 27 ဆေ န့ မုး မာဘူ အုဝ်၊ ဂေ နုဝ် ဂြုဝ်း အုဝ်။ ဘော အုဝ် နပ် ဂေ။ ဂေ မိူဝ် ဒူပ် အုဝ်။ 28 အုဝ် ဒီ ဘော တဲး ဂေ ကွယ် ရိုမ် ဒူပ် ဇဝ်ဖြာ ဆေဆေ။ ဂေ တူ စှိုမ် ဒေါ မှဝ်။ န့ မိူဝ် တူ မိုဝ်း အာဆေ အီ ပဲ ဒီ ဒိုဝ်း လေး ဂေ ဒီ အုဝ်။ 29 ဂုန့် အုဝ် ဟဲ့ ဒွါ ဂေ ဒီ အုဝ်။ အန် ဟဲ့ တာင် လွှိုမ် တူတ့်။ အာဝ် မိုဝ်း အာဆေ နပ် ဒီ ဖာတ် ဂေ ဒီ ဂုန့် အုဝ်။ 30 ဘော ဂုန့် အုဝ် ဘော အုဝ်၊ ယာယ် ပီ အူ ဝီ။”

31 ကူပ် ကာလာင် အန် ဂြုဝ်း တီ၊ ဂေ ဒူအီ အာယူဒါ ဝီ ဒိုဝ်း မာဝ် တဝ်း ဒီ ဝိုန့် ဒီ ဇဝ် ယေဆူ၊ တဲး အန် ယမ်။ 32 ဇဝ် ယေဆူ ဝီ တဝ်း ဒီ ဂေ၊ “ဂုန့် အုဝ် ဟဲ့ ဟွတ့် တဲး အုဝ် ဘူင် နာ မွှိုမ် ဘဲန် မျုဝ် ဘဲန် မျုဝ် တဲး ဘေ ယိုဝ်။ န့ မုး ကူပ် နာ မွှိုမ် မျုဝ် မှဝ် ဘေ တဝ်း ဒီ ဒိုဝ်း မာဝ် ဝီ ဝိုန့် ဒီ အုဝ် တဲး အုဝ် ယမ်။း”

33 ဂေ ဒူအီ အာယူဒါ ဝီ တဝ်း၊ “အာဝ် မုး၊ ယေ ဝိုန့် မဲ ကူပ် ဘူင် မဲ နာ မွှိုမ်။ ယေ ဝိုန့် မဲ ကူပ် ကာလာင် မဲ ဂြုဝ်း အီ ခဲန့် ဇဝ်ဖြာ။ န့ ပီ၊ မဲ ဆီ ဘဲန် ဇဝ်ဖြာ။”

34 ဇဝ် ယေဆူ ဝီ တဝ်း၊ “ခဲင် ဘပ် ဒါရာ ဘေ ဟဲ့ ဒဲမ် အုန် လွင် ဇဝ်ဖြာ တဝ်း ပါယ် နီ၊ ‘အုဝ် ဟဲ့ ဒွိုမ် တဝ်း၊ “ဘေ ဟဲ့ ဘဲန် ဇဝ်ဖြာ။”’ 35 ဂြုဝ်း ဇဝ်ဖြာ တီ အီ ဒဲမ် အုန် ခဲင် ဘပ် ဇဝ်ဖြာ အာဝ် ပွိုန် ဝဲန်။ အန် ဇဝ် ဟဲ့ ဟွတ့် တဝ်း၊ ဂေ ဒူအီ အီ ထူမ် ဂြုဝ်း ဇဝ်ဖြာ ဒီ ဝီ ဘဲန် ဇဝ်ဖြာ။ 36 ဆေ န့ ပါယ် တီ၊ ဆေ အုဝ် တဝ်း၊ အုဝ် မုး ဂွန် ဇဝ်ဖြာ၊ မှဝ် န့ ပါယ် ပီ တဝ်း ဘေ၊ အုဝ် ကာလာင် ဂြုဝ်း အီ ခဲန့် ဇဝ်ဖြာ။း န့ မုး အုဝ်၊ ဂုန့် အုဝ် ဟဲ့ တဲး အုဝ် ဘဲန် ဒူအီ အီ ဆီငါ ဘွတ်၊ တဲး အုဝ် လူင် ဒဲင် ကာဒါယ်။ 37 ဆေ အုဝ် တူ ဘူင် ခဲ့ ပီ စ်ု ဂုန့် အုဝ်၊ ဘေ တူ လုဝ် ညှိုမ် အုဝ်။ 38 ဆေ န့ ယီ မှာန်၊ အုဝ် ဘူင် ပီ စ်ု ဂုန့် အုဝ်၊ ဘေ ဆ ညှိုမ် အုဝ်၊ ဘေ ဟဲ့ လုဝ် ညှိုမ် နာ မွှိုမ် အာမ် ကာဆဝ် ပဲ့ ဟဲ့ ဘူင် အုဝ်။ ပန် တီ န့ ဒီ ဘော လိုဝ်း ဒီ နဝ်း ဘေ၊ ဘေ ဒီ ဘော နပ်၊ ဘော ဇဝ်ဖြာ ဘော အုဝ် ကွယ် ကာဒူပ်၊ အာဝ် ပွိုန် ကာယဝ်း။” 39 ပန် တီ ဂေ တဝ်း ဒီ မှေတ့် အန် ပေါ အူ ဇေန့်။ အန် ယီ လေး ဟာဝ်။

40 ဇဝ် ယေဆူ ဝီ ကာလုဝ်း ဘ့လဲင် ယောဒါန်၊ ဟာဝ် ဇမ် ဒူင် ဒွိုမ် ကွယ် ဒါ ဆာရာ အာယောဟာန် တွိုန် ဒေါ စိုပ် အန် ဒူအီ ခဲင် အိုမ်။ အန် ဘော ကွယ် ဒီ တီ၊ 41 န့ ဝီ မိုဝ်း ဒူအီ ကိူန် တး ဒူင် ကွယ် အန်။ ဂေ ဝီ တဝ်း၊ “ဒါ ဆာရာ အာယောဟာန် တူ ဒွိုမ် ဘူင် နာ မွှိုမ် အာမ် ကာဆဝ်။ ခဲ့ ပီ ကာလာင် အန် လွင် ဒူအီ နီ၊ ဒွန် မျုဝ် ဟဲ့ မှာန် ဟဲ့ မုး။” 42 ဒူင် ကွယ် အန် တီ၊ န့ မိုဝ်း ဒူအီ ကိူန် အီ ညှိုမ် ဇဝ် ယေဆူ။