1 ဒေါ ဟာဝ် ဇဝ် ယေဆူ ဒူပ် န့တေန့်၊ အန် ယိုဝ် ဒူအီ အူ ဝီ၊ ငါယ် အန် အပ် ဆိန့် ဒေါ ဂွိုတ် အန်။ 2 ဂေ ဒီဘဲ အန် ဝီ ဒီမွှတ် အန် တဝ်း၊ “မဲ ဆာရာ၊ ငါယ် အန် အပ် ကူပ် မာဆေ။း န့ အပ် ကူပ် မှာပ် အန်။း န့ အပ် ကူပ် မှာပ် ဂုန့် မာ အန်။း”

3 ဇဝ် ယေဆူ ဝီ တဝ်း၊ “အာဝ် မုး ငါယ် အန် အပ် ကူပ် မှာပ် ပီ ဘူင် အန် ဘော မှာပ် ဂုန့် မာ အန်။ ငါယ် ဒူအီ တီ ဟဲ့ အပ် တဲး ဒူအီ ပွိုန် ဒီ ယိုဝ် ခဲ့ ပီ ဒီ ဘူင် ဇဝ်ဖြာ ဒီ အန်။ 4 ဒေါ မိုဝ်း ဘ့လာင် ဆီငဲ၊ အေ လုဝ် ဘူင် ဂါန် ဇဝ်ဖြာ၊ အီ ဟဲ့ တိုယ် အုဝ် တး ဒီ နီ။ အာဝ် လှေန့် န့ ဒီ ဘော ပီ ပြဲ အပ်။ ဒေါ အန် တီ အာဝ် မိုဝ်း အာဆေ ပွိုန် ဒီ ဘူင် ဂါန်။ 5 ဒေါ ကွယ် အုဝ် ဒဲင် ကာဒါယ်၊ အုဝ် ပီ ဘ့လာင် အီ တဲး န့ ဘ့လာင် ဒဲင် ကာဒါယ်။”

6 ဇဝ် ယေဆူ ဟဲ့ ဟွတ့် ကာလာင် ဂြုဝ်း တီ၊ အန် ဝီ ပတ့် ဒဲင် ကာဒါယ်၊ ဝီ ဘူင် တဲး န့ ဘဲန် ညုဝ့်။ ဟဲ့ ဟွတ့်၊ အန် ဝီ ဒိုဝ်း ညုဝ့် တီ၊ ဖဝ်း ဒီ ငါယ် ဒူအီ တွိုန်။ 7 ဇဝ် ယေဆူ ဝီ တဝ်း ဒီ အန်၊ “တဲး မဲ ဟာဝ် ဒီ အိုမ် ဒိုင် အီ စိူဝ် အိုမ် ဆီလုဝ်အာမ်၊ တဲး မဲ ဘာယ် ငါယ် မဲ ခဲင် အိုမ် တီ။” (လွင် ဒါင် ဂြုဝ်း “ဆီလုဝ်အာမ်” တီ၊ န့ လေး “တိုယ်”)။ ပန် တီ ဒူအီ ငါယ် အပ် တွိုန် ဝီ ဟာဝ် ဘာယ် ငါယ် အန်။ ဒေါ ဝီ တး အန်၊ ငါယ် အန် ဟဲ့ ဝီ ပွိုန် ယိုဝ်။

8 ဂေ ဒူအီ အီ ကွယ် ကာတတ် ကာင် အန် ဘော ဂေ ဒူအီ အီ ဒွိုမ် ယိုဝ် ဒေါ ငါယ် အပ် အန်၊ ဂေ ဝီ လာယ် ဒီမွှတ် တဝ်း၊ “အာဝ် မုး၊ ဒူအီ ဝီ တီ မုး ဒူအီ အီ ကွယ် မှာန့် ရွိုန် ဒီ အီ တွိုန်။း” 9 မင် အီ တဝ်း၊ “ဟဲ့ မုး။ အန် မုး ဝီ တီ။” မင် အီ ယီ တဝ်း၊ “အာဝ် မုး အန်။ ဝီ တီ၊ အန် နှဲန် ဒူအီ ငါယ် အပ် တွိုန်။” အန် ယီ ဝီ တဝ်း၊ “ဟဲ့ မုး အုဝ်။”

10 ဂေ ဝီ တဝ်း၊ “ဆေ န့ မှာန် ဟဲ့ မုး မဲ၊ မှဝ် မဲ ပါယ် ဒီ ပွိုန် ဒီ ယိုဝ်။း”

11 အန် ဝီ တဝ်း၊ “ဒူအီ အီ စိူဝ် အာယေဆူ၊ အန် ဟဲ့ ဘူင် ညုဝ့် အီ စဲက်၊ ဝီ ဖဝ်း ဒီ ငါယ် အုဝ်။ အန် ဝီ စ်ု အုဝ် ဟာဝ် ဘာယ် ငါယ် အုဝ် ဒီ အိုမ် ဆီလုဝ်အာမ် တွိုန်၊ အုဝ် မိူဝ် ဟာဝ်။ ဟဲ့ ဟွတ့်၊ အုဝ် ဝီ ပွိုန် ဒီ ယိုဝ်။”

12 ဂေ ဝီ ဒီမွှတ် အန် တဝ်း၊ “ဒူအီ ဝီ တီ၊ နာ မှဝ် အန် ကွယ်။း” အန် ဝီ တဝ်း၊ “အုဝ် တူ နပ်။”

13 ပန် တီ ဂေ တိုယ် ဒူအီ အီ ဒွိုမ် ငါယ် အပ် တွိုန်၊ တဲး အန် ဟာဝ် ဒူင် ကွယ် ဂေ ဒူအီ ခဲင် ဖိုင် ဖာရီဆဲ။ 14 ဆီငဲ ဘူင် ဇဝ် ယေဆူ ညုဝ့် တဲး ငါယ် ဒူအီ တွိုန် ဝီ ယိုဝ်၊ န့ မုး ဆီငဲ ဒီလှဝ်။ 15 ခုဝ်၊ ဂေ ဒူအီ ခဲင် ဖိုင် ဖာရီဆဲ ဝီ ဒီမွှတ် အန်၊ မှဝ် န့ ပါယ် ပီ ပွိုန် ယိုဝ် အန်။ အန် တဝ်း၊ “ဒူအီ တွိုန်၊ အန် ဟဲ့ ဖဝ်း ညုဝ့် ဒီ ငါယ် အုဝ်။ ဟဲ့ ဟွတ့်၊ အုဝ် ဝီ ဟာဝ် ဘာယ်၊ အုဝ် ဝီ ပွိုန် ယိုဝ်။”

16 ဂေ ဒူအီ ခဲင် ဖိုင် ဖာရီဆဲ မင် အီ၊ ဂေ တဝ်း၊ “ဇဝ်ဖြာ တူ တိုယ် ဒူအီ တီ တး ဒီ နီ။ ခုဝ်၊ အန် တူ ကမ် ဆီငဲ ဒီလှဝ်။”

ဂေ အီ ဟဝ် မင် အီ ယီ ဒီမွှတ်၊ “ဆေ အန် မုး ဒူအီ အီ မိုဝ်း မှာပ်၊ မှဝ် အန် ပါယ် ဒီ ဘူင် နာ မွှိုမ် အာမ် ကာဆဝ် ဇိုဝ် တီ။း” ပါယ် တီ ဂေ တူ လာယ် ဖြူမ်။

17 ဟဲ့ ဟွတ့်၊ ဂေ ဝီ တဝ်း ဒီ ဒူအီ တွိုန်၊ “မာဆေ ပီ ဒီ တဝ်း မဲ လွင် ဒူအီ တီ၊ အီ ဟဲ့ တဲး ငါယ် မဲ ယိုဝ်။း”

ဒူအီ တွိုန် ဝီ တဝ်း၊ “အန် မုး ဒူအီ အီ ဘျာန် ဂြုဝ်း ဇဝ်ဖြာ။”

18 ဂေ ဒါ တာင် ယူဒါ ညှမ် ညှိုမ်၊ ဒူအီ တီ ဟဲ့ ဒွိုမ် မုး ဒူအီ ငါယ် အပ် အီ ဟဲ့ ဝီ ကဲန်။ ဂေ ဝီ ဒဲ့ ဂုန့် မာ အန် တး ဒူင် ကွယ် ဂေ။ 19 ဂေ ဝီ ဒီမွှတ် ဂါယ် တဝ်း၊ “ဒူအီ တီ မုး ဂွန် ဘာယ်။း ဟဲ့ မှာန်၊ ပီ တဝ်း ဘာယ်၊ ငါယ် အန် ဟဲ့ ဒွိုမ် အပ် ဆိန့် ဂွိုတ် အန်။း မှဝ် အန် ပါယ် ဒီ ပွိုန် ယိုဝ် ဒေါ တီ နီ။း”

20 ဂုန့် မာ အန် ဝီ တဝ်း၊ “ယာယ် နပ်၊ အန် မုး ဂွန် ယာယ်။ ယာယ် ဘော နပ်၊ ငါယ် အန် ဟဲ့ ဒွိုမ် အပ် ဆိန့် ဂွိုတ် အန်။ 21 န့ ပါယ် မှဝ် ပီ ပွိုန် ယိုဝ် အန် ဒေါ တီ နီ ဘော၊ လွင် အာဆေ ဟဲ့ တဲး အန် ယိုဝ်၊ ယာယ် တူ နပ်။ တဲး ဘေ ဒီမွှတ် အန်။ အန် ဟဲ့ တာင်။ အန် ဟဲ့ နပ် ဒီ ကာလာင် ရာင် အန်။” 22 ဂုန့် မာ အန် ဝီ တဝ်း ဇိုဝ် တီ ကူပ် ယုဝ် ဂါယ် ဂေ ဒါ တာင် ယူဒါ။ ဂေ ဒါ တာင် ဟဲ့ ဟွတ့် ဆုင်ဖျာတ် တဝ်း၊ “အာဆေ ကာလာင် လွင် အာယေဆူ တွိုန်၊ အန် မုး ဒူအီ ပီ ရဝ်း ပီ တိုယ် ဇဝ်ဖြာ တဲး အန် ချွတ် ဒူအီ၊ ဒူအီ တီ အာဝ် ဟူ ပွိုန် လိုပ် ခဲင် ဇူင် ကြိုပ် ဂေ ဒူအီ အာယူဒါ ဇဝ်ဖြာ။” 23 ခုဝ် အန် တီ ဂုန့် မာ ဒူအီ တွိုန် ဟဲ့ တဝ်း၊ “အန် ဟဲ့ တာင်။ တဲး ဘေ ဒီမွှတ် အန်။”

24 ဂေ ဝီ ဒဲ့ ဒူအီ အီ ဒွိုမ် မိုဝ်း ငါယ် အပ်၊ တဲး အန် တး ဒူင် ကွယ် ဂေ ပေါ အူ ဇေန့်။ ဂေ တဝ်း ဒီ အန်၊ “တဲး မဲ အိူပ် မျုက် ဇဝ်ဖြာ။ ယေ ဟဲ့ နပ်၊ ဒူအီ တွိုန် မုး ဒူအီ တူ မွှိုမ်။”

25 အန် ဝီ တဝ်း၊ “ယုဝ် အန် မွှိုမ် တူ မွှိုမ်၊ အုဝ် တူ နပ်။ အူ မျုဝ် အုဝ် ယီ နပ်။ ခါ အာတ့် ငါယ် အုဝ် ဟဲ့ အပ်။ ဒေါ တီ နီ အုဝ် ဟဲ့ ပွိုန် ဒီ ယိုဝ်။”

26 ပန် တီ ဂေ ဝီ ဒီမွှတ် တဝ်း၊ “မာဆေ ပီ ဘူင် အန် ဒီ မဲ။း မှဝ် အန် ပါယ် ဒီ ပီကဲန် မဲ။း”

27 အန် ဝီ တဝ်း၊ “အုဝ် ဟဲ့ ဟွတ့် ခဲ ဒီ ဘေ လွင် အန် တီ။ ဘေ ယီ တူ ထူမ်။ မှဝ် န့ ပါယ် ပီ ဆီ ထူမ် ဘေ ပေါ အူ ဇေန့်။း ဘေ မိူဝ် ဆီ ဘဲန် ဒီဘဲ အန်။း”

28 ပန် တီ ဂေ ကာလာင် ဂြုဝ်း စီစိဝ် ဒီ အန်။ ဂေ ဝီ တဝ်း၊ “မဲ မုး ဒီဘဲ ဒူအီ တီ။ ယေ ယီ မုး ဒီဘဲ ဒါ ဆာရာ အာမုဝ်ဆဲ။ 29 ယေ နပ်၊ ဇဝ်ဖြာ ဟဲ့ ဒွိုမ် ကာလာင် ဂြုဝ်း ဒီ ဒါ အာမုဝ်ဆဲ တွိုန်။ ဆေ န့ ယီ မုး ဒူအီ တီ၊ ယေ တူ နပ် နာ မှဝ် အန် တး။”

30 ဒူအီ တွိုန် ဝီ တဝ်း၊ “အာတီ ဟဲ့ မွှိုမ် အာမ် ကာဆဝ်။ ဘေ တူ နပ် နာ မှဝ် အန် တး။ အန် ယဲ့ ဟဲ့ ဘူင် တဲး ငါယ် အုဝ် ယိုဝ်။ 31 အေ နပ်၊ ဇဝ်ဖြာ တူ ထူမ် ပီ ဆာခိုဝ် ဂေ ဒူအီ အီ ဘူင် မှာပ်။ အန် ထူမ် ပီ ဆာခိုဝ် ဂေ ဒူအီ ဘွတ် အီ ဘူင် ပီ အိုင် အန်။ 32 အေ တူ ဒွိုမ် ယိုဝ် လွင် အာဆေ အီ နပ် ဒီ ဘူင် တဲး ငါယ် ဒူအီ ဝီ ယိုဝ်၊ ဆေ ငါယ် အန် ဟဲ့ အပ် ဆိန့် ဒေါ ဂွိုတ် အန်။ 33 ဆေ ဇဝ်ဖြာ တူ တိုယ် ဒူအီ တီ၊ အန် တူ ပွိုန် ဘူင် မာဆေ။”

34 ပန် တီ ဂေ ဒါ တာင် ယူဒါ ဝီ တဝ်း၊ “မဲ မိုဝ်း မှာပ် ကိူန် ကာဆဝ် ဆိန့် ဒေါ ဂွိုတ် မဲ။ ဒေါ တီ နီ မဲ ဟဲ့ ယ ဝီ မာနုဝ် ယေ။” ဟဲ့ ဟွတ့်၊ ဂေ ဝီ ဆုတ့် အန် လေး။

35 ဇဝ် ယေဆူ ဟဲ့ ယိုဝ် လွင် ဂေ ဒါ တာင် ဟဲ့ ဆုတ့် ဒူအီ တွိုန် လေး ဒူင် ကွယ် ဂေ၊ ဇဝ် ယေဆူ ဝီ ဟြေတ့် အန်။ ဇဝ် ယေဆူ ဟဲ့ ဝီ ကာတုန့် အန်၊ ဝီ ဒီမွှတ် အန် တဝ်း၊ “မဲ ညှိုမ် ဒူအီ အီ ဟဲ့ ဘဲန် ဂွန် ဒူအီ။း”

36 ဒူအီ တွိုန် ဝီ တဝ်း၊ “အာဆေ အန် မုး။း တဲး မဲ ကာလာင် ဒီ အုဝ် လွင် ဒူအီ တီ၊ တဲး အုဝ် ပွိုန် ဒီ ညှိုမ် အန်။”

37 ဇဝ် ယေဆူ ဝီ တဝ်း၊ “မဲ ဟဲ့ ဒွိုမ် ယိုဝ် အန်။ ဒေါ တီ နီ အန် ကာလာင် ဂြုဝ်း ဒီ မဲ။”

38 ပန် တီ အန် ဝီ တဝ်း၊ “မဲ ဇဝ်၊ အုဝ် ဟဲ့ ညှိုမ်။” ဟဲ့ ဟွတ့်၊ အန် ဘော ကြိုပ် ဇဝ် ယေဆူ။

39 ဇဝ် ယေဆူ ဝီ တဝ်း၊ “အုဝ် ဟဲ့ တး ဇမ် ဒဲင် ကာဒါယ် နီ၊ တဲး အုဝ် ဒမ် မှာပ် ဒီ အီ။ အုဝ် ဒီ တဲး ဒူအီ ငါယ် အပ် ဝီ ယိုဝ်၊ အုဝ် ဒီ ဘော တဲး ဒူအီ ငါယ် ဘ့လာင် ဝီ ပီ ဒူအီ ငါယ် အပ်၊ ကွဲ့ တဲး ဂေ ပွိုန် ဒီ ယိုဝ် ဘ့လာင်၊ ပီ ဟပ် ဇဝ်ဖြာ ခဲင် နဝ်း ဒူအီ။”

40 န့ ယီ မိုဝ်း ဒူအီ ခဲင် ဖိုင် ဖာရီဆဲ မင် အီ၊ ဂေ ကွယ် ရိုမ် ဒူပ် ဇဝ် ယေဆူ ဒေါ ကာလာင် အန် ဂြုဝ်း တီ။ ဂေ ဟဲ့ ယိုဝ် ဂြုဝ်း တီ၊ ဂေ ဝီ တဝ်း၊ “ဆေ မဲ တဝ်း ပါယ် တီ၊ န့ ပီ ဘော ယေ ဟဲ့ ငါယ် အပ်။”

41 ဇဝ် ယေဆူ ဝီ တဝ်း ဒီ ဂေ၊ “ဆေ ငါယ် ဘေ ဟဲ့ အပ် အာခါခ်ု၊ ပီ ဘူင် ဘေ တူ ဘဲန် မှာပ် ဒီ ဘေ။ ဒေါ တီ နီ၊ ဘေ ယီ တဝ်း၊ ဘေ ပွိုန် ယိုဝ်။ ခုဝ်၊ မှာပ် ဘေ ကွယ် ဒူပ် ဘေ။”