1 ဝါယ် အန် တီ ဇဝ် ယေဆူ ဟုဝ့် ဒဲင် နွန် ဟေ နာမန်။ 2 ပါ ခဲညှာ၊ ဆိန့်ဝး စေဝ်၊ အန် ဝီ ဟာဝ် လိုပ် ခဲင် ဝဲင် ဟုဝ် ဇဝ်ဖြာ။ ဂေ ဒူအီ ကိူန် ဝီ တး ဒူင် ကွယ် အန်။ အန် ဝီ တုတ့် တဝ်း ဒီ မာနုဝ် ဂေ။ 3 ဂေ ဒါ ဆာရာ အီ မာနုဝ် ဒါရာ ယူဒါ ဘော ဂေ ဒူအီ ဖိုင် ဖာရီဆဲ၊ ဂေ ဝီ ဒိုဝ်း တး အီဘိုန့် အူ ဝီ ဒူင် ကွယ် ဇဝ် ယေဆူ။ ဂေ ဟဲ့ ယိုဝ် အီဘိုန့် တီ လာယ် အီမာယ် အီ ဟဝ်။ ဂေ ဝီ စ်ု အန် ကွယ် ဒီ အာတ့် ဒူအီ ကိူန်။ 4 ဂေ ဝီ တဝ်း ဒီ ဇဝ် ယေဆူ၊ “မဲ ဒါ ဆာရာ၊ ဂေ အီ ဟဝ် ဟဲ့ ယိုဝ် အီဘိုန့် တီ လာယ် အီမာယ် အီ ဟဝ်။ 5 ဆေ န့ မုး ဒါရာ အာမုဝ်ဆဲ၊ န့ စ်ု ယေ ဒိုဝ်း မာဝ်၊ ဝိုန့် အန်၊ တဲး အန် ကော ယမ်။ ဆေ န့ ယီ မုး မဲ၊ မာဆေ ပီ ဒီ တဝ်း မဲ။း” 6 ဂေ ယီ ဒီမွှတ် ဇဝ် ယေဆူ လွင် အန် တီ၊ ကူပ် ဆီ ထေဝ် ဂေ နဝ်း အန်၊ တဲး ဂေ ပွိုန် ဒီ ဝီ ဖျာက် အန်။

ဇဝ် ယေဆူ ဝီ မုတ်၊ ဝီ ဒဲမ် ဒီ ကာဒါယ်၊ တာ ကာနူ အန်။ 7 ဂေ ဝီ ဒီမွှတ် အန် ဘဲန် ဇေန့် ဘဲန် ဇေန့်။ ဟဲ့ ဟွတ့်၊ အန် ဝီ ငိုဝ်း ယွတ် ဂေ၊ ဝီ တဝ်း၊ “ဆေ န့ မိုဝ်း ဒူအီ အူ ဝီ ကာတဲ ဘေ၊ အီ တူ ဒွိုမ် ဘူင် မှာပ် ဒေါ မှဝ်၊ တဲး အန် ဘဲ ယဲတ့်၊ ဒိုဝ်း မာဝ် ဝိုန့် ဒီ အာတ့်။” 8 အန် ဟဲ့ ဟွတ့် ကာလာင် ဂြုဝ်း တီ၊ အန် ဝီ မုတ် ဝီ ဒဲမ် ဒီ ကာဒါယ်။

9 ပန် တီ ဂေ ဒူအီ အီ ထူမ် ဂြုဝ်း တီ၊ ဂေ ဘဲန် ဝီ ဘဲန် ဝီ လှုဝ်း မှာပ် ဂေ၊ ဝီ ဝေန့်။ ဂေ ဒူအီ ကတ် ဟာဝ် ဒီ အာတ့်။ ဟဲ့ ဟွတ့် ဂေ အီ ဟဝ် ဘော ဒူပ်။ ဟဲ့ ဝီ ဂိတ် မီ ဇဝ် ယေဆူ ဂါယ် အီဘိုန့် တွိုန်။ 10 ဇဝ် ယေဆူ ဝီ ငိုဝ်း၊ ဝီ ဒီမွှတ် အီဘိုန့် တဝ်း၊ “မှဝ် ဂေ။း န့ နှဲန် တူ မိုဝ်း အာဆေ အီ ဒမ် မှာပ် ဒီ မဲ။”

11 အီဘိုန့် ဝီ တဝ်း၊ “အာဝ် မိုဝ်း အာဆေ။” ဇဝ် ယေဆူ ဝီ တဝ်း၊ “ဆေ န့ ပါယ် တီ၊ ဘော အုဝ် တူ ဒမ် မှာပ် ဒီ မဲ။ ဒေါ တီ နီ၊ တဲး မဲ ဝေန့်၊ ကွဲ့ ဝီ ဘူင် မှာပ် ပေါ မ့ပွါ။”

12 ဝါယ် အန် တီ ဒေါ ဝီ ကာလာင် ဇဝ် ယေဆူ ဒီ ဒူအီ ကိူန်၊ အန် တဝ်း၊ “အုဝ် ပီ ဘ့လာင် အီ တဲး န့ ဘ့လာင် ဒဲင် ကာဒါယ်။ အာဆေ ဒူပ် အုဝ်၊ အန် အာဝ် ဟူ လုဝ် ကွယ် ခဲင် အပ် ဝွင့် ဒေါ မှဝ်။ အန် ဒီ မိုဝ်း ဘ့လာင် အီ ဒွါ အာဆာက် ကာမာယ် ဒီ အီ။”

13 ပန် တီ ဂေ ဒူအီ ခဲင် ဖိုင် ဖာရီဆဲ၊ ဂေ ဝီ တဝ်း၊ “ဒေါ တီ နီ မဲ ကာလာင် ဂြုဝ်း လွင် ဒုဝ် မဲ။ န့ ပီ မဲ ကာလာင် ဆက်ဆေ လွင် အာမူ မဲ။ အာဝ် မိုဝ်း ဒီခုဝ်။”

14 ဇဝ် ယေဆူ ဝီ တဝ်း၊ “ဆေ န့ ဘော မုး ပါယ် တီ၊ ဆေ အုဝ် ဝီ ကာလာင် ဆက်ဆေ လွင် အာမူ အုဝ်၊ န့ ဟဲ့ မိုဝ်း ဒီခုဝ်။ ခုဝ်၊ အုဝ် ဟဲ့ နပ်၊ ဒီ မှဝ် အုဝ် ဟဲ့ တး။ အုဝ် မိူဝ် နပ် ဆီချာ ဒူင် ဒီ ဝဝ့် အုဝ်။ ယီ မုး ဘေ၊ ဘေ တူ နပ် မာဆေ လွင် အုဝ်၊ ဒီ မှဝ် အုဝ် တး၊ နာ မှဝ် အုဝ် ဒီ ဝဝ့်။ 15 ပီ ဆုင်ဖျာတ် ဘေ၊ န့ ဒူပ် အာငျာန် ဒူအီ။ အုဝ် ယီ တူ ဆုင်ဖျာတ် အာမူ အာဆေ ရာင် အုဝ်။ 16 ဆေ အုဝ် ယီ ဆုင်ဖျာတ် အာမူ အီ၊ ပီ ဆုင်ဖျာတ် အုဝ် ဟဲ့ မှာန်။ ခုဝ်၊ န့ တူ မုး ပီ ဆုင်ဖျာတ် အုဝ် အူ ဝီ။ န့ မုး ဘော အုဝ် ဘော ဂုန့် အုဝ်၊ အီ တိုယ် အုဝ် တး ဒီ နီ။ ယာယ် လာယ် ဖြူမ် ပီ ဆုင်ဖျာတ် ယာယ်။ 17 န့ ပီ ပီ ဒဲမ် အုန် ခဲင် ဘပ် ဒါရာ ဘေ။ န့ တဝ်း၊ ဆေ အာ ဝီ ကာလာင် အူ မျုဝ်၊ ပီ ကာလာင် ဂါယ် ဟဲ့ မှာန်။ 18 ပါယ် တီ၊ ဘော အုဝ် ကာလာင် လွင် အုဝ်။ ပေါ အူ ဝီ အီ ကာလာင် လွင် အုဝ်၊ န့ မုး ဂုန့် အုဝ်၊ အီ ဟဲ့ တိုယ် အုဝ် တး ဒီ နီ။”

19 ဂေ ဝီ ဒီမွှတ် အန် တဝ်း၊ “ဂုန့် မဲ ကွယ် ဒီ မှဝ်။း”

ဇဝ် ယေဆူ ဝီ တဝ်း၊ “ဘော အုဝ် ဘော ဂုန့် အုဝ် ဘေ တူ နပ်။ ဆေ ဘေ နပ် အုဝ်၊ ဘေ ဒီ ဘော နပ် ဘော ဂုန့် အုဝ်။”

20 ဒေါ ကာလာင် ဇဝ် ယေဆူ ဂြုဝ်း တီ၊ အန် ကွယ် ခဲင် ဝဲင် ဟုဝ် ဇဝ်ဖြာ အီ ကာတတ် ဒူင် ဘ့လေး ဂေ ပီ ဒီ လှူ။ န့ ယီ တူ မိုဝ်း အာဆေ မှေတ့် အန်၊ ကူပ် ညှမ် တဲး ဇဝ်ဖြာ ဂေ ဘူင် ပါယ် တီ။

21 ပေါ အူ ဇေန့် ဇဝ် ယေဆူ ဝီ တဝ်း ဒီ ဂေ၊ “အုဝ် ဒီ လေး ဒူင် ကွယ် ဘေ နီ။ ဘေ ဒီ ဘော ဝီ ဟြေတ့် အုဝ်။ ဘေ ဒီ ဘော ယမ် ကူပ် မိုဝ်း ဘေ မှာပ်။ ဒူင် ဒီ ဟာဝ် အုဝ်၊ ဘေ ယီ တူ ပွိုန် ဒူပ်။”

22 ကူပ် ကာလာင် အန် ဂြုဝ်း တီ၊ ဂေ ဒါ တာင် ယူဒါ ဝီ လာယ် ကာလာင် တဝ်း၊ “န့ နှဲန်၊ အန် တဝ်း ဒီ ငဝ်း ဒုဝ် ဘြိမ် အန်။ ခုဝ် အန် တီ အန် တဝ်း၊ ‘ဒူင် ဒီ ဟာဝ် အုဝ် ဘေ တူ ပွိုန် ဒူပ်။’”

23 ဇဝ် ယေဆူ ဝီ တဝ်း၊ “ဘေ ဟဲ့ လေး တး နာ ခြိုမ် နီ။ အုဝ် ယဲ့ ဟဲ့ လေး တး နာ ဒဲင် လူင်။ ဘေ ဟဲ့ ကွယ် ဒဲင် ကာဒါယ် နီ ဆေဆေ။ အုဝ် ယီ တူ ဒွိုမ် ကွယ် ဒဲင် ကာဒါယ် နီ။ 24 အုဝ် ဟဲ့ ဟွတ့် ကာလာင်၊ အာဆေ အုဝ် မုး။ အုဝ် မိူဝ် ဟဲ့ ဟွတ့် တဝ်း၊ ဆေ ဘေ တူ ညှိုမ်၊ အုဝ် မုး ဒူအီ ပီ တဝ်း အုဝ်၊ ဘေ ဒီ ဘော ယမ် ကူပ် မှာပ် ဘေ။”

25 ဂေ ဝီ ဒီမွှတ် တဝ်း၊ “အာဆေ မဲ မုး။း” ဇဝ် ယေဆူ ဝီ တဝ်း၊ “အုဝ် ဟဲ့ ဟွတ့် ကာလာင် ဒီ ဘေ ဘဲန် ဇေန့် ဘဲန် ဇေန့်၊ အာဆေ အုဝ် မုး။ 26 အုဝ် ဟဲ့ မိုဝ်း ကိူန် ပီ ဒမ် မှာပ် ဘေ။ အန် ဇဝ် အီ တိုယ် အုဝ် တး ဒီ နီ၊ ပီ ကာလာင် အန် ဟဲ့ မှာန်။ ခဲ့ ပီ ယိုဝ် အုဝ် ဂြုဝ်း အန်၊ အုဝ် ဒီ ဝီ ကာလာင် တဲး ဂေ ဒူအီ အီ ကွယ် ဒဲင် ကာဒါယ် ပွိုန် ဒီ ထူမ်။”

27 ဂေ အီ ထူမ် ဂြုဝ်း တီ၊ ဂေ တူ နပ်၊ ဇဝ် ယေဆူ ကာလာင် ဂြုဝ်း တီ လွင် ဇဝ်ဖြာ အီ မုး ဂုန့် အန်။ 28 ဇဝ် ယေဆူ ဝီ တဝ်း၊ “န့ မုး အုဝ်၊ အီ ဟဲ့ ဘဲန် ဂွန် ဒူအီ။ ဘေ ဟီ ဒိုက် အုဝ် ဒီ ရွင့်၊ ဘေ ဒီ ဘော နပ်၊ အုဝ် မုး ဝီ ပီ တဝ်း အုဝ်။ ဒေါ အန် တီ ဘေ ဒီ ဘော နပ်၊ အုဝ် တူ ကာလာင် မာဆေ အီ လေး အာငျာန် အုဝ်။ အုဝ် ကာလာင် မီ ခဲ့ ပီ မာနုဝ် ဂုန့် အုဝ် ဒီ အုဝ်။ 29 အန် ဇဝ် အီ ဟဲ့ တိုယ် အုဝ် တး ဒီ နီ၊ အန် မိူဝ် ဟဲ့ ကွယ် ရိုမ် ဒူပ် အုဝ်။ အန် တူ ဝဲန် တဲး အုဝ် ကွယ် အုဝ် အူ ဝီ ကူပ် ဘူင် အုဝ် အီ လဝ့် နဝ်း အန် ဆေဆေ။” 30 ဒေါ ကာလာင် အန် ဂြုဝ်း တီ၊ န့ မိုဝ်း ဒူအီ ကိူန်၊ အီ ညှိုမ် အန်။

31 ဇဝ် ယေဆူ ယီ ကာလာင် ဒီ ဂေ ဒူအီ အာယူဒါ အီ ဟဲ့ ညှိုမ် အန် တဝ်း၊ “ဆေ ဘေ ဒူပ် ပီ မာနုဝ် အုဝ်၊ ဘေ မုး ဒီဘဲ အုဝ် အာခ်ု မှာန်။ 32 ပါယ် တီ ဘေ ဒီ နပ် ဆီချာ နာ မှာန်။ နာ မှာန် တီ ဝီ တဲး ဘေ ကွယ် ထင်ဟာင်။”

33 ဂေ တဝ်း ဒီ အန်၊ “ယေ မုး လှုက်လှာန် ဒါ အာဘြာဟမ် တွိုန်။ ယေ တူ ဒွိုမ် ဘဲန် မှာယ် အီ။ မှဝ် န့ ပါယ် ပီ တဝ်း မဲ၊ ယေ တူ ကွယ် ထင်ဟာင်။း”

34 ဇဝ် ယေဆူ ဝီ တဝ်း၊ “အုဝ် တဝ်း အာခ်ု ဒီ ဘေ။ အာဆေ ဘူင် မှာပ်၊ အန် ဝီ ဘဲန် မှာယ် မှာပ်၊ တဲး မှာပ် အိုပ် အန်။ 35 ဆေ န့ မုး မှာယ်၊ အန် တူ ပွိုန် ကွယ် ခဲင် န့ဟူမ် ဒါ ကာညာ အန် ဆေဆေ။ ဆေ န့ ယီ မုး ဂွန် ဒါ ကာညာ တွိုန်၊ အန် ပွိုန် ဒီ ကွယ် ခဲင် န့ဟူမ် ဒါ ကာညာ အန် ဆေဆေ။ 36 ခုဝ်၊ အုဝ် တဝ်း၊ ဆေ ဂွန် ဇဝ်ဖြာ တဲး ဘေ လွတ်၊ ဒါ ကာညာ တွိုန် အာဝ် ဟူ ပွိုန် ဒီ ဝီ အိုပ် ဘေ။ 37 အုဝ် နပ်၊ ဘေ မုး လှုက်လှာန် ဒါ အာဘြာဟမ် တွိုန်။ ဘေ ယီ တဝ်း ဒီ ငဝ်း ဝဲန် အုဝ် ကူပ် တူ တဲး ဘေ ဂြုဝ်း အုဝ် လိုပ် ခဲင် နဝ်း ဘေ။ 38 အုဝ် ကာလာင် ဒီ ဘေ လွင် ပဲ့ ဟဲ့ ယိုဝ် အုဝ် ဒေါ ကွယ် ရိုမ် အုဝ် ဒူပ် ဂုန့် အုဝ်။ ဘေ မိူဝ် ထူမ် ဘူင် ဒူပ် ဂြုဝ်း ဂုန့် ဘေ။”

39 ဂေ ဝီ တဝ်း၊ “ဒါ အာဘြာဟမ် တွိုန် မုး ဂုန့် ဒင် ယေ။”

ဇဝ် ယေဆူ ဝီ တဝ်း၊ “ဆေ န့ မှာန်၊ မုး ဘေ လှုက်လှာန် ဒါ အာဘြာဟမ်၊ ဘေ ဒီ ဘော ဘူင် ခဲ့ ပီ ဒွိုမ် ဘူင် အန်။ 40 န့ ယီ လိုဝ်း ဆီချာ၊ ဘေ ဆီ ငဝ်း အာဆာက် အုဝ်။ အုဝ် ယီ မုး ဒူအီ အီ ဟဲ့ ကာလာင် ဒီ ဘေ လွင် နာ မှာန် ပဲ့ ဟဲ့ ကာလာင် ဇဝ်ဖြာ ဒီ အုဝ်။ ဒါ အာဘြာဟမ် တူ ဒွိုမ် ဘူင် ပီ ပီ ဆီ ဘူင် ဘေ။ 41 ဘေ ဘူင် ခဲ့ ပီ ဘူင် ဂုန့် ဘေ၊ အီ တူ မုး ဒါ အာဘြာဟမ်။”

ဂေ ဝီ တဝ်း၊ “ယေ တူ မုး ဂွန် ယာ မာလမ်။ ယေ မိုဝ်း ဂုန့် မီ အူ ကာဒင် အီ မုး ဇဝ်ဖြာ။”

42 ပန် တီ ဇဝ် ယေဆူ ဝီ တဝ်း၊ “ဆေ န့ မှာန်၊ ဇဝ်ဖြာ မုး ဂုန့် ဘေ၊ ဘေ ဒီ ဘော ရွက့် ဘော အုဝ်။ ခုဝ်၊ ဒေါ တီ နီ အုဝ် ဟဲ့ လေး ဒူင် ကွယ် အန်၊ ဝီ တး ဇမ် ဒီ နီ။ အုဝ် တူ တး ကူပ် ဘူင် အုဝ် ပီ အိုင် အုဝ်။ ဇဝ်ဖြာ ဟဲ့ တိုယ် အုဝ်။ 43 မှဝ် န့ ပါယ် ပီ တူ နပ် ဘေ ဂြုဝ်း အုဝ်။း န့ မုး ကူပ် တူ ဆီ ထူမ် ဘေ ဂြုဝ်း အုဝ်။ 44 ဂုန့် ဘေ မုး ဘုဝ် ကာနမ်၊ ဘေ မိူဝ် မိုဝ်း နဝ်း ဆီ ဘူင် ပီ အိုင် ဂုန့် ဘေ တီ။ အူ ဆိန့် ဒေါ ဂုဝ် အန်၊ ဘုဝ် ကာနမ် တီ ယဲ့ ဟဲ့ ငဝ်း အာဆာက် အီ။ အန် မိူဝ် တူ ဒွိုမ် ဘူင် နာ မှာန် ဒေါ မှဝ် ကူပ် တူ မိုဝ်း နာ မှာန် မာဆေ ခဲင် နဝ်း အန်။ ဆေ အန် ကာလာင် ဂြုဝ်း မျုဝ် မှဝ်၊ န့ လေး ခဲင် နဝ်း အန်။ ခုဝ်၊ အန် ဆီမာ ကာလုဝ်။ အန် ဘော မုး ဂုန့် ဂေ ဒူအီ အီ ဆီမာ ကာလုဝ် ဒွန် အီ။ 45 န့ ယီ မုး အုဝ်၊ ဘေ ယီ တူ ညှိုမ် ကူပ် ကာလာင် အုဝ် နာ မှာန် ဒီ ဘေ။ 46 အာဝ် မိုဝ်း အာဆေ အီ နပ် ဒီ ဘျ မှာပ် ပီ ဒွိုမ် ဘူင် အုဝ်။ န့ မုး အုဝ်၊ အုဝ် ကာလာင် နာ မှာန် ဒီ ဘေ။ မှဝ် န့ ပါယ် ပီ တူ ညှိုမ် ဘေ ဂြုဝ်း အုဝ်။း 47 အာဆေ မုး အာမျုဝ် ဇဝ်ဖြာ၊ အန် နပ် ဒီ ထူမ် ဂြုဝ်း ဇဝ်ဖြာ။ ဘေ ယီ တူ မုး အာမျုဝ် ဇဝ်ဖြာ။ ခုဝ်၊ ဘေ တူ နပ် ဒီ ထူမ် ဂြုဝ်း အန်။”

48 ဂေ ဒါ တာင် ယူဒါ ဝီ တဝ်း၊ “ဟဲ့ မှာန် ပီ ဒွိုမ် တဝ်း ယေ။ မဲ မုး ဒူအီ အာမျုဝ် ဆာမာရီ။ မဲ မိုဝ်း ဘော ကာနမ် ကွယ် ခဲင် ဒုဝ် ဘူင့် မဲ။”

49 ဇဝ် ယေဆူ ဝီ တဝ်း၊ “အုဝ် တူ မိုဝ်း ကာနမ် ခဲင် ဒုဝ် အုဝ်။ အုဝ် ရုဝ်ဆေ ဂုန့် အုဝ်။ ဘေ ယီ တူ ရုဝ်ဆေ အုဝ်။ 50 အုဝ် တူ လုဝ် အီ ရုဝ်ဆေ အုဝ်။ န့ ယီ မိုဝ်း အန် ဇဝ် အီ ဆီ တဲး အီ ဟဝ် ရုဝ်ဆေ အုဝ်။ အန် ဇဝ် တီ အီ ဒီ ဆုင်ဖျာတ် အာဂျာင် ဘေ။ 51 အုဝ် တဝ်း အာခ်ု ဒီ ဘေ။ အာဆေ ထူမ် ဒူပ် ဂြုဝ်း ပီ ကာလာင် အုဝ်၊ အန် တူ ယမ် ဒေါ မှဝ်။”

52 ဒေါ ကာလာင် အန် ဂြုဝ်း တီ၊ ဂေ ဒါ တာင် ယူဒါ ဝီ တဝ်း၊ “ဒေါ တီ နီ၊ ယေ နပ် ဆီချာ၊ ဟဲ့ မိုဝ်း ကာနမ် ကွယ် ခဲင် ဒုဝ် မဲ။ ဒါ အာဘြာဟမ် တွိုန် ဟဲ့ ယမ်။ ဘော ဂေ ဒူအီ အီ ဘျာန် ဂြုဝ်း ဇဝ်ဖြာ ဟဲ့ ယမ်။ မဲ ယီ တဝ်း၊ ဆေ ဒူအီ အူ ဝီ ဒီ ဒူပ် ဆီချာ ဂြုဝ်း ပီ ကာလာင် မဲ၊ အန် တူ ယမ် ဒေါ မှဝ်။ 53 မဲ ထာင်၊ မဲ ဟဲ့ တာင် လွှိုမ် ဒါ အာဘြာဟမ် အီ မုး ဂုန့် ဒင် ယေ။း ဒါ အာဘြာဟမ် ယီ ဟဲ့ ဟွတ့် ယမ်။ ဘော ဂေ ဒူအီ အီ ဘျာန် ဂြုဝ်း ဇဝ်ဖြာ ဟဲ့ ဟွတ့် ယမ်။ မဲ ထာင် အာဆေ မဲ မုး။း” 54 ဇဝ် ယေဆူ ဝီ တဝ်း၊ “ဆေ အုဝ် ပီဖုင် အုဝ်၊ အာဝ် မိုဝ်း ဒီခုဝ်။ န့ မုး ဂုန့် အုဝ်၊ ဘေ တဝ်း အန် မုး ဇဝ်ဖြာ ပီ ကြိုပ် ဘေ၊ အန် ဟဲ့ ဒွါ အာဖုင် ဒင်ခုဝ် ဒီ အုဝ်။ 55 ဘေ တူ နပ် အန်။ အုဝ် ယီ နပ် အန်။ ဆေ အုဝ် တဝ်း၊ ‘အုဝ် တူ နပ် ဇဝ်ဖြာ၊’ အုဝ် ဒီ ဘော ကာလုဝ် ပီ ဘေ။ အုဝ် ယီ နပ် ဆီချာ အန်။ အုဝ် ဘော ထူမ် ဒူပ် ဂြုဝ်း ပီ ကာလာင် အန် ဒီ အုဝ်။ 56 ဘော ဂုန့် ဒင် ဘေ အီ စိူဝ် ဒါ အာဘြာဟမ်၊ အန် ခူယ် ကာဆဝ် ဒေါ နပ် အန် ဒီ အာတ့် လွင် ဒီ တး အုဝ် ဒဲင် ကာဒါယ် နီ။ ဟဲ့ ဟွတ့်၊ ဒေါ ဝီ ယိုဝ် အန် လွင် ဟဲ့ တး အုဝ် ဒီ နီ၊ အန် ဝီ ဘဲန် နဝ်း ဒါခိုယ်။”

57 ဇဝ် ယေဆူ ဟဲ့ ဟွတ့် ကာလာင် ဂြုဝ်း တီ၊ ဂေ ဒါ တာင် ယူဒါ ဝီ တဝ်း ဒီ အန်၊ “မဲ ညှမ် နုဝ့် ဖန် ဂိုဝ် ဆီနမ်။ မဲ ယီ တဝ်း၊ မဲ ဟဲ့ ယိုဝ် ဒါ အာဘြာဟမ် တွိုန်။”

58 ဇဝ် ယေဆူ ဝီ တဝ်း၊ “အုဝ် တဝ်း အာခ်ု ဒီ ဘေ။ အုဝ် ဟဲ့ မိုဝ်း ဆိန့် အာတ့် ဂွိုတ် ဒါ အာဘြာဟမ်။”

59 ဒေါ ကာလာင် အန် ဂြုဝ်း တီ၊ ဂေ ဒိုဝ်း မာဝ်၊ တဝ်း ဒီ ဝိုန့် အန်၊ တဲး အန် ယမ်။ ဇဝ် ယေဆူ ယီ ချြီင် ဒုဝ် အန်၊ ဝီ လေး ခဲင် ဝဲင် ဟုဝ် ဇဝ်ဖြာ၊ ကွဲ့ တဲး အီ ယိုဝ် အန်။