ခါန် 7
လွင် ဇဝ် ယေဆူ လိုပ် ဘ့လွယ် လုဝ် ကွယ် ခဲင် ထိုပ်
1 ဝါယ် အန် တီ ဇဝ် ယေဆူ ဝီ ဟာဝ် ဘဲန် ပ့လုဝ့် ဘဲန် ပ့လုဝ့် ခဲင် အိူင် ဂါလီလေ။ အန် တူ ဆီ ဟာဝ် ခဲင် အိူင် ယူဒါ ကူပ် ဟြေတ့် ဂေ ဒါ တာင် ယူဒါ ဒီ အန်၊ တဲး ဂေ ပွိုန် ဒီ ငဝ်း အာဆာက် အန်။ 2 ဒေါ ကာတတ် ဒီ ဘူင် ဂေ ဒူအီ အာယူဒါ ဘ့လွယ် လုဝ် ကွယ် ခဲင် ထိုပ်၊ 3 န့ မုး ဂေ ဝါ ဇဝ် ယေဆူ ဂေ တဝ်း ဒီ အန်၊ “မဲ လုဝ် လေး ဒီ နီ၊ ဟာဝ် အိူင် ယူဒါ၊ တဲး ဂေ ဒီဘဲ မဲ ဝီ ပွိုန် ဒီ ယိုဝ် အီ မွှိုမ် အာမ် ကာဆဝ် ပီ ဘူင် မဲ။ 4 အာဆေ ဆီ တဲး ဒူအီ ကိူန် နပ် လွင် အန်၊ အန် တူ ချြီင် ဒီ ဘူင် ဂါန် အန်။ ကူပ် ဘူင် မဲ ဇိုဝ် တီ၊ တဲး မဲ တဲး ဒွန် အီ ဒဲင် ကာဒါယ် ယိုဝ် ပီ ဘူင် မဲ။” 5 ဂေ ဝါ ဇဝ် ယေဆူ ကာလာင် ဂြုဝ်း တီ ကူပ် တူ ဘော ညှိုမ် ဂေ။
6 ခုဝ်၊ ဇဝ် ယေဆူ ဝီ ကာလာင် ဒီ ဂေ၊ “ဇဝ်ဖြာ ညှမ် တဲး အုဝ် ဟာဝ်။ ဘေ ယီ တူ လိူက် ဟာဝ် ဒေါ မှဝ်။ 7 ဂေ ဒူအီ ဒဲင် ကာဒါယ် ဂေ တူ ဇွင့် ဘေ။ ဂေ ယီ ဇွင့် အုဝ် ကူပ် ကာလာင် အုဝ် လွင် ပီ ဘူင် ဂေ၊ န့ တူ မွှိုမ်၊ န့ ဟာယ်။ 8 တဲး ဘေ ဟာဝ် လိုပ် ဘ့လွယ် တီ။ အုဝ် ညှမ် ဟာဝ်။ အာခြာဝ် ဒီ လုဝ် ဟာဝ် အုဝ် ညှမ် ဇမ်။” 9 ဇဝ် ယေဆူ ဟဲ့ ဟွတ့် ကာလာင် ဂြုဝ်း တီ၊ အန် မိူဝ် ကွယ် ဒီ ပန် ခဲင် အိူင် ဂါလီလေ။
10 ဝါယ် ဟဲ့ ဟွတ့် ဟာဝ် ဂေ ဝါ အန် ဒီ ဘ့လွယ် တွိုန်၊ ဘော အန် ဝီ ဟာဝ်။ အန် ယီ တူ တဲး အီ ဟဝ် နပ် လွင် ဟာဝ် အန်။ အန် ဟာဝ်၊ ကွဲ့ တဲး အီ ယိုဝ်။ 11 ဒေါ ဘူင် ဂေ ဘ့လွယ် တွိုန်၊ ဂေ ဒါ တာင် ယူဒါ ယီ ဟြေတ့် အန် တဝ်း၊ “မှဝ် အန် ကွယ်။း”
12 ဂေ ဒူအီ ကိူန် ကာလာင် ဒွန် မျုဝ် ကာတဲ ဂေ၊ ကွဲ့ တဲး အီ ဟဝ် ယိုဝ်။ မင် အီ တဝ်း၊ “အန် မုး ဒူအီ မွှိုမ်။”
မင် အီ တဝ်း၊ “အာဝ် မုး။ အန် ကာလုဝ် အီ၊ ကွဲ့ တဲး ဂေ ဒူပ် နာ မှာန်။” 13 န့ ယီ တူ မိုဝ်း အာဆေ၊ အီ ယ ကာလာင် ဇိုဝ် တီ၊ တဲး ဒူအီ ကိူန် ပွိုန် ဒီ ယိုဝ်။ ဂေ ဘောကာဂ့လျီတ် ယုဝ် ဂေ ဒါ တာင် ယူဒါ။
14 ဒေါ အန် တီ ဒေါ ဆီငျာ ဘူင် ဂေ ဘ့လွယ်၊ ဇဝ် ယေဆူ ဟာဝ် လိုပ် ခဲင် ဝဲင် ဟုဝ် ဇဝ်ဖြာ၊ ဝီ စုး ဒီ မာနုဝ် အီ။ 15 ဂေ ဒါ တာင် ယူဒါ ဝီ အာမ် ဘော တဝ်း၊ “မှဝ် န့ ပါယ် ပီ ပွိုန် အန် အာငျာန် ကိူန် ခဲ့ တီ။း အန် တူ ဒွိုမ် ဟေန် ထမ် ဒေါ မှဝ်။”
16 ဇဝ် ယေဆူ ဝီ တဝ်း ဒီ ဂေ၊ “ပီ မာနုဝ် အုဝ်၊ န့ တူ လေး ခဲင် အာငျာန် အုဝ်။ န့ မုး အာငျာန် အန် ဇဝ် အီ ဟဲ့ တိုယ် အုဝ် တး ဒီ နီ။ 17 ဆေ န့ ယီ မိုဝ်း ဒူအီ အီ တဝ်း ဒီ ဘူင် အီ လဝ့် နဝ်း ဇဝ်ဖြာ၊ အန် ဒီ ဘော နပ် ဆီချာ လွင် ပီ မာနုဝ် အုဝ်၊ ယုဝ် န့ မုး အာငျာန် ဇဝ်ဖြာ၊ ယုဝ် န့ လေး အာငျာန် အုဝ်။ 18 အာဆေ ကာလာင် ဂြုဝ်း အီ လေး ခဲင် အာငျာန် အန်၊ အန် ကာလာင် တဲး ဒူအီ ရုဝ်ဆေ အန်။ အာဆေ ယီ ရုဝ်ဆေ ဝီ ပီ တိုယ် ဇဝ်ဖြာ၊ အန် မုး ဒူအီ အီ ဘူင် နာ မှာန်၊ တူ နပ် ဒီ ဘူင် နာ တူ မှာန်။ 19 န့ မုး ဒါ ဆာရာ အာမုဝ်ဆဲ တွိုန်၊ အန် ဟဲ့ ဒွါ ဒါရာ ဇဝ်ဖြာ ဒီ ဘေ။ န့ ယီ တူ မိုဝ်း ဒူအီ အူ ဝီ ကာတဲ ဘေ၊ အီ ဒူပ် ဒါရာ တီ။ ဆေ န့ ပါယ် တီ၊ မှဝ် န့ ပါယ် ပီ ဆီ ငဝ်း ဘေ အာဆာက် အုဝ်။း”
20 ဂေ ဒူအီ ကိူန် ဝီ တဝ်း၊ “မဲ မိုဝ်း ကာနမ် ဟာယ် ကွယ် ခဲင် ဒုဝ် မဲ။ အာဆေ ဟဲ့ တဝ်း ဒီ ငဝ်း အာဆာက် မဲ။း”
21 ဇဝ် ယေဆူ ဝီ တဝ်း၊ “အုဝ် ဟဲ့ ဘူင် နာ မွှိုမ် အာမ် ကာဆဝ် အူ မျုဝ်။ ဟဲ့ ဟွတ့်၊ ဘေ ဘောကာဂ့လျီတ် အာမ်။ 22 ဒါ ဆာရာ အာမုဝ်ဆဲ တွိုန်၊ အန် ဟဲ့ စ်ု ဘေ ဆွာ့ ဝဲန် ဟုန် လခါနာ အီမာယ်။ ခုဝ်၊ ဘေ ဝီ ဘူင် ပါယ် တီ ဒေါ မုး ဆီငဲ ကဲမ် ဆိန့်။ (မာလဲ န့ တူ မုး အာမုဝ်ဆဲ အီ စ်ု ဘေ ဘူင် ပါယ် တီ။ န့ မုး ဂုန့် ဒင် ဘေ)။ 23 ဘေ ခ့ဝါင် အီ ဆွာ့ ဝဲန် ဟုန် လခါနာ အီမာယ် ဒေါ မုး ဆီငဲ ဒီလှဝ်၊ ကွဲ့ တဲး ဒါရာ အာမုဝ်ဆဲ လိုဝ်။ ဘေ ယီ ရူ ဒီ အုဝ်၊ ဆေ အုဝ် ပီကဲန် ဒူအီ အူ ဝီ ဒေါ မုး ဆီငဲ ဒီလှဝ်။ 24 ကွဲ့ ဆုင်ဖျာတ် အာမူ အီ ကူပ် ယွတ် ဘေ အာရိုပ် အီ။ တဲး ဘေ ဒူပ် နာ မှာန် ဒေါ ဆုင်ဖျာတ် ဘေ ဘဲန် မျုဝ် ဘဲန် မျုဝ်။”
လွင် ဇဝ် ယေဆူ မာနုဝ် ဒူအီ
25 ပန် တီ န့ မုး ဂေ ဒူအီ အီ ကွယ် ခဲင် မိူင် ယေရူဆာလဲမ်။ ဂေ စုး ဒီ ဒီမွှတ်။ ဂေ တဝ်း၊ “ယေ ထာင်၊ န့ မုး ဒူအီ ဝီ တီ၊ ပီ ခြာမ် ဂေ ဒီ ငဝ်း ဝဲန်။ 26 အန် ကွယ် ဒီ နီ၊ ကာလာင် ဂြုဝ်း၊ တဲး ဒွန် အီ ပွိုန် ဒီ ထူမ်။ ဂေ ဒါ တာင် ယီ တူ တဝ်း မာဆေ ဒီ အန်။ န့ ပီ၊ ဂေ ထာင် ဒူအီ ဝီ တီ မုး ဒူအီ ပီ ရဝ်း ပီ တိုယ် ဇဝ်ဖြာ တဲး အန် ချွတ် ဒူအီ။ 27 ယေ ယီ နပ် ဆီချာ ဒူင် ကွယ် ဘြိမ် အန်။ ဆေ န့ ယီ မုး ဒူအီ ပီ ရဝ်း ပီ တိုယ် ဇဝ်ဖြာ တဲး အန် ချွတ် ဒူအီ၊ ဆေ အန် ဒီ တး၊ အာဝ် မိုဝ်း အာဆေ နပ် ဒူင် ကွယ် ဘြိမ် အန်။”
28 ဒေါ အန် တီ ဇဝ် ယေဆူ ဆီ ကွယ် ခဲင် ဝဲင် ဟုဝ် ဇဝ်ဖြာ၊ မာနုဝ် ဒူအီ။ အန် ဝီ ဒတ် တာင် တဝ်း၊ “ဟဲ့ မှာန်၊ ဘေ ထာင် ဘေ နပ် အုဝ်။ ဘေ ဘော ထာင် ဘေ နပ် ဆီချာ ဒူင် ကွယ် ဘြိမ် အုဝ်။ အုဝ် ယီ တူ တး ဒီ နီ ကူပ် မိုဝ်း အုဝ် နဝ်း ဆီ တး။ အုဝ် ဟဲ့ တး ကူပ် မိုဝ်း အန် ဇဝ် အီ တိုယ် အုဝ်။ ဘေ ယီ တူ နပ် အန် ဇဝ် တီ။ 29 အုဝ် ယီ နပ် အန် ကူပ် တး အုဝ် ဒူင် ကွယ် အန်၊ အန် မိူဝ် ဟဲ့ စ်ု အုဝ် တး ဒီ နီ။”
30 ခုဝ် အန် တီ ဂေ ဒါ တာင် ယူဒါ ဆီ မှေတ့် အန်။ န့ ယီ တူ မိုဝ်း အာဆေ ယ မှေတ့် အန်။ ဇဝ်ဖြာ ညှမ် တဲး ဂေ ဘူင် ဇိုဝ် တီ။ 31 န့ ယီ မိုဝ်း ဒူအီ ကိူန်၊ ဂေ ညှိုမ် အန်။ ဂေ တဝ်း၊ “ဆေ ဒူအီ ပီ ရဝ်း ပီ တိုယ် ဇဝ်ဖြာ ဒီ တး၊ အန် တူ ကူပ် နပ် ဒီ ဘူင် နာ မွှိုမ် အာမ် ကာဆဝ် လွှိုမ် ဒူအီ ဝီ နီ။”
32 ဂေ ဒူအီ ခဲင် ဖိုင် ဖာရီဆဲ၊ ဂေ ဘော ယိုဝ် ဒူအီ လာယ် ဂြုဝ်း လာယ် ဖူဖာပ် ကာတဲ ဂေ ဇိုဝ် တီ။ ပန် တီ ဂေ ဒါ တာင် အီ ယဲတ့် ဂေ ဒူအီ အီ လှူ ဒီ ဇဝ်ဖြာ ဘော ဂေ ဒူအီ ခဲင် ဖိုင် ဖာရီဆဲ၊ ဂေ စ်ု ဒူအီ အီ ဘ်ု ဟုဝ် ဇဝ်ဖြာ မင် အီ၊ တဲး ဂေ မှေတ့် ဇဝ် ယေဆူ။
33 ဇဝ် ယေဆူ ဝီ တဝ်း ဒီ ဒူအီ အီ ထူမ် ဂြုဝ်း အန်၊ “အုဝ် ဒီ ကွယ် ရိုမ် ဒူပ် ဘေ အာဒါ အူ ကာစန်။ ဟဲ့ ဟွတ့် အုဝ် ဒီ ဝီ ဝေန့် ဒူင် ကွယ် အန် ဇဝ် အီ စ်ု အုဝ် တး ဒီ နီ။ 34 ဝါယ် အန် တီ ဘေ ဒီ ဝီ ဟြေတ့် အုဝ်။ ဘေ ယီ တူ ကာတုန့် အုဝ်။ ဒူင် ကွယ် အုဝ်၊ ဘေ မိူဝ် တူ ပွိုန် ဒီ တး ဇမ်။”
35 အန် ဟဲ့ ဟွတ့် ကာလာင် ဂြုဝ်း တီ၊ ဂေ ဒါ တာင် ယူဒါ ဝီ လာယ် ကာလာင် တဝ်း၊ “မှဝ် အန် ဒီ ဟာဝ်။း ဒီ မှဝ် န့ မုး၊ ပီ တူ ပွိုန် အေ ဟာဝ်။ ယုဝ် အန် ပီ ခြာမ် ဒီ ဟာဝ် ဒူင် ကွယ် ဒူအီ အာယူဒါ ခဲင် မိူင် ဂြိက် ဘဲန် ပ့လုဝ့် ဘဲန် ပ့လုဝ့်၊ ဝီ မာနုဝ် ဂေ ဒူအီ ဂြိက်။ 36 မာဆေ န့ မုး လွင် ဒါင် အန်၊ ဒေါ တဝ်း အန်၊ ‘ဘေ ဒီ ဟြေတ့် အုဝ်၊ ယီ တူ ကာတုန့် အုဝ်။’ ဘော၊ ‘ဒူင် ကွယ် အုဝ် ဘေ တူ ပွိုန် ဟာဝ်။’”
37 န့ ယီ ဇမ် ဆီငဲ ဒီ ဟွတ့် ဘ့လွယ်။ န့ မုး ဆီငဲ တာင် လွှိုမ် ဒွန် ဆီငဲ။ ဒေါ အန် တီ ဇဝ် ယေဆူ ဝီ ယိတ့်၊ ကာလာင် ဂြုဝ်း တာင်။ အန် တဝ်း၊ “ဆေ န့ မိုဝ်း ဒူအီ အီ ဆီ ဒျီင် အိုမ်၊ တဲး အန် တး ဒီ အုဝ်။ အုဝ် ဒီ ဒွါ ပီ ဒီ ဒျီင် ဒီ အန်။ 38 အာဆေ ညှိုမ် အုဝ် ပီ ပီ ဒဲမ် အုန် ခဲင် ဘပ် ဇဝ်ဖြာ၊ န့ ဒီ ပီ ဘ့လဲင် အိုမ် အီ လေး ခဲင် ဒုဝ် ဘူင့် အန်။ အိုမ် တီ ယီ မုး အိုမ် အီ နပ် ဒီ ဒွါ အာဆာက် ကာမာယ်။” 39 အန် ယီ ကာလာင် ဂြုဝ်း တီ လွင် နဝ်း ဖွိုမ် ဇဝ်ဖြာ။ နဝ်း ဖွိုမ် ဇဝ်ဖြာ တီ ဒီ လိုပ် ခဲင် နဝ်း အီ ညှိုမ်။ ဒေါ ကာလာင် အန် ဂြုဝ်း တီ၊ ဇဝ်ဖြာ ညှမ် ဒွါ နဝ်း ဖွိုမ် အန် ဒီ ဒူအီ။ ခုဝ်၊ ဇဝ် ယေဆူ ညှမ် ပွိုန် အာဖုင် ဒင်ခုဝ် အန်။
40 ဒေါ ထူမ် ဂေ ဂြုဝ်း ဇဝ် ယေဆူ တီ၊ မင် အီ ဘော တဝ်း၊ “ဟဲ့ မှာန်၊ ဟဲ့ မုး။ ဒူအီ နီ၊ အန် မုး ဒူအီ အီ ဘျာန် ဂြုဝ်း ဇဝ်ဖြာ၊ အီ ပီ တဝ်း ဇဝ်ဖြာ ဒီ တိုယ်။”
41 မင် အီ တဝ်း၊ “အန် မုး ဒူအီ ပီ ရဝ်း ပီ တိုယ် ဇဝ်ဖြာ တဲး အန် ချွတ် ဒူအီ။” ဘော မင် အီ ယီ တဝ်း၊ “ဆေ န့ မုး ဒူအီ ပီ ရဝ်း ပီ တိုယ် ဇဝ်ဖြာ၊ အန် တူ တး အိူင် ဂါလီလေ။ 42 ခဲင် ဘပ် ဇဝ်ဖြာ န့ တဝ်း၊ ဒူအီ ပီ ရဝ်း ပီ တိုယ် ဇဝ်ဖြာ တဲး အန် ချွတ် ဒူအီ၊ အန် မုး ဒူအီ ခဲင် ခြိုဝ် အာဒါဝိတ်၊ တး မိူင် ဘေတ်လဲမ် အီ မုး ဒူင် ကွယ် အာဒါဝိတ် တွိုန်။” 43 ပါယ် တီ၊ ဂေ ဒူအီ တူ လာယ် ဖြူမ် လွင် ဇဝ် ယေဆူ။ 44 မင် အီ တဝ်း ဒီ မှေတ့် အန်။ ယီ တူ မိုဝ်း အာဆေ၊ ယ တး ပါ အန်။
လွင် ဒါ တာင် ယူဒါ တူ ညှိုမ်
45 ဝါယ် အန် တီ ဂေ ဒူအီ အီ ဘ်ု ဟုဝ် ဇဝ်ဖြာ တွိုန်၊ ဂေ ဝီ ဝေန့် ဒူင် ကွယ် ဂေ ဒါ တာင် အီ ယဲတ့် ဂေ ဒူအီ အီ လှူ ဒီ ဇဝ်ဖြာ ဘော ဂေ ဒူအီ ခဲင် ဖိုင် ဖာရီဆဲ တွိုန်။ ဂေ ဝီ ဒီမွှတ် ဒူအီ အီ ဘ်ု ဟုဝ် ဇဝ်ဖြာ။ ဂေ တဝ်း၊ “မှဝ် န့ ပါယ် ပီ တူ ဒိုဝ်း တး ဘေ အာယေဆူ။း”
46 ဂေ ဝီ တဝ်း၊ “န့ တူ ဒွိုမ် မိုဝ်း အာဆေ၊ အီ ကာလာင် ဂြုဝ်း ပီ အန်။”
47 ဂေ ဒူအီ ခဲင် ဖိုင် ဖာရီဆဲ ဝီ တဝ်း၊ “ဆေ န့ ပါယ် တီ၊ အန် ဟဲ့ ပီလွှက့် ဘော ဒီ ဘေ။ 48 တဲး ဘေ ယွတ်၊ ခဲင် ဒါ တာင် ယူဒါ အီ အိုပ် မိူင် ဘော ခဲင် ဖိုင် ဖာရီဆဲ အာဝ် မိုဝ်း အာဆေ အီ ဟဲ့ ညှိုမ် အန်။ 49 န့ ယီ မုး ဒူအီ ကိူန် ဂေ နီ၊ ဂေ တူ နပ် မာဆေ လွင် ဒါရာ ဇဝ်ဖြာ၊ လုဝ် ဒိူင် ဂေ။”
50 န့ ယီ မုး အာနီခုဝ်ဒေမ်၊ အီ ဒွိုမ် တး ကာလာင် ဂြုဝ်း ဒီ ဇဝ် ယေဆူ။ အန် မုး ဒူအီ ခဲင် ဖိုင် ဂေ။ အန် ဝီ တဝ်း၊ 51 “ဆေ အေ ဒူပ် ဒါရာ၊ အာဝ် ပွိုန် ဒမ် မှာပ် ဒီ အီ အာတ့် ထူမ် အေ ဂြုဝ်း အန်။ အေ လုဝ် နပ် ဒီ အာတ့် လွင် ပဲ့ ဟဲ့ ဘူင် အန်။”