အိုယ် ဘေ ဘီနွင်၊ အာဝ် မိုဝ်း အာဆေ အီ ပွိုန် ဂဝ်း ဒုဝ် အန်။ ဆေ မဲ ဆုင်ဖျာတ် လွင် အီ ဟဝ်၊ မဲ မိူဝ် တူ ပွိုန် ချြီင် မှာပ် မဲ။ ပီ ဆုင်ဖျာတ် မဲ အီ ဟဝ် တီ၊ န့ ပီ မဲ ဝီ ဆုင်ဖျာတ် ဒုဝ် ဘြိမ် မဲ။ ခုဝ်၊ မဲ အီ ဆုင်ဖျာတ် လွင် အီ ဟဝ်၊ မဲ မိူဝ် ဟဲ့ ဘူင် မှာပ် ပီ ဒူအီ ဂေ တီ။ ပဲ့ ဟဲ့ ဘူင် မဲ ဘော ပဲ့ ဟဲ့ ဘူင် အီ ဟဝ် တီ ဟဲ့ မုး အူ မျုဝ်။ 2 အေ ယီ ဟဲ့ နပ်၊ ဆေ ဇဝ်ဖြာ ဆုင်ဖျာတ် အာမူ ဒူအီ၊ အန် ဒီ ဆုင်ဖျာတ် ဒူပ် နာ မုး နာ မှာန်။ 3 ခုဝ်၊ ဆေ မဲ နပ် ဒီ ဆုင်ဖျာတ် ပီ ဘူင် အီ ဟဝ် အီ တူ ဘွတ် အီ တူ မွှိုမ်၊ မဲ ယီ ဝီ ဘူင် ပီ ပီ ဘူင် အီ ဟဝ် တီ၊ မဲ မိူဝ် တူ လွတ် ဇဝ်ဖြာ ဒမ် မှာပ် ဒီ မဲ။ 4 ဇဝ်ဖြာ ဆီ ဂေဇူ မဲ၊ ဆီ တဲး မဲ လှုဝ်း မှာပ် မဲ၊ တဲး မဲ ဝဲန် မှာပ် မဲ။ ဆေ မဲ ယီ တူ ဆီ တဲး ဇဝ်ဖြာ ဘူင် ပါယ် တီ၊ န့ ပီ မဲ လုက်တာယ် ပီ ဂေဇူ ဇဝ်ဖြာ ဘော ပဲ့ ဟဲ့ ခမ် အန် ဇဝ် ဒီ ယိူန် လှေန့် ကူပ် မဲ။

5 ကူပ် မိုဝ်း မဲ နဝ်း ဒိူဝ် ကာဆဝ်၊ ကူပ် တူ ဆီ ဝဲန် မဲ နဝ်း ဘြိမ် မဲ၊ မဲ ဘူင် တဲး ဇဝ်ဖြာ ကြဲ ဒီ ရူ ကာဆဝ် ဒီ မဲ၊ တဲး န့ ကော ဇမ် ဆီငဲ ဒီ ဘျ ဇဝ်ဖြာ နဝ်း ရူ အန်။ ဒေါ အန် တီ န့ ဒီ လိုဝ်း ဆီချာ လွင် အန် ဇဝ် ဆုင်ဖျာတ် ဒူပ် နာ မုး နာ မှာန်။ 6 ဇဝ်ဖြာ ဒီ ဝီ ဘူင် ဝျီ့ ဒီ ဂေ ဒူအီ ဒွန် အီ ခဲ့ ပီ ဒွိုမ် ဘူင် ဂေ။ 7 ဂေ ဒူအီ အီ ဂျုဝ်ဂျာ ဒီ ဘူင် မီ နာ ဘွတ်၊ ဘူင် တဲး ဂေ မိုဝ်း ဆာရေ ဘော အာဖုင် ဒင်ခုဝ်၊ မိုဝ်း ဘော နဝ်း ဆီ ကွယ် ရိုမ် ဒူပ် ဇဝ်ဖြာ၊ ဇဝ်ဖြာ မိူဝ် ဒီ ဝီ ဒွါ အာဆာက် ကာမာယ် ဒီ ဂေ။ 8 မာလဲ၊ ဂေ အီ မိုဝ်း နဝ်း ဆီ ဘူင် ပီ အိုင် ဂေ ဘော ဝဲန် နာ မုး နာ မှာန်၊ ပီ ဝီ ဘူင် နာ ဟာယ် နာ စီစိဝ်၊ ဂေ ဒီ လုဝ် ခမ် ပီ ရူ ကာဆဝ် ဇဝ်ဖြာ ဒီ ဂေ။ 9 ဂေ အီ ဘူင် နာ ဟာယ် နာ မိူက် ဒွန် အီ ဒီ ကာဒုး ဒုက်။ န့ ဒီ ဘော ညှာပ် ကာဆဝ် ဒီ နဝ်း ဂေ။ ဂေ ဒူအီ အာယူဒါ ဒီ လုဝ် ခမ် ဒီ အာတ့် အီ ဟဝ်။ ဟဲ့ ဟွတ့်၊ ဂေ ဒူအီ အာမျုဝ် ဟဝ် ဒီ ဝီ ခမ်။ 10 ဂေ အီ ဘူင် နာ ဘွတ် နာ မွှိုမ် ဒွန် အီ၊ ဇဝ်ဖြာ ယီ ဒီ ဒွါ ဒီ ဂေ၊ တဲး ဂေ မိုဝ်း အာဖုင် ဒင်ခုဝ်၊ မိုဝ်း ဆာရေ၊ မိုဝ်း နဝ်း ဂတ် ဂျီတ်။ ဂေ ဒူအီ အာယူဒါ ဒီ ပွိုန် ဒီ အာတ့် အီ ဟဝ်။ ဟဲ့ ဟွတ့်၊ ဂေ ဒူအီ အာမျုဝ် ဟဝ် ဒီ ဝီ ပွိုန်။ 11 ကူပ် န့ ပါယ် တီ၊ ဇဝ်ဖြာ ဆုင်ဖျာတ် တဲး န့ ကာရမ် ဒီ ဒူအီ ဒွန် အီ။ အန် တူ မိုဝ်း ဒူင် ရွက့် ဒူင် ဇွင့်။

12 အီ တူ နပ် လွင် ဒါရာ ဇဝ်ဖြာ၊ ဆေ ဂေ ဘူင် မှာပ်၊ ဂေ ပီ ဆ မိုဝ်း ဒါရာ မိူဝ်၊ ဂေ ဒီ ဘော လိုဝ် စှိုမ်။ ဆေ ဂေ အီ နပ် ဒါရာ ယီ ဘူင် မှာပ်၊ ဂေ ဒီ ခမ် မှာပ် ဂေ ကူပ် ဒါရာ တီ။ 13 ခုဝ်၊ ဇဝ်ဖြာ တူ တဲး နဝ်း ဆိူဝ် နဝ်း မှာန် ဒီ အီ ကူပ် ထူမ် ဂေ ဒါရာ။ ဇဝ်ဖြာ ဒီ ဒွါ နဝ်း ဆိူဝ် နဝ်း မှာန် ဒီ ဂေ အီ ဘူင် ဒူပ် ဒါရာ။ 14 ဂေ ဒူအီ အာမျုဝ် ဟဝ်၊ ဂေ ပီ ဆ မိုဝ်း ဒါရာ ဇဝ်ဖြာ မိူဝ်၊ ဆေ ဂေ ဘူင် ဒူပ် ရာင် ဂေ ပီ ဒမ် ဒါရာ ဇဝ်ဖြာ၊ န့ လိုဝ်း ဆီချာ လွင် ဒါရာ တီ၊ န့ ဟဲ့ ကွယ် ခဲင် နဝ်း ဂေ။ 15 ဒူအီ ဂေ တီ၊ ဂေ ဟဲ့ ဘျ၊ ဒါရာ ဟဲ့ ဒဲမ် အုန် ခဲင် နဝ်း ဂေ။ ဂေ နပ် ခဲင် နဝ်း ဂေ လွင် အီ မွှိုမ် အီ တူ မွှိုမ်။ ဘော ပီ ကာဒွါ့ ကာဖာ ဂေ၊ မင် ဇေန့် န့ နပ် ဒီ ဒမ် မှာပ် ဒီ ဂေ။ မင် ဇေန့် န့ ဘော နပ် ဒီ တဲး ပ့လူမ် ဂေ ဟဲန့် ဒီ နဝ်း ဂေ။ 16 န့ ဒီ ဇမ် ဆီငဲ ပန် ဒီ ဆုင်ဖျာတ် ဇဝ်ဖြာ အာမူ အီ။ အန် ဇဝ် ဒီ တဲး ဇဝ် ယေဆူ ဆုင်ဖျာတ် အာမူ ဂေ တီ။ ဒေါ အန် တီ န့ ဒီ ဘဲန် တူတ့် ဒွန် မျုဝ် ပဲ့ ဟဲ့ ကာလာင် အုဝ် ဒေါ တီ နီ။ ပီ ကာဖာ ဒူအီ ဘော ပီ ချြီင် ဂေ၊ ကွဲ့ တဲး အာဆေ နပ်၊ န့ ဒီ ဘော လိုဝ်း တူတ့် ဒွန် မျုဝ်။ ပါယ် တီ၊ န့ ဒီ ဒူပ် ပီ ကာလာင် အုဝ် လွင် ဇဝ်ဖြာ အီ တဲး နဝ်း ဒူအီ ဒါခိုယ်။

17 န့ ယီ မုး မဲ၊ အီ မုး ဒူအီ အာယူဒါ၊ မဲ ဟဲ့ ဘိုင် ဒါရာ။ မဲ နပ် ဒီ ပီခိုက် မဲ ကူပ် ညှိုမ် မဲ ဇဝ်ဖြာ။ 18 မဲ မိူဝ် ဟဲ့ ဟွတ့် ဒွိုမ် ဟေန် ဒါရာ၊ ဟဲ့ နပ် ပီ လုဝ် ဇဝ်ဖြာ၊ ဟဲ့ နပ် ဘော အီ ဘွတ် အီ မွှိုမ်။ 19 မဲ မိူဝ် ထာင် မဲ ပွိုန် ယဲတ့် န့တေန့် ဂေ ဒူအီ ငါယ် အပ်။ မဲ မိူဝ် ထာင် မဲ ပွိုန် ဒီ တဲး န့ ဘ့လာင် ဒီ ဂေ အီ ကွယ် ခဲင် အပ် ဝွင့်။ 20 မဲ မိူဝ် တဝ်း၊ မဲ နပ် ဒီ မာနုဝ် ဂေ ဒူအီ ရိုဝ်၊ ဘဲန် ဒါ ဆာရာ ဂေ ဒူအီ အီ တူ မိုဝ်း အာငျာန်။ ကူပ် ညှိုမ် မဲ ဒါရာ တီ မဲ ထာင်၊ န့ တဲး မဲ နပ် ပီ ပါယ် ဘဲန် မျုဝ် ဘဲန် မျုဝ်၊ တဲး မဲ နပ် ဘော နာ မုး နာ မှာန်။ 21 ဆေ န့ ပါယ် တီ၊ မဲ အီ မာနုဝ် အီ ဟဝ်၊ မှဝ် န့ ပါယ် ပီ တူ ဝီ မာနုဝ် မဲ ဒုဝ် ဘြိမ် မဲ။း မဲ ဟဲ့ မာနုဝ် အီ ဟဝ် တဝ်း၊ “ကွဲ့ ပြာ ကြုဝ်ကြာမ် အီ ဟဝ်။” ခုဝ်၊ အာဝ် ကာအာပ် မဲ ဝီ ပြာ။ 22 မဲ ဟဲ့ တဝ်း၊ “ကွဲ့ ဝိန် ဒီ လုတ့် အီဘိုန့် အီမာယ် အီ ဟဝ်။” ခုဝ်၊ အာဝ် ကာအာပ် မဲ ဝီ လုတ့် အီဘိုန့် အီ။ မဲ တဝ်း၊ မဲ ဟဲ့ ကာအိး အာရိုပ် ရာင်။ မဲ ယီ နပ် ဒီ ဝီ ဟာဝ် ဇူန် ဒိုဝ်း ကြုဝ်ကြာမ် ခဲင် ဟုဝ် ဒူင် ကြိုပ် ဂေ အာရိုပ် ရာင် တီ။ 23 မဲ ဟဲ့ မျုက် ဟဲ့ အိူပ် ဒါရာ ဇဝ်ဖြာ၊ မဲ ယီ ဝီ လှိုဝ် ဝီ ဘ့လိူင် ဒါရာ တီ၊ ဝီ ဘူင် ကွဲ့ တဲး ဇဝ်ဖြာ မိုဝ်း ဆာရေ။ 24 ခဲင် ဘပ် ဇဝ်ဖြာ န့ ဘော ဒဲမ် တဝ်း၊ “ကူပ် ဘေ ဒူအီ အာယူဒါ နီ၊ ဂေ ဒူအီ အာမျုဝ် ဟဝ် လုက်တာယ် ဘော ထဲန့် ဇဝ်ဖြာ။”

25 ဆေ မဲ ဟဲ့ ဘူင် ဒူပ် ဒါရာ၊ ပဲ့ ဟဲ့ ခမ် မဲ ဒီ ဆွာ့ ဝဲန် ဟုန် လခါနာ အီမာယ် ဟဲ့ မိုဝ်း အာဂျိုဝ်။ ဆေ မဲ ယီ တူ ဒူပ် ဒါရာ၊ န့ ပီ မဲ တူ ဒွိုမ် ဆွာ့ ဝဲန် ဟုန် လခါနာ ဒေါ မှဝ်။ 26 န့ ဘော ပါယ် တီ၊ ဂေ ဒူအီ အာမျုဝ် ဟဝ်၊ ဂေ ပီ ဆ ခမ် ဒီ ဆွာ့ ဝဲန် ဟုန် လခါနာ မိူဝ်၊ ဆေ ဂေ ယီ ဘူင် ဒူပ် ဒါရာ ဇဝ်ဖြာ၊ ဂေ ဟဲ့ ပီ ဒူအီ အီ ဟဲ့ ဟွတ့် ဆွာ့ ဝဲန် ဟုန် လခါနာ။ 27 ကူပ် န့ ပါယ် တီ၊ ဂေ ဒူအီ အာမျုဝ် ဟဝ် အီ တူ ခမ် ဒီ ဆွာ့ ဝဲန် ဟုန် လခါနာ အီမာယ်၊ ဆေ ဂေ ယီ ဘူင် ဒူပ် ဒါရာ၊ ဂေ ဒီ ဘော ဒမ် မှာပ် ဒီ ဒူအီ အာယူဒါ အီ ဟဲ့ ခမ် ဒီ ဆွာ့ ဝဲန် ဟုန် လခါနာ ဘော နပ် ဒါရာ ပီ ဒမ် အုန် ဇဝ်ဖြာ၊ ယီ တူ ဒူပ် ဒါရာ တီ။

28 ခုဝ်၊ ဆေ ဒူအီ အူ ဝီ ဒူပ် မီ ဟိတ် ဂေ ဒူအီ အာယူဒါ၊ န့ တူ တဲး အန် ဘဲန် ဒူအီ အာယူဒါ အာခါခ်ု။ ဘော၊ ဆေ ဒူအီ ဆွာ့ ဝဲန် မီ ဟုန် လခါနာ ဒီ ဒုဝ် ဘူင့် အန်၊ န့ တူ တဲး နဝ်း အန် ဆီငါ။ 29 ဒူအီ အီ မုး ဒူအီ အာယူဒါ အာခါခ်ု၊ အန် ညှိုမ် ခဲင် နဝ်း အန်။ ဆေ ဒူအီ ဆွာ့ ဝဲန် ဟုန် လခါနာ န့ ဘဲန် လက်ဆာနာ အီ ဘျ ပီ ဘူင် ဇဝ်ဖြာ ခဲင် နဝ်း ဒူအီ။ အာဝ် မုး ကူပ် ဘူင် ဒူပ် အန် ဒါရာ ဒွန် ညွင့်။ န့ မိူဝ် တူ မုး ဒူအီ အီ ဒီ အိူပ် အန်။ ဇဝ်ဖြာ အီ ဒီ အိူပ် အန်။