ဆေ န့ ပါယ် တီ၊ မှဝ် န့ ပါယ် ပီ ထာင် ဂေ ဒူအီ အာယူဒါ၊ ဂေ မွှိုမ် လွှိုမ် ဒူအီ အာမျုဝ် ဟဝ်။း ပဲ့ ဟဲ့ ခမ် ဂေ ဒီ ဆွာ့ ဝဲန် ဟုန် လခါနာ ဒီ မိုဝ်း အာဂျိုဝ် မာဆေ။း 2 န့ ဟဲ့ ဘဲန် အာဂျိုဝ် ကိူန် ဒွန် မျုဝ်။ အီ အာဂျိုဝ် တာင် လွှိုမ် မျုဝ် ဟဝ်၊ န့ ဘော မုး လွင် ဇဝ်ဖြာ ဟဲ့ အာပ် ဒွါ ဂြုဝ်း အန် ဒီ ဂေ ဒူအီ အာယူဒါ။

3 ဆေ န့ ယီ မိုဝ်း မင် အီ၊ အီ တူ ညှိုမ်၊ ပီ တူ ညှိုမ် ဂေ တီ တူ တဲး ဇဝ်ဖြာ အီ ဘူင် နာ မုး နာ မှာန် ဆေဆေ ဘျွင် နဝ်း အန်။ 4 ဆေ ဒူအီ ဘောကာဂ့လျီတ် ပီ ဘော ဟဲ့ ဘဲန် တူတ့် ဒူအီ အီ ဆီမာ ကာလုဝ် မိူဝ်၊ ဇဝ်ဖြာ ယီ ဘူင် နာ မုး နာ မှာန် ဆေဆေ။ န့ ပီ ပီ ဒဲမ် အုန် ခဲင် ဘပ် ဇဝ်ဖြာ တဝ်း၊ “ဒူအီ ဒွန် အီ ဒီ ယိုဝ် ဂြုဝ်း ပီ ကာလာင် မဲ ဟဲ့ မုး ဟဲ့ မှာန်။ ဆေ မဲ ဇဝ် ဒမ် မှာပ် ဒီ အုဝ်၊ မဲ ဘူင် အီ မုး အီ မှာန်။”

5 မာလဲ၊ ဆေ နာ တူ မွှိုမ် ပဲ့ ဟဲ့ ဘူင် အေ တဲး န့ လိုဝ်း ဆီချာ လွင် ဇဝ်ဖြာ ဘူင် နာ မုး နာ မှာန်၊ န့ ဒီ ပါယ် မှဝ် ဒီ အေ။း ဆေ ဇဝ်ဖြာ ဝီ ဒမ် မှာပ် ဒီ အေ၊ အေ မိူဝ် တူ ပွိုန် တဝ်း၊ ဇဝ်ဖြာ တူ ဘူင် နာ မုး နာ မှာန်။ (ဂြုဝ်း တီ၊ န့ ဒူပ် ပီ ကာဖာ ဒူအီ ခဲင် နဝ်း ဂေ)။ 6 ဆေ ဇဝ်ဖြာ တူ ဘူင် ဆိူဝ် ဆိူဝ် မှာန် မှာန်၊ အန် တူ ပွိုန် ဆုင်ဖျာတ် အာမူ ဒူအီ ဒဲင် ကာဒါယ် ဘောကာဂ့လျီတ်။ 7 မင် အီ နပ် ဒီ တဝ်း၊ ကူပ် ဟဲ့ ဘူင် အုဝ် နာ တူ မွှိုမ် တီ၊ ဆေ န့ ယီ တဲး ဒူအီ ဝဲ နပ် လွင် ဇဝ်ဖြာ အီ ဟဲ့ မုး ဟဲ့ မှာန်၊ ဆေ န့ ဘော တဲး အာဖုင် ဒင်ခုဝ် ဇဝ်ဖြာ ဝဲ လိုဝ်း ဆီချာ၊ မှဝ် န့ ပါယ် ပီ ဆုင်ဖျာတ် အန် ဇဝ် ဒီ အာမူ အုဝ် တဝ်း၊ အုဝ် မိုဝ်း မှာပ်။း 8 ဆေ န့ ပါယ် တီ၊ မှဝ် န့ ပါယ် ဘေ ပီ တူ တဝ်း၊ တဲး အေ ဘူင် နာ ဟာယ် နာ မိူက် တီ၊ တဲး န့ ဝီ ဘဲန် အာဂျိုဝ် အီ ဘွတ် အီ မွှိုမ်။း အုဝ် ကာလာင် ပါယ် တီ၊ ခုဝ်၊ န့ ဟဲ့ မိုဝ်း ဂေ ဒူအီ မင် အီ၊ ဂေ ဟဲ့ ဖျာက် ယေ တဝ်း၊ ယေ ဟဲ့ ကာလာင် ပါယ် တီ။ ဂေ ဒူအီ အီ ကာလာင် ပါယ် တီ၊ ဂေ ဟဲ့ ကာအာပ် ခမ် မှာပ် ဂေ။

9 ဆေ န့ ပါယ် တီ၊ ဆီဖဝ် ပီ ကာလာင် အုဝ် ဇိုဝ် တီ၊ န့ လေး ပါယ် မှဝ်။း ဘေ ထာင် အေ ဒူအီ အာယူဒါ ဟဲ့ မွှိုမ် လွှိုမ် ဂေ ဒူအီ အာမျုဝ် ဟဝ်။း အာဝ် မုး ပါယ် တီ။ အုဝ် ဟဲ့ ဟွတ့် ဒွိုမ် ကာလာင်၊ ဘော ဒူအီ အာယူဒါ ဘော ဒူအီ အာမျုဝ် ဟဝ် ဒွန် အီ မိုဝ်း မှာပ် မုး အူ မျုဝ်။ 10 ခဲင် ဘပ် ဇဝ်ဖြာ ဟဲ့ ဒဲမ် အုန် တဝ်း၊ “အာဝ် မိုဝ်း ဒူအီ အီ မိုဝ်း နဝ်း ဆိူဝ် နဝ်း မှာန် ခေါ အူ ဝီ။ အူ ဝီ မိူဝ် န့ တူ မိုဝ်း။ 11 အာဝ် မိုဝ်း ဒူအီ အီ ဟဲ့ ကာလှုး ဒီ နဝ်း။ အာဝ် မိုဝ်း ဒူအီ အီ ဆီ ဘိုင် ဇဝ်ဖြာ။ 12 ဒူအီ ဘောကာဂ့လျီတ် ဟဲ့ ဝဲန် ဇဝ်ဖြာ၊ ဟဲ့ ဘဲန် တူတ့် ဒူအီ အီ တူ မိုဝ်း ဒီခုဝ် ဒီလူယ်။ အာဝ် မိုဝ်း အီ ဘူင် နာ ဘွတ် နာ မွှိုမ် ခေါ အူ ဝီ။ အူ ဝီ မိူဝ် န့ တူ မိုဝ်း။ 13 ကာဒဝ် မဲင် ဂေ၊ န့ ဘော ပီ ကာဒဝ် ဘာရေဝ် အီ ဟဲ့ န့ဝိုဝ်း ဆေဆေ။ ဂြုဝ်း အီ လေး ခဲင် မူတ့် ဂေ တဲး န့ ဆဝ် ဒီ နဝ်း အီ။ န့ ဘော ပီ အာယ် မာဟန့်။ 14 ဂေ ဘော နပ် မီ ဒီ ကာလာင် ဂြုဝ်း ဒိူင်၊ ဂြုဝ်း အေး အီ ဇဲမ် ကာဆဝ်။ 15 ဂေ ဘော ခြန် ဒီ ဟာဝ် ငဝ်း ယမ် အီ ဟဝ်။ 16 ဂေ ဘော ဟာဝ် နာ မှဝ်၊ ဂေ ဘူင် တဲး အီ လိုဝ် စှိုမ်၊ တဲး အီ ဇမ် ဒုက်။ 17 ဂေ မိူဝ် တူ နပ် န့တေန့် အီ ဒါခိုယ် အီ ဂျာမ်ဆာ။ 18 ဂေ မိူဝ် တဝ်း၊ ‘အာဝ် မိုဝ်း ဒီ လုဝ် ယုဝ် ဇဝ်ဖြာ။’” ခဲင် ဘပ် ဇဝ်ဖြာ န့ ဟဲ့ တဝ်း ပါယ် တီ။

19 အေ ဟဲ့ နပ်၊ ဒါရာ ဒွန် ဒဲ၊ န့ ဘော မာနုဝ် ဂေ ဒူအီ အီ ဒီ လုဝ် ဒူပ် ဒါရာ။ န့ တူ တဲး အာဆေ ပွိုန် ဒီ ဂဝ်း ဒုဝ် အန်။ ခဲ့ ကွယ် ဒူအီ ဒဲင် ကာဒါယ် ဘောကာဂ့လျီတ် ဒီ လုဝ် ခမ် ဇဝ်ဖြာ ဆုင်ဖျာတ် အာမူ ဂေ ဒူပ် ဒါရာ တီ။ 20 ခုဝ်၊ ဇဝ်ဖြာ တူ ဒွါ နဝ်း ဆိူဝ် နဝ်း မှာန် ဒီ အာဆေ ကူပ် ဒူပ် အန် ဒါရာ။ ဒါရာ တီ၊ န့ ယီ ဘျ နှဲ ဒီ အေ၊ တဲး န့ လိုဝ်း ဆီချာ လွင် မှာပ် ဘဲန် မျုဝ် ဘဲန် မျုဝ် ပဲ့ ဟဲ့ လုတ့် အေ ဒီ ဇဝ်ဖြာ။

21 ဇဝ်ဖြာ ဟဲ့ ဘူင် တဲး န့ လိုဝ်း ဆီချာ လွင် နဝ်း ဆိူဝ် နဝ်း မှာန် ပီ ဒွါ ဇဝ်ဖြာ။ အန် တူ တဲး နဝ်း တီ ဒီ အာဆေ ကူပ် ဒူပ် ဂေ ဒါရာ။ ခဲင် ဘပ် ဒါရာ ဇဝ်ဖြာ ဘော ဂေ ဒူအီ အီ ဘျာန် ဂြုဝ်း ဇဝ်ဖြာ ဟဲ့ ဒွိုမ် ဒဲမ် အုန် လွင် အန် တီ။ 22 ဇဝ်ဖြာ ဒီ ဒွါ နဝ်း ဆိူဝ် နဝ်း မှာန် တီ မီ ဒီ ဂေ ဒူအီ အီ ဟဲ့ ညှိုမ် ဘိုင် ဇဝ် ယေဆူ။ ဘော မုး ဒူအီ အာမျုဝ် မှဝ်၊ အာဝ် တဝ်း။ 23 ခုဝ်၊ ဒူအီ ဘောကာဂ့လျီတ် မိုဝ်း မှာပ်။ ခဲ့ ဂျုဝ်ဂျာ ဂေ ဒီ ဘူင် နာ မွှိုမ်၊ န့ တူ ငှိုယ် ငှာယ် ဒီ ကာဒါန် အာဖုင် ဒင်ခုဝ် ဇဝ်ဖြာ။ 24 ဇဝ်ဖြာ ယီ ဟဲ့ ဂေဇူ ဒူအီ။ အန် ဟဲ့ တဲး ဇဝ် ယေဆူ ထုတ် လေး ဂေ ဘောကာဂ့လျီတ် ခဲင် မှာပ်၊ တဲး ဂေ ဝီ ပွိုန် နဝ်း ဆိူဝ် နဝ်း မှာန် ပီ ဒွါ အန် ဒီ ဂေ။ ဂေ ယီ တူ လုဝ် တူတ့် မာဆေ။ 25 ဇဝ်ဖြာ ဟဲ့ တဲး ဇဝ် ယေဆူ ခမ် ဒီ ယမ် ကာဒါင် ဒူအီ၊ တဲး အန် တဲး ဂေ ဒူအီ အီ ညှိုမ် ဘိုင် အန် ဝီ ကာလဝ့် ဒီ ဇဝ်ဖြာ။ ဇဝ်ဖြာ ဘူင် ပါယ် တီ၊ တဲး န့ လိုဝ်း ဆီချာ၊ ပီ ဘူင် အန် ဟဲ့ မုး ဟဲ့ မှာန်။ ခုဝ်၊ အာတ့် နီ အန် ဇဝ် ညှမ် ဒမ် မှာပ် ပဲ့ ဟဲ့ ဘူင် အေ ဒူအီ ကူပ် ဟဲ့ ခမ် အန် ဒီ ယိူန် လှေန့်။ 26 ဇဝ်ဖြာ မိူဝ် ခမ် ဒီ ယိူန် လှေန့် ကူပ် ဆီ ဘျ အန် ဒီ အေ အီ ကွယ် ဒေါ တီ နီ လွင် မိုဝ်း အန် နဝ်း ဆိူဝ် နဝ်း မှာန်။ အန် ဆီ တဲး န့ လိုဝ်း ဆီချာ၊ အန် ဒီ ချွတ် ဒွန် အီ အီ ညှိုမ် ဘိုင် ဇဝ် ယေဆူ ဘော ဒွါ နဝ်း ဆိူဝ် နဝ်း မှာန် ဒီ ဂေ။

27 ဆေ န့ ပါယ် တီ၊ အာဝ် မိုဝ်း မာဆေ ပီ ဒီ ပွိုန် အေ ပီဖုင် အေ။ ခုဝ်၊ ဇဝ်ဖြာ တူ တဲး အေ မိုဝ်း နဝ်း ဆိူဝ် နဝ်း မှာန် ကူပ် ဟဲ့ ဘူင် ဒူပ် အေ ဒါရာ။ အန် ဟဲ့ ချွတ် အေ ကူပ် ညှိုမ် ဘိုင် အေ ဒီ ဇဝ် ယေဆူ။ 28 ပါယ် တီ၊ အေ မိူဝ် ဟဲ့ နပ် ဆီချာ၊ ဇဝ်ဖြာ မာတ် အေ ဘဲန် ဒူအီ နဝ်း ဆိူဝ် နဝ်း မှာန် ကူပ် ညှိုမ် ဘိုင် အေ ဇဝ် ယေဆူ။ အာဝ် မုး ကူပ် ဘူင် ဒူပ် အေ ဒါရာ။ 29 ခုဝ်၊ အာဝ် မုး၊ ဇဝ်ဖြာ ရွက့် မီ ဂေ ဒူအီ အာယူဒါ။ အန် ရွက့် ဘော ဂေ ဒူအီ အာမျုဝ် ဟဝ်။ 30 အီ မုး ဇဝ်ဖြာ၊ န့ မိုဝ်း မီ အူ ကာဒင်။ အန် ဒီ ဒွါ နဝ်း ဆိူဝ် နဝ်း မှာန် ဒီ ဂေ ဒူအီ အာယူဒါ အီ ခမ် ဒီ ဆွာ့ ဝဲန် ဟုန် လခါနာ၊ ကူပ် ညှိုမ် ဂေ ဇဝ် ယေဆူ။ ဘော ဂေ ဒူအီ အာမျုဝ် ဟဝ် အီ တူ ဆွာ့ ဝဲန် ဟုန် လခါနာ၊ ဘော ဂေ ဒီ ပွိုန် နဝ်း ဆိူဝ် နဝ်း မှာန် ပီ ဒွါ ဇဝ်ဖြာ ကူပ် ညှိုမ် ဂေ ပါယ် တီ။ 31 ဆေ န့ ပါယ် တီ၊ မင် အီ နပ် ဒီ တဝ်း၊ အေ ဝဲန် ဒါရာ ကူပ် ညှိုမ် အေ။ အာဝ် မုး ပါယ် တီ။ အေ ဝဲ ဘူင် ဒူပ် ဒါရာ ကူပ် ညှိုမ် အေ ပါယ် တီ။