ဆေ န့ ပါယ် တီ၊ အာဘြာဟမ် အီ မုး ဂုန့် ဒင် အေ ဒူအီ အာယူဒါ တွိုန်၊ မှဝ် အန် ပါယ် ဒီ ပွိုန် နဝ်း ဆိူဝ် နဝ်း မှာန် ပီ ဒွါ ဇဝ်ဖြာ။း 2 ဆေ အန် ပွိုန် နဝ်း ဆိူဝ် နဝ်း မှာန် ကူပ် ပီ ဘူင် အန်၊ အန် ဟဲ့ ပွိုန် ပီဖုင် ဒုဝ် ဘြိမ် အန်။ အန် ယီ တူ ပွိုန် ပီဖုင် အန် ဒီ အာတ့် ဇဝ်ဖြာ။ 3 ခဲင် ဘပ် ဇဝ်ဖြာ န့ ဟဲ့ ဒဲမ် အုန် တဝ်း၊ “ဒါ အာဘြာဟမ် ညှိုမ် ဘိုင် ဇဝ်ဖြာ။ ကူပ် ညှိုမ် အန် ပါယ် တီ၊ ဇဝ်ဖြာ မိူဝ် တဝ်း၊ အန် ဟဲ့ မိုဝ်း နဝ်း လုယ်။”

4 ဆေ န့ မုး ဒူအီ အီ ရန့် ဂါန်၊ အန် ဒီ ပွိုန် ရွိုန် ရုး ရန့် အန်။ ရွိုန် ပီ ပွိုန် အန် တီ၊ အာဝ် မုး၊ အီ ဒွါ ဘဲန် လက်ဆွင် ဒီ အန်။ န့ မုး ရုး ပီ လုဝ် ပွိုန် အန် ကူပ် ရန့် အန် ဂါန် တီ။

5 မာလဲ၊ အာဆေ တူ ဘိုင် အာဂျိုဝ် ပီ ဘူင် အန်၊ ဆေ အန် ညှိုမ် ဘိုင် မီ ဇဝ်ဖြာ အီ ပွိုန် ဂဝ်း ဝဲန် မှာပ် ပီ ဘူင် ဒူအီ ဟာယ် ဒူအီ မိူက်၊ ဇဝ်ဖြာ ဒီ ဒွါ နဝ်း ဆိူဝ် နဝ်း မှာန် ဒီ အန် ကူပ် ဟဲ့ ညှိုမ် အန်။ 6 ဘော ခုန်ဒီခမ် အာဒါဝိတ် တွိုန် ဟဲ့ ကာလာင် လွင် အန် တီ။ အန် ဟဲ့ ကာလာင် လွင် ဒူအီ အီ ဟဲ့ ပွိုန် နဝ်း ဆိူဝ် နဝ်း မှာန် ကူပ် ညှိုမ် ဘိုင် ဂေ ဒီ ဇဝ်ဖြာ၊ ဂေ မိုဝ်း နဝ်း ဒါခိုယ် ကာဆဝ်။ လွင် အန် တီ၊ န့ ဟဲ့ ဒဲမ် အုန် တဝ်း၊

7 “ဆေ ဇဝ်ဖြာ ဟဲ့ ဂဝ်း ဝဲန် မှာပ် ဒူအီ အူ ဝီ၊ အန် ဒီ မိုဝ်း နဝ်း ဒါခိုယ် ကူပ် ဟဲ့ ဟွတ့် ဟြာယ် မှာပ် အန် တီ။

8 ဆေ ဇဝ်ဖြာ တဝ်း လွင် ဒူအီ အူ ဝီ၊ အန် တူ မိုဝ်း မှာပ်၊ အန် ဒီ ဘျုဝ် ဒါခိုယ်။”

9 မာဆေ ပီ ထာင် ဘေ။း ဂေ အီ ဟဲ့ ဘျုဝ် ဒါခိုယ် ပီ ကာလာင် ခုန်ဒီခမ် တီ၊ န့ မုး မီ ဂေ ဒူအီ အီ ဟဲ့ ခမ် ဒီ ဆွာ့ ဝဲန် ဟုန် လခါနာ။း ဆေ အာဝ် ပါယ် တီ၊ န့ မုး ဘော ဂေ ဒူအီ အာမျုဝ် ဟဝ် အီ တူ မိုဝ်း ဒီ ဆွာ့။း ယေ ယီ ဟဲ့ ဟွတ့် တဝ်း၊ “ကူပ် ညှိုမ် ဘိုင် ဒါ အာဘြာဟမ် ဒီ ဇဝ်ဖြာ၊ ဇဝ်ဖြာ မိူဝ် တဝ်း၊ အန် ဟဲ့ မိုဝ်း နဝ်း လုယ်။” 10 ဒေါ မှဝ် ဇဝ်ဖြာ ဟဲ့ တဝ်း၊ အာဘြာဟမ် ဟဲ့ မိုဝ်း နဝ်း လုယ်။း န့ မုး ဝါယ် ဟဲ့ ဟွတ့် အန် ဆွာ့ ဝဲန် ဟုန် လခါနာ အန်။း ဆေ အာဝ် ပါယ် တီ၊ န့ မုး အာတ့် ညှမ် ဆွာ့ ဝဲန် အန်။း အာဝ် မုး ဝါယ် ဟဲ့ ဟွတ့် ဆွာ့ ဝဲန် အန် ဟုန် လခါနာ အန်။ ဆိန့် အာတ့် ညှမ် ဆွာ့ ဝဲန် အန် ဟုန် လခါနာ အန်၊ ဇဝ်ဖြာ ဟဲ့ တဝ်း၊ အန် ဟဲ့ မိုဝ်း နဝ်း လုယ်။ 11 လွင် ဝီ ခမ် အန် ဒီ ဆွာ့ ဝဲန် ဟုန် လခါနာ အန် တီ၊ န့ ဘဲန် လက်ဆာနာ ပီ ဒွါ ဇဝ်ဖြာ။ ခုဝ်၊ အန် ဟဲ့ ဟွတ့် ဒွါ နဝ်း လုယ် ဒီ အာဘြာဟမ် ကူပ် ညှိုမ် အန် ဇဝ်ဖြာ ဆိန့် အာတ့် ဆွာ့ ဝဲန် အန် ဟုန် လခါနာ အန် တီ။ ကူပ် န့ ပါယ် တီ၊ ဇဝ်ဖြာ ဟဲ့ တဲး အန် ဘဲန် ဂုန့် ဒင် ဂေ အီ ညှိုမ် ဒွန် အီ၊ အီ တူ မိုဝ်း ဒီ ဆွာ့ ဝဲန် ဟုန် လခါနာ ဂေ။ ဂေ မိူဝ် ဟဲ့ ပွိုန် နဝ်း ဆိူဝ် နဝ်း မှာန် ပီ ဒွါ ဇဝ်ဖြာ။ 12 ဒါ အာဘြာဟမ် တီ၊ အန် ဟဲ့ ဘဲန် ဘော ဂုန့် ဒင် ဂေ အီ ခမ် ဒီ ဆွာ့ ဝဲန် ဟုန် လခါနာ ဂေ။ န့ ယီ တူ မုး ကူပ် ဟဲ့ ခမ် ဂေ ဒီ ဆွာ့ ဝဲန် ဟုန် လခါနာ ဂေ။ န့ မုး ကူပ် ညှိုမ် ဂေ ဒီ ဇဝ်ဖြာ ပီ ဒါ အာဘြာဟမ် တွိုန် အီ ဟဲ့ ညှိုမ် ဆိန့် အာတ့် ဆွာ့ ဝဲန် အန် ဟုန် လခါနာ အန်။

13 ဇဝ်ဖြာ မိူဝ် ဟဲ့ ဒွါ ကာဒိက် ဆတ်ဇာ ဒီ ဒါ အာဘြာဟမ် ဘော ဒီ ဂေ ခြိုဝ် အန် တဝ်း၊ ဒဲင် ကာဒါယ် နီ ဒွန် နာ ဒွန် ပ့လုဝ့်၊ န့ ဒီ ဘဲန် ခါဂုန် ဂေ။ ဇဝ်ဖြာ တူ ဒွါ ကာဒိက် ဆတ်ဇာ တီ ကူပ် ဘူင် ဒူပ် ဒါ အာဘြာဟမ် ဒါရာ။ ဇဝ်ဖြာ ဒွါ ကာဒိက် ဆတ်ဇာ တီ ခုဝ်၊ ဇဝ်ဖြာ ဟဲ့ ဟွတ့် ဒွါ နဝ်း ဆိူဝ် နဝ်း မှာန် ဒီ အန် ကူပ် ဟဲ့ ညှိုမ် ဘိုင် အန် ဇဝ်ဖြာ။ 14 ဆေ ဇဝ်ဖြာ ဒွါ ခါဂုန် တီ ဒီ ဒူအီ ကူပ် ဘူင် ဒူပ် ဂေ ဒါရာ၊ ပီ ညှိုမ် အေ အာဝ် မိုဝ်း အာဂျိုဝ်။ ကာဒိက် ဆတ်ဇာ တီ မိူဝ်၊ အာဝ် မိုဝ်း ဒီခုဝ်။ 15 ခုဝ်၊ ဒါရာ တီ၊ န့ တဲး ဇဝ်ဖြာ ရူ ဒီ အေ ဒူအီ။ မာလဲ၊ ဆေ အာဝ် မိုဝ်း ဒါရာ၊ အာဝ် မိုဝ်း မှာပ်၊ အာဝ် မိုဝ်း ပီ ကာလိုပ် ပီ လုတ့် အေ။

16 ခုဝ်၊ ကာဒိက် ဆတ်ဇာ တီ၊ ဇဝ်ဖြာ ဟဲ့ ဒွါ ကူပ် ညှိုမ် အေ။ န့ ဘော မုး ပီ ဂေဇူ အန် ဇဝ် ဒီ အေ၊ တဲး အေ နပ် ဆီချာ၊ ဂေ လှုက်လှာန် ခြိုဝ် ဒါ အာဘြာဟမ် ဘောကာဂ့လျီတ် ဒီ ပွိုန် ပီ ဂေဇူ ဇဝ်ဖြာ တီ။ အေ မိူဝ် တူ လုဝ် တူတ့် မာဆေ။ ဇဝ်ဖြာ တူ ဒွါ ကာဒိက် ဆတ်ဇာ တီ မီ ဒီ ဂေ အီ ဘူင် ဒူပ် ဒါရာ။ အန် ဒွါ ဘော ဒီ ဂေ အီ ညှိုမ် ဇဝ်ဖြာ ပီ ဒါ အာဘြာဟမ် အီ ဟဲ့ ညှိုမ် တွိုန်။ အန် ဟဲ့ ဘဲန် ဂုန့် ဒင် အေ ဒွန် အီ အီ ညှိုမ် ပါယ် တီ။ 17 ဇဝ်ဖြာ ဟဲ့ ဒဲမ် အုန် ခဲင် ဘပ် အန် တဝ်း၊ “အုဝ် ဟဲ့ တဲး မဲ ဘဲန် ဂုန့် ဒင် အာမျုဝ် ဒူအီ ကိူန်။” ပါယ် တီ၊ ဇဝ်ဖြာ ဟဲ့ တဲး ဒါ အာဘြာဟမ် ဘဲန် ဂုန့် ဒင် အေ ကူပ် ညှိုမ် ဘိုင် အန် ဒီ ဇဝ်ဖြာ အီ နပ် ဒီ တဲး ဒူအီ ယမ် ဝီ ယိတ့် ဝီ အိမ်။ အန် ဇဝ် ဘော နပ် ဒီ ကာလာင် လွင် အီ ညှမ် မိုဝ်း၊ တဲး န့ ပီ ဟဲ့ ဟွတ့် မိုဝ်း။

18 အန် ဘော ညှိုမ် ဂြုဝ်း ဇဝ်ဖြာ ဒေါ တူ မိုဝ်း အန် ဒူင် နဝ်း တာင် ဒီ မာဆေ။ ခုဝ်၊ ဇဝ်ဖြာ ဘော တဲး အန် ဘဲန် ဂုန့် ဒင် ဂေ အာမျုဝ် ဒူအီ ကိူန်၊ တဲး န့ ပီ ပီ ဒွိုမ် ကာလာင် ဇဝ်ဖြာ ဒေါ တဝ်း အန်၊ “လှုက်လှာန် မဲ၊ ဂေ ဒီ ကိူန် ကာဆဝ်။” 19 ဒေါ ဝီ ကာဖာ အန် ပီ ပါယ် ဒုဝ် ဘြိမ် အန်၊ နဝ်း ညှိုမ် အန် ယီ တူ ဟြာယ် တူ ယူမ် ဒေါ မှဝ်။ အန် ဟဲ့ နပ်၊ ကူပ် ဟဲ့ နုဝ့် အာဆာက် အန် အူ မာယဝ်း ဆီနမ်၊ အန် ဟဲ့ နှဲန် ဒူအီ ယမ်။ ဘော အီဘိုန့် အန် အီ မုး နာင် ဆာရာယ် ဟဲ့ မှန်။ 20 အန် ပီ ဘော ဟဲ့ နပ် လွင် အန် တီ၊ အန် ယီ ညှိုမ် ဆေဆေ။ အန် တူ မိုဝ်း နဝ်း အီ ထာင်၊ ကာဒိက် ဆတ်ဇာ ဇဝ်ဖြာ န့ တူ မှာန်။ ခဲင် နဝ်း အန်၊ အန် ဘော ဝဲ ညှိုမ် ဆီချာ ဘော အိူပ် ဇဝ်ဖြာ။ 21 အန် ညှိုမ် အာခါခ်ု၊ ဇဝ်ဖြာ နပ် ဒီ ဘူင် ဒူပ် ပီ ကာဆဲန့် အန်။ 22 ခုဝ်၊ ဇဝ်ဖြာ မိူဝ် တဲး အန် မိုဝ်း နဝ်း ဆိူဝ် နဝ်း မှာန်။ 23 အီ ဒဲမ် တဝ်း၊ “ဇဝ်ဖြာ ဟဲ့ တဝ်း၊ အန် မိုဝ်း နဝ်း လုယ်” ဂြုဝ်း တီ၊ အာဝ် မုး ဇဝ်ဖြာ ကာလာင် မီ ဒီ ဒါ အာဘြာဟမ် အူ ဝီ။ ဇဝ်ဖြာ ဟဲ့ ကာလာင် ဘော ဒီ အေ။ 24 ဆေ အေ ညှိုမ်၊ ဇဝ်ဖြာ ဟဲ့ တဲး ဇဝ် ယေဆူ အီ မုး ဒါ ကာညာ အေ ဝီ ယိတ့် ဝီ အိမ် ဝါယ် ဟဲ့ ဟွတ့် ယမ် အန်၊ အန် ဇဝ် ဒီ တဝ်း၊ ဘော အေ ဟဲ့ မိုဝ်း နဝ်း ဆိူဝ် နဝ်း မှာန်။ 25 ဇဝ် ယေဆူ တီ၊ အန် ဟဲ့ ခမ် ဒီ ယမ် ကာဒါင် မှာပ် အေ။ အန် ဟဲ့ ဝီ ယိတ့် ဝီ အိမ်၊ တဲး အန် ဘူင် တဲး ဘော အေ မိုဝ်း နဝ်း ဆိူဝ် နဝ်း မှာန်။