ဇဝ်ဖြာ ဟဲ့ ဒွါ နဝ်း ဆိူဝ် နဝ်း မှာန် ဒီ အေ ကူပ် ညှိုမ် အေ ဇဝ် ယေဆူ။ ခုဝ်၊ အေ ဝီ ပွိုန် ဒီ လာယ် ကာလဝ့် ဒီ ဇဝ်ဖြာ။ 2 ကူပ် ညှိုမ် အေ ဇဝ် ယေဆူ၊ အေ မိူဝ် ပွိုန် ဒီ ဘိုင် ဆေဆေ ပီ ဂေဇူ ဇဝ်ဖြာ ပဲ့ ဟဲ့ ဒွါ အန် ဒီ အေ ဒေါ တီ နီ။ အေ မိူဝ် ခူယ် ဒါခိုယ် ဒီ နှဝ့် ဇဝ်ဖြာ ဒီ ဒွါ ဘော အာဖုင် ဒင်ခုဝ် အန် ဒီ အေ။ 3 ဒဲင် တီ၊ အေ မိူဝ် ခူယ် ဒါခိုယ် ကူပ် ဇမ် အေ ဒုက် ဘော ကာဒုး အာဖေ အာရေ။ ခုဝ်၊ အေ ဟဲ့ နပ်၊ ဒုက် တီ၊ န့ ဒီ မာနုဝ် အေ တဲး အေ ပဲ ဒီ အူတ်၊ ပဲ ဒီ ယိူန် နဝ်း အေ။ 4 ဆေ အေ ခမ် ဒီ အူတ် ဒီ ယိူန် နဝ်း၊ န့ တဲး အေ ပွိုန် ဒီ ဘူင် အီ လဝ့် နဝ်း ဇဝ်ဖြာ။ ဆေ အေ ဘူင် အီ လဝ့် နဝ်း ဇဝ်ဖြာ၊ န့ တဲး အေ ဘော နှဝ့် န့ဒဝ့် ပီ ကာဆဲန့် ဇဝ်ဖြာ ဒီ ဘူင်။ 5 ပီ နှဝ့် န့ဒဝ့် အေ တီ၊ န့ ဒိူန် တူ တဲး အေ ကာလုတ့် နဝ်း။ နဝ်း ဖွိုမ် ဇဝ်ဖြာ ပီ ဒွါ ဇဝ်ဖြာ ဒီ အေ၊ အန် ဟဲ့ တဲး အေ နပ် လွင် ဇဝ်ဖြာ ဟဲ့ ရွက့် ကာဆဝ် အေ။

6 ခုဝ်၊ ဒေါ ဆီ ဒီလှး န့စမ် အေ၊ ဇဝ် ယေဆူ မိူဝ် ဟဲ့ ခမ် ဒီ ယမ် ကာဒါင် မှာပ် အေ ဒူအီ မိူက်။ အန် ဟဲ့ ခမ် ဒီ ယမ် ဒေါ ဇမ် အာခြာဝ် ပီ ဘ့လေး အုန် ဇဝ်ဖြာ ဒီ အာတ့်။ 7 ဒူအီ အီ ခမ် ဒီ ယမ် ကာဒါင် ဒူအီ အီ မိုဝ်း နဝ်း ဆိူဝ် နဝ်း မှာန်၊ န့ နာန် ဒီ မိုဝ်း။ မာလဲ၊ ဆေ ဒူအီ ခမ် ဒီ ယမ် ကာဒါင် ဒူအီ အီ မွှိုမ်၊ ယုဝ် န့ ပီ ဘော မိုဝ်း။ 8 ဇဝ်ဖြာ ယီ ဘျ ခဲ့ ရွက့် အန် ဒီ အေ။ ဒေါ ဆီ ဘူင် အေ မှာပ်၊ အန် တဲး ဇဝ် ယေဆူ ခမ် ဒီ ယမ် ကာဒါင် အေ။

9 ကူပ် ဟဲ့ ခမ် ဇဝ် ယေဆူ ဒီ ယမ် ကာဒါင် အေ၊ န့ တဲး အေ ဝီ ဘဲန် ဒူအီ အီ မိုဝ်း နဝ်း ဆိူဝ် နဝ်း မှာန်။ ဒဲင် တီ၊ အန် ဒီ ချွတ် အေ တဲး အေ လွတ် ဘော နဝ်း ရူ ဇဝ်ဖြာ။ 10 အေ ပီ ဘော ဟဲ့ ဒွိုမ် ဘဲန် ရန်ဆူ ဇဝ်ဖြာ မိူဝ်၊ ဇဝ်ဖြာ ယီ ဝီ ခမ် ဒီ တဲး ဂွန် အန် ယမ် ကာဒါင် အေ၊ တဲး အေ ဝီ ပွိုန် ဒီ လာယ် ကာလဝ့် ဒီ အန်။ ဒေါ တီ နီ၊ အေ ဟဲ့ ဟွတ့် ဝီ လာယ် ကာလဝ့် ဒီ ဇဝ်ဖြာ၊ အန် ဇဝ် မိူဝ် ဒီ ဝီ ချွတ် အေ ကူပ် ဟဲ့ ဝီ ယိတ့် ဝီ အိမ် ဇဝ် ယေဆူ။ 11 အာဝ် ဝန် မီ ခဲ့ တီ။ ဒေါ တီ နီ အေ ဟဲ့ ဝီ ဘျုဝ် ဒါခိုယ် ဒီ ကွယ် ရိုမ် ဒူပ် ဇဝ်ဖြာ ကူပ် ဇဝ် ယေဆူ အီ ဟဲ့ ဘဲန် ဒါ ကာညာ အီ အိုပ် အေ၊ အန် မိူဝ် ဟဲ့ ဘူင် တဲး အေ ဝီ လာယ် ကာလဝ့် ဒီ ဇဝ်ဖြာ။

12 န့ ပါယ် နီ။ မှာပ် မိုဝ်း ဒဲင် ကာဒါယ် နီ၊ ကူပ် ပဲ့ ဟဲ့ ဘူင် ဒူအီ အူ ဝီ။ ဒူအီ ဝီ တီ ဟဲ့ ယမ် ကူပ် ဘူင် အန် မှာပ် တီ။ ဟဲ့ ဟွတ့် ဝါယ် တီ၊ ဒူအီ ဘောကာဂ့လျီတ် ဝီ ဘူင် မှာပ်။ ခုဝ်၊ ဂေ ဘောကာဂ့လျီတ် လုဝ် ယမ်။ 13 ဆိန့် အာတ့် နပ် ဒူအီ ဒါရာ ဇဝ်ဖြာ၊ မှာပ် ဟဲ့ ဟွတ့် မိုဝ်း ဒဲင် ကာဒါယ် နီ။ မာလဲ၊ ကူပ် ညှမ် ဒွါ အန် ဇဝ် ဒါရာ အန် ဒီ ဒူအီ၊ အန် ညှမ် မာတ် ဂေ မိုဝ်း မှာပ်။ 14 ပီ ဘော တဝ်း ပါယ် တီ မိူဝ်၊ ဆိန့် စုဝ် အာဒါမ် ကော ဇမ် စုဝ် အာမုဝ်ဆဲ၊ ဒွန် အီ ဟဲ့ ကာဒုး ဒီ ယမ်။ မှာပ် ဒူအီ မင် အီ၊ ပီ ဆ ပီ ပီ ကာလိုပ် အာဒါမ် အီ လှိုဝ် ဂြုဝ်း ဇဝ်ဖြာ မိူဝ်၊ န့ တဲး ဘော ဂေ လုဝ် ယမ်။ အာဒါမ် တီ၊ အန် ယီ ဘဲန် အူဖာမာ အီ ဘျ လွင် အန် ဇဝ် အီ ဒီ တး နာ ပန်။

15 မာလဲ၊ ပီ ဂေဇူ အန် ဇဝ်၊ န့ ယီ တူ ပီ မှာပ် ပီ ဘူင် အာဒါမ်။ မှာပ် ပဲ့ ဟဲ့ ဘူင် ဒူအီ အူ ဝီ၊ တဲး ဒူအီ ဘောကာဂ့လျီတ် လုဝ် ယမ်။ မာလဲ၊ ပီ ဂေဇူ ဒူအီ အူ ဝီ အီ မုး ဇဝ် ယေဆူ၊ န့ တဲး ဒူအီ ဘောကာဂ့လျီတ် ဝီ ပွိုန် ကိူန် ပီ ဂေဇူ ဇဝ်ဖြာ အီ ဘွတ် အီ မျာတ် ကာဆဝ်။ 16 ဒဲင် တီ၊ ပီ ဂေဇူ ဇဝ်ဖြာ အာဝ် ပီ မှာပ် ပဲ့ ဟဲ့ ဘူင် ဒူအီ ဝီ တီ။ အာဒါမ် ဟဲ့ ဘူင် မှာပ် အူ မျုဝ်။ ဟဲ့ ဟွတ့်၊ အန် လုဝ် ခမ် ဒီ စှိုမ် အာဆာက် အန်။ အီ မုး ပီ ဂေဇူ အန် ဇဝ်၊ အန် ယီ ဒွါ ဒီ ဒူအီ အီ ဟဲ့ ဘူင် မှာပ် ကိူန် ကာဆဝ်။ ပီ ဂေဇူ တီ၊ န့ တဲး ဇဝ်ဖြာ ဝီ မာတ် ဂေ ဒူအီ တီ မိုဝ်း နဝ်း ဆိူဝ် နဝ်း မှာန်။ 17 မှာပ် ပီ ဘူင် ဒူအီ အူ ဝီ၊ ဟဲ့ တဲး ဇဝ် မာရာန ပွိုန် ဒီ အိုပ် ဒဲင် ကာဒါယ်။ ပွုန် ဇဝ်ဖြာ ယီ ဆီ တာင် လွှိုမ် ဇဝ် မာရာန တီ။ ခုဝ်၊ ပဲ့ ဟဲ့ ဂေဇူ ဇဝ်ဖြာ ဒီ အီ၊ န့ ဟဲ့ ကိူန် ကာဆဝ်၊ ဟဲ့ တဲး ဂေ ပွိုန် ဒီ ဘဲန် ဒူအီ အီ မိုဝ်း နဝ်း ဆိူဝ် နဝ်း မှာန် ဘော ပွိုန် အာဆာက် ကာမာယ် ကူပ် ညှိုမ် ဂေ ဒီ ဇဝ် ယေဆူ အီ မုး ကာဒင် တွိုန်။

18 မှာပ် ပီ ဘူင် ကာလိုပ် ဒူအီ အူ ဝီ၊ ဟဲ့ တဲး ဒူအီ ဘောကာဂ့လျီတ် စှိုမ် အာဆာက် ဂေ။ ပါယ် တီ၊ ကူပ် ဟဲ့ ဝီ ဘူင် ဒူအီ အူ ဝီ နာ မုး နာ မှာန်၊ ဒူအီ ဘောကာဂ့လျီတ် ပီ ဝီ ပွိုန် ဒီ လွတ် လေး တ မှာပ် ဂေ၊ ပွိုန် ဘော အာဆာက် ကာမာယ်။ 19 န့ ဘော ပါယ် တီ။ ကူပ် တူ ထူမ် ဒူအီ အူ ဝီ ဂြုဝ်း ဇဝ်ဖြာ၊ န့ တဲး ဒူအီ ဘောကာဂ့လျီတ် ကာလိုပ်။ ကူပ် ဟဲ့ ဝီ ထူမ် ဒူအီ အူ ဝီ ဂြုဝ်း ဇဝ်ဖြာ၊ န့ ပီ ဝီ တဲး ဒူအီ ဘောကာဂ့လျီတ် ပွိုန် နဝ်း ဆိူဝ် နဝ်း မှာန်။

20 ဇဝ်ဖြာ ယီ ဟဲ့ ဒွါ ဒါရာ အန်၊ တဲး န့ လိုဝ်း ခဲ့ ကိူန် ကာဆဝ် ပဲ့ ဟဲ့ လုတ့် ဒူအီ။ မာလဲ၊ မှာပ် ပဲ့ ဟဲ့ လုတ့် ဒူအီ ပီ ဘော ဟဲ့ ကိူန် ခဲ့ မှဝ်၊ ပီ ဂေဇူ ဇဝ်ဖြာ န့ ယီ ဟဲ့ ဝဲ ကိူန် လွှိုမ် တီ။ 21 မှာပ် ဒီ အိုပ် ဒူအီ တဲး ဂေ ယမ်။ ပီ ဂေဇူ ဇဝ်ဖြာ အီ ဟဲ့ တဲး ဒူအီ မိုဝ်း နဝ်း ဆိူဝ် နဝ်း မှာန်၊ န့ ယီ တဲး ဂေ ပွိုန် ဒီ ကွယ် ရိုမ် ဒူပ် ဇဝ်ဖြာ ဆေဆေ ကူပ် ညှိုမ် ဂေ ဇဝ် ယေဆူ အီ မုး ဒါ ကာညာ အီ အိုပ် အေ။