ဆေ န့ ပါယ် တီ၊ အေ ဒီ ပါယ် မှဝ်။း အေ ဒီ ဝဲ ဘူင် ဟာဝ် မှာပ် ပေါ န့ ပွါ၊ တဲး ပီ ဂေဇူ ဇဝ်ဖြာ ဝဲ ကိူန်။း 2 အာဝ် မုး ပါယ် တီ။ အေ ဟဲ့ ပီ ဒူအီ အီ ဟဲ့ ဟွတ့် ယမ်။ မှာပ် အာဝ် ဟူ ပွိုန် ဒီ အိုပ် အေ။ ဆေ န့ ပါယ် တီ၊ မှဝ် အေ ဒီ ပါယ်၊ အေ ဒီ ဝီ ဘူင် မှာပ် ပီ ဘြိမ်။း အာဝ် မုး ပါယ် တီ။ 3 ဘေ တူ နပ်။း ဒေါ ဟဲ့ ခမ် အေ ဒီ စိုပ် ခဲင် အိုမ် ဒူပ် ဇဝ် ယေဆူ၊ န့ ပီ အေ ဟဲ့ ခမ် ဒီ ယမ် ရိုမ် ဒူပ် ဇဝ် ယေဆူ။ 4 ခုဝ်၊ ဒေါ ဟဲ့ စိုပ် အေ ခဲင် အိုမ် တီ၊ န့ ပီ အေ ဟဲ့ ယမ် ရိုမ် ဘော ကွယ် ရိုမ် ခဲင် ကာဒဝ် ဘာရေဝ် ဒူပ် ဇဝ် ယေဆူ။ အာဖုင် ဒင်ခုဝ် ဇဝ်ဖြာ အီ မုး ဂုန့် ဇဝ် ယေဆူ၊ န့ ဟဲ့ ဝီ တဲး ဇဝ် ယေဆူ ဝီ ယိတ့် ဝီ အိမ်။ ပါယ် တီ ဘော အေ ဟဲ့ ဝီ ယိတ့် ဝီ အိမ်၊ တဲး အေ ဝီ မိုဝ်း အာဆာက် ကာမာယ် ပီ ဇဝ် ယေဆူ။

5 ခုဝ်၊ ဆေ အေ ဟဲ့ ယမ် ပီ ဇဝ် ယေဆူ၊ အေ မိူဝ် ဟဲ့ ဝီ ယိတ့် ဝီ အိမ် ရိုမ် ဒူပ် အန်။ 6 အေ မိူဝ် ဟဲ့ နပ်၊ န့ ပီ ဒုဝ် ဘြိမ် အေ နီ ဟဲ့ ဒိုက် ဒီ ရွင့် ကာဝဲ့ ပီ ဇဝ် ယေဆူ၊ တဲး ဒုဝ် ဘြိမ် အေ အီ မိုဝ်း မှာပ် တီ လိုဝ် စှိုမ် တူတ့်၊ ကွဲ့ ဟူ တဲး မှာပ် ပွိုန် ဒီ အိုပ် အေ ပီ ဒါ ကာညာ အီ အိုပ် မှာယ် အန်။ 7 ခုဝ်၊ ဆေ ဒူအီ ဟဲ့ ဟွတ့် ယမ်၊ မှာပ် အာဝ် ဟူ ပွိုန် ဒီ အိုပ် အန်။

8 ဆေ အေ ဟဲ့ ဟွတ့် ယမ် ဒူပ် ဇဝ် ယေဆူ၊ အေ မိူဝ် ညှိုမ်၊ အေ ဒီ ဝီ ယိတ့် ဝီ အိမ်၊ ဝီ မိုဝ်း အာဆာက် ကာမာယ် ပီ အန် ဇဝ်။ 9 ခုဝ်၊ အေ ဟဲ့ နပ်၊ ကူပ် ဟဲ့ ဟွတ့် ဝီ ယိတ့် ဝီ အိမ် ဇဝ် ယေဆူ၊ ဟဲ့ ဝီ မိုဝ်း အာဆာက် ကာမာယ်၊ အန် အာဝ် ဟူ လုဝ် ယမ် ဒေါ မှဝ်။ ဇဝ် မာရာန မိူဝ်၊ အာဝ် ဟူ မိုဝ်း ပွုန် ဒီ အိုပ် အန်။ 10 ဒေါ ခမ် ဇဝ် ယေဆူ ဒီ ယမ်၊ မှာပ် အာဝ် ဟူ ပွိုန် ဒီ အိုပ် အန် ဒေါ မှဝ်။ အန် မိူဝ် အာဝ် ဟူ လုဝ် ယမ် ဘဲန် ဇေန့် ဘဲန် ဇေန့်။ အာဆာက် ပီ ဝီ မိုဝ်း အန် ဒေါ တီ နီ၊ န့ မုး အာဆာက် ကာမာယ်၊ အာဆာက် အီ ကွယ် ရိုမ် ဒူပ် ဇဝ်ဖြာ ဆေဆေ။

11 ဘေ မိူဝ် လုဝ် မာတ် ဒုဝ် ဘေ ပါယ် တီ။ ဒုဝ် ဘြိမ် ဘေ ဟဲ့ ခမ် ဒီ ယမ်၊ ကွဲ့ ဟူ တဲး မှာပ် ပွိုန် ဒီ အိုပ် ဘေ။ ဟဲ့ ဟွတ့် ကူပ် ညှိုမ် ဘေ ဇဝ် ယေဆူ၊ ဘေ ဝီ မိုဝ်း အာဆာက် ကာမာယ် အီ နပ် ဒီ ဘူင် ပီ အိုင် ဇဝ်ဖြာ။ 12 ခုဝ်၊ ကွဲ့ တဲး မှာပ် ပွိုန် ဒီ ဝီ အိုပ် ဒုဝ် ဘူင့် ဘေ။ ကွဲ့ ဝီ ဒူပ် နဝ်း ကာဝါတ့် အီ ဆီ ကာဆုး ဘေ ဘူင် နာ ဟာယ် နာ မိူက်။ 13 ကွဲ့ တဲး ပ့လဝ် ဘေ ဂေ ဒဲ ဘေ ဘော ဒွန် မျုဝ် အီ ကွယ် ဒီ ဒုဝ် ဘူင့် ဘေ ပွိုန် ဒီ ဘူင် နာ ဟာယ် နာ မိူက်။ ကွဲ့ တဲး ဒုဝ် ဘေ ဘဲန် ပီ ဆုတ့် ပီ စ်ု မှာပ်။ တဲး ဘေ ယီ အာပ် ဒုဝ် ဘူင့် ဘေ ဒီ ဇဝ်ဖြာ၊ တဲး န့ ဘဲန် ပီ ဆုတ့် ပီ စ်ု နာ ဆိူဝ် နာ မှာန်။ ခုဝ်၊ ဘေ ဟဲ့ ပီ ဒူအီ အီ ဟဲ့ ဟွတ့် ယမ်၊ ဟဲ့ ဝီ ပွိုန် အာဆာက် ကာမာယ်။ 14 မှာပ် အာဝ် ဟူ ပွိုန် ဒီ အိုပ် ဘေ။ ခုဝ်၊ ဘေ အာဝ် ဟူ လုဝ် ဒူပ် ဒါရာ။ ဘေ ဟဲ့ ပွိုန် ပီ ဂေဇူ ဇဝ်ဖြာ။

15 ဆေ န့ ပါယ် တီ၊ မာဆေ ပီ ဒီ လုဝ် ဘူင် အေ။း န့ မှာန်၊ ဆေ အေ တဝ်း၊ “တဲး အေ ဘူင် မှာပ် ကူပ် ဟဲ့ ပွိုန် အေ ဒီ ဘိုင် ပီ ဂေဇူ ဇဝ်ဖြာ၊ အာဝ် ဟူ လုဝ် ဒူပ် ဒါရာ။း” အာဝ် မုး ပါယ် တီ။ 16 အုဝ် ဆီ တဲး ဘေ နပ် ဆီချာ၊ ဆေ အေ အာပ် ဒုဝ် အေ ဒီ အာဆေ ဘော တဝ်း ဒီ ထူမ် ဂြုဝ်း အန်၊ အေ မိူဝ် ဒီ ဘဲန် မှာယ် ဝီ တီ။ ဆေ အေ တဲး မှာပ် အိုပ် အေ၊ န့ ဒီ တဲး အေ ယမ်။ ဆေ အေ ယီ ထူမ် ဂြုဝ်း ဇဝ်ဖြာ ပီ မှာယ် အီ ထူမ် ဂြုဝ်း ဒါ ကာညာ အန်၊ ဇဝ်ဖြာ ဒီ ဒွါ နဝ်း ဆိူဝ် နဝ်း မှာန် ဒီ အေ။ 17 အုဝ် ယီ ဒါင် ဂုင် ဂေဇူ ဒီ ဇဝ်ဖြာ။ ဘေ ပီ ဘော ဟဲ့ ဒွိုမ် တဲး မှာပ် အိုပ် ဘေ မိူဝ်၊ ဘေ ဟဲ့ ဝီ အွန် ဒီ ထူမ်၊ အွန် ဒီ ဒူပ် ဂြုဝ်း ဇဝ်ဖြာ ပဲ့ ဟဲ့ မာနုဝ် အီ ဒီ ဘေ၊ တဲး န့ လိုပ် ခဲင် နဝ်း ဘေ။ 18 ဘေ ဟဲ့ ဟွတ့် လွတ် တ မှာပ်၊ ဟဲ့ ဝီ ဘဲန် မှာယ် နာ ဆိူဝ် နာ မှာန်။

19 အုဝ် ဘော လုဝ် ကာလာင် လွင် အန် တီ၊ တဲး န့ ဒူပ် ပီ ပါယ် ဒူအီ ဒီ ဇေန့်ဇာ၊ တဲး န့ ငှိုယ် ထူမ် ဒီ ဘေ။ ခုဝ်၊ လွင် ဇဝ်ဖြာ အာဝ် ငှိုယ် ကာလှုး ဒီ ဒူအီ။ ဘေ ဟဲ့ ဒွိုမ် တဲး ဒုဝ် ဘူင့် ဘေ ဘော ဒုဝ် ဘဲန် ပီ မှာယ် အီ ဘူင် ပီ စ်ု ဒါ ကာညာ အန် အီ မွှိုမ် ကာအိး၊ မွှိုမ် ကာဒါတ့်။ ဘေ ဟဲ့ ဘူင် အီ ဟာယ် အီ မိူက် တဲး န့ ကြဲ ဒီ ကိူန် ကာဆဝ်။ ဒေါ တီ နီ၊ တဲး ဘေ ဝီ အာပ် ဒုဝ် ဘူင့် ဘေ တီ၊ တဲး ဘေ ဝီ ဘဲန် မှာယ် နာ ဆိူဝ် နာ မှာန်၊ ဝီ ဘဲန် ဒူအီ အီ ဆီငါ ဘွတ်။ 20 ဒေါ ဘူင် ဘေ ပီ စ်ု မှာပ်၊ နာ ဆိူဝ် နာ မှာန် တူ ပွိုန် ဒီ ဆုတ့် ဒီ စ်ု ဘေ။ 21 ပဲ့ ဟဲ့ ဒွိုမ် ဘူင် ဘေ တီ၊ ဟဲ့ တဲး ဘေ ဆာယ် အီ ဒေါ တီ နီ။ အာဂျိုဝ် ပီ ဘူင် ဘေ တီ၊ န့ မိူဝ် တူ စွယ် မာဆေ။ န့ တဲး ဘေ ယမ်။ 22 မာလဲ၊ ဒေါ တီ နီ ဘေ ဟဲ့ ဟွတ့် လွတ် တ မှာပ်။ ဘေ ဟဲ့ ဝီ ဘဲန် မှာယ် ဇဝ်ဖြာ။ အာဂျိုဝ် အန် တီ ယီ တဲး ဘေ ဘဲန် ဒူအီ အီ ဆီငါ ဘွတ်။ ဟဲ့ ဟွတ့်၊ ဘေ မိူဝ် ဒီ ပွိုန် ဒီ ကွယ် ရိုမ် ဒူပ် ဇဝ်ဖြာ ဆေဆေ။ 23 ခုဝ်၊ ဆေ အေ ဘူင် မှာပ်၊ ရုး အန် န့ တဲး အေ ယမ်။ မာလဲ၊ ပီ ဂေဇူ ဇဝ်ဖြာ ဘော ပီ ဒွါ ဇဝ်ဖြာ ဒီ အေ၊ အေ ပီ ဆ လုဝ် တူတ့် မာဆေ မိူဝ်၊ န့ တဲး အေ ကွယ် ရိုမ် ဒူပ် ဇဝ် ယေဆူ ဆေဆေ။