အိုယ် ဘေ ဘီနွင် အုဝ်၊ ကူပ် ဟဲ့ နပ် ဘေ ဒါရာ ဇဝ်ဖြာ၊ ဘေ ဒီ ဘော နပ် ဘော ဂြုဝ်း ပီ ဒီ ကာလာင် အုဝ် နီ။ တဲး န့ ကာလှုး ဆီချာ ဒီ နဝ်း ဘေ။ အေ ဒူအီ ပွိုန် ဒီ ဒူပ် ဒါရာ မီ ဒေါ အိမ် အေ နီ။ 2 အူဖာမာ အန်၊ အီဘိုန့် အီ ဟဲ့ ဟွတ့် ခတ်၊ စုဝ် အာဆာက် အန်၊ အန် လုဝ် ကွယ် ရိုမ် ဒူပ် အီမာယ် အန် တီ ဘော စုဝ် အန်။ အာဝ် ပွိုန် ကာဂဝ်း ဒီ အီမာယ် အန်။ ဆေ အီမာယ် အန် ဟဲ့ ဟွတ့် ယမ်၊ အန် မိူဝ် ဟဲ့ ပွုန် ပီ အိုပ် အီမာယ် အန် ဒီ အန်၊ အန် ဟဲ့ ပွိုန် ကွယ် ထင်ဟာင်။ 3 ပါယ် တီ၊ ဆေ အီမာယ် အန် ဆီ အိမ်၊ ဆေ အန် ယီ ဝိန် ဒီ တဲး အီမာယ် အီ ဟဝ် လာယ် အန်၊ အေ ဒီ တဝ်း၊ အန် ဟဲ့ လုတ့် ရဝ်။ ဆေ အီမာယ် အန် ဟဲ့ ဟွတ့် ယမ်၊ အန် ယီ ကွယ် ထင်ဟာင်၊ အာဝ် ဟူ မိုဝ်း အီမာယ် အီ အိုပ် အန်။ ဆေ အန် ပီ ဘော ဝီ လာယ် အီမာယ် ပေါ အူ ဝီ မိူဝ်၊ အေ အာဝ် ဟူ တဝ်း၊ အန် လုတ့် ရဝ်။

4 အိုယ် ဘေ ဘီနွင် အုဝ်၊ ဘော ဘေ ဟဲ့ ဒွိုမ် ပီ ဒူအီ အီ ဟဲ့ ခတ်။ ဘေ လုဝ် ဘူင် ပီ စ်ု ဒါရာ ဘေ ဘူင်။ ဒေါ ဝီ ညှိုမ် ဘေ ဇဝ် ယေဆူ ခမ် ဒီ ယမ် ကာဒါင် ဘေ၊ န့ ပီ ဘော ဘေ ဟဲ့ ဟွတ့် ယမ်။ ခုဝ်၊ ဘေ အာဝ် ဟူ လုဝ် ဒူပ် ပီ စ်ု ဒါရာ။ န့ ပီ ဘေ ဟဲ့ ဝီ ခတ် ဒိုဝ်း အီမာယ် ပေါ အူ ဝီ အီ မုး ဇဝ် ယေဆူ အီ ဟဲ့ ဝီ ယိတ့် ဝီ အိမ် ဝါယ် ဟဲ့ ဟွတ့် ယမ် အန်။ အန် ဟဲ့ တဲး အေ ဝီ ပွိုန် ဒီ ဘူင် ဂါန် ဇဝ်ဖြာ၊ တဲး န့ ဘဲန် အာဂျိုဝ် ဒီ အန်။ 5 ဒေါ ဘူင် ဒူပ် အေ ပီ အိုင် ဒုဝ် ဘြိမ် အေ၊ အေ ပီ ဒူအီ အီ တူ နပ် ဇဝ်ဖြာ။ ဒေါ အန် တီ န့ မုး ဒါရာ ဇဝ်ဖြာ အီ တဲး နဝ်း ကာဝါတ့် အေ ဝဲ ကိူန်။ ဒါရာ တီ၊ အန် ဘော ကာဆုး ဒုဝ် ဘူင့် အေ ဘော ယဲတ့် တဲး အေ ဘူင် မျုဝ် အီ ဒီ တဲး အေ ယမ်။ 6 မာလဲ၊ ဒေါ တီ နီ အေ ဟဲ့ ဟွတ့် လွတ် တ ဒါရာ တီ။ ကူပ် ဟဲ့ ဟွတ့် ယမ် အေ၊ အေ အာဝ် ဟူ လုဝ် ဒူပ် ဒါရာ ပဲ့ ဟဲ့ ဒဲမ် အုန် ခဲင် ဘပ် ဇဝ်ဖြာ။ အေ ပွိုန် ဒီ ဘူင် ပီ အိုင် ဇဝ်ဖြာ၊ ပီ မာနုဝ် နဝ်း ဖွိုမ် ဇဝ်ဖြာ ဒီ အေ။ န့ ပီ န့တေန့် ကာမာယ် အီ ဒူပ် နဝ်း ဖွိုမ် ဇဝ်ဖြာ။ အာဝ် မုး န့တေန့် ဘြိမ် အီ ဒူပ် ဒါရာ ပဲ့ ဟဲ့ ဒဲမ် အုန် ခဲင် ဘပ်။

7 ဆေ န့ ပါယ် တီ၊ ဟဲ့ ပွိုန် တဝ်း၊ ဒါရာ တဲး အေ ဘူင် မှာပ်။း အာဝ် ပွိုန် တဝ်း။ ကူပ် မိုဝ်း ဒါရာ တီ၊ အေ ကော နပ်၊ အေ မိုဝ်း မှာပ်။ ဆေ ဒါရာ တူ ခြဲ တဝ်း၊ “ကွဲ့ တဲး ဘေ မိုဝ်း နဝ်း လောဖ၊” အုဝ် မိူဝ် တူ နပ် လွင် နဝ်း လောဖ တီ၊ န့ ပါယ် မှဝ်။ 8 ကူပ် ဟဲ့ ခြဲ ဒါရာ တီ၊ အီ တူ မွှိုမ် အီ ကွယ် ခဲင် နဝ်း အုဝ်၊ တဲး အုဝ် ဇေန့်ဇာ လွင် အန် တီ၊ တဲး န့ ဘဲန် နဝ်း ဆီ ပွိုန် ဘဲန် မျုဝ် ဘဲန် မျုဝ်။ ခုဝ်၊ ဆေ အာဝ် မိုဝ်း ဒါရာ၊ န့ ပီ၊ ဘော မှာပ် အာဝ် မိုဝ်း။ 9 ဒေါ မွိုန် အုဝ် ဟဲ့ ကွယ်၊ တူ နပ် ဒါရာ။ မာလဲ၊ ဒေါ ဝီ နပ် အုဝ် ဂြုဝ်း ဒါရာ တီ၊ မှာပ် ဟဲ့ ကာပ့လုး၊ ဘူင် တဲး အုဝ် ယမ်။ 10 ဇဝ်ဖြာ ဟဲ့ ဘ့လေး အုန် ဒါရာ တီ၊ တဲး န့ စွယ် အေ၊ တဲး အေ ကွယ် ဒါခိုယ်။ မာလဲ၊ န့ ဟဲ့ ဝီ ဘူင် တဲး အေ ယမ်။ 11 ခုဝ်၊ ကူပ် နပ် အုဝ် ဒါရာ တီ၊ အီ တူ မွှိုမ် အီ ကွယ် ခဲင် နဝ်း အုဝ် ဟဲ့ ပီလွှက့် ဒီ အုဝ်၊ တဲး အုဝ် ဘူင် မှာပ်။ ဟဲ့ ဟွတ့် ဘော ဝီ တဝ်း၊ ကူပ် ဟဲ့ လုတ့် အုဝ် ဒါရာ တီ၊ အုဝ် လုဝ် ယမ်။ 12 ခုဝ် အန် တီ အာဝ် ပွိုန် တဝ်း၊ ဒါရာ တူ မွှိုမ်။ ဂြုဝ်း ဒါရာ ဇဝ်ဖြာ ဒွန် ဒဲ ဟဲ့ ဆီငါ ဘွတ်၊ ဟဲ့ မွှိုမ်၊ ဟဲ့ မုး ဟဲ့ မှာန်။

13 ခုဝ် အန် တီ အာဝ် ပွိုန် တဝ်း အီ ဘွတ် အီ မွှိုမ် တီ ဟဲ့ ဘူင် တဲး အုဝ် ယမ်။ ဒါရာ အီ ဘွတ် အီ မွှိုမ် တီ တဲး န့ လိုဝ်း ဆီချာ လွင် မှာပ် ဟဲ့ မွှိုမ် ကာအိး ခဲ့ မှဝ်။

14 အေ ယီ ဟဲ့ နပ်၊ ဒါရာ ဇဝ်ဖြာ ဒူပ် နဝ်း ဖွိုမ် ဇဝ်ဖြာ။ န့ ယီ မုး အုဝ်၊ အုဝ် မိုဝ်း ဒုဝ် ဘူင့် အီ တူ ဆီ ဒူပ် နဝ်း ဖွိုမ် ဇဝ်ဖြာ။ န့ ပီ၊ အုဝ် ဟဲ့ ယွင့် ဒုဝ် ဘူင့် အုဝ်၊ တဲး န့ ဘဲန် မှာယ် အီ။ အုဝ် ဟဲ့ တဲး မှာပ် အိုပ် အုဝ်။ 15 ခုဝ်၊ ပီ ဘူင် အုဝ် တီ၊ အုဝ် တူ နပ် နာ လှုး။ ပီ ကာပြာ အုဝ် ဒီ ဘူင်၊ အုဝ် တူ ပွိုန် ဒီ ဘူင်။ အုဝ် ဝီ ဘူင် မီ ပီ ဇွင့် အုဝ်။ 16 ကူပ် ဟဲ့ ဝီ ဘူင် အုဝ် ပီ တူ ဆီ ဘူင် အုဝ် တီ၊ န့ ဘော ဘျ ဒီ အုဝ် လွင် ဒါရာ၊ န့ ဟဲ့ ဘွတ် ဟဲ့ မွှိုမ်။ 17 ခုဝ် အန် တီ အာဝ် မုး အုဝ် အီ ဘူင် နာ တူ မွှိုမ်။ န့ မုး မှာပ် အီ ကွယ် ခဲင် ဒုဝ် ဘူင့် အုဝ် အီ ဘူင် ဇိုဝ် တီ။ 18 အုဝ် ဟဲ့ နပ် ခဲင် ဒုဝ် ဘြိမ် အုဝ် နီ၊ အာဝ် မိုဝ်း အီ ဘွတ် အီ မွှိုမ် ခေါ အူ မျုဝ်။ အုဝ် ပီ ဘော ဆီ ဘူင် နာ ဘွတ် နာ မွှိုမ်၊ အုဝ် ယီ တူ ပွိုန် ဒီ ဘူင်။ 19 ခုဝ်၊ ပီ ဘူင် အုဝ် အာဝ် မုး နာ ဘွတ် နာ မွှိုမ် ပီ ဆီ ဘူင် အုဝ်၊ န့ ယီ မုး နာ ဟာယ် နာ မိူက် ပီ တူ ဆီ ဘူင် အုဝ်၊ ယီ ဝီ ဘူင် ပါယ် တီ ဆေဆေ။ 20 ဆေ အုဝ် ဘူင် မျုဝ် ပီ တူ ဆီ ဘူင် အုဝ်၊ အာဝ် မုး ဒုဝ် ဘြိမ် အုဝ် အီ ဘူင်။ န့ မုး မှာပ် အီ ကွယ် ခဲင် ဒုဝ် ဘူင့် အုဝ် အီ ဘူင်။

21 ပါယ် တီ၊ န့ မိုဝ်း ပွုန် အူ မျုဝ် အီ အိုပ် နဝ်း အုဝ်။ ဆေ အုဝ် ဟီ တဝ်း ဒီ ဘူင် နာ ဘွတ် နာ မွှိုမ်၊ နာ ဟာယ် နာ မိူက် မိူဝ် ဟဲ့ ဝီ တး ချြီ့ အုဝ် အူ ဇေန့်။ 22 ခဲင် နဝ်း အုဝ် ခါခ်ု၊ အုဝ် ဟဲ့ ဘျုဝ် ဒါခိုယ် ဒီ ဒူပ် ဒါရာ ဇဝ်ဖြာ။ 23 မာလဲ၊ န့ မိုဝ်း ပွုန် ပေါ အူ မျုဝ် ခဲင် ဒုဝ် ဘူင့် အုဝ်။ န့ တူ မုး ပွုန် ပီ ဆီ ဒူပ် အာငျာန် အုဝ်။ ပွုန် တီ ဘော ကာဂုဝ်း ဒီ အာငျာန် အုဝ်၊ ဘူင် တဲး အုဝ် ခမ် ဒုက်၊ တဲး မှာပ် ဝီ အိုပ် ဒုဝ် ဘူင့် အုဝ်။ 24 အုဝ် နီ၊ အုဝ် ဟဲ့ ခမ် ဒုက် တာင် ခဲင် နဝ်း။ အာဆေ ဒီ ပွိုန် ဒီ ချွတ် အုဝ်၊ ကွဲ့ တဲး ဒုဝ် ဘြိမ် အုဝ် အိုပ် အုဝ်၊ ကွဲ့ တဲး အုဝ် လုဝ် ယမ်။း 25 အုဝ် ဒါင် ဂုင် ဂေဇူ ဒီ ဇဝ်ဖြာ ကူပ် ဟဲ့ တဲး အန် ဇဝ် ယေဆူ ချွတ် အုဝ်။ ခုဝ်၊ ဒေါ တီ နီ၊ အာငျာန် အုဝ် တဲး ဒါရာ ဇဝ်ဖြာ အိုပ် အုဝ်။ အီ မုး နဝ်း ဘြိမ် အုဝ်၊ န့ တဲး မှာပ် အိုပ် အန်။