ခုဝ် အန် တီ အာဝ် မိုဝ်း အာဆေ အီ ပွိုန် ဒီ ဒမ် မှာပ် ဒီ ဂေ ဒူအီ အီ ညှိုမ် ဘိုင် ဇဝ် ယေဆူ။ 2 ခုဝ်၊ နဝ်း ဖွိုမ် ဇဝ်ဖြာ ဟဲ့ မိုဝ်း ပွုန် ဒီ တဲး အာဆာက် ဒီ အီ။ ကူပ် ညှိုမ် ဘိုင် ဘေ ဇဝ် ယေဆူ၊ ပွုန် တီ ဟဲ့ တဲး ဘေ လွတ် ဒီ ပွုန် ပေါ အူ မျုဝ် အီ ဟဲ့ အိုပ် ဘေ၊ အီ တဲး ဘေ ဘူင် မှာပ် ဆေဆေ၊ အီ တဲး ဘေ ယမ်။ 3 ပါယ် တီ၊ ဒါရာ ပီ ဒွါ ဇဝ်ဖြာ ဒီ အာမုဝ်ဆဲ တွိုန်၊ န့ တူ ပဲ ဒီ ချွတ် အေ။ ခုဝ်၊ မှာပ် ဟဲ့ မိုဝ်း ပွုန် ခဲင် နဝ်း အေ။ ဇဝ်ဖြာ ယီ ဟဲ့ ဘူင်၊ တဲး ဂွန် အန် တး လူင် ဒဲင် ကာဒါယ်၊ တဲး အန် ဘဲန် ပီ ဒူအီ အီ မိုဝ်း မှာပ်၊ တဲး အန် ပွိုန် ဒီ ဂဝ်း ဝဲန် မှာပ် တီ။ အန် တဲး ဂွန် အန် ခမ် မှာပ် ပီ လုဝ် ခမ် အေ။ 4 ဇဝ်ဖြာ ဟဲ့ ဘူင် ပါယ် တီ၊ တဲး န့ ဇေ့ဇုင် ဒွန် မျုဝ် ခဲ့ ပီ ဒမ် ဒါရာ။ ဟဲ့ ဟွတ့်၊ အေ ပွိုန် ဒီ ဘူင် ဒူပ် ပီ အိုင် နဝ်း ဖွိုမ် ဇဝ်ဖြာ၊ အာဝ် ဟူ လုဝ် ဘူင် ဒူပ် ပီ အိုင် နဝ်း ဘြိမ် အေ။

5 ဂေ အီ ဒူပ် နဝ်း ဘြိမ်၊ ဂေ မိူဝ် နပ် ဒီ ဇေန့်ဇာ မီ လွင် ပီ အိုင် နဝ်း ဘြိမ် တီ။ ဂေ အီ ဘူင် ဒူပ် နဝ်း ဖွိုမ် ဇဝ်ဖြာ၊ ဂေ နပ် ဒီ ဇေန့်ဇာ လွင် ပီ အိုင် နဝ်း ဖွိုမ် ဇဝ်ဖြာ။ 6 ဆေ ဒူအီ ဇေန့်ဇာ မီ လွင် ပီ အိုင် နဝ်း ဘြိမ် ဂေ၊ န့ ဒီ တဲး ဂေ ယမ်။ ဆေ ဒူအီ ဇေန့်ဇာ လွင် ပီ အိုင် နဝ်း ဖွိုမ် ဇဝ်ဖြာ၊ န့ ဒီ တဲး ဂေ ပွိုန် အာဆာက်၊ ပွိုန် ဘော နဝ်း ဂတ် ဂျီတ်။ 7 ဂေ အီ ဇေန့်ဇာ မီ လွင် ပီ အိုင် နဝ်း ဘြိမ် ဂေ၊ ဂေ ဒီ ဘဲန် ရန်ဆူ ဇဝ်ဖြာ ကူပ် တူ ဆီ ဘူင် ဒူပ် ဂေ ဒါရာ ဇဝ်ဖြာ။ ဂေ ပီ ဘော ဝီ ဆီ ဘူင် ဒူပ် မိူဝ်၊ ဂေ တူ ပွိုန် ဒူပ်။ 8 ခုဝ်၊ ဂေ ဒူအီ အီ တဲး နဝ်း ဘြိမ် တီ အိုပ် ဂေ၊ ဂေ တူ နပ် ဒီ ဘူင် ပီ အိုင် ဇဝ်ဖြာ။

9 ဆေ နဝ်း ဖွိုမ် ဇဝ်ဖြာ ဟဲ့ ကွယ် ခဲင် နဝ်း ဘေ၊ ဘေ ဒိူန် တူ မိုဝ်း နဝ်း ဆီ ဘူင် ဒူပ် ပီ အိုင် နဝ်း ဘြိမ် ဘေ။ ဘေ ဆီ ဘူင် ဒူပ် မီ ပီ အိုင် နဝ်း ဖွိုမ် ဇဝ်ဖြာ။ ဒူအီ ဒွန် အီ အီ တူ မိုဝ်း နဝ်း ဖွိုမ် ဇဝ် ယေဆူ၊ ဂေ မိူဝ် တူ မုး ဒူအီ ပီ အိုပ် အန်။ 10 ဆေ ဇဝ် ယေဆူ ဟဲ့ ဟွတ့် ကွယ် ခဲင် နဝ်း ဘေ၊ ဒုဝ် ဘြိမ် ဘေ ပီ ဘော ယမ် ကူပ် မှာပ် ပဲ့ ဟဲ့ ဘူင် ဘေ မိူဝ်၊ နဝ်း ဖွိုမ် ဘေ ယီ တူ ယမ် ဒေါ မှဝ်။ ခုဝ်၊ ဇဝ်ဖြာ ဟဲ့ ဝီ ဒွါ နဝ်း ဆိူဝ် နဝ်း မှာန် ဒီ ဘေ။ 11 ဆေ နဝ်း ဖွိုမ် ဇဝ်ဖြာ အီ ဟဲ့ တဲး ဇဝ် ယေဆူ ဝီ ယိတ့် ဝီ အိမ် တွိုန် ဟဲ့ ကွယ် ခဲင် နဝ်း ဘေ၊ ဇဝ်ဖြာ အီ ဟဲ့ တဲး ဇဝ် ယေဆူ ဝီ ယိတ့် ဝီ အိမ် တီ၊ အန် ဒီ တဲး ဘော ဒုဝ် ဘူင့် ဘေ အီ နပ် ဒီ လိုဝ် တီ ဝီ မိုဝ်း အာဆာက် အိမ် ကူပ် ဟဲ့ ကွယ် နဝ်း ဖွိုမ် ဇဝ်ဖြာ ခဲင် နဝ်း ဘေ။

12 အိုယ် ဘေ ဘီနွင်၊ အေ အာဝ် ဟူ လုဝ် ဇေန့်ဇာ ပီ အိုင် နဝ်း ဘြိမ် အေ တီ။ အေ အာဝ် ဟူ လုဝ် ဘူင် ဒူပ် ပီ အိုင် ဒုဝ် ဘြိမ် တီ။ 13 ခုဝ်၊ ဆေ ဘေ ဘူင် ပီ အိုင် နဝ်း ဘြိမ် ဘေ တီ၊ ဘေ ဒီ ယမ်။ မာလဲ၊ ဆေ ဘေ ယီ ဘိုင် နဝ်း ဖွိုမ် ဇဝ်ဖြာ၊ တဲး အန် ဝဲန် အီ တူ မွှိုမ် ဒွန် မျုဝ် ပီ ဘူင် နဝ်း ဘြိမ် ဘေ တီ၊ ဘေ ဒီ ဝီ ပွိုန် အာဆာက် ကာမာယ်။ 14 ဂေ အီ ဟဲ့ ခမ် ဒီ တဲး နဝ်း ဖွိုမ် ဇဝ်ဖြာ ယဲတ့် ဂေ၊ ဂေ ဟဲ့ ဘဲန် ဂွန် ဇဝ်ဖြာ။ 15 ခုဝ်၊ နဝ်း ဖွိုမ် ဇဝ်ဖြာ အီ ကွယ် ခဲင် နဝ်း ဘေ တူ တဲး ဘေ ဝီ မိုဝ်း နဝ်း ယုဝ်။ အန် ဟဲ့ တဲး ဘေ ဘဲန် ဂွန် ဇဝ်ဖြာ၊ တဲး ဘေ ပွိုန် တဝ်း ဒီ ဇဝ်ဖြာ၊ “အိုယ် ဂုန့်။” 16 နဝ်း ဖွိုမ် ဇဝ်ဖြာ၊ ဟဲ့ တဲး နဝ်း ဖွိုမ် အေ နပ်၊ အေ ဟဲ့ ဘဲန် ဂွန် ဇဝ်ဖြာ။ 17 ကူပ် ဟဲ့ ဘဲန် အေ ဂွန် ဇဝ်ဖြာ တီ၊ အေ မိူဝ် ဒီ ပွိုန် ခါဂုန် ပီ ဒွါ ဇဝ်ဖြာ ဒီ အေ။ ဘော ဇဝ် ယေဆူ ဘော အေ ဒီ ပွိုန် ခါဂုန် တီ ဆေ အေ ဟဲ့ ခမ် ဒုက် ပီ ဇဝ် ယေဆူ ဟဲ့ ခမ်။ ပန် တီ အေ မိူဝ် ဒီ ပွိုန် အာဖုင် ဒင်ခုဝ် ပီ အန်။

18 အုဝ် ဘော ဇေန့်ဇာ လွင် ဒုက် ပီ ခမ် အေ ဒေါ တီ နီ။ အုဝ် ဟဲ့ နပ်၊ န့ တူ ငှိုယ် ဒီ ကာဒါန် ဒေါ မှဝ် ဒီ အာဖုင် ဒင်ခုဝ် အီ ဒီ လိုဝ်း ဆီချာ နာ အာတ့် ဟာဝ်။ 19 ခဲ့ ကွယ် ပီ ဖာန် ဘ့လေး ဇဝ်ဖြာ ဒွန် မျုဝ်၊ ဂေ နှဝ့် န့ဒဝ့် ကာဆဝ် ဘော ဘ်ု ဒီ ယွတ် ပန် ဒီ ဘျ ဇဝ်ဖြာ ဂွန် အန် ဂေ ဒွန် အီ။ 20 ခဲ့ ပီ ဖာန် ဘ့လေး ဇဝ်ဖြာ ဒွန် မျုဝ် တီ၊ န့ ဒီ ဟြာယ် တူတ့်။ မာလဲ၊ ပဲ့ ဟဲ့ ဖာန် ဘ့လေး ဇဝ်ဖြာ တီ ယီ တူ အိုင် လွင် အန် တီ။ န့ မုး ဒါ ကာညာ အီ ဟဲ့ ဖာန် ဘ့လေး ဂေ၊ အန် ဟဲ့ ဘူင် ပါယ် တီ။ အန် ယီ ဝီ တဲး ဂေ မိုဝ်း ပီ နှဝ့် န့ဒဝ့် ပေါ အူ မျုဝ်။ 21 ခဲ့ ပီ ဖာန် ဘ့လေး ဇဝ်ဖြာ ဒွန် မျုဝ်၊ ဂေ ဒီ ဘော နှဝ့် တဲး ဂေ လွတ် လေး ခဲင် ဒုက်၊ ကွဲ့ တဲး ဂေ ဘဲန် မှာယ် အန် ဇဝ် အီ နပ် ဒီ ဘူင် တဲး န့ လိုဝ် တဲး န့ စှိုမ်။ ဂေ နှဝ့် အာခြာဝ် ပန် ဒီ ဝီ ပွိုန် ဂေ ဒီ ကွယ် ဒါခိုယ်၊ ကွယ် ထင်ဟာင် ပီ ဂေ အီ မုး ဂွန် ဇဝ်ဖြာ။

22 အေ ဟဲ့ နပ် ခဲ့ ပီ ဖာန် ဘ့လေး ဇဝ်ဖြာ တီ ဒွန် မျုဝ်၊ ဂေ ဟဲ့ ခမ် ဒုက် တာင် ကာဆဝ် ကော ဇမ် အာတိုဝ် နီ။ ဂေ ဘော ငှုန် ပီ အီဘိုန့် ဟဲ့ ဆဝ် ဒီ မိုဝ်း ဂွန်။ 23 အာဝ် ဝန် မီ ခဲ့ ပီ ဖာန် ဘ့လေး ဇဝ်ဖြာ တီ။ ဘော အေ အီ မုး ဒူအီ ပဲ့ ဟဲ့ ဂေဇူ ဇဝ်ဖြာ ဒီ အာတ့်၊ အီ ဟဲ့ မိုဝ်း နဝ်း ဖွိုမ် ဇဝ်ဖြာ၊ ဘော အေ ဟဲ့ ငှုန် ခဲင် နဝ်း အေ ကူပ် ဘ်ု အေ ပန် ဒီ တဲး ဇဝ်ဖြာ အေ ကွယ် ရိုမ် ဒူပ် အန် ပီ ဂွန် အာရာင် အန်၊ တဲး ဘော ဒုဝ် ဘူင့် အေ လွတ် ယမ်။ 24 ကူပ် ပီ နှဝ့် န့ဒဝ့် အေ တီ၊ ဇဝ်ဖြာ ဟဲ့ ချွတ် အေ။ မာလဲ၊ ဆေ အေ ပွိုန် ယိုဝ် ပီ နှဝ့် န့ဒဝ့် အေ၊ အာဝ် ဟူ မုး ပီ နှဝ့် န့ဒဝ့်။ ခုဝ်၊ အာဝ် မိုဝ်း အာဆေ အီ ဝီ နှဝ့် န့ဒဝ့် ပဲ့ ဟဲ့ ဟွတ့် ပွိုန် အန်။ 25 ဆေ အေ ယီ နှဝ့် န့ဒဝ့် ပီ ညှမ် ယိုဝ် အေ၊ န့ တဲး နဝ်း အေ ခမ် ဒီ ယိူန် ခမ် ဒီ ဘ်ု လှေန့်။

26 ပါယ် တီ၊ နဝ်း ဖွိုမ် ဇဝ်ဖြာ မိူဝ် ဒီ စွယ် အေ ကူပ် တူ မိုဝ်း အေ ပ့လူမ် ဂေ ဟဲန့်။ ခုဝ်၊ အေ တူ နပ် ပီ ဒီ လုဝ် ဆာခိုဝ် ဘော ပီ ဒီ လုဝ် မှာန့် အေ ဒီ ဇဝ်ဖြာ။ န့ ယီ မုး နဝ်း ဖွိုမ် ဇဝ်ဖြာ၊ အန် ဒီ စွယ် အေ ဝီ ဆာခိုဝ် ဘော ငှုန် ဒေါ တူ ပွိုန် အေ ကာလာင် လေး ဂြုဝ်း။ 27 ဇဝ်ဖြာ အီ နပ် ပီ ပါယ် ခဲင် နဝ်း ခဲင် ဖွိုမ် အေ၊ အန် နပ် ဘော ပီ ပါယ် နဝ်း ဖွိုမ် ဇဝ်ဖြာ။ နဝ်း ဖွိုမ် ဇဝ်ဖြာ တီ၊ အန် ဟဲ့ ဝီ ဆာခိုဝ် ဒီ ဇဝ်ဖြာ ဒါင် ဂေ အီ ညှိုမ် ဆီချာ ဒွန် အီ။ အန် ဘော ဆာခိုဝ် တဲး န့ ဒူပ် ပီ အိုင် ဇဝ်ဖြာ။

28 အေ မိူဝ် ဟဲ့ နပ်၊ ခဲ့ ပီ ကာဒုး အေ ဒွန် မျုဝ်၊ ဇဝ်ဖြာ ဒီ ဘူင် တဲး န့ ဘဲန် အာဂျိုဝ် ဒီ ဂေ အီ ရွက့် အန်၊ အီ မုး ဒူအီ ပဲ့ ဟဲ့ အိုင် အန် ဇဝ် ဒီ ရဝ်း။ 29 ဇဝ်ဖြာ ဟဲ့ နပ် ဒီ အာတ့် အာဆေ ဒီ ညှိုမ် ဘိုင် အန်။ ခုဝ်၊ အန် ဘော ခြာမ် ဒီ တဲး ဂေ ဒူအီ တီ ဝီ ဘဲန် ဂွန် အန်၊ တဲး ဂွန် အန် အီ မုး ဇဝ် ယေဆူ ဝီ ဘဲန် ဂွန် ဂိန့် အီ မိုဝ်း ဝါ ကိူန် ကာဆဝ်။ 30 ပါယ် တီ၊ ဂေ ဒူအီ ပဲ့ ဟဲ့ အိုင် ဇဝ်ဖြာ ဒီ တဲး ဂေ ဘဲန် ဂွန် အန်၊ အန် မိူဝ် ဟဲ့ ရဝ်း ဂေ။ ဂေ ဒူအီ ပီ ရဝ်း ဇဝ်ဖြာ တီ၊ အန် မိူဝ် တဝ်း၊ ဂေ မုး ဒူအီ အီ မိုဝ်း နဝ်း ဆိူဝ် နဝ်း မှာန်။ ဂေ အီ မိုဝ်း နဝ်း ဆိူဝ် နဝ်း မှာန် တီ၊ အန် မိူဝ် တဲး ဂေ မိုဝ်း အာဖုင် ဒင်ခုဝ်။

31 ကူပ် ခြာမ် အန် ဇဝ် ဒီ ဘူင် ပါယ် တီ၊ အေ ဟဲ့ နပ် ဆီချာ၊ ဆေ ဇဝ်ဖြာ ဟဲ့ ကွယ် ဘ့လာက် အေ၊ အာဝ် မိုဝ်း အာဆေ အီ ပွိုန် ကာဘး ဒီ အေ။ 32 ဇဝ်ဖြာ တူ လှယ့် ဂွန် အန် အီ မိုဝ်း ခဲ့ အူ ဝီ တီ။ အန် ဟဲ့ ခမ် ဒီ တဲး ဂွန် အန် တီ ယမ် ကာဒါင် မှာပ် အေ ဒူအီ ဒွန် အီ။ အန် ဒီ ဘော ဂေဇူ အေ၊ ဒွါ ဒီ အေ ဘော ဇဝ် ယေဆူ ဘော အာမျုဝ် ဟဝ်၊ ခဲ့ ပီ လုဝ် အေ ဒွန် မျုဝ်။ 33 အာဝ် မိုဝ်း အာဆေ အီ ပွိုန် ဖျာက် ဂေ ဒူအီ ပဲ့ ဟဲ့ ရဝ်း ဇဝ်ဖြာ တီ။ ဇဝ်ဖြာ ဒီ ဒွါ နဝ်း ဆိူဝ် နဝ်း မှာန် ဒီ ဂေ။ 34 ပါယ် တီ၊ န့ မိူဝ် တူ မိုဝ်း အာဆေ အီ ပွိုန် ဒမ် မှာပ် ဒီ ဂေ။ ဇဝ် ယေဆူ အီ ဟဲ့ ခမ် ဒီ ယမ်၊ အီ ဟဲ့ ဝီ ယိတ့် ဝီ အိမ်၊ အန် ဟဲ့ ဝီ ကွယ် ဘ့လာက် အာအး ဇဝ်ဖြာ၊ ဝီ ဆာခိုဝ် ဒီ ဇဝ်ဖြာ ဒါင် အေ။ 35 ခုဝ်၊ အာဝ် မိုဝ်း မာဆေ အီ ဒီ ပွိုန် ဘူင် တဲး အေ လာယ် ကာဂဝ်း ဒီ ဇဝ် ယေဆူ အီ ဟဲ့ ရွက့် အေ။ ဘော မုး အီ ဒုက် အီ ညှာပ် ဒီ နဝ်း၊ ဘော မုး ဒုက် ပီ ခါနှာပ် အီ ဟဝ် ဒီ အေ ဘော ဒုက် တူ မိုဝ်း ပီ ဒီ ဟူမ် ပီ ဒီ တာ၊ ဒုက် ဒီ အာဖေ အာရေ ဘော ဒုက် ပီ ဆီ ငဝ်း အီ ဒီ အေ၊ ဇိုဝ် တီ ဒွန် မျုဝ်၊ န့ တူ ပွိုန် ဘူင် တဲး အေ လာယ် ကာဂဝ်း ဒီ ဇဝ် ယေဆူ အီ ဟဲ့ ရွက့် အေ ဆေဆေ။ 36 ခဲင် ဘပ် ဇဝ်ဖြာ န့ ဟဲ့ ဒဲမ် အုန် လွင် အန် တီ။ န့ တဝ်း၊ “ကူပ် ညှိုမ် ယေ ဒီ မဲ ဇဝ်၊ န့ ပီ ယေ ဒီ ဘော လုဝ် ယမ် ဒွန် ဆီငဲ။ ယေ ဘော ပီ မာဘူ ပီ ဒီ ငဝ်း ယမ် အီ ဟဝ်။” 37 အေ ပီ ဘော ခမ် ဒုက် ဘဲန် မျုဝ် ဘဲန် မျုဝ်၊ န့ ယီ တူ တဲး အေ လာယ် ကာဂဝ်း ဒီ အန် ဇဝ်။ ပီ ခမ် အေ ဇိုဝ် တီ ဒွန် မျုဝ်၊ န့ ဒီ တဲး အေ အွင် တူတ့် ဒွန် မျုဝ် ကူပ် ဟဲ့ ရွက့် အန် ဇဝ် ဒီ အေ။ 38 အုဝ် ဟဲ့ နပ် ဆီချာ၊ အာဝ် မိုဝ်း ခေါ အူ မျုဝ် အီ ဒီ ပွိုန် ဘူင် တဲး အေ လာယ် ကာဂဝ်း ဒီ ဇဝ် ယေဆူ အီ မုး ဒါ ကာညာ အီ အိုပ် အေ။ ဘော မုး လွင် လုဝ် ယမ် ဘော လွင် ဆီ အိမ်၊ ဘော မုး အာမူ အာမာတ် ဇဝ်ဖြာ၊ ဘော မုး ကာနမ်၊ ဘော မုး အာခြာဝ် ဒေါ တီ နီ ဘော အာခြာဝ် အီ ဒီ တး ဝါယ် နီ၊ ဘော မုး မျုဝ် အီ မိုဝ်း ပွုန် ဘဲန် မျုဝ် ဘဲန် မျုဝ်၊ 39 ဘော မုး အာမျုဝ် အီ ကွယ် ခဲင် ဂါင်ဟြာဝ် ဘော အီ ကွယ် ခဲင် မိူင် မာရာန၊ ဘော မုး အာမျုဝ် ပီ ဖာန် ဘ့လေး ဇဝ်ဖြာ၊ ဇိုဝ် တီ ဒွန် မျုဝ်၊ န့ တူ ပွိုန် ဘူင် တဲး အေ လာယ် ကာဂဝ်း ဒီ ဇဝ်ဖြာ အီ ဟဲ့ ရွက့် အေ၊ အီ ဟဲ့ တဲး ဘော ဇဝ် ယေဆူ ရွက့် အေ။