ကူပ် ဒူပ် အုဝ် ဇဝ် ယေဆူ၊ ပီ ကာလာင် အုဝ် ဟဲ့ မှာန် အာခါခ်ု။ အုဝ် မိူဝ် တူ ကာလုဝ်။ ဘော နဝ်း ဖွိုမ် ဇဝ်ဖြာ ဟဲ့ တဲး အုဝ် ဝီ နပ် လွင် အန် တီ။ 2-3 န့ ဟဲ့ ဘဲန် နဝ်း မှဲ ကာဆဝ် ဒီ အုဝ် ဒါင် ဂေ ဒူအီ အီဆာရေလ အီ မုး ဒူအီ အာမျုဝ် အုဝ်။ အုဝ် ဘော က့လိုဝ် ဆေဆေ ကူပ် တူ ညှိုမ် ဂေ ဇဝ် ယေဆူ။ ခုဝ်၊ ဆေ န့ ဒီ ဘော ဘဲန် အာဂျိုဝ် ဒီ ဂေ၊ အုဝ် ဒီ ဘော ခမ် ကာဆမ် ဒိူင် ဒါင် ဂေ ဘီနွင် အုဝ်။ အုဝ် ဒီ ဘော ခမ် ဘော ဒီ ကာယဝ်း ဒီ ဇဝ် ယေဆူ။ 4 ဂေ ဟဲ့ ဘဲန် ဒူအီ ပီ ရဝ်း ဇဝ်ဖြာ၊ တဲး ဂေ ပွိုန် ဒီ ဘဲန် ဂွန် ဇဝ်ဖြာ၊ တဲး ဂေ ပွိုန် ဘော အာဖုင် ဒင်ခုဝ် ဇဝ်ဖြာ။ ဇဝ်ဖြာ မိူဝ် ဟဲ့ ကာဆဲန့် ဒီ ဂေ ဘော ဒွါ ဒါရာ အန် ဒီ ဂေ၊ တဲး ဂေ နပ် ပီ ဒီ ပါယ် ဒီ ကြိုပ် အန် ဇဝ်။ အန် ဇဝ် မိူဝ် ဟဲ့ ဒွါ ကာဒိက် ဆတ်ဇာ ဘဲန် မျုဝ် ဘဲန် မျုဝ် ဒီ ဂေ။ 5 ဂေ မိူဝ် ဟဲ့ မုး ခြိုဝ် အီ တး ဒီ ဂုန့် ဒင် ဂေ။ ဇဝ် ယေဆူ အီ မုး ဒူအီ ပီ ရဝ်း ပီ တိုယ် ဇဝ်ဖြာ၊ အန် မိူဝ် ဟဲ့ ဂွိုတ် တး ဘဲန် ဒူအီ ခဲင် ခြိုဝ် ဂေ တီ။ ဇဝ်ဖြာ ယီ အိုပ် တူတ့် ဒွန် မျုဝ်။ တဲး အေ အိူပ် အန် ဇဝ် ဆေဆေ။ ဆာတူ။

6 န့ မုး လွင် တူ ညှိုမ် ဂေ ဒူအီ အီဆာရေလ၊ အာဝ် မုး ဇဝ်ဖြာ တူ ဘူင် ဒူပ် ကာဒိက် ဆတ်ဇာ အန်။ ခုဝ်၊ အာဝ် မုး ဂေ ဒူအီ အာမျုဝ် အီဆာရေလ ဒွန် အီ ဟဲ့ မုး ဒူအီ အီဆာရေလ အာခါခ်ု။ 7 ပါယ် တီ၊ အာဝ် မုး၊ ကူပ် မုး ဂေ လှုက်လှာန် ဒါ အာဘြာဟမ်၊ ဂေ ဒွန် အီ မုး လှုက်လှာန် ဒါ အာဘြာဟမ် အာခါခ်ု။ ဇဝ်ဖြာ ဟဲ့ ဒွိုမ် ကာလာင် ဒီ ဒါ အာဘြာဟမ် တဝ်း၊ “မီ ဂေ လှုက်လှာန် အာဆဲက်၊ အုဝ် ဒီ တဲး ဂေ ဘဲန် လှုက်လှာန် မဲ။” 8 ဆေ န့ ပါယ် တီ၊ လှုက်လှာန် ဒါ အာဘြာဟမ် ဂေ တူ မုး ဂွန် ဇဝ်ဖြာ ဒွန် အီ။ န့ မိုဝ်း မီ ဂွန် ပီ ဒွါ ဇဝ်ဖြာ ကာဒိက် ဆတ်ဇာ တွိုန်၊ ဇဝ်ဖြာ မာတ် အန် မုး လှုက်လှာန် ဒါ အာဘြာဟမ် အာခါခ်ု။ 9 ဂြုဝ်း ကာဒိက် ဆတ်ဇာ တီ၊ န့ ဘော ဟဲ့ ဒဲမ် အုန် တဝ်း၊ “ဆေ ဟီ နုဝ့် အူ ဆီနမ်၊ အုဝ် ဒီ ဝီ တး ဒူင် ကွယ် မဲ။ ဒေါ အန် တီ အီဘိုန့် မဲ အီ စိူဝ် နာင် ဆာရာယ်၊ အန် ဒီ မိုဝ်း ဂွန် အီမာယ် အူ ဝီ။”

10-11 ဒဲင် တီ၊ ဘော ဂွန် နာင် ဘဲက် အာ ဝီ တွိုန် မိုဝ်း ဂုန့် အီ စိူဝ် အာဆဲက် အီ မုး ဘော ဂုန့် ဒင် အေ။ ပီ ဘော ဟဲ့ ပါယ် တီ မိူဝ်၊ အန် ဇဝ် ဟဲ့ တဝ်း ဒီ နာင် ဘဲက်၊ “ဂွန် ဂိန့် ဒီ ဝီ ဘဲန် ဒဲစေန့် ဝီ တျီ့။” အန် ဇဝ် ဟဲ့ ကာလာင် အုန် ပါယ် တီ၊ ဆိန့် အာတ့် ဂွိုတ် ဂွန် ဂါယ် တီ။ ဂွန် ဂါယ် တီ မိူဝ် ညှမ် နပ် ဒီ ဘူင် အီ မွှိုမ် အီ တူ မွှိုမ်။ 12 ပဲ့ ဟဲ့ ဘူင် ဇဝ်ဖြာ ဇိုဝ် တီ၊ န့ တဲး အေ နပ် ဆီချာ၊ ဇဝ်ဖြာ ရဝ်း ဒူအီ၊ တဲး န့ ဒူပ် ပီ အိုင် အန်။ အန် တူ တဲး န့ ဒူပ် အီ မွှိုမ် တူ မွှိုမ် ပဲ့ ဟဲ့ ဘူင် အေ ဒူအီ။ 13 ပါယ် တီ၊ ခဲင် ဘပ် ဇဝ်ဖြာ န့ ဟဲ့ ဒဲမ် အုန် လွင် ဇဝ်ဖြာ တဝ်း၊ “အုဝ် ရွက့် အာကူပ်၊ အုဝ် ဇွင့် အာဆုဝ်။”

14 ဆေ န့ ပါယ် တီ၊ မာဆေ ပီ ထာင် ဘေ။း ဟဲ့ ပွိုန် တဝ်း၊ ဇဝ်ဖြာ တူ မိုဝ်း နဝ်း ဆိူဝ် နဝ်း မှာန်။း အာဝ် ပွိုန် တဝ်း ဒေါ မှဝ်။ 15 အန် ဇဝ် ဟဲ့ ဒွိုမ် တဝ်း ဒီ အာမုဝ်ဆဲ၊ “အုဝ် ဒီ ဂေဇူ ဝီ ပီ ဆီ ဂေဇူ အုဝ်။ အုဝ် ဒီ ကာဝေ ဝီ ပီ ဆီ ကာဝေ အုဝ်။” 16 ခုဝ် အန် တီ ဇဝ်ဖြာ တူ ဂေဇူ ဒူအီ ဒူပ် ပီ ကာပြာ ပီ ဘူင် ဂေ။ န့ ဆိူတ် ဒီ နဝ်း ဇဝ်ဖြာ။ 17 ခဲင် ဘပ် ဇဝ်ဖြာ န့ ဘော ဟဲ့ ဒဲမ် အုန် လွင် ပီ ကာလာင် ဇဝ်ဖြာ ဒီ ခုန်ဒီခမ် ဖာရုဝ်။ အန် တဝ်း၊ “အုဝ် ညှမ် တဲး မဲ ယမ်။ ခုဝ်၊ အုဝ် ဒီ ဘျ ပွုန် အုဝ် ဒီ မဲ၊ တဲး ဂေ ဒူအီ ဘော ကာဒါယ် နပ် ဒီ ကာလာင် လွင် အုဝ်။” 18 ခုဝ်၊ ဝီ မှဝ် ပီ ဆီ ဂေဇူ ဇဝ်ဖြာ၊ အန် မိူဝ် ဒီ ဂေဇူ ဝီ တီ။ ဝီ မှဝ် ပီ ဆီ တဲး ဇဝ်ဖြာ မိုဝ်း နဝ်း ဒိူဝ်၊ အန် မိူဝ် ဒီ တဲး ဝီ တီ ဒိူဝ်။

19 ဆေ န့ ပါယ် တီ၊ ဘေ ပီ ဒီ တဝ်း ဒီ အုဝ်၊ “မှဝ် န့ ပါယ် ပီ ဒမ် ဇဝ်ဖြာ မှာပ် ဒီ အေ။း အာဝ် မိုဝ်း အာဆေ အီ ပွိုန် ခြဲ ပီ ဆီ ဘူင် ဇဝ်ဖြာ။ အန် ဒီ ဘူင် ပီ အိုင် အန် ဆေဆေ။” 20 ဘေ ဂိုက် အုဝ်၊ အာဝ် ကာအာပ် ဘေ ထဲန့် ဇဝ်ဖြာ။ အူဖာမာ အန်၊ ဆေ န့ မုး ကာလုဝ့် ကာဒါယ်၊ အန် တူ ပွိုန် ကာလာင် ဒီ ဒါ ကာညာ အန် အီ ဟဲ့ ဘူင် အန် တဝ်း၊ “မှဝ် န့ ပါယ် ပီ ဘူင် မဲ အာရိုပ် အုဝ် တဲး န့ ပါယ် နီ။း” 21 ဒါ ကာညာ ကာလုဝ့် ဟဲ့ ပွိုန် ဒိုဝ်း ကာဒါယ် ကာပိတ် တီ ဘူင် ဒူပ် ပီ အိုင် အန်။ ကာဒါယ် အူ ဒီက့လွုန် တီ၊ အန် နပ် ဒီ ဘူင် တဲး န့ ဘဲန် ကာလုဝ့် ဘဲန် မျုဝ် ဘဲန် မျုဝ်။ မင် မျုဝ် ဒူအီ ဘော စ်ု ဘူင် တဲး န့ မိုဝ်း ဆာရေ။ မင် မျုဝ် ဂေ ဘော စ်ု ဘူင် အီ တူ ဘော မိုဝ်း ဆာရေ။

22 ဇဝ်ဖြာ ဟဲ့ ပီ ဒါ ကာညာ ကာလုဝ့် တီ။ အန် ပီ ဘော ပွိုန် ဒမ် မှာပ် ဒီ အီ၊ ပီ ဘော ပွိုန် ဘျ ပွုန် အန် မိူဝ်၊ အန် ယီ အူတ် နဝ်း၊ အူတ် ဖွိုမ် အန်၊ တူ တဲး ဂေ ဒူအီ ပီ ရူ အန် လိုဝ် စှိုမ် အူ ဇေန့်။ 23 အန် ဘူင် ပါယ် တီ၊ တဲး န့ လိုဝ်း ဒီ ဂေ ဒူအီ ပီ ဒီ ဂေဇူ အန် ခဲ့ တာင် ကာဆဝ် အာဖုင် ဒင်ခုဝ် အန်။ အန် ဟဲ့ ရဲန် အုန် ဒီ ဘူင် ပါယ် တီ အူ ဆိန့် အာတ့် နီ။ 24 ခုဝ်၊ အီ မုး အေ၊ အေ ဘော မုး ဒူအီ ပဲ့ ဟဲ့ ရဝ်း အန် ဇဝ်၊ ဘော မုး ဘော ဒူအီ အာမျုဝ် ယူဒါ ဘော ဒူအီ အာမျုဝ် ဟဝ်။ 25 န့ ဟဲ့ ဒူပ် ပီ ဒဲမ် အုန် အာဟုဝ်ဆီယာ လွင် ဇဝ်ဖြာ။ အန် တဝ်း၊ “ဂေ ဒူအီ အီ တူ ဒွိုမ် ဘဲန် ဒူအီ အာမျုဝ် အုဝ်၊ အုဝ် ဒီ တဲး ဂေ စိူဝ်၊ ‘ဒူအီ အာမျုဝ် အုဝ်။’ ဒူအီ ပီ တူ ဒွိုမ် ရွက့် အုဝ်၊ အုဝ် ဒီ တဲး ဂေ စိူဝ်၊ ‘ဒူအီ ပီ ရွက့် အုဝ်။’” 26 အန် ဘော တဝ်း၊ “အုဝ် ဒီ တဲး န့ ဘဲန် ပါယ် နီ။ ဒူအီ ဒွန် နာ ဒွန် ပ့လုဝ့် အီ ဟဲ့ ဒွိုမ် တဝ်း ဒီ ဂေ၊ ‘ဘေ တူ မုး ဒူအီ အာမျုဝ် ဇဝ်ဖြာ။’ ဂေ ပီ ဒီ ဝီ တဝ်း အူ ဇေန့်၊ ‘ဘေ မုး ဂွန် ဇဝ်ဖြာ အီ အိမ် ဆေဆေ။’” 27 ဒဲင် တီ၊ ဘော အာအီဆာယ ဟဲ့ ဒွိုမ် ကာလာင် လွင် ဂေ ဒူအီ အီဆာရေလ။ အန် တဝ်း၊ “ဂေ ဒူအီ အီဆာရေလ၊ ဂေ ပီ ဘော ဟဲ့ ကိူန် ကော နှဲန် ကာဟာတ့် အီ ကွယ် ခူပ် အိုမ် နမ်မုက်ဆာရာ မိူဝ်၊ န့ ဒီ ဂိတ် မီ မင် အီ ပီ ဒီ ချွတ် အန် ဇဝ်။ 28 ခုဝ်၊ ဇဝ်ဖြာ ဒီ ဘော ဆုင်ဖျာတ် အာမူ ဒူအီ ဒဲင် ကာဒါယ်၊ တဲး န့ ဒူပ် နာ မုး နာ မှာန်၊ တဲး န့ ဘော စေဝ် ဟွတ့်။” 29 အာအီဆာယ ဘော ဒဲမ် ပေါ အူ ပ့လုဝ့် တဝ်း၊ “ဇဝ်ဖြာ အီ မိုဝ်း ပွုန် တာင် လွှိုမ် တူတ့်၊ ဆေ အန် တူ တဲး န့ ဂိတ် ဂေ မင် အီ၊ အေ ဒီ ပီ မိူင် ဆုဝ်ဒူမ် ဂါယ် မိူင် ဂုဝ်မုဝ်ရာ။”

30 ဆေ န့ ပါယ် တီ၊ အေ ဘော နပ် ဒီ တဝ်း၊ ဂေ ဒူအီ အာမျုဝ် ဟဝ်၊ ဂေ တူ ဂျုဝ်ဂျာ ဒီ ဘူင် တဲး ဂေ ဘဲန် ဒူအီ အီ မိုဝ်း နဝ်း ဆိူဝ် နဝ်း မှာန်။ ဂေ ယီ ဟဲ့ ဘဲန် ဒူအီ အီ မိုဝ်း နဝ်း ဆိူဝ် နဝ်း မှာန် ကူပ် ညှိုမ် ဂေ ဇဝ် ယေဆူ။ 31 ဂေ ဒူအီ အီဆာရေလ၊ ဂေ ယီ ဂျုဝ်ဂျာ ဒီ ဘူင် ဒူပ် ဒါရာ တဲး ဂေ ပွိုန် နဝ်း ဆိူဝ် နဝ်း မှာန်၊ ဂေ ယီ တူ ပွိုန်။ 32 မှဝ် န့ ပါယ် ပီ တူ ပွိုန် ဂေ နဝ်း ဆိူဝ် နဝ်း မှာန် တီ။း ဂေ ဘိုင် ပီ ဘူင် ဂေ၊ ယီ တူ ညှိုမ် ဘိုင် ဇဝ် ယေဆူ။ ခုဝ်၊ န့ ပီ ဂေ ဟဲ့ တာ ဒုး ပ့လဝ် ဂေ ဒီ မာဝ် အီ တဲး ဂေ ကာဝှး ကေး။ 33 ခဲင် ဘပ် ဇဝ်ဖြာ ဟဲ့ ဒဲမ် အုန် လွင် မာဝ် တီ။ ဇဝ်ဖြာ ဟဲ့ တဝ်း၊ “ခဲင် မိူင် ဇီအူန် အုဝ် ဟဲ့ ဘ့လေး အုန် မာဝ် အူ ဘူင့် အီ တဲး ဒူအီ ကာဝှး ကေး။ မာလဲ၊ ဂေ အီ ဘိုင် အန် ဇဝ် အီ ပီ မာဝ် တီ၊ ဂေ တူ လုဝ် ဆာယ် အီ ဒေါ မှဝ်။”