အိုယ် ဘေ ဘီနွင် အုဝ်၊ အုဝ် ဟဲ့ ဆီ တဲး ကာဆဝ် ဇဝ်ဖြာ ချွတ် ဂေ ဒူအီ အီဆာရေလ။ အုဝ် ဘော ဆာခိုဝ် မှာန့် တဲး ဇဝ်ဖြာ ဘူင် ပါယ် တီ။ 2 အုဝ် ဒီ ဘဲန် ဆက်ဆေ ဂေ၊ ကာလာင် လွင် ဂျုဝ်ဂျာ ကာဆဝ် ဂေ ဒီ ဒူပ် ဇဝ်ဖြာ။ မာလဲ၊ န့ ယီ တူ ကာလှုး ဆီချာ ဒီ နဝ်း ဂေ လွင် ဇဝ်ဖြာ။ 3 ဂေ တူ နပ် လွင် နဝ်း ဆိူဝ် နဝ်း မှာန် ပီ ဒွါ ဇဝ်ဖြာ။ ခုဝ်၊ ဂေ ဝီ ဂျုဝ်ဂျာ ဒီ မိုဝ်း နဝ်း ဆိူဝ် နဝ်း မှာန် ရာင် ဂေ။ ဂေ တူ ဘိုင် နဝ်း ဆိူဝ် နဝ်း မှာန် ပီ ဒွါ ဇဝ်ဖြာ။ 4 န့ ယီ ဟဲ့ မုး ဇဝ် ယေဆူ၊ အန် ဟဲ့ ဟွတ့် ဘူင် တူတ့် ဒွန် မျုဝ် ပီ ဒမ် ဒါရာ အေ ဘူင်။ ခုဝ် အန် တီ ဒွန် အီ အီ ညှိုမ် ဇဝ် ယေဆူ ပွိုန် ဒီ ဘဲန် ဒူအီ အီ မိုဝ်း နဝ်း ဆိူဝ် နဝ်း မှာန်။

5 အာမုဝ်ဆဲ ဟဲ့ ဒွိုမ် ဒဲမ် အုန် လွင် ဂေ ဒူအီ အီ ဒီ ပွိုန် နဝ်း ဆိူဝ် နဝ်း မှာန် ကူပ် ဘူင် ဒူပ် ဂေ ဒါရာ။ အန် ဟဲ့ တဝ်း၊ “အာဆေ ဘူင် ဒူပ် ဆီချာ ဒါရာ၊ အန် ဒီ ပွိုန် အာဆာက် ကူပ် ဒူပ် အန် ဒါရာ။” 6 ဂေ ဒူအီ အီ ဟဲ့ ပွိုန် နဝ်း ဆိူဝ် နဝ်း မှာန် ကူပ် ညှိုမ် ဂေ ဇဝ် ယေဆူ၊ ဂေ ပွိုန် တဝ်း ဒူပ် ပဲ့ ဟဲ့ ဒဲမ် အုန် အာမုဝ်ဆဲ အီ ဟဲ့ တဝ်း၊ “အာဝ် လုဝ် ဇေန့်ဇာ ခဲင် နဝ်း တဝ်း၊ အာဆေ ဒီ ဘော ပွိုန် ဒီ ဟုဝ့် ခဲင် ဂါင်ဟြာဝ်။း” အာဆေ တဝ်း ပါယ် တီ၊ န့ ပီ၊ အန် တဲး ဇဝ် ယေဆူ တး လူင်။ အန် ယီ ဟဲ့ ဟွတ့် လူင်။ 7 ဂေ မိူဝ် တူ လုဝ် တဝ်း၊ “အာဆေ ဒီ ဘော ပွိုန် ဒီ လူင် မိူင် ခြိုမ်။း” အာဆေ တဝ်း ပါယ် တီ၊ န့ ပီ၊ အန် ဘာင် ဇဝ် ယေဆူ ဝီ ယိတ့် ဝီ အိမ် ဝါယ် ဟဲ့ ဟွတ့် ယမ် အန်။ အန် ဇဝ် ယီ ဟဲ့ ဟွတ့် ဝီ ယိတ့် ဝီ အိမ်။ 8 ဂေ ယီ ဟဲ့ နပ်၊ ခဲင် ဘပ် ဇဝ်ဖြာ န့ မိူဝ် ဟဲ့ ဒဲမ် တဝ်း၊ “ဂြုဝ်း အန် ဇဝ် ဟဲ့ ကွယ် ချြီ့ မဲ၊ ဟဲ့ ကွယ် ခဲင် မူတ့် မဲ၊ ဘော ခဲင် နဝ်း မဲ။” ဂြုဝ်း တီ၊ န့ ဘော မုး ဂြုဝ်း အီ တဲး အီ ညှိုမ်။ ဂြုဝ်း တီ၊ ယေ ဘော ကာလာင် ဒီ အီ ဟဝ်။ 9 ခုဝ်၊ ဆေ မဲ ဖြူမ် ဒီ ကာလာင် တဝ်း၊ “ဇဝ် ယေဆူ မုး ဇဝ်ဖြာ၊” မဲ ဘော လုဝ် ညှိုမ် ခဲင် နဝ်း မဲ လွင် ဇဝ်ဖြာ ဟဲ့ တဲး ဇဝ် ယေဆူ ဝီ ယိတ့် ဝီ အိမ် ဝါယ် ဟဲ့ ဟွတ့် ယမ် အန်။ ဆေ မဲ ကာလာင် ဘော ညှိုမ် ပါယ် တီ၊ ဇဝ်ဖြာ ဒီ ချွတ် မဲ။ 10 ခုဝ်၊ န့ ဘော မုး ဒူအီ အီ ညှိုမ် ခဲင် နဝ်း၊ အန် ဒီ ပွိုန် နဝ်း ဆိူဝ် နဝ်း မှာန်။ ဆေ ဂြုဝ်း အီ လေး ခဲင် မူတ့် အန် မိူဝ် ကာလာင် လွင် အန် တီ၊ ဇဝ်ဖြာ ဒီ ဘော ချွတ် အန်။ 11 ပါယ် တီ၊ ခဲင် ဘပ် ဇဝ်ဖြာ န့ ဘော ဟဲ့ ဒဲမ် အုန် တဝ်း၊ “ဒူအီ အီ ညှိုမ် အန် ဇဝ် ဒွန် အီ၊ ဂေ တူ လုဝ် ဆာယ် အီ ဒေါ မှဝ်။” 12 ဇဝ်ဖြာ မိုဝ်း မီ အူ ကာဒင်။ အန် ဘော မုး ဇဝ်ဖြာ ပီ ကြိုပ် ဒူအီ ဘောကာဂ့လျီတ်။ အန် ဇဝ် တူ ကာယဝ်း ဒူအီ အာယူဒါ ဂေ ဒူအီ အာမျုဝ် ဟဝ်။ အန် ဘော မွင့်ကာရာ ဒွါ နာ မွှိုမ် ဒီ ဂေ ဒွန် အီ အီ ဆာခိုဝ် အီ မှာန့် ဒီ အန်။ 13 ခဲင် ဘပ် ဇဝ်ဖြာ မိူဝ် ဟဲ့ ဒဲမ် တဝ်း၊ “ဂေ ဒူအီ ဒွန် အီ အီ ဆာခိုဝ် အီ ဂါဝ် ပွုန် ဇဝ်ဖြာ၊ ဇဝ်ဖြာ ဒီ ချွတ် ဂေ။”

14 မာလဲ၊ ဆေ ဂေ တူ ညှိုမ်၊ မှဝ် ဂေ ဒီ ပါယ် ဒီ ဆာခိုဝ် မှာန့် ဒီ ဇဝ်ဖြာ။း ဆေ ဂေ တူ ဒွိုမ် ယိုဝ် အီ ကာလာင် လွင် ဇဝ်ဖြာ၊ မှဝ် ဂေ ဒီ ပါယ် ဒီ ညှိုမ်။း ဆေ အာဝ် မိုဝ်း အီ ခဲ အီ ကာလာင်၊ မှဝ် ဂေ ဒီ ပါယ် ဒီ ယိုဝ် လွင် အန် တီ။း 15 ဆေ အာဝ် မိုဝ်း အီ စ်ု ဂေ ကာလာင်၊ န့ မိူဝ် တူ မိုဝ်း အီ ဒီ ဟာဝ် ကာလာင်။ ပါယ် တီ၊ န့ ဟဲ့ ဒူပ် ပီ ဒဲမ် အုန် ခဲင် ဘပ် ဇဝ်ဖြာ တဝ်း၊ “ဆေ ဒူအီ တး ကာလာင် ဂြုဝ်း ဇဝ်ဖြာ လွင် အီ တဲး နဝ်း ဒူအီ ဒါခိုယ်၊ န့ ဟဲ့ ဘဲန် နာ မွှိုမ် နာ ဒါခိုယ် ကာဆဝ်။”

16 မာလဲ၊ အာဝ် မုး၊ ဒူအီ အီဆာရေလ ဒွန် အီ ဟဲ့ ညှိုမ် ဂြုဝ်း ဇဝ်ဖြာ အီ တဲး နဝ်း ဒူအီ ဒါခိုယ် တီ။ ခုဝ်၊ အာအီဆာယ ဟဲ့ ဝီ တဝ်း၊ “အိုယ် မဲ ဇဝ်၊ အာဝ် ဘော ကူပ် မိုဝ်း အီ ဒီ ညှိုမ် ဂြုဝ်း မဲ ဇဝ် ပဲ့ ဟဲ့ ကာလာင် ယေ။” 17 ပါယ် တီ၊ ဒူအီ ပွိုန် ဒီ ညှိုမ် ကူပ် ဟဲ့ ပွိုန် ဂေ ဒီ ထူမ် ဂြုဝ်း ဇဝ်ဖြာ။ အီ ပွိုန် ဒီ ထူမ် ဂြုဝ်း ဇဝ်ဖြာ ကူပ် ဟဲ့ မိုဝ်း ဒူအီ အီ ကာလာင် လွင် ဇဝ် ယေဆူ။ 18 မာလဲ၊ အုဝ် ဆီ ဒီမွှတ်၊ န့ ဟဲ့ မှာန်၊ ဂေ ဒူအီ အီဆာရေလ ညှမ် ဒွိုမ် ထူမ် ဂြုဝ်း ဇဝ်ဖြာ တီ။း အာဝ် မှာန်။ ဂေ ဟဲ့ ဟွတ့် ထူမ်၊ ဟဲ့ ဟွတ့် ယိုဝ်။ ခုဝ်၊ ခဲင် ဘပ် ဇဝ်ဖြာ န့ ဟဲ့ ဒဲမ် တဝ်း၊ “ဂြုဝ်း ဇဝ်ဖြာ တီ ဟဲ့ ကာလတ့် ဒဲင် ကာဒါယ် နီ။ န့ ဟဲ့ ဇမ် ဒူင် ဆိူတ် ကာဒါယ်။” 19 ဆေ န့ ပါယ် တီ၊ အုဝ် ဆီ နပ်၊ ယုဝ် ဂြုဝ်း တီ န့ ကာလှုး ဒီ နဝ်း ဂေ ဒူအီ အီဆာရေလ ဒီ အာတ့် အီ ဟဝ်။ ဟဲ့ မုး အာမုဝ်ဆဲ အီ ဟဲ့ ဝျီ့ ဂြုဝ်း တီ။ အန် ဟဲ့ ဒဲမ် အုန် ဂြုဝ်း ဇဝ်ဖြာ အီ တဝ်း၊ “အုဝ် ဒီ တဲး ဘေ လှယ့် ဂေ ဒူအီ အာမျုဝ် ဟဝ် အီ တူ မိုဝ်း မိူင်။ အုဝ် ဒီ တဲး ဘေ ပီရူ ပီစာဝ် ဘေ ဒီ ဂေ ဒူအီ အာမျုဝ် ဟဝ် အီ ရိုဝ် ကာဆဝ်။” 20 အာအီဆာယ ဟဲ့ ဝဲ ယ ကာလာင် ဆိူဝ်။ အန် ဟဲ့ ဒဲမ် အုန် ဂြုဝ်း ဇဝ်ဖြာ အီ ဟဲ့ တဝ်း၊ “ဂေ အီ တူ ဟြေတ့် အုဝ်၊ ဂေ ဟဲ့ ကာတုန့် အုဝ်။ အုဝ် ဟဲ့ ဘျ လွင် အုဝ် ဒီ ဂေ ဒူအီ အီ တူ ဒီမွှတ် အုဝ်။” 21 မာလဲ၊ အန် ပီ ဝီ ကာလာင် ဂြုဝ်း ဇဝ်ဖြာ လွင် ဂေ ဒူအီ အီဆာရေလ။ အန် တဝ်း၊ “အုဝ် ဟဲ့ ဆူင့် ဒဲ အုဝ် ဒွင် ဝန်၊ ဘ်ု ဒီ ရွုး ဂေ ဒူအီ အီ တူ ထူမ် ဂြုဝ်း အုဝ်၊ ဘော ဂေ ဒူအီ အီ ဟဲ့ ကာဘး ဒီ အုဝ်။”