ဆေ န့ ပါယ် တီ၊ မင် အီ ဘော နပ် ဒီ တဝ်း၊ ဇဝ်ဖြာ ဟဲ့ ဝဲန် ဂေ ဒူအီ အီဆာရေလ။ အာဝ် မုး ပါယ် တီ။ ခုဝ်၊ ဘော အုဝ် ဟဲ့ မုး ဒူအီ အီဆာရေလ၊ ဟဲ့ မုး အာမျုဝ် အာဘြာဟမ် ဘော ခြိုဝ် အာဘေန်ယာမ်။ 2 ဇဝ်ဖြာ တူ ဝဲန် ဒူအီ ပဲ့ ဟဲ့ ရဝ်း အုန် အန် အူ ဆိန့် အာတ့် နီ။ တဲး ဘေ လှုဝ်း ပီ ဒဲမ် အုန် ခဲင် ဘပ် ဇဝ်ဖြာ လွင် အာအေလီယ တွိုန်။ အန် ဟဲ့ ကာလာင် ဒီ ဇဝ်ဖြာ မှာပ် ပီ ဘူင် ဂေ ဒူအီ အီဆာရေလ။ 3 အန် ဟဲ့ တဝ်း၊ “အိုယ် မဲ ဇဝ်ဖြာ၊ ဂေ ဟဲ့ ငဝ်း ဝဲန် တူတ့် ဒူအီ အီ ဘျာန် ဂြုဝ်း မဲ ဇဝ်။ ဘော ကာစှူင့် လှူ အီ ဒီ မဲ ဇဝ်၊ ဂေ ဟဲ့ ပျာတ့် ဝဲန်။ ဟဲ့ ဂိတ် မီ အုဝ် အူ ဝီ။ ဂေ ဟဲ့ ဟြေတ့် ဘော အုဝ်၊ တဲး ဂေ ပွိုန် ဒီ ငဝ်း ဝဲန်။” 4 ဇဝ်ဖြာ ဝီ ဝျီ့ ဂြုဝ်း အန် တီ တဝ်း၊ “အုဝ် ဟဲ့ ဟွတ့် အုန် ဒူအီ ဘူ ဟြဲန့် ဝီ။ ဂေ တူ ဒွိုမ် ခြိုပ်ခြဝ် ကြိုပ် ဇဝ် ဘာလ။ ဂေ ဟဲ့ ကြိုပ် မီ အုဝ်။” 5 ဘော ဒေါ တီ နီ၊ န့ ဘော ပါယ် တီ၊ န့ ဆီ မိုဝ်း ဒူအီ ပီ ရဝ်း ဇဝ်ဖြာ ကူပ် ဟဲ့ ဂေဇူ အန် ဒီ ဂေ။ 6 ဆေ န့ ယီ မုး ပီ ဂေဇူ ဇဝ်ဖြာ အီ တဲး ဂေ ကွယ်၊ န့ တူ မုး ကူပ် အာဂျိုဝ် ပီ ဘူင် ဂေ။ ဆေ ဇဝ်ဖြာ ရဝ်း ဂေ ကူပ် အာဂျိုဝ် ပီ ဘူင် ဂေ၊ အာဝ် ဟူ မုး ပီ ဂေဇူ ဇဝ်ဖြာ။

7 ဆေ န့ ပါယ် တီ၊ ဂေ ဒူအီ အီဆာရေလ၊ ဂေ ဘောကာဂ့လျီတ် တူ ပွိုန် ပီ ဆီ ပွိုန် ဂေ။ မီ ဂေ ဒူအီ ပီ ရဝ်း ဇဝ်ဖြာ အီ ပွိုန်။ ဂေ အီ ဟဝ် မိူဝ်၊ ဂေ ဘော မိုဝ်း နဝ်း ဒိူဝ်၊ တူ ထူမ် ဂြုဝ်း ဇဝ်ဖြာ။ 8 န့ ဟဲ့ ပီ ပီ ဒဲမ် အုန် ခဲင် ဘပ် ဇဝ်ဖြာ။ န့ တဝ်း၊ “ဇဝ်ဖြာ ဟဲ့ ဘူင် တဲး န့ ဘဲန် မာမိုက် မာမွယ် ဒီ ဂေ၊ တူ တဲး မာဆေ လိုပ် ခဲင် နဝ်း ဂေ။ အန် ဇဝ် ဟဲ့ တဲး ဂေ မိုဝ်း ငါယ်၊ ဂေ ယီ တူ ပွိုန် ယိုဝ်။ အန် ဇဝ် ဟဲ့ တဲး ဂေ မိုဝ်း ဟျဝ့်၊ ဂေ ယီ တူ ပွိုန် ထူမ်၊ ဂေ ဘော ကွယ် ပါယ် တီ ကော ဇမ် ဒေါ တီ နီ။” 9 ခုန်ဒီခမ် အာဒါဝိတ် မိူဝ် ဟဲ့ ဒွိုမ် တဝ်း၊ “ဆေ ဂေ ဟူမ် ပီ လှူ ဂေ၊ တဲး န့ ဘဲန် ကာပူ ဒီ ဂေ၊ တဲး န့ ပီ မာဆိမ် အီ ဟဲ့ ခြေ ယွတ့်။ တဲး ဂေ စှိုမ် ဘော ဝီ ခမ် မှာပ် ပီ ဘူင် ဂေ။ 10 တဲး ငါယ် ဂေ အပ်၊ ကွဲ့ တဲး ဂေ ယိုဝ် မာဆေ။ တဲး ဂေ ဘော ကာဒုး ဒီ ဟာဝ် ကာဂုဝ့် ဆေဆေ။”

11 ဆေ န့ ပါယ် တီ၊ မင် အီ ထာင်၊ ဆေ ဂေ ဒူအီ အီဆာရေလ ဟဲ့ ကာလိုပ် ဟဲ့ ဒီပ့လာတ် ပါယ် တီ၊ ဂေ ဒီ ဘော လိုဝ် စှိုမ် တူတ့်။ အာဝ် မုး ပါယ် တီ။ ကူပ် ဘူင် ဂေ ပါယ် တီ၊ န့ ဝီ တဲး ဒူအီ အာမျုဝ် ဟဝ် ဝီ ပွိုန် ဒီ နပ် လွင် ဇဝ်ဖြာ ချွတ် အီ။ ဇဝ်ဖြာ ဟဲ့ ဘူင် ပါယ် တီ၊ တဲး ဂေ ဒူအီ အီဆာရေလ ဝီ လှယ့် ဂေ ဒူအီ အာမျုဝ် ဟဝ်။ 12 န့ ပါယ် နီ။ ပဲ့ ဟဲ့ ကာလိုပ် ဂေ ဒူအီ အီဆာရေလ ဟဲ့ ဝီ ဘဲန် အာဂျိုဝ် ကိူန် ဒီ ဒူအီ ဒဲင် ကာဒါယ် နီ။ ဘော ပဲ့ ဟဲ့ စှိုမ် ဂေ၊ ဟဲ့ ဝီ ဘဲန် နာ ဘွတ် နာ မွှိုမ် ကိူန် ဒီ ဒူအီ အာမျုဝ် ဟဝ်။ ခုဝ်၊ ဆေ ဂေ ဘောကာဂ့လျီတ် ယီ ညှိုမ် ဆီချာ ဇဝ်ဖြာ၊ န့ ဒီ ဝဲ ဘဲန် အာဂျိုဝ် လွှိုမ် တီ။

13 ခါ နီ၊ အုဝ် ဝီ ကာလာင် ဒီ ဘေ ဒူအီ အာမျုဝ် ဟဝ်။ အုဝ် မုး ဒူအီ ပီ ရဝ်း ပီ တိုယ် ဇဝ် ယေဆူ၊ တဲး အုဝ် ကာလာင် ဂြုဝ်း ဇဝ်ဖြာ အီ တဲး နဝ်း ဒူအီ ဒါခိုယ် ဒီ ဘေ ဒူအီ အာမျုဝ် ဟဝ်။ ဂါန် တီ တဲး အုဝ် မိုဝ်း နဝ်း ဒါခိုယ်။ 14 ခုဝ်၊ အုဝ် ဆီ တဲး ဂေ ဒူအီ အာမျုဝ် အုဝ် ဝီ မိုဝ်း နဝ်း လှယ့် ဘေ၊ တဲး ဇဝ်ဖြာ ပွိုန် ဒီ ချွတ် ဂေ မင် အီ။ 15 ဒေါ ဝဲန် ဇဝ်ဖြာ ဂေ ဒူအီ အီဆာရေလ၊ န့ ဘော ဝီ တဲး ဒူအီ ဘော ကာဒါယ် ဝီ ပွိုန် ဒီ လာယ် ကာလဝ့် ဒီ ဇဝ်ဖြာ။ ဆေ ဇဝ်ဖြာ ယီ ဝီ ဒိုဝ်း ဝိဝ် ဂေ ဒူအီ အီဆာရေလ၊ န့ ဒီ ပီ ဒူအီ အီ ယမ် ဝီ ယိတ့် ဝီ အိမ်။ 16 အူဖာမာ အန်၊ အာတ့် ဘူင် ဒူအီ ခါမုန်၊ ဆေ ဂေ ဒိုဝ်း ကာပဲ့ အီ စဲက် လှူ ဒီ ဇဝ်ဖြာ၊ န့ တဲး ဘော ဒီက့လွုန် ဘဲန် ကြုဝ် ဇဝ်ဖြာ။ ဆေ ဒူအီ ဟဲ့ လှူ ရျီး ဟေ ဒီ ဇဝ်ဖြာ မိူဝ်၊ ရာ အန် ဘောကာဂ့လျီတ် ဟဲ့ ဘဲန် ကြုဝ် ဇဝ်ဖြာ။

17 ဂေ ဒူအီ အီဆာရေလ ယီ ပီ ဟေ နာမန် ပဲ့ ဟဲ့ လိုမ်လာ ဆီချာ ဒါ ကာညာ အန်။ ဘေ ဒူအီ အာမျုဝ် ဟဝ် ယီ ပီ ဟေ နာမန် ပြဲ။ ဆေ ဒါ ကာညာ တွိုန် ယီ ဟဲ့ ဒဲပ် လေး မင် ရာ ဒီ ဟေ အန်၊ ဝီ ဒိုဝ်း ရာ ဟေ ပြဲ၊ ဝီ ကူပ် ဒိုက် ဒီ ဒင် ဟေ ဘြိမ်၊ တဲး အိုမ် ခဲင် ဒင် ဘြိမ် တီ ဟျီင် ဘော ရာ တီ၊ တဲး န့ အိမ်၊ 18 ဘေ ကွဲ့ ထာင်၊ ရာ တီ ဟဲ့ မွှိုမ် လွှိုမ် ဒင် ဟေ ဘြိမ်။ ဆေ ဘေ ယီ ထာင်၊ ဘေ ဟဲ့ မွှိုမ် လွှိုမ် ဒူအီ အီဆာရေလ၊ တဲး ဘေ လှုဝ်း လွင် ဟေ နာမန် တီ။ ဘေ ပီ ခဲ့ ရာ တး ကူပ် ပါယ် တီ။ ဘေ တူ ဟျီင် ရျီး။ ရျီး အီ ဟျီင် ရာ။ 19 ဘေ ဘော နပ် ဒီ တဝ်း၊ “ရာ တီ၊ ဒါ ကာညာ အန် ဟဲ့ ဒဲပ် လေး၊ တဲး ယေ ပွိုန် ဒီ တး ဒိုက်။” 20 ဟဲ့ မှာန်။ ဂေ ကာဒုး ဒီ ဒဲပ် ဝဲန် ကူပ် တူ ညှိုမ် ဂေ။ အီ မုး ဘေ၊ ကူပ် ညှိုမ် ဘေ၊ ဘေ ဝီ ပွိုန် ဒီ တး ကူပ် ဒိုက်။ ခုဝ်၊ ကွဲ့ ပီစာ နဝ်း ဘေ။ တဲး ဘေ ယီ ရုဝ်ဆေ ဇဝ်ဖြာ။ 21 ဆေ ဇဝ်ဖြာ ယီ တူ လှယ့် ဂေ ဒူအီ အီဆာရေလ အီ ဟဲ့ ပီ ရာ ပီ ဒဲပ် အန် တီ၊ ဘေ ထာင် ဇဝ်ဖြာ ဒီ ဘော လှယ့် ဘေ။း

22 တဲး ဘေ နုဝ် ဆီချာ၊ ဇဝ်ဖြာ မိုဝ်း နဝ်း မွှိုမ်။ အန် ယီ ဝီ နပ် ဒီ ဒမ် ကာဆဝ် မှာပ် ဒီ အီ။ အန် ဇဝ် ဟဲ့ ဟွတ့် ဒမ် ကာဆဝ် မှာပ် ဒီ ဂေ ဒူအီ အီ ဟဲ့ လုတ့်။ အန် ယီ ဝီ ဘူင် နာ မွှိုမ် ဒီ ဘေ၊ ဆေ ဘေ ကော ဘိုင် ပီ ဂေဇူ အန် ဇဝ် တီ။ မာလဲ၊ ဆေ ဘေ တူ ဘိုင် ပီ ဂေဇူ အန် ဇဝ်၊ အန် ဒီ ဘော ဝဲန် ဘော ဘေ။ 23 ဂေ ဒူအီ အီဆာရေလ၊ ဆေ ဂေ ယီ ဘျွင် နဝ်း၊ ဝီ ညှိုမ်၊ န့ ပီ ဇဝ်ဖြာ ဒီ ဝီ တး ကူပ် ဒိုက် ဂေ ဒီ ဒင် ဘြိမ် တီ။ အန် ဟဲ့ မိုဝ်း ပွုန် ဒီ ဘူင် ပါယ် တီ။ 24 ဇဝ်ဖြာ ဟဲ့ ပွိုန် ဒိုဝ်း ရာ ဟေ နာမန် ပြဲ ဝီ တး ကူပ် ဒိုက် ဒီ ဟေ နာမန် အီ မွှိုမ်။ ဟေ ဂါယ် တီ၊ ပီ ဆ မုး အူ မျုဝ် မိူဝ်၊ ဇဝ်ဖြာ ယီ ဟဲ့ နပ် ဒီ တး ကူပ် တဲး န့ ဒိုက်။ ခုဝ်၊ ဆေ အန် ဝီ ဒိုဝ်း ရာ ပဲ့ ဟဲ့ ဟွတ့် ဒဲပ် ဝဲန် အန်၊ ဝီ ကူပ် ဒိုက် ဒီ ဒင် ဘြိမ် တွိုန်၊ န့ ဟဲ့ ဝဲ ငှိုယ် ဒီ အန်။

25 အိုယ် ဘေ ဘီနွင်၊ အုဝ် ဆီ တဲး ဘေ နပ် အူ မျုဝ် ပီ တူ ဒွိုမ် နပ် အီ။ ကွဲ့ တဲး ဘေ ပီဖုင် ဘေ။ ဂေ ဒူအီ အီဆာရေလ၊ အာဝ် မုး ဂေ ဒီ ဘော ဒိူဝ် ဘော နှူက် ဆေဆေ။ ဆေ ဒူအီ အာမျုဝ် ဟဝ် အီ ဒီ ညှိုမ် ဟဲ့ ဟွတ့် ညှိုမ် လိုပ် တူတ့် ဇဝ် ယေဆူ၊ 26 ဘော ဂေ ဒူအီ အီဆာရေလ ဒွန် အီ ဒီ ဝီ တး ညှိုမ် လိုပ် ဇဝ် ယေဆူ၊ တဲး န့ ဘော ဒူပ် ပီ ဒဲမ် အုန် ခဲင် ဘပ် ဇဝ်ဖြာ။ န့ တဝ်း၊ “အန် ဇဝ် အီ ချွတ် အီ၊ အန် ဒီ ဘော တး ဒီ နွန် ဇီအူန်။ အန် ဒီ ဘော ဒိုဝ်း ဝဲန် နဝ်း အီ တူ ညှိုမ် ဇဝ်ဖြာ ဒီ ဒူအီ ခဲင် ခြိုဝ် အာကူပ်။ 27 ဒေါ ဒိုဝ်း ဝဲန် အုဝ် မှာပ် ဂေ တီ၊ အုဝ် ဒီ ဒွါ ကာဒိက် ဆတ်ဇာ တီ ဒီ ဂေ။” 28 ဂေ ဒူအီ အီဆာရေလ၊ ကူပ် တူ ညှိုမ် ဂေ ဂြုဝ်း ဇဝ်ဖြာ အီ တဲး နဝ်း ဒူအီ ဒါခိုယ်၊ ဂေ ဝီ ဘဲန် ရန်ဆူ ဇဝ်ဖြာ။ ခုဝ် အန် တီ န့ ဝီ ဘဲန် အာဂျိုဝ် ဒီ ဘေ ဒူအီ အာမျုဝ် ဟဝ်။ ဇဝ်ဖြာ ယီ ရဝ်း ဂေ၊ တဲး ဂေ ဘဲန် ဂွန် ပီ ရွက့် ဇဝ်ဖြာ ကူပ် ကာဒိက် ဆတ်ဇာ ပဲ့ ဟဲ့ ဒွါ ဇဝ်ဖြာ ဒီ ဂုန့် ဒင် ဂေ။ 29 ခုဝ်၊ ဇဝ်ဖြာ တူ ဘျွင် ပီ ဂေဇူ အန်။ ဘော ပီ ရဝ်း အုန် အန်၊ အန် တူ ဘျွင် ဒေါ မှဝ်။ 30 ဘေ ဒူအီ အာမျုဝ် ဟဝ်၊ အာတ့် နီ ဘေ ပီ ဆ ဆီ ထူမ် ဂြုဝ်း ဇဝ်ဖြာ မိူဝ်၊ ဘေ ယီ ဟဲ့ ဝီ ပွိုန် ပီ ဂေဇူ ဇဝ်ဖြာ ကူပ် တူ ထူမ် ဂေ ဒူအီ အီဆာရေလ ဂြုဝ်း ဇဝ်ဖြာ။ 31 န့ ဘော ပါယ် တီ၊ ဂေ ဒူအီ အီဆာရေလ မိူဝ်၊ ဂေ တူ ဆီ ထူမ် ဂြုဝ်း ဇဝ်ဖြာ ဒေါ တီ နီ၊ ဂေ ယီ ဒီ ဝီ ပွိုန် ပီ ဂေဇူ ဇဝ်ဖြာ အီ ပီ ပဲ့ ဟဲ့ ပွိုန် ဘေ တီ။ 32 ဇဝ်ဖြာ ဟဲ့ တဲး ဒူအီ ဘောကာဂ့လျီတ် တူ ထူမ် ဂြုဝ်း အန်၊ တဲး အန် ဝီ ပွိုန် ဒီ ဂေဇူ ဂေ ဘောကာဂ့လျီတ်။

33 အာငျာန် ဇဝ်ဖြာ ဟဲ့ လိုက် ကာဆဝ်။ ဘော ပီ နပ် အန် ဟဲ့ ကိူန် ကာဆဝ်။ ပီ ဒီ ဆုင်ဖျာတ် အန် ဇဝ် မိူဝ်၊ အာဝ် မိုဝ်း အာဆေ အီ နပ်။ ဘော န့တေန့် ဒူင် ဒီ ဝဝ့်၊ ဒူင် ဒီ ဟာဝ် အန် ဇဝ်၊ အာဝ် မိုဝ်း အာဆေ အီ နပ် ဒီ ဟြေတ့်၊ နပ် ဒီ ဒူပ်။ 34 အာဝ် မိုဝ်း အာဆေ အီ နပ် နဝ်း ဇဝ်ဖြာ။ အာဝ် မိုဝ်း အာဆေ အီ ပွိုန် ဆင်ချာင် ဒွါ အာကျာမ် အာငျာန် ဒီ ဇဝ်ဖြာ။ 35 အာဝ် မိုဝ်း အီ ဒွိုမ် ဒွါ မျုဝ် မှဝ် ဒီ ဇဝ်ဖြာ၊ တဲး အန် ဇဝ် လုဝ် ဝီ ဝျီ့။ 36 ခုဝ်၊ ခဲ့ ဘော မိုဝ်း ဒွန် မျုဝ်၊ န့ ဘော တး တူတ့် ဒီ အန် ဇဝ်၊ န့ ဘော မိုဝ်း ကူပ် ယွတ် မဲန် အန် ဇဝ် တူတ့် ဒွန် မျုဝ်၊ တဲး န့ လိုဝ်း ခဲ့ တာင် အာဖုင် ဒင်ခုဝ် အန်။ ခုဝ်၊ တဲး အေ အိူပ် မျုက် အာဖုင် ဒင်ခုဝ် အန် ဇဝ် ဆေဆေ။ ဆာတူ။