တဲး ဘေ ဒွန် အီ မာတ် ယေ မုး ဒဲစေန့် ဇဝ် ယေဆူ၊ မာတ် ယေ မုး ဒူအီ ပဲ့ ဟဲ့ စ်ု ဇဝ်ဖြာ ကာလာင် ပီ တူ ဒွိုမ် ယိုဝ် အီ လွင် အန်။ 2 ဒူအီ ပီ စ်ု ဇဝ်ဖြာ ဘူင် ပါယ် တီ၊ ဂေ ယီ ဘူင် ခါခ်ု ဇိုဝ် တီ ဆေဆေ။ 3 န့ ပီ ဘော မုး ဘေ၊ ပီ ဘော မုး ဒါ တာင် အီ တဝ်း ဒီ ဆုင်ဖျာတ် လွင် အုဝ်၊ အုဝ် မိူဝ် တူ ဒိုဝ်း ဒီ ထူမ်။ အုဝ် မိူဝ် တူ ဆုင်ဖျာတ် မာဆေ လွင် ပီ ဘူင် အုဝ်။ 4 အုဝ် တူ နပ် မှာပ် ခဲင် နဝ်း အုဝ်။ ပီ ဘော ဟဲ့ ပါယ် တီ မိူဝ်၊ အုဝ် တူ တဝ်း အုဝ် တူ မိုဝ်း မှာပ်။ န့ ယီ မုး ဇဝ်ဖြာ အီ ဒီ ဆုင်ဖျာတ် လွင် ပီ ဘူင် အုဝ်။

5 ခုဝ်၊ ကွဲ့ တဲး ဘေ ပီခြန် ဒီ ဆုင်ဖျာတ် အာရေ အီ အာတ့် ဇမ် အာခြာဝ် အန်။ တဲး ဘေ ဘ်ု တဲး ကော ဇမ် ပန် ဒီ ဝီ တး လူင် ဇဝ် ယေဆူ။ ခဲ့ ပီ ချြီင် အီ ခဲင် အပ် ဝွင့်၊ အန် ဇဝ် ဒီ ဝီ တဲး န့ လိုဝ်း ခဲင် ဘ့လာင်။ ပီ ကာဖာ ဒူအီ ခဲင် နဝ်း ဂေ မိူဝ်၊ န့ ဒီ ဝီ လိုဝ်း ဆီချာ။ ဝါယ် တီ၊ ဇဝ်ဖြာ ဒီ ဝီ မျုက် ဒူအီ ဒွန် အီ ခဲ့ ကာအာပ် မျုက် ဝီ မှဝ် ဝီ အန်။

6 အိုယ် ဘေ ဘီနွင်၊ အုဝ် ဟဲ့ ကာလာင် ဇိုဝ် တီ လွင် ဒါ ဆာရာ အာဖောလူန် ဘော လွင် အုဝ်၊ တဲး န့ ဘဲန် အာဂျိုဝ် ဒီ ဘေ။ တဲး ဘေ ဟေန် ဒီ ယာယ်၊ ကွဲ့ တဲး ဘေ ဘူင် လွှိုမ် ပီ ဒဲမ် အုန် ခဲင် ဘပ် ဇဝ်ဖြာ။ ဆေ ဘေ ဘူင် ပါယ် တီ၊ ဘေ တူ လာယ် ကာထဲန့် လွင် ဒါ ဆာရာ ဘေ။ ဘေ မိူဝ် တူ အိူပ် အူ ဝီ၊ ဝီ ဖျာက် ပေါ အူ ဝီ။ 7 ခုဝ်၊ အာဝ် မိုဝ်း အာဆေ အီ ဟဲ့ စုဝ့် တဲး ဘေ တာင် လွှိုမ် အီ ဟဝ်။ ပဲ့ ဟဲ့ ပွိုန် ဘေ ဒွန် မျုဝ်၊ န့ မုး ပီ ဂေဇူ ဇဝ်ဖြာ။ ဆေ ဘေ ယီ ဝီ ပီဖုင် ဘေ၊ အာဝ် ဟူ ဘဲန် ပီ ဂေဇူ ဇဝ်ဖြာ ဒီ ဘေ။

8 ဘေ ဘော ထာင် ဘေ ဟဲ့ မိုဝ်း ဇေ့ဇုင် တူတ့် ခဲ့ ပီ လုဝ် ဘေ။ ဘေ မိူဝ် ထာင် ဘေ ဟဲ့ ဘဲန် ဒူအီ ခြမ်။ ဘေ ထာင် ဘေ ဟဲ့ ပီ ခုန်ဒီခမ်။ ယီ တူ ထာင် န့ မုး ပီ စွယ် ယေ။ အုဝ် ဘော ဆီ တဲး ခါခ်ု ဘေ ဘဲန် ခုန်ဒီခမ်၊ တဲး ဘော ယေ ဘဲန် ခုန်ဒီခမ် ဒူပ် ဘေ။ 9 အီ မုး ယေ ဒူအီ ပီ ရဝ်း ပီ တိုယ် ဇဝ် ယေဆူ၊ အုဝ် ယီ ထာင် အန် ဇဝ် ဟဲ့ တဲး ယေ ပီ ဒူအီ အီ စုဝ်း တျီမ်၊ တဲး ယေ ပီ ဒူအီ အီ လုဝ် ခမ် မှာပ်၊ အီ လုဝ် ခမ် တဲး ဒုဝ် ဆတ်ဒါဝါ ကဝ့် ယမ်၊ တဲး ဒူအီ ကိူန် ကော ယိုဝ်။ န့ ပီ ဇဝ်ဖြာ ဟဲ့ ဘျ ယေ၊ တဲး ဘော အာမူ အာမာတ် ဇဝ်ဖြာ ဘော ဒူအီ ဒဲင် ကာဒါယ် ဘောကာဂ့လျီတ် ပွိုန် ဒီ ယိုဝ်။ 10 ကူပ် ဒူပ် ယေ ဇဝ် ယေဆူ၊ ယေ ပီ ဒူအီ ရိုဝ်။ မာလဲ၊ ကူပ် ညှိုမ် ဘေ ဇဝ် ယေဆူ၊ ဘေ ဟဲ့ ဘဲန် ဒူအီ အီ မိုဝ်း အာငျာန်။ ယေ ဘဲန် ဒူအီ အီ တူ မိုဝ်း ပ့လူမ် ဂေ ဟဲန့်။ ဘေ ယီ ဝီ ဘဲန် ဒူအီ အီ မိုဝ်း ပ့လူမ် မိုဝ်း ဟဲန့်။ ယေ ဟဲ့ ဘဲန် ဒူအီ အီ တူ မိုဝ်း ဆာရေ။ ဘေ ယီ ဝီ ဘဲန် ဒူအီ အီ မိုဝ်း အာဖုင် မိုဝ်း ဆာရေ။ 11 ယေ ဘော အေတ့် ပီ ဒီ ဟူမ်၊ အေတ့် ပီ ဒီ ဒျီင် ကော ဇမ် ဒေါ တီ နီ။ ယေ ဘော တာ ခြိုင် ကာပျာတ့် ခြိုင် လှုး။ ယေ ဘော ခမ် အီ မး အီ ဆီဘျြီ့။ ဒဲင် တီ၊ ယေ ဘဲန် ဒူအီ တူ မိုဝ်း ရဝ် မိုဝ်း ကာင်၊ လုဝ် ဟာဝ် ဝိဝ် ဟာဝ် ဝေန့်။ 12 ယေ ဘော ရန့် ဂါန် ကိူန်၊ ဝီ ဟျီင် ဒုဝ် ဘြိမ် ယေ။ ဒေါ အေး အီ ဟဝ် ဒီ ယေ၊ ယေ ဘော ဝီ မွင့်ကာရာ ဒွါ ဒီ ဂေ။ ဒေါ ခါနှာပ် အီ ဟဝ် ဒီ ယေ၊ ယေ ဘော ခမ် ဒီ ယိူန် ခမ် ဒီ အူတ်။

13 ဒေါ လုက်တာယ် အီ ဟဝ် ဒီ ယေ၊ ယေ ဘော ဝီ ကာလာင် ဂြုဝ်း ဒါခိုယ် ဂြုဝ်း မွှိုမ် ဒီ ဂေ။ ကော ဇမ် ဒေါ တီ နီ၊ အီ ဟဝ် ဘော တဝ်း၊ ယေ ပီ ကာအး ဒဲင် ကာဒါယ် နီ။ ဂေ ဘော တဝ်း၊ ယေ ဟဲ့ ပီ ဒီဂြမ် ပီ လုဝ် ဝဲန် အီ။

14 ပီ ဒဲမ် အုဝ် နီ၊ အုဝ် တူ ဒဲမ် တဲး ဘေ ဆာယ် အီ။ အုဝ် ဆီ မာနုဝ် ဘေ ကူပ် မုး ဘေ ဂွန် ပီ ရွက့် အုဝ်။ 15 ခဲင် ဖိုင် ဒူအီ အီ ညှိုမ် ဇဝ် ယေဆူ တီ၊ ဘေ ပီ ဘော ဟဲ့ မိုဝ်း ဒါ ဆာရာ ဘဲန် ဟြဲန့် ဝီ မိူဝ်၊ ဂုန့် ဘေ ယီ တူ ကိူန်။ ခုဝ်၊ ဒေါ ညှိုမ် ဘေ ဇဝ် ယေဆူ၊ အုဝ် ဟဲ့ ပီ ဂုန့် ဘေ ကူပ် ကာလာင် အုဝ် ဒီ ဘေ လွင် ဇဝ်ဖြာ ဒီ ချွတ် ဘေ၊ တဲး န့ ဘဲန် နဝ်း ဒါခိုယ် ဒီ ဘေ။ 16 ကူပ် ပါယ် တီ၊ အုဝ် ကာဆုး ဘေ တဲး ဘေ ဘူင် ဒူပ် ပီ ဘူင် အုဝ်။ 17 အုဝ် ဟဲ့ စ်ု အာထီမုဝ်ထေ ဟာဝ် ဒူင် ကွယ် ဘေ။ အန် ဘော ပီ ဂွန် ပီ ရွက့် အုဝ်။ အန် ဘူင် နာ မုး နာ မှာန် ဆေဆေ ဘော ဒူပ် ဆီချာ ဇဝ် ယေဆူ။ အန် ဒီ ကာလာင် တဲး ဘေ လှုဝ်း ပီ ဘူင် အုဝ်၊ ပီ ဒူပ် အုဝ် ဇဝ် ယေဆူ။ ပီ ဘူင် အုဝ် တီ၊ န့ ကာဒါန် ဘော ပီ မာနုဝ် အုဝ် ဒီ ဒူအီ ခဲင် ဖိုင် ဇဝ် ယေဆူ အီ ကွယ် ဒွန် နာ ဒွန် ပ့လုဝ့်။

18 ကာတဲ ဘေ န့ မိုဝ်း မင် အီ အီ ပီခိုက် ဂေ။ ဂေ ထာင် အုဝ် ဟူ ဒီ ဝီ တး ဒူင် ကွယ် ဘေ။ 19 ဆေ န့ ဘော မုး ပီ အိုင် ဇဝ်ဖြာ၊ အုဝ် ယီ ဒီ စေဝ် တး ဒူင် ကွယ် ဘေ။ ဒေါ ယိုဝ် အုဝ် ဒူအီ အီ ပီခိုက် ဂေ တီ၊ အုဝ် တူ ဆီ ယိုဝ် မီ ဂြုဝ်း ပီ ကာလာင် ဂေ။ အုဝ် ဆီ ယိုဝ် ဘော ပွုန် ဂေ။ 20 ခုဝ်၊ ခဲင် မိူင် ပီ အိုပ် ဇဝ်ဖြာ၊ ဂြုဝ်း ပီ ကာလာင် အီ အာဝ် မိုဝ်း အာရေ အန်။ န့ မုး ပွုန် ဇဝ်ဖြာ အီ ဟဲ့ အာရေ တာင်။ 21 တဲး ဘေ ဇေန့်ဇာ မာဆေ ပီ လုဝ် ဘေ။ ဆေ အုဝ် တး ဒူင် ကွယ် ဘေ၊ ဘေ ဆီ တဲး အုဝ် ဂူင့် မ့ဖျီ့။း ဆေ အာဝ် ပါယ် တီ၊ ဘေ ဆီ တဲး အုဝ် ရွက့် ဘေ၊ ကာလာင် ဂြုဝ်း ဒါခိုယ် ဒီ ဘေ။း