ဒေါ တီ နီ၊ အုဝ် ဟဲ့ ယိုဝ် အီ ဟဝ် ကာလာင်၊ ဟဲ့ မိုဝ်း အူ ဝီ ကာတဲ ဘေ၊ အီ ဟဲ့ လုတ့် အီဘိုန့် အီ။ ပီ ဘူင် အန် တီ ဟဲ့ မွှိုမ် ကာအိး ကာဆဝ်။ ဂေ ဒူအီ အီ တူ နပ် ဇဝ်ဖြာ မိူဝ် တူ ဒွိုမ် ဘူင် မျုဝ် တီ။ ဂေ တဝ်း၊ အန် ဟဲ့ ဝီ လာယ် အီဘိုန့် ဂုန့် အန်။ 2 န့ ပီ ဘော ဟဲ့ မွှိုမ် ကာအိး ခဲ့ တီ၊ ဘေ ယီ တူ က့လိုဝ်၊ ဘေ ပီ ဆီ နဲ့ ပီဖုင် ဘေ။ ဝီ အီ ဟဲ့ ဘူင် ပါယ် တီ၊ ဘေ ဟဲ့ လုဝ် ဆုတ့် လေး အန် ခဲင် ဖိုင် ဘေ။ 3 ဒုဝ် အုဝ် ပီ ဘော ကွယ် တူင့် ဘေ မိူဝ်၊ နဝ်း အုဝ် ယီ ကွယ် ရိုမ် ဒူပ် ဘေ။ အုဝ် မိူဝ် ဟဲ့ ဟွတ့် ဆုင်ဖျာတ် ဒီ ဒူအီ အီ ဟဲ့ လုတ့် တီ။ န့ ပီ အုဝ် ဟဲ့ ကွယ် ရိုမ် ဒူပ် ဘေ။ 4 ပန် ဒီ တး ကာဇု ဘေ၊ တဝ်း ဒီ ကာမွုန် လွင် အန် တီ ဘော ဘိုင် ပွုန် ဇဝ် ယေဆူ၊ နဝ်း အုဝ် မိူဝ် ဒီ ကွယ် ရိုမ် ဒူပ် ဘေ။ 5 ဒေါ အန် တီ တဲး ဘေ အာပ် ဒူအီ တီ ဒီ ဘုဝ် ကာနမ်၊ တဲး ဘုဝ် ကာနမ် ပျာတ့် ဒုဝ် ဘူင့် ဒူအီ တီ၊ တဲး အန် လိုဝ်၊ တဲး နဝ်း ဖွိုမ် အန် ယီ လွတ် ဒေါ ဇမ် ဆီငဲ ဝီ တး လူင် ဇဝ် ယေဆူ။

6 ဘေ တူ ကာအာပ် ပီဖုင် ဘေ။ ဘေ ဟဲ့ နပ် ဂြုဝ်း အီ တဝ်း၊ “ဆီနမ် ဘြး ခါမုန် အီ စဲက်၊ အန် ပဲ ပီဘြး ခါမုန် ဘော ဒီက့လွုန်။”

7 တဲး ဘေ ဒိုဝ်း ဝဲန် မှာပ် အီ ပီ ဆီနမ် ဘြး တီ၊ တဲး န့ ပီ ပီ ဘူင် ဂေ ဒူအီ အီဆာရေလ ဒေါ လေး ဂေ ခဲင် မိူင် အဲဂိုပ် တွိုန်။ တဲး ဘေ ပီ ခါမုန် ကာမာယ် အီ တူ မိုဝ်း ဆီနမ် ဘြး။ ဘေ ယီ ဟဲ့ ဟွတ့် ဘဲန် ဒူအီ ကာမာယ်။ ခုဝ်၊ ဇဝ် ယေဆူ ဟဲ့ ဟွတ့် ခမ် ဒီ ယမ် တဲး အန် ဂဝ်း ဝဲန် မှာပ် အေ။ အန် ဟဲ့ ပီ ဂွန် မာဘူ ပဲ့ ဟဲ့ ငဝ်း ယမ် ဒူအီ အီဆာရေလ ဒေါ ကာလုဝ်း ဇဝ်ဖြာ ကာင် ဂေ။ ကူပ် ဟဲ့ ဟွတ့် ဂဝ်း ဝဲန် ဇဝ် ယေဆူ မှာပ် ဘေ၊ ဘေ ပီ ခါမုန် ကာမာယ် အီ တူ မိုဝ်း ဆီနမ် ဘြး။

8 ခုဝ် အန် တီ တဲး အေ ဘူင် ဘ့လွယ် အီ လှုဝ်း ဒေါ ကာလုဝ်း ဇဝ်ဖြာ ကာင် ဂေ ဒူအီ အီဆာရေလ။ တဲး အေ ဝဲန် မှာပ် အီ ဟာယ် ကာဆဝ်၊ တဲး န့ ပီ အေ ဝဲန် ခါမုန် အီ မိုဝ်း ဆီနမ် ဘြး။ တဲး အေ ဒိုဝ်း နဝ်း လုယ် နဝ်း မှာန် အီ ပီ ခါမုန် အီ တူ ဟပ် ဆီနမ် ဘြး။

9 ခဲင် ပဲ့ ပီ ဒဲမ် အုဝ် ဒီ ဘေ ခါ အာတ့် တွိုန်၊ အုဝ် ဟဲ့ တဝ်း၊ ကွဲ့ တဲး ဘေ ဘဲန် ဂိုက် ဂေ ဒူအီ အီ လာယ် လုတ့် လာယ် လာယ်။ 10 လွင် အန် တီ၊ အုဝ် တူ တဝ်း၊ ကွဲ့ တဲး ဘေ ဘဲန် ဂိုက် ဒူအီ ဒဲင် ကာဒါယ် ဘောကာဂ့လျီတ်၊ ဂေ အီ လုတ့် ရဝ်၊ အီ မိုဝ်း နဝ်း လောဖ၊ အီ ပီလွှက့် ဒီ အီ ဟဝ်၊ အီ ကြိုပ် အာရိုပ် ရာင်။ ဆေ ဘေ တူ ဆီ ကွယ် ရိုမ် ဒူပ် ဒူအီ ဇိုဝ် တီ၊ ဘေ လုဝ် တဝ် လေး တ ကာဒါယ် နီ။

11 ပီ တဝ်း အုဝ် ဒီ ဘေ၊ န့ ပါယ် နီ။ ဆေ ဒူအီ အူ ဝီ ဟဲ့ တဝ်း၊ အန် ဟဲ့ ညှိုမ် ဇဝ် ယေဆူ ဘဲန် ဘီနွင် ဘေ၊ ဆေ ဒူအီ ဝီ တီ ယီ ဝီ လုတ့် အီဘိုန့် အီ၊ ဝီ မိုဝ်း နဝ်း လောဖ၊ ဝီ ကြိုပ် အာရိုပ်၊ ဝီ လာယ် ကာယွင့်၊ ဒျီင် ပဝ်း၊ ပီလွှက့် ဒီ အီ ဟဝ်၊ ဒူအီ ဇိုဝ် တီ ဘေ တူ ပွိုန် ကာဒူပ် ဘဲန် ဂိုက် အန်။ ဒဲင် တီ၊ ဘူမ် မိူဝ် အာဝ် ပွိုန် ဟူမ် ရိုမ် ဒူပ် အန်။

12 မာလဲ၊ အာဝ် မုး ဂါန် အုဝ် ဒီ လုဝ် ဆုင်ဖျာတ် အာမူ ဒူအီ အီ တူ ကွယ် ခဲင် ဖိုင် ဇဝ် ယေဆူ။ န့ မုး မီ ဂေ ဒူအီ အီ ကွယ် ခဲင် ဖိုင် ဇဝ် ယေဆူ၊ ပီ လုဝ် ဆုင်ဖျာတ် ဘေ။ 13 ဂေ ဒူအီ အီ တူ ကွယ် ခဲင် ဖိုင် ဇဝ် ယေဆူ၊ ဇဝ်ဖြာ အီ ဒီ ဆုင်ဖျာတ် အာမူ ဂေ။ ဆေ န့ ပါယ် တီ၊ တဲး ဘေ ဒူပ် ပီ ဒဲမ် အုန် ခဲင် ဘပ် ဇဝ်ဖြာ အီ တဝ်း၊ “တဲး ဘေ ဆုတ့် လေး ဒူအီ ဟာယ် ခဲင် ဖိုင် ဘေ။”