ဆေ ဘေ မိုဝ်း အာမူ ကာတဲ ဘေ၊ တဲး ဘေ တဲး န့ ဟွတ့် ခဲင် ဖိုင် ဘေ ဒူအီ အီ ညှိုမ် ဇဝ်ဖြာ။ ဆေ ဘေ ယီ ဝီ ယ ဟာဝ် တဲး ဒါ တာင် အီ တူ ညှိုမ် ဇဝ်ဖြာ ဆုင်ဖျာတ် အာမူ ဘေ၊ အာတီ န့ တူ မွှိုမ်။ 2 တဲး ဘေ လှုဝ်း၊ ဂေ ဒူအီ အီ ဘွတ်၊ အီ ညှိုမ် ဇဝ်ဖြာ၊ ဂေ ဒီ လုဝ် ဆုင်ဖျာတ် အာမူ ဒူအီ ဒဲင် ကာဒါယ် နီ။ ဆေ ဘေ လုဝ် ဆုင်ဖျာတ် အာမူ ဒူအီ ဒဲင် ကာဒါယ် အီ အာရေ တာင်၊ ဘေ ဒီ ဘော နပ် ဒီ ဆုင်ဖျာတ် အာမူ ဘေ အီ အာရေ တူ တာင်။ 3 တဲး ဘေ ဘော လှုဝ်း၊ ဘေ ဒီ လုဝ် ဆုင်ဖျာတ် ဘော အာမူ ဂေ အာမူ အာမာတ် ဇဝ်ဖြာ။ ကူပ် န့ ပါယ် တီ၊ အာမူ ဒူအီ ဘာန် ဒေါ တီ နီ၊ အေ ဟဲ့ ဝဲ လုဝ် ဆုင်ဖျာတ်။ 4 ဆေ ဘေ ယီ မိုဝ်း အာမူ၊ မှဝ် န့ ပါယ် ပီ တူ ဝီ ဟာဝ် ဘေ ဒူင် ကွယ် ဒူအီ အီ တူ မုး ဒါ တာင် ခဲင် ဖိုင် ဇဝ် ယေဆူ၊ တဲး ဂေ ဆုင်ဖျာတ် အာမူ ဘေ။း 5 အုဝ် ကာလာင် ပါယ် တီ၊ တဲး ဘေ ဆာယ် အီ။ ဆေ ဘေ တဝ်း၊ ကာတဲ ဘေ ဘီနွင်၊ အူ ဝီ မိူဝ် အာဝ် မိုဝ်း အီ မိုဝ်း အာငျာန်၊ အီ နပ် ဒီ ဆုင်ဖျာတ် အာမူ ဘေ၊ အာဝ် မွှိုမ် ညှိုမ်။ 6 ဘေ ဘီနွင် ယီ ဘူင် အာမူ ကာတဲ ဘေ၊ ပီ ဝီ တဲး ဂေ အီ တူ ညှိုမ် ဇဝ်ဖြာ ယိုဝ်။

7 ကူပ် ဟာဝ် ဘေ ဒီ ဒူအီ အီ တူ ညှိုမ်၊ တဲး ဂေ ဆုင်ဖျာတ် အာမူ ဘေ တီ၊ ဘေ ဟဲ့ ဟွတ့် ကာလိုပ်။ မှဝ် န့ ပါယ် ပီ တူ ခမ် ဘေ နာ စီစိဝ် ပီ ဘူင် အီ ဟဝ် ဒီ ဘေ။း မှဝ် န့ ပါယ် ပီ တူ ခမ် ဘေ ပီ ပီလွှက့် အီ ဟဝ် ဒီ ဘေ။း 8 ဘေ ယီ တူ ခမ် ဒီ ဘူင် ပါယ် တီ။ ဒဲင် တီ၊ ဘေ ဘီနွင် နင်ဂန် ပီ ဝီ လာယ် ကာလုတ့် ကာထဲန့်၊ လာယ် ပီလွှက့် ကာတဲ ဘေ။

9 တဲး ဘေ လှုဝ်း၊ ဂေ ဒူအီ ဟာယ်၊ ဂေ တူ ပွိုန် ဒီ လိုပ် ခဲင် မိူင် ပီ အိုပ် ဇဝ်ဖြာ။ ကွဲ့ တဲး ဘေ ဝီ ကာလုဝ် ဒုဝ် ဘြိမ် ဘေ။ ဂေ ဒူအီ လုတ့် ရဝ်၊ ဂေ အီ ကြိုပ် အာရိုပ်၊ အီ လုတ့် အီဘိုန့် အီ၊ ဂေ အီမာယ် အီ လာယ် လုတ့် လာယ် လာယ် ခဲင် ဇူင်၊ ဂေ အီမာယ် နင်ဂန် ဘော အီဘိုန့် နင်ဂန်၊ 10 ဘော ဂေ အီ ပြာ အီ ဟဝ်၊ အီ မိုဝ်း နဝ်း လောဖ၊ အီ ဒျီင် ပဝ်း၊ အီ ကာယွင့် အီ ဟဝ်၊ ဘော ဂေ အီ ဝိန် ဒီ ဇူန် အီ၊ ဂေ ဒူအီ ဇိုဝ် တီ တူ ပွိုန် ဒီ လိုပ် ခဲင် မိူင် ပီ အိုပ် ဇဝ်ဖြာ။ 11 ကာတဲ ဘေ ဟဲ့ မိုဝ်း မင် အီ အီ ဟဲ့ ဒွိုမ် ဘူင် ပါယ် တီ။ မာလဲ၊ ဇဝ်ဖြာ ဟဲ့ ဟွတ့် ဂဝ်း ဝဲန် မှာပ် ဘေ၊ တဲး ဘေ ဘဲန် ဒူအီ အီ ဆီငါ ဘွတ်၊ တဲး ဘေ မိုဝ်း နဝ်း မှာန်။ ဇဝ်ဖြာ ဟဲ့ ဘူင် ပါယ် တီ၊ ကူပ် ညှိုမ် ဘေ ဇဝ် ယေဆူ ဘော ကူပ် ဟဲ့ ကွယ် နဝ်း ဖွိုမ် ဇဝ်ဖြာ ခဲင် နဝ်း ဘေ။

12 မင် အီ ဘော တဝ်း၊ “အုဝ် ဟဲ့ ပွိုန် ဘူင် တူတ့် ဒွန် မျုဝ်။” န့ ပီ ဘော ဟဲ့ မှာန် မိူဝ်၊ အာဝ် မုး ဒွန် မျုဝ် ဒီ ဘဲန် အာဂျိုဝ် ဒီ အေ။ အုဝ် မိူဝ် ဟဲ့ တဝ်း၊ “အုဝ် ပွိုန် ဘူင် တူတ့် ဒွန် မျုဝ်။” မာလဲ၊ ပီ ဘူင် အုဝ် ဒွန် မျုဝ် တီ၊ အုဝ် တူ တဲး န့ အိုပ် အုဝ် ခေါ အူ မျုဝ်။ 13 ဒူအီ မင် အီ ဘော နပ် ဒီ တဝ်း၊ “ပီ ဒီ ဟူမ် လုဝ် ဘ့လိုပ် ခဲင် ဝတ့်။ ဝတ့် လုဝ် ဘ့လိုပ် ပီ ဒီ ဟူမ်။” န့ ပီ ဘော ဟဲ့ မှာန် မိူဝ်၊ ဇဝ်ဖြာ ဒီ ပျာတ့် ဝဲန် ဘော အာ မျုဝ်။ ဒုဝ် ဘူင့် အေ အာဝ် ကာအာပ် လုတ့် ရဝ်။ န့ ကာအာပ် ဒုဝ် ဘူင့် အေ ဘူင် ပီ အိုင် ဇဝ်ဖြာ။ ဇဝ်ဖြာ မိူဝ် ဒီ ယွတ် လိုမ်လာ ဒုဝ် ဘူင့် အေ။ 14 ပွုန် ဇဝ်ဖြာ အီ ဟဲ့ တဲး ဇဝ် ယေဆူ ဝီ ယိတ့် ဝီ အိမ်၊ အန် ဒီ တဲး ဘော အေ ဝီ ယိတ့် ဝီ အိမ်။

15 ဘေ လုဝ် လှုဝ်း၊ ဖိုင် ဇဝ် ယေဆူ ပီ ဒုဝ် ဘူင့် ဇဝ် ယေဆူ။ ခုဝ်၊ ဒုဝ် ဘူင့် ဘေ၊ န့ ပီ ဟဲ့ ကွယ် ခဲင် ဒုဝ် ဘူင့် ဇဝ် ယေဆူ။ ဆေ န့ ပါယ် တီ၊ အာဝ် ကာအာပ် အုဝ် ဒိုဝ်း ဒုဝ် ဘူင့် အုဝ် အီ ဘာ့ ခဲင် ဒုဝ် ဘူင့် ဇဝ် ယေဆူ၊ ဝီ ဒူပ် ယာ မာလမ်။ အာဝ် ပွိုန် ဘူင် ပါယ် တီ ဒေါ မှဝ်။ 16 တဲး ဘေ လှုဝ်း၊ အာဆေ ဒူပ် ယာ မာလမ်၊ န့ ပီ ဒုဝ် ဂါယ် အာ ဝီ ဟဲ့ ဘဲန် ဒုဝ် အူ ဘူင့်။ ခုဝ်၊ ခဲင် ဘပ် ဇဝ်ဖြာ ဟဲ့ ဒဲမ် အုန်၊ “အာ ဝီ ဒီ ဘဲန် ဒုဝ် အူ ဘူင့်။” 17 မာလဲ၊ အာဆေ တဲး ဇဝ် ယေဆူ လိုပ် ခဲင် နဝ်း အန်၊ နဝ်း ဖွိုမ် အန် ဘော နဝ်း ဖွိုမ် ဇဝ် ယေဆူ ဟဲ့ ဘဲန် အူ မျုဝ်။

18 တဲး ဘေ ဝး တဝ် မျုဝ် လာယ် လုတ့် လာယ် လာယ်။ မှာပ် ပီ ဘူင် ဒူအီ မျုဝ် ဟဝ်၊ အာဝ် ဒိုဝ် ဒုဝ် အန်။ မာလဲ၊ ဆေ ဒူအီ လာယ် လုတ့် လာယ် လာယ်၊ န့ ဒီ တဲး ဒုဝ် ဂေ လိုဝ်။ 19 ဘေ လုဝ် လှုဝ်း၊ ဒုဝ် ဘူင့် ဘေ ဟဲ့ ပီ ဟုဝ် ဇဝ်ဖြာ။ နဝ်း ဖွိုမ် ဇဝ်ဖြာ ပီ ဒွါ အန် ဒီ ဘေ ဟဲ့ ကွယ် ခဲင် ဒုဝ် ဘူင့် ဘေ။ ခုဝ်၊ အာဝ် ဟူ မုး ဘေ အီ အိုပ် ဒုဝ် ဘြိမ် ဘေ။ 20 န့ ပီ ဇဝ်ဖြာ ဟဲ့ စိုဝ်း ဒုဝ် ဘူင့် ဘေ၊ ဟဲ့ ဒွါ ငဝ်း တာင် ကာဆဝ်။ ခုဝ်၊ တဲး ပီ ဘူင် ဘေ ဘော အိူပ် မျုက် ဇဝ်ဖြာ။